ཉེ་ཆར། བོད་ལྗོངས་གཞིས་རྩེ་གྲོང་ཁྱེར་དིང་རི་རྫོང་ལ་ས་ཡོམ་རིམ་པ་6.8བརྒྱབ་ནས་མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་ལ་གནོད་འཚེ་ཚབས་ཆེན་བཟོས་ཡོད། མིག་སྔར་ཕྱོགས་བཞི་མཚམས་བརྒྱད་དང་གོང་འོག་ཚང་མས་ཕྱར་བ་གྲུ་འདེགས་ཀྱིས་གེགས་ཁུལ་མང་ཚོགས་ལ་གང་ས་ཅི་ཐད་ནས་རོགས་སྐྱོར་བྱེད་བཞིན་མཆིས།
ཕྲན་ནི་གསར་འགྱུར་ཚན་པའི་ཆེས་སྤྱིར་བཏང་གི་འཕྲིན་སྤེལ་བ་ཞིག་ཡིན་པས། ཁ་པར་ནང་ལ་ས་ཡོམ་གྱི་སྔོན་བརྡ་ཇི་ལྟར་བཟོ་ཐབས་དང་། སྔོན་བརྡ་འབྱོར་རྗེས་ཇི་ལྟར་རང་སྲུང་བྱེད་སྟངས་སྐོར་གྱི་རྒྱུན་ཤེས་ཐུང་ངུ་འདི་ཙམ་སྤེལ་བ་ལས་གཞན་རྒྱུ་ནོར་དང་བཟའ་འཐུང་གྱོན་གོས་སོགས་ཀྱི་ཐད་ནས་གེགས་ཁུལ་མང་ཚོགས་ལ་རྔོ་ཅི་ཡང་མི་ཐོགས་པས་སེམས་ནང་བློ་འགྱོད་ཆེ་བ་ལས་མ་འདས་ཀྱང་ཡིག་ཕྲེང་ལ་བཅོལ་བའི་ལྷག་བསམ་དཀར་པོ་འདིས་གེགས་ཁུལ་མང་ཚོགས་དང་། ལྷག་པར་དུ་མ་འོངས་པར་ཕན་པའི་རྒྱུ་རུ་བསྔོ།
གཅིག ཁ་པར་ནང་ས་ཡོམ་གྱི་སྔོན་བརྡ་བཟོ་སྟངས།
དེ་ཡང་། དེང་སང་ང་ཚོ་མི་རེ་རེར་ཁ་པར་རེ་ཡོད་ཅིང་། ཁ་པར་རིགས་མི་འདྲ་བར་གཞིགས་ནས་ས་ཡོམ་གྱི་སྔོན་བརྡ་བཟོ་ཆོག་པ་གཤམ་གསལ་གྱི་བརྙན་ཐུང་ལ་གཟིགས་ན་ཤེས་ཐུབ།
གཉིས། སྐད་འཕྲིན་ནང་ས་ཡོམ་གྱི་སྔོན་བརྡ་བཟོ་སྟངས།
གོང་དུ་གླེང་བ་བཞིན་ཁ་པར་མི་འདྲ་བར་གཞིགས་ནས་ས་ཡོམ་གྱི་སྔོན་བརྡ་བཟོ་རྒྱུ་ཡོད་པའི་ཁར་ད་དུང་ང་ཚོའི་ཁ་པར་ནང་གི་སྐད་འཕྲིན་ལའང་ས་ཡོམ་གྱི་སྔོན་བརྡ་བཟོ་རྒྱུ་ཡོད་དེ།
1.སྐད་འཕྲིན་གྱི་བྱ་རིམ་ཆུང་ངུ་ཁ་ཕྱེ་སྟེ། “ཀྲུང་གོ་ས་ཡོམ་སྟེགས་བུའི་དྲ་བ་”ཞེས་པའི་བྱ་རིམ་ཆུང་ངུ་འཚོལ་བཤེར་བྱེད་དགོས།
2.ས་ཡོམ་སྔོན་བརྡ་ཞེས་པར་མནན་དགོས།
3.ས་ཡོམ་སྔོན་བརྡའི་བརྡ་ཐོ་དང་གནས་ཡུལ་ཐོབ་པར་མོས་མཐུན་བྱེད་དགོས།
གསུམ། ས་ཡོམ་གྱི་སྔོན་བརྡ་འབྱོར་ན་ཇི་ལྟར་བྱ་དགོས།
ས་ཡོམ་གྱི་སྔོན་བརྡའི་ཆ་འཕྲིན་འབྱོར་རྗེས། སྔོན་བརྡའི་ཚབས་ཆེ་ཆུང་དང་རིམ་པར་གཞིགས་ནས་མགྱོགས་མྱུར་ངང་བྱ་སྤྱོད་སྤེལ་དགོས།
1.གལ་ཏེ་སྔོན་བརྡའི་རིམ་པ་ཅུང་དམའ་བ་དང་། ས་གནས་དེ་གའི་སྔོན་དཔག་ཡོམ་ཚད་ཆུང་ན། དངངས་སྐྲག་བྱེད་མི་དགོས་ཤིང་། མཐོ་ས་ནས་དངོས་པོ་ཟགས་པར་མཉམ་འཇོག་བྱ་དགོས།
2.གལ་ཏེ་སྔོན་བརྡའི་རིམ་པ་ཅུང་མཐོ་བ་དང་། ས་གནས་དེ་གའི་སྔོན་དཔག་ཡོམ་ཚད་ཅུང་ཆེ་ན། ངེས་པར་དུ་འཕྲལ་མར་ཉེན་ཁ་ལས་གཡོལ་དགོས།
བཞི། ས་ཡོམ་རྒྱག་སྐབས། བྱ་སྤྱོད་བཞི་བློ་ལ་བརྟན་པོར་ངེས་དགོས།
1.ཐག་ཉེ་སར་གབ་དགོས། ས་ཡོམ་ཆེན་པོ་རྒྱག་སྐབས་ལམ་སེང་ཐག་ཉེ་སར་གབ་དགོས། ཁྱིམ་ཆས་མཁྲེགས་པོའམ་གྱང་གིས་ལུས་པོར་འགེབས་སྲུང་བྱས་ཏེ། སྒང་ནས་ཟགས་པའི་དངོས་པོས་ལུས་པོར་རྨས་སྐྱོན་མ་ཕོག་པ་བྱེད་དགོས།
2.དངོས་པོ་ཞིག་དམ་པོར་འཇུ་དགོས། ལྟོས་བཅས་ཀྱིས་བདེ་འཇགས་ལྡན་པའི་ཉེན་གཡོལ་དངོས་པོ་བརྙེད་ན། དཔེར་ན། ཅོག་ཙེའི་རྐང་པའམ་ཡང་ན་སྲ་ཞིང་བརྟན་པའི་དངོས་པོ་གཞན་དག་འཇུས་ནས་སྡོད་པ་ལས་འགུལ་སྐྱོད་བྱེད་མི་རུང་།
3.ལག་པ་གཅིག་གིས་ཟགས་དངོས་བཀབ་དགོས། རྒྱ་ཆེ་བའི་ས་ཆར་བྲོས་འགྲོ་སྐབས། དངོས་པོ་གང་རུང་ཞིག་གིས་མགོ་དང་མཇིང་པ་སོགས་གལ་ཆེ་སར་སྲུང་སྐྱོབ་བྱེད་དགོས། མཉམ་འཇོག་བྱེད་དགོས་པ་ཞིག་ལ་ལག་པ་གཅིག་གིས་མགོ་ཐོག་བཀབ་ན་གཟུགས་པོ་བརྟན་པོ་བྱུང་ནས་འགྱེལ་བའམ་རྨས་སྐྱོན་ཕོག་པ་སྔོན་འགོག་བྱེད་ཐུབ།
4.གོམ་ཆུང་སྤོས་ནས་མགྱོགས་པོ་འགྲོ་དགོས། མི་མང་འདུས་ས་ནས་ཕྱིར་འཐེན་བྱེད་སྐབས། གང་བྱུང་དུ་རྒྱུག་མི་རུང་ཞིང་། གོམ་ཆུང་སྤོས་ནས་མགྱོགས་པོ་འགྲོ་དགོས། དེས་ཟིང་ལངས་ནས་རྡོག་རྫིས་ཐེབས་པའི་དོན་རྐྱེན་སྔོན་འགོག་བྱེད་ཐུབ།
ལྔ། ས་ཡོམ་བརྒྱབ་ནས་བར་སྟོང་ཆུང་ངུ་ཞིག་གི་ནང་དུ་ལུས་ན་ཇི་ལྟར་བྱེད་དགོས།
1.ས་ཡོམ་རྒྱག་སར་མེ་གསོད་རུ་མི་སོགས་མི་སྐྱོབ་མཁན་སླེབས་སྐབས་ས་ངོས་ལ་བརྡུངས་ནས་སྐད་རྒྱག་གི་ཡོད་པས། གལ་སྲིད་སྐད་སྒྲ་དེ་དག་ཐོས་ན་ལམ་སེང་རྡོ་དང་ལྕགས་ཧྲེང་སོགས་ཀྱིས་གྱང་ལ་བརྡུངས་ནས་བརྡ་ལན་སྤྲོད་དགོས།
2.གལ་ཏེ་མི་སྐྱོབ་མཁན་གྱིས་མ་བརྙེད་པ་ཡིན་ན། གང་ཐུབ་ཀྱིས་ཁུ་སིམ་མེར་ཉལ་ནས་སྡོད་པ་ལས་འགུལ་སྐྱོད་བྱེད་མི་རུང་། དེ་དང་དུས་མཚུངས་དབུགས་འབྱིན་རྔུབ་བརྟན་པོ་དང་ལུས་ཤུགས་ཆེ་ཤོས་རྒྱུན་འཁྱོངས་བྱས་ནས་རོགས་སྐྱོབ་མི་སྣ་མ་སླེབས་པར་སྒུག་དགོས།
ཀུན་ཁྱབ་འོད་སྣང་འཕྲིན་སྟེགས།
གཞན་ལ་སྐུར།
ཉར་ཚགས།
མཐེ་བོང་ནོན།
མེ་ཏོག་ནོན།
