ནགས་ཚལ་ཀུན་ཏུ་དགའ་བའི་གཏམ། ཀུན་མཁྱེན་ཀློང་ཆེན་རབ་འབྱམས་ཀྱིས་མཛད།

文化 2024-12-03 16:06 青海

ནགས་ཚལ་ཀུན་ཏུ་དགའ་བའི་གཏམ།

ཀུན་མཁྱེན་ཀློང་ཆེན་རབ་འབྱམས་ཀྱིས་མཛད།

རྒྱ་གར་སྐད་དུ། སཱ་ན་ཨཱ་ནནྟ་བཱ་ཏི། བོད་སྐད་དུ། ནགས་ཚལ་ཀུན་ཏུ་དགའ་བའི་གཏམ། བླ་མ་དང་དཀོན་མཆོག་གསུམ་ལ་ཕྱག་འཚལ་ལོ། །གང་སྐུའི་ནགས་འདབས་ཞི་བའི་མེ་ཏོག་གསར་པ་ཅན། །ཐུགས་རྗེས་བསིལ་བའི་ཟླ་འོད་དང་བཅས་ཉམས་དགའ་བ། །ཡུན་རིང་དུབ་པའི་སྐྱེ་བོ་ངལ་གསོའི་སྨན་གཅིག་པུ། །སྔོན་མེད་ནགས་ཚལ་རྨད་དུ་བྱུང་ལ་ཕྱག་འཚལ་ལོ། །སྲིད་པའི་གྲོང་ལ་བདག་གི་ཡིད་སྐྱོ་ནས། །ཞི་བའི་ནགས་འདབས་བསྟེན་པའི་གཏམ་འདི་ནི། །སྙིང་ནས་ཆོས་ཀྱི་ལམ་ལ་འབད་པའི་རིགས། །སེམས་ཀྱིས་སེམས་ལ་ནང་དུ་ཕྲིན་འདི་ཞུ། །ཚེ་འདི་མི་རྟག་མྱུར་དུ་འཇིགས་འགྱུར་ཞིང་། །གཅེས་པར་གསོས་པའི་ལུས་ཀྱང་བཞག་ནས་ནི། །ཆ་མེད་ཡུལ་དུ་གཅིག་པུར་འགྲོ་དགོས་པས། །འདི་དོན་མཐོང་ནས་ད་ནི་ནགས་སུ་འགྲོ། །གང་གིས་གཡེངས་ན་ཐར་པའི་ལམ་སྟོར་ཞིང་། །འཁོར་བའི་སྡུག་བསྔལ་འཕེལ་བའི་རྒྱུ་གཅིག་པུ། །རྣམ་པར་རྟོག་པའི་རིམས་ནད་འདི་མཐོང་ནས། །སྐྱེ་མེད་ཞི་བའི་ནགས་འདབས་བསྟེན་དུ་འགྲོ། །འདུ་འཛིའི་གྲོང་ཁྱེར་འདོད་པའི་མེ་འོབས་ཅན། །སྲིད་པའི་རིམས་ནད་དྲག་པོས་རབ་གཟིར་ནས། ། སླར་ཡང་སྲིད་པའི་གཅོང་རོང་འཁྱམས་གྱུར་པ། །འདི་དོན་མཐོང་ནས་ད་ནི་ནགས་སུ་འགྲོ། །སྲིད་པའི་སེམས་ཅན་ཉོན་མོངས་ཀྱིས་གཙེས་པ། །གཟུང་འཛིན་འཇིགས་ཆེན་འཆིང་བས་བཅིངས་པ་ཀུན། །ཕ་མར་མ་གྱུར་མེད་པས་དེ་ཡི་ཕྱིར། །འགྲོ་སྒྲོལ་སླད་དུ་ངེས་པར་ནགས་སུ་འགྲོ། །

འདི་ལྟར་ཕྱི་རོལ་ཡུལ་ལ་ཕར་བལྟས་པས། །གང་ཡང་མི་རྟག་ནམ་ཡང་ཡིད་བརྟན་མེད། །སྟོན་ཀའི་སྤྲིན་ལྟར་གཡོ་བ་མཐོང་ནས་ནི། །ཞི་བའི་ནགས་སུ་སྙིང་ནས་ངེས་པར་འགྲོ། །གནའ་དུས་བཟང་པོའི་ཉི་མ་ནུབ་གྱུར་ཅིང་། །དེང་སང་སྐྱེ་བོ་ངན་པའི་ཟླ་ཤར་བས། །སྡིག་སྤྱོད་བདུད་སྡེའི་མུན་པས་ཕྱོགས་རྣམས་ཁྱབ། །འདི་དོན་མཐོང་ནས་ད་ནི་ནགས་སུ་འགྲོ། །སྐྱེ་བོ་རྣམས་ཀྱང་ཤིན་ཏུ་བསྟེན་དཀའ་སྟེ། །ལེགས་ན་མི་འདྲེན་ཉེས་ན་རྒྱུན་ཏུ་འདྲེན།།ཅུང་ཟད་ཙམ་ལའང་རྣམ་འགྱུར་སྣ་ཚོགས་འབྱིན། །ཇི་ལྟར་བྱས་ཀྱང་མགུ་བར་མི་འགྱུར་གྱི། །ད་ནི་མི་སྡོད་ནགས་ཀྱི་ནང་དུ་འགྲོ། །རང་གི་སེམས་ཀྱིས་རང་སེམས་མ་ཟིན་ན། །གཞན་གྱིས་སེམས་འཛིན་ཁ་ལོ་མི་བསྒྱུར་གྱི། །རང་གི་སེམས་ལ་གྲོས་ཆེན་གདབ་པའི་ཕྱིར། །མི་སྡོད་ནགས་ཀྱི་ནང་དུ་ངེས་པར་འགྲོ། །བྱིས་དང་འགྲོགས་ན་དགེ་བ་འགྲིབ་འགྱུར་ཞིང་། །མི་དགེ་བ་ཞིག་ཅེས་ཀྱང་ངེས་པར་འབྱུང་། །བདག་ནི་དགེ་བ་འབའ་ཞིག་སྤྱོད་པའི་ཕྱིར། །དེ་རིང་ཉིད་ནས་ངེས་པར་ནགས་སུ་འགྲོ། །དེང་སང་སྐྱེ་བོ་རྣམས་དང་འགྲོགས་པ་ན། །ཡུད་ཙམ་ཉིད་ལ་བཤེས་སུ་འཛིན་བྱེད་ཅིང་། །སྐད་ཅིག་ཙམ་གྱིས་དགྲ་བཞིན་ཟུངས་མི་ཐུབ། །དེས་ན་མི་སྡོད་ནགས་ཀྱི་ནང་དུ་འགྲོ། །ཀྱེ་མ་དེང་སང་ཐུབ་པའི་བསྟན་པ་ཡང་། །ནུབ་རིའི་རྩེ་མོར་ནུབ་ལ་ཉེ་བར་གྱུར། །འདི་ཉིད་ནུབ་ན་དམ་ཆོས་སེང་གེའི་སྒྲ། །ཕྱིན་ཆད་འབྱུང་བ་མེད་ཀྱི་ནགས་སུ་འགྲོ། །ལེགས་པར་བཤད་ན་དོན་དུ་གཉེར་བ་མེད། །ཉེས་པར་བཤད་ན་དམ་པའི་ཆོས་དང་འགལ། །རྒྱལ་བས་སེམས་ཅན་མགུ་བྱ་མ་གཏོགས་པ། །ཐབས་གཞན་མེད་ཅེས་གསུངས་པ་དེ་བཟུང་ནས། །ཆོས་ལམ་བཤད་ན་ཀུན་གྱིས་དགྲ་བཞིན་ བརྙས། །ཅི་སྟེ་ཆོས་མིན་བཤད་ན་དེང་སང་དུས། །སེམས་ཅན་མགུ་ཡང་ངན་སོང་རྒྱུར་འགྱུར་བས། །ཇི་ལྟར་བགྱིད་པ་བདག་གིས་མ་འཚལ་བས། །དེ་དོན་མཐོང་ནས་སེམས་ཅན་དོན་སྒྲུབ་ཕྱིར། །མི་སྡོད་མི་སྡོད་ད་ནི་ནགས་སུ་འགྲོ། །དུལ་བའི་ལུས་མཛེས་བསླབ་གསུམ་འདབ་གཤོག་ཅན། །ཐོས་བསམ་པདྨོའི་མཚོར་འཇུག་སྐྱེས་བུ་ཡང་། །ནོར་མེད་ཚེ་ན་ཀུན་གྱིས་བརྙས་ཤིང་འདོར། །ཆོས་མིན་སྡིག་སྤྱོད་འབྱོར་རྣམས་ལྷ་བཞིན་བཀུར། །དམ་པ་བས་ཀྱང་བླུན་པོ་བྲིན་པའི་དུས། །དིང་སང་དུས་འདི་མཐོང་ནས་ནགས་སུ་འགྲོ། །གང་ལ་བལྟས་ཀྱང་དངོས་པོའི་རྩོལ་བ་ལས། །ཆོས་ལམ་སྒྲུབ་པ་ཉིན་མོའི་སྐར་མ་ཙམ། །འདི་དོན་མཐོང་ནས་དམ་ཆོས་སྒྲུབ་པའི་ཕྱིར། །ད་ནི་མི་སྡོད་ནགས་ཀྱི་ནང་དུ་འགྲོ།

།གང་དུ་བསམས་ཀྱང་འདུ་འཛི་གཉེར་བ་ལས། །ཆོས་བཞིན་སྐྱོང་བ་བརྒྱ་ལམ་རེས་འགའ་ཙམ། །ཆོས་བཞིན་སྤྱོད་ལ་བརྙས་ཤིང་ཁྱད་དུ་གསོད། །དེས་ཀྱང་མི་སྡོད་ནགས་ཀྱི་ནང་དུ་འགྲོ། །རང་གིས་རང་ལ་ནང་དུ་བལྟས་པས་ཀྱང་། །ཉིན་མཚན་མི་སྡོད་ཚེ་འདི་མྱུར་དུ་འཇིག །ལེ་ལོས་དུས་ཀུན་དགེ་བའི་ཕྱོགས་བཅོམ་ཞིང་། །ཅུང་ཟད་ཙམ་ཡང་སེམས་འདི་མི་གནས་པའི། །དོན་འདི་མཐོང་ནས་ད་ནི་ནགས་སུ་འགྲོ། །བསྟོད་ན་དགའ་ཞིང་སྨད་ན་མི་དགའ་སོགས། །འཇིག་རྟེན་ཆོས་བརྒྱད་འདི་ལ་གཡེངས་བས་ན། །ཆོས་བཞིན་སྤྱད་ཀྱང་ཚེ་འདིའི་དབང་དུ་སོང་། །ད་ནི་མི་སྡོད་ནགས་ཀྱི་ནང་དུ་འགྲོ། ཁ་སོང་ཕན་ཆད་དགའ་བདེ་སྤྱད་པ་ཡི། །ལོངས་སྤྱོད་དེ་ཀུན་མདང་སུམ་རྨི་ལམ་བཞིན། །ཐེངས་འགའ་དྲན་པའི་ཡུལ་དུ་གྱུར་ན་ཡང་། །སྙིང་པོ་མེད་པར་མཐོང་ནས་ནགས་སུ་འགྲོ། །འདོད་པ་རྣམས་ནི་མྱང་ཡང་ཆོག་ཤེས་མེད། །བདག་ཉིད་སྐྱེས་ནས་ད་ལྟའི་བར་དག་ཏུ། །བདེ་བར་སྤྱད་པ་ཅི་ཙམ་མྱོང་གྱུར་ཀྱང་། །སླར་ཡང་མི་ཚིམ་འདོད་ལ་སེམས་ཆགས་པ། །འདི་འདྲས་ཚེ་འདིའི་བདེ་བ་མི་འགྲུབ་ནའང་། །ཚེ་རབས་ཀུན་ཏུ་ཕན་པ་སྒྲུབ་འདོད་པའི། །མྱ་ངན་འདས་པ་བདག་གིས་ཇི་ལྟར་ཐོབ། །ད་ནི་འདོད་པའི་ལམ་ཡང་དེས་ཆོག་གི། །སྙིང་ཁྱོད་དེ་རིང་ཉིད་ནས་ཆེར་གྱིས་ལ། །འདོད་པ་སྤོངས་ལ་ནགས་ཀྱི་ནང་དུ་སོང་། །ཇི་ལྟར་བསམས་ཀྱང་ཕན་པ་མི་གདའ་བས། །རང་གི་སེམས་ལ་བལྟ་བ་གོམས་པའི་ཕྱིར། །དེ་རིང་ཉིད་ནས་ནགས་ཀྱི་ནང་དག་ཏུ། །སེམས་ཁྱོད་གཏན་གྱི་བདེ་བ་སྒྲུབ་ཏུ་སོང་། །བདག་ནི་མལ་གྱི་ཐ་མ་དེར་འདུག་ནས། །ཐམས་ཅད་བོར་ནས་གཅིག་པུར་འགྲོ་དགོས་པ། །རིང་པོར་མི་ཐོགས་ངེས་པར་འབྱུང་འགྱུར་གྱི། །ད་ལྟ་ཉིད་དུ་ནགས་ཀྱི་ནང་དུ་སོང་། །དེང་སང་དུས་འདི་ཤིན་ཏུ་སྙིགས་པས་ན། །བདག་འདྲའི་བཤད་ཀྱང་གཞན་ལ་ཕན་པ་མེད། །མ་འོངས་བསྐལ་པར་ཕན་པའི་སྨོན་ལམ་འདེབས། །དེས་ན་མི་སྡོད་ནགས་སུ་སྒོམ་དུ་འགྲོ །

རང་ལའང་མི་ཕན་གཞན་ལའང་མི་ཕན་པའི། །དོན་འདི་ཐོངས་ལ་སེམས་ཁྱོད་དེ་རིང་ཉིད། །ངེས་པར་རང་ལ་ཕན་པ་སྒྲུབ་པའི་ཕྱིར། །ནགས་སུ་སེམས་ཉིད་དོན་ལ་སྒོམ་དུ་སོང་། །ཕྱིས་ནས་གཞན་ཕན་འབྱུང་བའི་གནས་ཐོབ་དུས། །རང་དོན་སྐད་ཅིག་ཙམ་ཡང་མི་སེམས་ཡས། །གཞན་དོན་དུང་ཕྱུར་མང་པོར་རབ་སྒྲུབ་པའི། །སྨོན་ལམ་བཟང་པོ་སྙིང་ནས་ངེས་པར་འདེབས། །ད་ལྟ་སྙིང་ལ་སེམས་ཤིག་ཡོད་གྱུར་ན། །མ་སྡོད་ནགས་ཀྱི་ནང་དུ་སྒོམ་དུ་སོང་། །བདག་ལས་དམན་པས་ཐོས་པར་མཛད་པ་དང་། །ལྷག་པར་སངས་རྒྱས་བསྟན་པ་འཛིན་པའི་ཕྱིར། །བསྟན་པའི་སྙིང་པོ་འཆད་ཉན་གཙོ་བོར་མཛོད། །དེས་ནི་ཐུབ་པའི་བསྟན་པ་རྒྱས་པ་དང་། །རང་གི་སེམས་ལ་བློ་གྲོས་འཕེལ་བར་གྱུར། །གང་ལ་བསམས་ཀྱང་མི་རྟག་སྙིང་པོ་མེད། །འདུས་བྱས་དངོས་པོ་བཟང་ཡང་ངེས་པར་འཇིག །འདི་དོན་མཐོང་ནས་འཇིག་མེད་སྙིང་པོའི་དོན། །བསླུ་མེད་སེམས་ཀྱི་དམ་པ་འཚོལ་དུ་འགྲོ། །ཐུབ་པས་ཆོས་ཀྱི་ཕུང་པོ་ཇི་སྙེད་གསུངས། །དེ་ཀུན་དོན་ཡང་འདོད་པ་སྤོང་པ་དང་། །ཞི་བའི་དོན་ལ་མཉམ་པར་འཇོག་པ་ལས། །གཞན་ནི་གསུངས་པ་མེད་ཀྱི་སེམས་ཁྱོད་ཀྱིས། །འཆི་བ་སོམས་ལ་ངེས་པར་ནགས་སུ་སོང་། །ནགས་ནི་རྒྱལ་བ་རྣམས་ཀྱིས་ཀུན་ནས་བསྔགས། །འདོད་པ་ཆུང་ཞིང་ཆོག་ཤེས་ལྡན་པ་ཡི། །སྐྱེ་བོ་རྣམས་ཀྱང་ནགས་སུ་གནས་པར་མཛད། །ད་ལྟ་རྟོག་པ་མི་བརྟན་དུས་འདི་ན། །སེམས་ནི་ནང་དུ་འཇོག་པ་གཙོ་བོ་སྟེ། །དེ་ཡང་མང་པོའི་དབུས་སུ་ཡུལ་ལ་འཕྲོ། །སྐད་ཅིག་ཙམ་ཡང་གནས་པ་མ་ལགས་ཤིང་། །ལེགས་པར་བསྲུངས་ཀྱང་ཉོན་མོངས་རྗེས་སུ་འབྲང་། །དེས་ཀྱང་མ་སྡོད་ནགས་སུ་སྒོམ་དུ་འགྲོ། །ཆོས་རྣམས་རང་བཞིན་གོ་ཡང་དྲན་པ་ཡི། །ཡུལ་དུ་ལུས་ན་དེ་ལ་ཕན་པ་མེད། །ཆོས་ཀྱི་རང་བཞིན་བློ་ལ་གོམས་པའི་ཕྱིར། །མི་སྡོད་ནགས་ཀྱི་ནང་དུ་འགྲོ་དགོས་སོ། །ནགས་ནི་རྣམ་གཡེང་འདུ་འཛི་ངང་གིས་ཆུང་། །འཇིགས་དང་འཚེ་བའི་སྡུག་བསྔལ་ཀུན་དང་བྲལ། །མཐོ་རིས་གྲོང་གི་དགའ་བས་ཆེས་ལྷག་པའི། །ཞི་བའི་ནགས་སུ་དེ་རིང་སྤྲོ་བར་མཛོད། །ཀྱེ་མ་སེམས་ཁྱོད་ནགས་ཀྱི་ཡོན་ཏན་ཉོན། །རྒྱལ་བ་མཆོད་འོས་རིན་ཆེན་ལྗོན་ཤིང་རྣམས།།འབྲས་བུ་དུད་ནས་ནགས་ན་ལེགས་པར་འཁྲུངས། །ལོ་མ་མེ་ཏོག་དྲི་ཞིམ་ཁ་ཕྱེ་ཞིང་། །སྤོས་ཀྱི་བསུང་དང་བསིལ་བུའི་ངད་ཀྱང་ལྡང་། །ཕུ་ཆུའི་རྫ་རྔ་སྙན་པའི་སྒྲ་འབྱིན་ཞིང་། །ཟླ་བ་བསིལ་བས་ཁྱབ་པའི་སྐེད་ངོས་ནི། །ཆུ་འཛིན་སྟུག་པོའི་གོས་ཀྱིས་གཡོགས་པར་གྱུར། །དེ་ན་རྒྱུ་སྐར་ཚོགས་ཀྱིས་ཡོངས་རྫོགས་མཛེས། །དྲི་ཞིམ་རྫིང་བུ་ངང་མོའི་ཁྱུ་ལྡིང་ཞིང་། །བྱ་དང་རི་དྭགས་མང་པོ་བདེ་བར་རྒྱུ། །པདྨ་དཔག་བསམ་ཤིང་དང་ཨུད་པ་ལ། །བུང་བས་གླུ་དབྱངས་དར་དིར་ལེན་པས་ཁྱབ། །ལྗོན་པའི་ཤིང་རྣམས་གཡོ་བའི་གར་བགྱིད་ཅིང་། །འཁྲི་ཤིང་ཡལ་གའི་ལག་རྩེད་དུད་པ་ཡིས། །འོངས་པ་ལེགས་ཞེས་མགྲོན་ལ་བསུ་བ་བཞིན། །བསིལ་བའི་ཆུ་གཙང་པདྨས་ཁེབས་པ་རྣམས། །འཛུམ་པའི་བཞིན་གྱི་མདངས་རབ་གསལ་བ་བཞིན། །སྐྱེད་ཚལ་མེ་ཏོག་ལྗོན་པའི་རྒྱན་ཕྲེང་ཅན། །ནེའུ་སིང་སྔོན་པོའི་གནམ་གཡོགས་ལེགས་འཛིན་ཞིང་། །དྭངས་པའི་མཁའ་ལ་གཟའ་སྐར་ཤར་འདྲ་ཞིང་། །དགའ་བའི་ཚལ་ན་ལྷ་རྣམས་རྩེ་བ་བཞིན། །ཁུ་བྱུག་མྱོས་པའི་གདངས་སྙན་གླུ་ལེན་ཅིང་། །དུས་རླུང་བསིར་བུས་མེ་ཏོག་འགྲིམས་པ་བཞིན། །སྤྲིན་གྱི་གླང་པོ་དགའ་བའི་སྒྲ་འབྱིན་ཅིང་། །ཆར་གྱི་སྣང་བ་རབ་བཟང་བསིལ་བསིལ་བཞིན། །རྩ་བ་ལོ་མ་འབྲས་བུའི་ཁ་ཟས་ཀྱང་། །སྡིག་དང་མ་འདྲེས་ནགས་ན་དུས་བཞིར་ལྡན། །ཉོན་མོངས་རྣམས་ཀྱང་ངང་གིས་ནགས་ན་འགྲིབ། །མི་སྙན་བརྗོད་པ་སུ་ཡང་མ་མཆིས་ཤིང་། །འདུ་འཛིའི་གྲོང་ལས་རྒྱང་རིང་གྱུར་པས་ནི། །ཞི་བའི་བསམ་གཏན་ངང་གིས་ནགས་ན་འཕེལ། །དམ་པའི་ཆོས་དང་མཐུན་ཞིང་སེམས་འདི་དུལ། །ཉེ་བར་ཞི་བའི་བདེ་བ་ནགས་ན་ཐོབ། །མདོར་ན་ནགས་ཀྱི་ཡོན་ཏན་མཐའ་ཡས་ཏེ། །བསྐལ་པར་བརྗོད་ཀྱང་ཟད་པར་ག་ལ་འགྱུར། །དུས་གསུམ་རྒྱལ་བས་བྱང་ཆུབ་བརྙེས་པ་ཡང་། །ནགས་སུ་གནས་ལས་བྱུང་བ་མ་གཏོགས་པ། །ཡུལ་འཁོར་གྲོང་དང་འདུ་འཛིའི་གནས་ལས་མིན། །

དེ་ལྟར་ནགས་ཀྱི་ཡོན་ཏན་དྲན་བྱས་ནས། །དགོན་པར་ཕྱོགས་ཏེ་གོམས་པ་བདུན་བོར་བ། །བསྐལ་པ་གངྒཱའི་སངས་རྒྱས་ཐམས་ཅད་ལ། །སྤོས་དང་མེ་ཏོག་ཀུན་གྱིས་མཆོད་པས་ཀྱང་། །དེ་ཡི་བསོད་ནམས་ཕུང་པོ་ཆར་མི་ཕོད། །རྒྱས་པར་ཟླ་བ་སྒྲོན་མེའི་མདོ་བཞིན་དུ། །ནགས་ཀྱི་ཡོན་ཏན་དམ་པ་བསམ་པར་བྱ། །དེར་སོང་ནས་ནི་ཕུག་དང་བྲག་རིའི་དྲུང་། །སྨན་ལྗོངས་མེ་ཏོག་ལྗོན་ཤིང་དྲུང་དག་གམ། །རྩྭ་དང་ལོ་མའི་སྤྱིལ་པོར་གནས་བཅས་ཏེ། །ཆུ་དང་ཤིང་དང་འབྲས་བུ་ལ་སོགས་པ། །ངན་ངོན་ཙམ་གྱི་འཚོ་བས་ལུས་འཚོ་ཞིང་། །དགེ་བའི་ཆོས་ལ་ཉིན་མཚན་བརྩོན་པར་བྱ། །དེར་ནི་ནགས་ཀྱི་ཤིང་ལོ་རྙིང་པའི་དཔེས། །གཟུགས་དང་ལང་ཚོ་དབང་པོའི་བྱེ་བྲག་རྣམས། །རིམ་གྱི་རིམ་གྱིས་འགྱུར་ཞིང་སྙིང་པོ་མེད། །འབྱོར་བ་རྒུད་ཅེས་ངེས་པར་རྟོགས་པར་བྱ། །དེར་ནི་ཤིང་དང་ལོ་འདབ་བྲལ་བའི་དཔེས། །མཛའ་དང་མི་མཛའ་དེ་བཞིན་བདག་གི་ལུས། །ལྷན་ཅིག་འདུས་ཀྱང་སོ་སོར་འགྱེས་ཆོས་ཅན། །འབྲལ་བའི་ཆོས་ཞེས་ངེས་པར་རྟོགས་པར་བྱ། །དེར་ནི་པདྨའི་རྫིང་བུ་སྟོང་པའི་དཔེས། །ནོར་དང་འབྱོར་བ་འདོད་ཡོན་སྣ་ཚོགས་ཀུན། །མཐར་ནི་མི་རྟག་འགྱུར་ཞིང་སྙིང་པོ་མེད། །བསགས་པ་འཛད་ཅེས་ངེས་པར་རྟོགས་པར་བྱ། །དེར་ནི་ནམ་ཟླ་དུས་བཞི་འགྱུར་བའི་དཔེས། །སོས་ཀའི་མེ་ཏོག་རྒྱས་འདྲའི་ལུས་འདི་ཡང་། །དུས་ཀྱིས་འགྱུར་ཞིང་ལང་ཚོ་རྣམ་པར་ཡོལ། །འཆི་བདག་འབྱུང་ཞེས་ངེས་པར་རྟོགས་པར་བྱ། །དེར་ནི་འབྲས་བུ་སྨིན་དང་ལྟུང་བའི་དཔེས། །རྒན་དང་གཞོན་དང་དར་ལ་བབས་རྣམས་ཀྱང་། །འཆི་བའི་ཆོས་ཏེ་ནམ་འབྱུང་ངེས་པ་མེད། །སྐྱེས་པ་འཆི་ཞེས་ངེས་པར་རྟོགས་པར་བྱ། །དེར་ནི་རྫིང་བུར་གཟུགས་བརྙན་ཤར་བའི་དཔེས། །སྣ་ཚོགས་ཆོས་ཀུན་སྣང་ལ་རང་བཞིན་མེད། །སྒྱུ་མ་སྨིག་རྒྱུ་ཆུ་ཡི་ཟླ་བ་འདྲ། །བདེན་པས་སྟོང་ཞེས་ངེས་པར་རྟོགས་པར་བྱ། །དེ་ལྟར་ཆོས་ཀུན་ཁོང་དུ་ཆུད་བྱས་ནས། །ཡངས་པའི་སྟན་ལ་བདེ་བའི་ལུས་བསྲངས་ཏེ། །སེམས་ཅན་དོན་སེམས་བྱང་ཆུབ་སེམས་སྒོམས་ལ། །འདས་པ་མི་བསམ་མ་འོངས་སྔོན་མི་བསུ། །ད་ལྟའི་ཤེས་པ་ཡིད་ལ་བྱེད་པ་བོར། །མི་སྤྲོ་མི་བསྡུ་མ་ཡེངས་ངང་ལ་ཞོག །ས་ལེ་སིང་ངེ་ཡེ་རེ་ཝལ་ལེ་བ། །སྟོང་གསལ་འཛིན་མེད་སྤྲོས་དང་བྲལ་བར་བཞག །དུས་གསུམ་རྒྱལ་བ་ཀུན་གྱི་དགོངས་པ་ཡིན། །སེམས་ཀྱི་གནས་ལུགས་ཇི་བཞིན་གཏུག་མའི་དོན། །ལྷུག་པར་གློད་ནས་འཇོག་པ་མ་གཏོགས་པ། །ཅི་ཡང་མི་བསམ་ཡིད་ལ་བྱེད་པ་ཐོང་། །མ་བསམ་མ་དཔྱད་སྤོས་པའི་ཡུལ་མིན་པ། །སངས་རྒྱས་རྣམས་ཀྱི་དགོངས་པ་དེ་ཉིད་ཡིན། །དེས་ན་རྟོག་པའི་ཚང་ཚིང་ཞི་སླད་དུ། །ཉེར་ཞི་སེམས་ཀྱི་གནས་ལུགས་བལྟ་བར་བྱ། །རྗེས་ལ་འཁོར་གསུམ་དག་པའི་བསྔོ་བ་བྱ། །བར་སྐབས་སེམས་ལ་མི་རྟག་འཆི་བ་བསྒོམ། །འདུས་བྱས་སྙིང་པོ་མེད་ལ་སྐྱོན་མང་བ། །འཁོར་བའི་རང་བཞིན་དེ་ཡང་བསམ་པར་བྱ། །འདི་ལྟར་ཕྱི་རོལ་སྣ་ཚོགས་སྣང་བ་ཀུན། །རྨི་ལམ་སྒྱུ་མ་འདྲ་བར་རྟོགས་བྱས་ནས། །ཐམས་ཅད་མཉམ་ཉིད་ནམ་མཁའི་ངང་ལ་བཞག །དགག་སྒྲུབ་མི་བྱེད་ཡིད་ལ་བྱེད་པ་བོར། །དེ་ལྟར་སྤྱད་པས་ཅི་ཞིག་ལྟར་དེ་ཡང་། །སེམས་ཉིད་སྐྱེ་བ་མེད་ཅིང་འགག་པ་མེད། །རང་བཞིན་གཏུག་མ་གང་ཡིན་མངོན་དུ་འགྱུར། །འདི་ལྟར་མཚན་མོ་ཉལ་བའི་ཚེ་ན་ཡང་། །སེམས་ཉིད་སྐྱེ་བ་མེད་པའི་ཆོས་ཉིད་ལ། །བློ་ཡིས་སྤྲོས་དང་བྲལ་བའི་ངང་དུ་ཞོག ། ལྡང་དང་སྣང་བའི་ཚེ་ཡང་སྒྱུ་མ་ལྟར། །རང་བཞིན་མེད་ལ་ཡང་དང་ཡང་དུ་ལྟོས། །ཅི་ཞིག་ལྟར་ཏེ་སེམས་ཉིད་རིན་ཆེན་གཏེར། །བསལ་བཞག་མེད་པའི་ངོ་བོ་མཐོང་ནས་ནི། །སྲིད་པའི་མྱ་ངན་རྒྱ་མཚོར་རབ་བརྒལ་ནས། །མྱ་ངན་མེད་ཞི་རྟག་དགའ་སྤྲོས་མེད་གླིང་། །སངས་རྒྱས་གོ་འཕང་མཐའ་ཡས་བརྙེས་པར་འགྱུར། །བར་སྐབས་རྟོག་པའི་ཆོ་འཕྲུལ་ཅི་བྱུང་ཡང་། །གང་ཤར་ངོ་བོ་རང་ཤར་འཛིན་མེད་ལྟོས། །རྣམ་རྟོག་ངོ་བོ་ཆོས་སྐུའི་རོལ་པར་འཆར། །འགྲོ་དང་འཆག་དང་ལྡང་དང་སྣང་བའི་ཚེ། །འགྲོ་བ་འདི་དག་བདག་གིས་དྲང་བྱ་ཞིང་། །མགོན་དང་སྐྱབས་དང་དཔུང་གཉེན་གྱུར་ཅིག་ཅེས། །བྱང་ཆུབ་སེམས་ལ་ངེས་པར་བློ་བཞག་ནས། །སྤྱོད་ཡུལ་དག་པའི་སྤྱོད་པ་དྲན་བྱ་ཞིང་། །སེམས་ཅན་དོན་ལས་གཞན་དུ་མི་བསམ་མོ། །འདི་ནི་སྙིང་རྗེའི་ལྗོན་ཤིང་ཆེན་པོ་སྟེ། །ཀུན་མཁྱེན་རྒྱལ་བའི་མྱུ་གུ་སྐྱེད་བྱེད་ཡིན། །ཉན་ཐོས་སངས་རྒྱས་འབྲིང་རྣམས་ལས་འདས་ཏེ། །ཚད་མེད་ཐུགས་རྗེའི་འོད་ཟེར་རབ་འགྱེད་པའི། །ཡོན་ཏན་དཔག་མེད་དུ་མའི་གང་ཆེན་མཚོ། །རྫོགས་པའི་སངས་རྒྱས་ནོར་བུ་འབྱུང་བ་མཚར། །འདི་ལས་ངོ་མཚར་ཆེ་བ་གཞན་གང་ཡོད། །དེ་ཕྱིར་བློ་དང་ལྡན་པའི་སྐྱེ་བོ་རྣམས། །བྱང་ཆུབ་ཞི་བ་དམ་པ་སྒྲུབ་པའི་ཕྱིར། །ནགས་ཀྱི་ནང་དུ་ངེས་པར་སྒོམ་དུ་གཤེགས། །གལ་ཏེ་འདི་ལ་ཆོས་ཤིག་མ་བསྒྲུབས་ན། །ཕྱི་ནས་གར་འགྲོ་བདག་གིས་ཇི་ལྟར་ཤེས། །ཆོས་ཀྱི་ལམ་དང་དེ་ནས་འཕྲད་པ་དཀོན། །དེ་དུས་བཅོས་སུ་ཡོད་པ་མ་ལགས་ཀྱི། །ད་ལྟ་ཉིད་དུ་ཆོས་ལ་འབད་དགོས་སོ། །དེང་འཆི་སང་འཆི་ངེས་པ་སུ་ཡིས་ཤེས། །ཡིད་བརྟན་མེད་དེ་འཆི་བདག་ཚུར་ཚུར་འོང་། །འདི་ཉིད་བདག་གིས་བཟློག་པར་ཡང་མི་ནུས། །རིངས་པར་རིངས་པར་ནགས་སུ་སྒོམ་དུ་གཤེགས། །ནོར་དང་མཛའ་བཤེས་གཉེན་འདུན་སུ་འབྱོར་ཡང་། །འཆི་བའི་དུས་སུ་ཅུང་ཟད་ཕན་པ་མེད། །ཆོས་དང་ལྡན་ན་འཆི་ཡང་མི་འཇིགས་ཀྱི། །རིངས་པར་ཚུར་གཤེགས་ནགས་ཀྱི་ནང་དུ་འདོང་། །བདག་དང་གཞན་དང་ཐམས་ཅད་མེད་པའི་དུས། །རིང་པོར་མི་ཐོགས་ངེས་པར་འབྱུང་འགྱུར་གྱི། །ད་ལྟ་ཉིད་དུ་ཆོས་ཤིག་སྒྲུབ་པའི་ཕྱིར། །ནགས་ཀྱི་ནང་དུ་ངེས་པར་དེངས་པར་བྱ། །ཚངས་པར་སྤྱོད་པ་མང་དུ་ཐོས་པ་དང་། །ལེགས་པར་སྒོམ་དང་ནགས་སུ་གནས་པ་དང་། །དགེ་བ་གོམས་རྣམས་འཇིགས་པ་མེད་པ་ཡིས། །འཆི་བའི་ཚེ་ན་རབ་དགའ་ཐོབ་པར་འགྱུར། །དགའ་བའི་རྒྱུ་ནི་ནགས་སུ་གནས་པས་འགྲུབ། །དེ་ཕྱིར་ནགས་ཀྱི་ནང་དུ་སྒོམ་དུ་གཤེགས། །ངེས་པར་བདག་ནི་མེད་པར་འགྱུར་བའི་དུས། །སང་ཙམ་འབྱུང་ཡང་སུས་ཤེས་དབང་ཅི་ཡོད། །འཆི་བའི་ནངས་པར་ཆོས་ལས་སྐྱབས་གཞན་མེད། །ཆོས་ནི་སྐྱབས་དང་གནས་དང་དཔུང་གཉེན་ཏེ། །ཆོས་ནི་བདེ་འགྲོའི་ཁང་བཟང་སྟོན་པ་ལགས། །དེ་ཕྱིར་སེམས་ཁྱོད་འཆི་བ་དྲན་བྱོས་ལ། །ནགས་ཀྱི་ནང་དུ་ཆོས་ལ་འགྲོ་དགོས་སོ། །སེམས་ཀྱིས་སེམས་ལ་ནང་དུ་ཕྲིན་འདི་མཛོད། །དེ་ལ་ཉན་ན་སེམས་ཁྱོད་ཆོས་སུ་ཤིས། །དེ་སྐད་ཕན་པར་སྨྲ་བའི་ངག་འདི་ནི། །སྙིང་ནས་ཡིན་གྱི་སེམས་ཁྱོད་ནགས་སུ་གཤེགས། །ནགས་ཚལ་ཀུན་ཏུ་དགའ་བའི་གཏམ་འདི་ནི། །ངེས་འབྱུང་ཐར་པའི་ཡིད་ཅན་བསམ་ཡས་པས། །སེམས་ཉིད་ངལ་བསོའི་རི་བོ་ཡང་རྩེའི་རྩེར། །སྙིང་ནས་ནགས་སུ་འགྲོ་སླད་སྨྲས་པ་ཡིན། །དེ་ལས་བྱུང་བའི་དགེ་བ་གང་ཡོད་དེས། །འགྲོ་ཀུན་འཁོར་བའི་གྲོང་ལས་ཡིད་བྱུང་ནས། །རྣམ་མཁྱེན་ཐར་པའི་ནགས་འདབ་ཉམས་དགའ་བར། །ཕྱམ་གཅིག་ཉིད་དུ་ཐམས་ཅད་གྲོལ་བར་ཤོག །

ནགས་ཚལ་ཀུན་ཏུ་དགའ་བའི་གཏམ། །མང་དུ་ཐོས་པའི་སྙན་དངགས་མཁན་དཔལ་ལྡན་བསམ་ཡས་པ་ངག་གི་དབང་པོས། རི་བོ་ཡང་རྩེའི་རྩེར་འཁོར་བའི་གནས་ལས་ངེས་པར་འབྱུང་བའི་ཚེ་སྦྱར་བའོ།།

阿魄羊倌

འདིར་འབྲེལ་བ་གྱིས་དང་། ཁྱོད་ལ་མཁོ་བའི་རིག་དངོས་ཀྱིས་སྒུག་ནས་ཡོད་ངེས།

གསུང་གི་མཛད་པས་དུས་ཚེས་དགེ་བ་བསུ། དྲིན་ཆེན་བླ་མ་སྐུ་ཚེ་བརྟན།

འདི་གསུམ་དང་དུ་བླང་ན་བདེ་ལེགས་འཕེལ། ། ཀུན་མཁྱེན་མི་ཕམ་པས་སོ།།

ཨོ་རྒྱན་པདྨའི་བཀའ་ཐང་བསྡུས་པ། སྒྲ་ཡིག་ཆ་ཚང་། གཞན་ལ་གང་མང་སྤེལ།

དེ་རིང་ཚེས་བཅུ་དུས་ཆེན་ལ་ཆེད་ཕུལ་གྱི་ཟབ་ཆོས་བྱིན་ཆེན་གཅེས་བཏུས།

བཟང་སྤྱོད་སྨོན་ལམ་གྱི་བཀའ་ཁྲིད། སྒྲ་ཆ་ཚང་། མཁན་འཆི་མེད་རིག་འཛིན།

བླུན་པོས་མཁས་ལ་འཕྱ་བྱེད་ཀྱང་། །མཁས་པས་བླུན་ལ་སྙིང་རྗེ་སྐྱེ། །

དུས་ཆེན་ཁྱད་འཕགས་ཚེས་བཅུའི་གསལ་བརྡ། རྣམ་དཀར་དགེ་བར་འབད་པར་ཞུ།

ལག་པ་གཉིས་ཀྱིས་འདི་ལྟར་གཡོ་འགུལ་བྱས་ན་ལུས་པོའི་བདེ་སྲུང་ལ་བཟང་།

ཀུན་མཁྱེན་མི་ཕམ་སྐུ་འཁྲུངས་པའི་དུས་ཆེན་ལ་ཆེད་ཕུལ་ལེགས་སྐྱེས།

ཀུན་མཁྱེན་མི་ཕམ་རྒྱ་མཚོ་རྗེས་སུ་དྲན་པའི་གཏམ། མཁན་ཆེན་རིག་དར།

ཀུན་མཁྱེན་མི་ཕམ་རྣམ་རྒྱལ་རྒྱ་མཚོ་མཚོས་མཛད་པའི་ཆོས་ཚན་ཉེར་གསུམ།

གླིང་བྲོ་བདེ་ཆེན་རོལ་མོའི་ཕན་ཡོན་དང་བཅས་པ། སྒྲ་དང་ཡི་གེ་ཆ་ཚང་།

ལག་པ་གཉིས་ཀྱིས་འདི་ལྟར་གཡོ་འགུལ་བྱས་ན་ལུས་པོའི་བདེ་སྲུང་ལ་བཟང་།

ནགས་ཚལ་ཀུན་ཏུ་དགའ་བའི་གཏམ། ཀུན་མཁྱེན་ཀློང་ཆེན་རབ་འབྱམས་ཀྱིས་མཛད།

རྗེ་བཙུན་མི་ལའི་མགུར་ལས། ཤ་ཁྲག་གི་ཉེས་དམིགས་སྐོར་བཞུགས་སོ།།

པད་མཚོའི་གཞས་གསར། ཕ་རི་གངས་དཀར་ཞེས་པའི་གླུ་དབྱངས་སྙན་མོ།

བན་རྒན་བགྲེས་པོའི་སེམས་གཏམ། མཁན་ཆེན་འཆི་མེད་རིག་འཛིན་གྱིས་མཛད།

བླུན་པོས་ཐོག་མར་བདེ་འབྲས་འཚོལ། །མཁས་པས་ཐོག་མར་བདེ་རྒྱུ་འཚོལ། །

མར་མི་མྱང་གསུམ་གྱི་རྣམ་ཐར་སྙན་ཚིག་རིས་འགྲེལ་མ། འཆི་མེད་རིག་འཛིན།

སེམས་ཁོང་གི་འབོད་སྐུལ། ཚིག རྨེ་སྤྲུལ། གཞས་མ། དངོས་གྲུབ་སྒྲོལ་མ།

བླ་མའི་དྲུང་དུ་ཞབས་ཏོག་བསྒྲུབ་ན། །ཚོགས་གཉིས་ཟུང་འབྲེལ་དེ་རང་ལགས་

རྗེ་བཙུན་མི་ལ་རས་པ། མཁན་ཆེན་འཆི་མེད་རིག་འཛིན་གྱིས་མཛད།

མཚན་བརྒྱ་ཕྱག་གསུམ་གྱི་ཆོ་ག་བདེ་ཆེན་ཞིང་དུ་བགྲོད་པའི་མྱུར་ལམ།

ཤེས་རབ་སྦྱོང་ཞིང་བརྩོན་པ་འཕེལ་བྱེད་ལ། །དད་པ་བྱ་ཞིང་སྨོན་ལམ་ལེགས་

རྒྱལ་བའི་བསྟན་ལ་ཞུགས་པའི་དོན་སྒོ་ལ། །མདོ་སྔགས་ལམ་གྱི་ཉམས་ལེན་སྣ་

ལྷོ་བྲག་མར་པ་ལོ་ཙཱ། མཁན་ཆེན་འཆི་མེད་རིག་འཛིན་གྱིས་མཛད།

མཛུབ་མོར་འཕུར་མཉེད་འདི་ལྟར་བྱས་ན་རིམས་འགོག་ནུས་པ་ཆེ་རུ་གཏོང་ཐུབ།

འཕགས་མཆོག་ས་ཡི་སྙིང་པོ་སྒྲུབ་ཐབས་བསྡུས་པ། ཀུན་མཁྱེན་མི་ཕམ།

༡༡/༢༥འཛམ་གླིང་དཀར་ཟས་ཉིན་གནང་བའི་བསླབ་བྱ། ཚུལ་ཁྲིམས་བློ་གྲོས།

སྡིག་པ་ཅི་ཡང་མི་བྱ་ཞིང་། །གེ་བ་ཕུན་སུམ་ཚོགས་པར་སྤྱད།། རང་གི་

མ་ཡུམ་མྱང་ཚ་དཀར་རྒྱན། མཁན་ཆེན་འཆི་མེད་རིག་འཛིན་གྱིས་མཛད།

མཁོས་ཆུང་བྱ་བར་ཞིབ་མི་འཇུག །གནད་ཆེན་དོན་ལ་ཞིབ་མོར་སྒྲིམ། །

ཞལ་གདམས་དིང་རི་བརྒྱ་རྩ་མ། ཕ་དམ་པ་སངས་རྒྱས་ཀྱིས་མཛད།

སྡུག་བསྔལ་ལ་བཟང་ཆ་ཡོད་ལ། བདེ་སྐྱིད་ལ་ཞན་ཆ་ཡོད། མཁན་ཆེན་མཆོག་གིས།

དེ་རིང་དུང་འགྱུར་ལྷ་བབས་དུས་ཆེན་ལ་ཆེད་ཕུལ་གྱི་ཟབ་ཆོས་བྱིན་ཆེན།

བཀྲ་ཤིས་པའི་མདོ་བཞུགས་སོ།། སངས་རྒྱས་ཤཱཀྱ་ཐུབ་པ།

ལྷ་བབས་དུས་ཆེན་གྱི་ངོ་སྤྲོད་དང་གསལ་བརྡ་གལ་ཆེན། གང་མང་སྤེལ་རོགས།

མཁས་དབང་ལྷག་བསམ་ཅན་ནོར་བྲང་ཨོ་རྒྱན་ལགས་སྐུ་གཤེགས་པར་མྱ་ངན་ཞུ།

ཁྱད་དུ་འཕགས་པའི་མི་གསུམ། མཁན་ཆེན་འཆི་མེད་རིག་འཛིན་གྱིས་མཛད།

ཉི་ཧོང་དུ་བོད་བརྒྱུད་ནང་བསྟན་ཐོག་མར་སྤེལ་མཁན་ཁོང་གི་རྣམ་ཐར།

ཀཿ ཐོག་རྡོ་རྗེ་གདན། སངས་རྒྱས་འཕྲིན་ལས།

བླུན་པོ་རང་གི་རྗེས་སུ་མི་འབྲང་ཡང་། རང་ཉིད་བླུན་པོའི་རྗེས་སུ་མི་་

རྨི་ལམ་ངན་པ་དང་ལྟས་ངན་སོགས་བཟློག་པ་ལ་ཟབ་པའི་གཙུག་ཏོར་འབར་བ།

ཡུན་རིང་འགྲོགས་པའི་མཛའ་བཤེས་སོ་སོར་འབྲལ། །འབད་པས་བསྒྲུབས་པའི་་་

མར་མེ་འབུལ་བ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་བཅོམ་ལྡན་འདས།

ཞེན་པ་བཞི་བྲལ་གྱི་བསྡུས་ཁྲིད། མཁན་ཆེན་ཚུལ་ཁྲིམས་བློ་གྲོས།

ཤིན་ཏུ་བདེན་པའི་གཏམ་ཡིན་ཡང་། །ཡུལ་དང་དུས་ལ་མ་བསྟུན་ན། །གཞན་གྱི་་

དེ་རིང་བླ་མ་ཨོ་རྒྱན་ཆེན་པོའི་དུས་ཆེན་ལ་ཕུལ་བའི་ཟབ་ཆོས་བྱིན་ཆེན།

ཨོ་རྒྱན་པདྨའི་བཀའ་ཐང་བསྡུས་པ། སྒྲ་ཡིག་ཆ་ཚང་། གཞན་ལ་གང་མང་སྤེལ།

分类

时事

民生

政务

教育

文化

科技

财富

体娱

健康

情感

旅行

百科

职场

楼市

企业

乐活

学术

汽车

时尚

创业

美食

幽默

美体

文摘

原创标签

时事社会财经军事教育体育科技汽车科学房产搞笑综艺明星音乐动漫游戏时尚健康旅游美食生活摄影宠物职场育儿情感小说曲艺文化历史三农文学娱乐电影视频图片新闻宗教电视剧纪录片广告创意壁纸头像心灵鸡汤星座命理教育培训艺术文化金融财经健康医疗美妆时尚餐饮美食母婴育儿社会新闻工业农业时事政治星座占卜幽默笑话独立短篇连载作品文化历史科技互联网

发布位置

广东北京山东江苏河南浙江山西福建河北上海四川陕西湖南安徽湖北内蒙古江西云南广西甘肃辽宁黑龙江贵州新疆重庆吉林天津海南青海宁夏西藏香港澳门台湾美国加拿大澳大利亚日本新加坡英国西班牙新西兰韩国泰国法国德国意大利缅甸菲律宾马来西亚越南荷兰柬埔寨俄罗斯巴西智利卢森堡芬兰瑞典比利时瑞士土耳其斐济挪威朝鲜尼日利亚阿根廷匈牙利爱尔兰印度老挝葡萄牙乌克兰印度尼西亚哈萨克斯坦塔吉克斯坦希腊南非蒙古奥地利肯尼亚加纳丹麦津巴布韦埃及坦桑尼亚捷克阿联酋安哥拉