རྐ་ཕུག་བསོད་རྡོའི་གློག་བརྙན་འཕྲིན་བརྩམས་ཆོས༼ནར་སོན་གྱི་ལོ་ཟླ༽ལ་འཛམ་གླིང་བྱིས་པའི་གློག་བརྙན་ལོ་ཚོགས་སྐབས་གཉིས་པའི་སྟེང་བྱ་དགའ་ཐོབ།
༢༠༢༤ལོའི་ཟླ་༡༡པའི་ཚེས་༢༩ཉིན་ནས་ཟླ་༡༢པའི་ཚེས་༡ཉིན་བར། འཛམ་གླིང་བྱིས་པའི་གློག་བརྙན་ལོ་ཚོགས་སྐབས་གཉིས་པའི་ཕུལ་བྱུང་གློག་བརྙན་བརྩམས་ཆོས་དཔྱད་བསྡུར་དང་བྱ་དགའ་གནང་བའི་མཛད་སྒོ་ཐེན་ཅིན་དགེ་འོས་སློབ་ཆེན་དུ་བསྡུས།
ལོ་ཚོགས་འདི་ནི་བྱིས་པའི་གློག་བརྙན་ཁྱབ་ཁོངས་ཀྱི་འདུ་འཛོམས་གཟབ་རྒྱས་ཤིག་ཡིན་ལ། མཛེས་དཔྱོད་སློབ་གསོའི་སྦྱོར་བ་ལ་བརྟེན་ནས་དུས་རབས་གསར་བའི་དོན་དངོས་དང་མ་འོངས་པར་ཁ་ཕྱོགས་པའི་བྱིས་པའི་གློག་བརྙན་སློབ་གསོ་ཞེས་པ་བརྗོད་བྱ་གཙོ་བོར་བཟུང་བའི་འཛམ་གླིང་གི་བྱིས་པའི་ལོ་ཚོགས་ཤིག་ཡིན་ཞིང་། རྒྱལ་ཁབ་ཕྱི་ནང་གི་གློག་བརྙན་ལས་རིགས་ཀྱི་འགོ་ཁྲིད་དང་། ཆིན་ཧྭ་སློབ་ཆེན་དང་པེ་ཅིང་སློབ་ཆེན་སོགས་རྒྱལ་ནང་གི་སློབ་ཆེན་གྲགས་ཅན་༣༠ལྷག་གི་ཆེད་མཁས་པ་དང་། གློག་བརྙན་འཁྲབ་ཁྲིད་པ་དང་འཁྲབ་གཞུང་རྩོམ་པ་པོ། འཁྲབ་སྟོན་པ་གྲགས་ཅན་༡༧༠ལྷག་གདན་ཐོག་གཅིག་ཏུ་འཛོམས་ཏེ་འཛམ་གླིང་བྱིས་པའི་གློག་བརྙན་སྐོར་ནས་བགྲོ་གླེང་བྱས་ཏེ་༢༠༢༠ལོ་ནས་༢༠༢༤ལོའི་བར་གྱི་ཕུལ་བྱུང་བྱིས་པའི་གློག་བརྙན་བརྩམས་ཆོས་དག་ལ་བྱ་དགའ་གནང་།
ལོ་ཚོགས་ཀྱིས་བརྩམས་ཆོས་ནང་དུ་གཏམ་རྒྱུད་ཟློས་གར་གྱི་ཚན་པ་དང་། ཟིན་ཐོ་དང་འགུལ་རིས་ཚན་པ། གྲངས་སྒྱུར་སྨྱན་སྦྱོར། བརྙན་ཐུང་དང་ཟློས་གར་ཐུང་ངུ་སོགས་ཚན་པ་མང་པོ་སྒྲིག་འཛུགས་བྱས་ཡོད། དཔྱད་འདེམས་ཚོགས་པས་སྒྱུ་རྩལ་རང་བཞིན་དང་། སློབ་གསོའི་རིན་ཐང་། སྤྱི་ཚོགས་ཀྱི་ཤུགས་རྐྱེན་ཐེབས་ནུས་སོགས་སྣ་མང་ཕྱོགས་བསྡུས་ལ་གཞིགས་ཏེ་དཔྱད་བསྡུར་གཏན་འབེབས་བྱས་ཤིང་། དཔྱད་འདེམས་བྱས་འབྲས་དོན་དངོས་དང་མཐུན་ཞིང་དྲང་གཞག་ཡོང་བར་འགན་ལེན་བྱས། དཔྱད་བསྡུར་བརྒྱུད།རྒྱལ་ཁབ་ཕྱི་ནང་གི་ཕུལ་བྱུང་བརྩམས་ཆོས་མང་པོའི་ཁྲོད་དུ་མཚོ་ནུབ་ཁུལ་མཉམ་འདྲེས་འཕྲིན་སྦྱོར་ལྟེ་གནས་དང་སེ་འབྲུའི་གློག་བརྙན་འཕྲིན་ལས་སྒྲུབ་ཁང་གིས་ཕབ་སྐྲུན་བྱས་པ་དང་། རྒན་རྡོ་རྗེ་སྒྲོལ་མ་དང་དོན་འགྲུབ་ཚེ་རིང་གིས་བརྙན་སྐྲུན་གྱི་འགན་ཁུར་ཞིང་། བོད་ཀྱི་ཕུལ་བྱུང་ན་གཞོན་འཁྲབ་ཁྲིད་པ་རྐ་ཕུག་བསོད་རྡོས་འཁྲབ་གཞུང་དང་འཁྲབ་ཁྲིད།སྒྲིག་སྦྱོར་སོགས་ཀྱི་འགན་གཅིག་ལྕོགས་སུ་ཁུར་བའི་ཁྲིམས་ལུགས་དང་སློབ་གསོའི་སྐོར་གྱི་བྱིས་པའི་ཟློར་གར༼ནར་སོན་གྱི་ལོ་ཟླ༽ལ་སྤྱི་ཚོགས་དཔྱད་བསྡུར་གྱི་ཟློས་གར་ཚན་པ་རུ་བྱ་དགའ་ཨང་གསུམ་པ་ཐོབ།
བྱིས་པའི་གློག་བརྙན་ཟློས་གར༼ནར་སོན་གྱི་ལོ་ཟླ༽ནི་མིའི་རིགས་ཀྱི་ལས་དབང་གཞི་གཅིག་ཅན་གྱི་བྱ་གཞག་སྟེ། ང་ཚོ་ངེས་པར་དུ་བརྒྱུད་དགོས་པའི་སློབ་གསོའི་ཁོར་ཡུག་གསུམ་གྱི་གཏམ་རྒྱུད་ཁྲོད། སློབ་གསོའི་ཁོར་ཡུག་གང་ཞིག་གིས་མི་ཚེའི་ནར་སོན་གྱི་ལོ་ཟླ་ལ་གཙེས་པའི་སྐྱོ་གར་དང་། ཕུགས་འདུན་ལམ་ཁའི་ཁྲོད་འཕྲད་པའི་མངར་སྐྱུར་ཚ་གསུམ་གྱི་གཏམ་རྒྱུད་བརྗོད་ཡོད།
རྒྱུས་ལོན་པ་ལྟར་ན། བརྙན་འཕྲིན་ཟློས་གར་འདི་ནི་ཉིས་སྟོང་ཉི་ཤུའི་ལོར། རྒྱལ་ཁབ་རྒྱང་སྒྲོག་བརྙན་འཕྲིན་སྤྱི་ཁྱབ་ཅུའུ་ནས་ཞིབ་བཤེར་ཆོག་མཆན་བརྒྱུད་དེ་ལག་རྟགས་ཆ་ཚང་ཐོབ་པའི་རྒྱལ་ཡོངས་ཀྱི་སྐབས་ཐོག་མའི་བོད་སྐད་མུ་འབྲེལ་གློག་བརྙན་འཕྲིན་ཟློས་གར་ཡིན་ལ། རྐ་ཕུག་བསོད་རྡོའི་བོད་ཁུལ་གྱི་ལོ་ཟླ་གླེང་བའི་མུ་འབྲེལ་བརྩམས་ཆོས་གསུམ་ཁྲོད་ཀྱི་གཅིག་ཡིན།
ཡོང་ཁུངས། མཚོ་ནུབ་ཁུལ་འཕྲིན་སྦྱོར་ཀུན་འདུས་ལྟེ་གནས།
རྩོམ་སྒྲིག་པ། ལྷ་མོ་འཚོ།
རྩོམ་སྒྲིག་འགན་ཁུར་པ། བསོད་ནམས་ཚེ་རིང་།
གཡང་འབུམ་རྒྱལ།
དོ་དམ་པ། བསོད་ནམས་དོན་འགྲུབ།
ལྟ་སྐུལ་པ། ཕྱུག་ལོ།
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
