![]()
བཀྲ་ཤིས་པའི་མདོ་བཞུགས་སོ།།རྒྱ་གར་སྐད་དུ། དེ་བ་པ་རི་པྲི་ཙྪ་མཾ་ག་ལ་གཱ་ཐཱ། བོད་སྐད་དུ། ལྷས་ཞུས་པའི་བཀྲ་ཤིས་ཀྱི་ཚིགས་སུ་བཅད་པ།དཀོན་མཆོག་གསུམ་ལ་ཕྱག་འཚལ་ལོ།།
གཞན་གྱིས་མི་ཐུབ་རྫོགས་སངས་རྒྱས།།མགོན་པོ་ཕྱོགས་གཅིག་བཞུགས་པ་ན།།ལྷ་གཅིག་དཔའ་བོ་ཆེན་པོ་ལ།།ཕྱག་འཚལ་འདི་སྐད་ཚིག་གསོལ་ཏོ།།བཀྲ་ཤིས་དག་ནི་བརྗོད་བགྱིས་ན།།བཀྲ་ཤིས་དམ་པ་གང་ཞིག་ལགས།།བཅོམ་ལྡན་འདས་ཀྱིས་བཀའ་སྩལ་པ།།བཀྲ་ཤིས་དག་ནི་རྗོད་བྱེད་པ།།དེ་དག་བཀྲ་ཤིས་བརྗོད་པར་བྱ།།ཡུལ་བཟང་གནས་དང་གྲོགས་མཆོག་དང་།།སྔོན་ཆད་བསོད་ནམས་བྱས་པ་དང་།།སེམས་ནི་ལེགས་པར་གཏད་བྱས་པ།།སྦྱིན་དང་ཤིན་ཏུ་སྙན་སྨྲ་དང་།།ཡང་དག་དོན་ལ་རྣམ་ངེས་དང་།།ཁྲིམས་ལྡན་རྣམས་དང་མཚུངས་སྦྱོར་བ།།བྱིས་བ་རྣམས་ལ་མི་བསྟེན་དང་།།མཁས་པ་རྣམས་ལ་བསྟེན་པ་དང་།།མཆོད་འོས་རྣམས་ལ་མཆོད་བྱེད་པ།།ཕ་མ་བསྙེན་བཀུར་བྱེད་པ་དང་།།ཞི་དང་ཚངས་པར་སྤྱོད་པ་དང་།།འབྱུང་པོ་ཀུན་ལ་སྙིང་བརྩེ་བ།།སྡིག་པའི་ལས་ལས་ལྡོག་པ་དང་།།དགེ་བའི་ལས་ལ་བསྟེན་པ་དང་།།ང་རྒྱལ་མེད་དང་ཁེངས་མེད་དང་།།ཆོག་ཤེས་མཐུན་པའི་འཚོ་བ་དང་།།རྟག་ཏུ་བྱས་པ་གཟོ་བྱེད་པ།།སྦྱིན་སྤྱོད་དེ་བཞིན་བཟོད་པ་དང་།།འཕགས་པ་རྣམས་དང་མཐུན་སྦྱོར་དང་།།དུས་སྐབས་སུ་ནི་ཆོས་ཉན་པ།།ལེ་ལོ་མེད་དང་མང་ཐོས་དང་།།ཆོས་ལ་ལེགས་པར་རྣམ་ངེས་དང་།།དེ་བཞིན་སེམས་ལ་རྙོག་མེད་པ།།གང་ཞིག་སེམས་ཅན་ཐམས་ཅད་ལ།།བྱམས་པའི་སེམས་ནི་རབ་བསྒོམ་ཞིང་།།དཔག་ཏུ་མེད་དེ་མི་འཁྲུག་པ།།གང་ཞིག་འཕགས་པའི་བདེན་རྣམས་ལ།།ཤེས་རབ་མིག་ནི་རྣམ་སྦྱངས་དང་།།ཚ྄ུལ་ཁྲིམས་ནོངས་པར་མ་གྱུར་པ།།འཕགས་པའི་བདེན་པ་མཐོང་བ་དང་།།ཚངས་པར་སྤྱོད་པ་སྒོམ་པ་དང་།།མྱ་ངན་འདས་པ་འཐོབ་འགྱུར་བ།།གང་ཞིག་འདོད་ཆགས་ཞེ་སྡང་དང་།།མ་རིག་པ་ཡང་རྣམ་སྤངས་དང་།།ཤེས་པ་མི་འཁྲུགས་སྐྱེ་འགྱུར་བ།།འཇིག་རྟེན་ཆོས་རྣམས་ཀྱིས་བསྐྱོད་ཀྱང་།།གང་གི་སེམས་ནི་མི་གཡོ་དང་།།དྲི་མེད་ཞི་དང་མྱ་ངན་མེད།།མཁས་པ་གང་ཞིག་བསྟོད་བྱེད་པ།།དེ་ལ་རྟག་ཏུ་བཀྲ་ཤིས་འགྱུར།།ལྷས་ཞུས་པའི་བཀྲ་ཤིས་ཀྱི་ཚིགས་སུ་བཅད་པ་རྫོགས་སོ།། །།
