བྱང་ཆུབ་སེམས་སྐྱེ་དོན་གཉིས་མཐར་ཕྱིན་ཤོག
བདུད་འཇོམས་གླིང་པའི་གསོལ་འདེབས།
敦珠林巴祈祷文
བསླུ་མེད་དཀོན་མཆོག་གསུམ་གྱི་ངོ་བོ་ཉིད།།
勒米贡乔桑杰欧窝尼
真实无欺三宝之本性
སྐུ་གསུམ་རྒྱལ་བ་རྒྱ་མཚོའི་སྤྱི་གཟུགས་མཆོག།
革森嘉瓦降措杰热乔
三身善逝海众妙总集
ཁམས་གསུམ་ཆོས་ཀྱི་རྒྱལ་པོ་རྫོགས་ཆེན་པ།།
堪森秋吉嘉波竹钦巴
三界法王大圆满上师
བདུད་འཇོམས་གླིང་བའི་ཞབས་ལ་གསོལ་བ་འདེབས།།
敦珠朗威亚拉所瓦得
降魔尊者足下诚祈祷
འཁོར་འདས་དག་མཉམ་ཆོས་ཉིད་རོལ་བ་རུ།།
括迪达酿秋涅若瓦热
轮涅平等净法界游戏
རྟོགས་གྲོལ་མངོན་གྱུར་སངས་རྒྱས་འགྲུབ་པར་ཤོག།
多卓温杰桑吉托巴效
证解显现觉者愿成就
རྣམ་ཐར་ཡོངས་རྫོགས་སྒྲོག་འདོན་བྱས་ཟིན་པས་མུ་མཐུད་དུ་སྤེལ་རྩིས་ཡིན། གདོད་མའི་མགོན་པོའི་རང་ཞལ་མཇལ་བའི་རྒྱུར་གྱུར་ཅིག །
དགུང་ལོ། ༤༤
དེ་ནས་ལོ་གྲངས་བཞི་བཅུ་ཞེ་བཞི་ལ་བབས་པའི་ཚེ། ཧོར་ཟླ་དང་པོའི་ཚེས་བཅུའི་ནུབ་མོ་མཁའ་འགྲོ་སྣང་སྲིད་དབང་མོ་ཞེས་བྱ་བ་ཡིན་སྐད་པའི་བུད་མེད་ལྗང་མོ་གཡུ་ཡི་ཁ་དོག་འཆང་བ་རུས་པའི་རྒྱན་དྲུག་གིས་སྤྲས་པ་ཞིག་གིས་ན་རེ།བསྐལ་མང་ལས་སྨོན་རྟེན་འབྲེལ་གྱི༎མཐུ་དང་ལྡན་པའི་སྐྱེས་བུ་ཉོན༎ཕོ་ཉས་བསྐུལ་བ་དོན་ཡོད་ཀྱི༎དགོས་པ་ཤིན་ཏུ་ཆེ་བའི་ཕྱིར༎རྫ་རྒྱལ་དཔའ་བོའི་ཉེ་འདབས་སུ༎སོངས་ལ་ཡུན་གཅིག་དེར་བཞུགས་ཤིག།རྨ་རྒྱལ་སྦོམ་རས་ལོངས་སྤྱོད་སྟེར༎རྫ་རྒྱལ་དཔའ་བོས་ཞབས་ཏོག་ཡོད༎དེ་ནས་སྦྲུལ་གྱི་ལོ་ཁྱིམ་དུ༎གསེར་གྱི་ལུང་པར་བཞུད་ལ་སོངས༎སློབ་མའི་འདུ་བ་རྒྱས་པ་དང་༎སྙན་དང་གྲགས་པའི་དཔལ་ཡང་ཡོད༎གནས་འདིར་ཡུན་རིང་སྡོད་དྲགས་ན༎འཇིགས་པ་ཆེན་པོ་ཐོག་ཏུ་འབེབས༎དེ་ཕྱིར་དེ་དོན་ཤེས་པར་གྱིས༎ལོ་ཁྱིམ་འདི་ཟད་ཕྱི་མའི་དུས༎ནག་པོ་བདུད་ཀྱི་རྒོལ་བ་ལས༎སྲིད་པའི་བོང་བུ་ནག་པོ་རྙེད༎ཕྱུག་ལ་ཧབ་ཤ་བྱེད་པ་འབྱུང་༎གཟའ་བདུད་ནག་པོ་ཆེན་པོ་དེ༎བདུད་དཔུང་འཇོམས་པའི་ཕོ་ཉར་མངོགས༎ངན་པའི་རྐྱེན་གྱིས་འཚེངས་དུས་ཡོད༎ཅེས་ཟེར་ཡལ།དེ་ནས་དབྱར་ཟླ་འབྲིང་པོའི་ཚེས་གཅིག་གི་ཉིན་བྱང་རྫ་ཆུ་ཁ་རུ་བཤུལ་ལམ་ལ་ཞུགས་ནས་ཕྱིན་ཚེ་རྨ་སྟོད་ནས་འབྲོང་སུམ་བརྒྱ་ཙམ་ཞིག་བདག་ཅག་དང་ལྷན་གཅིག་ཏུ་འགྲོགས་པའི་ཚུལ་དུ་ཞག་གསུམ་གྱི་བར་ཉིན་མོ་སྔ་ལོགས་སུ་འགྲོ།མཚན་མོ་ཉེ་སར་གནས་བར་བྱེད་པ་དེ་བདག་གིས་རྨ་རྒྱལ་གྱི་བསུ་སྐྱེལ་དུ་གོདེ་ནས་ནུབ་གཅིག་རྨི་ལམ་ན་ཞིང་སྐྱོང་ཀུན་དགའ་གཞོན་ནུས་ང་སྔོན་དུ་འགྲོ་སྟེ་འཚམས་སྤྲུལ་ལ་སྔ་ཞུས་བཏང་ནས་གནས་ཚང་ལེན་དགོས་ཟེར་ནས་སོང་།དེ་ནུབ་འཚམས་སྤྲུལ་པས་མདངས་སུམ་མི་ནག་པོ་སེང་གེའི་མགོ་ཅན་བེར་ནག་གྱོན་ཞིང་རྟ་ནག་རྟིང་དཀར་ལ་ཞོན་པ་ཞིག་གིས་གནས་ཁང་ལ་མདུང་རྟིང་གིས་བརྒྱབ་ནས་ངེད་ལ་གནས་ཁང་ཕྱུངས་ཤིག་ཟེར་ཞིང་སོང་བའི་གཏེར་སྟོན་རིན་པོ་ཆེ་དཔོན་སློབ་སང་ཉིན་བྱོན་འོང་བའི་བཅའ་ལག་སྦྲ་ནང་དུ་སྤོས་གསུངས་ནས་གནས་ཁང་ཕྱུངས།དེ་ཉིན་མ་མོའི་དྲིལ་དཀར་དུ་ཞག་ས་བྱས།དེ་ཉིན་རྫ་རྒྱལ་དགོན་ནས་བསུ་མ་བཏང་བ་དང་འཕྲད།དེ་ཡི་ཕྱི་ཉིན་རྫ་རྒྱལ་དགོན་དུ་སླེབ་ཚེ་སེར་སྦྲེང་གིས་བསུ་བ་བྱས།འཚམས་སྤྲུལ་དཔོན་སློབ་གསུམ་ཀྱང་བསུ་མར་བྱུང་བ་དང་འཕྲད་དེ་བདག་གི་བུ་ཆུང་ཁྲི་རུ་མངའ་གསོལ་ཏེ།འཚམས་སྤྲུལ་རིན་པོ་ཆེའི་གཟིམ་ཁང་དུ་གནས་ཁང་བྱས་ནས་བསྡད།དེ་ཡི་ཞག་བདུན་ལ་བབས་པའི་ནུབ་ཀློང་ཆེན་རྡོ་རྗེ་གཟི་བརྗིད་དང་ཞལ་མཇལ་ནས་རྫོགས་པ་ཆེན་པོའི་གདམས་པ་ཡོངས་སུ་རྫོགས་པ་གནང་ནས་བཀའ་གཏད་དང་བཅས་པ་རྫོགས་པར་བྱས་སོ།དེ་ནས་ཡང་འདི་སྐད་གསུངས།ཁྱོད་ཀྱི་བུ་འདི་ང་ཡི་སྤྲུལ་པ་རིག་འཛིན་འཇིགས་མེད་གླིང་བ་ཞེས་བྱ་བ་ཡིན་ཏེ།འཚམས་སྒྲུབ་ལ་འབད་པ་ཐོན་ནས་རྟོགས་པ་ཕུལ་ཏུ་ཕྱིན་པ་ཞིག་འབྱུང་བར་གྱིས་ཤིག་དང་བསྟན་དང་འགྲོ་བ་ལ་ཕན་འགའ་ཐོགས་པར་འགྱུར་སྙམ་གྱི།ཞེས་གསུངས་ཤིང་མི་སྣང་བར་ཡལ་ལོ།དེ་ནས་དབྱར་ཐ་ཆུང་གི་ཚེས་དགུའི་ནུབ་མོ་ཡང་མཁའ་འགྲོ་མ་ཞིག་གིས།སང་ཉིན་དཔལ་སྤྲུལ་པའི་མདུན་དུ་བུ་ཆུང་ཁྲིད་སོང་ལ་བཤད་པ་འགའི་བཀའ་ལུང་ཞུས་ན་འཐོབ་པར་འགྱུར་བ་ཡིན།ཞེས་གསུངས།ཚེས་བཅུའི་ཉིན་དཔལ་སྤྲུལ་པའི་མདུན་དུ་སླེབ་ཚེ་ཚོགས་མཆོད་བྱས་ནས་དྲངས་བ་ལེན་སྐབས་སུ་ཐུག་པས།བླ་མའི་ཞལ་ནས་རྟེན་འབྲེལ་ཤིན་ཏུ་ལེགས་པས་དྲང་དེ་འདི་གཉིས་ལ་བྱིན་གསུངས་བཞིན་དུ་མཁྱེན་སྤྲུལ་དང་ངེད་གཉིས་ཀྱིས་དྲངས་བ་ཐོབ་པས་དགའ་སྤྲོ་དཔག་ཏུ་མེད་པ་བྱུང་།སྤྲུལ་སྐུ་འདིར་བཞུགས་ན་ཆོས་ཁྲིད་རྣམས་འཐོབ་འོངས་གསུངས་བཞིན་དེར་བསྡད་པས་སྤྱོད་འཇུག་དང་།མངོན་རྟོགས་རྒྱན།དབུ་མ་འཇུག་པ།གསང་བ་སྙིང་པོ་སོགས་ཁྲིད་ལུང་མང་པོ་ཞིག་ཡོངས་སུ་རྫོགས་པ་གསུངས་པ་ཐོབ་བྱུང་།དེ་ནས་མཁྱེན་སྤྲུལ་དཔོན་སློབ་དགོན་དེར་བཞུགས་ནས།རང་ཅག་དཔོན་སློབ་ལྔ་ཙམ་དགུན་ཟླ་འབྲིང་པོའི་ཚེས་གསུམ་ཉིན་རང་ཡུལ་ལ་བཏེགས་ཚེ་ཁ་བ་ཆེན་པོ་འབབ་རྒྱུ་བྱེད་པ་ལ་སྐྲག་ཅིང་འཇིགས་ནས་འགྱོད་དུ་ཡོད་པའི་ནུབ་གནོད་སྦྱིན་ཤན་པ་དམར་ནག་གིས།ཁྱེད་རྣམས་མ་འཇིགས་མ་སྡུག་དང་ཁ་བ་ངས་གཅོད་ཀྱིས་སྔར་བབས་ཟིན་པ་དེ་ལས་མི་བཏང་ཟེར་བ་རྨིས།དུས་དེ་ནས་བཟུང་སྟེ་དགུན་ཐོག་དེ་རུ་ཁ་བ་བབས་མ་མྱོང་།
དགུང་ལོ། ༤༥
དེ་ནས་ལོ་གྲངས་བཞི་བཅུ་ཞེ་ལྔ་ལ་བབས་པའི་ཧོར་ཟླ་གཉིས་པའི་ཚེས་ལྔ་ཉིན་ཆོས་སྐོར་ལྷ་བསྟེན་གྱི་སྒ་མ་བླང་། ཁོ་བཙོན་དུ་བཟུང་སྟེ་བཙོན་ལས་མང་པོ་བྱས། དེ་ནས་ཁ་མཆུ་བསྡུམ་པའི་མི་དྲག་ཤོས་འགའ་བྱུང་ནས་བཤད་པའི་ཚེ་གྱོད་བཅད་ནས་ཁོང་རྣམས་རང་ཡུལ་ལ་ཤོར་སོང་། དབྱར་ཟླ་ཐ་ཆུང་གི་ཚེས་གྲངས་བཅུ་གཉིས་ཀྱི་ཉིན་གནོད་ལན་དུ་ཕྱུགས་རྣམས་དེད་ནས་སོང་ཚེ། བདག་དཀར་སྡོམ་ལ་སོང་ནས་ཁྱིམ་ན་མེད་པའི་སྐབས་ཤིག་ལ་ཐུག་པས་འབོད་དུ་བྱུང་ནས་རང་ཁྱིམ་དུ་སླེབ་པར་བྱས། ཀུན་གྱིས་ད་ནི་མཐུ་བྱེད་དགོས་ཟེར་བ་ལ་བདག་གིས་ཟླ་བ་ཡར་འཕེལ་ལ་མཐུ་བྱས་ན་ཐུབ་པར་དཀའ་སྟེ་ཟླ་བ་མར་འགྲིབ་ལ་རྦད་དགོས་ཞེས་སྨྲས་ནས་ཚེས་བཅུ་བདུན་གྱི་མུན་དགུང་མཚམས་སུ་རང་གི་གཏེར་ཁའི་གཟའ་རྒོད་རྦད་པས་དེ་ནུབ་དགྲ་བོའི་ཁྱིམ་དུ་གཟའ་བབས། དེའི་ཕྱི་ཉིན་སྦྲ་ཐོག་ཏུ་སྦྲུལ་ནག་གདུང་མ་ཙམ་ཞིག་གིས་འཁྱིལ་འགྲོས་བྱས། གཞན་ཕྱུགས་མང་པོ་གཟའ་གྲིབ་ཀྱིས་ཤི དགྲ་བོ་དེ་དཔོན་གྱི་བཙོན་ཁང་དུ་འཕངས་ནས་སྡུག་བསྔལ་མང་པོ་ཐོག་ཏུ་བབས། དེ་ནས་བདག་གིས་ཡི་དམ་གྱི་ཞལ་ཧོམ་འབུམ་ཕྲག་གྲངས་ལོངས་པར་བྱས་ཚེ་དགྲ་བོའི་ཞིང་གི་སྟེང་དུ་སེར་བ་ཆེན་པོ་བབས་པས་རི་ཆེན་པོ་སྙིལ་ནས་ཞིང་ར་ཉིས་ཞེས་བྱ་བ་དངུལ་རྡིལ་ཚད་གསུམ་གྱི་རིན་ཐང་ཅན་རྡོ་སྤུངས་བསལ་མི་ནུས་པས་བཀབ་སོང་། གཞན་ཡང་ཡུལ་ཕྱོགས་དེ་དག་གི་ཞིང་རྣམས་སུ་འབྲས་བུ་ཕུལ་གང་ཙམ་ཡང་མ་ལུས་པར་བཅོམ་ནས་མུ་གེ་ཆེན་པོ་བྱུང་སྟེ་ང་ཡི་གནག་ཕྱུགས་རྣམས་ཕྱིར་གཏད་ནས་གྱོད་ཡག་པོ་བྱུང་ཡང་མཐར་དགྲ་བོ་ཕུང་བརླགས་སུ་སོང་ནས་མཐུ་ཡི་གྲགས་པ་ཐོབ་སྟེ་སྔར་ཉེས་མཐར་འཚེངས་ཟེར་བའི་མཁའ་འགྲོའི་ལུང་བསྟན་ཐོག་ཏུ་ཕེབས་པ་བྱུང་།
དགུང་ལོ ༤༦
དེ་ནས་ལོ་བཞི་བཅུ་ཞེ་དྲུག་ལ་བབས་ཚེ། གསེར་སྟོད་བླ་མ་རུང་དུ་འགྲོ་སྙམ་ནས་ཕོ་ཉ་མི་གསུམ་སྔོན་དུ་བཏང་བས་སྨར་སྟོད་གཡུང་དྲུང་ལྕགས་རྩེས་ཀོ་ལོང་བསྡམས་ནས་རྟ་རྣམས་ཉལ་ཏེ་འགྲོ་མ་བཏུབ་པས་ཕྱིར་ལ་འོང་ཚེ་རྟ་རྣམས་ལངས་ནས་ཕྱིར་སླེབ་བྱུང་།དེ་ནས་གཞི་བདག་དེའི་མདུན་ནས་བསང་མཆོད་དང་དར་ཟབ་མང་པོ་ཕུལ་ཚེ་ཁོ་མངོན་སུམ་དུ་བྱུང་ནས་ཁྱོད་ངེད་ཀྱི་གནས་འདི་ནས་མི་འཕོ་བར་སྐུ་མཁྱེན།ཞེས་ཟེར་བ་ལ་ངས་ཁྱོད་དེ་སྐད་མ་ཟེར་ཅིགམཁའ་འགྲོས་ལུང་བསྟན་པ་བཞིན་མི་འགྲོ་ཐབས་མེད་ཡིན་སྨྲས་པ་དང་།དེ་ན་རེ།འོ་ན་ང་ཡང་ད་ལོ་འགྲོ་སྟབས་མེད་ཀྱང་སང་ཕོད་ཁྱོད་འགྲོ་ས་རུ་འགྲོ་དགོས་ཟེར།བདག་གིས་སང་ཕོད་དབྱར་ཟླ་ཐ་ཆུང་གི་ནང་དུ་ཁྱོད་ཀྱི་མིང་ནས་འབོད་ཚེ་ནམ་མཁའ་སྤྲིན་མེད་ཀྱི་ནང་དུ་ཁུ་འཕང་འབབ་ནུས་ན་ཁྱོད་སླེབ་པའི་ལྟས་ཡིན་ཏེ་མཆོད་གསོལ་ཀྱང་བྱ་ཞེས་སྨྲས་སོ།དེ་ནས་དབྱར་ཟླ་ར་བའི་ཚེས་བཅུ་གསུམ་ལ་བབས་ཚེ་ལམ་དུ་ཞུགས་ནས་གསེར་ཁོག་ཏུ་སོང་བའི་ཉིན་ཁོབ་ལེ་གཟུ་ལྡན་ཡིན་ཟེར་བའི་མི་ནག་གཡག་ཁམས་པ་རྭ་མེད་ལ་ཞོན་པ་ཞིག་གིས།ཁྱེད་མི་འདུག་ན་འདི་ཁྱེར་ཟེར་ནས་གཡག་ནག་པོ་ཞིག་ཁྲིད་ནས་བྲོས་སོང་བ་ལ་བདག་གིས་འགུགས་གཞུགས་བྱེད་གྲབས་བྱས་ཚེ།གནོད་སྦྱིན་ནག་པོས་ན་རེ།མ་བྱེད་མ་བྱེད་སྐྱུར་ཐོངས་དང་ལེགས་ཞེས་ཟེར་བས་མ་བྱས།དེ་ནས་དབྱར་ཟླ་འབྲིང་པོའི་ཚེས་གསུམ་ལ་གསེར་སྟོད་བླ་མ་རུང་དུ་སླེབས་སོ།དེ་ན་ཀླུ་གདུག་པ་ཅན་ཞིག་གནས་པ་དེ་མི་གཅེར་བུ་ཞིག་ལ་ཞོན་ནས་བདག་གི་མདུན་སར་སླེབས་ནས་ཁྱོད་འདི་རུ་འདུག་མི་ཉན།ངེད་ལ་ཤིན་ཏུ་གནོད་དོ་ཟེར་བ་ལ།ངས་ཁྱོད་ལ་དཔའ་མཁར་ལབ་ཙེ་ཕུལ་དང་མི་སྐྱོན་སྨྲས་པ་དང་།སྦྲུལ་ནག་པོ་ཞིག་གིས་ལྕག་བྱས་ནས་ང་ལ་བྲབ་པས་ཁོས་སྐེ་ནས་བཟུང་སྟེ་གཅུར་བས་ཁོ་བྲེད་ཅིང་སྔངས་ནས་ཁྱོད་ཀྱིས་ང་ཐོང་དང་གནོད་པ་བྱེད་རེ་ན་ར་ཀན་དཔང་།ཞེས་ཟེར་བས་བདག་གིས་ཀློད་བཏང་བ་དང་ཆུ་མིག་ཏུ་མཆོང་ཐལ།
དགུང་ལོ། ༤༧
དེ་ཡི་ལོ་ཁྱིམ་ཕྱི་མ་རང་ལོ་ཞེ་བདུན་ལ་བབས་པའི་ཧོར་ཟླ་གསུམ་པའི་ཚེས་བཅུ་གསུམ་ལ་བབས་ཚེ། བུད་མེད་ནག་མོ་ནུ་མ་གཉིས་བསྣོལ་ནས་འཕྲག་ལ་བཀལ་བ་སྐྲ་དམར་པོ་ས་ལ་སླེབས་པ་གཅེར་བུ་གོས་མེད་པ་ཞིག་གིས་བདག་ལ་མ་རུང་མི་སྲུན་གདུག་པ་ཅན་ཁྱོད་འདིར་འདུག་མི་ཆོགབདག་སྟོད་ཟླ་སྙིའི་གོང་བ་མན་ཆད་སྨད་ལི་རྩང་ཡན་ཆད་ཀྱི་ཕྱུགས་འཆི་ཁ་མ་དག་གི་སྲོག་དབུགས་ལ་དབང་བྱེད་པ་མོ་ཡིན།ཁྱོད་ཀྱི་ཅི་སྙམ་འདུག་གི་འགྲོ་ཐུབ་ན་སོང་ཟེར་བ་མངོན་སུམ་དུ་བྱུང་ནས་རེ་བ་ནག་པོའི་དར་གྱིས་ང་ལ་བརྒྱབ་ཚེ།ངས་མོ་ཡི་ལག་པ་གཡས་ནས་བཟུང་སྟེ་རེ་དར་འཕྲོགསྙིང་ལ་ཕུར་བ་འཛུགས་རྒྱུ་བྱས་པ་དང་།མོ་ན་རེ།ང་ཐོངས་སྡིག་དྲེད་ཟེར་བ་ལ།ངས་ཁྱོད་གསོད་མི་འཇོག་ན་སྨྲས་ཚེ།མ་བསད་དང་ཁྱེད་ལ་གནོད་པ་བྱེད་རེ་ན་ར་ཀན་ཞེས་ཟེར་ཞིང་ཁས་བླང་བའི་མཐར་མངགས་བཏང་།དེ་གསེར་ལུང་འཛི་ཆེན་གྱི་ཐང་དེའི་སྨན་མོ་ཡིན་འདུགདེ་ནས་དབྱར་ཟླ་ཐ་ཆུང་གི་ཚེས་བཅུའི་ཉིན་རི་མཐོ་བའི་རྩེ་མོར་ཕྱིན་ནས་གཡུང་དྲུང་ལྕགས་རྩེ་ཞེས་ལན་གསུམ་དུ་བོས་ཚེ་ནམ་མཁའ་སྤྲིན་མེད་སྔོ་སང་ངེ་བའི་ནང་ནས་ཁུ་འཕངས་གིས་ས་དཀར་བ་ཙམ་བབས་བྱུང་ཚེ་ཀུན་གྱིས་ངོ་མཚར་བར་གྱུར་ཏོ།ཟླ་བ་དེ་ཡི་སྔ་སོར་མཁའ་འགྲོ་ཡེ་ཤེས་མཚོ་རྒྱལ་ཡིན་སྐད་པའི་བུ་མོ་ཟ་འོག་ཁ་དོག་སྣ་ལྔའི་གོས་རིང་ཐུང་བྱས་ནས་གྱོན་པ་རིན་པོ་ཆེ་སྣ་ཚོགས་ཀྱི་རྒྱན་ཕྲེང་གིས་བརྒྱན་པ་ཞིག་བདག་གི་ཐད་དུ་བྱུང་ནས་སྐྱེས་བུ་དམ་པ་ཁྱོད་ལ་བཞི་བཅུ་ཞེ་བརྒྱད་ཀྱི་ལོ་ཚེ་གེགས་ཆེན་པོ་ཞིག་ཡོད་དེ་སེལ་དཀའ་བས་དེ་སེལ་ཐབས་ལ་འབད་པ་གལ་ཆེ་ཞེས་ཟེར་བ་ལ་བདག་གིས་ཐབས་ཅི་དགོས་སྨྲས་པ་དང་།ཀྱཻ།ཉོན་ཅིག་གསོན་ཅིག་རིགས་ཀྱི་བུ༎སྡོང་གི་རིགས་སུ་སྐྱེས་པ་ཡི༎བུ་མོ་སྒྲོན་གྱི་མིང་མཐའ་ཅན༎སྔོན་གྱི་སྨོན་ལམ་མཐུ་ཡོད་ཕྱིར༎དེ་ཉིད་ཕྱག་རྒྱར་བསྟེན་གྱུར་ན༎ཚེ་ཡི་གེགས་སེལ་འབྱོར་བ་རྒྱས༎ནོར་བུ་རིན་ཆེན་གསུམ་ཀྱང་རྙེད༎ས་གསུམ་སྙན་དང་གྲགས་པས་ཁྱབ༎ནོར་འཁྲུལ་མེད་པ་གནད་དུ་ཤེས༎ནོར་ན་གནོད་པའི་རྒྱུ་རུ་འགྲོ༎དེ་ལྟར་གནད་ཀྱིས་ཟིན་སྲིད་ན༎བུ་སློབ་འདུ་བ་རྒྱས་པ་ཡིན༎མཐའ་མིས་དམོད་པ་མཐུ་བཙན་པས༎ཆོས་བདག་སྐྱེས་བུའི་སྐུ་ཚེར་གནོད༎དེ་ལ་ཡི་དམ་ལྷ་བསྒོམ་ཞིང་༎སྟོང་ཉིད་ལྟ་བསྒོམ་ལྷུར་ལེན་གནད༎ད་ནས་མི་ལོ་བརྒྱད་ཅུ་ལ༎ཐུག་ཚེ་ཆོས་ཀྱི་བདུད་རྩི་ཡལ༎ས་སྟེང་ཀླ་ཀློའི་བསྟན་པས་ཁྱབ༎བསྐལ་བ་མེ་བྱ་ནས་བཟུང་སྟེ༎མི་རྣམས་དྲན་པ་ཉམས་པ་དང་༎འཁྲུགས་དང་རྩོད་པའི་ལས་ཀར་འབད༎རི་ཀླུང་ཇག་རྐུན་ཆོམ་པོས་གང་༎བསྟན་འགྲོའི་བདེ་སྐྱིད་ཉི་མ་ནུབ༎སྦྲུལ་ནག་ཆུ་རུ་འཁྱིལ་བའི་ཚེ༎ལྷོ་མོན་ཕྱོགས་སུ་ཁྱོད་སླེབ་ན།།སྦས་ཡུལ་གཉན་པོའི་སྒོ་འབྱེད་པའི༎དུས་ཚིགས་ལགས་ཏེ་ཡོལ་མི་རུང་༎དེ་ལྟར་གནད་དང་མི་ལྡན་ན༎རྡོ་ཡུལ་སྟོད་ཀྱི་ས་ཆ་རུ༎གདུལ་ཞིང་ཡོད་ཀྱི་ས་འཆགས་མཛོད༎དབང་ཕྱུག་མ་ཧཱ་དེ་ཝ་ལ༎བློ་ཕུག་གཏད་ན་རེ་ཞིག་དགེ།ཚིག་དེ་སྙིང་གི་དཀྱིལ་དུ་ཟུངས༎ཞེས་ཟེར་ཞིང་ཡལ་སོང་།དེ་ལྟར་ཚུལ་བཞིན་དུ་ལག་ལེན་ལ་བཏབ་པས་ཚེ་ཡི་གེགས་སྒོ་ཆེན་པོ་ལས་ཐར་པར་གྱུར།དེ་ལྟར་མཁའ་འགྲོས་ལུང་ཇི་ལྟར་བསྟན་པ་བཞིན་དེ་རྗེས་རང་ལོ་ང་དགུ་པ་ཆུ་སྦྲུལ་ལོར་གནས་པདྨ་བཀོད་དུ་འགྲོ་ཆས་བྱས་ཀྱང་གཞན་རྐྱེན་གྱིས་རྟེན་འབྲེལ་འཕྱུག་ནས་འགྲོ་སྟབས་མ་འགྲིག་པ་ཡིན།དེ་ནས་བླ་མ་རུང་དུ་ཁང་བ་བརྩིགས་པ་སྨོན་ལམ་ལོག་པའི་བདུད་སྤྲུལ་འགས་བར་ཆད་བརྩམ་ནས་སྡོད་གནས་མ་ལེགས་པའི་དུས་ངན་པའི་ལྟས་འགའ་བྱུང་།
དགུང་ལོ ༤༨
དེ་ནས་རང་ལོ་བཞི་བཅུ་ཞེ་བརྒྱད་ཀྱི་ལོ་ཁྱིམ་ལ་བབས་ཚེ་དགུན་དུས་སློབ་མའི་ཚོགས་བརྒྱ་ཕྲག་ཙམ་ལ་བདུད་གཅོད་དང་རྫོགས་པ་ཆེན་པོའི་ཁྲིད་བཏབ་ཚེ་དགུན་ཟླ་འབྲིང་པོའི་ཚེས་བཅུའི་ནུབ་མཁའ་འགྲོ་མ་ཀུན་ཏུ་རྒྱུ་བ་གསལ་བྱེད་མ་ཡིན་ཟེར་བའི་བུད་མེད་ཅིག་གིས་བདག་ལ་འདི་སྐད་ཟེར། ཀྱཻ།མ་ཡེངས་མཁའ་འགྲོའི་ངག་ལ་ཉོན༎ཡུལ་འདི་རུ་ཁྱོད་ཀྱི་བསྟན་འཛིན་པའི༎སྐྱེས་མཆོག་པད་མའི་མིང་ཅན་ཏེ༎ཉམས་ལེན་གནད་བསྣུན་ངེས་མེད་རྒྱུ༎སྐྱེས་མཆོག་དོན་སེམས་མིང་ཅན་ནི༎རྫོགས་ཆེན་དགོངས་པ་ཟང་ཐལ་གྱི༎བཀའ་བབས་ངེས་མེད་རི་སུལ་འཛིན༎ལོག་ལམ་བདུད་ཀྱིས་མ་བསླུས་ན༎འཇའ་ལུས་ཆེན་པོར་མངོན་སངས་རྒྱས༎སྐྱེས་མཆོག་རྒྱ་མཚོའི་མིང་ཅན་གྱིས༎སྙིང་པོའི་སྒྲུབ་པ་ལྷུར་ལེན་ཞིང་༎ཚེ་དང་སྒྲུབ་པ་མཉམ་བྱས་ན༎ཡང་དག་རྫོགས་པའི་སངས་རྒྱས་ཐོབ༎སྐྱེས་མཆོག་གྲོལ་གྱི་མིང་མཐའ་ཅན༎ཆོས་བརྒྱད་ཡུལ་དུ་མ་འཁྱོལ་ན༎འཇའ་ལུས་སྒྱུ་མའི་སྐུ་འགྲུབ་འགྱུར༎སྐྱེས་མཆོག་རབ་ཀྱི་མིང་མཐའ་ཅན༎ཆོས་བརྒྱད་རྐྱེན་གྱིས་མ་བསླུས་ན༎འཇའ་ལུས་སྒྱུ་མའི་སྐུ་མཆོག་འགྲུབ༎དེ་དག་སྣོད་ལྡན་བུ་སློབ་སྟེ༎དུས་ངན་དམུ་རྒོད་སྐྱེས་བུ་ལ༎གདམས་པ་འཆད་ན་མཁའ་འགྲོས་བསླུ༎མི་འདོད་འཚུབ་མ་བཞིན་དུ་སྡང་༎དེ་ཕྱིར་གསང་བའི་རྒྱ་སྡོམ་མཛོད༎ཅེས་ཟེར་ཡལ།དེ་ནས་ཧོར་ཟླ་བཅུ་གཉིས་པའི་ཚེས་བཅུ་དྲུག་གི་ཉིན།མཁའ་འགྲོ་མ་གསང་མཛོད་ཆེན་མོ་ཡིན་སྐད་པའི་བུད་མེད་ནག་མོ་ཞིག་གིས་ན་རེ།ཀྱཻ།གནས་འདི་མཁའ་འགྲོ་དཔལ་བཙུན་མ༎པདྨ་མཁའ་འགྲོ་འདུ་བའི་གླིང་༎ཕ་ཀི་ནགས་ཀྱི་ཁྲོད་དེ་རུ༎འབྱུང་བ་ཤིང་གི་ལྷ་མོ་སྟེ༎སྨན་མོ་ཤ་ཟ་སྲོག་འཕྲོག་མ༎མི་སྲུན་སྨན་མོ་བཞི་དང་འགྲོགས༎དེ་ནི་དྲག་པོས་མ་ཐུབ་ན༎ཞི་བའི་ལས་ཀྱིས་བཀོལ་བ་མིན༎དུས་ཚིགས་སྤྲེའུའི་ལོ་རུ་བབས༎རྟགས་སུ་ཉམ་སད་བྱེད་དུ་འབྱུང་༎དྲག་ལས་མངོན་སྤྱོད་དག་ལ་རེམ༎ ཞེས་ཟེར་ཡལ།
དགུང་ལོ།༤༩
དེ་ནས་རང་ལོ་བཞི་བཅུ་ཞེ་དགུ་ལ་བབས་ཚེ། ཧོར་ཟླ་གསུམ་པའི་ཚེས་དྲུག་གི་ནུབ་མོ་མཁའ་འགྲོ་མ་དམར་མོ་ཟ་འོག་དམར་པོའི་ལའུ་གྱོན་པ་ཞིག་གིས།བདག་གི་ལག་པ་གཡས་ནས་བཟུང་སྟེ་རི་བོ་ལྕང་ལོ་ཅན་དུ་ལྟད་མོ་ལ་ཨེ་འགྲོ་ཟེར་བཞིན།སྟེང་ཕྱོགས་ཀྱི་ནམ་མཁའ་དཔག་ཚད་བརྒྱད་དུ་འཕགས་པའི་སར་འཕུར་སྟབས་ཀྱིས་མཁའ་ལ་ལྡིངས་ཏེ་ནམ་མཁའ་ནས་ཤར་གྱིས་སོང་བས་ལུང་བ་ཆེན་པོའི་འདབ་ན་ནགས་ཚལ་ལྷུན་མཐུག་པ།གཞུང་ན་ཙན་དན་དང་སྨྱུག་མ།རྦ་དང་རྩི་ཤིང་གིས་གང་བ་ཞིག་གི་ཕུ་རུ་རི་བོ་སྔོ་སང་ངེ་བ་འོད་ནམ་མཁའ་ལ་འཕགས་པས་ཕྱོགས་ཐམས་ཅད་སྦྲེལ་བ་དཔེར་ན་ཉི་མའི་ཟེར་རམ་རལ་བ་རླུང་གིས་གཡེང་བ་ལྟ་བུའི་འོད་ཟེར་རབ་ཏུ་འབར་བ་ཞིག་གི་རྩ་བ་ན་མཚོ་ནག་ལ་གཏིང་ཟབ་པའི་ཡོངས་སུ་བསྐོར་བའི་ནང་དང་འགྲམ་ན།འབྱུང་བོ་དང་རོ་ལངས།ཤ་ཟ་དང་དབུགས་ལེན་གྱི་སྡེ་ཚོགས་གཟུགས་མི་སྡུག་པ་མི་དང་སྲིན་པོ་ལྟ་བུ་དང་།མགོ་བརྙན་ཅན་རྣམ་པ་སྣ་ཚོགས་ཀྱིས་ཀུ་ཅོ་དང་གད་རྒྱང་གི་སྒྲས་སྣང་སྲིད་ཀྱི་ལྷ་འདྲེ་དབང་དུ་བསྡུད་པ་དེ་འདྲ་བས་ཡུལ་དེ་གང་བ་ཞིག་སྣང་།རི་བོ་དེ་ཡི་རྩེ་རུ་ཐོད་པ་ར་རི་གསུམ་གྱི་རྩིག་པ་ལ་གནམ་ལྕགས་ཀྱིས་གཟེར་གདབ་པར་ཁྲོ་ཆུ་ཞུན་མས་ཞལ་བ་བྱས་པའི་གཞལ་ཡས་ཁང་ཡངས་པའི་དབུས་སུ་སྦལ་བ་དང་ཉ་བོ་ཆེ་དང་སྦྲུལ་ཆེན་བརྩེགས་པའི་ཁྲི་ཡི་ཁར་པདྨ་དང་ཉི་མའི་གདན་ལ་ཁྲོ་བོ་མཐིང་ནག་བལྟར་མི་བཟོད་པ་སྦྲུལ་དང་མི་མགོའི་ཕྲེང་བ་རྒྱན་དུ་འཆང་བ་ཐལ་ཆེན་གྱི་ཚོམ་བུ་དང་རཀྟའི་ཐིག་ལེ་ཞག་གི་ཟོ་རིས་རྣམས་ཆུ་ནང་དུ་གཟུགས་བརྙན་བཀྲ་བ་ལྟར་ཤར་ཡོད་པ།ཞལ་གསུམ་ཕྱག་དྲུག་ཞབས་བཞི་དང་ལྡན་པ་མེ་དཔུང་དམར་ནག་འབར་བ།དཔེར་ན་མར་མེའི་སྡོང་བུ་ལྟ་བུ།དབུ་སྐྲ་དམར་སེར་གྱེན་དུ་འབར་བའི་གསེབ་ནས་ཁྱུང་གི་ཚྭ་ཚྭ་མེ་སྟག་ལྟར་དུ་འཕྲོ་བ་ཞིག་ལ་འཁོར་ཁྲོ་བོའི་ཚོགས་བསམ་གྱིས་མི་ཁྱབ་པས་བསྐོར་བ་ཞིག་འདུག་གོདེ་ལ་བདག་གིས་ཕྱག་འཚལ་ཞིང་བསྐོར་བ་བྱས་ནས་ཞབས་ལ་མགོ་བོས་གཏུག་སྟེ་སྨོན་ལམ་བཏབ་པས་ཁྲོ་བོ་དེ་ཡི་ཕྱག་མཚན་རྣམས་བདག་གི་མགོ་ཐོག་ཏུ་བཞག་ནས་ཁྱོད་ཉིད་དུས་གསུམ་གྱི་རྒྱལ་བ་རྣམས་ཀྱི་རྒྱལ་ཚབ་ཏུ་མངའ་གསོལ་ལོ།།འཁོར་བ་ཡོངས་སུ་སྒྲོལ་བའི་དབང་བསྐུར་རོ།ཁམས་གསུམ་ཆོས་ཀྱི་རྒྱལ་པོའི་གོ་འཕང་དུ་གྲོལ་བ་ཐོབ་པར་དབུགས་དབྱུང་ངོ་།ངའི་སྤྲུལ་བ་གྲུབ་ཆེན་ས་ར་ཧས་ངའི་ཡུམ་ཁྲོས་མའི་གདམས་པ་བསྟན་པ་དེ་བུ་སློབ་རྣམས་ཀྱི་ཉམས་སུ་ལེན་པ་ལ་འབད་ན་བར་ཆད་ཐམས་ཅད་ངང་གིས་སེལ་བར་འགྱུར་རོ།ཞེས་གསུངས།དེ་ནས་ཞིང་ཁམས་དེ་ཡི་སྟེང་ཕྱོགས་དཔག་ཚད་གཅིག་འདས་པའི་སྟེང་གི་ནམ་མཁའ་ན་ཞིང་ཁམས་ཀྱི་བཀོད་པ་ཡོངས་སུ་རྫོགས་པའི་དབུས་ན་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཡངས་པའི་དབུས་སུ་རིན་པོ་ཆེའི་ཁྲི་སྟེང་དུ་སྐུ་ཞི་བ་ཁ་དོག་མཐིང་ནགམཚན་དང་དཔེ་བྱད་ཀྱིས་སྤྲས་པ་ལོངས་སྤྱོད་རྫོགས་པའི་རྒྱན་དུ་མས་བརྒྱན་པ་ཞིག་དང་མཇལ་ཚེ་རབ་ཏུ་གུས་པས་ཕྱག་འཚལ་ཞིང་བསྐོར་བ་བྱས་ནས་ཞབས་ལ་མགོ་བོས་གཏུག་སྟེ་སྨོན་ལམ་བཏབ་པས།བདག་གི་མགོ་ལ་རྡོ་རྗེས་རེག་ནས་ངའི་སྒྲུབ་ཐབས་ཀྱིས་དབང་ལུང་ཡོངས་སུ་རྫོགས་པར་གྱུར་ཅིགཅེས་གསུངས་ནས་མཐར་རིགས་ཀྱི་བུ་ཁྱོད་ཀྱིས་ཡི་གེ་ཕབ་ཀྱིན་ཨི་ཡོད།ཅེས་གསུངས་པ་ལ་བདག་གིས་འདི་སྐད་ཞུས།ཡི་གེ་འགའ་ཕབས་ཀྱང་མཁས་པ་དཔྱོད་ལྡན་པ་རྣམས་ཀྱིས།ན་རེ།སངས་རྒྱས་ཀྱི་བཀའ་བསྟན་བཅོས་དང་རྒྱལ་བ་གོང་མ་རྣམས་ཀྱི་གསུངས་པ་དེས་ཆོག་གི་ཟེར་བ་མང་བས་དེ་བདེན་འདུག་སྙམ་ནས་མང་པོ་ཕབ་པ་མེད་ལགས་ཞུས་པ་དང་།འཕགས་པའི་ཞལ་ནས་ཧ་ཧ།དེ་དག་རྣམས་མཁས་པ་དང་དཔྱོད་ལྡན་མ་ཡིན་ཏེ།མཐའ་དཔྱོད་བྱེད་པའི་ཤེས་རྒྱ་མེད་པ་ཡིན།སྔོན་ཚེ་རབས་མང་པོ་ལ་བརྒྱུད་རིམ་མང་དྲག་པས་བླ་སློབ་དམ་འགལ་གྱི་དབང་གིས་བརྒྱུད་པའི་ཟམ་པ་དང་དབང་ལུང་གི་བརྒྱུད་པ་ཆད།བྱིན་རླབས་ཀྱི་ཆུ་བོ་ཉམས་སུ་འགྲོ་ལ་དགོངས་ནས་ས་རྡོ་རི་བྲག་ཐམས་ཅད་གཏེར་གྱིས་བཀང་བ་ཡིན།དེ་དོན་མ་ཤེས་པ་བླུན་པོའི་གཏམ་ངེས་པ་ཡིན་མོད།སྔོན་བྱོན་གྱི་རྒྱལ་བ་རྣམས་ཀྱིས་གསུངས་པའི་ཆོས་རྣམས་རང་ངོས་ནས་བྱིན་རླབས་ལ་ཉམས་པ་མེད་ཀྱང་གང་ཟག་གི་བྱེད་ལས་ཀྱིས་བྱིན་རླབས་མི་འབྱིན་པ་ཡིན།དེ་ཕྱིར་དབང་ལུང་གི་བརྒྱུད་པ་མ་ཆད་ན་བྱིན་རླབས་དང་དངོས་གྲུབ་ཉེ་ཞིང་མྱུར་བ་ཡིན་པས་ཤེས་པར་གྱིས་ཤིགཟབ་གཏེར་ཡི་གེར་ཕབ་པ་ཐམས་ཅད་མྱུར་ཏུ་སྣོད་ལྡན་གྱི་སློབ་མ་རྣམས་ལ་སྟོན་ལ་ཉམས་སུ་ལེན་ནས་གྲོལ་བའི་ས་ལ་སྦྱོར་དུ་ཆུགས་ཤིགཕྱི་རོལ་ཀླ་ཀློའི་བསྟན་པ་ནམ་མཁའ་ལ་ནམ་ལང་འོང་བ་བཞིན་དུ་ཤིན་ཏུ་ཉེ་རུ་བྱུང་བས་བསྟན་པ་གནས་ཡུན་ཤིན་ཏུ་ཐུང་བས་མྱུར་ཏུ་སྤེལ་ཞིགཁྱོད་ནི་ང་དང་གཉིས་སུ་མེད་དེ་ངའི་སྔགས་རྣམས་རྟག་ཏུ་ཟུངས་ཤིགད་ནི་དབང་ལུང་རྣམས་ནི་རྫོགས་པ་ཡིན།གདམས་པ་ལ་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྟོང་བ་ཉིད་ཀྱིས་རོལ་བ་ལས་མ་འདས་པའི་ངང་ཚུལ་ཇི་བཞིན་པ་ཤེས་པར་གྱིས་ཤིགསྟོང་ཉིད་ནི་ནམ་མཁའ་ལྟ་བུ་སྟེ།བདག་སྣང་དང་གཞན་སྣང་ཐམས་ཅད་ནམ་མཁའ་གཅིག་གིས་རོལ་བ་དང་རང་བཞིན་དུ་ཐག་ཆོད་པ་ཞིག་བྱུང་ན་ནམ་མཁའ་རྣམ་པར་དག་པ་ཞེས་བྱ་བ་ཡིན་ཏེ་ལྟ་བ་ཡིན།དེ་རྟག་ཏུ་མངོན་དུ་གྱུར་པ་ནི་སྒོམ་པ་ནམ་མཁའ་ཀློང་ཡངས་ཞེས་བྱ་བ་ཡིན།དེ་ཡི་ངང་ལས་མི་འདའ་བ་ནི་སྤྱོད་པ་བྱུང་རྒྱལ་བྱ་བ་ཡིན་པས་ཤེས་པར་མཛོད་ཅིགགཞི་ཐག་ཆོད་པ་ལ་བརྟེན་ནས་ལམ་ཐོད་རྒལ་ཞེས་བྱ་བ་འོད་གསལ་སྦུབས་འཇུག་གི་གདམས་པ་སྡིག་པོ་ཆེ་བཙན་ཐབས་སུ་སངས་རྒྱས་པའི་མན་ངག་ཡིན་པས་ཁྱོད་ལོ་གྲངས་དྲུག་ཅུ་རེ་གཉིས་ཕན་ཆད་ལ་གནད་དུ་བསྣུན་ནས་ཉམས་སུ་ལོངས་ཤིགདེ་ལྟར་ཉམས་སུ་བླངས་ན་ཚེ་ལོ་བརྒྱད་ཅུར་འཕེན་སྲིད་དེ།ཉམས་སུ་ལེན་པའི་གནད་དང་འཛོལ་ན་ཚེ་ལོ་དྲུག་ཅུ་རེ་བདུན་ཙམ་ཚེ་ཚད་དུ་ངེས་སོ།ཞེས་གསུངས་མཐར་བུད་མེད་དེ་ན་རེ།འགྲོ་འགྲོ་གནམ་ལ་ལྟོས་ཤིག་ཟེར། བལྟས་པས་གཉིད་དེ་ལས་སད་དོ།།
དགུང་ལོ།༥༠
དེ་ནས་རང་ལོ་ལྔ་བཅུ་ལ་བབས་པའི་དུས་སུ། སྤྱིར་ན་མི་མ་ཡིན་གྱི་རིགས་རྣམས་རང་གིས་ཁས་བླངས་པ་དེ་ལས་འདའ་མི་སྲིད་པ་ལྟ་བུ་ཡིན་ཀྱང་།སྔར་བཤད་པའི་འཛི་ཆེན་གྱི་སྨན་མོ་དེ་ནི་དམ་ལོག་ཤིན་ཏུ་མ་རུང་བ་ཞིག་ཡིན་པས་ཁས་བླང་ལས་འདས་ནས།ཧོར་ཟླ་དང་པོ་ནས་བཟུང་སྟེ་བཞི་བའི་ནང་ཚུན་ཆད་དུ་རིག་མ་དང་བུ་མོ་གཡོག་མོ་ཐམས་ཅད་ཀྱི་སྙིང་ལ་ཞུགས་ནས་སྨྱོ་བ་དང་བརྒྱལ་བ་སོགས་པ་བྱུང་ནས་ཞི་དྲག་གི་སྒྲུབ་པ་ལ་ཇི་ལྟར་འབད་ཀྱང་ཕན་པ་མ་བྱུང་བས།བདག་གིས་ལྷ་དཀོན་མཆོག་རྩ་གསུམ་དཔའ་བོ་མཁའ་འགྲོའི་ཚོགས་ལ་གསོལ་བ་བཏབ་ནས་ཉལ་ཚེ།རང་གི་བླ་མ་དམ་པ་འཇིགས་མེད་པའི་ཞལ་གཟིགས་ནས་ཁྱོད་ཀྱིས་ལྷ་ལ་འོ་དོད་འབོད་དོན་ཅི་ཡིན།ང་ལ་སྨོས་ཤིག་གསུངས་པ་ལ།ཕྱག་འཚལ་ཞིང་གུས་པས་བཏུད་ནས་བླ་མ་ཐུགས་རྗེ་ཅན་ཁྱེད་ཀྱིས་མཁྱེན་བཞིན་ལགས་སྟེ།བུད་མེད་བུ་མོ་རྣམས་སྨྱོ་འབོག་ནད་ཀྱིས་བཏབ་པ་ལ་རིམ་གྲོ་ཅི་བྱས་ཀྱང་ཕན་པ་མ་བྱུང་བ་འདི་ཅི་ཡིས་ལན་ཡིན།བགེགས་གང་རེད།ཅི་བྱས་ན་ཕན་ཐོགས།ཞེས་ཞུས་པའི་ལན་དུ་འདི་སྐད་གསུངས།སྔོན་མཁའ་འགྲོས་ལུང་བསྟན་པ་བཞིན་དུ་དྲག་པོ་མངོན་སྤྱོད་ཀྱི་ལས་ཀྱིས་འདུལ་བ་ལས་རིམ་གྲོ་ཅི་ཙམ་བྱས་ཀྱང་ཕན་པ་མེད་ཟེར་བའི་དོན་ཐོག་ཏུ་བབ་པ་ཡིན།ཞེས་གསུངས་ཏེ་མི་སྣང་བར་ཡལ།དེ་ནས་བཀའ་བཞིན་དུ་བདག་ནགས་ཁྲོད་དེ་རུ་སོང་ནས་ཐུན་གྱི་བྲབ་མེ་མདའ་མང་པོ་འཕང་།བྲག་གཉན་བཤིགཤིང་གཉན་བཅད།རྫས་ངན་གྱིས་བདུགས་ཏེ་འཁོར་གྱི་སྨན་མོ་གསུམ་བསྒྲལ་བ་ལས།ཡང་མཁའ་འགྲོ་སྨ་ར་ཅན་ཟེར་བ་ཞིག་གིས།གཅིག་བན་བསོའི་འདུལ་སྐལ་ཡིན་ཟེར་བས་དེ་མངགས་ཏེ་མཁའ་འགྲོ་ཁྲོས་མའི་སྦྱིན་བསྲེག་བླུགས་པས་ཐུལ་བའི་ལྟས་མངོན་སུམ་དུ་བྱུང་།གཙོ་མོའི་མགོ་ལ་ཕུར་བ་དྲུག་ཅུ་བཙག་པས་ཁྲོམ་གྱི་ལབ་ཙེ་དཀར་དངས་ནང་ལ་བྲོས་སོང་།ནད་པ་རྣམས་ནད་ལས་གྲོལ་སོང་།དེ་ནས་མཁའ་འགྲོ་གསང་བའི་མཛོད་འཛིན་མས།ད་ནི་རྡོ་ཡི་ངང་པའི་ལུང་པར་སོང་ཟེར་བཞིན་དབྱར་ཟླ་འབྲིང་པོའི་ནང་དུ་དེར་སོང་ནས་བསྡད་པ་ན་སློབ་མ་བརྒྱ་ཕྲག་ཙམ་འདུས་པ་ལ་ཆོས་བཤད།ཧོར་ཟླ་བརྒྱད་པའི་ཚེས་བཅུའི་ནུབ་མཁའ་འགྲོ་བདེ་བའི་འབྱུང་གནས་མ་ཡིན་ཟེར་བ་ཞིག་གི་རྒྱབ་ལ་གོས་དཀར་གྱོན་ལག་ན་སྤོས་ཀྱི་དབྱུག་པ་ཐོགས་པ་ཞིག་གིས་འདི་སྐད་ཟེར།ཀྱཻ།སྐྱེས་མཆོག་དམ་པ་ཚུར་ཉོན་དང་༎ང་ངོ་ཁྱོད་ཀྱིས་མ་ཤེས་ན༎ང་ནི་བདེ་བའི་འབྱུང་གནས་ཡིན༎གནས་འདི་ཁྱོད་ཀྱིས་མ་ཤེས་ན༎བྱང་ཕྱོགས་རྒྱ་གྲམ་རྫོང་ཆེན་ཡིན༎ཁྱེད་ནི་ཡུན་རིང་འདིར་གནས་ན༎བསྟན་པ་རྒྱས་ཤིང་འདུ་སྒོ་ཚུགས༎འགྲོ་དོན་རྒྱ་ཆེན་འབྱུང་སྲིད་དེ༎ལས་དང་རྐྱེན་གྱི་དབང་གྱུར་པས༎ཡུན་རིང་འདུག་སྐལ་ངས་མ་མཐོང་༎གནས་འདིའི་ཤར་ཕྱོགས་ཐུགས་རྟེན་དྲུང་༎ལྷ་མོ་དུང་ལི་སྨན་ཞེས་བྱ༎ཨོ་རྒྱན་ཆེན་པོའི་ཐུགས་གཏེར་འཛིན༎དེ་ཡི་མིང་ནས་ལན་གསུམ་བོས༎ཐུགས་ཀྱི་རྟེན་མཆོག་སྟེར་དུ་བྱུང་༎སང་ཕོད་ནམ་མཁའི་སྙིང་བོ་ཉིད༎ཁྱོད་ཀྱི་སྲས་སུ་འབྱུང་འགྱུར་གྱི༎བསྟན་དང་འགྲོ་ལ་ཕན་ཐོགས་འབྱུང་༎བདུད་ཕོ་མི་རིང་རྙབ་མཁའ་པས༎དམག་དང་མཚོན་གྱི་ཡོ་ལངས་འབེབས༎དེ་ལ་ཞིང་སྐྱོང་མགོན་པོ་དང་༎གནོད་སྦྱིན་དམར་ནག་གཉེན་པོར་ཐོངས༎བདུད་ཀྱི་སྡེ་ཚོགས་སྨ་འབབ་བྱེད༎མ་བརྗེད་སྙིང་གི་དཀྱིལ་དུ་ཟུངས༎ཞེས་ཟེར་ཡལ།དེ་ནས་ཧོར་ཟླ་དགུ་བའི་ཚེས་བཅུའི་ཉིན་གནས་དེའི་ཉེ་སར་ཤར་དུ་ཚ་ཁང་ཞིག་ཡོད་པའི་སར་ཕྱིན་ནས་བལྟས་པས་བྲག་ཞིག་གི་རྩ་བ་ན་ཤིང་སྡོང་ཞིག་ཡོད་པའི་ངོས་ནས་དུ་བ་སྔོ་ཐུལ་ཐུལ་འབྱུང་འདུག་པ་མཐོང་ནས་དེར་ཁ་ཕྱོགས་ནས་དུང་ལི་སྨན་ཞེས་ལན་མང་དུ་བོས་ཚེ།བུད་མེད་སྔོ་ལྗང་གི་ཁ་དོག་ཅན་ཞིག་བྱུང་ནས།ཁྱོད་ཀྱིས་ང་ལ་ཅི་ཟེར་བ་ཡིན།ཞེས་ཟེར་ཞིང་སླར་ཡང་ཨ་ཀྱང་ཀུ་རེ་ཡིན།ཁྱོད་ཁྱེའུ་ཆུང་ལོ་ཙཱ་ཡིན་འང་ཟེར།བདག་གིས་ཡིན་བྱས་པས།ཨོ་ད་དེ་ངས་ཤེས་ཟེར་ནས་ཕུར་བ་ཞིག་དང་གྲོ་གའི་ལྤགས་ཤུན་གྱི་ཐུམ་པོ་ཞིག་ཐོགས་ནས་ཕུར་པ་དེ་ང་ལ་གཏད་ནས་འདི་ཨོ་རྒྱན་ཆེན་པོའི་ཕུར་པ་བརྒྱ་རྩ་བརྒྱད་གཏད་པའི་ནང་ནས་གཅིག་ཡིན།དེ་ཁྱོད་ལ་གཏད་རྒྱུ་བཞག་པ་ཡིན་ཟེར་ནས་བདག་ལ་བྱིན།གྲོ་ལྤགས་ཀྱི་ཐུམ་དེ་བདག་ལ་བྱིན་ནས་སངས་རྒྱས་རབ་བདུན་གྱི་གདུང་འཕེལ་ཡིན་ཏེ་སྔོན་རུང་གཏེར་བདེ་ཆེན་གླིང་པ་ལ་གཏད་རྒྱུ་འདི་སོགས་མང་དུ་ཡོད་ཀྱང་ཁོས་རྟེན་འབྲེག་འཆུག་ནས་ལེན་དུ་མ་བྱུང་བས།ད་ཁྱོད་ལ་གཏད་ནས་གཏོང་ཞེས་ཟེར།དེ་ནས་གནས་དེའི་ཡོན་ཏན་ཆ་ཚང་བར་བཤད་ནས་སྐུ་བླའི་བསང་ཞིག་ངག་ནས་བཏོན་ཏེ།དེ་ཡི་གེར་ཐོབ་ཅིག་ཅེས་ཟེར་ནས་ཤིང་ལ་ཐིམ་སོང་།དེ་ནས་མི་མང་པོས་ཁྱོད་ཚུར་འོང་དགོས་ཞེས་མནའ་དང་ཆོས་ཚིག་གི་ཚིག་ནན་ཆེན་པོ་འཕངས་ནས་དེར་མི་འོང་བའི་ཐབས་མ་བྱུང་།
མུ་མཐུད་དུ་འགོད་རྩིས་ཡིན།
སྐལ་ངན་ལྟ་བ་དམན་པ་དང་༔
ལོག་ལྟ་ཅན་དུ་མ་གྱུར་ཅིག༔
ཤེས་རབ་སྙིང་རྗེ་དད་ལྡན་པས༔
རྟག་ཏུ་བླ་མ་བསྟེན་པར་ཤོག༔
ལོག་འཚོ་ཁ་ན་མ་ཐོའི་ཟས༔
གཞན་གྱི་སྐྱོན་རྟོག་སྤངས་ནས་ནི༔
ཆོས་ཀྱི་རྩ་བ་ངོ་ཤེས་ཏེ༔
གུས་པས་གདམས་ངག་སྒོམ་པར་ཤོག༔
རང་གི་རྒྱུད་དང་གཞན་གྱི་རྒྱུད༔
གྲོལ་བྱེད་དམ་ཆོས་བདུད་རྩི་ལས༔
ལོག་ན་མེད་པའི་དོན་མཐོང་ནས༔
རྟག་ཏུ་ཆོས་བཞིན་བྱེད་པར་ཤོག༔
བསླབ་པ་ལམ་གྱི་སྨོན་ལམ་འདི༔
གེགས་མེད་ཡིད་བཞིན་འགྲུབ་པའི་མཐུས༔
འབྲས་བུ་རྫོགས་སངས་རྒྱས་ཐོབ་ནས༔
སེམས་ཅན་ཐམས་ཅད་འདྲེན་པར་ཤོག༔
སྒྲོག་འདོན་གཞན་གྱི་འཚོལ་བྱང་།
/ ཁྲིད་ཡིག
ཀུན་བཟང་བླ་མའི་ཞལ་ལུང་/།
འཆད་ཁྲིད་ཟུར་བཀོད།
/ལུགས་གཉིས་བླང་དོར་གྱི་བསླབ་བྱ་ཉུང་ངུ།
མཛད་པ་པོ།ཀུན་མཁྱེན་མི་ཕམ་རྒྱ་མཚོ།
/ས་སྐྱ་ལེགས་བཤད།
མཛད་པ་པོ།འཇམ་མགོན་ས་སྐྱ་པཎ་ཆེན།
མཛད་པ་པོ།དགེ་བཤེས་གླང་ཐང་པ།
/ཞིང་སྦྱོང་དྲང་སྲོང་ལུང་གི་ཉི་མ།
མཛད་པ་པོ།ཀུན་མཁྱེན་མི་ཕམ་རྒྱ་མཚོ།
རྒྱ་ཆེན་ཐོས་པ་བསགས་པའི་མཁའ་ལམ་ནས།།
ལྷག་བསམ་སྤྲིན་གྱི་འདུ་བ་རབ་བཀོད་ནས།།
སྤོབས་པའི་ལྕི་བའི་སྤྲིན་གྱི་སྒྲ་དབྱངས་ཀྱིས།།
ཕན་བདེའི་གྲུ་ཆར་རྟག་ཏུ་འབེབས་པར་ཤོག།
ཁྱེད་ཉིད་ཕེབས་བསུ་ཡོད།
བྱང་ཆུབ་སེམས་དཔའི་བསམ་སྤྱོད་ཀྱི་རི་མོ་འབྲི་ཨེ་ཤེས་ལྟ།
