སི་རི་ཡའི་ནང་གྱེན་ལོག་འཐབ་འཁྲུག་ཛ་དྲགས་ཡོང་བཞིན་པ།
2024.11.30 གཟའ་སྤེན་པ།
ཁ་སང་ནས་སི་རི་ཡའི་ཁ་ཆེ་གྱེན་ལོག་དམག་དཔུང་ཞིག་གིས། རྒྱལ་ཁབ་འདིའི་གྲོང་ཁྱེར་ཆེ་ཤོས་གཉིས་པ་ཨ་ལེ་པོ་Aleppoཡི་ཆ་ཤས་ཤིག་བཟུང་ཟིན་པ་ལྟར། ད་ལྟ་དམག་སྡེ་འདིས་གྲོང་ཁྱེར་འདིའི་བརྒྱ་ཆ་ཕལ་ཆེ་བ་བཟུང་ཟིན་པའི་གནས་ཚུལ་ཐོན། དེ་དང་ལྷན་སི་རི་ཡའི་གཞུང་དམག་དང་། དེའི་རྒྱབ་སྐྱོར་བ་ཨུ་རུ་སུའི་མཁའ་དམག་གིས་གཏོར་རྒོལ་དྲག་པོ་འགོ་བཙུག ཨུ་རུ་སུས་བཤད་པ་ལྟར་ན་འདས་པའི་ཆུ་ཚོད་ 24 ནང་ཉུང་མཐར་གྱེན་ལོག་དམག་མི་ 200 བསད་ཟིན་ཟེར།
རྒྱལ་ཁབ་འདིར་མི་ས་ཡ་1.5ལས་མང་བ་བསད། སི་རི་ཡའི་དབུ་ཁྲིད་སྒེར་གཅོད་པ་བྷ་ཤར་ཨལ་ས་རྡི་ཡིས་ཨུ་རུ་སུའི་རྒྱབ་སྐྱོར་འོག་མང་གཙོའི་ལས་འགུལ་དང་གྱེན་ལོག་དམག་དཔུང་དག་བཙན་གྱིས་མནན། ད་ལྟ་ཨུ་རུ་སུ་རང་ཉིད་དམག་འཁྲུག་གི་ཁྲོད་ལྷུང་ཟིན་པས། གྱེན་ལོག་དམག་དཔུང་དག་གིས་གོ་སྐབས་འདི་བཟུང་ནས་ཨལ་ས་རྡི་སྲིད་སྟེགས་ནས་གཡུག་ཐབས་བྱ་རྒྱུ་ཡིན་པ་གསལ།
ཁུངས་གཞན་དག་ལྟར་ན་བདུན་ཕྲག་འདིའི་གཟའ་ཕུར་བུའི་ཉིན་ནས་ད་ལྟ་བར། དྲག་ཟིང་འདིའི་ཁྲོད་མི་སེར་20ཚུད་པའི་མི་300བསད་ཟིན་པ་བཤད། སྦི་སྦི་སི་གསར་ཁང་ལྟར་ན། གྱེན་ལོག་དམག་དཔུང་གིས་ཐོག་མར་ཨ་ལེ་པོ་གྲོང་ཁྱེར་ནང་ལ་ཚུར་རྒོལ་སྐབས། གྲོང་ཁྱེར་གྱི་ལས་བྱེད་དང་སྲུང་དམག ཉེན་རྟོག་པ་སོགས་བྲོས་ཟིན་པ་བཤད་ཅིང་། གྱེན་ལོག་དམག་དཔུང་ལ་དཀའ་ངལ་ཆེན་པོ་མ་འཕྲད་པར་གྲོང་ཁྱེར་ནང་འཛུལ་ཐུབ་སོང་བའི་གནས་ཚུལ་ཐོན།
