ཀུ་ཤུ་ཁ་པར་གྱི་གཞུང་ཕྱོགས་དྲ་བས་གློ་བུར་དུ་རིན་གོང་བཅག་ནས་གོང་ཆེ་ཤོས་དེའང་སྒོར་800ཕབ་འདུག་ཟེར།
ཀུ་ཤུ་ཁ་པར་གྱི་གཞུང་ཕྱོགས་དྲ་བས་གློ་བུར་དུ་རིན་གོང་བཅག་ནས་གོང་ཆེ་ཤོས་དེའང་སྒོར་800ཕབ་འདུག་ཟེར། ཟླ་1པོའི་ཚེས་2ཉིན། པོད་ཕྲིན་ལས་ཀུ་ཤུ་ཁ་པར་གྱི་གཞུང་ཕྱོགས་དྲ་བས་གློ་བུར་དུ་རིན་གོང་བཅག་པའི་གླེང་གཞི་ཞིག་འཚོལ་བཤེར་མཐོ་ཤོས་སུ་ཆགས་ནས་ཚང་མས་དོར་ཁུར་བྱེད་བཞིན་ཡོད་པ་རེད། ལོ་གསར་པ་ཚེས་མ་ཐག་ཀུ་ཤུ་ཁ་པར་གྱི་གཞུང་ཕྱོགས་དྲ་བས་ལོ་གསར་པའི་ཚོང་སྐུལ་བྱ་འགུལ་ཆེན་མོ་ཞིག་སྤྱི་བསྒྲགས་བྱས་ཤིང་དེ་ནི་ཟླ་1པོའི་ཚེས4་དང་ཚེས་7བར་འགོ་བརྩམ་རྒྱུ་རེད།
བྱེད་སྒོའི་རིང་ཆ་རྐྱེན་ཚང་ཡོད་པའི་རིན་སྤྲོད་ལམ་ནས་དམིགས་འཛུགས་ཚོང་ཟོག་ཉོ་ཆོག་རྒྱུ་དང་། ཉོ་མཁན་རེ་རེས་ཐོན་རྫས་སྣ་རེ་རེའི་ཁྲོད་ནས་རིགས་གཉིས་རེ་ཉོས་ན་མཐོ་ཤོས་ལའང་སྒོར་800ཕྲལ་དུ་མར་གཅག་རྒྱུ་ཡོད་པ་མ་ཟད། iPhoneགསར་པ་བརྗེ་ཉོ་བྱས་ན་ད་དུང་རིན་གོང་ཕབ་པའི་གཟིགས་སྐྱོང་ཡོད་པ་རེད།
དོ་སྣང་བྱེད་དགོས་པ་ཞིག་ནི། ཀུ་ཤུ་ཡིས་Apple Storeསིལ་ཚོང་ཚོང་ཁང་ནང་ད་ཐེངས་ཀྱི་གཟིགས་སྐྱོང་བྱེད་སྒོའི་གྲས་སུ་འཇོག་ཡོད་པའི་ཚོང་ཟོག་གི་གྲངས་འབོར་ལ་ཚད་ཡོད་པ་དང་།（དེ་དག་ནིiPhoneརིགས་ཀྱི་ཚོང་ཟོག་ཁ་གྲངས་29300དང་།iPadརིགས་ཀྱི་ཚོང་ཟོག་ཁ་གྲངས་3500 Macཟིན་བྲིས་གློག་ཀླད་རིགས་ཀྱི་ཚོང་ཟོག་ཁ་གྲངས་530 Apple Watchརིགས་ཀྱི་ཚོང་ཟོག་ཁ་གྲངས་8350 AirPodsརིགས་ཀྱི་ཚོང་ཟོག་ཁ་གྲངས་2590 Apple Pencilརིགས་ཀྱི་ཚོང་ཟོག་ཁ་གྲངས་940བཅས་ཡིན།) བཙོང་ཚར་ན་མཚམས་འཇོག་རྒྱུ་ཡིན་པ་རེད།
ད་ཐེངས་ཀྱི་རིན་གོང་བཅག་པའི་ཐད་དྲ་གྲོགས་ཚོས་བསམ་འཆར་་འདྲ་མིན་སྣ་ཚོགས་བསྟན་ཡོད་དེ། མི་ལ་ལས་རིན་གོང་ཇེ་དམའ་རུ་གཏོང་ཚད་ཀྱང་ཆུང་དྲགས་པས་གློག་རྡུལ་ཚོང་སྟེགས་དེ་བས་ལེགས་ཞེས་་ངོས་འཛིན་བྱེད་ཀྱི་ཡོད་པ་དང་། ཡང་དྲ་གྲོགས་ཁ་ཤས་ཀྱིས་རང་ཉིད་ཀྱིས་ཀུ་ཤུ་གཞུང་དྲའི་ཚོང་ཟོག་ཐོན་ཁུངས་ཁོ་ནར་ཡིད་ཆེས་བྱེད་ཀྱི་ཡོད་ཅེས་བརྗོད་ཡོད།
ད་དུང་དྲ་གྲོགས་མི་ཉུང་བ་ཞིག་གིས་ཁྱོད་ཀྱིས་མ་ཉོ། ངས་ཀྱང་མ་ཉོས་ན། ཕལ་ཆེར་ད་དུང་སྒོར800ཙམ་ཆག་ཐུབ་རྒྱུ་རེད་ཅེས་བཤད། ཀུ་ཤུ་རིགས་ཀྱི་ཐོན་རྫས་ཉོས་མ་ཐག་པའི་འཛད་སྤྱོད་པ་ཁག་གཅིག་གིས་ངས་ཉོས་ནས་ཡུན་རིང་མ་སོང་བར་གྱོང་གུན་ཕོག་སོང་། རིན་གོང་གི་ཁྱད་པར་ཕྱིར་སློག་བྱེད་ཐུབ་ཀྱི་ཡོད་དམ་ཅེས་བཤད། དེ་ལ་ཀུ་ཤུ་གཞུང་ཕྱོགས་ཀྱི་སྐུ་མགྲོན་ཞབས་ཞུ་པས་གལ་ཏེ་བྱེད་སྒོ་མ་སྤེལ་གོང་གི་ཉིན་14ཡི་ནང་དུ་ཉོས་པའི་ཐོན་རྫས་ཡིན་ན། ཚོང་ཟོག་ཕྱིར་སློག་བྱས་ནས་ཉོ་ཆོག དེ་ནི་རིན་གོང་གི་ཁྱད་པར་ཕྱིར་སློག་གི་རིགས་ཤིག་ཡིན་པར་གོ་བ་ལེན་ཆོག་ཅེས་བཤད་པ་རེད།
གླེང་རིན་ཡོད་པ་ཞིག་ལ་དེ་ནི་ཀུ་ཤུ་iPhone16རབ་དང་རིམ་པ་ཁྱབ་བསྒྲགས་བྱས་ཚུན་གྱི་རིན་གོང་ཆག་པ་ཐེངས་དང་པོ་མིན། 2024ལོའི་ཟླ་11པའི་ཚེས་11གི་གློག་རྡུལ་ཚོང་དོན་དུས་ཆེན་ཁྲོད། ཀུ་ཤུ་ཁྱབ་བསྒྲགས་བྱས་ནས་ཟླ་བ་གཅིག་ལས་འགོར་མེད་པའི་iPhone 16མ་ལག་ཡོངས་ཀྱི་རིན་གོང་དམའ་རུ་ཕྱིན་པ་དང་། iPhone 16མ་ལག་ཡོངས་ལ་སྒོར་500ཡི་གོང་བདེའི་འཛིན་ཤོག་ལེན་ཆོག་པ་དང་། འཛིན་ཤོག་རྗེས་ཀྱི་རིན་གོང་སྒོར་5499ཡན་མས་ཡིན་ལ། སྒོར་500གཟིགས་སྐྱོང་བྱས་རྗེསiPhone16 Pro Maxརིན་གོང་སྒོར་9499བར་ཆག་ཡོད་པ་རེད།
འཕྲུལ་ཆས་གསར་པ་ཁྱབ་བསྒྲགས་བྱས་རྗེས་ཟླ་བ་གཅིག་ནང་རིན་གོང་སྒོར་500ཆག་པ་དང་ཟླ་བ་གསུམ་གྱི་རྗེས་སུ་སླར་ཡང་རིན་གོང་སྒོར་500ཆག་ནས་ཕྱིར་ཚོང་བྱ་རྒྱུ་དེ་ནི་ཀུ་ཤུ་ཡི་ཐོན་རྫས་གསར་པ་ཕྱིར་ཚོང་བྱེད་པའི་ཁྲོད་མཐོང་དཀོན་པའི་སྣང་ཚུལ་ཞིག་ཏུ་ཆགས་ཡོད་པ་རེད།
ཡོང་ཁུངས། སི་ཁྲོན་ལྟ་ཞིབ།
ཀུན་ཁྱབ་འོད་སྣང་འཕྲིན་སྟེགས།
གཞན་ལ་སྐུར།
ཉར་ཚགས།
མཐེ་བོང་ནོན།
མེ་ཏོག་ནོན།
