སི་ཁྲོན་ཞིང་ཆེན་མི་རིགས་ཆོས་ལུགས་སྡེ་ཁག་གི་དྲིལ་བསྒྲགས་ལས་ཀ་དང་མི་རིགས་དུས་དེབ་ཁང་གི་རྐང་འཛིན་གསར་འགོད་པའི་༢༠༢༤ལོའི་ལོ་འཁོར་གསོ་སྦྱོང་ཕན་ཀྲི་ཧྭ་རུ་འཚོགས།
ཟླ་༡༠པའི་ཚེས་༣༠ཉིན་སི་ཁྲོན་ཞིང་ཆེན་མི་རིགས་ཆོས་ལུགས་སྡེ་ཁག་གི་དྲིལ་བསྒྲགས་ལས་ཀ་དང་མི་རིགས་དུས་དེབ་ཁང་གི་རྐང་འཛིན་གསར་འགོད་པའི་༢༠༢༤ལོའི་ལོ་འཁོར་གསོ་སྦྱོང་འཛིན་གྲྭ་དེ་ཕན་ཀྲི་ཧྭ་གྲོང་ཁྱེར་ཏང་ཨུའི་སློབ་གྲྭ་རུ་འཚོགས་པ་རེད། སི་ཁྲོན་མི་རིགས་ཆོས་ལུགས་ཨུ་ལྷན་གྱི་ཏང་ཙུའུ་ཡི་ཁོངས་མི། ཀྲུའུ་རེན་གཞོན་པ་མཱ་ཧྥེ་ཡིས་འགོ་ཚུགས་མཛད་སྒོའི་ཐོག་སྐུལ་སློབ་གསུང་བཤད་གནང་བ་དང་། ཕན་ཀྲི་ཧྭ་གྲོང་ཁྱེར་ཏང་ཨུའི་རྒྱུན་ཨུ། འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་མ་ཞའོ་ཧྥེང་གིས་ཤིས་ཚིག་ཕུལ་བ་རེད།
ཐེངས་འདིའི་གསོ་སྦྱོང་ནི་ཞིང་ཆེན་མི་རིགས་ཆོས་ལུགས་ཨུ་ལྷན་གྱིས་ཏང་གི་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་གསུམ་པ་དང་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན། སི་ཁྲོན་ཞིང་ཆེན་ཏང་ཨུའི་སྐབས་བཅུ་གཉིས་པའི་ཀྲུང་ཨུའི་ཚང་འཛོམས་གྲོས་ཚོགས་ཐེངས་དྲུག་པ་སོགས་གྲོས་ཚོགས་གལ་ཆེན་རྣམས་ཀྱི་སྙིང་དོན་ལ་སློབ་སྦྱོང་དང་ལག་བསྟར་དོན་འཁྱོལ་བྱེད་པའི་ཞིབ་ཕྲའི་བྱ་སྤྱོད་ཡིན་པར་མ་ཟད། མི་རིགས་ཆོས་ལུགས་སྡེ་ཁག་གི་དྲིལ་བསྒྲགས་ཁྱབ་ཁོངས་དང་དྲིལ་བསྒྲགས་དཔུང་སྡེའི་འཛུགས་སྐྱོང་ཇེ་རྒྱས་གཏོང་བའི་བྱེད་ཐབས་གལ་ཆེན་ཡང་ཡིན་པ་རེད།
ཐེངས་འདིའི་གསོ་སྦྱོང་ཚོགས་ཡུན་ནི་ཉིན་ལྔ་ཡིན་ལ། གསོ་སྦྱོང་དེ་ཆེད་དོན་སློབ་ཁྲིད་དང་། ཡུལ་དངོས་སློབ་ཁྲིད། ཉམས་ཞིབ་སློབ་ཁྲིད་བཅས་ཟུང་འབྲེལ་བྱས་པའི་སློབ་ཁྲིད་བྱེད་ཐབས་སྤྱད་ནས་འཚོགས་ཡོད་དེ། ཆེད་དོན་སློབ་ཁྲིད་ནི་གཙོ་བོ་༼དུས་རབས་གསར་པར་མི་རིགས་ཆོས་ལུགས་ཁྱབ་ཁོངས་ཀྱི་དྲིལ་བསྒྲགས་ལས་ཀ་ཡག་མོ་སྒྲུབ་པའི་སྐོར་གྱི་ངོས་འཛིན་དང་བསམ་གཞིགས་༽ཞེས་པ་དང་།༼ལོ་རྒྱུས་ཐོག་གི་ཐིག་གསུམ་འཛུགས་སྐྲུན་ཆེན་པོ་གསུམ་སྟེ་གུང་ཁྲན་ཏང་མིའི་ཐོག་མའི་དམ་བཅའ་དང་འགན་འཁྲི།༽༼མི་རིགས་ཆོས་ལུགས་ཁྱབ་ཁོངས་ཀྱི་འདུ་ཤེས་འཛིན་སྟངས་ཐད་ཀྱི་ཉེན་ཁ་དང་མངོན་མེད་གནད་དོན་སྔོན་འགོག་དང་སེལ་ཐབས་བྱེད་པ། རྒྱལ་ཁབ་ཀྱི་བདེ་འཇགས་སྲུང་སྐྱོབ་བྱེད་པ༽བཅས་ཀྱི་སྐོར་ཡིན་པ་རེད།
ཟླ་༡༠པའི་ཚེས་༢༩ཉིན། སློབ་མ་ཚོས་སྔར་རྗེས་སུ་ཡན་པན་རྫོང་ཧུང་གེ་གྲོང་རྡལ་ཞི་གེ་ཏཱ་གྲོང་ཚོའི་དང་ཅིན་ཏང་ཡན་པན་གྲོང་གསེབ་དར་རྒྱས་དཔེ་སྟོན་གླིང་། ནུབ་རྒྱུད་ས་ཁུལ་གྱི་ཐོག་མའི་ཕུགས་འདུན་ར་བ། ཐིག་གསུམ་དུས་སྐབས་ཀྱི་ཕྱོགས་བསྡུས་སློབ་གསོའི་རྟེན་གཞི་བཅས་ནས་ཡུལ་དངོས་ཀྱི་སློབ་སྦྱོང་བྱས་པ་རེད།
ཐེངས་འདིར་སི་ཁྲོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ལྷན་གྱི་འབྲེལ་ཡོད་ལས་སྒྲུབ་ཁང་དང་། ལས་ཁུངས་ཀྱི་འགན་འཁུར་མི་སྣ། དེ་མིན་ཞིང་ཆེན་ཡོངས་ཀྱི་གྲོང་ཁྱེར་དང་ཁུལ། རྫོང་། ཆུས་བཅས་ཀྱི་མི་རིགས་ཆོས་ལུགས་ལས་དོན་ཨུ་ལྷན་དང་ཅུས་ཀྱི་འབྲེལ་ཡོད་བློ་མཐུན། ཆེད་དུ་གདན་ཞུ་བྱས་པའི་འཕྲིན་སྦྱོར་སྡེ་ཁག་དང་རྐང་འཛིན་གསར་འགོད་པ་སོགས་འདུས་པའི་མི་༨༠ལྷག་གསོ་སྦྱོང་འཛིན་གྲྭའི་འགོ་ཚུགས་མཛད་སྒོ་དང་འབྲེལ་ཡོད་བྱེད་སྒོར་ཞུགས་ཡོད་པ་རེད།
ཡོང་ཁུངས། ༼མི་རིགས༽དུས་དེབ་ཁང་།
རྩོམ་སྒྲིག་པ། ལྷ་མོ་བཀྲ་ཤིས། མཚོ་ལྷ།
ཞུ་ཆེན། པ་སངས་རྡོ་རྗེ།
གཙོ་སྒྲིག་པ། མཁའ་འགྲོ་ཚེ་རིང་།
ལྟ་སྐུལ་པ། བཀྲ་ཤིས་ཉི་མ།
གོང་གི་ཚད་གཉིས་ཨང་གྲངས་བཤེར་འབེབས་བྱས་ན་
ཁམས་པའི་བརྙན་འཕྲིན་གྱི་ལེ་ཚན་ཆ་ཚང་གཟིགས་ཐུབ།
关注我们
微信号 ：weikangba
新浪微博 ：康巴藏语卫视
ཤམ་བྷ་ལ་ཆ་འཕྲིན་ཕབ་ལེན་བྱས་ན་བོད་ཁུལ་གྱི་ཆ་འཕྲིན་གསར་པ་གང་མང་གཟིགས་ཐུབ་པར་མ་ཟད། གླུ་གར་དང་བོད་སྐད་བརྙན་འཕྲིན་ཟློས་གར། གློག་བརྙན། འཆད་ཁྲིད། རོལ་དབྱངས་སོགས་ཆབ་དཔལ་རིག་གསུམ་གང་ཡིན་ཡང་རང་ཉིད་ཀྱི་འདོད་མོས་ལྟར་གཟིགས་ཆོག
