༄༅། །ཆོོས་པ་ཉམ་ཆུང་གཅིིག་གིིས་འདས་རྟགས་འདིི་ལྟ་བུ་ཞིིག་བཞག་སྟེེ་གཤེེགས་སོོང་།
བོད་ཤིང་འབྲུག་ལོའི་ཟླ་བ་བརྒྱད་པའི་ཚེས་བདུན་ ( ཕྱིི་ལོོ་2024-10-9 ) ཉིན་ཆོས་པ་ཉམ་ཆུང་ཞིག་བློ་བདེ་བག་ཕེབས་ཀྱི་རྣམ་པས་སྐུ་ལུས་དྲང་པོར་བསྲངས་ཏེ་ཐུགས་དམ་ལ་བཞུགས་པའི་ཉམས་ཀྱིས་འདི་ལྟར་ཕེབས་སོང་།
དེ་ཡང་ཁོང་གི་མཚན་ལ་རྫ་བུ་རྒྱ་སྒོང་ཟེར། གང་ཉིད་ནི་ཕྱི་ལོ་( 1934 ) བོད་རབ་བྱུང་བཅུ་དྲུག་པའི་ཤིང་ཕག་ལོར་དགེ་རྩེ་རྫ་སྟོད་དུ་ཕ་མེ་མེ་དང་མ་བསོད་ལྷ་གཉིས་ཀྱི་བུ་རུ་སྐྱེས་ཤིང་། རང་ལོ་བཅུ་དྲུག་ལ་སོན་སྐབས་རྐྱེན་དབང་ཞིག་གིས་རུ་བ་མང་ཙམ་ཞིག་དང་མཉམ་དུ་གསེར་རྟར་སླེབས་ཏེ་མཐར་གསེར་རྟའི་ཆུ་སྟོད་རྐང་ཚ་སྡེ་བའི་འབངས་མི་དཀྱུས་མ་ཞིག་ཏུ་གྱུར། དུས་འགྱུར་གྱི་སྐབས་ ( 1960 ) ཡས་མས་ཤིག་ནས་མི་ལོ་ཉེར་གཅིག་ཙམ་ལ་མི་ཉག་ར་རྔའི་བཙོན་ཁང་དུ་འདུག་དགོས་བྱུང་ཞིང་། སྐབས་དེར་བྲག་མགོའི་བླ་མ་མདོ་མང་གཡང་ཐང་སོགས་བླ་སྤྲུལ་འགའ་རེ་ལ་ཞབས་ཕྱི་བསྒྲུབས་ཚུལ་དང་བཙོན་པ་ཉམ་ཐག་ནད་ཅན་དག་ལ་གཉོར་སྐྱོང་ལེགས་པོ་བྱས་པའི་ལོ་རྒྱུས་ཀྱང་འདུག ཁོང་ནི་མི་གཤིས་བརྟན་ཅིང་གཞུང་དྲང་བ་ཀུན་གྱིས་བློ་གཏད་ཕེར་བའི་གནས་སུ་བརྩི་བའི་མི་ཞིག་ཡིན་ལ། རང་གི་ཁྱིམ་གྱི་ཚ་བུ་ལའང་མི་བློ་གཏད་ཅན་དང་བདེན་པ་བདེན་དྲང་གི་མི་ཞིག་བྱེད་དགོས་ཞེས་རྒྱུན་དུ་ཁ་ཏ་སློབ་སྟོན་བྱེད་མྱོང་ཚུལ་ཚ་བུས་བཤད་ཀྱིན་འདུག
ཕྱི་ལོ( 1997 ) བོད་རབ་བྱུང་བཅུ་བདུན་པའི་མེ་གླང་ལོའི་སྟོན་ཁར་བླ་རུང་སྒར་གྱི་དགེ་བསྙེན་ཆོས་སྡེ་རུ་གཏན་སྡོད་བྱེད་དུ་འོངས། ལེགས་ཚོགས་ཆར་འབེབས་གླིང་དུ་སླེབས་ནས་ལོ་ཁ་ཤས་འགོར་རྗེས་རབ་ཏུ་བྱུང་སྟེ་དགེ་ཚུལ་གྱི་སྡོམ་པའང་མནོས། དུས་དེ་ནས་བཟུང་སྟེ་ད་ལྟའི་བར་བགྲང་བྱ་ཉེར་བདུན་ལོན་ཞིང་། དེའི་རིང་ལ་ཆོས་རྗེ་ཡིད་བཞིན་ནོར་བུའི་སྐུ་དྲུང་ནས་ཐེག་པ་ཐུན་མོང་དང་ཐུན་མིན་མདོ་སྔགས་ཀྱི་ཆོས་དང་དབང་ལུང་ཁྲིད་གསུམ་སོགས་མདོར་ན་ཉན་ཐོས་ནས་འོད་གསལ་རྫོགས་པ་ཆེན་པོའི་བར་ཐེག་པ་རིམ་པ་དགུའི་ཆོས་ཚུལ་མ་ཐོབ་པ་མེད་པ་ལྟ་བུའི་བསོད་ནམས་དང་སྐལ་བ་ལྡན་པར་གྱུར།
ཁོང་གི་ནར་མའི་ཐུགས་དམ་གྱི་རིམ་པ་ནི། མཚན་མོ་དུས་ཚོད་བཞི་པ་ཡས་མས་ཤིག་ནས་ཐོག་མར་ཐུན་གཅོད་པ་ཡིན་ཞིང་། དེ་ནས་རང་བྱུང་བསྟན་པ་བུ་གཅིག་གི་རྒྱུད་སོགས་ལྡེབ་ཤར་ཆུང་ངུ་ཉིས་བརྒྱ་ཞེ་དགུ་ཡས་མས་ཀྱི་ཁ་ཏོན་ཀློག་པ་སོགས་དང་། དགོང་མོར་ནུབ་ཇ་འཐུང་རྗེས་སུའང་ཐུན་བཅད་དེ་འདུག་པ་སོགས་རྒྱུན་གྱི་སྤྱོད་ལམ་ལྟ་བུར་ཆགས་ཡོད། དུས་ཚེས་ཁྱད་པར་ཅན་དག་ཏུ་ཕལ་ཆེར་རྒྱུན་ཆགས་སུ་བསྙུང་བར་གནས་ཤིང་ཐ་ན་ཁོ་རང་འཆི་ལ་ཉེ་སྐབས་ཀྱི་དུས་ཆེན་དག་ཏུའང་མཚན་གནས་མ་ཆད་པར་མཛད་དོ། །འོད་མཚན་བཏོན་པའི་གྲངས་ཀའང་ས་ཡ་དགུ་ལ་ཉེ་བ་དང་། གཞན་ཡང་སངས་རྒྱས་ཀྱི་མཚན་དང་བསྙེན་པ་གཟུངས་སྔགས་སོགས་རྒྱ་ཆེར་བསགས་ཤིང་སྤྱོད་ལམ་ཀུན་ཏུ་མ་ཎིའི་ལག་འཁོར་འབྲལ་མེད་དུ་སྐོར་བ་སོགས་རྣམ་དཀར་དགེ་བའི་ལས་མང་དུ་བགྱིས་སོ། །ཉིས་སྟོང་ཉེར་གསུམ་གྱི་ལོ་མཇུག་ཡས་མས་ཤིག་ཏུ་གདན་དུ་བཏིང་བའི་པགས་སྟན་དེ་བརྗེ་སྤོར་དགོས་པ་དང་། འཆི་ཁར་ལུས་ལ་པགས་རིགས་འཆང་མི་ཉན་ཚུལ་བཤད་དེ་པགས་སྟན་དང་སྐབས་དེར་ལུས་སུ་བཅིངས་པའི་ཚ་རུའི་སྐེད་ལྗིབས་ཀྱང་བརྗེ་རུ་བཅུག
བར་སྐབས་ཤིག་ནས་བཤས་ཤ་སྤངས་པར་བྱས་ཤིང་། སྤྱིར་ན་ཤ་ལ་ཧ་ཅང་དགའ་མཁན་ཞིག་ཡིན་ཡང་འཆི་བའི་སྔོན་རོལ་ཟླ་བ་གཉིས་གསུམ་ཞིག་ནས་ཤ་ལ་བཙོག་སྣང་ཅན་ཞིག་ཏུ་གྱུར་སོང་ཟེར།
འདི་ལོའི་ ( 2024 ) བོད་ཟླ་དྲུག་པའི་ཟླ་མགོ་ཙམ་ཞིག་ནས་ནད་བབས་ཅུང་ཇེ་ལྕིར་སོང་ནས་སྨན་དཔྱད་དང་ནད་གཡོག་སོགས་སྟབས་བདེ་ཆེད་གསེར་རྟ་རྫོང་ཐོག་གི་ཁོ་རང་གི་ཚ་བུ་རིག་རྒྱམ་གྱི་ཁྱིམ་དུ་ཁྲིད་དེ་ལྟ་སྐྱོང་བྱས། བོད་ཟླ་ ༨ པའི་ཚེས་ ༧ གྱི་སྔ་དྲོ་དུས་ཚོད་དགུ་ཕྱེད་ཙམ་ན་ཚ་བོ་གྲྭ་ཚེ་རིང་བསམ་འགྲུབ་སྐུ་དྲུང་དུ་བཅར་བ་ན། ཡུན་རིང་འཚོ་དཀའ་བའི་ཚུལ་མཐོང་བས་བླ་མ་ཡིད་བཞིན་ནོར་བུ་དང་འོད་དཔག་མེད་དྲན་དགོས་ཚུལ་དང་། བླ་མ་ཡིད་བཞིན་ནོར་བུས་འོད་མཚན་ས་ཡ་ཞིག་བཏོན་ན་བདེ་བ་ཅན་ལ་སྐྱེ་ངེས་པ་ཡིན་གལ་ཏེ་མ་སྐྱེས་ན་ཁོང་གིས་ཁྱེད་ཅག་བསླུས་པ་ཡིན། དེར་མ་ཟད་སངས་རྒྱས་བྱང་སེམས་རྣམས་ཀྱིས་ཀྱང་བསླུས་པ་རེད་ཅེས་བཀའ་གསུང་ནན་མོ་མཛད་མྱོང་བ་ཁྱོད་རང་གིས་དྲན་གྱིན་འདུག་གམ། ཁྱོད་ཀྱིས་ཀྱང་འོད་མཚན་ས་ཡ་གཅིག་ཡན་ཆད་བཏོན་ཟིན་འདུག་ཡོད་དམ་ཞེས་བཤད། སྐབས་དེར་ཁོ་རང་གི་ཕྲེང་བ་ཚ་བུའི་ལག་ཏུ་བཞག་ནས་འོད་མཚན་བཏོན་ཟིན་པ་རྣམས་ཚ་བུ་ལ་རྩིར་བཅུག་ཚེ་ས་ཡ་བརྒྱད་དང་། འབུམ་བརྒྱད། ཁྲི་གཅིག་བཏོན་ཟིན་འདུག་ཟེར། དེ་ནས་ཉིན་གུང་དུས་ཚོད་དང་པོ་དང་སྐར་བཞི་བཅུའི་ཐོག་ཙམ་ལ་མལ་སྟན་བརྗེ་སྤོར་བྱ་བའི་ཆེད་ཁོང་ཉིད་གདན་ལས་བཏེག་སྟེ་འཁོར་ཁྲིའི་འདུག་སྟེགས་ཤིག་གི་སྟེང་དུ་བཞག མལ་སྟན་བརྗེ་སྤོར་བྱེད་བཞིན་པའི་དུས་སུ་ཁོང་གི་མགོ་བོ་གཡོན་གྱི་བྲང་ཕྱོགས་སུ་ཅུང་ཟད་ཡོ་བའི་ཚུལ་གྱིས་མིག་གཉིས་ཅེར་གྱིས་སར་ལྟ་བའི་རྣམ་པས་འགུལ་འཕྲིགས་གང་ཡང་མེད་པར་དར་ཅིག་གནས། དེ་ནས་ཅུང་ཞིག་ན་གློ་བུར་དུ་མགོ་བོ་ཧར་གྱིས་བཏེག་སྟེ་འཇིགས་སྐྲག་གི་ཉམས་དང་མི་བདེ་བའི་ཟུག་རྔུ་སོགས་གང་ཡང་མེད་པར་ལག་གཉིས་མཉམ་བཞག་གི་ཚུལ་དུ་བྱས་ཤིང་ལུས་ཚུགས་དྲང་པོར་བསྲངས་ཏེ་དབུགས་ཀྱི་རྒྱུ་བ་མི་ཚོར་བར་གྱུར་ཏོ།
དེ་ལྟར་གང་ཉིད་སྐུ་གྲོངས་ནས་བསྲེག་སྦྱོང་གི་བར་ཉིན་བཅུའི་རིང་ལ་སྐུ་ཕུང་སྒུལ་བསྐྱོད་སོགས་གང་ཡང་མ་བྱས་པར་འདུག་སྟེགས་སྟེང་དེ་གར་བཞག གྲོངས་ནས་ཉིན་གཉིས་པར་མགོ་བོ་ནང་དུ་ཅུང་ཟད་ཅིག་གུག་ཙམ་བྱུང་བ་ལས་གཞན་ཕུང་པོ་སྦྱིན་བསྲེག་གི་བར་དུ་ལུས་ཚུགས་ཅུང་ཟད་ཀྱང་མ་ཤོར་བར་གནས། ཉིན་ཆེས་རྗེས་མ་དག་ཏུ་བྲང་དང་དཔུང་པ་སྐེ་རྒྱབ་རྣམས་དཀར་ཞིང་འཇམ་ལ་འོད་མདངས་ཆགས་ཤིང་གསོན་པོའི་གནས་སྐབས་སུའང་དེ་ལས་བཀྲག་མདངས་དང་གཟི་བྱིན་ཆེར་ཡོད་ཅེས་སྨྲ་མི་སྤོབས་པ་ལྟ་བུ་ཞིག་འདུག་གོ །
ཉིན་བདུན་པའི་དུས་ཚོད་བརྒྱད་པའི་སྟེང་སྤྲུལ་སྐུ་མཆོག་གིས་ཞལ་པར་བརྒྱུད་ནས་ཐུགས་དམ་འགྲོལ་བའི་བཀའ་དྲིན་གྱིས་བསྐྱངས། དེ་རྗེས་ཉིན་གསུམ་ལ་མཁན་སྤྲུལ་རྣམས་གདན་དྲངས་ཏེ་ཁོང་རྣམས་ཀྱིས་སྔགས་ཀྱི་ཆོ་ག་ཟབ་མོ་དང་། ཆོས་སྤྱོད་ཀྱི་རིམ་པ་དུ་མ་སྒྲོག་འདོན་མཛད།
གྲོངས་ནས་ཉིན་བཅུ་པ་སྟེ་ཚེས་བཅུ་དྲུག་ཉིན་གྱི་དགུང་མོ་དུས་ཚོད་ལྔ་ཕྱེད་ཡས་མས་སུ་གང་ཉིད་ཀྱི་སྐུ་ཕུང་དངོས་སུ་གདུང་ཁང་དུ་བསྐྱལ། དེ་ནས་བླ་རུང་གི་བླ་གྲྭ་བཅུ་ཕྲག་ཙམ་གྱིས་བར་དོ་ཐོས་གྲོལ་ཆེན་མོའི་སྦྱིན་བསྲེག་གི་ཆོ་ག་ལ་བརྟེན་ནས་མཚན་མོའི་དུས་ཚོད་བཅུ་གཉིས་པ་ཙམ་ལ་དངོས་སུ་གདུང་མེ་བསྒྲོན་ཏེ་སྐུ་ཕུང་བསྲེག་སྦྱོང་གི་ལས་དངོས་ལ་འཇུག་པར་བྱས། དེ་ལྟར་བསྲེག་སྦྱོང་གི་ལས་ཀྱི་རིམ་པ་མཇུག་བསྡུས་རྗེས་གདུང་སྒོ་སོགས་ལེགས་པར་བཏུམས་ཏེ་ཀོང་སྤྲུལ་ཚང་གིས་གསུངས་པ་བཞིན་གདུང་ཁང་སྟེང་དུ་རྟེན་བྱིན་ཅན་རེ་བཞག་ཅིང་ཤེར་མདོ་སོགས་བཀླགས་ནས་ཉིན་གསུམ་ཙམ་ལ་གདུང་ཁང་བསྲུངས་པར་བྱས།
དེ་ནས་གདུང་ཐལ་ལས་རིང་བསྲེལ་འཚོལ་བའི་ལས་ལ་ཞུགས་ནས་མཐར་དབྱིབས་དང་ཆེ་ཆུང་སོགས་མི་འདྲ་བའི་རིང་བསྲེལ་མང་ཙམ་ཞིག་རྙེད་སོན་བྱུང་ངོ་། །
དེ་རིང་ཟླ་བ་དགུ་པའི་ཚེས་༢༧ ཉིན་གང་ཉིད་ཀྱི་དགུང་ཞག་ཞེ་དགུའི་དུས་གྲངས་ལེགས་པར་ཐེམ་ནས་དགོངས་རྫོགས་ཀྱི་ལས་རིམ་ཡོངས་སུ་གྲུབ་པའོ། །
