ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༥

དགུང་ལོ། ༩

དེ་ནས་ལོ་ཁྱིམ་དགུ་ལ་བབས་པ་ཡོས་བུའི་ལོ་དགུན་ཟླ་ར་བའི་ཚེས་བདུན་ཉིན་གྱི་ནུབ་མཁའ་འགྲོ་མ་རས་སྔོན་པོའི་ལྭ་བ་གྱོན་པ་ཞིག་ན་རེ། བུ་ཁྱོད་སང་ཕོད་འདི་ནས་ནུབ་བྱང་མཚམས་སུ་འགྲོ་དགོས་པ་བྱུང་ནས། ཨོ་རྒྱན་ཆེན་པོའི་དངོས་སྤྲུལ་བླ་མ་འཇམ་དབྱངས་ཞེས་བྱ་བ་སློབ་དཔོན་ནམ་མཁའི་སྙིང་པོའི་སྐྱེ་བརྒྱུད་དང་འཕྲད་ཀྱི། དེ་ལས་ཡི་གེ་སློབ་ཐབས་ཀྱིས་དང་ཁྱོད་ལ་རིམ་པ་བཞིན་དུ་བདེ་སྐྱིད་ཐམས་ཅད་རིམ་གྱིས་གསལ་འོང་ངེས་པ་ཡིན་ཞེས་ཟེར་ཞིང་ཐོད་པ་མཛེས་ཤིང་ཡིད་དུ་འོང་བ་ཞིག་གནང་ནས་བདུད་རྩི་བླུད་པས་ཧུབ་གཅིག་བྱས་ཚེ་ལུས་ཐམས་ཅད་བདེ་ཀྱི་ལེ་འགྲོ་བའི་ཉམས་ཤིག་ཤར་བྱུང་། མཁའ་འགྲོ་མ་དེ་ཉི་མའི་འོད་ཟེར་ལ་ཞོན་ནས་དགོང་སྔོན་མཐོང་ལ་ཡལ་ཐལ།  

དགུང་ལོ།༡༠

   དེ་ནས་ལོ་ཁྱིམ་བཅུ་པ་ལ་བབས་པ་འབྲུག་གི་ལོ་དཔྱིད་ཟླ་ཐ་ཆུང་གི་ཚེས་གྲངས་ལྔའི་ནུབ་ང་ནི་དམ་ཅན་རྡོ་རྗེ་ལེགས་པ་ཞེས་བྱ་བ་ཡིན་ཟེར་བའི་དགེ་བཙུན་གྱི་ཆས་ཅན་མགོ་ལ་སག་ཞུ་གྱོན་པ་ཞིག སེང་གེ་དཀར་མོ་ཞིག་ལ་ཞོན་ནས་བདག་གི་ཐད་དུ་འོང་ནས་ཁྱོད་ཀྱི་སྔོན་ལས་ཀྱི་འབྲེལ་བའི་བླ་མ་དེས་སྐྱེ་བོའི་ཤེས་རྒྱུད་བསྐུལ་ནས་བསུ་མ་རུ་དབྱར་འབྲིང་བོའི་ཚེས་པ་བཅུ་བཞིའི་ཉིན་མོ་སླེབ་འོང་གིཁྱོད་དགའ་སྤྲོ་དང་བཅས་པས་དེར་འོང་ཐབས་རེམ་ཟེར་ནས་ཡལ་སོང་།ཡང་དབྱར་ཟླ་འབྲིང་པོའི་ཚེས་བདུན་གྱི་ནུབ་རྨི་ལམ་ཉམས་ཀྱི་སྣང་ངོར་མི་དམར་པོ་མེ་ལྕེའི་ལུས་པོ་ཅན་མེ་ཁྱུང་དམར་པོ་རླུང་གི་གཤོག་པ་ཅན་ཞིག་ལ་ཞོན་པ་བདག་གི་ཐད་ཀྱིས་ནམ་མཁའ་ལ་ཕྱིན་ནས་འདི་སྐད་ཟེར།ཀྱཻ།སྔོན་སྨོན་ལས་འཕྲོ་བཟང་པོ་དུས་འཛོམ་པའི་སྐྱེས་བུ་ཁྱོད་དང་ངེས་གཉིས་ཁྱེའུ་ཆུང་ལོ་ཙཱ་ནས་བཟུང་ད་ལྟའི་བར་དུ་སྐད་ཅིག་ཙམ་ཡང་འབྲལ་མ་མྱོང་བས་ཚེ་རབས་ལས་ཀྱི་སྲུངས་མ་ཡིན།འདི་ནས་ཚེས་བཅུ་བཞིའི་ཉིན་མོ་ཁྱོད་ཀྱི་ཞང་པོ་མི་འགྱུར་ཞེས་བྱ་བ་ཁྱོད་འབོད་དུ་འོང་གི་དེ་རུ་བཞུད་ཅིགཅེས་ཟེར་ཞིང་མི་སྣང་བར་གྱུར་ཏོ།དེ་ནས་ཚེས་བཅུ་བཞིའི་ཉིན་ཞང་བོ་སླེབ་པའི་ཟླ་བ་དེ་ཡི་ཕྱི་མའི་ཚེས་བཅོ་ལྔའི་ཉིན་ཞང་པོའི་རྗེས་སུ་འགྲོ་དགོས་པའི་རྨི་ལམ་ཡོད་པ་བདག་གི་ཕ་མ་ལ་སྨྲས་པས་མ་ཡི་ངག་ནས་འདིས་བོར་སྟོར་ལ་སོགས་པའི་ཐག་མ་ཆོད་པ་ཐམས་ཅད་རྨི་ལམ་དུ་བཤད་པ་ཐམས་ཅད་རྫུན་མ་མྱོང་བས་མངག་དགོས་པ་ཨེ་ཡིན་ཟེར་བ་ལ།ཕས་ཀྱང་དེ་བདེན་ཀྱང་འདི་ཤིན་ཏུ་རྒོད་དྲག་པས་གྲི་རུ་ཨེ་འགྲོ་སྙམ་ནས་བློས་མི་ལོངས་པ་ཡིན།གལ་སྲིད་མི་འགྲོ་ཐབས་མེད་པ་ཡིན་ན་ཡི་གེ་མཁས་པར་གྱུར་བ་ཞིག་ནི་སློབ་དགོས་ཞེས་ཟེར་བའི་ལན་དུ།ཞང་པོ་ན་རེ།ཡི་གེ་མ་བསླབ་ཀྱང་ངེད་ཀྱིས་ཁྱིམ་གཞིའི་བདག་པོ་ཞིག་ཨེ་ཡོང་སྙམ་པ་ཡིན།ཞེས་ཟེར་ཞིང་ཁས་མི་ལེན་པར་འདུགདེ་ནས་སང་གི་ཉི་མ་ཞང་པོས་ཁྲིད་དེ་སོང་བས་ཞང་པོའི་ཁྱིམ་དུ་འདུག་ནས་དེར་ཕྱུགས་རྫི་དང་ལས་ཀ་ལ་འབད་དགོས་པ་བྱུང་ཚེ།ཁྲོ་དང་རྫ་མ་ཡོབ་ཆེན་གཞོང་བ་ལ་སོགས་ཀ་ཆ་ཐམས་ཅད་མདའ་ཡིས་ཁྲོལ་མར་ཕུག་པ་དང་བཅག་གྲུམ་བྱས་པས་ཨ་ཕྱི་དང་ཨ་ནེ་གཉིས་ཀྱིས་བུ་འདི་ཐེའུ་རིང་གིས་བརླབ་པ་ཡིན་འདུག་པས་ཡི་གེ་རེ་བསླབ་ན་བན་དེ་རེ་ཨེ་འོང་།དེ་མ་བྱུང་ན་མི་སྐྱ་བྱས་ཚེ་མི་ཕུང་བདག་བརླག་བྱེད་ངེས་པ་རེད་ཟེར་བ་ལ། ཞང་པོས་ཀྱང་དེ་བྱེད་དགོས་ཟེར།

དགུང་ལོ།༡༡ 

       ལོ་ཁྱིམ་བཅུ་གཅིག་པ་སྦྲུལ་གྱི་ལོ་དགུན་ཟླ་ར་བའི་ཚེས་གཅིག་གི་ཉིན་བླ་མ་འཇམ་དབྱངས་མདུན་སར་ཁྲིད་ནས་སོང་ཚེ་བླ་མའི་ཐུགས་དགའ་བའི་བཞིན་མདངས་བསྟན་ནས་བདག་གི་མགོ་ཕྱག་བྱིལ་བྱས་ནས་ཀ་ར་དང་བུ་རམ་བྱིན་ཏེ་མདངས་ངས་རྨི་ལམ་བཟང་བོ་རྨིས་ཤིང་དེ་རིང་ཡང་དགའ་བདེའི་ཉམས་ཤིག་ཤར་བྱུང་བས་བན་དེ་བཟང་བོ་ཁྱད་འཕགས་ཤིག་ཨེ་ཡོང་སྙམ། སོ་སོའི་སྐྱེ་བོ་ལ་ཟག་མེད་ཀྱི་མངོན་ཤེས་ནི་མེད། ཉམས་རྨི་ལམ་ཙམ་ལ་མཆོག་འཛིན་བྱེད་གྱིན་འདུག་པས་དེ་ཚོ་བདེན་ན། བདག་གི་རྨི་ལམ་ཡང་ལོས་བདེན་ཞེས་གསུངས་ནས་ཀ་སྨད་སུམ་ཅུ་པ་ལན་གསུམ་དུ་བསླབ་ནས་སྨོན་ལམ་ཡང་གསུམ་བཏབ་བོ། དེ་ནས་བཟུང་སྟེ་བླ་མ་དམ་པ་དེས་རྗེས་སུ་བཟུང་ཞིང་ཡི་གེ་བསླབ་པ་ཡིན།

དགུང་ལོ།༡༢                     

                     ལོ་ཁྱིམ་བཅུ་གཉིས་རྟ་ཡི་ལོ་ཧོར་ཟླ་བདུན་པའི་ཚེས་དགུའི་ནུབ་བུད་མེད་གཞོན་ནུ་མ་ཟ་འོག་སྔོན་པོའི་སྟོད་གཡོག་དང་། དམར་པོའི་སྨད་དཀྲིས་བྱས་པ་ལ།དར་སེར་པོའི་སྐེད་དཀྲིས་བྱས་པ་བྱུང་ནས།ཁྱོད་དང་ང་གཉིས་བྱང་ཕྱོགས་སིངྔྷིའི་གྲོང་ཁྱེར་དུ་འགྲོ་ཟེར་ནས་ལག་པའི་མཛུབ་མོ་ནས་བཟུང་སྟེ་ཕྱིན་པས་འཇའ་ཚོན་འོད་ཀྱི་དྲྭ་བ་འཁྲིགས་པའི་ཀློང་དུ་མི་མིན་མཁའ་འགྲོའི་གྲོང་ཁྱེར་དུ་ཕྱིན་པ་ན།དེར་མཁའ་འགྲོ་དང་མཁའ་འགྲོ་མའི་སྡེ་ཚོགས་ཐམས་ཅད་ཁྲོམ་འཚོགས་པ་ལྟ་བུར་འདུས་པའི་དབུས་སུ་འཇའ་ཚོན་འོད་ཀྱི་གུར་ཁང་རྡོ་རྗེ་ཕྲ་མོའི་ཕྲེང་བས་བསྐོར་བའི་ཀློང་དུ་ཨོ་རྒྱན་ཆེན་པོའི་སྐུ་བྲིས་སྐུ་ལྟ་བུའི་ཆས་རྒྱན་རྫོགས་པ་ཞིག་གིས་མཁའ་འགྲོ་མའི་ཚོགས་ལ་ངེས་གསང་ཐེག་པ་ཆེན་པོའི་ཆོས་འཆད་པར་འདུག་གོདེ་ཡི་མདུན་དེར་གུས་པས་ཕྱག་འཚལ་ཏེ་ཞབས་ལ་བཏུད་པའི་མོད་ལ་ཞལ་འཛུམ་པ་མཛད་ནས་ཕྱག་གཡས་བདག་གི་མགོ་ཐོག་ཏུ་བཞག་ནས།བུ་ཁྱོད་ཀྱི་རྒྱུད་ལ་དུས་གསུམ་གྱི་རྒྱལ་བ་སྲས་དང་བཅས་པའི་ཐུགས་རྒྱུད་རྣམ་པར་མི་རྟོག་པའི་ཡེ་ཤེས་ད་ལྟ་ཉིད་དུ་འཕོ་བར་གྱུར་ཅིགཁྱོད་ཀྱི་རྒྱུད་སྨིན་ཅིང་གྲོལ་ནས་འབྲེལ་ཚད་རྣམ་པར་གྲོལ་བའི་ས་ལ་འདྲེན་ནུས་པར་ཤོག་ཅིགཅེས་གསུང་ཞིང་ཁྱོད་ང་ཡི་མདུན་སར་སྡོད་ལ་ངས་བཤད་པའི་ཚིག་འདི་ཉོན་ཅིག་གསུངས་བ་བཞིན་བདག་དེ་ལྟར་མདུན་དུ་འདུག་ཅིང་ཉན་པས།སློབ་དཔོན་ཆེན་པོས་འདི་སྐད་དོ།ཁྱོད་ཀྱི་བླ་མ་འཇམ་དབྱངས་ཞེས་བྱ་བ་འདི་བྱང་ཆུང་སེམས་དཔའ་སྒྲིབ་པ་རྣམ་སེལ་གྱི་སྤྲུལ་བ་ཡིན་པས་ཁྱོད་དང་ཚེ་རབས་ལྔ་རུ་འབྲེལ་བའི་བླ་མ་ཡིན་ཏེ།དེའི་བཀའ་བཞིན་ཉོན་ལ་ཡི་གེ་ལ་སྦྱངས་བ་ཐོན་ངེས་ཞིག་ཀྱིས་དང་ཁྱོད་ཀྱི་ཚེ་མཇུག་ཏུ་དགོན་པ་འདི་ལ་ཕན་ཐོག་པ་མུན་པའི་གླིང་དུ་ཉི་མ་ཤར་བ་ལྟ་བུ་ཞིག་འབྱུང་སྟེ།འོད་གསལ་རྫོགས་པ་ཆེན་པོའི་བསྟན་འཛིན་སྤྲུལ་པའི་སྐུ་སྣ་ཚོགས་རང་གྲོལ་ཅེས་པ་ལང་གྲོ་དཀོན་མཆོག་འབྱུང་གནས་དངོས་སུ་འབྱོན་པར་འགྱུར་བ་ཡིན།ང་ཡི་ཕྲིན་ལས་ཀྱི་མངའ་བདག་རྨ་བན་རིན་ཆེན་མཆོག་གི་དངོས་སྤྲུལ་སྐྱེས་བུ་ཨ་རྣམ་ཞེས་བྱ་བས་བསྟན་པ་ལ་སོ་ནམ་བྱེད་ཅིང་།མཐར་ཁོང་གིས་སྔོན་དུས་མྱང་མི་སྣ་བོ་ཆེ་བསྒྲལ་བ་སྨོན་ལམ་ལོག་པའི་སྟོབས་ཀྱིས་སྙི་ལུང་གི་རྒྱལ་འགོང་ཞིག་ཏུ་སྐྱེས་པ་དེས་བར་ཆད་བརྩམས་ཏེ་སྐུ་ཚེ་བསྟུངས་ནས་འགྲོ་དོན་མི་འབྱུང་ལ།དེ་ཡི་འབངས་འཁོར་སྨོན་ལམ་ལས་ཀྱི་འབྲེལ་བས་སྐྱེ་བ་མང་པོར་ཁྱོད་ཀྱི་གདུལ་བྱ་རུ་གྱུར་ནས་བསྟན་པའི་སྲོལ་འཛིན་པ་ཡིན།ཁྱོད་ལ་ད་སྔོན་འཇིགས་སྐྲག་གི་སྣང་བ་ཨེ་བྱུང་གསུངས།དེའི་ལན་དུ་བདག་གིས་འདི་སྐད་ཞུས།ང་ལོ་གྲངས་བདུན་གྱི་དུས་སུ་དགུན་ར་བའི་ཚེས་བཅོ་བརྒྱད་ཀྱི་དགོང་མོ་སྲིང་མོ་ཆེ་བ་དང་འགྲོགས་ནས་བེའུ་ཚོལ་དུ་ཕྱིན་ཚེ་རྡོ་ཕ་བོང་ཞིག་གི་སྟེང་དུ་ཁྲག་ཤ་དང་རྣག་ཐིག་ཆེན་པོ་ཡོད་པ་མཐོང་བས་སྲིང་མོས་འདི་ཅི་ཡིན་ཨ་ཙེ་ཙེ་ཞེས་ཟེར་བ་ལ།ཤིན་ཏུ་འཇིགས་ཤིང་སྐྲག་ནས་ངེད་མིང་སྲིང་གཉིས་བྲོས་ཏེ་རང་ཁྱིམ་དུ་ཕྱིན།དེའི་ལོ་རྒྱུས་ཕ་མ་ལ་བཤད་པས་ཕ་མས་ལྷ་འདྲེའི་ཆོ་འཕྲུལ་རེད་ཟེར་བས་བདག་ཤིན་ཏུ་སྐྲག་ཅིང་འཇིགས་བཞིན་ཉལ་བའི་ཚེ་མིག་བཙུམ་མ་ཐག་ཏུ་སྟེང་ཕྱོགས་ནས་ཁྲག་གི་རྦ་ཀློང་དྲག་པོ་ལྟ་བུར་འབབ་པའི་སྒྲ་ནི་ཀླད་པ་འགས་པ་ཙམ་བྱུང་བ་དང་།ཕྱོགས་མཚམས་ཁོར་ཡུག་ཐམས་ཅད་ནག་ལ་སྟོང་ཧང་ངེ་བར་སྣང་བ་ལ་བྲེད་ཅིང་སྐྲག་པས་ཉལ་མ་སྤོབས་པར་ཡར་ལངས་ཏེ་ངུ་ཤོམ་དྲག་པོ་བྱེད་དགོས་པ་བྱུང་ཞིང་།དེ་ནས་བཟུང་སྟེ་ད་ལ་ཐུག་གི་བར་མིག་བཙུམ་མ་ཐག་ཏུ་དེ་ལྟར་སྣང་བ་ལ།ཁྱད་པར་ལོ་བཅུ་དང་བཅུ་གཅིག་ལོན་ནས་བཟུང་སྟེ་ད་ལྟའི་བར་སྟེང་ན་གནམ་མེད་ཅིང་འོག་ན་ས་མེད་པའི་སྟོང་སང་ངེ་བའི་ཀློང་དུ་ཁྲག་གི་རྦ་ཀློང་ཆེན་པོ་དེ་འོད་ཕུང་དམར་པོ་འཇའ་ཚོན་ལྟ་བུར་གྱུར་ཏེ།དེ་ལས་འོད་ཟེར་དང་འོད་ཕུང་དཔག་ཏུ་མེད་པ་འཕྲོས་པས་ཡུལ་ཡངས་པ་ཆེན་པོའི་སྣོད་བཅུད་ཀྱི་སྣང་བ་སྣང་ལ་རང་བཞིན་མེད་པ་ཆུ་ཡི་ཟླ་གཟུགས་ལྟ་བུར་སྣང་བའི་རྐྱེན་ལ་བརྟེན་ནས་སྣོད་བཅུད་ཐམས་ཅད་རང་སྣང་བདེན་མེད་རྨི་ལམ་ལྟ་བུར་གོ་བ་བྱུང་ལགས།ཞེས་ཞུས་ཚེ།སློབ་དཔོན་ཆེན་པོའི་ཞལ་ནས།བུ་ཁྱོད་ལ་མཁའ་འགྲོ་མ་གིརྟི་དམར་མོས་འཁོར་འདས་རང་སྣང་དུ་སྟོན་པའི་གདམས་པ་མངོན་གྱུར་དུ་བསྟན་པ་ཡིན་པས་ངང་ཤེས་ཏེ་གདེང་ཐོབ་པར་གྱིས་ཤིགཅེས་གསུངས་ཤིང་མི་སྣང་བར་ཡལ་ལོ།དེ་ལྟར་ཐོག་མར་རྐྱེན་དེས་འཇིགས་སྐྲག་བྱུང་བའི་ནུབ་མོ་དེར་ཕ་མ་གཉིས་ཀྱིས་བུ་འདི་འདྲེ་ཡིས་བརླབས་པ་ཡིན་འདྲ་བས།སང་ཉིན་བླ་མ་དྲངས་ཏེ་དབང་རྗེས་གནང་ཞིག་ཞུ་དགོས་ཟེར་ནས་བདག་གི་མགོ་པང་དུ་བླངས་ནས་ནམ་མ་ལང་བར་དུ་འདུག་ཀྱང་འཇིགས་སྐྲག་ལ་ཕན་པ་ནི་མ་བྱུང་།ཕྱིའི་ཉིན་པར་ཇི་ལྟར་ཟེར་བ་ལྟར་བླ་མ་མཚན་བཟང་ཞེས་བྱ་བ་གདན་དྲངས་ནས་གཅོད་དང་དབང་ཁྲུས་ཞུས།ལུང་བསྟན་ཡང་ཞུས་པ་བླ་མའི་ཞལ་ནས།བུ་ཆུང་འདི་འདྲེ་བགེགས་ཀྱིས་བརླབས་པ་ནི་མ་ཡིན་ཏེ།མདངས་སུམ་མཁའ་འགྲོ་མ་ཞིག་གིས་བདག་ལ་སང་གི་བུ་ཆུང་དེ་འདྲེ་གདོན་གྱིས་བརླབས་པ་ནི་མ་ཡིན།སྔོན་གྱི་ལས་འཕྲོ་སད་ནས་རྟོགས་པ་ཀློང་དུ་གྱུར་པའི་ལྟས་ཡིན་ཟེར་བས།སྲུང་བཟློག་དང་རིམ་གྲོ་མི་དགོས་ངེས་པ་རེད་ཅེས་ཐག་བཅད་པར་མཛད། 

དགུང་ལོ།༡༣

ཨོ་རྒྱན་ཆེན་པོའི་གསུང་འདིར་དཔག་ན་ལུང་བསྟན་དེ་ཡང་ལོ་ཁྱིམ་བཅུ་གསུམ་ལ་བབས་པའི་ཧོར་ཟླ་དགུ་པའི་ཚེས་བཅོ་ལྔའི་ནུབ་སྣང་བ་ཐམས་ཅད་ཆོས་ཉིད་སྤྲོས་མཐའ་དང་བྲལ་བའི་དབྱིངས་སུ་ཞིག་སོང་། རེ་ཞིག་གི་ཚེ་སྟོང་ཉིད་ནམ་མཁའ་རྣམ་པར་དག་པའི་དབྱིངས་སུ་མཁའ་ལ་འཇའ་ཚོན་ཤར་བ་བཞིན་མེ་དཔུང་ཆེན་པོ་ཕྱོགས་མཚམས་ཁོར་ཡུག་ཀུན་ཏུ་འབར་བའི་ཀློང་དུ་ཁྲོ་བོ་ནག་པོ་བེར་ནག་བགོས་ཤིང་གྲི་ཐོད་བསྣམས་ནས་ཙན་དན་གྱི་བིང་ཆེན་སྐེད་དུ་བཙུག་པ་འཇིགས་རྔམ་བལྟར་མི་བཟོད་པ་ཞིག་གིས་ན་རེ།བུ་ཁྱོད་མ་འཇིགས་ཤིགམ་སྐྲག་ཅིགང་ནི་སྟེང་ལྷ་ཁམས་ནས་འོང་བ་ཡིན།ཕོ་རྒྱུད་དབང་དུ་སྡུད་པའི་ཐབས་མཆོག་ཁྲོ་བོ།མོ་རྒྱུད་དབང་དུ་བྱེད་པའི་ཤེས་རབ་ཁྲོ་མོ་ཡང་ཡིན།ཁྱོད་རང་གི་བླ་མ་འདི་ཀའི་བཀའ་བསྲུང་གི་མཆོག་ཆེན་པོ་ང་ཡིན།བླ་མ་འདིའི་གདུང་རྒྱུད་ལ་བར་དུ་གཅོད་པའི་རྒྱལ་འགོང་མ་གི་ཨེ་རི།གནས་འདི་ནས་གཞན་དུ་མ་འཕོས་ན་མི་རྒྱུད་ཀྱི་མཐའ་ནི་ཕྲ་མོར་འགྱུར་ཞིང་ལོངས་སྤྱོད་ཀྱི་དཔལ་རྨི་ལམ་དང་མཚུངས་པ་ཞིག་འབྱུང་ངེས་པ་ཡིན་པས་དེ་ཚུལ་མ་བརྗེད་པར་ཡིད་ལ་ཟུངས་ལ་སྨོས་ཤིགས་གནས་ཕུང་བཤིག་གི་ཤུལ་ཡིན་པ་དང་།རྒྱབ་རི་རྒྱུན་ཆད་པ་དང་།ཆུ་ཀློང་ཀླུ་བདུད་ཀྱིས་ཞགས་ཁུག་ཏུ་འདུག་པས་ལེགས་ཉེས་སྤྲིན་བར་གྱི་ཉི་ཞལ་ལྟ་བུར་རེས་མོས་སུ་བྱེད་པ་ཡིན།གནས་གཞན་དུ་འཕོས་པ་གལ་ཆེ་བ་ཡིན་པས་དེ་ལུགས་སེམས་ལ་ཞོགད་ལོ་ཁྱོད་ཀྱི་ཞང་པོ་འདིའི་ཚེ་ལ་བར་དུ་གཅོད་པའི་རྒྱལ་འགོང་གདུག་པ་ཅན་ཁ་དར་བ་སུས་ཀྱང་བཟློག་མེད་ཡིན།ཁྱོད་ཀྱིས་ཉི་མ་སང་ཉིན་ནས་གནོད་སྦྱིན་ཤན་པ་དམར་ནག་གི་དབང་ལུང་ཞུས་ལ་གསོལ་མཆོད་ལ་འབད་པར་བྱས་ན་རྒྱལ་འགོང་གིས་མི་ཚུག་གོཞེས་ཟེར་ཞིང་མི་སྣང་བར་ཡལ་ལོ།དེ་བཞིན་དུ་བླ་མ་ལ་ཞུས་ཚེ་བླ་མའི་ཞལ་ནས་དེ་ང་ཡིས་བསྒྲུབ་པའི་ལྷ་མ་ནིང་ནག་པོ་ཡིན་པ་འདྲ་སྟེ།གཞན་ལ་བཤད་ན་བྱིས་པའི་རྨི་ལམ་ལ་བདེན་པ་མེད་ཟེར་ནས་ཀུན་གྱིས་འཕྱ་བགད་བྱེད་པ་ལས་འོས་མེད་མོད། ཁྱེད་རང་ལ་ངས་གནོད་སྦྱིན་ཤན་པའི་དབང་ལུང་སྦྱིན་གསུངས་ནས་དབང་ལུང་གནང་སྟེ་བཀའ་གཏད་སྨོན་ལམ་བཏབ།

 དགུང་ལོ།༡༤

                             ལོ་ཁྱིམ་བཅུ་བཞི་ལ་བབས་ཚེ་ཧོར་ཟླ་དང་པོའི་ཚེས་བཅུའི་ནུབ་མཁའ་འགྲོ་མ་སྔོ་སེང་བ་གཡུ་ཡི་ཕྲེང་བས་ལུས་རབ་ཏུ་བརྒྱན་པ་ཞིག་གིས་འདི་སྐད་ཟེར། མ་གི་རྒྱལ་འགོང་གདུག་པ་ཅན་དེས་ཁྱོད་ཀྱི་ཞང་པོ་དང་བཙུན་པ་ཁྱུག་སྔོན་གཉིས་ཀྱི་བླ་ཁྱེར་ཐལ་བས་སྟོན་ཟླ་ར་བའི་ནང་དུ་ཤི་འགྲོ་སྟེ་བཟློག་པའི་ཐབས་ནི་ཕུར་བའི་བསྙེན་བསྒྲུབ་ལ་གཟབ་ན་ཡོད་ཅེས་ཟེར། ནངས་པར་དེ་ལྟར་སྨྲས་པས་ཁྱོད་ཀྱིས་ཅི་ཡང་མི་ཤེས་ཟེར་ནས་མགོ་ལ་ཐལ་མོས་བརྒྱབ་ནས་སོང་ངོ། སྟོན་ཟླ་ར་བ་ལ་གཉན་རིམ་མཆེད་ནས་ཞང་པོ་ཡང་མགུལ་སྐྲངས་ནས་ཤི་སོང་ངོ། དགུན་ཟླ་ར་བའི་ཚེས་གསུམ་གྱི་ནུབ་མོ་རྨི་ལམ་ན་བུད་མེད་རྒན་པོ་ཞིག་དང་བན་དེ་གཉིས་བསྡེབ་ནས་ཁྱོད་འགྲོ་རན། འུ་ཅག་ཡུལ་མ་ཀི་ན་ཤིན་ཏུ་སྐྱིད་པའི་གནས་ཤིག་ཡོད་པས་དེར་འགྲོ་ཟེར་བྱུང་བའི་མོད་ལ་ངས་འགྲོ་གྲབས་བྱས་པའི་ཚེ། མི་དམར་པོ་ཁྱུང་དམར་ལ་ཞོན་པ་ཞིག་བྱུང་ནས་བུ་ཁྱོད་འགྲོ་མི་རུང་། ཁྱོད་ཀྱི་དམིགས་པ་འདི་བཞིན་དུ་མཛོད་ཅིག སྲོག་གཅོད་ཀྱི་ལག་ཏུ་ཤོར་ཟིན་ཏེ། འདི་ལྟར་སོམས་ཤིག ཡིད་ལ་གྱིས་ཤིག

                             ཧཱུཾཿ །རང་གི་ལུས་ངག་ཡིད་གསུམ་ནི༎སྟོང་པར་གྱུར་ཏེ་སྟོང་དབྱིངས་ལས༎བླ་མ་ཡི་དམ་གཉིས་མེད་པའི༎ངོ་བོ་གུ་རུ་དྲག་པོ་ནི༎དམར་ནག་ཞལ་གཅིག་ཕྱག་བཞི་པ༎ཞལ་གདངས་ལྗགས་འདྲིལ་མཆེ་བ་གཙིག།སྨྲ་ར་སྨིན་མ་མེ་སྟག་འཕྲོ༎ཁམས་ནག་དབུ་སྐྲ་གྱེན་དུ་བརྫིས༎དང་པོ་ཕྱག་གཉིས་རྡོ་རྗེ་དང་༎ཁ་ཊྭཾ་རྩེ་གསུམ་མཁའ་ལ་ཕྱར༎ཐ་གཉིས་ཕུར་བ་ལྕགས་སྡིགས་བསྣམས༎སྐུ་སྨད་ལྕགས་སྲེག་ཕུར་བའི་དབལ༎རྒྱལ་བསེན་གདུག་པའི་སྙིང་ཀར་གདབ༎བསྐལ་བའི་མེ་དཔུང་ལྟ་བུའི་ཀློང་༎ཧཱུཾ་སྒྲ་འབྲུག་སྟོང་ལྡིར་བཞིན་སྒྲོག།ཁྲོ་ཆུང་ལྕགས་སྡིག་ཚྭ་ཚྭ་ཡིས༎རྒྱལ་བསེན་གདུག་པ་ཀུན་གཞོམ་གྱུར༎ཨོཾཨཱཿཧཱུཾ་ཨརྩིག་ནེ་རྩིག་ན་མོ་བྷ་ག་ཝ་ཏེ་བཛྲ་ཀི་ལི་ཀཱི་ལཱ་ཡ་སརྦ་བིགྣན་བཾ་ཧཱུཾ་ཕཊཿཅེས་ཟློས་ཤིགདེ་བཞིན་དུ་གསལ་ནས་སྔགས་བཟླས་པས་རྒྱལ་བསེན་གཉིས་ཀ་བརྒྱལ་ནས་སར་འགྱེལ།ཡུན་ཅིག་གི་ཚེ་བརྒྱལ་སངས་མ་ཐག་རིང་མོ་ཞིག་ཏུ་བྲོས་ནས་ཡལ་སོང་།དེ་ནས་མི་དམར་ནག་དེས་འདི་སྐད་ཟེར།བསྐལ་བ་སྔོན་ནས་བུ་ཁྱོད་དང་སྲུངས་མ་ང་གཉིས་ཀ་སྐད་ཅིག་ཙམ་ཡང་འབྲལ་མ་མྱོང་བས་ང་ལ་བློ་སྙིང་རྩེ་གཅིག་གཏོད་དང་བར་ཆད་ཐམས་ཅད་གཞོམ་པར་བྱེད་དོ།ཞེས་ཟེར་ཞིང་གཉིད་ལས་སད་དོ།    །

                             ཡང་ལོ་ཁྱིམ་དེ་ཡི་སྟོན་ཟླ་འབྲིང་པོའི་ཚེས་བཅུའི་ནུབ་མི་དམར་འཇིགས་སུ་རུང་བ་བཙན་རྟ་དམར་པོ་ཆིབས་པ་ཞིག་གི་ན་རེ། སྤྲུལ་སྐུ་འཇིགས་དགའ་ལ་ངས་འདི་སྐད་ཟེར་གྱིན་ཤོད།ཁྱོད་ཀྱིས་སྔོན་གནོད་སྦྱིན་ཤན་པས་བཤད་པའི་ལྷ་འདྲེ་དེ་འདྲ་བསྒོམས་ལ་སྔགས་དེ་ཟློས་ཤིགསྙི་སྨད་རྒྱལ་འགོང་འདིས་ཁྱོད་ལ་སྐབས་ལྟ་ཀླགས་ཚོལ་བྱེད་པར་ཉིན་མཚན་ཀུན་ཏུ་ཁྱི་འཁྱམས་ལྟ་བུར་ཉུལ་འདུག་པས་ཐུགས་དམ་གཟབ་པ་གལ་ཆེ།དེ་ལྟར་ངས་ཟེར་བ་སྨོས་ཤིགདགོན་པ་འདིར་གནས་པ་རྣམས་ཀྱིས་ཀྱང་ཕུར་པའི་ཟླ་སྒྲུབ་དམ་རྒྱ་ཅན་རེ་མ་ཆགས་ན་ལེགས་ལེགས་འདྲ་ཡང་བསྒྲུབ་མི་དཀོན་པས་བཤད་དོན་ཆུང་ཞེས་ཟེར།བུ་ཁྱོད་རིག་འཛིན་བདུད་འདུལ་རྡོ་རྗེ་དངོས་ཡིན་ཡང་ད་དུང་སྨྲས་པ་ལ་དགོས་པ་མེད་ཞེས་ཟེར་ཞིང་མི་སྣང་བར་ཡལ།དེ་ནས་ཞག་གསུམ་གྱི་ཉིན་སྤྲུལ་སྐུ་འཇིགས་དགའ་ལ་དེ་སྐད་སྨྲས་པས་འཇིགས་དགས་ན་རེ།དེ་རྨི་ལམ་རྟགས་ཅན་ཡིན་ངེས་པས།ད་ང་རང་གིས་གནམ་ཆོས་ལས་བྱུང་བའི་གུར་དྲག་ཕུར་མཇུག་ཅན་ཉིད་དེ་རིང་ནས་ངེས་པར་བསྒྲུབ་རྒྱུ་ཡིན་ཟེར་ནས་ཟླ་བ་གཅིག་ལ་དམ་རྒྱ་བྱས་ནས་བསྒྲུབ་པ་ལ་ཞུགས་སོ།ལོ་ཁྱིམ་དེ་ཡི་ཧོར་ཟླ་བཅུ་གཉིས་པའི་ཚེས་ལྔའི་ནུབ་སྙི་སྟོད་སེ་ར་དགོན་པའི་གཡོན་ཕྱོགས་ཀྱི་ཆུ་ཆེན་པོའི་ཕ་རིས་བྲག་ཕུག་གི་སྒོ་ཐད་དུ་མཚེར་སྤོས་པའི་ནུབ་བྱིས་པ་སྐད་གསེང་བ་ཞིག་གིས་ང་ཡི་མིང་ནས་ལན་གསུམ་འབོད་པ་ལ།སྐད་ལན་མ་བྱས་པར་ཉལ་བས་གཉིད་དུ་སོང་།ཡང་ནམ་ཕྱེད་ཙམ་དུ་འབོད་དུ་བྱུང་བ་ལ་ལན་མ་བཏབ།ཡང་ནམ་གྱི་སྨད་དུ་འབོད་བྱུང་ཚེ་གནོད་སྦྱིན་ཤན་པ་དམར་ནག་གིས་ངར་སྐད་ཀྱིས་ཀྵཿསྒྲ་འབྲུག་ལྟར་སྒྲོགས་ཤིང་ནམ་མཁའི་ཁམས་སུ་བྱོན་ནས་འདི་སྐད་ཟེར།ཁྱོད་ཀྱིས་ཤིང་མདའ་ཤིང་གཞུ་ཟུངས་ལ་འབོད་པའི་སར་ཕྱིན་ཅིག་ཟེར།བདག་གིས་མདའ་གཞུ་བཟུང་ནས་འབོད་པའི་སར་སོང་ཚེ་རྟ་སྒ་ཞིག་གི་ཡོབ་ཆེན་གྱི་ཐོག་ཏུ་བྱིས་པ་གཅེར་བུ་ཞིག་གིས་མིག་ཁྲ་ཧྲིག་གེར་བདག་ལ་བལྟ་འདུག་པ་ལ་མདའ་ཡིས་བརྒྱབ་པས་ངུ་ཚམ་མེ་སོང་བ་བདག་གི་ཨ་ཕྱིའི་ཡང་ཐོས།ནངས་པར་སྐྱེར་མདས་ཡོབ་ཆེན་ཐལ་མར་ཕུག་ཡོད་པ་ལ་ཨ་ཕྱི་ན་རེ།ལྕགས་ཤིང་གིས་ཕུག་པ་འདི་ཡང་ན་གྲུབ་རྟགས་ཤིག་ཨེ་ཡིན།ཡང་ན་ལྷ་འདྲེ་ཞིག་གི་ཆོ་འཕྲུལ་ཡིན་ཟེར་ཞིང་།བླ་མར་དྲིས་པས་བླ་མའི་ཞལ་ནས་བུ་འདི་སྐྱེ་བ་བཟང་བོ་ཞིག་ཡིན་པ་འདྲ་བས་གྲུབ་རྟགས་ཡིན་ཐང་ཟེར།དེ་ཡི་ཕྱི་ནུབ་བུད་མེད་ཤིན་ཏུ་མི་སྲུན་པ་བལྟར་མི་བཟོད་པ་ཞིག་བྱུང་ནས།དེ་ན་རེ།ཁྱོད་ཀྱིས་མདངས་སུམ་ངའི་བུ་བསད་པའི་ལན་དུ་ངས་ཁྱོད་ཀྱི་གློ་སྙིང་དམར་ཙ་རེ་འཁྱེར་རྒྱུ་ཡིན་ཟེར་ནས་ལྕགས་ཀྱི་སེན་མོ་མཐོ་གང་ཙམ་གྱིས་ངའི་སྙིང་ལ་གཟིར་བྱུང་ཚེ། ནམ་མཁའི་མཐོངས་ནས་གནོད་སྦྱིན་ཆེན་པོའི་རལ་གྲི་མེ་འབར་བས་བུད་མེད་དེ་ཡི་ལུས་ལ་བརྒྱབ་པས་ལུས་སྙུགས་མ་བཀས་པ་ལྟར་བཀས་ཐལ་ཚེ་མི་སྣང་བར་ཡལ་སོང་།

མུ་མཐུད་དུ་འགོད་རྩིས་ཡིན།

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔