ཟླ་11ཚེས་15ཉིན་ནས་ཚེས་17ཉིན་བར། “2024ACEཨ་ཤེ་ཡའི་བཟའ་བཏུང་འགྲེམས་ཚོགས་དང་ཨ་ཤེ་ཡའི་གཡོས་སྦྱོར་འགྲན་བསྡུར་ཆེན་མོ” ཧྲན་ཏུང་ཅི་ནན་དུ་སྤེལ་འགོ་ཚུགས་ཡོད། གཞིས་རྩེ་གྲོང་ཁྱེར་ལག་རྩལ་ལས་རིགས་སློབ་གྲྭའི་དགེ་རྒན་ཀུན་བཟང་དབང་རྒྱལ་གྱིས་བཟོས་པའི《བཀྲ་ཤིས་ནས་ཀྱི་བང་ཕིག》ལ་འགྲན་བསྡུར་ཆེན་མོའི་ཐོག“ཨ་ཤེ་ཡའི་གསེར་གྱི་བྱ་དགའ”ཐོབ་འདུག
སྐབས་འདིའི་ཨ་ཤེ་ཡའི་གཡོས་སྦྱོར་འགྲེམས་ཚོགས་ཀྱིས་ཨ་རི་དང་འཇར་མན། སོ་ཏི་ཨ་རབ། པར་ཙིར། ཨུ་རུ་སུ། ལྗར་པན། ལྷོ་ཁོ་རེ་ཡ་སོགས་རྒྱལ་ཁབ་དང་ས་ཁུལ་བཅུ་ལྷག་ཙམ་འགྲེམས་སྟོན་དང་ཚོགས་འདུ། འགྲན་བསྡུར་བཅས་ཀྱི་ནང་ཞུགས་རྒྱུའི་ཡིད་དབང་བཀུག་ཡོད། རྒྱལ་ཁབ་དང་ས་ཁུལ་མང་པོ་ནས་ཡོང་བའི་འཐུས་མི་རུ་ཁག་40ཡི་འགྲན་ཞུགས་པ་500ལྷག་གིས་འགྲན་བསྡུར་ནང་རང་སོའི་འཇོན་ཐང་ངོམས་ཡོད།
བང་ཕིག་ནི་བོད་སྲན་གྱིས་བཟོས་པའི་གཞིས་རྩེའི་འཐུབ་ཚབ་རང་བཞིན་ལྡན་པའི་ཁྱད་ལྡན་སིལ་ཟས་ཤིག་ཡིན་ཞིང་། མང་ཚོགས་ཀྱིས་ཧ་ཅང་དགའ་པོ་བྱེད་ཀྱི་ཡོད། 2009ལོར། བང་ཕིག་བཟོ་རྩལ་དེ་བོད་རང་སྐྱོང་ལྗོངས་ཀྱི་ཁག་གསུམ་པའི་མངོན་མིན་རིག་གནས་ཤུལ་བཞག་གི་མིང་གཞུང་ནང་ཚུད་ཡོད།
འགྲན་བསྡུར་ཆེན་མོའི་ནང་། ཀུན་བཟང་དབང་རྒྱལ་གྱིས་སྲོལ་རྒྱུན་གྱི་བང་ཕིག་བཟོ་སྟངས་རྨང་གཞིར་བྱས་ཐོག་དེར་ནས་རྒྱུ་མཉམ་འདྲེས་བྱས་ནས་གཞིས་རྩེའི་ས་གནས་དེ་གའི་ཁྱད་ཆོས་ལྡན་པའི་ཞིམ་ཟས《བཀྲ་ཤིས་ནས་ཀྱི་བང་ཕིག》བཟོས་ཡོད་པ་དང་། དེར་ཆེད་མཁས་པའི་དཔྱད་འདེམས་པ་དང་ཚོགས་ཞུགས་ལས་རིགས་གཅིག་པའི་མི་སྣའི་ཁས་ལེན་ཐོབ་ཡོད།
གཞིས་རྩེ་གྲོང་ཁྱེར་ལག་རྩལ་ལས་རིགས་སློབ་གྲྭའི་སློབ་སྤྱི་ལུའོ་ཤིན་གྱིས། སློབ་གྲྭས་ཆེད་ལས་ཁག་འཛུགས་སྐྱོང་དང་འཕེལ་རྒྱས་ལ་ཤུགས་སྣོན་ཟམ་མི་ཆད་པར་བརྒྱབ་ནས། སྤྱི་ཚོགས་དང་ཁེ་ལས་ལ་མཁོ་བའི་བྱང་ཚད་མཐོ་བ་དང་རྩལ་ནུས་ཆེ་བའི་ཆེད་ལས་རྩལ་ནུས་མི་སྣ་སྔར་བས་མང་བ་གསོ་སྐྱོང་བྱ་རྒྱུ་ཡིན་ཞེས་གསུངས་འདུག
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
