ནམ་རྒྱུན་འཚོ་བའི་ཁྲོད། མི་མང་པོ་ཞིག་གིས་གཅིན་པ་མངར་འགྱུར་གྱི་ནད་དང་བཟའ་བཅའི་དབར་འབྲེལ་བ་ཆེན་པོ་ཡོད་པར་སྙམ་གྱི་ཡོད། ཁྱེད་ཀྱིས་ཤེས་སམ། ད་དུང་གཅིན་པ་མངར་འགྱུར་གྱི་ནད་དང་གཉིད་ཀྱི་བར་ལའང་རྔ་དང་འཆམ་ལྟ་བུའི་འབྲེལ་བ་ཆེན་པོ་ལྡན་པ་ཞིག་རེད།
2024ལོའི་ཡོ་རོབ་ཀྱི་གཅིན་པ་མངར་འགྱུར་ནད་གཞི་ཞིབ་འཇུག་མཐུན་ཚོགས་ཀྱི་ལོ་འཁོར་ཚོགས་འདུ་སྐབས་60པའི་ཐོག་ཧོ་ལན་གྱི་མཁས་དབང་ཚོས་ཞིབ་འཇུག་སྙན་ཞུ་ཞིག་ཁྱབ་བསྒྲགས་བྱས་པ་རེད། ཞིབ་འཇུག་ལས་ཤེས་རྟོགས་བྱུང་བར། ཕྱི་ཉལ་ཕྱི་ལངས་བྱེད་མཁན་གྱི་མིའི་ལུས་པོའི་ལྗིད་ཚད་སྟོན་གྲངས་ཇེ་མཐོར་འགྲོ་བ་དང་གྲོད་ཁོག་ཅུང་ཆེ་བ་སོགས་བརྗེ་ཚབ་རྟགས་འདུས་ནད་ཐོན་པའི་ཉེན་ཁ་ཆེ་རུ་ཕྱིན་ཡོད། དགོང་མོ་སྔ་པོ་ཉལ་མཁན་དང་བསྡུར་ན། ཕྱི་པོ་ཉལ་མཁན་ལ་གཅིན་པ་མངར་འགྱུར་གྱི་ནད་རིགས་2པ་ཕོག་པའི་ཉེན་ཁ་50%ཡིས་མཐོ་བ་ཡོད།
དུས་ཡུན་རིང་པོར་དགོང་མོ་ཕྱི་པོ་གཉིད་ཉལ་བའམ་ཡང་ན་གཉིད་ཆོས་ཉིད་དང་མཐུན་པ་ཞིག་མ་ཁུག་ན་མིའི་ལུས་པོའི་ནང་གི་གཉིད་མཚམས་འཇོག་པའི་བྱེད་ལས་གཙོ་བོ་སྐྱེ་དངོས་ཆུ་ཚོད་ཅེས་པར་གཏོར་སྐྱོན་ཕོག་ནས་ཟགས་ཐོན་སྙོམས་སྒྲིག་མ་ཐུབ་པར་གཤེར་མའི་ཕུང་རྩིའི་རང་བཞིན་ལ་ཤུགས་རྐྱེན་ཐེབས་ཏེ། ཁྲག་མངར་འཕར་བ་དང་ཁྲག་ཤེད་ཚོད་འཛིན་མི་ཐུབ་པའི་ཉེན་ཁ་ཇེ་ཆེར་འགྲོ་སྲིད།
མི་འགའ་ཤས་ཀྱི་བསམ་པར་གལ་ཏེ་ཉིན་རེར་གཉིད་ཆུ་ཚོད་བརྒྱད་ཁུག་པ་ཡིན་ན། ཕྱི་ཉལ་ཕྱི་ལངས་སམ་ཡང་ན་སྔ་ཉལ་སྔ་ལངས་གང་བྱས་ཀྱང་གཟུགས་པོར་གནོད་པ་དེ་ཙམ་མེད་པར་འདོད་ཀྱི་ཡོད། དོན་དངོས་ཐོག དུས་ཡུན་རིང་པོར་ཕྱི་ཉལ་ཕྱི་ལངས་ཀྱི་གོམས་གཤིས་ངན་པ་འཇགས་ན་གཟུགས་པོར་ནད་ཕོག་པའི་ཉེན་ཁ་ཆེན་པོ་ཡོད། ཆེད་ལས་མཁས་པས། ནམ་རྒྱུན་འཚོ་བའི་ནང་ཕྱི་ཉལ་ཕྱི་ལངས་མ་བྱས་ན་ཡག་པ་དང་། དགོང་མོ་ཉལ་བའི་དུས་ཚོད་ཕྱི་དྲགས་ན་གཟུགས་པོའི་ཚོར་འགྲིམ་དབང་རྩ་འཕར་ཏེ་ལུས་ཤ་རྒྱགས་པོ་ཆགས་པ་དང་ཁྲག་ཤེད་མཐོ་བའི་ཉེན་ཁ་ཇེ་ཆེར་འགྲོ་སྲིད་པའི་དྲན་སྐུལ་གནང་འདུག
གཉིད་ཁུག་པར་ཤུགས་རྐྱེན་བཟོ་བའི་རྒྱུ་རྐྱེན་གཙོ་བོ་གཉིས་ནི། གཉིད་ཆོས་ཉིད་དང་མཐུན་པ་ཞིག་ཁུག་དགོས་པ་དང་། གཉིད་འདང་ངེས་ཁུག་དགོས་པ་དེ་ཡིན།
ཉིན་རེར་གཉིད་ཉལ་བའི་དུས་ཚོད་དང་གཉིད་སད་པའི་དུས་ཚོད་གཅིག་མཚུངས་རྒྱུན་འཁྱོངས་ཐུབ་ན་གཉིད་ཁུག་པའི་ཆོས་ཉིད་རང་བཞིན་གསོ་སྐྱོང་བྱེད་པར་ཕན་ཐོགས་ཆེ།
མིའི་ལུས་ཕུང་གི་རང་ནུས་གསོ་བའི་ལས་ཀ་མང་ཆེ་བ་ཐོ་རེངས་ཆུ་ཚོད་3པའི་སྔོན་ལ་བྱེད་ཀྱི་ཡོད་པས། དགོང་མོའི་ཆུ་ཚོད་23:00ནས་ཆུ་ཚོད་3:00བར་གཉིད་ཁུག་པའི་སྤུས་ཚད་ནི་ཧ་ཅང་གནད་འགག་ཆེ་བ་ཞིག་རེད།
ཞིབ་འཇུག་ལས་མངོན་པ་ལྟར་ན། འཚོ་བ་སྐྱེལ་སྟངས་ལ་འགྱུར་ལྡོག་གཏོང་དགོས་པ་སྟེ། དཔེར་ན། ཟས་ཉུང་ཙམ་ཟ་བ་དང་འགུལ་སྐྱོད་མང་ཙམ་བྱེད་དགོས་པ། མ་ཉལ་སྔོན་ལ་མཚན་ཟས་མ་བཟས་ན་གཅིན་པ་མངར་འགྱུར་གྱི་ཉེན་ཁ་ཇེ་ཆུང་དུ་གཏོང་ཐུབ།
གལ་ཏེ་ལས་ཀའི་དབང་གིས་ཕྱི་པོ་མ་ཉལ་ཀ་མེད་ཐུག་ན། ཆོས་ཉིད་དང་མཐུན་པའི་གཉིད་དང་ཟས་སྤྱོད་དུས་ཚོད་རྒྱུན་འཁྱོངས་བྱེད་དགོས།
གལ་སྲིད་ཕྱི་པོ་མ་ཉལ་ཀ་མེད་ཐུག་ན། འཚོ་བའི་གོམས་གཤིས་ངན་པ་གཞན་དག་ཡོ་བསྲང་གང་ཐུབ་བྱས་ཏེ། བཟའ་བཏུང་ཚད་མེད་མི་བསྟེན་པ་དང་། གཉིད་མ་ཉལ་གོང་དུ་ཟས་མི་བཟའ་བར་དུས་བཀག་ལྟར་འགུལ་སྐྱོད་བྱེད་པའི་གོམས་གཤིས་འཇགས་དགོས།
དུས་རྟག་ཏུ་ལུས་པོའི་ལྗིད་ཚད་ལ་དོ་དམ་ཡག་པོ་བྱས་ན། གཅིན་པ་མངར་འགྱུར་གྱི་ནད་དང་ཁྲག་ཤེད་མཐོ་བའི་ནད་ཕོག་པའི་ཉེན་ཁ་ཇེ་ཆུང་དུ་འགྲོ་ཐུབ།
བསྐྱར་ཞུས། རྒྱལ་མཚན།
ཞུ་དག ཚེ་རིང་སྒྲོལ་མ།
རྩོམ་སྒྲིག་པ། ཚེ་རིང་རྒྱ་མཚོ།
སྒྲ་འཇུག ཚེ་སྒྲོན།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
ཡིག་སྒམ་ཨང་གྲངས།
གལ་སྲིད་ཁྱེད་ལ་ཁུངས་བཙན་གྱི་གསར་འགྱུར་རམ་ཆ་འཕྲིན་ཆོབ་ཚ་པོ་དེ་འདྲ་ཡོད་ཚེ་ང་ཚོར་བསྐུར་རོགས་གནང་།
ང་ཚོའི་ཡིག་སྒམ་ནི་1132875981@qq.comཡིན།
རྩོམ་ཡིག་གཞིས་ཀ་རྩེའི་ཚགས་པར་ལས་ཁུངས་ཀྱི་ཡིག་སྒམ་rkzbszw@163.comལ་བསྐུར་རོགས་གནང་།
ང་ཚོའི་བརྙན་ཐུང་རྟགས་ཅན་日喀则广播电视台ཟེར་བར་དོ་ཁུར་གནང་ནས་ངོ་མཚར་ལྟད་མོར་གཟིགས་དང་།
