阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
酒 婆
作者：冯骥才
改写、讲述：耕雲
酒馆也分三六九等。首善街伊只小酒馆要算是顶顶末脚个一等。呒没招牌，也呒没店名，屋里向连得座位也呒没一张；柜台浪呢勿卖菜，只是摆了一缸酒。来吃酒个，侪是挑担、拉车卖苦力个底层人。有个手里捏一根酱猪肠，有个衣裳袋袋里囥仔一把五香花生，进门要二三两酒，隑勒墙角窗台独饮。碰着人轧人，就端仔酒碗到门口头，树下头一立，拿酒一眼一眼倒进嘴巴里，搿叫过过念头解解馋，其乐无穷啊！
搿只酒馆只卖一种酒，就是用山芋干酿个，价钿便宜，酒劲足。首善街养个猫从来勿会勿认得路，寻勿着自家屋里个，侪会得循牢仔酒味道回转来。搿酒勿讲后劲，只讲冲劲，进嘴巴赛过是镪水，板定要豪稍咽下去，勿然像煞会得烧烂脱舌头、嘴巴或者喖咙。但一咽到肚皮里，跟手一股劲一记头蹿上来，直冲脑门，昏昏沉沉，劲道邪气足。赛过是大年夜放个埃种炮仗“炮打灯”，点着就炸，红灯蹿天。搿酒就叫“炮打灯”。
好酒应该是口感醇厚丰满，柔和而细腻，绝对勿会敲头。但穷人们一日天苦力做下来，腰酸背痛、胸闷，就是想花铜钿勿多，吃一口马上来劲个酒，拿自家灌得昏头搭脑解脱解脱、放纵放纵。
要讲顶顶乐惠个，就要算酒婆了。每日天下半日，搿老太婆板定要到小酒馆，衣裳着得破破烂烂，赛过叫花子；头发乱蓬蓬，脸孔黑㿳㿳，呒没人看得清伊长啥样子，更呒没人晓得伊姓啥叫啥，但是侪晓得伊是迭个小酒馆个头号酒鬼，大家侪叫伊酒婆。
伊一进门，总归是从袋袋里挖出一只四四方方小布包，解开布包，里向是只申报纸包成功个包，报纸有辰光新有辰光旧；解开报纸，又是只绵纸包，倒像煞里向包仔一只翡翠别针；再解开绵纸，原来只是两角洋钿！伊拿钞票厾勒柜台浪，老板照例拿大半碗“炮打灯”递过去，伊呢，接过酒碗，高高举起来，头颈一仰，碗底一翻，咕噜噜酒就灌到肚皮里，赛过是倒进酒桶。搿老太婆一跨出门槛，两只脚就像煞勒地浪画天书了。
一路浪向伊东倒西歪朝北跑，跑过去一百多步远个地界，是只十字路口，此地车来车往，常庄出事体。侬还真用勿着搭伊担心，伊出门个辰光看上去烂醉如泥，但是每趟到路口，定规会得一记头醒转来！竟然搭常人一样，呒没半点醉意，好端端个穿过马路。伊每日侪是迭能，从来呒没出啥事体。首善街浪个人家，顶顶欢喜看酒婆搿种醉醺醺个样子：扭法扭法，东倒西歪，笃悠悠赛过是只活神仙，又像一片随风摇摆个荷叶；碰着落雨天，雨点淋身，赛过是一把慢慢转动个大伞了……但是为啥酒婆一到路口就呒没一眼醉意呢？是因为“炮打灯”就迭能介一眼劲头，还是酒婆有超人个本事讲醉就醉、讲醒就醒？
就是搿日，酒婆来到迭家小酒馆，进门还是摸出布包来，一层层解开，花铜钿买酒，头颈一仰，举起手张开嘴巴，拿改假为真个“炮打灯”灌进肚皮里……真货色就是真货色。搿趟酒婆还呒没出门，人就混淘淘了。而且今朝伊一路浪摇晃得格外好看，上身左摇，下身右摇，越转越快，一开始赛过风中个大鹏鸟，后首来竟然像一只黑洞洞个大旋涡！首善街个人觉着老奇怪，也有眼摸勿着头脑，呒没多少辰光，酒婆已到路口，酒竟然呒没醒，破天荒一记头转到大马路浪，挨下来个惨事就勿讲了……
从此，迭条街浪就呒没了酒婆。小酒馆里个客人却常庄牵记起伊来。讲只有酒婆再能够算得上够格个酒鬼。伊吃酒用勿着搭酒菜，总归是端起酒杯一口闷，勿是嘴巴馋，只是要伊个一股酒劲。勒酒馆既勿多事，也呒没闲话，交铜钿吃酒，吃光就跑，从来呒没欠过账。真正个酒鬼，侪是迭能自得其乐，勿去打搅别人。
老板耳朵听勒海，辣末生头想着，酒婆出事体埃个一日，勿正是自家呒没往酒里炝假个伊个一日末？原来祸根竟勒自家身浪！伊觉着邪气胸闷，心想搿世界浪向个道理真是讲勿清道勿明了。到底骗人勿对，还是诚实勿对？为啥几十年拿假酒骗人，却相安无事， 外加侪吃得老开心，偏生认真起来反倒出事体了呢？
来源：上海言话讲起来
我知道你在看哟~
