ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༨

དགུང་ལོ།༢༥ 

 རང་ལོ་ཉེར་ལྔ་ལ་བབས་ཚེ། ཧོར་སྐོར་གྱི་ནང་དུ་གདུལ་བྱར་འགྲོ་བའི་དུས་སུ་སྦྱིན་བདག་འགའ་ལ་སྒྲུབ་པ་རེ་བཏོན་སྐབས་དཀྱིལ་འཁོར་གྱི་ནང་དུ་དཔའ་བོ་མཁའ་འགྲོ་མ་མང་པོ་འདུ་བ་མཐོང་བ་དང་ནད་པ་མང་པོ་ལ་ཕན་ཐོགས་པ་བྱུང་།ཡང་དེའི་དབྱར་ཟླ་ར་བའི་ཚེས་བཅུར་ཚོགས་བསྐང་བརྒྱ་ཕྲག་ཙམ་བཏང་བས་དེའི་ནུབ་མོར་མཁའ་འགྲོ་མ་དམར་མོ་རས་དཀར་གྱི་ཨང་རག་གྱོན་པ་ཞིག་གིས།སྔོན་ཚེ་བསྐལ་བ་མང་པོའི་གོང་རོལ་ནས༎བསོད་ནམས་ཚོགས་དང་སྨོན་ལམ་སྟོབས་འཛོམ་པའི༎སྐྱེས་བུ་ཁྱོད་ཉིད་ཕ་ཅིག་པད་འབྱུང་གི།ཕྲིན་ལས་མངའ་བདག་ཟབ་གཏེར་བདག་པོ་ལགས༎སྨར་སྟོད་བྲག་དམར་སྒམ་ཆུང་འདྲ་བ་དེར༎བཻ་རོའི་རྦ་མཁར་གཏེར་དུ་སྦས་པ་ཡི༎མིང་ཟུར་ཆག་པའི་རྦ་ཐི་ཞེས་སུ་གྲགས༎དེ་རུ་སྐུ་གསུང་ཐུགས་ཀྱི་རྟེན་རྣམས་དང་༎ཁ་བྱང་ཡང་བྱང་གཉིས་ཀྱི་བཞུགས་བྱང་ཡོད༎དུས་ལ་བབ་པོ་ཕ་ནོར་མྱུར་དུ་ལོངས༎ཞེས་ཟེར་བའི་ལན་དུ་འདི་སྐད་སྨྲས།ཀྱཻ།ཨ་ལྕམ་རྒྱལ་མོ་བཞིན་ལེགས་མ༎གཏད་ཁུང་མེད་པའི་སྤྲང་པོ་ང་༎ཕྱི་ན་ཐོས་པའི་ཤེས་རབ་མེད༎ནང་ན་སྒོམ་པའི་ཡོན་ཏན་མེད༎ནོར་དང་ལོངས་སྤྱོད་འབྱོར་བ་མེད༎གོང་ན་སྐྱབས་ཀྱི་རྟེན་སོ་མེད༎འོག་ན་བརྟེན་པའི་ཡར་འདེགས་མེད༎བར་ན་ཉེ་བ་རྩ་ལགས་མེད༎ཕྲག་དོག་སྨ་ཕབ་བྱེད་པ་ལས༎བཀུར་བསྟོད་བྱེད་པའི་ཕན་གྲོགས་མེད༎ཉམ་ཐག་སྟོབས་མེད་སྤྲང་པོ་ལ།།གཏེར་གྱི་སྐལ་བ་ཡོད་པ་དང་༎ཡོད་ཀྱང་འགྲོ་དོན་འབྱུང་སྙམ་མེད༎རང་རེ་ཕྱི་མར་མི་འཇིགས་པའི༎བན་སྤྲང་བཟང་པོ་ཨེ་འོང་སྙམ༎སྨོན་དོན་འགྲུབ་པར་བླ་མ་མཁྱེན༎ཅེས་པའི་ལན་དུ་མོ་ན་རེ༎ཀྱཻ།བུ་ཁྱོད་སེམས་དཔང་མ་ཞན་དང་༎བུ་སློབ་སྐར་ཚོགས་ལྟ་བུ་འབྱུང་༎དང་པོ་ཉམ་ཆུང་སྐྱབས་མེད་ཀྱང་།།ཐ་མ་གཞན་ལས་ཁྱད་འཕགས་འབྱུང་༎ཀུན་གྱིས་བསྟོད་ཅིང་བཀུར་གནས་བྱེད༎རང་གི་ལས་འབྲེལ་གདུལ་བྱ་ལ༎ཕན་ཐོགས་ཐར་ལམ་ལ་འདྲོང་བྱེད༎ང་ཡིས་བསྒོས་པ་ཅི་བཞིན་མཛོད༎ཁྱོད་ཀྱི་སྐྱིད་མགོ་ཚུགས་པ་ཡིན༎ལོངས་སྤྱོད་ཡར་ངོ་ཟླ་ལྟར་འཕེལ༎འདོད་དོན་ལྷ་དང་སྲུང་མས་བསྒྲུབ༎གྲོགས་ནི་མ་དང་མཁའ་འགྲོས་བྱེད༎སེམས་ལ་ཞོག་ཅིག་སྐལ་ལྡན་བུ༎ཞེས་ཟེར་ཞིང་དེ་ལྟར་སྨར་གྱི་རྦ་གཏེར་ཞེས་བྱ་བའི་བྲག་སྒམ་འདྲ་བ་དེར་སོང་དང་ས་ར་ཧ་པའི་ཕྱག་ཕྲེང་དང་བྱེ་མ་ཨ་ཀྲོང་ལས་གྲུབ་པའི་སྒྲོལ་མའི་འདག་སྐུ་དང་།གཏེར་གྱི་ཁ་བྱང་དང་བཅས་པ་ཡོད་པས་མི་འགྱང་བར་མྱུར་དུ་དེར་སོང་ཞིག་ཅེས་ལུང་བསྟན་པ་བཞིན།དབྱར་ཟླ་ཐ་ཆུང་གི་ཚེས་བཅུའི་ཉིན་རྦ་གཏེར་བྲག་གི་ཚལ་དུ་ཕྱིན་པ་དང་བྲག་མཐོ་སྐོར་ཞིག་ཆད་ནས་འོངས།དེའི་ཤུལ་དུ་བལྟས་ཚེ་སྒྲོལ་མའི་འདག་སྐུ་དང་ལ་ཆའི་སྒྲོམ་བུ་ཕྲེང་བ་རྙིང་བ་ཡིད་དུ་འོང་བ་དང་བཅས་སོལ་སྤུངས་ནང་ནས་བཏོན་ཞིང་།སྒྲོམ་དེའི་ནང་ན་ཤོག་དྲིལ་ཞིག་འདུག་པའི་ངོས་ལ་བལྟས་ཚེ་དངུལ་རྒོད་ཞེས་བྱ་བའི་བྲག་བྱ་ཁྱུང་འདྲ་བའི་མགུལ་ན་ཁ་བྱང་ཞིག་ཡོད་ཅེས་བྲིས་པ་མཐོང་ཞིང་།གནས་དེར་སོང་ནས་ཕྱིན་མ་ཐག་ཏུ་ཉི་མ་སྤྲིན་ཆར་འདྲེས་པའི་ཀློང་དུ་འཇའ་ཚོན་འོད་ཀྱི་དྲ་བ་འཁྲིགས་པའི་དབུས་སུ་མི་ནག་པོ་སེང་གེའི་མགོ་ཅན་རྟ་ནག་རྟིང་དཀར་ལ་ཞོན་པ་ལག་ན་མདུང་དར་ཐོགས་པ་ཞིག་གིས་བྲག་ངོས་སུ་མདུང་དར་གྱིས་བརྡེག་པའི་མོད་ལ་བྲག་སྲུབ་ཅིག་གས་པའི་ནང་ན་ཤོག་དྲིལ་ཞིག་འདུགདེ་རུ་བལྟས་པས་དེའི་ངོས་སུ་ས་མོ་ལུག་གི་ལོ་དགུན་ཟླ་འབྲིང་བོའི་ཚེས་བཅུའི་ཉིན་མོར་གསེར་སྨད་རྡོ་རྗེ་བྲག་ནས་གཏེར་འབྱིན་པའི་དུས་དང་གཏེར་ཚབ་སྲུང་མ་ལ་གཏང་རག་གི་གཏོར་མ་དང་དཔའ་བོ་མཁའ་འགྲོ་ལ་ཚོགས་མཆོད་འབུལ་དགོས་ཚུལ་རྣམས་འདུག་པས།དེ་ནང་བཞིན་དུ་དགུན་ཟླ་ར་བའི་ནང་དུ་ཕ་ཡུལ་ལ་སླེབས་པར་བྱས།དགུན་ཟླ་འབྲིང་པོའི་ཚེས་དགུའི་ཉིན་གྲོགས་བདེ་ཆེན་ཞེས་བྱ་བ་དེ་ཉིད་ཁྲིད་དེ་བླ་མ་མཚན་བཟང་གི་མདུན་དུ་སོང་ནས་ང་རང་ལ་གཏེར་ཚབ་ཏུ་འཇོག་རྒྱུའི་བུམ་གཏེར་བཟང་པོ་ཞིག་གནང་བའི་བཀའ་དྲིན་ཞུ་ཞུས་པས།བླ་མས་ཀྱང་གཏེར་བུམ་གྱི་རྫས་ཚུལ་བཞིན་དུ་བསྡུས་ཏེ་ཆུ་དར་སྔོན་པོ་ཞིག་གིས་དྲིལ་དེ་གནང་བྱུང་།དེའི་ཕྱི་ཉིན་ཚེས་བཅུའི་ནངས་མོ་གཏེར་ལེན་དུ་ཕྱིན་ནས་གསེར་སྨད་རྔ་ལ་སྟག་རྩེའི་རི་ངོགས་མཐོང་ཚེ་བྲག་ས་ནགས་ཚལ་ཐམས་ཅད་འཇའ་ཡིས་གཡོགས་ཏེ་ས་རྡོ་ཤིང་གི་རང་བཞིན་མི་སྣང་བ་ཙམ་དུ་གྱུར་ཞིང་དགའ་སྤྲོ་ཚད་མེད་པ་སྐྱེས་བཞིན་སོང་ཚེ་ཤྭ་བྲག་རྡོ་རྗེ་ཞེས་བྱ་བའི་ཉེ་འདབས་སུ་སླེབ་པ་དང་།གླ་བ་ཞིག་རྙི་ཡིས་བཟུང་འདུག་པ་ལས་བཏོན་ཏེ་མངགས་བཏང་བ་ན།བདེ་ཆེན་ན་རེ།འདི་རྟེན་འབྲེལ་ཅི་འདྲ་ཡིན་ཅིས་ལྟས་ལགས།ཞེས་ཟེར་བ་ལ་རྟེན་འབྲེལ་ཤིན་ཏུ་ལེགས་ཏེ་མ་འོངས་པའི་དུས་སུ་གདུལ་བྱ་སྐལ་བ་དང་ལྡན་པ་རྣམས་རི་དྭགས་རྒྱ་ལས་གྲོལ་བ་ལྟར་འཁོར་བ་དང་ངན་སོང་གི་གནས་ལས་འདྲོངས་པའི་ལྟས་ལགས་པས།ངས་གཏེར་ཆོས་ཀྱིས་འགྲོ་དོན་རྒྱ་ཆེན་པོ་འབྱུང་བའི་དགོས་པ་ཆེན་པོ་ཡོད་དོ་ཞེས་སྨྲས་སོ།དེ་ནས་ཚོགས་བསྐང་བརྒྱ་ཕྲག་དང་མཆོད་གསོལ་ཅི་མང་བཏོན་རྗེས་གྲོགས་དེ་ཉིད་བྲག་གི་རྩ་བ་རུ་འདུག་ཏུ་བཅུག་ནས་ཁྱོད་ཀྱིས་ཚིག་བདུན་གསོལ་འདེབས་རྒྱུན་མ་བཅད་པར་འདོན་ཅིག་ཅེས་བསྒོས་ཏེ།བདག་ཉིད་རིག་པ་དབྱིངས་སུ་གཏད་པའི་མོད་ལ།བྲག་ཁང་སྒོ་ལྟ་བུ་ཞིག་གི་ནང་ནས་གཟུགས་མི་མཐོང་ཡང་མོ་སྐད་ཕྲ་ཞིང་གསང་བ་ཞིག་གིས།ཨེ་ཨེ་མ།སླེབས་སླེབས་མགྲོན་པོ་སླེབ་བྱུང་༎སྦྱིན་སྦྱིན་ཁྱོད་ལ་སྦྱིན་དང་༎ཤ་དགོ་རྒང་རྒྱུད་བགྲོད་བཞིན༎གང་དང་ཐུག་འཕྲད་མེད་པར།འགྲོ་བའི་ཐབས་ལ་མཁས་ན༎རྟེན་འབྲེལ་མཆོག་ཏུ་ལེགས་འོང་༎ལ་ནས་ལུང་དུ་བབས་ཚེ༎ཁ་ཤོའི་མི་དང་འཕྲད་ན༎ཁ་མཆུ་འབྱུང་བའི་ལྟས་ཡིན༎ལྟ་བ་མི་ཤེས་གཏེར་སྟོན༎རྟེན་འབྲེལ་འགྲིག་དུས་དཀོན་སྲིད༎གསེར་སྨད་རྡོ་རྗེའི་བྲག་ལ༎གཏེར་ཁ་མང་དུ་ཡོད་ཀྱང་༎ཁྱོད་ལ་རིག་མ་མ་འབྱོར༎སྐྱོན་དེས་ཕྱེད་ལས་མི་སྦྱིན༎ཕྱེད་ཁ་ཙམ་འདི་ཁྱེར་ལ༎གཏེར་ཚབ་བཟང་པོ་སྦོས་ཤིག།ཅེས་ཟེར་ཞིང་སྒྲ་དེ་མི་སྣང་བར་གྱུར་ཏོ།བདེ་ཆེན་ན་རེ།མོ་སྐད་ཅིག་སི་ལི་ལི་གྲགས་སྣང་ཤར།དེ་ཅི་ཡིན་ཟེར།བདག་གིས་ང་ལ་གླུ་ལེན་གྱིན་འདུག་སྨྲས་ཏེ།རིམ་བཞིན་བྲག་གི་ཐེམ་པ་ལ་འཛེགས་ནས་ཕྱིན་པ་ན་བདེ་བ་དང་འཇམ་པའི་སྣང་བ་ལས་མ་བྱུང་བཞིན་སོང་བས་མཐོ་དམན་གཞུ་འདོམས་ལྔ་ཙམ་གྱི་སར་སླེབ་པའི་ཚེ།བྲག་སྲུབ་ཟླ་གམ་པ་ཞིག་ཡོད་པའི་ནང་དུ་གཟོང་གིས་རྒྱབ་ནས་སྒོ་ཕྱེ་ཏེ་དེའི་ནང་དུ་སོལ་བ་མང་དུ་སྤུང་བའི་དཀྱིལ་ཤིང་ཤུག་པའི་ཤུན་པ་དང་གྲོ་གའི་ནང་དུ་སྒྲོམ་བུ་མང་པོ་ཡོད་པ་མཐོང་ཡང་ལན་གསུམ་ལས་ལེན་མི་ཉན་པའི་ཚུལ་ཁ་བྱང་ནས་བཤད་པ་ལྟར་ལན་གསུམ་དུ་བླངས་པས་སྒྲོམ་བུ་བདུན་ཕྲག་ཙམ་ལག་ཏུ་བྱུང་།སྐུ་གསུང་ཐུགས་རྟེན་མང་དུ་མཐོང་ཡང་ཆོས་བདག་དང་རིག་མ་རྣམས་མ་འཛོམས་པའི་དབང་གིས་མ་ལོན།དེ་རྗེས་གཏེར་ཚབ་བཞག་ཅིང་སྔར་ཅི་ལྟ་བ་བཞིན་དུ་དམ་རྒྱ་བྱས་ཏེ།བྲག་གི་རྩ་བ་རུ་མར་ཕྱིན་པ་ན་ཕྱིར་བལྟས་ཚེ་ཐེམ་སྐས་རྣམས་ཀྱང་མི་སྣང་བར་གྱུར་ཏོ།དེ་ནས་གྲོགས་བདེ་ཆེན་དེས་ཁོ་བོའི་མགོ་ཐོག་ཏུ་གཏེར་རྫས་རྣམས་ཞོག་ལ་སྨོན་ལམ་ཐོབས་ཅེས་ཟེར་བ་ལ་སྨོན་ལམ་བཏབ་ཅིང་།སླར་ཡང་ཕྱིར་ལོག་སྟེ་འོང་པའི་ལམ་ཁ་ཞིག་ཏུ་མི་ཁ་ཤྭ་ཞིག་འགྲོ་བ་དང་འཕྲད་བྱུང་བ་ན།བདེ་ཆེན་ན་རེ།འདི་རྟེན་འབྲེལ་ཅི་འདྲ་ཟེར་བ་ལ།རང་ཅག་གཉིས་མྱུར་དུ་ཞལ་ལྕེ་ཞིག་ལ་ཐུག་པའི་ལྟས་ཡིན་འདྲ་ཞེས་སྨྲས།དེ་ནུབ་མཁའ་འགྲོ་མ་རུས་པའི་རྒྱན་དྲུག་གིས་སྤྲས་པ་ཞིག་བདག་གི་ཐད་དུ་འདུག་པ་ལ།ཁྱོད་སུ་ཡིན་ཞེས་དྲིས་ཚེ་མོ་ན་རེ།ང་ནི་བསིལ་བའི་ཚལ་གྱི་མཁའ་འགྲོ་ཀུན་རྒྱུ་མ་ཞེས་བྱ་བ་ཡིན།ཁྱོད་ཀྱིས་ཅི་བསམ་འདུག་ཟེར་བ་ལ་ལན་དུ།ཁར་སང་མི་ཁ་ཤྭ་ཞིག་དང་འཕྲད་པ་དེ་ཅི་ཡིན་བསམ་འདུག་སྨྲས་པས།མོ་ན་རེ།ཡཻ།མགྱོགས་པའི་རྟ་ལ་ཞོན་པ་དེ༎བདེ་ཆེན་མྱུར་ལམ་བགྲོད་པའི་ལྟས༎རྒྱབ་ཏུ་སྨན་ཁུག་ཁུར་བ་ནི༎འཁོར་བའི་གཅོང་ནད་སེལ་བའི་རྟགས༎སྨོན་ལམ་གྱིས་འབྲེལ་སྐལ་ལྡན་ཀུན༎གྲོལ་བའི་ལྟས་སུ་མིང་དེ་འཛིན༎གཞོན་ནུའི་གྲོགས་དང་འགྲོགས་པ་ནི༎རིག་པའི་གྲོགས་དང་འཕྲད་པའི་རྟགས༎ཡ་ཁྭ་ཤོ་རུ་ཡོད་པ་ནི༎ཁ་མཆུའི་ལ་ཡོག་འབྱུང་བའི་ལྟས༎རྟེན་འབྲེལ་མི་ངན་རྟེན་འབྲེལ་བཟང་༎བཟང་ལ་སྐྱོན་ཕྲན་དྲི་མ་ཙམ༎རྣམ་རྟོག་ངན་པས་སེམས་ཞུགས་པ༎ལྟ་བ་དམན་པའི་ལྟས་མིན་ནམ༎འཁོར་འདས་སྟོང་ཉིད་ཆེན་པོ་ལ།སྣང་བ་སྒྱུ་མའི་འཕྲུལ་སྣང་ཤར༎དེ་དོན་ཤེས་ན་ཅི་ལ་གནོད༎དེ་ལྟར་ཤེས་པ་གནད་དུ་ཟུངས༎ཞེས་ཟེར་ཞིང་མི་སྣང་བར་ཡལ་སོང་།དེའི་རྗེས་སུ་ཨ་བོ་ཆུང་ཡོས་མི་སྐྱ་སེར་སྡེ་ཀུན་ནས་དགུན་ལུག་ཟླའི་ནང་དུ་རི་ཐང་མེད་པར་འཇའ་ཡིས་ཁྱབ་ལུགས་ལ་བལྟས་ན་ངེད་ཀྱི་གཞི་བདག་ལ་ཤིན་ཏུ་མ་ལེགས་པ་ཞིག་བྱས་སོང་ངེས་པ་ཡིན་འདུག་པས་ཁྱོད་ཀྱིས་གཏེར་ནས་ཅི་བཏོན་གང་བཏོན་ཐམས་ཅད་ངེད་ལ་མ་སྤྲད་ན་དམག་གི་ལས་ཀ་ཞིག་མི་བྱེད་རེ་ཟེར་བ་བྱུང་ཚེ།ཨོ་རྒྱན་ཆེན་པོས།ལས་འཕྲོ་ང་ཡི་གཏེར་དང་འཕྲད་པའི་ཚེ༎རྒྱ་བོད་ལྷ་འདྲེ་མ་རུང་ཐམས་ཅད་འཚོགས༎ལེགས་པ་ལྟར་བསྟན་ཉེས་པ་སྣ་ཚོགས་གཏོང་༎ཀི་སྒྲ་དི་རིར་ཧབ་ཤ་བྱེད་པ་འབྱུང་༎གསུངས་པ་ལྟར་ལོས་ཡིན།ཁྱོད་རང་གིས་དམག་དྲངས་ལ་ཤོག་དང་བཟོ་ཐབས་ལེགས་པོ་ཡོད་ཅེས་སྨྲས་ནས་རང་ས་བཟུང་བཞིན་འདུག་པས་དམག་ཡང་མ་བྱུང་ལ་གྱོད་ཀྱང་རང་ཡལ་དུ་སོང་སྟེ་འཐབ་རྒྱུ་མ་བྱུང་།དེ་རྗེས་ཤར་མགོ་ལོག་གི་ཡུལ་དུ་ཕར་ཕྱིན་པ་དང་ཆོས་བདག་ཕུན་ཚོགས་བཀྲ་ཤིས་དང་ངག་དབང་རྒྱ་མཚོ་གཉིས་ཀྱིས་ད་ནི་གཏེར་ཆོས་རྣམས་ཚུལ་བཞིན་གཏན་ལ་ཕབ་དགོས་ཟེར་བ་ལ།ད་དུང་མི་ལོ་དྲུག་གི་བར་དུ་བཀའ་རྒྱ་བྱེད་དགོས་ཞེས་སྨྲས་ཏེ་ཡི་གེར་མ་ཕབ་པར་རེ་ཞིག་བཞག་གོ    །

དགུང་ལོ།༢༦   

དེ་ནས་རང་ལོ་ཉེར་དྲུག་ལ་བབས་ཚེ། བུ་ཆུང་རྟ་ཤུལ་གྱི་ནང་དུ་རྙེད་ཚོལ་ལ་ཕྱིན་ཚེ་མཁའ་འགྲོའི་ལུང་བསྟན་མང་དུ་བྱུང་བ་ཐམས་ཅད་ཐོག་ཏུ་མི་འཁེལ་བ་གཅིག་ཀྱང་མ་བྱུང་ངོ་། སེ་ཕུང་ནག་པོ་ཞེས་བྱ་བ། ཨོ་རྒྱན་ཆེན་པོས་མ་ཐུལ་པའི༎ ལས་ངན་བདུད་རྗེ་ནག་པོ་འབྱུང་༎ ཧོར་སྡེ་མངའ་འོག་བསྡུས་ནས་སུ༎ ལ་ལུང་མང་པོ་མངའ་དབང་བྱེད༎ བདུད་ཀྱི་བློ་ཡིད་སློང་བྱེད་པའི༎ བར་སྣང་གློག་མ་སྤྲིན་ཞེས་པའི༎ སྨོན་ལམ་ལོག་པའི་སྐྱེས་བུ་ཡོད༎ རྨ་རྡོ་གསེར་ལ་རྒོལ་སེམས་དུས༎ སྟོད་ནས་ཁ་སྐྱ་མདའ་ལ་འབབས༎ སྨད་ནས་མཚོ་སྔོན་གྱེན་དུ་འཕྱུར༎ བདུད་བྲག་ནག་པོ་རྨང་ནས་བསྒྱེལ༎ སྟོད་སྨད་གཉིས་ལ་འགྲིམ་སྒོ་འབྱེད༎ ཅེས་མཁའ་འགྲོ་མ་ཀུན་ཏུ་སྣང་བྱེད་མས་སྨྲས་ཤིང་སོང་།

དགུང་ལོ།༢༧   

རང་ལོ་ཉེར་བདུན་ཆོ་འཕྲུལ་ཆེན་མོའི་ཟླ་བའི་ཚེས་བཅུའི་ནུབ་མཁའ་འགྲོ་མ་སེར་མོ་མིག་ཟླུམ་ཞིང་མདོག་རྨ་བྱའི་སྒྲོ་ཐིག་ལྟ་བུ་གཡས་ན་རྦ་མཁར་དང་གཡོན་ན་བསེ་ཕོར་འཛིན་པ་ཞིག་བདག་གི་ཐད་དུ་བྱུང་ནས་བུ་ཁྱོད་དང་ང་གཉིས་བསྡེབས་ནས་ལྷོ་ཕྱོགས་འདུ་བ་ཅན་གྱི་སྐྱེད་ཚལ་དུ་ཨེ་འགྲོ་ཟེར་བའི་ལན་དུ། བདག་གིས་འགྲོ་འགྲོ་སྨྲས་ནས་ཕྱིན་པའི་མོད་ལ།ས་གཞི་ཐམས་ཅད་འོད་དང་འཇའ་རིས་ཀྱིས་གང་ཞིང་ཁྱབ་པ་ནམ་མཁའ་ལའང་འཇའ་དང་འོད་ཀྱི་དྲྭ་མིག་རིས་སུ་བྲིས་པ་བར་སྣང་ནས་མེ་ཏོག་སྣ་ཚོགས་ཀྱི་ཆར་བ་ལོང་ལོང་འབབས་པའི་སྐྱེད་མོའི་ཚལ་ཆེན་པོ་ཞིག་ན་རིན་པོ་ཆེའི་ཁྲི་དཔང་མཐོ་བ་རེའི་སྟེང་དུ་བསྐལ་བ་བཟང་པོའི་སངས་རྒྱས་སྟོང་ཡིན་པར་སྐད་པའི་སྟོན་པ་སྤྲུལ་སྐུ་ཆ་ལུགས་ཅན་རིགས་ལྔ་རང་རྟགས་ཀྱི་ཕྱག་རྒྱ་མཛད་པ་འཇའ་ཚོན་འོད་ལྔའི་ཀློང་ན་བཞུགས་པ་ཤ་སྟག་དང་མཇལ་བའི་ཚེ་དེ་དག་གི་དབྱངས་གཅིག་གིས་འདི་སྐད་གསུངས།བུ་ཁྱོད་ཀྱིས་ལུང་འདིར་ཉོན་ཅིག་གསུངས་ནས།ཕྱག་གཡོན་པ་རྣམས་ཀྱི་པོ་ཏི་རེ་ཐོགས་པའི་ལུང་རྣམས་འུར་སྒྲ་དང་བཅས་ཏེ་གསུངས་ནས་བདག་ཅག་གི་བཀའ་རྣམས་མ་ལུས་པར་རྫོགས་པ་ཡིན་ནོ་ཁྱོད་ཀྱིས་ཡིད་ཆེས་པར་མཛོད་ལ་འདི་དག་གི་སྙིང་པོ་བཅུད་དུ་དྲིལ་པའི་མན་ངག་རྣམས་གདུལ་བྱའི་དོན་དུ་ཡི་གེར་ཐོབས་ཤིགད་ནི་ཆོས་ཉིད་ནམ་མཁའ་མཛོད་ཀྱི་དགོངས་པ་ཀློང་ནས་རྡོལ་བར་འགྱུར་རོ།ཞེས་གསུངས་ནས་རྟེན་དང་བརྟེན་པ་ཐམས་ཅད་བདག་ལ་ཐིམ་ནས་མི་སྣང་བར་གྱུར་ཏོ།།དུས་དེ་ནས་བཟུང་སྟེ་འཁོར་འདས་ཀྱི་བསྡུས་པའི་ཆོས་ཐམས་ཅད་རྒྱ་མཚོའི་ནང་གི་གཟའ་སྐར་ལྟ་བུར་བདག་གི་སྣང་བ་ཆེན་པོའི་དབྱིངས་སུ་འུབ་ཏུ་འདུས་ཤིང་ཡོངས་སུ་ཆུབ་པའི་ངང་མངོན་དུ་གྱུར་པ་དང་སེམས་ཀྱི་འདུན་པ་གང་ལ་གཏད་པ་ཙམ་གྱིས་གང་ལ་གང་དགོས་པའི་ཆོས་ཚིག་རྣམས་སྤར་གྱིས་བཏབ་པ་བཞིན་དུ་རང་རྡོལ་བ་ཡིན་ནོ།།ལོ་ཁྱིམ་དེ་ཡི་དབྱར་ཟླ་འབྲིང་པོའི་ཚེས་བཅུ་བདུན་གྱི་ནུབ་རྨི་ལམ་དུ།བུད་མེད་དམར་མོ་ལྭ་བ་སྔོན་པོ་གྱོན་པ་ཞིག་བདག་གི་ཐད་དུ་བྱུང་ནས་བུ་ཁྱོད་འགྲོ་ཟེར་བ་དང་ཆབས་ཅིག་ཕྱིན་པས་ཤིན་ཏུ་ཉམས་དགའ་ཞིང་ཡིད་གདུང་བའི་གནས་ཤིག་ཏུ་སླེབས་ཚེ་གནས་དེ་ན་འཕགས་པ་ཀླུ་སྒྲུབ་ཡིན་སྐད་པའི་དགེ་སློང་གཟུགས་བྱད་རབ་ཏུ་མཛེས་པ་ཞིག་ལ་དགེ་སློང་སྟོང་དང་སུམ་བརྒྱས་བསྐོར་བ་ཀུན་གྱིས་ཕྱག་ན་ཡི་གེ་པོ་ཏི་རེ་ཐོགས་ཏེ་འདི་སྐད་ཟེར།ཀྱཻ་ཧོ།སྐལ་ལྡན་རིགས་ཀྱི་བུ།།གནས་འདི་རྒྱ་གར་རྡོ་རྗེ་གདན༎བདག་ཅག་རྒྱལ་བའི་སྲས་མཆོག་སྟེ༎ཁྱོད་ནི་རྒྱལ་བའི་རྒྱལ་ཚབ་ཡིན༎ཚེ་རབས་ཐོག་མ་མེད་དུས་ནས༎འདོད་ཡོན་ལྔ་ཡི་ཆོས་སོ་ཅོག།བདག་ཏུ་མ་བཟུང་གཅིག་ཀྱང་མེད༎དེ་དག་བློ་ཡིས་བླང་ནས་སུ༎ཆོས་ཀྱི་ཡོན་ཏུ་ཕུལ་མཛོད་དང་༎སེམས་ཀྱི་ལོངས་སྤྱོད་མི་ཟད་གཏེར༎འདི་ནི་བླ་མེད་མཎྜལ་མཆོགཅེས་གསུངས་ཚེ་བདག་གིས་མཎྜལ་འབུལ་ཚིག་གང་ལགས་ཞུས་པའི་ལན་དུ་ཤོ་ལོ་ཀ་འདི་གསུངས་སོ།།ཨོཾ་ཨཱཿཧཱུཾ་ཚེ་རབས་དུ་མར་སྣང་བའི་ཆོས་སོ་ཅོག།རིན་ཆེན་རིན་ཐང་བྲལ་བའི་ལུས་སེམས་དང་༎ལྷ་ཀླུ་མི་ཡི་ལོངས་སྤྱོད་བཀོད་པ་འདི༎ཚོགས་གཉིས་རྫོགས་ཕྱིར་དཀོན་མཆོག་གསུམ་ལ་འབུལ༎ཏྲཱཾ་གུ་རུ་རཏྣམཎྜལ་པཱུ་ཙ་མེ་གྷ་ས་མུཏྲ་སྥ་ར་ན་ས་མ་ཡ་ཨ་ཧཱུཾ།ཞེས་གསུངས་པ་བཞིན་དུ་བདག་གིས་དེ་སྐད་དུ་ཕུལ་ལོ།།སླར་ཡང་དེ་དག་གི་ཞལ་ནས་ཁྱོད་ཀྱིས་ཉོན་ཅིག་གསུངས་ཤིང་ཡི་གེ་དེ་དག་གི་ལུང་རྣམས་མགྲིན་གཅིག་ཏུ་གསུངས་མཐར་གཙོ་བོ་དེ་ཉིད་ཀྱི་ཞལ་ནས་ཚིགས་སུ་བཅད་པ་འདི་སྐད་དོ།བསྟན་བཅོས་མ་ལུས་ཡོངས་སུ་རྫོགས་པ་ཡིན༎མདོར་ན་བཀའ་དང་བསྟན་བཅོས་གྲངས་མང་ཡང་༎རྣམ་མཁྱེན་ཤེས་རབ་ཕ་རོལ་ཕྱིན་ལ་འདུས༎མངོན་བྱེད་བསྐྱེད་དང་རྫོགས་པ་གཉིས་ཕྱིར་དུ༎ཐབས་ཀྱི་འཇུག་སྒོ་དུ་མའི་ཚུལ་དུ་བསྟན༎དཔེར་ན་ཡངས་པའི་གྲོང་ཁྱེར་ཆེན་པོ་ཡི༎ཕྱོགས་མཚམས་ལམ་རྣམས་གང་ནས་ཕྱིན་ན་ཡང་༎གྲོང་ཁྱེར་ཆེན་པོ་དེ་རུ་སླེབས་པ་བཞིན༎ཆོས་ཀུན་ཆོས་ཉིད་གཅིག་ཏུ་མདོར་འདུས་པའི༎ཆོས་ཉིད་མི་ཟད་ནམ་མཁའ་མཛོད་དུ་གྲགས༎དེ་ཕྱིར་འགྲོ་ཀུན་རྣམ་པར་གྲོལ་བའི་ཆོས༎རྫོགས་པ་ཆེན་པོ་འབྲས་བུ་བླ་ན་མེད༎མ་ཧཱ་ཡོ་གའི་མྱུར་ལམ་ཐབས་ཟབ་མོ༎ཕྱོགས་ཀྱི་ཆུ་མིག་ཆུ་ཕྲན་གྲངས་མང་བ༎རྒྱ་མཚོ་ཆེན་པོར་རོ་གཅིག་འདྲེས་པ་ལྟར།།ཆོས་རྣམས་མ་ལུས་བདེན་པ་གཉིས་སུ་འདུས༎བདེན་གཉིས་དབྱེར་མེད་རྫོགས་པ་ཆེན་པོར་འདུ༎དེ་དོན་ཤེས་ན་ཆོས་ཉིད་བདེན་པ་མཐོང་༎གནད་དེས་འབྲེལ་ཚད་རིག་འཛིན་ས་རུ་འཕེན༎དེ་དོན་གཞན་ལ་སྟོན་དང་འགྲོ་བའི་དོན༎རླབས་ཆེན་གཞན་ན་མེད་དོ་ཤེས་པར་མཛོད༎ཅེས་གསུངས་ཤིང་རྨི་ལམ་དབྱིངས་སུ་སད་པ་བཞིན་དུ་ཡལ་སོང་།དེ་ནས་ཆོས་ཉིད་ནམ་མཁའ་མཛོད་ཀྱི་ཀློང་རྡོལ་ཞིང་བསྐྱེད་རྫོགས་ལམ་གྱི་རིམ་པ་ཇི་ལྟ་བ་བཞིན་དུ་ཆུབ་པར་གྱུར་ཏོ།      །

དགུང་ལོ།༢༨

དེ་ནས་རང་ལོ་ཉེར་བརྒྱད་ཁྱི་ཡི་ལོ་ཁྱིམ་ལ་བབས་ཚེ། མཁའ་འགྲོ་མ་མེ་རུ་འཛིན་བྱེད་ཡིན་ཟེར་བ་ཞིག་ན་རེ།ཁྱོད་འབྲོས་ཕུག་མཁའ་འགྲོའི་འདུ་ཁང་དུ་སྒྲུབ་པ་ལ་ཞུགས་ན་ཚེ་འཇུག་ཏུ་ལོངས་སྤྱོད་དང་མངའ་ཐང་རྒྱས་པར་འགྱུར།ཞེས་ཟེར་ཞིང་ཡང་འདི་ལྟར།ཨ་ཧོ།ཉོན་དང་སྐལ་བཟང་སྐྱེས་བུ༎འབྲོས་ཕུག་མཁའ་འགྲོའི་འདུ་གླིང་༎རྡོ་རྗེ་མཁའ་འགྲོ་འདུ་བས༎ཞི་བའི་ཕྲིན་ལས་གྲུབ་པའི༎གནས་བཟང་སྐྱིད་པའི་འབྱུང་གནས༎དེ་རུ་སྒྲུབ་པ་བྱས་ན༎ཉམས་རྟོགས་ཡོན་ཏན་འཁྲུངས་ཡོང་༎ཐབས་ཤེས་ཟུང་དུ་འབྲེལ་བའི༎རིག་འཛིན་སྔགས་པའི་སྒྲུབ་གནས༎བཙུན་མོ་ཁྲི་ལ་འགྱིང་བ༎ཕྱོགས་ནས་འབངས་ཀྱིས་བསྐོར་འདྲ༎གྲྭ་འཁོར་འདུ་བའི་རྟེན་འབྲེལ༎དུར་ཁྲོད་མ་མོ་པུཎྱེ༎རེ་ཞིག་ཕྱག་རྒྱར་བསྟེན་ན༎གཅན་གཟན་ཀུན་གྱི་ཁྱུ་མཆོག།གངས་སེང་དཀར་མོ་ལྟ་བུའི༎བུ་མཆོག་དམ་པ་འབྱུང་སྲིད༎དེ་བཞིན་སེང་གེའི་གྲོགས་པོ༎རྒྱ་སྟག་ཁྲ་བོ་ལྟ་བུའི༎བུ་གཅིག་ཡོས་བུས་ཁུར་འོང་༎བྲག་བཙུན་སྲིད་པའི་མ་མོ༎ལས་ཀྱི་ཕྱག་རྒྱར་བསྟེན་ན༎ཤར་གྱི་ཧི་མ་གཞོན་ནུ༎ལྷ་མཚམས་གཟི་བརྗིད་ཆེན་པོ༎པ་ཝ་སངས་ལྟར་དཀར་བའི༎བུ་འབྱུང་བསྟན་པ་འཛིན་འོང་༎ནོར་རྒྱུན་བུ་མོར་འགྲོགས་ན༎གསེར་གྱི་མཆོད་རྟེན་སེར་པོ༎དུང་གི་ཟླ་རྒྱས་དཀར་པོ༎གནམ་ལྕགས་རྡོ་རྗེ་འབར་བས༎བསྟན་པའི་སྲོག་ཤིང་འཛིན་ཞིང་།།ཡིད་བཞིན་ནོར་བུ་ལྟ་བུར༎ཕྱོགས་ཀྱི་མགྲོན་པོ་ངོམས་པའི༎རོ་བརྒྱའི་ཟས་མཆོག་སྟེར་སྲིད༎གཞན་ཡང་ནམ་འཕང་གཅོད་པའི༎མཁའ་ལྡིང་ག་རུ་ཆེན་པོས༎ཁྱེད་ཀྱི་བསྟན་ལ་གདུང་བཞིན༎ངེས་མེད་རི་སུལ་བགྲོད་དེ༎ཕྱོགས་མེད་འགྲོ་དོན་འབྱུང་འོང་༎མ་ངའི་བརྡ་ཚིག་དེ་ཀ།མ་བརྗེད་སེམས་ལ་ཞོག་དང་༎ཆོས་སྲིད་མངའ་ཐང་རྒྱས་འོང་༎ཞེས་ཟེར་ཞིང་མི་སྣང་བར་ཡལ་སོང་།དེ་ལྟར་ལུང་བསྟན་པ་བཞིན་དབྱར་ཟླ་ར་བའི་ནང་དུ་དེར་ཕྱིན་ནས་ཟླ་གཅིག་ཙམ་ལ་སྒྲུབ་པ་བྱས་ཚེ་དགེ་ལེགས་ཡ་མཚན་གྱི་ལྟས་བཟང་མང་དུ་བྱུང་བ་ནི།ཞག་བདུན་གྱི་ནུབ་མོ་བསྟན་མ་ཏིང་ལོ་སྨན་གྱིས་གླུ་འདི་ལེན་གྱིས།ཀྱཻ་ཧོ།ང་ནི་སྲིད་པའི་ཨ་ཕྱི༎བྱང་གི་ཏིང་རུའི་ས་འཛིན༎ཏིང་ལོ་སྨན་ཞེས་གྲགས་ཏེ༎སྔོན་ཚེ་འབྲོག་མོའི་སྐྱེས་བུ༎ཁྱེའུ་ཆུང་ལོ་ཙཱ་ཁྱོད་ཡིན༎ཡ་གི་བྲག་སྲུབ་རྐོས་དང་༎སེར་བའི་འཇིགས་པ་བཟློག་པས༎སཱ་ཙྪ་ནག་པོའི་ཆོ་ག།རྫས་སྦྱོར་ཟབ་མོ་ཞིག་ཡོད༎སང་ཕོད་གནས་འདིར་སླེབས་ཚེ༎ཁྱོད་ལ་འཚམ་རྒྱག་ཅིག་འབྱུང་༎དབྱར་དུས་དཀར་སློང་དང་ནི།དགུན་དུས་འབྲུ་སློང་མ་གཏོགས༎དཀོར་ལ་རྟག་ཏུ་མ་འབྱམས༎དེང་དུས་བསྐལ་བའི་ཐ་མར༎མི་བསྲུན་སྐྱེ་བོའི་ཚོགས་ཀྱིས༎མཐོ་རློམས་གཏེར་སྟོན་ལ་བརྫུས༎ཚེ་གཅིག་དཀོར་ལ་འབྱམས་ཏེ༎ཟླ་གསུམ་མཚམས་སྒྲུབ་མི་བྱེད༎དེ་འདྲའི་སྤྱོད་ངན་སྤོངས་ལ༎ཨོ་རྒྱན་ཆེན་པོའི་རྒྱལ་ཚབ༎འགྲོ་བའི་དོན་ལ་ཆས་པའི༎གཏེར་ཆེན་གོང་མ་རྣམས་ཀྱིས༎སྙིང་པོའི་སྒྲུབ་ལ་བརྩོན་ཏེ༎དཀོར་བསྡུ་རྙེད་ཚོལ་སྤངས་ནས༎འཆད་དང་ཡིག་རིས་ལྷུར་ལེན༎སྐུ་ཚེའི་སྨད་ཆར་སླེབས་ཚེ༎མངའ་ཐང་རྩོལ་མེད་འཕེལ་ཞིང་༎བུ་སློབ་སྐལ་ལྡན་ཕོ་མོའི༎འདུ་བ་ཕུན་སུམ་ཚོགས་བཞིན༎ཁྱོད་ཀྱང་དེ་ལྟར་རིམ་བཞིན།།ལག་ལེན་ཐོབ་དང་དེ་བཞིན༎འདི་ཕྱིའི་དོན་ཆེན་འགྲུབ་ངེས༎ཞེས་ཟེར་ཡལ༎ཡང་བདུན་ཞག་གསུམ་པའི་ནུབ༎འཇའ་སྤྲིན་འོད་དུ་འཁྲིགས་པའི་ཀློང་ནས་ཨོ་རྒྱན་ཆོས་ཀྱི་རྒྱལ་པོ་མདུན་གྱི་ནམ་མཁར་བྱོན་ནས།རིགས་ཀྱི་བུ་ཁྱོད་ཀྱིས་ཚོགས་དང་བསྐང་བ་ལ་འབད་པ་གལ་ཆེ་ཞིང་བཀའ་སྲུང་གཉན་པོ་ལ་གཏོར་མ་མང་དུ་གཏོང་བ་དང་།ལོ་བཞིན་ཟླ་སྒྲུབ་དམ་ཅན་ཆགས་མེད་དུ་བྱ་བ་དང་དེ་གསུམ་གནད་དུ་ཟུངས་ཤིགདངོས་གྲུབ་དམ་པ་འདི་ལྷག་མེད་རོལ་ཅིགཅེས་གསུངས་ནས་བདུད་རྩི་ཐོད་པ་གང་གནང་བྱུང་སྟེ།བདག་གིས་ལྷག་མེད་དུ་རོལ་བས་བདེ་བའི་ཉམས་བསམ་གྱིས་མི་ཁྱབ་པ་འབར་བྱུང་བའི་མོད་ལ་འདི་སྐད་ཞུས།དུས་གསུམ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་རྫོགས་པའི་ངོ་བོར་གྱུར་པའི་སྐྱབས་མཆོག་རིན་ཆེན་ཁྱེད་ལ་ཕྱག་འཚལ་ཞིང་སྐྱབས་སུ་མཆིའོ།ངས་སྤྱོད་ཚུལ་ཇི་ལྟར་བྱེད་ལགས་ཞུས་པས།ཀྱཻ།སྐྱེས་བུ་ཆེན་པོ་ཁྱོད་ཀྱིས་སྤྱོད་པ་སྔར་བཞིན་དུ་མི་གང་ལ་ཡང་ངོ་བསྲུང་མེད་པར་སྨྱོན་པ་ལྟ་བུའི་སྤྱོད་པ་སྐྱོངས་ལ་ཀུན་གྱིས་བསྙེན་བཀུར་བྱེད་པའི་དུས་སུ་ཀུན་ལ་སྙོམས་པའི་ཞི་དུལ་ཚུལ་མཐུན་སྒྲུབས་ལ་གདམས་པ་སྟོན།འགྲོ་དོན་ཅི་ནུས་ཀྱིས་ཤིགཅེས་གསུངས་ཤིང་དབྱིངས་སུ་ཡལ་སོང་།དེ་ནས་སྒྲུབ་པ་ཆེན་པོའི་དངོས་གྲུབ་ལེན་པ་ལ་ཐུག་པའི་ནུབ་རིགས་འཛིན་བདུད་འདུལ་རྡོ་རྗེས་ལི་སྡེར་ཞིག་གི་ནང་དུ་ཆང་བླུགས་པ་ལ་ཨ་ལི་ཀ་ལི་གཟུགས་བརྙན་ཤར་བ་ལྟར་བཀྲ་ལམ་མེར་ཡོད་པ་འཇའ་ཡི་རླངས་པ་འཕྱོ་བ་ཞིག་བདག་ལ་གནང་ནས་ང་སྤྲུལ་ང་དང་གཉིས་སུ་མེད་པའི་བུ་ཁྱོད་ལ་མཁའ་འགྲོ་མ་རྡོ་རྗེ་ཕག་མོས་བསྐུར་པ་ཡིན་པས་གནས་གསུམ་ལ་གཏུགས་ཤིགཅེས་གསུངས་ཤིང་བདག་ལ་ཐིམ་པ་དང་བདུད་རྩི་དེ་ཡང་བཏུང་བས་ཉམས་རྟོགས་ཁྱད་པར་ཅན་ཞིག་རྒྱུད་ལ་སྐྱེས་སོ།      །དབྱར་ཟླ་ར་བའི་ཚེས་བཅུའི་ནུབ་མཁའ་འགྲོ་མ་སྔོན་མོ་དར་དཀར་གྱི་ལྭ་བ་གཡང་ལུགས་སུ་གྱོན་པ་ཞིག་གིས་བུ་ཁྱོད་དག་པ་འདོད་འབྱུང་ཞེས་བྱ་བའི་གནས་སུ་ལྟད་མོ་ལ་འགྲོ་ཟེར་བ་བྱུང་ཚེ་དེ་དང་འགྲོགས་ནས་ཕྱིན་པས་གནས་ཤིན་ཏུ་ཉམས་དགའ་བའི་སྐྱེད་ཚལ་འདོད་དགུའི་ལོངས་སྤྱོད་ཐམས་ཅད་ན་བུན་འཐིབ་པ་བཞིན་དུ་རང་བྱུང་དུ་འཕྱོ་བའི་དབུས་སུ་ཡེ་ཤེས་ལྔ་ལས་གྲུབ་པའི་གཞལ་ཡས་ཁང་དཀར་སེར་དམར་ལྗང་མཐིང་གའི་ཁ་དོག་ཉི་མ་དང་ཉི་འོད་ལྟར་དུ་འབར་བ་དེའི་དབུས་སུ་རིན་པོ་ཆེའི་ཁྲི་ལ་པདྨ་དང་ཟླ་བ་ཉི་མའི་གདན་ལ་རིག་འཛིན་རྒྱལ་པོ་ཆེན་པོ་ཧཱུཾ་ཆེན་ཀ་ར་ཞེས་བྱ་བ་སྐུ་མདོག་དཀར་ལ་དམར་བའི་མདངས་ཆགས་པ་སྐུ་བྱད་བལྟ་བའི་ཆོག་མི་ཤེས་པ་ཞིག་གིས།སྔར་གྱི་འབྲོས་ཕུག་རྡོ་རྗེ་མཁའ་འགྲོའི་འདུ་གནས་ཉམས་རྟོགས་ཡོན་ཏན་ཤུགས་ཀྱི་འཁྲུངས་པའི་གནས་ཡིན་པས།རེ་ཞིག་ཁྱོད་ཀྱི་སྡོད་གནས་དེ་རུ་གྱིས་ལ་སྙིང་པོའི་སྒྲུབ་པ་ལ་འབུངས་ཤིགལོ་གཅིག་འདས་པའི་རྗེས་སུ་གསེར་གྱི་འཛི་ཆེན་ཤེས་ཤར་དུ་སོང་ལ་ཟླ་སྒྲུབ་གཉིས་ལ་བརྟེན་ནས་བསྐང་ཚོགས་སྟོང་ཕྲག་གཉིས་ཙམ་བཏང་ན་བསོད་ནམས་ཀྱི་འབྲས་བུ་ཆར་གྱིས་བསྐྱེད་པ་ལྟར་འཕེལ་ཞིང་སྨིན་པར་འགྱུར།དང་པོ་གནས་མཆོག་འབྲོས་ཕུག་མཁའ་འགྲོའི་འདུ་གླིང་དུ་ཕྱིན་པའི་དུས་སུ་ལས་ལྡན་གྱི་སློབ་བུ་འགའ་རེ་འབྱུང་རྒྱུ་ཡོད་པས་དེ་དག་ལ་རང་རང་གི་རྒྱུད་ཚོད་དང་བསྟུན་པའི་གདམས་པ་སྟོན་པ་དང་ཐར་པ་ཆེན་པོའི་གྲོང་ཁྱེར་དུ་འདྲོང་ངེས་པ་ཅན་ཡིན་གསུངས་པའི་ལན་དུ།བླ་མ་ལགས་ངས་གདམས་ངག་སྣ་གཅིག་ཀྱང་འཆད་མི་ཤེས་པའི་ཚུལ་ནི་འདི་ལྟ་སྟེ།ང་བྱིས་པ་སྐྱབས་མེད་མགོན་མེད༎སྟེང་ན་སྐྱབས་མགོན་མི་མེད༎འོག་ན་བརྟེན་པའི་མི་མེད༎ཟུར་ན་སྐྱོར་མི་གཅིག་མེད༎རང་སྣང་སྟོན་པའི་བཀའ་བཞིན༎གཞན་ལ་འཆད་སྒྲོགས་བྱས་ཚེ༎ཀུན་གྱི་གཤེ་བསྐུར་གནས་ལས༎དང་ལེན་བྱེད་པ་མི་འོང་༎ཟབ་གཏེར་འབྱིན་སྐད་ལྡན་ཡང་༎དུས་ངན་སྙིགས་མའི་མཐའ་འདིར༎གདུལ་བྱའི་ཞིང་ས་མི་སྣང་༎རྫུན་མེད་བདེན་པར་སྨྲས་ཀྱང་༎ཀུན་གྱིས་རྫུན་དུ་གྱེར་འོང་༎དད་ཅིང་དང་དུ་ལེན་པའི༎བུ་སློབ་འབྱུང་སྙམ་མེད་ལགས༎ཕ་གཅིག་ཐམས་ཅད་མཁྱེན་པ༎བདག་རྒྱུད་ཡོངས་སུ་སྨིན་པར༎ད་ལྟ་ཉིད་དུ་བྱིན་རློབས༎ཉམས་ཆུང་སྤྲང་པོ་བདག་ལ༎མི་འཇིགས་དབུགས་ཆེན་འབྱིན་པར༎ད་ལྟ་ཉིད་དུ་བྱིན་རློབས༎ཞེས་ཞུས་པའི་ལན་དུ།སྒྲུབ་ལ་ལྷུར་ལེན་བྱེད་པའི༎ལས་དང་སྐལ་པ་མེད་ན༎སངས་རྒྱས་དངོས་སུ་བྱོན་ཡང་༎རྒྱུད་ལ་ཕན་ཐོགས་མེད་ཚུལ༎རྒྱལ་བ་ཤཱཀྱའི་དབང་པོ༎འཇིག་རྟེན་ཁམས་སུ་བྱོན་ཡང་༎འགྲོ་ཁམས་དོང་སྤྲུགས་མ་ནུས༎ཁྱོད་ནི་སྨོན་ལམ་མཐུ་ཡིས༎འགྲོ་བའི་དོན་ལ་ཆས་ཀྱང་༎སྔོན་ནས་ལས་ཀྱིས་འབྲེལ་བའི༎བུ་སློབ་རེ་འགའ་ཙམ་ཞིག།རང་རང་ལས་དབང་བཙན་པས༎གདུལ་བྱའི་ལྷག་མར་འདུག་པ༎དེ་རྣམས་འདྲོང་པའི་དུས་བབ།ཕྱི་རོལ་ཀླ་ཀློ་མཐའ་མིས༎མི་ལོ་བརྒྱ་ཕྲག་ཙམ་ལས༎ཆོས་ཀྱི་སྒྲ་ཙམ་མེད་བྱེད༎མུན་པའི་བསྐལ་པར་ཐུག་པས༎རྒྱ་ཆེ་གྲངས་མང་ཕབ་ཀྱང་༎ངལ་བའི་རྒྱུ་ལས་མེད་པས༎གདམས་པའི་ཡང་བཅུད་ཐམས་ཅད༎ཡི་གེར་ཕོབས་ལ་སྤེལ་དང་༎སྐལ་ལྡན་དག་ལ་ཕན་སྲིད༎སེམས་ཀྱི་དཔང་རྒྱ་བསྐྱེད་དང་༎འདི་ཕྱིའི་དོན་ཆེན་འགྲུབ་འོང་༎ཞེས་གསུངས་མཐར་བླ་མའི་ཞལ་ནས་ངས་དགོངས་རྒྱུད་འཕོ་བ་དང་གདམས་ངག་ཆུ་ཀློང་བཞིན་དུ་རྡོལ་འོང་གསུངས།དེ་ནས་སྔར་བཞིན་ཧོར་སྐོར་གྱི་རུ་ནང་དུ་སོང་སྟེ།རང་གི་དག་སྣང་སྐོར་ལས་བྱུང་པའི་རྡོ་རྗེ་ཁྲོ་ལོད་ཀྱི་བསྒྲུབ་པ་མང་དུ་བྱས་མཐར།དབྱར་འབྲིང་པོའི་ནང་དུ་ཨ་གནམ་དབང་ཆེན་ཞེས་བྱ་བ་བྱུང་ནས་འདི་སྐད་ཟེར།ན་ནིང་དུས་ཕྱིས་གཏེར་སྟོན་དང་གྲུབ་ཐོབ་ཡིན་པར་སྐད་པ་ཤིན་ཏུ་མང་བས་ང་རང་ལ་ཡིད་ཆེས་གློ་ཐུབ་མེད་ཀྱང་འཇའ་བ་ཨ་ལགས་ནས་ཁྱོད་ཀྱིས་རྒིས་ལེའི་གཏེར་སྟོན་དེ་ལ་སྒྲུབ་པ་ཞིག་འདོན་དུ་ཆུག་དང་དེ་ཨོ་རྒྱན་པདྨའི་སྤྲུལ་པ་ཞིག་མིན་ཚེ་ངས་ཁྱོད་བསླུས་པ་ཡིན་གསུངས་པས་དེ་ལ་ཉན་ནས་ང་རང་ཁྱོད་འབོད་དུ་འོང་བ་ཡིན་ཟེར་བ་བྱུང་ཚེ་བདག་ཀྱང་དེར་ཕྱིན་ནས་རང་གི་གཏེར་བྱོན་རྡོ་རྗེ་ཁྲོ་ལོད་ཀྱི་སྒྲུབ་པ་ཞིག་བྱས།དེ་ཡང་འཇའ་བ་ཨ་ལགས་ཟེར་བ་འཇའ་བ་སྤྲུལ་བའི་སྐུ་རིན་པོ་ཆེ་མདོ་སྔགས་རྒྱ་མཚོ་ཞེས་པ་མཁས་པའི་དབང་པོ་དེ་ཡིན་ནོ།དེ་ནས་དབྱར་ཟླ་ཐ་ཆུང་གི་ནང་དེར་རྒིས་ལེའི་ཁྱིམ་དུ་ཕྱིན།སྐེ་བླ་ཆོས་འཕགས་ཞེས་པ་དེར་བྱུང་ནས་ཁྱོད་གཏེར་སྟོན་ངོ་མ་ཞིག་ཡིན་ན་ངས་ཁྱོད་ཀྱི་ཆོས་བདག་བྱེད་ཀྱི།ཁོ་བོ་ལ་རྟ་མགྲིན་གྱི་སྒྲུབ་ཐབས་ཤིག་འབྲི་དགོས་ཟེར་བ་ལ།བདག་གིས་ཟབ་ཆོས་དགོངས་པ་ཀློང་རྡོལ་གྱི་སྐོར་ལས་བྱུང་བའི་རྟ་མགྲིན་གྱི་སྒྲུབ་ཐབས་ཤིག་གཏན་ལ་ཕབས་ཏེ་དབང་ལུང་བཏོན་ནས་གཏད་ཀྱང་ཁོས་ཐེ་ཚོམ་སྐྱེས་ཏེ།དེ་སྐབས་ཀཿཐོག་བཞག་སར་སྤྲུལ་སྐུ་མགོ་ལོག་ཏུ་གྲྭ་ས་ཆོས་རྒྱུན་གྱི་ཕྱིར་དང་འབུལ་སྡུད་དུ་ཕེབས་ནས་བཞུགས་ཡོད་པ་དེའི་དབུ་སྔས་ཀྱི་ཞབས་སུ་བཅུག་སྟེ་དོ་ནུབ་གཏེར་ཆོས་གསར་བ་ཞིག་ཉིད་ཀྱི་གཟིམ་སྔས་སུ་བཞག་ཡོད་པས།དེ་ཅི་འདྲ་བ་ཞིག་ཡིན་བཟང་ངན་གཉིས་ཀའི་ཐག་ཆོད་ངེས་པ་ཞིག་ནངས་སྔ་མོ་གསུང་རྒྱུའི་བཀའ་དྲིན་ཞུ་ཞེས་བྱས་ནས་ནངས་པར་མདང་སུམ་ཞུ་རྒྱུའི་བརྟགས་བབས་དེ་ཅི་འདྲ་ལགས་ཞུས་པས།བླ་མའི་ཞལ་ནས་མདང་རྨི་ལམ་ལ་ཞིང་ས་བཟང་པོ་ཞིག་གི་ནང་དུ་འབྲུ་དྲུག་རྒྱ་ཆེན་པོ་སྨིན་པ་ལ་ད་དུང་ཅུང་ཟད་བརྔ་མ་རན་ཡང་བརྡ་བ་རྨིས་པས།གཏེར་ཆོས་སྤེལ་སྔ་བ་དང་།ཚོགས་ཀྱི་འཁོར་ལོ་རྒྱ་ཆེན་པོ་མ་ཕུལ་ན་མཁའ་འགྲོ་མ་རྣམས་མི་དགྱེས།དེ་མ་མཉེས་ན་བརྡ་ལ་ལྷག་ཆད་མང་པོ་འབྱུང་ངམ་སྙམ་གྱི་གཏེར་སྟོན་ཡང་དག་པ་ཞིག་ཡིན་པ་འདྲ་ཞེས་གསུངས།དེ་ནས་ཡང་སྐྱིད་ལུང་ཐུགས་མཆོག་རྡོ་རྗེ་ལ་གཏེར་ཆོས་འདི་བཟང་ངན་ཅི་ཡིན་ཐག་ཆོད་པ་ཞིག་གསུང་དགོས་ཞེས་ཞུས་ཚེ།དེས་ཀྱང་གཏེར་སྟོན་རྣམ་དག་ཡིན་མིན་མཐའ་ལ་བརྟགས་ན་གསལ་བར་འགྱུར་ཏེ།ཉི་མ་སྤྲིན་ལས་གྲོལ་བ་བཞིན་དུ་ཇེ་གསལ་ཇེ་མཐོ་རུ་སོང་ན་ལེགས།དེ་མིན་ན་རྫུན་གྱི་མཇུག་མ་མར་འགྲིབ་ཏུ་འགྲོ་བ་ལས་འོས་མེད་པ་ཡིན་ཅེས་གསུངས།ཡང་རེ་ཞིག་གི་ཚེ་བདག་གིས་ལུས་སྦྱིན་ཞིག་ཕབ་ཡོད་པ་དེ་གཞན་ཞིག་གིས་རས་དཔོན་ལ་བསྟན་པས།དེ་ན་རེ།སེམས་འགྱུ་བའི་རང་མདངས་མཁའ་འགྲོ་མ།ཟེར་བ་དེ་ཚོ་འདྲེ་མོ་འདྲ་ཡིན་ན་མ་གཏོགས་འགྱུ་བའི་གདངས་ན་ཡེ་ཤེས་མཁའ་འགྲོ་ཞིག་ཡོང་མི་སྲིད་དེ་ཧ་ཧ་ཚིག་གཅིག་པུ་འདིས་ཐག་ཆོག་ཐལ་ཟེར།དེ་རྗེས་རས་དབོན་གྱིས་ཀཿཐོག་སྤྲུལ་སྐུ་དེ་ལ།སྤྲུལ་སྐུ་ཉིད་ལགས་ཀྱིས་རྒིས་ལེའི་གཏེར་སྟོན་འདི་གཏེར་སྟོན་ངེས་པ་ཞིག་རེད་གསུངས་པ་དེ་བདེན་ནམ་ཞུས་པ་ན།བདག་ལ་རྨི་ལྟས་ཤིན་ཏུ་ལེགས་པོ་ཞིག་ཤར་བྱུང་གསུངས་ཚེ།ཁོ་ན་རེ་སེམས་འགྱུ་བའི་རང་གདངས་སུ་མཁའ་འགྲོ་མ་ཟེར་ལུགས་ལ་བལྟས་ན་ཡང་ཕྱོགས་ཙམ་ཤེས་འདུག་ཟེར་བའི་ལན་དུ།སྤྲུལ་སྐུའི་ཞལ་ནས།དེ་ལ་སྐྱོན་ཞིག་འབྱུང་ན་རྡོ་གྲུབ་ཆེན་གྱིས་ཀྱང་།ཡིད་ཤེས་གྲོལ་འཁྲུལ་རླུང་འགྱུའི་སྒྱུ་འཕྲུལ་གར།གསུངས་པ་དེ་ཡང་དེ་དང་མཚུངས་སྟེ་དེ་ཡང་མི་རིགས་པ་ཞིག་ཡིན་ནམ་གསུངས་པ་དང་།ཁོས་དེ་འདྲ་ཞིག་གསུངས་ཡོད་དམ་ཟེར་ཞིང་མགོ་འཕང་སྨད་ནས་འཚོགས་པ་མང་པོའི་ཁྲོད་དུ་ཅང་མི་ཟེར་བར་འདུགདེ་སྐད་བདག་གིས་ཐོས་ཚེ་བདེན་བརྗོད་བྱས་ནས་དམོད་པ་བོར་ཞིང་ཡི་གེ་མེ་ལ་བསྲེག་པས།ཁོ་ལ་ཡང་དེ་ནས་བཟུང་སྟེ་རིམ་གྱིས་གྱོད་དང་ཁ་མཆུ་སོགས་མི་འདོད་པ་མང་དུ་བྱུང་ཞིང་ཅི་ཞིག་ན་དམག་གིས་བརླག་ནས་རྒྱུ་རྫས་ཀྱང་གཏོར།ལུས་ལ་མཚོན་གྱིས་རྨས།མཐར་ཁྱིམ་འཁོར་གཏིང་ལོག་ཏུ་སོང་འདུག་གོདེ་ནས་སྟོན་ཟླ་ཐ་ཆུང་གི་ནང་དུ་གཅོད་སྨྱོན་གྲགས་པ་ཞེས་བྱ་བས་ཌཱ་མ་རུ་དང་མི་རྐང་གི་གླིང་བུ།རྔ་དང་།ཀློང་ཆེན་སྙིང་ཐིག་གི་པོ་ཏི་ཟུང་བཅས་ཕུལ་ནས་མཁའ་འགྲོའི་གསང་མཛོད་ཞིག་ཡི་གེར་ཕོབས་དང་ང་རང་གིས་ཉམས་ལེན་བྱེད་ཟེར་བ་བྱུང་།དེའི་ནུབ་མོ་མཁའ་འགྲོ་མ་རྔ་སྒྲའི་རྒྱལ་མོ་ཡིན་སྐད་པའི་བུད་མེད་སྔོ་བསང་མ་ཞིག་བདག་གི་ཐད་དུ་འདུག་པར་སྣང་བ་ལ་གཅོད་སྨྱོན་གྲགས་པ་འདི་བཟང་ངན་ཅི་འདྲ་བ་ཡིན་དྲིས་པས།ཧེ་ཧེ།སྦས་པའི་རྣལ་འབྱོར་དམ་པ་དེ༎ས་ཆེན་ཀུན་དགའ་རྒྱལ་མཚན་དང་༎ཀོང་སྨྱོན་སྦས་པའི་རྣལ་འབྱོར་པ༎སྒྲིབ་པའི་ལྷག་མ་སྦྱངས་པའི་ཕྱིར༎དེང་དུས་འདི་འདྲའི་ལུས་བཟུང་སྟེ༎མི་ཁྱོད་གཏེར་དང་འཕྲད་པ་ཡི༎རྟེན་འབྲེལ་སྙིང་ཐིག་ཟབ་མོ་དང་༎སྙན་གྲགས་ལྟས་སུ་རྔ་དྲིལ་བུ༎གཅོད་ཀྱི་ལྟས་སུ་ཌཱ་མ་རུ༎མིང་ལ་གྲགས་པ་གྲགས་པའི་ལྟས༎ལྟས་བཟང་ལེགས་ཏེ་འདི་འདྲ་དཀོན༎ཅེས་ཟེར།དེའི་ཕྱིར་ནུབ་རིག་འཛིན་འཇིགས་མེད་གླིང་བ་དང་ཀློང་ཆེན་རབ་འབྱམས་པདྨ་འབྱུང་གནས་རྣམས་ཞལ་འཛོམ་པའི་སྐུ་འདྲ་གསུམ་ལྷན་ཅིག་ཏུ་འདུག་པ་དང་མཇལ་ཚེ་དེ་རྣམས་ཀྱིས་ཡི་གེ་གླེགས་བམ་གཉིས་པོ་བདག་གི་མགོ་ཐོག་ཏུ་བཞག་སྟེ།བརྗོད་བྱ་ཚིག་གི་དབང་ལུང་།བརྗོད་བྱེད་དོན་གྱི་དབང་ལུང་།ཉེ་བརྒྱུད་ཆིག་རྫོགས་ཀྱི་དབང་ལུང་རྣམས་ཁྱོད་ལ་སྦྱིན་ན་ཐོབ་པར་ཤོག་ཅིག་རྫོགས་པར་གྱུར་ཅིགཅེས་ཟེར་ཞིང་སྐུ་དེ་རྣམས་ཤིག་ཤིག་ཏུ་འགུལ།དེ་ནས་བདག་གི་དེ་འདྲའི་ས་སྐུ་ངོ་མཚར་ཅན་དེ་དག་ངོ་མཚར་རོ་ཟེར་བ་ན།མི་རྒན་ཞིག་ན་རེ།མིག་མ་དག་པ་དེ་ཧ་ཧ།ཡེ་ཤེས་སྒྱུ་མའི་སྐུ་ཡང་ས་སྐུ་རུ་མཐོང་བ་འདི་ཅི་འདྲ་འདྲ།ཞེས་ཟེར་བ་དང་ཆབས་ཅིག་ཏུ་གཉིད་སད་སོང་།དེ་ནས་དེ་ལ་མཁའ་འགྲོའི་གསང་མཛོད་ཡི་གེར་ཕབ་ཚེ་ཡིད་ཆེས་ངོ་མཚར་བའི་ལྟས་བཟང་པོ་འཇའ་འོད་ཀྱི་གུར་ཁང་འཁྲིགས་པ་དང་དུས་མཉམ་དུ་བྱ་རྒྱལ་རྒོད་ཀྱི་ཐིས་ཕྲན་བབས།དྲི་བཟང་གི་ན་བུན་འཐུལ།རོལ་མོའི་རང་སྒྲ་གྲགས་པ་བྱུང་། 

མུ་མཐུད་དུ་འགོད་རྩིས་ཡིན།

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔