བཙུན་མའི་བསྟོད་པ་ཉུང་ངུ། ཁྱུང་ཆེན་གྲགས་པ།
文摘
音乐
2024-10-17 16:57
四川
བྱང་ཆུབ་སེམས་སྐྱེ་དོན་གཉིས་མཐར་ཕྱིན་ཤོག།
![]()
གངས་ཅན་གདུལ་བྱའི་མགོན་གཅིག་ཨོ་རྒྱན་མཚོ་སྐྱེས་རྡོ་རྗེ་ལ་ན་མོ།
སྙིགས་མའི་འགྲོ་རྣམས་ཆེས་ཆེར་སྐྱོབ་པ་ཡི།།རྒྱལ་བ་ཀུན་ལས་ལྷག་པའི་ཐུགས་བརྩེ་ཅན།།རྒྱལ་དབང་མཚོ་སྐྱེས་རྡོ་རྗེའི་ཞབས་པད་ནི།།སྲིད་མཐར་བསྙེན་པའི་ཕུན་ཚོགས་བརྟན་པར་ཤོག།བཤང་གཅི་བྱུར་བུར་གཏམས་པ་ཡི།།མི་གཙང་ཁང་ལ་དྲི་ཞིམ་མེད།།ལས་དང་ཉོན་མོངས་དབང་གྱུར་པའི།།འཁོར་བའི་གནས་ན་བདེ་བ་མེད། ། གང་ཞིག་འདི་ལས་ཐར་འདོད་ཀྱི།།རྟོག་པ་གཅིག་གི་བསོད་ནམས་ཀྱིས།།འཇིག་རྟེན་ཕུན་ཚོགས་ཟིལ་གནོན་པའི།།དཔལ་གྱི་རི་བོ་བསྐྲུན་པར་ནུས།།གང་ཞིག་འདི་ལས་འབྲོས་འདོད་ཀྱི།།གོམ་གཅིག་བོར་བའི་ལས་ཀྱིས་ཀྱང་།།བསྐལ་མང་མཐའ་ལ་མྱོང་ངེས་པའི།།སྡུག་བསྔལ་རྒྱ་མཚོ་སྐེམས་པར་ནུས།།མ་རིག་ལིང་ཏོག་གིས་སྒྲིབ་ནས།།སྡུག་བསྔལ་རྒྱ་མཚོའི་གནས་འདི་ལ།།ཐེ་ཚོམ་ཙམ་ཡང་མེད་པར་འཁྱམ།།བདག་གཞན་བར་མས་ཕྱེ་ན་ཡང་།།གཅིག་ཏུ་རྟོགས་ཏེ་གཅིག་ཏུ་འཁྲུལ།།སྔ་ཕྱི་དུས་ཀྱིས་འགྱུར་ན་ཡང་།།རྟག་ཏུ་རྟོགས་ཏེ་རྟག་ཏུ་འཁྲུལ།།ཐར་བའི་གླིང་བགྲོད་ངང་མོའི་ཁྱུ།།དགེ་སྦྱོང་དམ་པའི་ཚོགས་ལ་ཡང་།།གཤེ་སྐུར་དམན་ལྟ་བྱེད་པས་ཀྱང་།།བཅོས་མེད་གདོན་གྱིས་སྙིང་རྩ་བཟུང་།།མི་གཙང་གདོས་བཅས་ཕུང་པོ་རུ།།མི་གཙང་རྣམ་རྟོག་འགེངས་བཞིན་དུ།།གཙང་མར་འདོད་པས་རྒྱན་སྤྲས་ཀྱང་།།མ་རིག་གཏི་མུག་སྨག་ལ་འཇུག།ཞེ་སྡང་སྦྲུལ་གྱི་མགོ་འཕང་མཐོ།།འདོད་ཆགས་མི་གཙང་འདམ་དུ་བྱང་།།དུག་གསུམ་གྱིས་ནི་སློང་བ་ཡི།།སྤྱོད་ལམ་དག་ཀྱང་ག་ལ་བཙུན།།དེ་ལྟས་མཚར་བའི་ལྟད་མོ་ལ།།སྡུག་མོའི་སྐྲ་ལོའི་རྩ་བ་བྲེག།ལས་ཉོན་གཡོག་གི་ལྭ་བ་བརྗེས།།བརྩེ་གདུང་འཆིང་བའི་སྲེད་ཐག་བཅད།།ཐར་བའི་གླིང་དུ་བགྲོད་པ་ཡི།།དགེ་སྦྱོང་ངང་མོའི་ཁྱུ་ཚོགས་བསྟར།།ཞི་དུལ་སྤྱོད་པའི་གོམས་འགྲོས་མཛེས།།སྙིང་རྗེ་འོད་དུ་ཞུ་བ་ཡི།།ངུར་སྨིག་བགོ་བའི་བཀྲག་མདངས་མཛེས།།ཁྲེལ་དང་ངོ་ཚའི་སྒོ་སྡོམ་པས།།ལུགས་གཉིས་ཡོན་ཏན་ཁུར་དུ་ལྕི།།སྡེ་སྣོད་ཆོས་ཀྱི་བགྲོ་བ་སྙན།།འོད་གསལ་རྟོགས་པའི་ཤན་འབྱེད་ཡག།ལུང་རྟོགས་ཉི་ཟླའི་རྒྱན་འཕྲེང་ཅན།།སྲིད་ཞི་ཀུན་གྱི་དཔལ་དུ་གྲགས།།རང་ལུས་རྩེད་ཆས་མི་བྱེད་ཅིང་།།གཞན་ལུས་སྲོག་ལ་མི་འཚེ་ཞིང་།།ལོག་འཚོའི་ཟས་ནོར་སྤོང་བ་ཡི།།ལུས་ཀྱི་སྤྱོད་པས་མཆོག་ཏུ་བསྔགས།།གཞན་མགོ་སྐོར་བའི་རྫུན་མེད་ཅིང་།།མཐུན་པ་འབྱེད་པའི་དབྱེན་མེད་ཅིང་།།སྲེག་པའི་ཚིག་དང་འཁྱལ་བའི་ངག།སྤོང་བས་ངག་གི་ཡོན་ཏན་རྫོགས།།གཞན་ནོར་མི་རྔམ་ཆོག་ཤེས་ཐོབ།།བདེན་པའི་གནས་ལ་སྒྲོ་སྐུར་བྲལ།།ཐུགས་ཀྱི་ཡོན་ཏན་རྨད་དུ་བྱུང་།།ཚངས་སྤྱོད་རྒྱན་གྱིས་མཛེས་པ་དག།ཉིན་གཅིག་འཚོ་ཡང་དགེ་བ་ཡིན།།སྒོ་གསུམ་མི་སྡོམ་འཆལ་བ་དག།ཉིན་གཅིག་འཚོ་ཡང་སྡིག་པ་ཡིན།།རྒྱལ་ལ་སྲིད་ཀྱི་ཉེས་པ་ཡོད།།སྒེག་ལ་འཆལ་བའི་ཉེས་པ་ཡོད།།ཁྱིམ་ལ་འཁོར་བའི་ཉེས་པ་ཡོད།།ཚངས་སྤྱོད་ལྡན་ན་ཉེས་ཟད་ཡིན།། སྲིད་པ་སྐྱོང་བའི་ཁུར་བོར་ཡང་།།སྲིད་པའི་སེམས་ཅན་མི་གཏོང་ཞིང་།།གཅིག་ལ་མཛའ་བའི་སེམས་དབེན་ཡང་།།ཀུན་ལ་བྱམས་སེམས་མི་གཏོང་བའི།།རླབས་ཆེན་ཐུགས་བསྐྱེད་ཡངས་པས་ཀྱང་།།འཇིག་རྟེན་མི་མོའི་མཆོག་ཏུ་བསྔགས།།བསྐལ་པའི་ཡུན་ལ་ཆགས་པའི་བྲན།།སྐལ་བཟང་དེང་འདིར་ཆགས་མེད་གནས།།ཇོ་མོ་བཙུན་མའི་མིང་ཙམ་ཡང་།།ཐོབ་པ་འདི་ཀོ་བསོད་ནམས་ཆེ།།ཐམས་ཅད་ནོར་གྱིས་བསླུས་བསླུས་ནས།།ཅི་ལ་རིན་ཐང་མེད་པའི་དུས།།ཚངས་སྤྱོད་ལྡན་པའི་ལུས་རྟེན་ནི།།དཔལ་གྱི་འཁྲི་ཤིང་བཟང་པོ་ཡིན།།སྡིག་པའི་གཡོག་དང་མི་འདྲ་བས།།ཕ་མའི་དྲིན་ལན་འདི་ཡིས་སོད།།འཁོར་བའི་ཆོས་དང་མི་འདྲ་བས།།འགྲོ་ལ་བདེ་སྐྱིད་འདི་ཡིས་སྤེལ།།སྲིད་ལ་ངེས་འབྱུང་གོམས་པ་དང་།།ཁྲིམས་ལྡན་སྡེ་སྣོད་འཛིན་མ་ཡིས།།འཇིག་རྟེན་དགེ་ལེགས་འཕེལ་གྱུར་ཅིག།ཤིང་འབྲུག་ལོ་སྟེ༢༠༢༤ལོའི་ཟླ་བ་༨པའི་ཚེས་༡༥ལ་ཁྱུང་ཆེན་གྲགས་པས་བྲིས་པ་དགེ་འོ།།
རྒྱ་ཆེན་ཐོས་པ་བསགས་པའི་མཁའ་ལམ་ནས།།
ལྷག་བསམ་སྤྲིན་གྱི་འདུ་བ་རབ་བཀོད་ནས།།
སྤོབས་པའི་ལྕི་བའི་སྤྲིན་གྱི་སྒྲ་དབྱངས་ཀྱིས།།
ཕན་བདེའི་གྲུ་ཆར་རྟག་ཏུ་འབེབས་པར་ཤོག།
བྱང་ཆུབ་སེམས་དཔའི་བསམ་སྤྱོད་ཀྱི་རི་མོ་འབྲི་ཨེ་ཤེས་ལྟ།
