མཁན་ཆེན་དམ་པ་ཚུལ་ཁྲིམས་བློ་གྲོས་མཆོག་ནི་ལུང་རིགས་ཀྱི་དགག་སྒྲུབ་ལ་རབ་ཏུ་ཐུགས་མོས་པའི་སྐྱེས་བུ་ཞིག་ཡིན་ལ་བོད་ཀྱི་མཁས་པ་སོ་སོའི་ལྟ་གྲུབ་ལ་དགག་བཞག་རྒྱ་ཆེར་བྱས་ཏེ་མཁས་པའི་སར་སླེབས་པ་ཞིག་ཡིན།
མཁན་ཆེན་དམ་པ་མཆོག་གིས་རྗེ་ཙོང་ཁ་པའི་ལྟ་གྲུབ་ལ་ཡང་ལུང་རིགས་ཀྱི་དགག་བཞག་རྒྱ་ཆེར་བྱས་ཡོད་ལ། ལུང་རིགས་ཀྱི་དགག་སྒྲུབ་ཆགས་སྡང་དང་མཁོན་དུ་འཛིན་པའི་རིགས་དང་ཡེ་ནས་མི་འདྲ་བར་ཁོང་ནི་ཕྱོགས་ལྷུང་དང་མ་འབྲེལ་བའི་དགག་སྒྲུབ་ཀྱིས་གནས་ལུགས་འཚོལ་མཁན་ཡིན། ཁོང་ནི་གཞན་གྱི་མཁས་པ་ཁས་ལེན་པའི་སྙིང་སྟོབས་དང་ལྡན་པ་དང་། དགོངས་གཞི་ཆེན་པོས་བླ་རུང་སྒར་སྤྱི་ལ་འདི་ལྟར་ལམ་སྟོན་གནང་གིན་ཡོད་པ་རེད།
ཆོས་འདི་བཤད་པ་ལ་དགོས་གལ་ཁྱད་པར་ཅན་ཞིག་ཡོད། རྒྱུ་མཚན་དེ་སྔོན་ཁྱེད་རྣམ་པ་ལ་ཞུ་མྱོང་མོད། བདག་གི་འཁྲུལ་བའི་སྣང་བ་ལ། རྗེ་བདག་ཉིད་ཆེན་པོས་བྱང་ཆུབ་ལམ་གྱི་གཙོ་བོ་རྣམ་པ་གསུམ་བདག་ལ་གསུངས་སྣང་ཤར། རྗེས་སུ་ཁྱོད་དང་ཁྱོད་ཀྱི་སློབ་མ་ཐམས་ཅད་ཀྱིས་གཞན་ལ་བཤད། བསྙེན་གནས་ཡན་ལག་བརྒྱད་པའི་སྡོམ་པ་རེ་བསྲུངས་ན་རང་སྐྱེ་བར་འདོད་ཚེ། འདི་ནས་འཕོས་མ་ཐག་ཏུ་དགའ་ལྡན་ཡིད་དགའ་ཆོས་འཛིན་གྱི་གནས་སུ་སྐྱེ་བར་འགྱུར་བ་དང་། རྗེ་བདག་ཉིད་ཆེན་པོ་རྒྱལ་བ་སེངྒེ་ང་རོ་ཡིན་པའི་དུས་སུ་འཛམ་བུ་གླིང་འདིར་སྐྱེས་ནས་ཐེག་པ་ཆེན་པོའི་ཆོས་ལ་ལོངས་སྤྱོད་པར་འགྱུར་རོ། །ཞེས་གསུངས་པའི་རྗེ་རིན་པོ་ཆེས་ཞལ་བཞེས་བསླུ་བ་མེད་པ་ཞིག་ཡོད་སྣང་ཤར་བས་ཡིན།
ད་སྔོན་ཆོས་སྒར་འདིའི་སློབ་མ་ཡོངས་རྫོགས་ཀྱིས་འདིའི་ཚིག་བློ་ལ་འགྲོ་བར་བྱས་ཡོད། ངས་ཀྱང་ཆོས་འདི་རྒྱ་ཆེར་བཤད་དེ་བསྙེན་གནས་ཡན་ལག་བརྒྱད་པའི་སྡོམ་པ་དངོས་སམ་བརྒྱུད་ནས་དུང་གཅིག་ལ་ཉེ་བ་ཞིག་དགེ་སྐུལ་བྱས་མྱོང་།ཁྱད་པར་དུ་པཎ་ཆེན་རིན་པོ་ཆེའི་སློབ་གྲྭའི་དགེ་རྒན་ལ་རྙིང་མ་པའི་ཚབ་བྱས་ནས་ང་སོང་བ་རེད།
སྐབས་དེར་བཤད་རྒྱུ་དེའང་ངེས་ཤེས་རིན་པོ་ཆེའི་སྒྲོན་མེ་རེད་འདུག་མོད། དེའི་སྔོན་དུ་དོན་གལ་ཆེན་མང་པོ་ཞིག་གིས། ངས་པཎ་ཆེན་རིན་པོ་ཆེ་ལ་དམིགས་བསལ་གྱིས་མཇལ་འཕྲད་ཅིག་བྱས་པ་ཡིན། དེའི་སྐབས་སུ་ཁོང་ལ་ལམ་གཙོ་རྣམ་གསུམ་དེ་ངས་ཆོས་ཁྲིད་ཚང་མའི་མགོར་འཆད་ཀྱིན་ཡོད། དེས་ན་ད་ཐེངས་ཀྱང་ཆོས་ཁྲིད་མགོར་འདི་བཤད་ན་ང་ལ་དགོས་པ་འདི་ལྟ་བུ་ཞིག་ཡོད་ཚུལ་དང་། རྨི་ལམ་འདི་ལྟ་བུ་རྨིས་ཚུལ་སོགས་ཡོད་ཚད་ཁོང་ལ་ཞུས་ཚེ། ཧ་ཅང་འགྲིག་འདུགལམ་གཙོ་རྣམ་གསུམ་ཁྱོད་ཀྱི་བློ་ལ་ཡོད་ན་ང་ལ་ལུང་ཞིག་ཐོན་གསུངས་སོང་། དེ་ནས་ཁོང་ལའང་ལུང་ཞིག་ཕུལ་བ་ཡིན།
ལམ་གྱི་གཙོ་བོ་རྣམ་གསུམ་འདི་རྨི་ལམ་གྱི་སྐབས་རྗེ་རིན་པོ་ཆེས་ལུང་ཞིག་གསུངས་སྣང་ཤར་བ་ཙམ་མ་ཡིན་པར། འདི་ལན་དུ་མར་བླ་མ་མང་པོའི་མདུན་ནས་ཁྲིད་དང་ལུང་ང་ལ་ཐོབ་མྱོང་། ངའི་མི་ཚེ་གང་བོའི་ཉམས་ལེན་ལ་ཡང་འདི་ལས་ལྷག་པ་ཞིག་ཡོད་མ་མྱོང་། ཁྱེད་རྣམ་པར་ཡང་འདི་ལས་ལྷག་པའི་ཉམས་སུ་བླང་བྱ་ཞིག་ཅི་ཡང་མེད་པས་འདི་ཉམས་ལེན་གྱིས།
ཞེས་པ་ཆོས་རྗེ་ྋཡིད་བཞིན་ནོར་བུའི་ཞལ་གསུང་གཅེས་བཏུས་དྲན་ངོགས་ཀྱི་གསེར་བྱ་ལས་བཏུས་ནས་སྤེལ་བ་དགེའོ། །
མཁན་ཆེན་མཆོག་གི་བོད་ཡིག་པོད་ཕྲན།
