ཟླ་1པོའི་ཚེས་7ཉིན་གྱི་ཆུ་ཚོད་9དང་སྐར་མ་5ཐོག བོད་རང་སྐྱོང་ལྗོངས་གཞིས་ཀ་རྩེ་གྲོང་ཁྱེར་དིང་རི་རྫོང་དུ་ས་ཡོམ་རིམ་པ་6.8བརྒྱབ་ཡོད།
ས་ཡོམ་བརྒྱབ་རྗེས། རྒྱལ་ཁབ་རིག་གནས་ཤུལ་བཞག་ཅུས་ཀྱིས་རིག་གནས་ཤུལ་བཞག་གི་གནས་ཚུལ་མགྱོགས་མྱུར་ཤེས་རྟོགས་དང་གེགས་ཁུལ་གྱི་རིག་གནས་ཤུལ་བཞག་སྲུང་སྐྱོང་ལས་དོན་ཡག་པོ་སྒྲུབ་པའི་ཐད་བཀོད་སྒྲིག་བྱས་པ་རེད། བོད་རང་སྐྱོང་ལྗོངས་རིག་གནས་ཤུལ་བཞག་ཅུས་ཀྱིས་བརྒྱུད་རིམ་ཧྲིལ་པོར་གཞིས་ཀ་རྩེ་གྲོང་ཁྱེར་རིག་གནས་ཤུལ་བཞག་ཅུས་དང་འབྲེལ་བ་དམ་ཟབ་བྱས་ཏེ་འཕྲལ་སྡོམ་འཕྲལ་རྒོལ་རུ་ཁག་བཙུགས་ནས་གཞིས་ཀ་རྩེ་གྲོང་ཁྱེར་གྱི་ས་སྐྱ་རྫོང་དང་ལྷ་རྩེ་རྫོང་། གཏིང་སྐྱེས་རྫོང་། དིང་རི་རྫོང་སོགས་སུ་ཉེན་སྐྱོབ་གེགས་སེལ་བྱས་ཏེ་རིག་གནས་དང་དངོས་རྫས་བཤམས་སྟོན་ཚན་པར་གནོད་འཚེ་ཕོག་པའི་གནས་ཚུལ་བསྡོམས་རྩིས་བྱས་ཡོད་པ་རེད།
ཐོག་མའི་ཞིབ་བཤེར་བྱས་པ་བརྒྱུད། གཞིས་ཀ་རྩེའི་ས་ཁོངས་ནང་གི་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོང་ཚན་པ་སྤྱི་ཡོངས་ནས་བརྟན་པོ་ཡིན་པ་དང་། བཀྲས་ལྷུན་དགོན་དང་གནས་བརྒྱ་ཆེ་མོའི་ཕུག་དགོན། ཞ་ལུ་དགོན་པ། དཔལ་འཁོར་མཆོད་རྟེན་སོགས་ལ་གནོད་སྐྱོན་མངོན་གསལ་བྱུང་མེད་ཅིང་། རང་སྐྱོང་ལྗོངས་རིམ་པ་དང་དེའི་མན་གྱི་རིམ་པའི་སྤོ་མི་རུང་བའི་རིག་དངོས་ལ་གནོད་འཚེ་ཕོག་པའི་གནས་ཚུལ་ཞིབ་བཤེར་དཔྱད་དཔོག་བྱས་པ་བརྒྱུད། ཡོམ་ཁུལ་ལྟེ་གནས་ཀྱི་རྫོང་རིམ་པའི་རིག་དངོས་སྲུང་སྐྱོང་ཚན་པ་གཉིས་ལ་གནོད་སྐྱོན་ཚབས་ཆེན་ཐེབས་ཡོད་པ་ཤེས་རྟོགས་བྱུང་ཡོད། རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོང་ཚན་པ་ཁག་དང་པོ་ས་སྐྱ་དགོན་ནི་ཡོམ་ཁུལ་ལྟེ་གནས་དང་ཐག་ཉེ་ཤོས་ཀྱི་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོང་ཚན་པ་ཞིག་ཡིན་ཞིང་། ཡོམ་ཁུལ་ལྟེ་གནས་དང་བར་ཐག་སྟོང་སྨི་71ལས་མེད་པ་རེད། དགོན་པའི་འདུ་ཁང་དེ་2024ལོར་ཉམས་གསོ་ལེགས་གྲུབ་བྱུང་ཞིང་། གཙོ་བོ་ཁང་ངོས་ཉམས་གསོ་དང་ཀ་གཞུ་ཁག་ཅིག་འདྲོང་རུ་དང་བརྟན་དུ་བཏང་ཡོད། ད་ཐེངས་ཀྱི་ས་ཡོམ་ཁྲོད་ལྷུ་ལག་ཆ་ཤས་འཁྱོག་པ་དང་གྱང་ཅུང་ཟད་གས་པ་ལས་སྤྱིའི་སྒྲོམ་གཞིར་ཉེན་ཁ་ཆེ་བ་བྱུང་མེད། 2019ལོར་ལག་བསྟར་བྱས་པའི་སྔོན་འགོག་རང་བཞིན་གྱི་སྲུང་སྐྱོབ་བྱེད་ཐབས་ཀྱིས་ཀྱང་ནུས་པ་འདོན་སྤེལ་ཐུབ་སྟེ། ས་སྐྱ་དགོན་གྱི་ཡོན་རྒྱལ་རབས་སྐབས་ཀྱི་དཀར་ཡོལ་སྔོ་ཁྲ་དང་ཤིང་ཏ་ལའི་ལོ་མའི་དཔེ་ཆ། ཐང་ག སྐུ་འདྲ་སོགས་སྤོ་རུང་བའི་རིག་དངོས་རྩ་ཆེན་ལ་མིག་སྔར་གནོད་སྐྱོན་ཐེབས་པའི་གནས་ཚུལ་མེད་པ་རེད།
རྒྱལ་ཁབ་རིག་དངོས་ཅུས་དང་བོད་རང་སྐྱོང་ལྗོངས། གཞིས་ཀ་རྩེ་གྲོང་ཁྱེར་སོགས་རིམ་པ་ཁག་གི་རིག་དངོས་སྡེ་ཚན་གྱིས་གནོད་འཚེ་ཕོག་པའི་རིག་དངོས་ལ་མུ་མཐུད་བརྟག་དཔྱད་དང་དཔྱད་དཔོག་བྱས་ཏེ་རིག་དངོས་ཀྱི་ཉེན་ཁ་དང་བདེ་འཇགས་ཀྱི་མངོན་མེད་གནས་ཚུལ་སེལ་ནས་གནོད་འཚེ་ཕོག་རྗེས་ཀྱི་ཉམས་གསོའི་ལས་དོན་གོ་རིམ་ལྡན་པའི་སྒོ་ནས་བཀོད་སྒྲིག་བྱས་ནས་རིག་དངོས་ཀྱི་བདེ་འཇགས་འགན་ལེན་བྱ་རྒྱུ་ཡིན་པ་རེད།
བསྐྱར་ཞུས། རྒྱལ་མཚན།
ཞུ་དག ཚེ་རིང་རྒྱ་མཚོ།
རྩོམ་སྒྲིག་པ། ཚེ་རིང་སྒྲོལ་མ།
ཡིག་སྒྱུར། ཚེ་རིང་སྒྲོལ་མ།
སྒྲ་འཇུག ཚེ་སྒྲོན།
ཡོང་ཁུངས། ཇོ་རིའི་འཕྲིན་སྟེགས།
ཡིག་སྒམ་ཨང་གྲངས།
གལ་སྲིད་ཁྱེད་ལ་ཁུངས་བཙན་གྱི་གསར་འགྱུར་རམ་ཆ་འཕྲིན་ཆོབ་ཚ་པོ་དེ་འདྲ་ཡོད་ཚེ་ང་ཚོར་བསྐུར་རོགས་གནང་།
ང་ཚོའི་ཡིག་སྒམ་ནི་1132875981@qq.comཡིན།
རྩོམ་ཡིག་གཞིས་ཀ་རྩེའི་ཚགས་པར་ལས་ཁུངས་ཀྱི་ཡིག་སྒམ་rkzbszw@163.comལ་བསྐུར་རོགས་གནང་།
ང་ཚོའི་བརྙན་ཐུང་རྟགས་ཅན་日喀则广播电视台ཟེར་བར་དོ་ཁུར་གནང་ནས་ངོ་མཚར་ལྟད་མོར་གཟིགས་དང་།
