ཉིན་གུང་གཉིད་ཉལ་རྒྱུ་ནི་མི་མང་པོ་ཞིག་གི་ནམ་རྒྱུན་འཚོ་བའི་ཁྲོད་ཀྱི་གོམས་གཤིས་སུ་གྱུར་ཡོད། ཞིབ་འཇུག་གསར་ཤོས་ལས་མངོན་པར། རྒྱུན་པར་ཉིན་གུང་གཉིད་ཉལ་བའི་མིའི་ཀླད་པ་ཉམས་ཚད་དེ་བས་འགོར་བ་ཡོད། འོ་ན། ཉིན་གུང་གཉིད་ཉལ་བའི་དུས་ཡུན་འཚམ་ཤོས་དེ་ག་ཚོད་ཡིན་ནམ། ཉིན་གུང་གཉིད་ཉལ་ན་དོ་སྣང་བྱེད་དགོས་ས་ག་རེ་ཡོད་དམ་ཞེ་ན།
2023ལོའི་ཟླ་4པར། ཞིབ་འཇུག་བྱས་པ་ལས་མངོན་པར། ཉིན་གུང་གཉིད་ཉལ་བའི་དུས་ཡུན་འཚམ་ཤོས་ནི་སྐར་མ་30ཡི་ནང་ཚུན་ཡིན། གང་ལགས་ཤེ་ན། ཉིན་གུང་གཉིད་མི་ཉལ་བའི་མི་དང་བསྡུར་ཚེ། གཉིད་ཉལ་བའི་དུས་ཡུན་སྐར་མ་30ལས་བརྒལ་བའི་མིའི་ལུས་པོར་བརྗེ་ཚབ་རྟགས་འདུས་ནད་འབྱུང་བའི་ཉེན་ཁ་41%མཐོ་རུ་འགྲོ་སྲིད་པ་དང་། ལྷག་པར་དུ་རྐེད་པ་དང་། དེ་བཞིན་ཁྲག་མངར་དང་ཁྲག་ཤེད་ཐད་ཀྱི་ནད་གཞི་འབྱུང་ཉེན་ཆེ་བ་ཡོད། འོན་ཀྱང་། ཉིན་གུང་གཉིད་ཉལ་བའི་དུས་ཡུན་སྐར་མ་30ལས་མི་བརྒལ་ཚེ། དེའི་ཐད་ཀྱི་བདེ་ཐང་ཉེན་ཁ་མེད་པ་མ་ཟད། ཁྲག་ཤེད་ཐད་དེ་བས་མངོན་གསལ་དོད་པོ་ཡོད། གཞན་ཡང་ཉིན་གུང་དུས་ཡུན་རིང་པོར་གཉིད་ཉལ་ན་བདེ་ཐང་ལ་གནོད་འཚེ་བཟོ་སྲིད། 2024ལོའི་ཟླ་6པར། 《ཡོ་རོབ་གླིང་གི་དབང་རྩའི་ནད་རིག་པའི་དུས་དེབ》ཐོག་གི་ཞིབ་འཇུག་ཅིག་ལས་མངོན་པར། ཁྲག་ཤེད་མཐོ་བའི་ནད་པ་ཡིན་ཚེ། ཉིན་གུང་གཉིད་ཉལ་བའི་དུས་ཡུན་དེ་སྐར་མ་30ལས་བརྒལ་མི་རུང་སྟེ། ཉལ་ཡུན་རིང་དྲགས་ན་གྲིབ་ནད་ཕོག་པའི་ཉེན་ཁ་ཇེ་ཆེར་འགྲོ་སྲིད། ཉིན་གུང་གཉིད་ཉལ་བའི་དུས་ཡུན་སྐར་མ་1ནས་30བར་ཡིན་མཁན་དང་བསྡུར་ན། གཉིད་ཉལ་བའི་དུས་ཡུན་སྐར་མ་31ནས་60བར་ཡིན་པའི་མི་དེ་དག་ལ་གྲིབ་ནད་ཕོག་པའི་ཉེན་ཁ་27%མཐོ་རུ་འགྲོ་བ་དང་། གཉིད་ཉལ་བའི་དུས་ཡུན་སྐར་མ་60ལས་བརྒལ་མཁན་ལ་གྲིབ་ནད་ཕོག་པའི་ཉེན་ཁ་37%མཐོ་རུ་འགྲོ་གི་ཡོད།
2024ལོའི་ཟླ་11ཚེས་21ཉིན།《ཚན་རིག》ཅེས་པའི་ཐོག་སྤེལ་བའི་ཞིབ་འཇུག་བྱས་འབྲས་ཤིག་ལས་མངོན་པར། གཉིད་སྐར་མ་30ཉལ་ཚེ། མིའི་ཀླད་ཆེན་གྱི་ཤེས་རྟོགས་ནུས་པ་ཆེ་རུ་འགྲོ་ཐུབ་པ་དང་ཀླད་ཆེན་གྱི་རྣམ་པ་ཡག་ཤོས་ཀྱི་ཚད་དུ་སླེབས་ཐུབ། དེས་ན། རྒྱུན་དུ་ཉིན་གུང་གཉིད་ཉལ་མཁན་གྱི་ཀླད་ཆེན་གྱི་སྤྱིའི་ཤོང་ཚད་དེ་བས་ཆེ་བ་ཡོད། དེ་ཡང་ཀླད་ཆེན་གྱི་ཤོང་ཚད་ཉམས་ཚད་ལོ་2.6~6.5བར་འགོར་དུ་ཕྱིན་པ་དང་གཅིག་མཚུངས་ཡིན།
2021ལོའི《ཕྱོགས་བསྡུས་སེམས་ཁམས་གསོ་རིག》ཅེས་པའི་ཐོག་སྤེལ་བའི་ཞིབ་འཇུག་བྱས་འབྲས་ཤིག་ལས་མངོན་པར། ཉིན་གུང་གཉིད་ན་རྒན་རྒོན་གྱི་གླེན་ནད་སྔོན་འགོག་ནུས་ལྡན་བྱེད་ཐུབ་པ་མ་ཟད། ཆོས་ཉིད་ལྡན་པའི་སྒོ་ནས་ཉིན་གུང་གཉིད་ན་བསམ་གཞིགས་ཀྱི་ཚོར་བ་རྣོན་དུ་འགྲོ་ཐུབ།
2019ལོར《སྙིང་ཁམས》ཞེས་པའི་དུས་དེབ་ཀྱི་དྲ་ཐོག་པར་གཞིའི་ཐོག་སྤེལ་བའི་ཞིབ་འཇུག་བྱས་འབྲས་ཤིག་ལས་ཤེས་ཐུབ་པར། མཚམས་རེར་ཉིན་གུང་གཉིད་ཉལ་བའི་མི(གཟའ་འཁོར་རེར་ཐེངས་1ནས་2བར་)དང་ཉིན་གུང་གཉིད་མི་ཉལ་བའི་མི་དེ་དག་བསྡུར་ཚེ། གཉིད་ཉལ་བའི་མིར་གྲིབ་ནད་དང་སྙིང་གི་ནད་གཞི་འབྱུང་བའི་ཉེན་ཁ་48%ཆུང་བ་ཡོད།
ཉིན་མོར་གཉིད་ཁྱུག་ཙམ་ཉལ་ན་སེམས་ཁམས་སྙོམས་སྒྲིག་ཐུབ་ཀྱི་ཡོད་པས། ཉིན་གུང་གཉིད་རྗེས་ཀྱི་སེམས་ཁམས་ལེགས་སུ་གཏོང་ཐུབ། 2010ལོར《སྨྱོ་ནད་རིག་པ་དང་ནད་ཐོག་དབང་རྩ་རིག་པ》ཞེས་པའི་ཐོག་སྤེལ་བའི་ཞིབ་འཇུག་བྱས་འབྲས་ཤིག་ལས་ཤེས་ཐུབ་པར། ཉིན་གུང་གཉིད་རྗེས་རིག་པ་དྭངས་གསལ་དུ་འགྲོ་ཐུབ་ཅིང་། སྤྲོ་སྣང་རྒྱས་པ་དང་སེམས་ཁམས་ལྷོད་པོར་གྱུར་ཚད་མངོན་གསལ་དོད་པོས་ཡག་པ་ཡོད་པ་རེད།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
ཀུན་ཁྱབ་འོད་སྣང་འཕྲིན་སྟེགས།
གཞན་ལ་སྐུར།
ཉར་ཚགས།
མཐེ་བོང་ནོན།
མེ་ཏོག་ནོན།
