རང་ཁུལ་གྱིས་དྲིལ་སྒྲོག་རིག་གནས་བསམ་བློ་དང་ཆ་འཕྲིན་དྲ་རྒྱའི་བདེ་འཇགས་བྱ་བའི་ཚོགས་འདུ་འཚོགས་པ།
ཉེ་སྔོན། རང་ཁུལ་གྱི་དྲིལ་སྒྲོག་རིག་གནས་བསམ་བློ་དང་ཆ་འཕྲིན་དྲ་རྒྱའི་བདེ་འཇགས་བྱ་བའི་ཚོགས་འདུ་འཚོགས་ཤིང་། ཚོགས་འདུའི་ཐོག་རྒྱལ་ཡོངས་ཀྱི་དྲིལ་སྒྲོག་རིག་གནས་བསམ་བློ་བྱ་བའི་ཚོགས་འདུའི་དགོངས་དོན་བརྒྱུད་སྒྲོག་དང་སློབ་སྦྱོང་བྱས། ཞིང་ཆེན་ཡོངས་ཀྱི་བསམ་བློའི་རིག་གནས་དྲིལ་སྒྲོག་དང་ཆ་འཕྲིན་དྲ་རྒྱའི་བདེ་འཇགས་བྱ་བའི་ཚོགས་འདུའི་དགོངས་དོན་ལ་གཞིགས་ནས་ཁུལ་ཡོངས་ཀྱི་དྲིལ་སྒྲོག་རིག་གནས་བསམ་བློ་དང་དྲ་འཕྲིན་བྱ་བའི་བཀོད་སྒྲིག་བྱས་པ་རེད། ཁུལ་ཨུའི་ཧྲུའུ་ཅི་གཞོན་པ་ཝང་ཀྲུང་དབྱི་ཡིས་ཚོགས་འདུར་མགོ་འཛིན་བྱས།
ཚོགས་འདུ་ལས་ཏང་གི་ཚོགས་ཆེན་ཐེངས་བཅོ་བརྒྱད་པ་འཚོགས་ཚུན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་དང་རྣམ་པ་ཀུན་དུ་བསམ་བློ་རིག་གནས་དང་དྲ་འཕྲིན་བྱ་བ་དེ་རྒྱལ་སྲིད་སྐྱོང་བའི་བྱ་བ་གལ་ཆེན་དུ་བརྩིས་ནས། ཞིང་ཆེན་ཏང་ཨུས་དྲིལ་སྒྲོག་རིག་གནས་བསམ་བློ་དང་དྲ་བའི་ཡིད་རྟོན་ལས་དོན་ལེགས་པར་བསྒྲུབ་རྒྱུ་དེ་ཆབ་སྲིད་ཀྱི་འགན་འཁྲི་གལ་ཆེན་ཞིག་ཏུ་བརྩིས་ཏེ། རང་ཁུལ་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་དང་། ཏང་ཀྲུང་དབྱང་དང་ཞིང་ཆེན་ཏང་ཨུའི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ཏེ། ཞི་ཅིན་ཕིང་གི་རིག་གནས་བསམ་བློ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དྲིལ་སྒྲོག་བསམ་བློའི་ལས་དོན་སྐོར་གྱི་གལ་ཆེའི་དགོངས་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དྲ་རྒྱར་བརྟེན་ནས་རྒྱལ་ཁབ་སྟོབས་ལྡན་དུ་གཏོང་བའི་སྐོར་གྱི་དགོངས་པ་བཅས་ལ་གོ་བ་ཡང་དག་ལེན་པ་དང་། ཆབ་སྲིད་ཀྱི་ལངས་ཕྱོགས་མཐོ་བ་དང་། དམིགས་འབེན་དང་ལས་འགན་གནད་ལ་འཁེལ་བ། སྲིད་ཇུས་དང་བྱེད་ཐབས་གནད་ལ་འཁེལ་བ། བྱ་བ་དོན་ཐོག་ཏུ་འཁྱོལ་བ། དྲིལ་སྒྲོག་གི་ཕན་འབྲས་ལེགས་པོ་བཅས་རྒྱུན་འཁྱོངས། བསམ་བློའི་དྲིལ་སྒྲོག་བྱ་བ་དེ་ཁུལ་ཡོངས་ཀྱི་ལྟེ་བའི་བྱ་བ་དང་།འཕེལ་རྒྱས་ཀྱི་ཁྱོན་ཡོངས་ཀྱི་ཁ་ཕྱོགས་དང་གཅིག་མཐུན་ཡོང་བར་བྱས་ཏེ། སྣང་བརྙན་གསར་པ་མངོན་པ་དང་། གྲུབ་འབྲས་གསར་པ་ལེན་པ། རྣམ་པ་གསར་པ་གཏོད་པ་བཅས་ལ་སྐུལ་འདེད་ཏན་ཏིག་གཏོང་དགོས་པ་བསྟན།
ཚོགས་འདུའི་སྟེང་དུས་རབས་གསར་པའི་རྒྱང་བསྐྱོད་ལམ་བུ་གསར་པའི་བསམ་བློའི་རིག་གནས་དྲིལ་སྒྲོག་དང་དྲ་འཕྲིན་བྱ་བ་བཟང་བོ་བསྒྲུབ་པར་འགན་འཁྲི་གཟི་བརྗིད་ལྡན་ལ་འགན་འཁུར་ལྕི་བས་བསམ་བློའི་ཁྲིད་སྟོན་ལ་མཐོང་ཆེན་བྱ་དགོས་ཤིང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་དྲིལ་སྒྲོག་བྱ་རྒྱུ་དེ་ཆབ་སྲིད་ཀྱི་ལས་འགན་དང་པོར་བརྩིས་ནས། ཏང་ཡོན་ལས་བྱེད་པར་རིག་གནས་ཀྱི་ཡིད་ཆེས་སྔར་བས་བརྟན་པོ་དང་། རིག་གནས་ཀྱི་རང་རྟོགས་སྔར་བས་ཚད་མཐོ་དགོས་པར་ཁྲིད་སྟོན་བྱས་ཏེ།སློབ་སྦྱོང་གི་ཕན་འབྲས་དེ་རང་སྣང་གི་འཇིག་རྟེན་བསྒྱུར་བཀོད་དང་། ཆབ་སྲིད་ཀྱི་ནུས་པ་ཆེ་རུ་གཏོང་བའི་སྒུལ་ཤུགས་ཆེན་པོར་བསྒྱུར་བ་དང་། རང་འཁྲིའི་བྱ་བ་ལེགས་པར་བསྒྲུབ་པ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བྱ་སྤྱོད་དངོས་སུ་འགྱུར་བར་བྱ་དགོས།
དྲིལ་སྒྲོག་དང་ཁྲིད་སྟོན་ལ་དོ་སྣང་ཆེན་པོ་བྱ་དགོས་ཏེ། ཏང་གི་བྱེད་ཕྱོགས་སྲིད་ཇུས་དང་མང་ཚོགས་ཀྱིས་དོ་ཁུར་བྱེད་སར་དམིགས་ནས། དྲང་ཕྱོགས་ཀྱི་དྲིལ་སྒྲོག་དང་ཁྲིད་སྟོན་ལ་རྒྱུན་མཐུད་ངང་ཤུགས་སྣོན་དང་ལེགས་བཅོས་བྱས་ཏེ། དྲང་ནུས་དར་སྤེལ་གཏོང་དགོས་ཤིང་། སྨྱན་སྦྱོར་མཉམ་འདྲེས་སྤྱད་དེ། ཕྱི་ཕྱོགས་དྲིལ་སྒྲོག་གི་འདུས་ཚད་མཐོ་རུ་གཏོང་བ་དང་། འཕེལ་ཕྱོགས་གཙོ་བོའི་བསམ་བློའི་གླེང་ཕྱོགས་སྲ་བརྟན་དང་རྒྱ་སྐྱེད་དུ་གཏོང་བ། ཁུལ་ཡོངས་ཀྱི་རིགས་སོ་སོའི་ལས་བྱེད་པ་དང་མང་ཚོགས་ཀྱིས་ཏང་ཀྲུང་དབྱང་གིས་གཏན་འཁེལ་བྱས་པའི་དམིགས་འབེན་གྱི་ཕྱོགས་སུ་གོམ་སྟབས་ཆེན་པོས་མདུན་དུ་བསྐྱོད་པར་སྐུལ་མ་གཏོང་དགོས། རིན་ཐང་གི་སྣེ་ཁྲིད་ལ་མཐོང་ཆེན་དང་། འདུ་ཤེས་ཀྱི་སློབ་གསོ་དང་ལོ་རྒྱུས་ལྔ་ཡི་དྲིལ་སྒྲོག་སློབ་གསོ་གཏིང་ཟབ་ཏུ་གཏོང་བ། ཀུན་སྤྱོད་དཔེ་བཟང་ཅན་སོགས་དུས་རབས་གསར་པའི་སྔོན་ཐོན་མི་སྣ་དྲིལ་སྒྲོག་ཤུགས་ཆེན་དང་། ཁྱིམ་སྲོལ་འཛུགས་སྐྱོང་ལ་ཤུགས་སྣོན་པ་བཅས་བྱས་ཏེ། གཞི་གཅིག་ཅན་གྱིས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་འཛུགས་སྐྱོང་དང་ཁྲིམས་སྐྱོང་འཛུགས་སྐྲུན། བསམ་པའི་དཔལ་ཡོན་འཛུགས་སྐྱོང་བཅས་བྱས་ནས་ཁུལ་ཡོངས་ཀྱི་རིགས་སོ་སོའི་ལས་བྱེད་པ་དང་མང་ཚོགས་ལ་མཐུན་སྒྲིལ་འབད་འཐབ་བྱེད་པར་སྐུལ་མ་གཏོང་དགོས། གསར་གཏོད་གསར་སྐྲུན་ལ་མཐོང་ཆེན་དང་། རིག་གནས་ཆེན་པོ་དང་དྲིལ་སྒྲོག་ཤུགས་ཆེན་གྱི་བྱ་བའི་སྒྲིག་གཞི་དང་འདུ་ཤེས་འཛུགས་པ་དང་། སྟོབས་ཤུགས་གཅིག་སྒྲིལ་གྱི་འབད་བརྩོན་དང་དོ་སྣང་བྱས་ནས། སྟོབས་ཤུགས་ལ་བརྟེན་ནས་བྱ་བ་བསྒྲུབ་པར་མཐོང་ཆེན་བྱས་ཏེ། རིག་གནས་དམངས་ཕན་འདུ་འགོད་གསར་གཏོད་དང་ལག་བསྟར་བྱས་ནས་རིག་གནས་སྲུང་སྐྱོང་རྒྱུན་འཛིན་བྱེད་ཤུགས་ཆེ་རུ་གཏོང་བ་དང་།བསམ་བློ་ཡོད་པ་དང་ཀུན་སྤྱོད་བཟང་བ། བརྩེ་བ་ཡོད་པ་བཅས་ཀྱི་རིག་རྩལ་བརྩམས་ཆོས་ཁག་ཅིག་གསར་རྩོམ་བྱས་ཏེ། གནས་མཆོག་མཚོ་ལྷོའི་རིག་གནས་མཚོན་རྟགས་ཤིག་ཧུར་ཐག་གིས་བསྐྲུན་ཏེ། རིག་གནས་ཡུལ་སྐོར་ལུས་རྩལ་གྱི་ཞིང་ཚོང་མཉམ་འདྲེས་ངང་འཕེལ་རྒྱས་སུ་འགྲོ་རྒྱུར་སྐུལ་འདེད་ཤུགས་ཆེན་གཏོང་དགོས་ཞེས་ནན་གྱིས་བསྟན།
ཚོགས་འདུའི་སྟེང་ས་གནས་སོ་སོ་དང་སྡེ་ཁག་སོ་སོས་དྲིལ་སྒྲོག་རིག་གནས་བསམ་བློ་དང་དྲ་རྒྱའི་བདེ་འཇགས་དང་ཆ་འཕྲིན་གྱི་བྱ་བར་ཏང་གིས་ཁྱོན་ཡོངས་ནས་མགོ་ཁྲིད་བྱ་རྒྱུར་ཤུགས་སྣོན་བྱས་ནས་ཡང་དག་པའི་ཁ་ཕྱོགས་དམ་འཛིན་བརྟན་པོ་བྱས་ཏེ། རིག་གནས་ཀྱི་འགན་འཁྲི་གསར་པ་འཁུར་རྒྱུར་ཆབ་སྲིད་ཀྱི་འགན་ལེན་བརྟན་པོ་མཁོ་འདོན་བྱེད་དགོས་པ་དང་།ཆབ་སྲིད་ཀྱི་འགན་འཁྲི་ཆེར་བསྐྱེད་དེ།ཏང་གིས་དྲིལ་སྒྲོག་ལ་དོ་དམ་དང་། ཏང་གིས་འདུ་ཤེས་འཛིན་སྟངས་ལ་དོ་དམ། ཏང་གིས་སྨྱན་སྦྱོར་ལ་དོ་དམ། ཏང་གིས་དྲ་སྦྲེལ་ལ་དོ་དམ་བཅས་རྒྱུན་འཁྱོངས་བྱས་ཏེ། ཁྲིད་སྟོན་ཡང་དག་དང་གཡུལ་སར་དོ་དམ་ཡག་པོ་བྱེད་པ། དཔུང་ཁག་སྟོབས་ཆེར་གཏོང་བ་དང་། གསར་གཏོད་བྱེད་ཕོད་པ་བཅས་ལ་བརྟེན་ནས།ཏང་ཀྲུང་དབྱང་གིས་རིག་གནས་དང་དྲ་རྒྱ་འཛུགས་སྐྱོང་སྐོར་གྱི་ཐབས་ཇུས་བཀོད་སྒྲིག་དོན་ཐོག་ཏུ་འཁྱོལ་བར་ཁག་ཐེག་བྱ་དགོས། ལམ་ལུགས་ཀྱི་འགན་སྲུང་ལ་ཤུགས་བསྣན་ཏེ་གསར་འགྱུར་སྨྱན་སྦྱོར་གྱིས་གསལ་འདེབས་དང་རིག་གནས་རིག་རྩལ་ལེ་ཚན་གྱི་གྲ་སྒྲིག་ལམ་སྲོལ་འཛུགས་པ་དང་། དྲ་རྒྱའི་མཁོ་བསྟུན་འཆར་འགོད་བཟོས་ཏེ་དྲ་རྒྱའི་བདེ་འཇགས་བྱ་བའི་དོ་དམ་སྒྲིག་སྲོལ་ལེགས་འགོད་ཡོང་བ་དང་།ཁུལ་དང་རྫོང་།ཤང་དང་སྡེ་བ་རིམ་པ་བཞིའི་སྤྱི་པའི་རིག་གནས་ཞབས་ཞུའི་མ་ལག་འཛུགས་སྐྱོང་གི་མཉམ་འགུལ་ལམ་སྲོལ་འཐུས་ཚང་དུ་བཏང་ནས། བསམ་བློ་རིག་གནས་དྲིལ་སྒྲོག་དང་དྲ་རྒྱའི་བདེ་འཇགས་དང་ཆ་འཕྲིན་བྱ་བ་དེ་ཚན་རིག་ཅན་དང་ཚད་ལྡན་ཅན། ལམ་ལུགས་ཅན་དུ་འགྱུར་བའི་ཆུ་ཚད་མཐོ་རུ་གཏོང་དགོས།དཔུང་ཁག་འཛུགས་སྐྱོང་གི་སྟོབས་ཤུགས་ཆེར་བསྐྱེད་དེ་རིག་གནས་ཅན་གྱི་ཤེས་ལྡན་མི་སྣ་དང་ས་གནས་ཀྱི་སྨྱན་སྦྱོར་ཤེས་ལྡན་མི་སྣ་སྔོག་འདོན་དང་གསོ་སྐྱོང་བྱས་ཏེ། ལས་བྱེད་པའི་དཔུང་ཁག་གི་ལག་ལེན་སྦྱོང་བརྡར་དང་ཆེད་ལས་སྦྱོང་བརྡར་ལ་མུ་མཐུད་དུ་ཤུགས་བརྒྱབ་སྟེ་ཆབ་སྲིད་ཐད་ཉམས་སད་ཐེག་ཐུབ་པ་དང་།འཇོན་ཐང་ཆེ་བ། བདེན་འཚོལ་གསར་གཏོད། རྒྱལ་ཁ་ལེན་ཐུབ་པ་བཅས་ཀྱི་དྲིལ་སྒྲོག་རིག་གནས་བསམ་བློ་དང་དྲ་རྒྱའི་བདེ་འཇགས་དང་ཆ་འཕྲིན་བྱ་བ་སྒྲུབ་མཁན་གྱི་ལས་བྱེད་པའི་དཔུང་སྡེ་ཞིག་གསོ་སྐྱོང་བྱ་དགོས་ཞེས་བསྟན།
རྫོང་སོ་སོའི་རྫོང་ཨུའི་ཧྲུའུ་ཅི་དང་དྲིལ་སྒྲོག་པུའུ་ཡི་པུའུ་ཀྲང་། ཁུལ་བསམ་བློ་རིག་གནས་དྲིལ་སྒྲོག་བྱ་བའི་མགོ་ཁྲིད་ཚན་ཆུང་དང་ཁུལ་ཨུའི་དྲ་རྒྱའི་བདེ་འཇགས་དང་ཆ་འཕྲིན་ཅན་ཨུ་ཡོན་ལྷན་ཁང་གི་ཁོངས་མིའི་ལས་ཁུངས་ཀྱི་འགན་འཁུར་བློ་མཐུན་གཙོ་བོ་བཅས་ཚོགས་འདུར་ཞུགས་པ་རེད།
ཡོང་ཁུངས། མཚོ་ལྷོ་ཁུལ་མཉམ་འདྲེས་སྨྱན་སྦྱོར་ལྟེ་གནས།
རྩོམ་སྒྲིག་པ། སྐར་མ་རྡོ་རྗེ།
རྩོམ་སྒྲིག་འགན་འཁུར་བ། ཚེ་རིང་སྐྱིད།
ལྟ་སྐུལ་བ། བཀྲ་ཤིས་ཚེ་རིང་། རིག་འཛིན་རྡོ་རྗེ།
