WXRedian | 海北祁连山藏文报 | ལོ་སར་ཤིས་ཚིག

ལོ་སར་ཤིས་ཚིག

ཀྲུང་གུང་མཚོ་བྱང་ཁུལ་ཨུ་དང་མཚོ་བྱང་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་། མཚོ་བྱང་ཁུལ་མི་དམངས་སྲིད་གཞུང་། མཚོ་བྱང་ཁུལ་སྲིད་གྲོས།

（2025ལོའི་ཟླ1པོའི་ཚེས28ཉིན།）

ཤིང་ཕོ་འབྲུག་ལོ་ཕར་ལ་བསྐྱལ་ཤིང་མོ་སྦྲུལ་ལོ་ཚུར་ལ་བསུ། ལོ་གསར་བ་ཞིག་བསུ་བའི་མཛེས་སྡུག་ལྡན་པའི་དུས་སྐབས་འདིར། ཀྲུང་གུང་མཚོ་བྱང་ཁུལ་ཨུ་དང་མཚོ་བྱང་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་། མཚོ་བྱང་ཁུལ་མི་དམངས་སྲིད་གཞུང་། མཚོ་བྱང་ཁུལ་སྲིད་གྲོས་བཅས་ཀྱིས་འཐབ་ཕྱོགས་སོ་སོ་དང་ལས་རིགས་སོ་སོར་དཀའ་སྤྱད་འབད་བརྩོན་གྱིས་ལས་ཀ་བྱེད་བཞིན་པའི་ཁུལ་ཡོངས་ཀྱི་རྒྱ་ཆེའི་ལས་བྱེད་པ་དང་མང་ཚོགས། ཁུལ་དུ་བཅའ་སྡོད་བྱས་པའི་དཔུང་སྡེ། དྲག་ཆས་ཉེན་རྟོག་དཔོན་དམག སྤྱི་བདེ་ཉེན་རྟོག་པ། མེ་ཟོན་རོགས་སྐྱོབ་མི་སྣ། ལས་བྲལ་དང་ལས་འཁྱུར་ངལ་གསོ་བྱས་པའི་བློ་མཐུན་རྒན་པ། མཚོ་བྱང་གི་འཕེལ་རྒྱས་ལ་སེམས་ཁུར་དང་རྒྱབ་སྐྱོར་བྱེད་པའི་ལས་རིགས་སོ་སོའི་མི་སྣ་ཡོངས་ལ་ལྷག་བསམ་ཟོལ་མེད་ཀྱིས་འཚམས་འདྲི་དང་བཀྲ་ཤིས་པའི་སྨོན་འདུན་ཞུས་པ་ཡིན།

དཀའ་སྤྱད་འབད་བརྩོན་བྱས་ཏེ་གྲུབ་འབྲས་གསར་བ་བརྩོན། འདས་པའི་ལོ་གཅིག་ནི་མཚོ་བྱང་འཕེལ་རྒྱས་ཀྱི་ལོ་རྒྱུས་ཐོག་གི་སྤྱིར་བཏང་མ་ཡིན་པའི་ལོ་ཞིག་རེད། ཁུལ་ཡོངས་ཀྱི་གོང་འོག་ཚང་མས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ། ཞིང་ཆེན་ཏང་ཨུའི་བཀོད་སྒྲིག་ཁྱོན་ཡོངས་ནས་ལག་བསྟར་དང་དོན་འཁྱོལ་བྱས་ཏེ“243”འཕེལ་རྒྱས་བཀོད་པ“ཞིང་ཆེན་ཡོངས་ཀྱི་མདུན་གྲལ་བསྐྱོད་པ་གསུམ”གྱི་ལས་འགན་འཛུགས་སྐྱོང་བྱ་རྒྱུར་དམིགས་ནས་མངགས་བཅོལ་ཡིད་ལ་བརྟན་པོར་བཟུང་སྟེ་དྲིན་ཚོར་ཡར་བརྩོན་བྱས་ནས་རླབས་ཆེན་གྱི་བྱ་གཞག་དག་ལ་མཐོང་ཐུབ་པའི་གྲུབ་འབྲས་གཡུར་དུ་ཟ་བ་བླངས་ཡོད། ང་ཚོས་སྐྱེ་ཁམས་སྔོན་ལ་འཛིན་རྒྱུ་རྒྱུན་འཁྱོངས་བྱས་ཏེ“རི་ཆུ་ནགས་ཞིང་མཚེའུ་རྩྭ་བྱེ་མ་འཁྱགས་ཀླུང”མ་ལག་བཅོས་སྐྱོང་དང་གཞི་གཅིག་ཅན་གྱི་སྲུང་སྐྱོབ་གཅིག་གྱུར་འཆར་འགོད་བྱས་ཏེ། མདོ་ལ་རིང་མོ་དང་མཚོ་སྔོན་པོ“རྒྱལ་ཁབ་སྤྱི་གླིང་གཉིས”དང་སྐྱེ་ཁམས་དཔལ་ཡོན་གྱི་བཙན་ས་བསྐྲུན་པར་གོམ་སྟབས་བརྟན་པོ་སྤོས་ཏེ་མཚོ་བྱང་གི་གནམ་ངོ་གསལ་བ་དང་རི་བོ་སྔོ་པ། ཆུ་མོ་དྭངས་པ། ས་གཞི་ལེགས་པ་ཞིག་ཏུ་བཏང་། ང་ཚོས་འཕེལ་རྒྱས་གཙོ་བོར་འཛིན་རྒྱུ་རྒྱུན་འཁྱོངས་བྱས་ནས་ཐོན་ལས་ཀྱི“གནས་བཞི”འཛུགས་སྐྲུན་ཇེ་མགྱོགས་སུ་བཏང་བ་དང་སྐྱེ་ཁམས་ཞིང་ཕྱུགས་ལས་ཀྱི“གཅིག་ཅན་དགུའི”བཟོ་བསྐྲུན་ཆ་ཚང་གི་ཚད་གཞི་མཐོ་རུ་བཏང་ནས་རྒྱ་སྐྱེད་བཏང་། འཇུ་ལག་གི་ལོག་དཀར་དང་མདོ་ལའི་བོད་ལུག་ཀྲུང་གོའི་ཞིང་ལས་ཐོན་རྫས་ཆས་རྟགས་མིང་ཐོའི་ནང་བཅུག་པ། རྐང་ཚའི་བོད་ལུག་རྒྱལ་ཡོངས་ཀྱི“རྫོང་གཅིག་གི་ཁྱད་ལྡན”ཆས་རྟགས་དཀར་ཆག་ནང་བཅུག་པ། “མདོ་ལ་རི་འདབས་ཀྱི་ཕྱུགས་ར་བཟང་བོའི”ལྗང་མདོག་སྐྱེ་ལྡན་ཆས་རྟགས་ཀྱི་ཤུགས་རྐྱེན་མུ་མཐུད་ཆེ་རུ་ཕྱིན་ཡོད། ཞིང་ལས་ལུས་རྩལ་རིག་གནས་ཡུལ་སྐོར་ཚོང་ལས་མཉམ་འདྲེས་གཏིང་ཟབ་ངང་ཇེ་མགྱོགས་སུ་བཏང་པ་དང་མཚོ་སྔོན་པོའི་བྱང་ངོགས་ཀྱི་སྐྱེ་ཁམས་ཉམས་ལེན་ས་ཚིགས6གི་ཚད་གཞི་ཇེ་མཐོར་བཏང་པ། མཚོ་སྔོན་པོ་སྨོན་ལམ་མཐོན་པོའི་གསར་བརྗེའི་ཉམས་ཞིབ་རྟེན་གཞིའི་སྐད་གྲགས་ཆོད་ཚད་མུ་མཐུད་དུ་ཆེ་རུ་བཏང་ཡོད། ཞིང་ཆེན་ཡོངས་ཀྱི་དགུན་དུས་ཡུལ་སྐོར་གྱི“མེ་མདའ་དང་པོ”བརྒྱབ་པ་དང་མེ་ལྷ་གངས་དཀར་རི་འཛེགས་ཡུལ་སྐོར་གྱིས“དར་ཁྱབ་ཆེ་བའི”ཐོག་ནས་རྐང་བགྲོད་དང་རྟ་རྒྱུག མདའ་འཕེན། ལྕགས་རྟ་བཅས་སྤུས་ལེགས་ངང་ཆས་རྟགས་ཆེན་པོ་བཞི་ཡི་འགྲན་སྡུར་བྱེད་སྒོ60ལྷག་ཙམ་གཉེར་བར་བརྟེན། “དག་སྣང་མཚོ་བྱང་། མདངས་ལྡན་གནས་མཆོག”ཅེས་པའི་མཚན་སྙན་རྒྱང་རིང་དུ་ཁྱབ་ཡོད། ཐོན་སྐྱེད་ནུས་ཤུགས་གསར་པ་འཕེལ་རྒྱས་སུ་བཏང་སྟེ་མ་དངུལ་སྒོར་དུང་ཕྱུར47བཏང་བའི་ལྗང་མདོག་རིག་ནུས་རྩིས་ནུས་ལྟེ་གནས་ལས་གཞི་འཛུགས་སྐྲུན་བྱེད་མགོ་བཙུགས་ནས་སྟོང་ཝ་ཁྲི་སྟོང་རིམ་པའི་ནུས་རྒྱུ་གཙང་མའི་རྟེན་གཞི་འཛུགས་སྐྲུན་ལ་སྐུལ་འདེད་བཏང་ཡོད། ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་འཕར་ཚད་བརྒྱ་ཆ5.1ཟིན་ནས་དཔལ་འབྱོར་དམིགས་ཚད་སོ་སོ་ཞིང་ཆེན་ཡོངས་ཀྱི་མདུན་གྲལ་དུ་སླེབས་ཡོད། ང་ཚོས་མི་དམངས་བླ་ན་མེད་པའི་འདུ་ཤེས་རྒྱུན་འཁྱོངས་བྱས་ཏེ་ལས་ཞུགས་དང་སློབ་གསོ། སྨན་བཅོས་འགན་བཅོལ། སྤྱི་ཚོགས་འགན་སྲུང་སོགས་དམངས་འཚོའི་བྱ་གཞག་གཅིག་གྱུར་འཆར་འགོད་བྱས་ཏེ་གྲོང་གསེབ་དར་སྤེལ་འཐབ་ཇུས་ལག་བསྟར་ཤུགས་ཆེན་བྱས་ནས་ཡུལ་ཚོ་དང་གྲོང་རྡལ། སྡེ་བའི“བཅུ་ལྡན”བཟོ་གྲྭའི་གྲུབ་འབྲས་སྲ་བརྟན་ངང་རྒྱ་སྐྱེད་བཏང་སྟེ་སྡེ་བའི་ཐུན་མོང་དཔལ་འབྱོར་གྱི་སྤྱིའི་ཡོང་འབབ་སྒོར་དུང་ཕྱུར1ལས་བརྒལ་ནས་སྡེ་བའི་ཆ་སྙོམས་སྒོར་ཁྲི53.8ཟིན་ཡོད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་བཏང་ནས“སེ་འབྲུའི་ཁྱིམ་གཞི”72བསྐྲུན་པ་དང་། “ཆུང་བ་དྲུག”གི་བྱ་བའི་བཅའ་ཁྲིམས་དང“ལས་གནས་སྟོང་དང་སོ་ལྟ་ཁྲི”སོགས་གཞི་རིམ་བཅོས་སྐྱོང་བྱེད་སྟངས་ཞིང་ཆེན་ཡོངས་སུ་ཁྱབ་གདལ་དུ་བཏང་བ་དང་མི་དམངས་མང་ཚོགས་ཀྱི་བདེ་འཇགས་རང་བཞིན་དང་བློ་ཡིད་ཚིམ་ཚད་ཞིང་ཆེན་ཡོངས་ཀྱི་ཨང་དང་པོར་སླེབས་ཡོད། ང་ཚོས་རིག་གནས་ཀྱི་སྣེ་ཁྲིད་རྒྱུན་འཁྱོངས་བྱས་ནས“མདེལ་གཉིས་སྐར་གཅིག”གི་སྙིང་སྟོབས་རྒྱུན་འཛིན་དང་དར་སྤེལ་གཏོང་ཤུགས་ཆེ་རུ་གཏོང་བ། 221རྟེན་གཞི་ཡི་གནའ་ཤུལ་སྲུང་སྐྱོབ་དང་བེད་སྤྱོད་ཚད་གཞི་མཐོ་བའི་སྒོ་ནས་སྐུལ་འདེད་གཏོང་བ། གསར་བརྗེའི་ཉམས་ཞིབ་ཆས་རྟགས་ཕྱོགས་ཡོངས་ནས་བཏོད་པ། མི་ཁྲི47ལྷག་ཙམ་མཚོ་བྱང་དུ་ཡོང་ནས་གསར་བརྗེའི་ཉམས་ཞིབ་དང་གསར་བརྗེའི་སློབ་གསོ་རོལ་མྱོང་བྱས་ནས་སྙིང་སྟོབས་ཀྱི་བཙན་སའི་ཤུགས་རྐྱེན་མུ་མཐུད་དུ་ཆེ་རུ་ཕྱིན་ཡོད།

དུས་ཚོད་དམ་འཛིན་བྱས་ནས་གྲུབ་འབྲས་གསར་བ་བླངས། འདས་ཟིན་པའི་ལོ་གཅིག་ལ་ཕྱིར་མིག་བལྟས་ཚེ། མཚོ་བྱང་གིས་འཕེལ་རྒྱས་ཐད་གྲུབ་འབྲས་བླངས་ཡོད། ཆེས་རྩ་ཆེ་བ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཡང་དག་པའི་སྣེ་ཁྲིད་དང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་ཁྲིད་སྟོན། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་སྟོབས་ལྡན་མགོ་ཁྲིད། སྤྱི་ཚོགས་ལས་རིགས་སོ་སོའི་སེམས་ཁུར་དང་རྒྱབ་སྐྱོར། ཁུལ་ཡོངས་ཀྱི་གོང་འོག་ཚང་མས་ཐུན་མོང་ཐོག་འབད་བརྩོན་བཅས་ལས་བྱུང་བ་ཡིན། འདིར་ཁུལ་ཡོངས་ཀྱི་རིགས་སོ་སོའི་མི་དམངས་ལ་བླ་ན་མེད་པའི་གུས་བཀུར་ཞུ་རྒྱུ་དང་མཚོ་བྱང་གི་མི་རེ་རེས་དཀའ་སྤྱད་འབད་བརྩོན་དང་འབད་བརྩོན་ལྷོད་མེད། སྒེར་སེམས་མེད་པར་ལེགས་སྐྱེས་ཕུལ་བར་བསྟོད་བསྔགས་བྱས་པ་ཡིན།

དངོས་སྒྲུབ་ཀྱིས་མགོ་གསར་བ་བརྩམ་ནས་འབད་བརྩོན་གྱིས་ལེའུ་གསར་བ་འབྲི། 2025ལོ་ནི“ལྔ་བཅུ་བཞིའི”འཆར་འགོད་ལག་བསྟར་མཇུག་བསྒྲིལ་བའི་ལོ་ཡིན་ལ་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་གསུམ་པའི་དགོངས་དོན་ལག་བསྟར་དོན་འཁྱོལ་བྱེད་པའི་འགག་རྩའི་ལོ་ཡང་ཡིན། ལོ་གསར་པར་རེ་བ་གསར་པ་དང་འབད་འཐབ་གསར་པར་འོད་སྟོང་གསར་པ་དགོས་པ་དང་། ང་ཚོས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱས་ཏེ་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་འགྱུར་མེད་སྟོབས་ལྡན་གྱི་མགོ་ཁྲིད་འོག་བློ་བརྟན་འགྱུར་མེད་དང་དངོས་སྒྲུབ་དོན་གཉེར། ཕན་འབྲས་དངོས་ཐོན་བཅས་ཀྱི“མཚོ་བྱང་དངོས་སྒྲུབ”བྱེད་སྟངས་ལག་ལེན་ཧུར་ཐག་བྱས་ཏེ་ཡིད་ཆེས་བརྟན་པོ་དང་དཔའ་ངར་ཆེན་པོས་སྔོན་ལ་བརྩོན་ལེན་བྱས་ནས་ཧུར་བརྩོན་གྱིས“མཚོ་བྱང་ལྔ”འཛུགས་སྐྲུན་གྱི་ལེའུ་གསར་བ་འབྲི་དགོས།

སྦྲུལ་ལོའི་ལོ་གསར་འདིར་རླབས་ཆེན་མེས་རྒྱལ་གྱི་རི་ཆུ་དར་རྒྱས་ཡོང་བའི་སྨོན་འདུན་དང་མཚོ་བྱང་གི་སང་ཉིན་སྔར་ལས་མཛེས་སྡུག་ལྡན་པ་དང་ཡར་རྒྱས་ཡོང་བ། ཁུལ་ཡོངས་ཀྱི་མི་དམངས་བདེ་ཐང་ཡོང་བའི་བཀྲ་ཤིས་བདེ་ལེགས་ཞུ།

ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར།

རྩོམ་སྒྲིག་འགན་ཁུར་བ། ཀླུ་མགོན་རྒྱལ།

ལྟ་སྐུལ་བ། གཡང་འབུམ་ཚེ་རིང་།

原文来源/海北州委办公室

责编/冷公加

监制/杨本才让

投稿邮箱/3068276991@qq.com

བརྩམས་དབང་རྩོམ་མཁན་ལ་དབང་། དབང་གནོད་ཡོད་ཚེ་འཕྲལ་མར་ང་ཚོར་འབྲེལ་བ་གནང་རོགས།

版权归原作者所有，如有侵权请立即与我们联系

海北祁连山藏文报

འཚོ་བའི་སྣང་བརྙན་རེ་རེ་དང་གསར་བྱུང་ཆ་འཕྲིན་མ་ལུས་ཡོངས་སུ་འདུ་བའི་གངས་ལྗོངས་འཕྲིན་གསར་གྱི་བང་མཛོད།