ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༡༡

དགུང་ལོ།༣༩

 དེ་ནས་རང་ལོ་སུམ་ཅུ་སོ་དགུ་ལ་བབས་ཚེ་དབྱར་ཟླ་འབྲིང་བོའི་ཚེས་དགུའི་ནུབ་མཁའ་འགྲོ་མ་ཞིག་གིས་འདི་ཁྱོད་ལ་མཁོ་བའི་རྫས་ཞིག་ཡིན་ཟེར་ནས་ལྕགས་ཕུར་ཤིན་ཏུ་མཛེས་ཤིང་ཡིད་དུ་འོང་བ་ཞིག་དར་ནག་པོ་བཏགས་པའི་སྣེ་ལ་རྡོ་ཡི་ཕུར་པ་ཡིད་དུ་མི་འོང་བ་ཞིག་བཏག་པ་གཏད་ནས་བུ་ཁྱོད་ལ་སྟེར་བ་ཡིན། འདི་བླ་མ་བླུན་པོའི་ལག་བརྒྱུད་པའི་ལན་གྱིས་དར་ནག་པོ་བཏགས་པ་རེད།དེ་དང་འབྲེལ་བའི་རྡོ་ཡི་ཕུར་བ་འདི་ཀ་ཡང་གཞན་ལ་མཁོས་ཆུང་སྟེ་རང་གི་དོན་འགྲུབ་པ་ཞིག་ཡིན་པ་འདྲ་ཞེས་ཟེར།དེ་ནས་ཚེས་བཅུའི་ཉིན་པར་སྔ་དྲོ་ཆུ་གཙང་རྡོར་བཟང་དང་ལྷ་བཟོ་རྡོ་རྗེ་ཞེས་བྱ་བ་གཉིས་སླེབ་བྱུང་དེར་དགའ་སྟོན་ཚོགས་འཁོར་བྱས།ཡང་དེ་ནུབ་མཁའ་འགྲོ་མ་ཞིག་གིས་རྡོ་རྗེ་བཟང་པོ་འདི་མཁའ་འགྲོ་ཡེ་ཤེས་མཚོ་རྒྱལ་གྱི་སྤྲུལ་པ་ཡིན་པས་གདམས་པའི་ཡང་བཅུད་རྣམས་སྟོན་ཅིག་དང་།འདིའི་བློ་ལོག་པའི་ལུང་ཞིག་གིས་བསྒྱུར་ཉེན་ཆེ་སྟེ་མ་བསྒྱུར་ནས་ཁྱོད་ཀྱི་ངག་བཞིན་དུ་ཉན་ན་གདུལ་བྱ་གྲངས་མེད་ཐར་བའི་ལམ་ལ་བཀོད་དེ་མཐར་འཇའ་ལུས་འོད་ཕུང་དུ་གྲོལ་བ་ཐོབ་པར་འགྱུར་ཞེས་ཟེར་བ་ལ།བདག་གིས་མཁའ་འགྲོ་ཀུན་ཤེས་མར།འདིའི་བློ་གཞན་གྱི་ལོག་པའི་ལུང་བསྟན་གྱིས་བསྒྱུར་ན་ཇི་ལྟར་འགྱུར་ཞེས་དྲིས་པའི་ལན་དུ།དེ་ནི་བྱ་རྒྱལ་དུག་མཚོར་ལྷུང་བ་དང་འདྲ་སྟེ་ཚེ་ཐུང་བ་དང་།མི་ཚེ་འདི་ལ་འགྲོ་དོན་ཡང་མི་འབྱུང་།གྲོགས་འདིས་ཀྱང་འགྲོ་དོན་མི་འབྱུང་ཡང་རང་དོན་ཞིག་འགྲུབ།དེ་ཟུང་གིས་རི་ཁྲོད་འཛིན་ཅིང་གནས་ངེས་མེད་དུ་འགྲིམ་པ་ཤིན་ཏུ་གལ་ཆེ་བ་ཡིན་ཞེས་ཟེར་ཞིང་མི་སྣང་བར་ཡལ་ལོ།།དེ་ནས་དགུན་ཟླ་ར་བའི་ཚེས་བརྒྱད་ཀྱི་ནུབ་མཁའ་འགྲོ་སྒེག་མཛེས་མ་ཡིན་ཟེར་བའི་བུད་མེད་ཅིག་གིས།སང་ཕོད་ཁྱོད་ལ་དགྲ་ཞིག་སྡང་འོང་བས་དེ་ལ་གཟའ་རྒོད་ཁྱབ་འཇུག་ཆེན་པོ་གཉེན་པོར་ཐོངས་ཤིགལོ་ཁྱིམ་མ་ཟད་གོང་དུ་གཟའ་ལ་གསོལ་མཆོད་ཐེམ་པ་གལ་ཤིན་ཏུ་ཆེ་བ་ཡིན།ཨེ་མ་སྐལ་ལྡན་སྐྱེས་བུ་ཉོན༎ས་འདི་ནམ་མཁའི་རང་བཞིན་ཏེ༎ནམ་མཁའ་ས་རུ་སྣང་བ་ཡིན༎ཆུ་རྣམས་ནམ་མཁའི་རང་བཞིན་ཏེ༎ནམ་མཁའ་ཆུ་རུ་སྣང་བ་ཡིན༎མེ་རྣམས་ནམ་མཁའི་རང་བཞིན་ཏེ༎ནམ་མཁའ་མེ་རུ་སྣང་བ་ཡིན༎རླུང་ཡང་ནམ་མཁའི་རང་བཞིན་ཏེ༎ནམ་མཁའ་རླུང་དུ་སྣང་བ་ཡིན༎འཇའ་ཚོན་ནམ་མཁའི་རང་བཞིན་ཏེ༎ནམ་མཁའ་འཇའ་ཚོན་སྣང་བ་ཡིན༎བདག་སྣང་ནམ་མཁའི་རང་བཞིན་ཏེ༎ནམ་མཁའ་བདག་ཏུ་སྣང་བ་ཡིན༎སྣོད་བཅུད་ནམ་མཁའི་རང་བཞིན་ཏེ༎ནམ་མཁའ་སྣོད་བཅུད་རོལ་པར་སྣང་༎དེ་དཔེ་རྨི་ལམ་སྣང་བར་ལྟོས༎རྨི་ལམ་སྣང་བ་མཆེད་པའི་ཚེ༎དངོས་པོ་ཐོག་རེག་གཟུགས་སུ་སྣང་༎དེ་ཡང་ཉིན་དུས་སྣང་མིན་ལྟར༎ཉིན་སྣང་མཆེད་ཚེ་སྣོད་བཅུད་ཀུན༎དངོས་པོ་ཐོག་རེག་གཟུགས་སུ་སྣང་༎རྨི་ལམ་སྣང་བ་མཆེད་པའི་ཚེ༎དེ་ཡང་མི་སྣང་སྣང་མི་སྲིད༎དེ་ལྟར་ཚུལ་བཞིན་དཔྱད་བཏང་ན༎བདག་གཞན་ཀུན་ཀྱང་ནམ་མཁའ་སྟེ༎ནམ་མཁའ་དྭངས་གསལ་རྙོགས་པ་མེད༎ནམ་མཁའ་སྐྱེ་དང་འགགས་པ་མེད༎ཆོས་ཀུན་ནམ་མཁའ་དྲི་མ་མེད༎བེམ་སྟོང་མ་ཡིན་ཆོས་ཀུན་ཤར༎ནམ་མཁའ་ཆོས་ཉིད་སྤྲོས་མཐའ་བྲལ༎དག་དང་མ་དག་ཆོས་སོ་ཅོག།ནམ་མཁའ་ཉིད་དུ་དག་མཉམ་རོལ༎ནམ་མཁའི་རང་བཞིན་རྟོགས་བྱས་ཏེ༎ནམ་མཁའ་མངོན་དུ་གྱུར་པ་ནི༎གྲོལ་པའི་ལམ་མཆོག་རྫོགས་པ་ཆེ༎རྫོགས་ཆེན་བྱ་བ་གཞན་ན་མེད༎ཐམས་ཅད་སྟོང་ཉིད་ནམ་མཁའི་ངང་༎རྟོགས་པ་སྟོང་ཉིད་ལྟ་བ་ཡིན༎སྟོང་ཉིད་བྱ་བ་ལོག་ན་མེད༎བཅོམ་ལྡན་འདས་ཀྱིས་དེ་དོན་གསུངས༎རྣམ་གྲོལ་ལམ་གྱི་མཆོག་ཏུ་བསྔགས༎བསྟན་ནོ་འཆད་དོ་ཡིད་ཆེས་མཛོད༎ཅེས་ཟེར་ཞིང་བདག་ལ་ཐིམ་པ་བྱུང་།  

དགུང་ལོ། ༤༠

དེ་ནས་རང་ལོ་བཞི་བཅུ་ལ་བབས་པའི་ཚེ། ཧོར་ཟླ་གཉིས་པའི་ཚེས་གསུམ་ནུབ་རྨི་ལམ་ན།ཤར་ན་ཉི་མ་ཤར་བ་དང་གནམ་མཐོང་ཟླ་གཞོན་ཤར་བ་ལྷོ་ན་སྐར་ཆེན་ཤར་བ་བྱང་ན་དུ་བ་མཇུག་རིང་རྣམས་ཤར་བ་རྨིས་ཚེ།མཁའ་འགྲོ་མ་ཡེ་ཤེས་དབང་མོ་དེར་ལྷག་པ་ལ།བདག་གིས་ནམ་ཟླ་འདི་དག་དུས་གཅིག་ཏུ་ཤར་བ་འདི་ཅིའི་ལྟས་ལགས་དྲིས་ཚེ།དེ་ན་རེ།ཀྱཻ།ཉོན་དང་སྐལ་བཟང་སྐྱེས་བུ་ལགས༎ཤར་དུ་ཉི་གཞོན་ཤར་བ་དེ༎གནོད་སྦྱིན་ཤན་པ་དམར་ནག་ཡིན༎ཉི་འོད་ས་གཞིར་ཁྱབ་པ་འདི༎རྒྱུད་འཛིན་རིས་མེད་སྐྱོང་བའི་བརྡ༎གནམ་མཐོང་ཟླ་བ་ཤར་བ་དེ༎ལྷ་ཆེན་དབང་ཕྱུག་ཆེན་པོ་ཡིན༎ཟླ་འོད་ས་ལ་ཁྱབ་པ་འདི༎བསྟན་པ་གཉན་ལ་གདུང་བའི་རྟགས༎ལྷོ་རུ་སྐར་ཆེན་ཤར་བ་ནི༎མ་མོས་བསྟན་པ་སྐྱོང་བའི་བརྡ༎བྱང་དུ་མཇུག་རིང་ཤར་བ་ནི༎ཕྲིན་ལས་གཟའ་ཡིས་བསྒྲུབ་པའི་རྟགས༎དེ་དོན་ཤེས་ནས་བསྐང་གསོལ་འབུངས༎ནམ་མཁའ་སྤྲིན་དང་བྲལ་བ་ནི༎རྟོགས་ལྡན་བུ་སློབ་འབྱུང་བའི་ལྟས༎ཤེས་པར་གྱིས་ཤིག་རིགས་ཀྱི་བུ༎ཞེས་ཟེར་བ་ལ།ཡང་དབྱར་ཟླ་ར་བའི་ཚེས་བཅོ་ལྔའི་ནུབ་པཎ་ཆེན་བི་མ་མི་ཏྲ་ཞེས་བྱ་བ་ཡིན་ཟེར་བའི་རྣལ་འབྱོར་པ་ཞིག་བདག་གི་ཐད་དུ་སླེབ་པ་ལ།བདག་གིས་ཁྱེད་འདི་རུ་ཅིའི་ཕྱིར་བྱོནཔ་ཡིན་ཞེས་སྨྲས་པ་དང་།དེ་ན་རེ།ཁྱོད་ལ་གཏམ་མང་པོ་ཞིག་དྲི་རྒྱུ་ཡོད་ལ་དེ་ལས་དོན་གཞན་མེད།ཁྱོད་སྐྱེས་པ་སྔོན་མ་སུ་ཡིན།རྗེ་འབངས་ཀྱི་དུས་སུ་གང་ཡིན།དེ་གཉིས་ཤོད་དང་ཟེར།བདག་གིས་འདི་སྐད་སྨྲས།ངའི་སྐྱེ་བ་སྔོན་མ་བདུད་འདུལ་རོལ་པ་རྩལ་ཞེས་བྱ་བ་ཡིན།དེའི་སྔོན་དུ་བདུད་འདུལ་རྡོ་རྗེ་ཞེས་བྱ་བ་ཡིན།རྗེ་འབངས་ནང་གི་གྲུབ་ཆེན་འབྲོག་བན་ཁྱེའུ་ཆུང་ལོ་ཙཱ་ཡིན།དེ་ནས་བཟུང་སྟེ་གཏེར་སྟོན་བཅུ་ཡི་སྐྱེ་སྲིད་བཟུང་བ་ཡིན་སྣང་གིཡང་དེ་ན་རེ།ཁྱོད་གང་དུ་སྐྱེས་པའི་མི་ཞིག་ཡིན་ཟེར།བདག་གིས་ང་ནི་ཡུལ་གསེར་ཐལ་དུ་སྐྱེས་པ་ཡིན་སྨྲས།ཁྱོད་མགོ་ལོག་ཏུ་ཅི་ལ་ཕེབས་ཞེས་ཟེར།བདག་གིས།ང་རྒྱུ་རྫས་མེད་པ་ཞིག་ཡིན་ཏེ་རྙེད་ཚོལ་དུ་འོང་བ་ཡིན།དེ་ན་རེ།ཞལ་གཟིགས་དང་ལུང་བསྟན་ཅི་འདྲ་ཡོད་ཟེར།དེ་ཤིན་ཏུ་མང་ཡང་ཕལ་ཆེར་བརྗེད་པར་ཡང་གྱུར་ལ་གྲངས་མང་བས་བརྗོད་མི་ལངས།ཞུས་ཚེ།དེ་ན་རེ།ལྟ་སྒོམ་ངོ་སྤྲོད་པའི་བླ་མ་གང་ལགས་ཞེས་ཟེར་བ་ལ།འདི་སྐད་སྨྲས།ང་ལ་ལྟ་སྒོམ་ངོ་སྤྲོད་མཁན་གྱི་འཇིག་རྟེན་མི་ཡི་བླ་མ་ནི་གཅིག་ཀྱང་མེད་དེ།རེ་འགའ་རང་སྟོབས་ཀྱིས་རྟོགས་པ་དང་།རེ་འགའ་རིག་འཛིན་བླ་མ་རྣམས་དང་ཡེ་ཤེས་མཁའ་འགྲོའི་ཚོགས་ཀྱིས་ཉམས་དང་རྨི་ལམ་དུ་ངོ་སྤྲོད་བྱེད་པ་ཡང་ཡང་བྱུང་ནས་འཁོར་འདས་རྫོགས་པ་ཆེན་པོའི་གནས་ལུགས་དང་ཡིན་ལུགས་ཇི་ལྟ་བ་བཞིན་དུ་ཤེས་པ་ཡིན།ཞེས་སྨྲས་སོ།ཡང་དེ་ན་རེ།ངས་ཁྱོད་ལ་འཁོར་འདས་འུབ་ཆུབ་ཀྱི་གདམས་པ་སྟོན་གྱིས་ཉོན་ཅིག་ཟེར་ནས།འཁོར་འདས་འུབ་ཆུབ་ཀྱི་གདམས་པ་གསུང་པ་རྣམས་བདག་གིས་ཁོང་དུ་ཆུབ་པར་བྱས་སོ།དེ་ནས་ཡང་ཁྱོད་འདི་ནས་ཚེ་འཕོས་ཚེ་མགོན་པོ་ང་ཡི་དྲུང་དུ་ཤོག་ཅིགདེ་ཕྱིར་ང་དང་ངའི་ཞིང་ཁམས་ཡིད་ལ་རབ་ཏུ་གྱིས་ཤིག་ཅེས་ཟེར་བ་ལ།ང་ནི་བདེ་བ་ཅན་དེ་རྣམ་དག་དབུགས་ཆེན་འབྱིན་པའི་ཞིང་གི་ནང་ནས་ཕྱིར་མི་ལྡོག་པའི་ས་ཡིན་པས་དེ་ལ་འདུན་པ་གཏད་ནས་སྨོན་ལམ་འདེབས་པ་ཡིན་ལགས།ཅེས་ཞུས་ཚེ་ཧ་ཧ་ཞེས་པའི་སྒྲ་ཡིས་གཉིད་སད་དོ།།དེ་ནས་ལོ་ཁྱིམ་དེ་ཡི་དགུན་ཟླ་ར་བའི་ཚེས་དགུའི་ནུབ་ཀྱི་རྨི་ལམ་ན།ཡུལ་ངོ་མི་ཤེས་པའི་ནགས་དང་ཤུག་པ་ལ་སོགས་པའི་ཤིང་སྣ་རྣམ་པ་སྣ་ཚོགས་སྐྱེས་པ་ཞིག་ཏུ་སླེབ་འདུག་ཚེ་བྲག་ཞིག་གི་རྩ་བ་ན་མི་རྒན་སྐྲ་དང་སྨ་ར་དང་སྨིན་མ་རབ་ཏུ་དཀར་བ་ཤ་མདོག་ནག་པ་གཉེར་མའི་ལྟེབ་ན་རྔུལ་ཆུའི་ཐིག་པ་ལྷུང་བ།ལག་ན་འཁར་བ་ཐོགས་པ་ཞིག་དང་འཕྲད་བྱུང་།དེ་ལ་བདག་གིས་ཁྱོད་སུ་ཡིན་དྲིས་པས།དེ་ན་རེ།ང་ནི་མི་ཚེ་རིང་ལེགས་པའི་བློ་གྲོས་ཞེས་བྱ་བ་ཡིན།ཁྱོད་སུ་ཡིན་ཟེར་བ་ལ།ང་ནི་རྒིས་ལེའི་གཏེར་སྟོན་ཟེར་བ་དེ་ཡིན་སྨྲས་པ་དང་།དེ་ན་རེ།ཁྱོད་ལ་གཏེར་སྟོན་ཅི་ལ་ཐོགས།གཏེར་སྟོན་ཡིན་ཟེར་བ་མང་གི་ད་གཏེར་སྟོན་འཁྲུལ་མེད་ཅིག་ནི་ཡོད་མི་ཡོང་ཨ་ཞེས་ཟེར་བ་ལ།ངས་ཁྱོད་རྒད་པོ་ཞིག་ལ་གཏེར་གྱི་ལོ་རྒྱུས་བཤད་ཀྱང་མི་གོདགོས་མེད་ཅེས་སྨྲས་པ་དང་།ཧ་ཧ་ང་སྲིད་པའི་མེས་པོ་ཞིག་ཡིན་ཏེ་སྲིད་པ་ཆགས་པའི་ལོ་རྒྱུས་དང་བསྐལ་བ་འཇིགས་པའི་རྣམ་འགྱུར་ངས་ཐ་མི་ཤེས་ན།ཁྱོད་ཀྱིས་ཞིབ་ཏུ་ཤོད་དང་ཟེར།ངས་འོ་ན་ཁྱོད་ཀྱིས་ཤེས་ན་གཏེར་སྟོན་ཡིན་པར་སྐད་པ་དག་ཇི་འདྲ་ཡིན་ཞེས་དྲིས་ཚེ།དེ་ན་རེ།ཨོ།ལ་ལ་ནི་བུད་མེད་ལ་ཆགས་ནས་གཏེར་སྟོན་སྐད་དེ་སེམས་ལ་གང་དྲན་ཡི་གེར་བྲི་འདུག་གིལ་ལས་ནི་ཁོ་དམན་པ་མཐོ་ལ་བརྐམ་ནས་དེ་ལྟར་བྱེད་འདུག་གིགཏེར་སྟོན་ཡིན་ཀྱང་བུད་མེད་ཀྱིས་ཅི་མཁོ།དེས་ཆོས་ནི་མི་ཤེས།གཏེར་སྟོན་ཡིན་ཡང་ཐོབ་ཐང་གིས་ཅི་བྱེད།དེ་འབངས་སྡེ་མ་རྙེད་པ་ནི་མ་རེད།གཏེར་སྟོན་ཡིན་ཡང་ཚེ་གཅིག་ཏུ་དཀོར་ལ་ཅིའི་ཕྱིར་འབྱམས།དེ་དཀོར་བསྡུ་བའི་ཕོ་ཉ་ནི་མ་རེད།གཏེར་སྟོན་ཡིན་ཡང་འཁོར་བའི་བྱ་བ་ལ་སོས་དལ་མེད་པར་ཅི་ལ་འབྱམས།དེ་ཕྱུག་རྫི་གཡོག་པོ་ནི་མ་རེད།ཟེར་བ་ལ་ངས་ཁོང་ཁྲོ་སྐྱེས་ནས་འདི་སྐད་སྨྲས།ཁྱོད་དེ་ལྟར་བཤད་མི་ལ་སུས་བསྐོས་པ་ཡིན།ངེད་ཅག་ཡིན་མིན་བཤད་དོན་ཅི་ཡོད་སྨྲས་པ་དང་།ཧེ་ཧེ།སྤྲོ་མ་སྐྱེས་དང་སྐད་ཆ་ཡག་པོ་ཡོད།ཁྱོད་ཀྱིས་ཁོ་སྒོམ་ཅན་ཡིན་བསམ་གི་ད།སྒོམ་མེད་ཐག་ཆོད་རེད།ཁྱོད་གཅིག་པུ་ལ་སྨད་པ་མིན་དང་།གཏེར་སྟོན་མིན་ཐག་ཆོད་སོང་།དེ་ཚོ་ང་མི་རྒན་གྱིས་ཁྱོད་ཀྱི་ཚོད་ལ་བརྟགས་ནས་ཅི་འདྲ་ཡིན་བལྟས་པ་ཡིན།ཨ་ཁུའི་འུང་།གཏེར་འདྲ་བ་རེ་ཡོད་ཀྱང་འདྲེ་མི་མ་ཡིན་གྱི་ཆོ་འཕྲུལ་ཡིན་ཡང་སྲིད།ལ་ལས་གོ་གོ་ཐོས་ཐོས་མང་བའི་གོམས་སྟོབས་ཀྱིས་བརྩམ་པ་ཡང་ཡོད།ལ་ལས་བསྒོམ་བསྒོམ་ཉམས་ཀྱི་རྩལ་སྣང་ཤར་བ་ཡང་ཡོད།ལ་ལས་བློ་རྩིངས་པས་རིག་པ་འུར་ཏེ་སྣ་ཚོགས་ཤར་བ་ཡང་ཡོད།ལ་ལས་རང་བཟོས་སེམས་རྣམ་རྟོག་གི་འཆར་ཆ་ཡི་གེར་ཕབ་པ་ཚོ་ཡོད་སྲིད་དེ།ཁྱོད་ལ་གཏེར་ཆོས་ཅི་ཡོད།གཏེར་གནས་གང་ཡིན་ཟེར་བ་ལ།འདི་སྐད་སྨྲས།ང་ལ་གཏེར་ཆོས་ཟབ་གསང་མཁའ་འགྲོའི་སྙིང་ཐིག་ཅེས་བྱ་བ་ས་གཏེར་སྐོར་ཡིན།གཏེར་གནས་སྨར་གྱི་སྦ་གཏེར་དང་།དངུལ་རྒོད།གསེར་སྨད་རྔ་ལ་སྟག་རྩེ་རྣམས་ཡིན།རིག་གསུམ་མགོན་པོས་བྱིན་གྱིས་བརླབས།ཨོ་རྒྱན་ཆེན་པོས་རྗེས་སུ་བཟུང་།རིག་འཛིན་གྲུབ་ཐོབ་རྣམས་ཀྱིས་གཏད་རྒྱ་སྨོན་ལམ་དབང་བསྐུར་རྣམས་ཐོབ་པའི་དག་སྣང་སྐོར་གསུམ་སོགས་ཀྱི་ཆོས་སྡེ་བསམ་གྱི་མི་ཁྱབ་ཡོད་ཀྱང་བྲི་མ་ནུས།དེ་ན་རེ།འབྲི་མི་ནུས་ན་དང་པོ་ནས་དེ་ལྟར་གཏེར་ལེན་དོན་ཅི་ཡོད།ཁྱོད་ཀྱི་གཏེར་ཆོས་ལ་བྱིན་རླབས་དང་ནུས་པའི་ལྟས་མཚན་ཅི་ཡོད།མཐུ་དང་ནུས་རྩལ་ཡོད་དམ་མེད།ཞིབ་ཏུ་ཤོད་དང་ང་རྒས་པས་ཉན་སྤྲོ།མི་རྒན་ཅི་དགའ་གཏམ་ལ་དགའ༎གཞོན་ནུ་ཅི་དགའ་མོ་ལ་དགའ༎ཟེར་བའི་དཔེ་ཡིན།ང་ནི་གཏམ་ལ་དགའ་ཞེས་ཟེར།དེ་ལ་བདག་གིས་ངའི་གཏེར་བྱུང་ཡི་དམ་གྱི་སྒྲུབ་པ་ལ་ནི་དྲོད་རྟགས་བྱུང་བ་མ་གོདེ་ཅིས་ལན་པ་ཡིན་མ་ཤེས།བཀའ་སྲུང་དྲེགས་པ་ཅན་རྣམས་ཟླ་བ་གཅིག་གཉིས་གསུམ་ཙམ་ལ་བསྒྲུབས་པས་གྲུབ་ལྟས་མི་འབྱུང་བ་ཡོད་མ་མྱོང་།རྫོགས་རིམ་གྱི་ཁྲིད་བཏབ་ནས་རྩེ་གཅིག་ཉམས་སུ་ལེན་པ་རྣམས་ལ་ས་ལམ་གྱི་རྟགས་མཚན་དང་།ཁྱད་པར་ཐོད་རྒལ་ཉམས་སུ་བླང་བའི་སྐྱེས་བུ་རྣམས་ལ་ཟླ་བ་བརྒྱད་ནས་རིག་འཛིན་དང་པོའི་ས་ལ་མི་སླེབ་པ་ཡོད་མ་མྱོང་།མཐུ་ཡི་ལོ་རྒྱུས་བཤད་ན།སྤྱིར་ང་ཡི་འགལ་ཟླར་གྱུར་པ་ཐམས་ཅད་མི་ལོ་དགུ་ཙམ་ནས་མི་འགྱང་བར་ཕོང་བརླག་ཡལ་གསུམ་དུ་མི་འགྲོ་མི་སྲིད་དེ།ཁྱད་པར་དུ་ཁྱོད་ལ་ཟུར་ཙམ་བཤད་ན།སྔ་སོར་མཁའ་འགྲོ་མ་ཞིག་གིས།ཁྱོད་ལ་དགྲ་འབྱུང་གི་གཟའ་གསོལ་ལ་འབོད་ཟེར་བ་བྱུང་།བདག་གིས་རང་གཏེར་གཟའ་ཁྲ་རྣོ་བའི་ཐོག་མདའ་ཞེས་བྱ་བ་ལ་བརྟེན་ནས་གསོལ་མཆོད་བྱས་ཚེ།སློབ་བུ་རྡོར་བཟང་དཔོན་སློབ་ཀྱི་རྟ་སྒ་སྲབ་དང་བཅས་པ་སྤོས་བསོ་ཞེས་བྱ་བ་དང་ཆོས་ཤུལ་རྡོར་ལི་དང་ཆོས་ཤུལ་དབང་པོ་ཞེས་པ་བཏགས་མིང་དུ་སྒམ་ཁར་གྲགས་པ་གསུམ་གྱིས་ཕྲོག་སོང་བ་བདག་གི་གམ་དུ་མུན་སྲིབས་ཀྱི་འཚམས་སུ་ཐོན་བྱུང་ནས།ངེད་གཉིས་ཀྱི་སྒ་མ་ཁྱེར་སོང་།ཁྱེད་ནི་མངོན་སྤྱོད་ཀྱི་ལས་ལ་མངའ་དབང་བསྒྱུར་བ་ཞིག་ལོས་ཡིན།སྔོན་གྱི་གཏེར་ཆེན་རྣམས་ཀྱང་དེ་ལྟར་ཡིན་པར་ཐོས་ཀྱིས།དགྲ་དེ་ལ་དོ་ནུབ་རྟགས་ཐོན་པ་ཞིག་སྐུ་མཁྱེན།ཟེར་མ་ཐག་ཏུ་བདག་གིས་བུ་སློབ་རྣམས་བསྡུས་ནས་གཟའ་གསོལ་སྟོང་བྱས་མཐར་བསྐུལ་ཏེ་རྦད་པས།དགུན་ཟླ་འབྲིང་པོའི་ཚེས་ཉེར་དགུའི་ནུབ་རླུང་ཆེན་གཡོས་ཤིང་སེར་ཆེན་འབབ་པ་དང་ཆབས་གཅིག་ཏུ་འབྲུག་སྒྲ་དྲག་པོ་བྱུང་ཇག་པ་དེ་དག་གི་སྟེང་དུ་གཟའ་ཡི་ཆར་པ་བབས།ཆོས་ཤུལ་རྡོར་ལི་ཞེས་བྱ་བའི་ཁ་འཐམས་ནས་ཟས་ཁ་རུ་མི་ཤོང་བ་བྱུང་།སྒམ་ཁ་སྙིང་ཁྲག་ཁ་ནས་བསྐྱུགས་ཏེ་ཤིདེ་ནས་སྒ་མ་ཕྱིར་འཕང་།དེས་ཕྱིར་ལོའི་དགུན་སྤོས་བསོས་དེས་མཐུ་ག་ལ་ཡིན་སླར་ཡང་རྒིས་ལི་ཚང་ལ་རྐུ་མི་འགྲོ་རེ་ཟེར་ནས་རྒིས་ལི་ཚང་གི་རྟ་ཕོ་རྒོད་གསུམ་རྐུས་པ་ལ་གཉིས་ཀྱིས་རྐུན་ཐག་ཁུར་ནས་ཤོར་བྱུང་བ་ལ།ཉེར་དགུའི་ཉིན་རྟ་རྐུན་ལ་དམིགས་ནས་རྐུན་ཐག་དེའི་སེང་དུ་ཟོར་བ་བརྡབ་པས་ཕྱིར་ཉིན་གནམ་སྟོང་གི་ནངས་པར་རྐུན་ཐག་གི་རྩ་བར་འཕྱི་བ་ཞིག་གི་རོ་བྱུང་འདུག་སྟེ།བདག་གིས་དེ་བནྡེ་ཞིག་ཤི་བའི་ལྟས་རེད་སྨྲས་པ་དང་དེ་ཡི་ནུ་བོ་འབྲུམ་ནད་ལས་ཐར་བ་ཞིག་ཡོད་པ་སླར་ཡང་འབྲུམ་ནད་ཀྱིས་ན་སྟེ་ཤི་བ་སོགས་མི་འདོད་པ་སྣ་ཚོགས་པའི་བདེ་བའི་དུས་སྐབས་མ་བྱུང་།བདག་གིས་ཁང་པ་བརྩིགས་ཏེ་དགོན་པ་བཏབ་ཚེ་སྐྱི་མོ་ལྷ་འབུམ་ཞེས་བྱ་བས་ཁོ་ཡི་དགུན་ས་འཕྲོག་སོང་བ་འདི་ཉེས་ཤིན་ཏུ་ཆེ་ཟེར་ནས་རྒོལ་བ་བྱུང་ཚེ།བདག་གིས་གནོད་སྦྱིན་ཤན་པ་དམར་ནག་རྦད་ཚེ་ཁོ་མི་ཤི་ནོར་བརླག་ཏུ་སོང་།གཞན་ཡང་བདག་གི་འགལ་ཟླ་མགོ་ལོག་ཕྱོགས་ཀྱི་དཔོན་མོ་དྲག་ཤོས་ཤིག་ཡོད་པའང་མིག་ལོང་ཁས་ཞན་དུ་སོང་སྟེ་ཤིདེ་ལྟར་བདག་གི་གཏེར་བྱུང་གི་སྲུང་མ་རྣམས་ནི་གཞན་གང་གིས་འགྲན་ཟླ་དང་བྲལ་བ་ཡིན།ཞེས་སྨྲས་ཚེ།དེ་ན་རེ།ཚིག་གིས་ཅི་བྱེད་བྱིན་རླབས་དང་ནུས་པ་ལ་བརྟགས་པས་ངེས་པར་གོ་བ་ཡིན།ཡི་དམ་ནི་བསྐྱེད་རིམ་རང་རྒྱུད་པར་མི་གོལ་བའི་ངོ་བོ་བླ་མར་ཤེས་པ་དང་ལྷའི་ང་རྒྱལ་བརྟན་པོ་ཞིག་མེད་ན་འགྲུབ་མི་སྲིད་ཟེར།ཁྱོད་གཅོད་པ་ཞིག་ཡིན་ན་སློང་ཚད་འདྲ་ཨི་བྱུང་ཟེར།སྔོན་ང་འབའ་རའི་རྒྱ་གར་ཞེས་པའི་བུ་ཆུས་ཁྱེར་བའི་འཕོ་བཏབ་ཏུ་སོང་ཚེ་ནད་ཆེན་པོ་ཞིག་གིས་བཏབ་པ་ལ་ཅིས་ཀྱང་ཕན་པ་མ་བྱུང་བ་ལ།དེའི་ནུབ་མོ་མཐའ་གཏད་ཀྱི་དམིགས་པ་བྱས་པས་མི་ནག་སྐྲ་དང་སྨ་ར་དམར་བ་ཞིག་གིས་ང་ནི་རྫ་ཡུལ་གསེར་ཁྲབ་ཟེར་བ་དེ་ཡིན།ཁྱོད་ཀྱི་ནད་འདི་ངས་འཇིབ།ཁྱོད་ཀྱིས་ང་ལ་གཏོར་མ་མང་པོ་ཨི་སྦྱིན་ཞེས་ཟེར་བ་ལ།ངས་དེ་ལོས་སྦྱིན་བྱས་པས་བདག་གི་མཁལ་མ་ལ་ཁ་གཏད་དེ་ཧུབ་ཀྱིས་བཏབ་པས་ནང་རོལ་ཐམས་ཅད་འཇིབ་སོང་བའི་སྣང་བ་བྱུང་།དེའི་ནངས་པར་བདག་གི་ནད་རྣམས་རང་ཡལ་དུ་སོང་ནས་སོས་པར་གྱུར།ལར་མཐའ་དག་ཇི་ལྟ་བ་བཞིན་དུ་བརྗོད་མི་ནུས་ཚེ།ལན་བརྒྱ་ཕྲག་གཉིས་ཙམ་དུ་ཚར་སློང་ཆོད་གསུམ་གྱི་སྣང་བ་བྱུང་སྟེ།ད་ནི་འབྱུང་རྒྱུ་མི་འདུགརྒད་པོ་ཁྱོད་ཀྱིས་ང་ལ་ཡིད་ཨེ་ཆེས་སྨྲས་པ་དང་།རྒད་པོ་དེ་ན་རེ།ཆེས་ཆེས་ང་ཡི་གླུ་འདི་ཉོན།སྟོན་རྒྱས་སྤངས་རྒྱན་སྔོན་མོ་དེ༎བཀྲག་མདངས་རྒྱས་ཤིང་གྲངས་མང་ཡང་༎དགུན་གྱི་རྒྱལ་མོ་སླེབ་ཉེ་བས༎ཟླ་ཞག་མང་པོར་རྒྱས་ལོང་མེད༎ཚེ་སྟོད་འདས་པའི་མི་རྒན་པོའི༎ཆེ་མཐོ་ཁེ་དྲག་ཐོབ་རློམས་ནས༎དཀའ་སྤྱད་སྙིང་རུས་བྱས་བྱས་ཀྱང་༎འཆི་བདག་གནས་སུ་ཆས་ཉེ་བས༎ཡུན་དུ་འདུག་ཁོམས་མེད་ལ་ལྟོས༎དེང་སང་སྙིགས་མའི་གཏེར་སྟོན་ཚོས༎ལུས་སེམས་དལ་ཁོམ་མེད་པ་རུ༎གཏེར་ཆོས་ཕབ་ལ་འབད་འབད་ནས༎ཡུན་རིང་བསྟན་པ་གནས་རེ་ཡང་༎ཀླ་ཀློའི་བསྟན་པ་སླེབ་ལ་ལྟོས༎སྲིད་དང་ལྷན་སྐྱེས་མི་རྒན་ངས༎འཇིག་རྟེན་བྱ་བར་གོམས་གོམས་ཀྱང་༎གོམས་ཚུལ་གཞན་ལ་བཤད་དོན་མེད༎ཡུན་རིང་སྡོད་ལོང་མ་མཆིས་པས༎ལང་ཚོ་ཉམས་ལུགས་འདི་ལ་ལྟོས༎ངས་ཁྱོད་ལ་སྨད་པས་ཅི་ཞིག་གནོད༎དེས་ཁྱོད་ལ་གནོད་པ་འབྱུང་དུ་མེད༎ང་ཡིད་ཆེས་ཀྱང་ཅི་ལ་ཕན༎ཁྱོད་ལ་ཕན་པ་སྤུ་ཙམ་མེད༎གཞན་གྱིས་ཚིག་ངན་བརྒྱ་སྨྲས་ཀྱང་༎དེ་ལ་ཁོང་ཁྲོ་སྡང་སེམས་ཆོད༎བསྟོད་ཅིང་བསྔགས་ཚིག་བརྗོད་བྱས་ཀྱང་༎དེ་ཡིས་ཕན་པ་ཆེར་མི་ཐོགས༎དགའ་མགུ་ཆགས་ཞེན་མ་བྱེད་ཅིག།ལྟ་བ་ནམ་མཁའ་རྣམ་དག་ལ༎སྒོམ་པ་བཅོས་སྒྱུར་མེད་པར་ཞོག།སྤྱོད་པ་བླང་དོར་མེད་པ་རུ༎མ་བཅོས་གཡོ་འགུལ་བྲལ་བར་ཞོག།བུ་སློབ་སྐལ་ལྡན་རེ་བྱུང་ན༎གྲོལ་བྱེད་གདམས་པ་སྟོན་པར་གྱིས༎ན་ཚོད་ཡོལ་བའི་དུས་བྱུང་ཚེ༎རྙེད་ཚོལ་དཀོར་སྡུད་སྤྱོད་པ་སྤོངས༎འཆི་བདག་སུན་མ་སླེབ་པའི་དུས༎བློ་སེམས་བདེ་བ་ཞིག་ལ་རེམ༎མི་རྒན་ལེགས་པའི་བློ་གྲོས་ང་༎གཞན་གྱིས་མི་ཐུབ་བྲག་ལ་འགྲོ༎ཁྱོད་ཀྱང་རྨི་ལམ་གྲོང་ཁྱེར་ནས༎ཉིན་སྣང་ཡངས་པའི་ཡུལ་དུ་སོང་༎ཞེས་ཟེར་བྲག་ལ་ཐིམ་སོང་།ལོ་ཁྱིམ་དེ་ཡི་དགུན་ཟླ་འབྲིང་པོའི་ཚེས་གཅིག་ལ་བདུད་འདུལ་རྡོ་རྗེའི་གཏེར་བྱོན་རྡོ་རྗེ་ཁྲོ་ལོད་ཀྱི་ཟླ་སྒྲུབ་ལ་ཞུགས།དགུན་ཐ་ཆུང་གི་ཚེས་ལྔ་ནས་བཅོ་ལྔའི་བར་ཁྲོས་མའི་སྒྲུབ་པ་ལ་ཞུགས་སོ།། 

དགུང་ལོ།༤༡   

དེ་ནས་ལོ་གྲངས་བཞི་བཅུ་ཞེ་གཅིག་ལ་བབས་ཚེ། ཧོར་ཟླ་ལྔ་བའི་ཚེས་བཅོ་བརྒྱད་ཀྱི་ནུབ་མཁའ་འགྲོ་མ་གསང་མཛོད་བདག་མོ་ཡིན་ཟེར་བའི་བུ་མོ་ཞིག་གིས།བདག་ལ་ཁྱོད་དབྱར་དཀར་གསོལ་ལ་སོང་།དགུན་ནས་གསོལ་ལ་མ་འགྲོ་འཚམས་སྒྲུབ་ལ་རེམ་མཛོད་ཅེས་ཟེར་བ་ལ།ལགས་ཟ་རྒྱུ་མི་རྙེད་པས་འགྲོ་དགོས་འབྱུང་གི་ཞེས་སྨྲས་པ་དང་།བུད་མེད་དེ་ན་རེ།ལ་ཐོག་འདི་རུ་ཞིང་རྨོས་ལ་ས་བོན་ཐོབ་དང་ཟ་རྒྱུ་དེ་ཡིན་ཞེས་ཟེར།ཡང་གླུ་འདི་གྱེར་འདུགདམ་སྲིའི་སྤྲུལ་པས་རྒོལ་བ་ལ།།དམ་སྲི་ལག་ཏུ་ལོན་པ་འབྱུང་༎དམ་སྲི་ལག་ཏུ་ལོན་པའི་རྐྱེན༎ལོངས་སྤྱོད་དཔལ་ལ་བདུད་ཀྱིས་རྒོལ༎དེ་འབྲས་མི་བདེའི་ཟུག་རྔུ་སློང་༎དེ་ཚེ་སྡོད་པའི་དུས་མ་ཡིན༎འགྲོ་ཕྱོགས་ལྷོ་ནུབ་འཚམས་སུ་སོང་༎ལུང་པ་ཡར་ཆེན་བླ་ཡི་ནང་༎རེ་ཞིག་གནས་ན་དགེ་ལེགས་དང་༎སྙན་གྲགས་རླུང་རྟའི་དཔལ་ཁ་བསྐྱེད༎བུ་སློབ་སྐལ་ལྡན་མང་དུ་འབྱུང་༎དེ་ལྟར་མ་བརྗེད་སེམས་ལ་ཞོག།ཅེས་ཟེར་ཡལ་སོང་།དབྱར་ཐ་ཆུང་གི་ནུབ་ཀྱི་རྨི་ལམ་ན་སྟེང་གི་ནམ་མཁར་སྤྲིན་ནག་པོ་བལྟར་མི་བཟོད་པ་ནག་ལ་ལྷུན་འཐུག་པ་ཞིག་གི་མཐའ་འཁོར་ཡུག་ཏུ་སྤྲིན་དམར་ནག་གིས་བསྐོར་བ་ཞིག་འཐིབ་བྱུང་བའི་ནང་ནས་བདག་གི་མདུན་དུ་ཐལ་ཕུང་ཞིག་ཡོད་པའི་སྟེང་དུ་སྟག་འཇིགས་སུ་རུང་བ་ཞིག་ལྷུང་བྱུང་།ཡུན་གཅིག་གི་ཚེ་སྟག་དེ་སྐྱུགས་ཤིང་གྲེ་ལོག་བྱེད་པའི་ཁ་ནང་ནས་བུད་མེད་རྒན་མོ་ཞིག་ལྷུང་ནས་ཡང་དར་གཅིག་གི་ཚེ་རྒན་མོ་དེ་ལ་བུ་གཅིག་བཙས་པ་པང་དུ་བླངས་འདུག་པའི་མོད།བུ་དེ་ཡར་ལངས་ཏེ་ས་ཐོག་ཏུ་འདུག་སྟེ།ཡ་ཨ་མ་གནས་འདི་གང་ཞེས་བྱ་བ་ཡིན།དགོན་པ་འདི་སུ་རེད།འདི་སུས་བཏབ་ཟེར་བ་ལ།ཨ་མ་ན་རེ།ཨེ་མ་གཅེས་པའི་བུ་ཁྱོད་ཉོན༎ཡུལ་འདིའི་ཡུལ་ངོ་མ་ཤེས་ན༎འབྲི་ཡུལ་བཙན་བདུད་འཇིགས་པའི་ཡུལ༎མི་འདིའི་མི་ངོ་མ་ཤེས་ན༎མགོ་ལོག་སྡིག་པའི་གྲོང་མི་ཡིན༎དགོན་འདི་གང་ཡིན་མ་ཤེས་ན༎འདི་མདངས་སུམ་ཆགས་པའི་དགོན་པ་རེད༎འདི་འདེབས་མི་བདུད་འཇོམས་རྡོ་རྗེ་རེད༎ཡུལ་འདི་སྒྱུ་མའི་གྲོང་ཁྱེར་སྟེ༎མི་འདི་ཚོང་འདུས་མགྲོན་པོ་རེད༎དགོན་འདི་མགྲོན་པོའི་ས་ཚིགས་ཡིན༎ཞེས་ཟེར་བ་ལ།ཡང་བུ་དེས།ཨ་མ་བསྐལ་བ་ཆགས་པའི་ལོ་རྒྱུས་དང་འགྲོ་བ་སེམས་ཅན་དང་བསྟན་པའི་བྱུང་ཚུལ་ཤོད་ཅེས་ཟེར་བའི་ལན་དུ་བསྐལ་བ་ཆགས་པའི་ལོ་རྒྱུས་ཞིབ་ཏུ་བཤད་ཅིང་།དེ་ནས་བུ་དེས་མ་འོངས་འབྱུང་འགྱུར་གྱི་ཚུལ་ཤོད་དང་ཟེར་བ་ལ།དེ་ལྟར་ཞིབ་ཏུ་བཤད་པ་ཐོས་ཀྱང་ཡི་གེ་མང་བས་འཇིགས་ནས་མ་བྲིས་སོ།དེ་ནས་བུ་དེས་ངེད་མ་བུ་གང་དུ་འགྲོ་ཟེར་བ་ལ།རྒན་མོ་དེས།ཡུལ་མི་གནས་ཟང་ཐལ་གྱི་གྲོང་ཁྱེར་དུ་འགྲོ་ཟེར་ཞིང་བུ་དེ་ཁྱུར་མིད་དུ་བཏང་།དེ་ནས་རྒན་མོ་ན་རེ།ཨ་ལེ་བདུད་འཇོམས་ཁྱོད་གནས་འདིར་ཡུན་རིང་པོར་འདུག་པའི་བསྐལ་བ་ནི་མེད་དོ།ཞེས་ཟེར་མ་ཐག་ཏུ་སྟག་དེས་རྒན་མོ་དེ་ཁྱུར་མིད་དུ་བཏང་ནས།དེས་ཕུ་ཕུ་ལང་ལང་བསྟན་པའི་བདུད་དུ་འབབ་ལ་ཉེ་ཟེར་ཏེ་སྤྲིན་དང་འདྲེས་ནས་ཡལ་ལོ།    །

དགུང་ལོ། ༤༢   

དེ་ནས་ལོ་གྲངས་བཞི་བཅུ་ཞེ་གཉིས་ལ་བབས་ཚེ། ཧོར་ཟླ་གསུམ་པའི་ཚེས་གཅིག་གི་ཉིན་ཕུག་ལུང་གད་ཐོག་ཏུ་རྨོས་བྱས།དེར་ནས་སྒྲོ་བ་གཉིས་བཏབ་པ་ལ་སྟོན་དུས་སུ་སྒྲོ་བ་ལྔ་བཅུ་རྩ་གཅིག་སྨིན་པ་ཡིན།སྟོན་ཟླ་ར་བའི་ཚེས་བཅུའི་ནུབ་མོ་རྨི་ལམ་ན།མཁའ་འགྲོ་མ་ཀུན་གསལ་རྒྱལ་མོ་ཞེས་བྱ་བ་ཡིན་ཟེར་བ་ཞིག་བདག་གི་ཐད་དུ་ལྷགས་ནས་འདི་སྐད་ཟེར།ཨེ་ཨེ།ལྷོ་མ་རུང་བདུད་ཕོ་སྨོན་ལོག་པས༎ཡུལ་མི་བདེ་ལ་ཡོག་འདོར་བ་ལས༎སྟོང་བགེགས་ཀྱི་སྡེ་ཚོགས་མགྲོན་དུ་བཀུག།ཀླུ་སྔོན་པོའི་རལ་བ་གཅོད་ཆས་ནས༎གནས་རི་རབ་ཟོམ་གྱི་འབྱུང་དམག་འཁྲུགས༎མཐའི་མི་སྡེ་མི་སྲུན་དབུས་སུ་འདྲེན༎དེའི་རྐྱེན་གྱིས་བསྟན་འགྲོའི་བདེ་བ་བཅོམ༎ཡུལ་འདི་ཡི་ནག་ཕྱོགས་གདུག་པའི་འཕྲུལ༎དོམ་ནག་པོས་ཤ་ལ་རྔམ་ཟས་བྱེད༎དེས་རང་སྒྲ་བཏོན་པའི་རྐྱེན་དབང་གིས༎གངས་སེང་གེ་དཀར་མོས་མ་བཟོད་དེ༎དཔུང་སྟག་གཟིགས་མང་པོའི་ཁྱུ་ཚོགས་ཀྱིས༎ཡུལ་དྲི་ཟའི་གྲོང་ཁྱེར་བཞིན་ངོམ་པ༎དོན་དེ་ཕྱིར་དབྱར་རྔ་སླེབ་པའི་ཚེ༎ཡུལ་ཀ་ན་ཀ་རུ་ལ་འུར་ཆོས༎དུས་རེ་ཞིག་བདེ་བའི་ཉི་ཞུར་མཐོང་༎ཞེས་ཟེར་ཞིང་མི་སྣང་བར་ཡལ་ལོ།།ཡང་ཧོར་ཟླ་གསུམ་པའི་ཚེས་བཅོ་ལྔ་ལ་བབས་ཚེ།ཆོས་སྐོར་ལྷ་རོ་ཞེས་བྱ་བས་བདག་གི་མཛོ་མོ་གཅིག་བརྐུས་སོང་བ་ན།དེ་ལ་མཐུ་བྱེད་དགོས་ཟེར་བ་མང་པོ་བྱུང་ཡང་བདག་གིས་དེ་ལྟར་བྱ་མི་ཉན་ཏེ།མཐར་རྩད་ཆོད་འོང་སྲིད་དེ་མི་བདེ་བའི་རྒྱུ་ཞིག་ཏུ་མི་འགྲོ་བའི་ཐབས་མེད་པ་རེད་ཅེས་སྨྲས་ཏེ་མ་བྱས་སོ།ཧོར་ཟླ་བརྒྱད་པའི་ཚེས་ལྔའི་ནུབ་མཁའ་འགྲོ་མ་སེར་མོ་གསེར་བཙོ་མའི་ཁ་དོག་འབར་བ་དར་དཀར་པོའི་ཨང་རག་གྱོན་པ་ཞིག་བདག་གི་ཐད་དུ་ལྷག་ནས་ལྷོ་ཕྱོགས་རི་བོ་གྲུ་འཛིན་ལ་ལྟད་མོར་ཨེ་འགྲོ་ཞེས་ཟེར་བ་ལ།ཁྱོད་སུ་ཡིན་དྲིས་ཚེ།དེ་ན་རེ།ང་ནི་གནས་དེ་རུ་གནས་པའི་མཁའ་འགྲོ་ནོར་སྲུང་མཆེ་གཙིག་ཆེན་མོ་ཞེས་བྱ་བ་ཡིན་ཏེ་སྔོན་གྱི་དུས་ཤིག་ཏུ་ལས་འབྲེལ་ཡོད་པ་དང་།ཁྱོད་ཀྱི་རིག་མ་དེ་ངའི་སྤྲུལ་བ་ཡིན་ཏེ་ཁྱོད་གནས་དེར་འབོད་དུ་འོང་པ་ཡིན།ཞེས་ཟེར་བ་ན།དེ་དང་ལྷན་གཅིག་ཏུ་བསྡེབ་ནས་ནམ་མཁའ་ལ་འཕུར་སྟབས་ཀྱིས་སོང་བས་རྒྱ་མཚོ་ཆེན་པོ་རྒྱ་ཆེ་ལ་གཏིང་ཟབ་པ་མདོག་སྔོ་ནག་ཏུ་འདུག་པ་ཞིག་གི་ཕ་མཐར་བགྲོད་ཚེ་དེ་ན་ཤར་ལྷོ་ནུབ་བྱང་ཕྱོགས་མཚམས་ཁོར་ཡུག་ཐམས་ཅད་ལུང་བ་མང་པོས་བསྐོར་བའི་མདོའི་ཆུ་རྣམས་རྒྱ་མཚོར་འབབ་པ།ཆུ་ཐམས་ཅད་ཕྱོགས་གཅིག་ཏུ་འདུས་པ།དེའི་དབུས་སུ་སྤངས་ཐང་རྒྱ་ཁྱོན་དཔག་ཏུ་མེད་པའི་དབུས་ན་ན་བ་རྒྱ་ཆེ་ཞིང་ཁོད་སྙོམས་པ་དེ་ཡི་དབུས་ན་ཆུ་མཚོས་འཁོར་བའི་ཚུལ་དུ་ཡོད་པའི་ནང་དུ་བྱ་ངང་བ་དང་།ཁྲུང་ཁྲུང་དང་།མཐིང་རིལ་དང་།བྱ་དུང་དཀར་འདྲ་བ་དང་།གསེར་ལྟར་སེར་བ།བྱུ་རུ་ལྟར་དམར་བ།གཡུ་ལྟར་ལྗང་བ།ཟ་འོག་ལྟར་ཁྲ་བོ་ལ་སོགས་པའི་ཆེ་བ་ཆུང་བ་འབྲིང་བ་བསམ་གྱིས་མི་ཁྱབ་པ་གནས་པ།མེ་ཏོག་སེར་པོ་དམར་པོས་ཡོངས་སུ་ཁེབས་པ།མཚོ་དེ་ཡི་འགྲམ་ན་ཀླུ་ཡི་བུ་དང་བུ་མོ།དྲི་ཟའི་བུ་དང་བུ་མོ།མིའམ་ཅི་ཡི་བུ་དང་བུ་མོ་མང་པོས་བྱ་ཁྲུང་ཁྲུང་དཀར་མོ་མི་གཏམ་ཤེས་པ་ཞིག་ལ་ཆོས་ཉན་དུ་འདུག་གོབདག་གིས་མཁའ་འགྲོ་དེ་ལ་ཕ་གི་ཁྲུང་ཁྲུང་འདི་ཅི་ཡིན་དྲིས་ཚེ།དེ་ན་རེ།དྲང་སྲོང་ལེགས་པར་སྨྲ་བ་ཞེས་བྱ་བ་རེད་ཟེར།ཡང་བདག་གིས།བུ་དང་བུ་མོ་འདི་དག་ཀླུ་དང་དྲི་ཟ་མིའམ་ཅིའི་བུ་དང་བུ་མོ་ཡིན་ན་འདི་དག་གིས་བྱ་འདི་ལ་ཆོས་ཉན་པ་འདི་ཅིའི་ཕྱིར་ལགས་དྲིས་ཚེ།དེ་ན་རེ།འདི་དག་ནི་ཚོགས་མ་བསགས་པའི་སེམས་ཅན་མ་ཡིན།མི་ཡུལ་ནས་འཕགས་པ་ལ་དད་ཅིང་གུས་པས་གསོལ་བ་བཏབ་པ་དེ་ཞིང་དེར་སྨོན་ནས་ཡིག་དྲུག་དུང་ཕྱུར་མང་པོ་བགྲང་བ་རྣམས་ཞིང་ཁམས་ངེས་པ་རུ་སྐྱེ་མ་ནུས་པ་གནས་འདིར་སྐྱེས་ཏེ་ཆོས་ཉན་ཞིང་ཚོགས་བསགས་ནས་མཐར་ཡེ་ཤེས་ཀྱི་སྤྱན་ཐོབ་ཚེ་འཕོས་ནས་དག་པའི་ཞིང་འཕགས་པའི་གྲོང་དུ་སྐྱེ་རྒྱུ་ཡིན་ཞེས་ཟེར་རོ།མཚོ་ལྕགས་རི་ལྟ་བུའི་དབུས་ན་ཡང་ཐང་ཆེན་པོ་འཁོར་བའི་དབུས་ན་རི་རྒྱལ་ཆེན་པོ་དབྱར་དགུན་མེད་པར་མེ་ཏོག་དཀར་པོས་ཡོངས་སུ་ཁེབས་ཤིང་རྩེ་མོ་དགུང་ལ་སྙེག་པ་ཡོད་པའི་རྩེ་རུ་ཕྱིན་ཚེ་ས་ལས་དཔག་ཚད་གཅིག་འཕགས་པའི་སྟེང་དུ་འོད་ཕུང་དཀར་པོ་ས་གཞིའི་རྣམ་པར་མཆེད་པའི་དབུས་སུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཡངས་པའི་ནང་དུ་དཔའ་བོ་དང་དཔའ་མོ་རྒྱ་མཚོ་ལྟ་བུའི་དབུས་ན་འཕགས་མཆོག་ཐུགས་རྗེ་ཆེན་པོ་ཞལ་གཅིག་ཕྱག་བཞི་པ།ཞབས་རྡོ་རྗེ་སྐྱིལ་མོ་ཀྲུང་གིས་རིན་པོ་ཆེའི་ཁྲི་ལ་བཞུགས་ཤིང་ལོངས་སྤྱོད་རྫོགས་པའི་ཆས་ཀྱིས་རབ་ཏུ་བརྒྱན་ཏེ་ཡུམ་མཁའ་སྤྱོད་དབང་མོ་དམར་མོ་དང་གཉིས་མེད་འཁྲིལ་སྦྱོར་དུ་རོལ་བ་ཞིག་དང་མཇལ་མ་ཐག་ཏུ་བདག་གིས་ཕྱག་འཚལ་ཏེ་གསོལ་བ་བཏབ་ནས་བདག་ལ་ཚེ་འདིར་རྣམ་པར་གྲོལ་བའི་གདམས་པ་ཞིག་བསྩལ་དུ་གསོལ།ཞེས་ཞུས་ཚེ།འཕགས་པའི་ཕྱག་ནས་ཡི་གེ་ཚེམ་པ་ཞིག་བདག་ལ་བསྟན་ཏེ་ཞལ་ནས་སྡུག་བསྔལ་ངེས་པར་སེལ་བའི་གདམས་པ་འདི་ལ་ལྟོས་ཤིག་ཅེས་གསུངས་མ་ཐག་ཏུ་བདག་གི་རྒྱུད་ལ་སྤར་གྱིས་བཏབ་པ་ལྟར་ངེས་པར་གྱུར་ཏོ།ད་ཁྱོད་ལ་ང་བསྒྲུབ་པའི་ཐབས་འདིའི་དབང་ལུང་སྦྱིན་ཞེས་གསུངས་སྟེ་ཚར་གཅིག་གསུངས་མཐར།འོ།བུམ་དབང་གིས་ལུས་རྡོ་རྗེའི་སྐུ་རུ་སྨིན་པར་གྱུར་ཅིགགསང་དབང་གིས་ངག་རྡོ་རྗེའི་གསུང་དུ་སྨིན་པར་གྱུར་ཅིག།ཤེར་དབང་གི་ནུས་པས་ཡིད་རྡོ་རྗེའི་ཐུགས་སུ་སྨིན་པར་གྱུར་ཅིགཚིག་དབང་གི་ནུས་པས་སྣང་སེམས་སྐུ་དང་ཡེ་ཤེས་ཀྱི་རོལ་བ་རུ་གོ་འཕོས་ཤིང་སྨིན་ཅིང་གྲོལ་བར་ཤོག་ཅིགཅེས་གསུངས་མཐར།རིགས་ཀྱི་བུ།དེང་ལྔ་བརྒྱའི་སྙིགས་མ་ལ་ཐུག་པའི་དུས་འདི་དོན་དམ་པའི་ཆོས་ལ་ཡིད་ཆེས་པའི་མི་ནི་དཀོན།སྨོན་ལམ་གྱི་སྟོབས་ཀྱིས་ངའི་གདུལ་བྱར་མ་གྱུར་པའི་མི་མེད་དེ་ང་ཉིད་སྒྲུབ་པའི་ཐབས་ལ་བསྟེན་ཏེ་རྟག་ཏུ་ཡིད་ལ་བྱས་ནས་ཡི་གེ་དྲུག་མ་ལ་འབད་པ་དང་།མཐར་བསྔོ་བ་སྨོན་ལམ་གྱིས་རྒྱས་བཏབས་ཏེ་ང་ཡི་ཞིང་འདིར་སྨོན་ལམ་རྟག་ཏུ་འདེབས་པ་རྣམས་འདིར་སྐྱེས་ཏེ།དེ་ཕྱིར་བསོད་ནམས་བསགས་པ་ནི་གནད་ཀྱི་དམ་པ་ཡིན།ད་ཁྱོད་ཀྱིས་ཚེས་གྲངས་དང་དུས་བཟང་ནམ་བྱུང་ལ་ཚོགས་འཁོར་རེ་བསྐོར་བ་གལ་ཤིན་ཏུ་ཆེ།བུ་སློབ་ཐམས་ཅད་ཀྱིས་རི་ཁྲོད་བསྟེན་ནུས་ན་འཇའ་ལུས་ཐོབ་པའི་སྐྱེས་བུ་མང་པོ་འབྱུང་བར་ངས་ལུང་བསྟན་ཏོ་ཞེས་གསུངས།དེ་ནས་བུ་མོ་དེས་འགྲོ་འགྲོ་ཞེས་ཟེར་ཞིང་བདག་གི་ལག་པ་ནས་འཐེན་བྱུང་བས་གཉིད་ལས་སད་དོ།དེ་ནས་དགུན་ཟླ་གསུམ་དུ་ཡི་དམ་ཀྱི་བསྒོམ་བཟླས་ལ་ཞུགས་ནས་དམ་རྒྱ་བྱས་སོ།      ། 

དགུང་ལོ། ༤༣   

དེ་ནས་ལོ་ཁྱིམ་བཞི་བཅུ་ཞེ་གསུམ་པ་ལ་བབས་ཚེ། ཧོར་ཟླ་བཞི་པའི་ཚེས་བཅུའི་ནུབ་མཁའ་འགྲོ་ཀུན་གསལ་མིག་ལྡན་མ་ཡིན་ཟེར་བ་ཞིག་ན་རེ།བུ་ཁྱོད་ང་ཡི་ངག་ལ་ཉོན༎ལྷོ་ཕྱོགས་ཕོ་ཉའི་ངག་བཞིན་དུ༎སོངས་ལ་སེང་ཆུང་གངས་རྩེར་ཕུད༎གཡུ་ཡི་རལ་བ་མཐའ་ནས་རྒྱས༎གནས་སྡོང་རྫོངས་བྲག་གི་རི་བོ་འདི༎བཙན་མི་ཟན་དམར་པོའི་གནས་ཡིན་ཞིང་༎མ་མཁའ་འགྲོ་བདེ་བའི་འབྱུང་གནས་ལ༎འཁོར་མཁའ་འགྲོ་བྱེ་བས་བསྐོར་ནས་ཡོད༎གནས་དེ་རུ་སྒྲུབ་པས་འབྲེལ་འཇོག་ན༎དམ་ཉམས་པའི་སྐྱེས་བུ་མ་གཏོགས་པ༎ཀུན་དངོས་གྲུབ་ཕྲན་བུ་རེ་འཐོབ་སྲིད༎དེ་མ་བརྗེད་ཟུངས་ཤིག་སྐལ་ལྡན་བུ༎ཞེས་ཟེར་ཡལ།དེ་ནས་དབྱར་ཟླ་འབྲིང་པོའི་ཚེས་གཅིག་ལ་ལམ་དུ་ཞུགས་ནས་རྡོ་ཡི་རྩང་ཆེན་དགོན་དུ་བུ་མཁྱེན་བརྩེའི་མྱུ་གུ་ཁྲི་ཁར་མངའ་གསོལ།དེ་རྗེས་རྣུ་ཟོག་དགོན་དུ་ཕྱིན་ནས་དེ་ཚང་གིས་ཀྱང་ཁྲི་ཁར་མངའ་གསོལ།དེ་མཐར་སྟོན་འབྲིང་པོའི་ནང་དུ་སླར་ཡང་རང་དགོན་དུ་སླེབ།ལོ་ཁྱིམ་དེ་ཡི་དགུན་ཟླ་གསུམ་ལ་ཡི་དམ་གྱི་སྒྲུབ་མཚམས་སུ་ཞུགས། དེའི་ཚེ་མཁའ་འགྲོ་མང་པོས་ཟས་ནོར་གོས་སོགས་ལོངས་སྤྱོད་གྱ་ནོམ་པ་སྣ་ཚོགས་ཕུལ་ནས་སྨོན་ལམ་བཏབས་ཤིང་དབང་བསྐུར་བ་ལན་གསུམ་དུ་ཉམས་དང་རྨི་ལམ་དུ་བྱུང་།

མུ་མཐུད་དུ་འགོད་རྩིས་ཡིན།

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔