ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༡༤

དགུང་ལོ། ༥༨

དེ་ནས་ལོ་ཁྱིམ་ལྔ་བཅུ་ང་བརྒྱད་ལ་བབས་ཚེ། ཧོར་ཟླ་དང་པོའི་ཚེས་གཅིག་གི་ནུབ་རྨི་ལམ་ན་མཁའ་འགྲོ་རྡོ་རྗེ་ཞི་རྒྱལ་མས་ཞལ་གཟིགས་ནས།ཁྱོད་མྱུར་དུ་འབོད་པ་ཞིག་བྱུང་ན་དེར་ཐོགས་པ་མེད་པར་སོངས་ཤིགདེར་སོང་ན་ཁྱེད་ལ་མཁོ་བའི་རྒྱུ་རྫས་རེ་རྙེད་འོང་།དེ་ནས་ཡང་དབྱར་ཟླ་ར་བའི་ནང་དུ་འབོད་པའི་ཕོ་ཉ་ཞིག་བྱུང་ན་དེར་སོངས་ཤིགད་ལོ་ཁྱོད་ཀྱི་ནོར་ཕྱུགས་རྣམས་བསགས་དགོས་པའི་དུས་ལ་བབས་པ་ཡིན།ཞེས་ཟེར་ནས་ཡལ་སོང་།དེ་ནས་ཧོར་ཟླ་བཞི་བའི་ནང་འབོད་མི་ཞིག་བྱུང་ནས་སྟག་ཐོག་འགབ་མའི་ནང་དུ་སོང་།ནོར་ཕྱུགས་འགའི་འབུལ་བ་ཐོབ་ཏེ་རང་ཡུལ་དུ་ཕྱིན།དབྱར་ཟླ་འབྲིང་པོའི་ནང་དུ་ཚ་ཆུར་ཉལ་དུ་སོང་སླར་སྟག་ཐོག་གོང་མ་ནས་འབོད་པའི་ཕོ་ཉ་འགའ་བྱུང་ནས་དེར་ཕྱིན་ནས་སྒྲུབ་ཆེན་གྱི་དབུ་བཙུགས་ཏེ་ཞག་བརྒྱད་དུ་བསྒྲུབ་པ་བྱས།དེ་ནས་ཞག་བརྒྱད་དུ་ཆོས་ཁྲིད་བཤད་ནས་ནོར་ཕྱུགས་མང་པོ་ཕུལ་བྱུང་ལ།གྲྭ་འབུལ་དགོན་པ་ཡང་འབུལ་ཟེར་བ་བྱུང་ནས་བདག་གིས་རྨི་ལམ་ཞིག་བརྟག་པའི་ཚེ།མཁའ་འགྲོ་ཡེ་ཤེས་དབང་མོ་ཞེས་བྱ་བས་འདི་སྐད་ཟེར།ཨེ་ཨཱ།སྐལ་བཟང་སྐྱེས་བུ་ཉོན༎གནས་འདིར་ས་འཛིན་བྱེད་འདོད་ན༎མི་དྲགས་མང་པོ་འདྲེར་འཁྲུལ་ཏེ།།ཕྱོགས་ཀྱི་རྒྱལ་གདོན་སྣ་འདྲེན་ནས༎ཡུལ་ནི་རྨི་ལམ་ཡུལ་ལ་འགྲན༎མཁར་ནི་བྲག་གི་བྱ་ཚང་འདྲ༎མི་རྣམས་ཚོང་དུས་མགྲོན་ལ་འགྲན༎བན་གཟུགས་སྤྱང་གུ་རྒྱ་སེར་འདྲ༎འདིར་འདུག་པའི་བསྐལ་བ་ངས་མ་མཐོང་༎དོན་དེ་ཕྱིར་ཡིད་ལ་ཞོག་དང་ཟེར༎མཐར་བར་སྣང་སྟོང་པའི་དབྱིངས་སུ་ཡལ།དེ་ནས་བདག་ལ་གྲྭ་འབུལ་བྱས་པ་ལ་དགའ་ཁུལ་བྱས་ནས་སླར་ཡང་རང་ཡུལ་ལ་སླེབ།ཧོར་ཟླ་བཅུ་པའི་ཚེས་བརྒྱད་ཀྱི་ནུབ་རྨི་ལམ་ན།མཁའ་འགྲོ་མ་པདྨའི་ཕྲེང་བ་ཅན་གྱིས་བདག་ལ་འདི་སྐད་ཟེར།ཁྱོད་དགུན་ཐོག་འདི་རུ་ཟླ་སྒྲུབ་ཟབ་མོ་ཞིག་རེམ་མཛོད།དེ་ལ་བརྟེན་ནས་བྱུར་སྲི་མནན་པ་གལ་ཆེན་གཟབ་དགོས།ཞེས་ཟེར་མཐར་ཡང་ཡུལ་དུས་ཀྱི་ལུང་བསྟན་མང་པོ་ཞིག་གླུ་རུ་གྱེར་ནས་མཐར་མི་སྣང་བར་ཡལ་ལོ།།དེའི་ཚེས་བཅུ་ལ་བབས་ཚེ་མཁའ་འགྲོ་མ་གསལ་ཁྱབ་དབང་མོས་ལྟད་མོ་ལ་ཨེ་འགྲོ་ཟེར་བའི་མོད་བདག་དེ་དང་ལྷན་དུ་འདོམ་ལྔ་བཅུ་ཙམ་དུ་འཕགས་པའི་སྟེང་གི་ནམ་མཁའ་ནས་སོང་བས་རི་བོ་ཆེན་པོ་སྔོ་ལྗང་གི་ཁ་དོག་འབར་བ་ཞིག་གི་རྩེ་མོ་དཔག་ཚད་གཅིག་འདས་པ་ན་འོད་མདངས་ལྗང་གུ་ལས་གྲུབ་པའི་ས་གཞི་རྒྱ་ཆེ་ལ་ཁྱོན་ཡངས་པའི་དབུས་སུ་རིན་པོ་ཆེ་ཨིནྡྲ་ནི་ལ་ལས་གྲུབ་པའི་གཞལ་ཡས་ཁང་ཡངས་ཤིང་རྒྱ་ཆེ་བའི་ནང་དུ་པདྨ་དང་ཟླ་བའི་གདན་ལ་རྗེ་བཙུན་འཕགས་མ་སྒྲོལ་མ་སྐུ་མདོག་ལྗང་ནག་གཡས་ན་བུམ་པ་དང་གཡོན་ན་ཨུཏྤལ་བསྣམས་ཤིང་ལོངས་སྤྱོད་རྫོགས་པའི་ཆས་ཐམས་ཅད་ཀྱིས་བརྒྱན་པ་ཞབས་གཉིས་བཙུན་མོ་རོལ་བའི་སྟབས་སུ་འཇའ་དང་འོད་ཕུང་འཁྲིགས་པའི་ཀློང་དུ་བཞུགས་པ་ཞལ་ཤིན་ཏུ་མཛེས་ཤིང་ཡིད་འཕྲོག་པ་གཞོན་ནུ་ལོ་བརྒྱད་ལོན་པའི་ན་ཚོད་ཅན་འོད་ཟེར་རབ་ཏུ་འབར་བ་དེ་ལ་ལྷ་མོ་ཉི་ཤུ་དང་།འཁོར་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བ་དང་མཇལ་ཚེ།གུས་པས་ཕྱག་འཚལ་ཞིང་བསྐོར་བ་བྱས་ནས་མགོ་བོས་གཏུག་སྟེ་རྒྱལ་བ་ཐམས་ཅད་བསྐྱེད་པའི་ཡུམ་ཆེན་མོ་ཁྱོད་ཀྱིས་བདག་དུས་ད་ནས་བཟུང་ཇི་སྲིད་རྣམ་མཁྱེན་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ་བྱིན་གྱིས་རླབས་ཤིང་རྗེས་སུ་འཛིན་པར་ཞུ།ཞེས་ཞུས་ཚེ་འཕགས་མའི་ཞལ་ནས་ཁྱོད་ཀྱིས་ང་ཡིད་ལ་གྱིས་ལ་ང་ཡི་བསྟོད་པ་དང་ཐུགས་ཡིད་བསྲེ་བ་ལ་རེམ་མཛོད།ཅེས་དང་།ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ།རྒྱལ་བ་ཀུན་གྱི་སྤྱན་སྔར་ཐུགས་བསྐྱེད་རྒྱལ་བའི་ཡུམ་གྱུར་ཞེས་པའི་བསྟོད་པ་ལན་གསུམ་བསྐྱར་བཟློས་བྱས་ནས་མཐར་སྨོན་ལམ་བཏབ་སྟེ་པདྨ་ལྗང་གུ་ཞིག་གི་སྟེང་དུ་ཤེལ་གྱི་ཕྲེང་བ་ཤིན་ཏུ་དཀར་ཞིང་གསལ་བ་ཞིག་བདག་ལ་གནང་ནས་འདི་ཁྱོད་ལ་སྟེར་གྱི་རུམ་དུ་ཆུག་ལ་སོང་ཞེས་ཟེར།ཕཊ་ཕཊ་ཕཊ།ཅེས་བསྒྲགས་པའི་སྒྲས་གཉིད་སད་དོ།།དེ་ནས་ཧོར་ཟླ་བཅུ་གཅིག་པའི་ཚེས་དགུའི་ཉིན།མཁའ་འགྲོ་མ་མེ་ཡི་ཕྲེང་ལྡན་མ་ན་རེ།བུ་ཁྱོད་ལྷ་ཆེན་དབང་ཕྱུག་ཆེན་པོའི་སྒྲུབ་པ་ལ་ཞུགས་ནས་ཟླ་གཅིག་གི་བར་བསྙེན་སྒྲུབ་ལ་འབད་པ་ཐོན་པ་ཞིག་བྱེད་དགོས་ཏེ་མི་ཕྱུགས་གཉིས་ཀྱི་རིམ་གྲོ་ལ་མཆོག་ཏུ་གལ་ཆེ་བ་ཡིན།ཞེས་ཟེར་བ་བཞིན་ལྷ་ཆེན་གྱི་སྒྲུབ་པ་ཞུགས་ཚེ།ཞག་ཉེར་གཅིག་འདས་པའི་ནུབ་རྨི་ལམ་ན་འོད་ཕུང་དམར་པོ་ལས་གྲུབ་པའི་གཞལ་ཡས་ཁང་གི་ནང་དུ་པདྨ་ར་ག་ལས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ།པདྨ་དང་ཉི་མའི་གདན་ལ་ལྷ་ཆེན་དབང་ཕྱུག་ཆེན་པོ་སྐུ་མདོག་པདྨ་ར་ག་ལྟར་དམར་ཞིང་འོད་ཕུང་བསྐལ་བ་དུས་མཐའི་མེ་ལྟར་འབར་བ་ཞི་མ་ཁྲོ་འཛུམ་གྱི་ཉམས་དང་ལྡན་པ་ཞིག་ལ་ཡུམ་ཨུ་མ་དཱེ་ཝི་དང་དུས་བཞིའི་ལྷ་མོ་དཔལ་མགོན་དྲེགས་པའི་ཚོགས་ཀྱིས་བསྐོར་བ་དང་འཕྲད་ཚེ།ཁོ་ན་རེ།ཁྱོད་ཀྱིས་ང་བསྒྲུབ་མཆོད་ལ་འབད་ཀྱང་བསྒྲུབ་གྲོགས་མི་ལེགས་པས་དངོས་གྲུབ་ཐོབ་མི་འོང་།ཕྱིས་དངོས་གྲུབ་ཕྲན་བུ་རེ་འཐོབ་འོང་ཞེས་ཟེར་ནས་ལྕགས་ཀྱུ་ཞིག་བདག་ལ་གནང་བྱུང་།དེ་ནས་མི་སྣང་བར་ཡལ་ལོ།  །

དགུང་ལོ། ༥༩

རང་ལོ་ལྔ་བཅུ་ང་དགུ་ལ་བབས་ཚེ། ཧོར་ཟླ་ར་བའི་ཚེས་གཅིག་གི་ནུབ།ནུབ་ཕྱོགས་པདྨ་མཁའ་འགྲོ་མ་ཡིན་ཟེར་བའི་བུད་མེད་དམར་མོ་མཛེས་སྡུག་ལྟ་བས་ཆོག་མི་ཤེས་པ་ཞིག་བདག་གི་ཐད་དུ་བྱུང་ནས་འདི་སྐད་ཟེར།ང་ནི་ནུབ་ཕྱོགས་པདྨ་འོད་ནས་ཡོང་བ་ཡིན།ང་ལ་འགྲོ་སྡོད་མེད་དེ་ཁྱོད་ཀྱི་ཤེས་རབ་ཀྱི་རྩལ་དུ་སྣང་བ་ཡིན།དེ་བཞིན་དུ་གནས་ཡུལ་གྱི་མཁའ་འགྲོ་མ་ཐམས་ཅདལུང་སྟོན་དུ་སྣང་བ་རྣམས་ཀྱང་དེ་བཞིན་ནོ།ད་ཉིད་འདིར་ལྷག་པའི་དགོས་ཆེད་ནི་འདི་ལྟ་སྟེ།སྔོན་དགེ་སློང་བདེ་ལེགས་ཞེས་བྱ་བའི་སྨོན་ལམ་ལོག་པའི་སྟོབས་ཀྱིས་ཀླ་ཀློའི་བསྟན་པ་རྒྱ་མཚོ་འཕྱུར་བ་ལྟར་འབྱུང་འོང་སྟེ།ལོ་ཁྱིམ་འདི་ཉིད་དུ་སྦས་ཡུལ་པདྨ་བཀོད་ཅེས་བྱ་བ་འདི་ནས་ནུབ་ཕྱོགས་ན་ཡོད་ཀྱི་དེར་སོང་དང་རྒྱལ་སངས་འདམས་ཞེས་བྱ་བ་ན་བྲག་རི་ཕག་མགོ་གནམ་ལ་བལྟ་བ་ལྟ་བུ་ཞིག་ཡོད།དེ་ན་ཁ་བྱང་དང་ལྡེ་མིག་གཏེར་དུ་སྦས་པ་ཡོད་ཀྱི་དེ་ལོངས་ལ་གསང་བའི་གནས་སྒོ་དེ་ཕྱེས་དང་སྦས་ལུང་དྲུག་ཅུ་རེ་དགུའི་སྒོ་འབྱེད་ནུས་ཏེ་འགྲོ་དོན་རྒྱ་ཆེན་པོ་འབྱུང་ངེས་ཡིན།ད་ལོའི་དུས་ཚིགས་འདི་ཡོལ་མི་རུང་བས་དེ་ལུགས་དོན་ཐོག་ཏུ་ཁེལ་བར་མཛོད།ཧེ་ཤིང་མོ་ལུག་གི་ལོ་ཁྱིམ་ནས༎བདུད་ཀྱི་དུག་ཆུས་མི་རྣམས་མྱོས༎བརྗེད་རྐྱེན་དུག་ལྔ་མེ་ལྟར་འབར༎རི་ཀླུང་མེད་པར་ཕྱོགས་ཀུན་ཏུ༎ཨར་ཇག་རྐུན་མའི་ལས་ལ་རྔམ༎ཕྱི་འཁྲུགས་ནང་འཁྲུགས་རྩོད་པ་འགྱེད༎དགེ་བའི་སྤྱོད་པ་རིམ་གྱིས་འགྲིབ༎མི་རྟ་ཕལ་ཆེར་གྲི་རུ་འཆི༎ནད་དུ་མ་ངེས་སྣ་ཚོགས་དང་༎གདོན་དུ་ལྷ་མིན་དྲེགས་པ་གནོད༎ད་ནི་བདེ་བའི་སྐབས་མེད་པས༎མྱུར་དུ་གནས་དེར་ལ་འུར་དེངས༎ཅེས་ཟེར་ཡལ།ལོ་ཁྱིམ་དེ་ཡི་དབྱར་ཟླ་ར་བའི་ཚེས་བཅུའི་ནུབ།ང་རང་གི་སློབ་བུ་ངག་དབང་རྒྱ་མཚོ་ལོངས་སྤྱོད་རྫོགས་པའི་ཆོས་ཐམས་ཅད་ཀྱིས་བརྒྱན་ནས་སྤྲིན་དང་འཇའ་ཚོན་འདྲེས་པའི་ཀློང་ནས་བདག་ལ་ཕྱག་བྱས་ཏེ།ན་མོ་སྐྱབས་རྗེ་བླ་མ་རིན་པོ་ཆེ༎བདག་ནི་ཚེ་ཡི་མཐར་ཐུག་ནས༎ལྔ་བཅུ་ང་གཉིས་ལ་འཕོས་ཏེ༎མངོན་པར་དགའ་བའི་ཞིང་མངོན་གྱུར༎ཉིད་ཀྱི་བུ་སློབ་ལས་ཅན་ཀུན༎ཁྲེགས་ཆོད་ཐོད་རྒལ་ཟུང་ལམ་སྟོན༎ལས་ཅན་སྒྲུབ་ལ་སྙིང་རུས་ཅན༎ལ་ལ་འཇའ་ལུས་ཆེན་པོར་གྲོལ༎ལ་ལ་ཡེ་ཤེས་སྒྱུ་མར་གྲོལ༎གྲོགས་མཆོག་ཕུན་ཚོགས་བཀྲ་ཤིས་ནི༎ལོ་ཁྱིམ་འདི་ཡི་དགུན་འབྲིང་པོར༎སྦས་ཡུལ་པདྨ་བཀོད་དུ་འཕོ༎དཔའ་བོ་ཆེན་པོའི་ལུས་བཟུང་སྟེ།།འཁོར་ཚོགས་འབུམ་གྱི་ཚོགས་དཔོན་བྱེད༎སློབ་བུ་རིག་འཛིན་རྒྱ་མཚོ་ཡང་༎གནས་དེར་སླེབ་ནས་དཔའ་བོར་གྱུར༎ངེད་ཅག་གཏན་དུ་བདེ་བའི་སར༎སླེབ་པའི་ངག་སྙན་གླུ་ཡིས་མཆོད༎བླ་མ་སྐུ་ཚེ་བརྟན་གྱུར་ཅིག།ཅེས་ཟེར་ཡལ།དེ་ནས་སྟོན་ཟླ་ར་བའི་ཚེས་བཅུ་གསུམ་ལ་བུ་ཆུང་ལྷ་སྟོབས་དཔལ་རྒྱལ་བ་ཀཿཐོག་པའི་སྲོལ་འཛིན་ཆོས་སྡེ་ཆེན་པོ་སྟག་རྩེ་བསམ་འགྲུབ་དགོན་ནས་མཚུངས་མེད་གཞི་ཆེན་སྤྲུལ་པའི་སྐུ་རིན་པོ་ཆེའི་ཡང་སྤྲུལ་དུ་གསེར་ཁྲི་མངོན་པར་མཐོ་བ་ལ་མངའ་གསོལ།མཐར་རང་ཡུལ་ལ་སླེབས་ནས་པདྨའི་ལུང་ཟིན་གྱི་སློབ་མར་དབང་ལུང་མང་པོ་ཞིག་རྫོགས་པར་བྱས།ལོ་ཁྱིམ་དེ་ཡི་སྟོན་ཐ་ཆུང་གི་ཚེས་བཅུའི་ནུབ་མཁའ་འགྲོ་མ་བདེ་བྱེད་དབང་མོ་རིན་པོ་ཆེའི་རྒྱན་དུ་མས་སྤྲས་པ་ཞིག་བདག་གི་ཐད་དུ་བྱུང་ནས་འདི་སྐད་དོ།སྦས་ཡུལ་སྒོ་འབྱེད་དུས་ཚིགས་ཡོལ༎ད་ནི་བུ་སློབ་ཕོ་མོ་ལ༎འཕོ་བ་ཆེན་པོའི་ལམ་སྟོན་མཛོད༎དཀར་མིན་དཀར་གྱི་སྡེ་ཚན་དུ༎སྐྱེས་བུ་གསུམ་གྱིས་འཇའ་ལུས་འགྲུབ༎རྒྱ་མིན་རྒྱ་ཡི་སྡེ་ཚན་ནས༎སྐྱེས་བུ་ཟུང་གིས་འཕོ་ཆེན་འགྲུབ༎བླ་མིན་བླ་ཡི་སྡེ་ཚན་ནས༎སྐྱེས་བུ་གསུམ་གྱིས་འཇའ་ལུས་འགྲུབ༎སྟག་མིན་སྟག་གི་སྡེ་ཚན་ནས༎སྐྱེས་བུ་ཟུང་གིས་འཇའ་ལུས་འགྲུབ༎རྟ་མིན་རྟ་ཡི་སྡེ་ཚན་ནས༎སྐྱེས་བུ་ལྔ་ཡིས་འཇའ་ལུས་འགྲུབ༎ཨ་མིན་ཨ་ཡི་སྡེ་ཚན་ནས༎སྐྱེས་བུ་གསུམ་གྱིས་འཇའ་ལུས་འགྲུབ།།སྟོང་མིན་སྟོང་གི་སྡེ་ཚན་ནས༎སྐྱེས་བུ་གཅིག་གིས་འཇའ་ལུས་འགྲུབ༎རྟུག་མིན་རྟུག་གི་སྡེ་ཚན་ནས༎སྐྱེས་བུ་གཅིག་གིས་འཇའ་ལུས་འགྲུབ༎གེ་མིན་གེ་ཡི་སྡེ་ཚན་ནས༎སྐྱེས་བུ་བཞི་ཡིས་འཇའ་ལུས་འགྲུབ༎དབང་མིན་དབང་གི་སྡེ་ཚན་ནས༎སྐྱེས་བུ་ཟུང་གིས་འཇའ་ལུས་འགྲུབ༎དེ་སོགས་ཁྱོད་ཀྱི་བུ་སློབ་འགའི༎ཆོས་བརྒྱད་ཡུལ་ལས་དབེན་པའི་སར༎འཕོ་ཆེན་གདམས་པ་ཉམས་སུ་བླང་༎རྩེ་གཅིག་སྙིང་པོའི་སྒྲུབ་གཞོལ་ན༎སྐྱེས་བུ་ཕོ་མོ་བརྒྱ་ཕྲག་གིས༎འཇའ་ལུས་འཕོ་ཆེན་ངེས་པར་འཐོབ༎ཨེ་མ་དུས་ཀྱི་སྙིགས་མ་འདིར༎ཨོ་རྒྱན་ཐུགས་ཀྱི་བསྟན་པ་མཆོག།སྐྱེས་བུ་ཁྱོད་ཀྱི་མདུན་སར་གནས༎འཆད་དང་སྒྲུབ་ལ་བརྩོན་པར་གྱིས༎བདག་ནི་ཤིན་ཏུ་ངོ་མཚར་བས༎གཏམ་ཚིག་གླུ་ཡིས་ཁྱོད་ལ་མཆོད༎ཅེས་ཟེར་ཡལ།ལོ་ཁྱིམ་དེ་ཡི་དགུན་ཟླ་འབྲིང་པོའི་ཉེར་ལྔའི་ནུབ།འཕགས་པ་འཇིག་རྟེན་དབང་ཕྱུག་གི་ཞལ་གཟིགས་ནས་འདི་སྐད་གསུངས།བུ་ཁྱོད་ཀྱི་ལྟ་སྒོམ་ལ་གཤེ་སྐུར་དམའ་འབེབས་བྱེད་ཅིང་ཐེག་པ་འོག་མ་རུ་ཁ་འདྲོང་ཐབས་བྱེད་པའི་བཤེས་གཉེན་འགའ་རེ་འབྱུང་བ་ནི་ཁོང་རྣམས་བདུད་འབངས་སུ་སོང་བ་ཡིན།དེར་ཁོང་ཁྲོ་ཞེ་སྡང་སྤངས་ཤིང་སྙིང་རྗེའི་ཐུགས་བསྐྱེད་ཅིགཉོན་དང་སྐལ་བཟང་སྐྱེས་བུ་མཆོག།འོད་གསལ་རྫོགས་པ་ཆེན་པོ་ནི༎སྐལ་དམན་སྐྱེས་བུའི་སྐལ་མིན་ཕྱིར༎གཤེ་སྐུར་འདེབས་པ་ཨེ་གོ་བུ༎གསང་སྔགས་ཐེག་མཆོག་རྫོགས་པ་ཆེ༎སེམས་ཅན་ཀུན་གྱི་དབང་སྐལ་ཏེ༎རིས་མེད་རང་ལ་རྫོགས་པ་འདྲ༎ཆོས་དང་སྟོན་པར་འཕྲད་པ་ཡི༎སྐྱེས་བུ་རྣམས་ཀྱི་དབང་སྐལ་ཡིན༎དེ་ལྟར་མི་ཤེས་དམུས་ལོང་འགས༎དེ་ལས་བཟློག་ནས་འོག་མར་འདྲེན༎ཁ་བཤད་ཅ་ཅོའི་ལབ་མོ་ཡིས༎ཐེག་ཆེན་བསྟན་ལ་རྒོལ་ནས་གནོད༎བདུད་འབངས་ལོག་ལམ་སྟོན་པ་སྟེ༎སེམས་ཅན་ལས་ངན་བསླུ་བ་ལ༎ཆགས་སྡང་སྤོངས་ལ་རང་བསྟན་སྐྱོངས༎ཐེན་ཆེན་བསྟན་པའི་ཉི་ཞལ་ནི༎ནུབ་ལ་ཉེ་སྟེ་མུན་དགོང་མཚམས༎ཤེས་པར་གྱིས་ཤིག་བུ་སློབ་སྐྱོངས༎ཞེས་ཟེར་ཡལ།ཡང་ལོ་ཁྱིམ་དེ་ཡི་དགུན་ཐ་ཆུང་གི་ཚེས་བརྒྱད་ཀྱི་ནུབ།མཁའ་འགྲོ་ལབ་ཀྱི་སྒྲོལ་མ་བདག་གི་ཐད་དུ་བྱོན་ནས་འདི་སྐད་དེ།ཀྱཻ་བུ་ཁྱོད་མ་ངའི་ངག་ལ་ཉོན༎སྨོན་ལམ་ལོག་པའི་སྐྱེས་བུ་འགས༎འཁྲུགས་དང་འཕྲོག་བཅོམ་རྩོད་ལས་ཀྱི༎རྐྱེན་གྱིས་དུག་མཚོ་ཁོལ་བ་ལས༎དུང་མདའ་དཀར་པོ་དེ་རུ་ནུབ༎ད་ནི་གནས་དེར་ཕྱིན་པ་ཡི༎དབང་དང་སྐལ་པ་རེ་ཞིག་དབེན༎བདུད་པོ་སེ་ཕུང་སྤྲུལ་བ་ཡི༎ཀུ་ཀུ་ནག་པོའི་རང་སྐད་སྒྲོགས༎རིགས་མཐུན་མང་པོའི་བློ་ལས་ཀྱིས།།གངས་རྩེའི་སེང་གེ་དཀར་མོ་ཕབ༎ངར་སྐད་དྲག་པོའི་ཤུགས་ཕྱུང་བས༎ཀླུ་རྒྱལ་གཙུག་ན་རིན་ཆེན་བསླང་༎དུག་མཚོ་ཁོལ་མ་གནམ་དུ་ཕྱུར༎ཀླུ་བདུད་དམག་དཔུང་སྟོད་དུ་ཆས༎བསྟན་པའི་སྒྲོན་མ་རྣམ་བཞི་ནུབ༎དུག་སྦྲུལ་ནག་པོའི་ཁ་རླངས་ཀྱིས༎འཚོ་བྱེད་སྨན་གྱི་ནུས་པ་བཅོམ༎ཀླ་ཀློའི་མེ་དཔུང་མཆེད་པ་ལས༎བསྟན་འགྲོའི་བདེ་སྐྱིད་ཞིང་ས་བསྲེག།ད་ནི་བདེ་བའི་སྐབས་མེད་དེ༎མྱུར་དུ་ཆོས་བརྒྱད་ལས་དབེན་པར༎སྙིང་པོའི་སྒྲུབ་པ་ལྷུར་ལེན་པ༎གདམས་པའི་མཆོག་ཏུ་འདོམས་ཤིག་བུ༎སྔོན་གྱི་སྨོན་ལམ་ལས་འབྲེལ་བའི༎བུ་སློབ་སྐལ་ལྡན་རེ་བྱུང་ན༎གདམས་ངག་ཟབ་མོའི་ཕ་ཕོག་སྤྲོད༎ཁྱོད་ཀྱང་ཡུན་རིང་སྡོད་མིན་ཏེ༎ཡང་དག་རྫོགས་ཆེན་བསྟན་པ་ཡང་༎དེ་ཙམ་ཡིན་ནོ་ཤེས་པར་མཛོད༎བརྡ་དེ་གོའམ་སྐལ་ལྡན་བུ༎ཞེས་ཟེར་ཡལ།   

དགུང་ལོ། ༦༠   

དེ་ནས་རང་ལོ་དྲུག་ཅུ་ལ་བབས་ཚེ། ཧོར་ཟླ་དང་པོའི་ཚེས་བཞིའི་ནུབ་མཁའ་འགྲོ་མ་ཐོད་པའི་ཕྲེང་ལྡན་མ་ཞེས་བྱ་བའི་བུ་མོ་ཁ་དོག་ལྗང་སྔོན་དར་སེར་ཁྲའི་སྟོད་གཡོགས་བྱས་པ་ཞིག་གིས་ན་རེ།དབུས་ཕྱོགས་ལྷུན་གྲུབ་བཀོད་པའི་ཞིང་ནས་བླ་མ་འཇིགས་མེད་པས་ཁྱོད་འདིར་ཤོག་ཟེར་བས་ཨེ་འགྲོ་ཟེར།བདག་གིས་འགྲོ་སྨྲས་པས།ངའི་ལག་པ་གཡོན་ནས་བཟུང་སྟེ་སྟེང་གི་ནམ་མཁའ་ཤར་གྱིས་སོང་བའི་མོད་ལ་ཞིང་ཁམས་མཛེས་ཤིང་ཡིད་འཕྲོག་པའི་ཚལ་དུ་སླེབ་ཚེ།དེ་ན་རིན་པོ་ཆེ་བཻཌཱུརྱ་ལས་གྲུབ་པའི་གནས་ཁང་ཡངས་པའི་ནང་དུ་རིན་པོ་ཆེའི་ཁྲི་ཡི་སྟེང་དུ་པདྨ་དང་ཟླ་བའི་གདན་ལ་བླ་མ་དེ་ཉིད་སྐུ་མངོན་སུམ་ལྟར་བཞུགས་འདུགདེ་ལ་ཕྱག་འཚལ་ཞིང་མགོ་བོས་གཏུག་ནས་བདག་ལ་དབང་མཆོག་ཟབ་མོ་ཞིག་གནང་བ་བསྩལ་དུ་གསོལ།ཞེས་ཞུས་ཚེ།བླ་མ་ཉིད་ཀྱིས་བདག་ལ་རིག་པ་རྩལ་གྱི་དབང་ཆེན་བསྐུར་ཏེ་བུ་ཁྱོད་ཀྱི་སེམས་ཉིད་གདོད་ནས་དག་པ་ནམ་མཁའ་རྣམ་པར་དག་པའི་དབྱིངས་ཉིད་མངོན་དུ་གྱུར་པའི་ངང་དུ་བཅས་བཅོས་སྤང་བླང་མེད་པར་ཞོག་ལ་ངང་བརྟན་པར་གྱིས་ཤིགཅེས་གསུངས་ཤིང་མི་སྣང་བར་ཡལ་སོང་།དེ་ནས་དགུན་ཟླ་ཐ་ཆུང་གི་ཉེར་བརྒྱད་ལ་བབས་ཚེ།རྨི་ལམ་ན་སྨན་པ་འཚོ་བྱེད་གཞོན་ནུ་ཡིན་སྐད་པའི་མི་རྒན་སྐྲ་དང་སྨིན་མ་དཀར་ཞིང་བཞིན་ཐམས་ཅད་གཉེར་མས་གང་བ་ལག་ན་འཁར་བ་ཐོགས་པ་ཞིག་གིས་ན་རེ།ད་ལོ་ཁྱོད་ཁང་པ་ཅན་རེད་དེ་སང་ཕོད་སྦྲ་ནག་ཅན་ལོས་ཡིན།ལར་འདིར་དགོན་པ་ཞིག་ཨེ་འོང་ངེས་པར་སྙམ་ན་ཆོས་ཀྱིས་བཤད་པ་དང་སྒོམ་སྒྲུབ་ཀྱིས་མཚམས་གྲྭ་ཞིག་ཡོད་དགོས་ཏེ་གཞན་དུ་ཆོས་སྡེ་དང་དགོན་པའི་མིང་བཏགས་ཀྱང་དགོས་པ་ཆུང་།སྔར་དགྲ་དང་རྐུན་ཇག་གིས་འཇིགས་པ་གཞན་ལ་རེ་འགའ་ཡོད་ཀྱང་ཆོས་སྡེ་ལ་མེད་མོད།དེང་སང་ལྔ་བརྒྱ་སྙིགས་མའི་མཐའ་མ་ལ་ཐུག་པའི་དུས་ཡིན་པས་དགོན་སྡེ་ལའང་དགྲ་ཇག་དང་ཆོམ་རྐུན་ཤིན་ཏུ་མང་སྟེ།དེ་ཡི་གཉེན་པོར་སྔགས་སྲུང་ཨེ་ཀ་ཙ་ཏི་དང་གཟའ་བདུད་དུག་གི་སྤུ་གྲི་གཉིས་བསྒྲུབ་པ་ལ་འབད་ནས་གྲུབ་པ་ན་བསྐང་གསོལ་ལ་རྒྱུན་དུ་འབད་པ་དང་།དགྲ་བྱུང་ཚེ་རྦད་བསྐུལ་བྱེད་པ་གལ་ཆེ་སྲིད་དེ།དེང་སང་གི་བླ་བཙུན་རྣམས་ཀྱིས་ཟླ་གཅིག་ལའང་དམ་རྒྱས་བསྒྲུབ་པར་ནི་མི་ནུས།རྒྱུན་གསོལ་ཁོ་ན་ཞིག་འདོན་མི་ཡོད་སྲིད་ཀྱང་དེས་ལྷ་འགྲུབ་མི་སྲིད།དེ་ནས་ལྷ་ལ་ཡིད་ཆད་དང་སྒྲུབ་ཐབས་ལ་ལོག་ལྟ་སྐྱེ་བ་རྣམས་ཀྱིས་རང་གི་སྐྱོན་རང་གིས་མི་རིག་པར་སྐྱོན་གཞན་ལ་འགེལ་བར་བྱེད་པ་དེ་ཚོ་སྙིང་རེ་རྗེ་བསམ་གྱི།ལར་ཁྱེད་ཚོ་ལ་སྔར་མཐུ་ཡོད་དེ་ད་ནི་མེད་འདུག་གིརང་ལན་པ་ནི་མི་གོ་བ་མཚར་རེ་ཞེས་ཞེ་ཁྲེལ་གཏོང་འདུག་པ་ལ།ངས་འདི་སྐད་སྨྲས།རྒད་པོ་ཁྱོད་ཅི་ཟེར།ལྷ་མ་ལན་པར་ངས་ལན་པ་ཅི་བཏང་ཁྱོད་ཀྱིས་ཤེས་ཡོད་ན་ཤོད།མེད་ན་མི་རྒན་གྱི་ཁ་བཤད་མང་དོན་ཅི་ཡོད་སྨྲས་པ་དང་།འོ་རེད་རེད་ངས་ཁ་བཤད་མང་བ་འདི་ཁྱོད་དང་རྟ་ཤུལ་གཉིས་ཀ་ལ་སྒོས་སུ་བཤད་པ་མིན།རྒྱལ་ཁམས་སྤྱི་ཡི་དགོན་པ་རྣམས་ལ་བཤད་པ་ཡིན།ཁྱོད་མ་དགའ་ཡང་ཁྱོད་ལན་གྱི་ལྷ་ལ་ཁེགས་མེད།ཇི་ལྟར་ལན་ཞེ་ན་ཁྱོད་ཀྱིས་ལྷ་རྦད་བསྐུལ་དྲག་ཏུ་བྱས་ནས་དགྲ་ལ་མཐུ་རྟགས་ཐོན་ནས་ནོར་ཕྱུགས་ཕྱིར་ཕྱུང་ཚེ་དགའ་བ་དང་བཅས་རང་གིས་བླངས་ནས་སྤྱོད་པས་སྲུང་མ་སུན་ཏེ་ལས་བྱེད་མི་སྲིད།ཁྱོད་ཚོ་དུས་ངན་གྱི་བླ་བཙུན་ནོར་ཟས་ལ་འཛིན་ཆགས་ཤིན་ཏུ་ཆེ་བ་ཀུན་གྱིས་དེ་ལྟར་བྱེད་པས་མཐར་སྲུང་མ་གཉེན་པོ་ཁྲོས་ན་སྒྲུབ་པ་པོ་ལ་ཆད་པ་གཅོད་ཡོང་།མཐུ་ཡོད་མི་སྲིད་ལོ་ལོ་ཞེས་ཟེར།དེ་ལ་བདག་གིས་ཁྱོད་བདེན་ཡང་ཐང་གིངས་ཀྱང་དེ་ལྟར་བསམ་འདུགཁྱོད་ནི་སྨན་པ་ཕུལ་དུ་ཕྱིན་སོང་བ་ཞིག་ཡིན་ཟེར་བ་ཐོས་ཀྱི།དེང་སང་གི་སྨན་པས་ནད་ངོས་མི་ཟིན་པ་དང་།ཕན་མི་ཐོགས་པ་འདི་ཅིའི་ཕྱིར་ཡིན་ཞེས་སྨྲས་པ་དང་།ཁོ་ན་རེ།ཧ་ཧ་དུས་ངན་སྙིགས་མའི་དུས་འདིར་སྔོན་བསྐལ་བ་བཟང་པོའི་དུས་ཀྱི་རྩྭ་དང་དེང་སང་གི་སྨན་བཟང་དྲུག་རྣམས་ལའང་ནུས་བཅུད་སྔོན་དུས་རྩྭ་ཡིས་བཟང་བ་དང་།སྔོན་གྱི་ཆུ་དང་དེང་སང་གི་འོ་མ་གཉིས་ལའང་སྔོན་དུས་ཀྱི་ཆུའི་རོ་ནུས་ཀྱིས་བཟང་བ་ལྟ་བུར་སོང་བས་ནད་ལ་སྨན་གྱིས་མི་ཕན་པ་དེ་ཡིས་ལན་ཡིན།མི་རྣམས་རྩོལ་བ་ཞན་པས་སྨན་དཔྱད་ལ་མི་མཁས་པ་དང་།སྔོན་དུས་ཀྱི་ནད་དང་དེང་དུས་ཀྱི་ནད་མི་གཅིག་པས་ངོ་མི་ཤེས་པ་དེ་ཀ་རང་ཡིན།ང་མི་རྒན་གྱིས་བཤད་པ་དང་།ཁྱོད་མི་མཁོ་བའི་དྲི་བ་དེས་ཅི་བྱ།ཞེས་ཟེར་བ་ལ།ང་ལ་སྨན་དཔྱད་ཞིག་བསླབ་ན་ཨེ་ཤེས་སྙམ་ཞེས་དྲིས་ཚེ།ཁོ་ན་རེ། ཁྱོད་ཚེ་སྟོད་ཟད་ནས་ཚེ་མཇུག་ཉི་ཞུར་ཙམ་འདིར་སྨན་དཔྱད་ལ་བསླབ་ཀྱང་རང་གཞན་གཉིས་ཀ་ལ་ཕན་བཏག་པའི་ལོང་ནི་ངས་མ་མཐོང་ཟེར་ནས་ཡལ་སོང་།

མུ་མཐུད་དུ་འགོད་རྩིས་ཡིན།

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔