ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༡༣

དགུང་ལོ། ༥༡   

རང་ལོ་ལྔ་བཅུ་ང་གཅིག་ལ་བབས་ཚེ་ཧོར་ཟླ་གསུམ་པའི་ཚེས་བཅོ་ལྔའི་ཉིན་སྒར་འདེགས་ནས་སྙག་གི་འབྲང་ངུའི་མདའ་རུ་ས་འཆགས་བྱས་པའི་སྐབས། ཧོར་ཡུལ་ནས་མི་མཛེ་བོ་ཞིག་སླེབ་བྱུང་ནས་དེ་ལ་ཕན་པའི་ཐབས་ཤིག་བྱ་དགོས་སྙམ་དུ་ཡོད་ཚེ། དབྱར་ཟླ་ར་བའི་ཚེས་བཅོ་ལྔའི་ཉིན་མཆུ་གཙང་གི་དམག་མི་བརྒྱ་ཕྲག་ཙམ་བྱུང་ནས་བདག་གི་སྦྲ་ལ་མེ་མདའ་ཉི་ཤུ་ཙམ་བརྒྱབ་ཀྱང་སྦྲ་མ་ཕིགས་པར་མདའ་རྣམས་ཐང་ལ་ལྷུང་འདུག་གོ དེ་ནས་བདག་གིས་གཏོར་སྒྲོམ་ཐང་དུ་ལན་གསུམ་དུ་བརྡབ་ནས་དམོད་པ་བོར། དེ་ནས་དམག་རྣམས་ཕྱིར་སོང་ཚེ་ལྟས་ངན་པ་འགའ་བྱུང་། སྣ་འདྲེན་ནང་དབྱེན་མཁན་ཞིག་ཡོད་པ་དེ་ཟླ་བ་གཅིག་ལས་མ་འགྱངས་པར་ཤི དམག་དཔོན་སྣ་འདྲེན་དམག་མི་རྣམས་ཀྱི་ནང་ནས་མང་པོ་ཞིག་ལོ་མ་འདས་པར་ཤི་སོང་བ་ཡིན། དེར་རྟེན་འབྲེལ་དེ་དག་གིས་འདུག་པའི་ཐབས་མ་བྱུང་བས་སླར་བླ་མ་རུང་དུ་སྐྱེས་ཐེག་པ་ཡིན། དེ་ནས་སྟོན་ཟླ་ཐ་ཆུང་ནས་དགུན་འབྲིང་པོར་མ་ཐུག་བར་དུ་ཡི་དམ་གྱི་སྒྲུབ་པ་ལ་ཞུགས། དེ་ཚེ་མཆུ་གཙང་གི་གཞི་བདག་ལྷ་ལུང་ཀླུ་མཁར་ཡིན་ཟེར་བའི་རྟ་མི་བཅུ་གཉིས་བདག་གི་སྟེང་དུ་ཀི་སྒྲ་ཧ་སྒྲ་དང་བཅས་ཏེ་འོངས་ཚེ་བཀའ་སྲུང་གནོད་སྦྱིན་ཆེན་པོས་རལ་གྲི་གཡུག་པས་རྟ་མི་ལྔ་བསད་པའི་འཕྲོ་བདུན་པོ་རང་གནས་སུ་བྱེའུ་ཆུང་ཁྲ་ཡིས་དེད་པ་བཞིན་དུ་བསྐྲད་ནས་སོང་། ལོ་ཁྱིམ་དེ་ཡི་དབྱར་འབྲིང་པོའི་ནང་དུ་བུ་གཅིག་སྐྱེས་པ་བཙས་ནས་ཞག་བཅུ་ཕྲག་གཉིས་ནས་མ་ལ་འབོད་པ་དང་ཡིག་དྲུག་བཟླ་ཤེས་པ་ཞིག་ཡིན་པ་ལ་མིང་ལ་ལྷ་ཆེན་སྟོབས་ཀྱི་རྒྱལ་པོ་ཞེས་བཏགས།

དགུང་ལོ། ༥༢   

དེ་ནས་རང་ལོ་ལྔ་བཅུ་ང་གཉིས་ལ་བབས་ཚེ། ཧོར་ཟླ་ལྔ་པའི་ཚེས་བཅུ་གསུམ་གྱི་ནུབ་མཁའ་འགྲོ་མ་པད་ཕྲེང་ཞེས་བྱ་བ་ཡིན་ཟེར་བའི་བུད་མེད་དཀར་མོ་ཞིག་གིས་ཁྱོད་ཀྱིས་སར་བཀག་ན་ཟས་ཀྱི་དངོས་གྲུབ་ཡོད་དེ་མཐར་བཙན་བདུད་མེ་སྟག་དམར་པོའི་སྤྲུལ་བ་ཞིག་གིས་གཞན་ལ་སྟེར་ནས་དེ་ཁྱོད་ཀྱིས་དྲག་ལས་ཀྱིས་གསོད་དགོས་པའི་གལ་ལ་ཐུག་འོང་གི་ཞེས་ཟེར་བ་དང་།གཞན་ཡང་མ་འོང་ལུང་བསྟན་མང་དུ་གསུངས་ནས་ཡལ་སོང་།དེ་སྐབས་ཤིག་ན་ཝ་ཤུལ་དཔོན་ནས་འཛུ་ཆེན་གྱི་ལྷ་མོ་དེ་ཀ་ངེད་ཀྱི་གཞི་བདག་དགའ་ཤོས་ཡིན་པས་ཁྱོད་ཀྱིས་ཡར་ལ་འབོད་དགོས་ཟེར་ཚེ།ཧོར་ཟླ་དྲུག་པའི་ཉེར་དྲུག་གི་ཉིན་གྲོགས་འགའ་ཞིག་དང་བཅས་སྔར་དེ་གནས་སའི་རི་བོ་དེའི་རྩེ་མོར་ཕྱིན་ནས་བདག་གིས་འཛུ་ཆེན་ཤིང་གི་ལྷ་མོ་ཁྱོད་ཡར་ཤོག་ཅེས་ལན་གསུམ་བོས་ཚེ་འོང་པའི་ལྟས་སྒྲ་ཆེན་པོ་བཅས་རླུང་ནག་འཚུབ་མ་ཞིག་ནམ་མཁའི་ཁམས་ན་ཀྱི་ལི་ལི་བྱུང་ནས་ནགས་ནང་དུ་བབས་སོང་བ་ཀུན་གྱིས་མཐོང་།དེ་ནས་ཧོར་ཟླ་དགུ་པའི་ཚེས་བཅུའི་ཉིན་རང་འོད་གསལ་ལ་མཉམ་པར་བཞག་ནས་ཡོད་པའི་དུས།ཉམས་འོད་གསལ་གྱི་སྣང་ཆ་ལ།འཇའ་ཚོན་འོད་ཀྱི་དྲྭ་བ་འཁྲིགས་པའི་ཀློང་དུ་ཨོ་རྒྱན་གཏེར་བདག་རྒྱལ་པོ་ཡིན་སྐད་པ་སྐུ་མདོག་སེར་པོ་གཡས་གཏེར་བུམ་དང་གཡོན་ནེའུ་ལེ་བསྣམས་པ་སྐུ་ལ་ཟ་བེར་དང་ཆོས་གོས་རྣམ་གསུམ་གསོལ་བ་དབུ་ལ་པད་ཞྭ་པདྨ་མཐོང་གྲོལ་གསོལ་བ་ཞི་མ་ཁྲོ་འཛུམ་གྱི་ཉམས་དང་ལྡན་པ་ཞིག་གིས་ཞལ་གཟིགས་ཏེ།བུ་ཁྱོད་ལ་ཅི་མཁོ་ཞེས་ཟེར་བ་ལ།ང་ལ་ནོར་ལོངས་སྤྱོད་ཅིག་འདོད་ཀྱི་ཞེས་ཞུས་ཚེ་སློབ་དཔོན་ཆེན་པོས།ཁྱོད་དེ་འདོད་ཀྱི་སྙམ་ནས་ང་འདིར་ལྷགས་པ་ཡིན།ངས་ནོར་བདག་ཨ་པར་ཙིཏྟ་ཞེས་བྱ་བ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དང་ཞལ་མི་གཉིས་པ་ནོར་གྱི་བདག་པོའི་ཚུལ་བཟུང་བ་ཞིག་ཡིན་པས།དེ་ཡི་སྒྲུབ་ཐབས་ཟབ་མོ་ངས་བཤད་ཀྱི།ལེགས་པར་ཉོན་ལ་ཡིད་ལ་ཟུངས་ཤིགཅེས་གསུངས་ཤིང་ཨ་པ་རའི་སྒྲུབ་ཐབས་ཀྱི་དབང་ལུང་ཡོངས་སུ་རྫོགས་པ་གནང་བ་བདག་གི་རྒྱུད་ལ་སྤར་གྱིས་བཏབ་པ་བཞིན་དུ་ངེས་པར་གྱུར་ཏོ།སླར་ཡང་འདི་སྐད་གསུང་།ཀྱཻ།སྐྱེས་བུ་ཆེན་པོ་དེང་སང་གི་དུས་བཟླས་པ་ཁོ་ན་ལ་འབད་པ་ཙམ་གྱིས་ནི་དངོས་གྲུབ་འབྱུང་བའི་གནས་མེད་ལ།དེ་བསྐྱེད་རྫོགས་མེད་པས་ལན་པ་ཡིན་ཀྱང་།དེ་མི་ཤེས་པས་ལྷ་དང་གང་ཟག་ལ་ཡི་ཆད་བྱེད་དུ་ཡོད་པ་དེ་ལྟར་མ་ཡིན་པར་བསྒོམ་བཟླས་ཡ་མ་བྲལ་བར་ཉམས་སུ་ལོངས་ཤིགཅེས་གསུང་ཞིང་མི་སྣང་བར་ཡལ་ལོ།     །

དགུང་ལོ། ༥༣ 

དེ་ནས་རང་ལོ་ལྔ་བཅུ་ང་གསུམ་ལ་བབས་ཚེ་ཆོས་ཁྲིད་ཆེན་པོ་བཙུགས་པའི་གནས་སྐབས་སུ་མཁའ་འགྲོ་འཁྲུགས་པའི་ལྟས་མང་དུ་བྱུང་བ་ན། དེ་ཅིའི་ལན་པ་ཡིན་སྙམ་པའི་གནས་སྐབས་སུ།དགུན་ཟླ་འབྲིང་པོའི་ཉེར་བཞིའི་ནུབ་ཀྱི་རྨི་ལམ་ན་བདག་གི་བླ་མ་འཇམ་དབྱངས་ཞེས་བྱ་བ་ཞལ་མཇལ་ཚེ་ངས་འདི་ལྟར་ཞུས།ཀྱཻ།བླ་མ་དུས་གསུམ་མཁྱེན་པ་ཁྱེད་འཇིག་རྟེན་མི་ཡུལ་དུ་སྐུ་བཞུགས་པའི་དུས་སུ་ལུང་བསྟན་དང་མངོན་ཤེས་མི་གསུང་ཡང་ད་ནི་ཁྱེད་ཡེ་ཤེས་སྒྱུ་མའི་སྐུས་མི་མཁྱེན་མི་གཟིགས་པ་ཅི་ཡོད།དེང་བདག་གིས་ཆོས་མ་གཏོགས་པ་མཁའ་འགྲོ་མི་དགྱེས་པའི་ལས་ནི་བྱེད་དུ་མེད་ཀྱང་མཁའ་འགྲོ་འཁྲུགས་པའི་ལྟས་མང་དུ་བྱུང་འདུག་པ་འདི་ཅི་ཡིས་ལན་པ་ཡིན་ཞེས་ཞུས་ཚེ།བླ་མའི་ཞལ་ནས་ཁྱོད་ཀྱིས་ཆོས་མིན་གྱི་བྱ་བ་མ་བྱས་པ་བདེན་ཡང་རྫོགས་པ་ཆེན་པོ་ནི་མ་དང་མཁའ་འགྲོ་ཐམས་ཅད་ཀྱི་སྙིང་གི་ཡང་ཐིག་དམ་པ་ཡིན་ཏེ།དམ་ཉམས་དང་ཉམས་སུ་མི་ལེན་པ་དང་དོན་གོ་ལོག་ཏུ་འཛིན་པ་དང་།ཡིད་མི་ཆེས་པ་རྣམས་ལ་འཆད་སྒྲོགས་བྱས་ན་མ་མོ་མཁའ་འགྲོ་འཁྲུགས་པའི་རྒྱུ་ཡིན་པ་ལས།སེམས་ཅན་གྱི་སྡིག་པ་མི་དགེ་བ་སྤྱོད་པ་ནི་ཀུན་གྱི་མཚན་ཉིད་ཡིན་ཏེ་འཁྲུགས་དོན་ཅི་ཡོད།དོན་དེ་ཕྱིར་ཡི་གེ་བརྒྱ་པ་དང་བཤགས་སྦྱངས་ལ་འབད་པ་གལ་ཆེ་བར་སོམས་ཤིགད་ནི་བུ་སློབ་རྣམས་ཀྱི་རབ་ངེས་མེད་རི་ཁྲོད་འཛིན་པ་དང་།འབྲིང་ཚེ་གཅིག་གྲོང་བསྒོམ་བྱ་བ།ཐ་ནའང་ལོ་བཞིན་ཟླ་རེར་བསྒོམ་དགོས།འཆད་པ་པོས་འཆད་པ་དང་།ཉན་པ་པོས་ཐོས་པ་དོན་ཡོད་པར་འགྱུར་བ་ཡིན་ཞེས་གསུངས་སོ།དེ་ནས་དེ་ལྟར་བཤགས་སྦྱངས་བྱས་པས་ལྟས་རྣམས་ཡལ་སོང་། 

དགུང་ལོ། ༥༤   

དེ་ནས་རང་ལོ་ལྔ་བཅུ་ང་བཞི་ལ་བབས་ཚེ། ཧོར་ཟླ་ལྔ་པའི་ཚེས་བཅུའི་ནུབ་ཀྱི་རྨི་ལམ་ན་མཁའ་འགྲོ་ཆོས་ཀྱི་སྤྱན་ལྡན་མ་ཡིན་སྐད་པའི་བུད་མེད་སྔོན་མོ་སྐུ་གཅེར་བུ་རུས་རྒྱན་གྱིས་སྤྲས་པ་ཞིག་བདག་གི་ཐད་དུ་བྱུང་ནས་བུ་ཁྱོད་ཀྱིས་ཅི་སྙམ་ཅི་འདོད།ཅེས་ཟེར་བ་ལ།ཁྱོད་ཀྱིས་ང་ལ་ལེགས་ཉེས་ལུང་བསྟན་ཞིག་གནང་བར་ཞུ་ཞུས་པས།དེ་ན་རེ།བུ་ཁྱོད་ཀྱིས་ང་ཡི་ངག་ལ་ཉོན༎ཁྱེད་འདི་ནས་སྟོད་ཀྱི་ཕྱོགས་སུ་སོང་༎བྱང་ཕྱོགས་རྡོ་ཡི་ས་ཆ་ན༎ཁྱེད་ལ་གདུལ་བྱའི་ཞིང་ཞིག་ཡོད༎ལོངས་སྤྱོད་དཔལ་ཀྱང་འགའ་ཞིག་ཡོད༎བདེ་བའི་སྐབས་ཀྱང་ཅུང་ཞིག་ཡོད༎རེ་ཞིག་ཡོད་པའི་སྐབས་ཙམ་ལས༎ནམ་ཕུག་ཐུབ་པའི་བདེ་བ་ནི༎འཛམ་བུའི་གླིང་ན་ཡོད་མི་འོང་༎ཕྱི་རོལ་ཀླ་ཀློའི་རྫས་སྔགས་དང་༎སྦྱོར་བ་ཏིང་ངེ་འཛིན་གྱི་མཐུས༎མི་རྣམས་ཀུན་གྱི་རྒྱུད་བསླུས་ཏེ༎ཇག་རྐུན་འཕྲོག་བཅོམ་ལས་ལ་འབད༎ཕྱི་ནང་བར་གསུམ་ཐམས་ཅད་ཀུན༎ཆེ་འཁྲུགས་ཆུང་འཁྲུགས་བར་བ་འཁྲུགས༎དམག་འཁྲུགས་མཚོན་གྱི་ཡོ་ལང་འགྱེད༎མི་ཕྱུགས་ནད་ཀྱི་ཡོ་ལང་འཚུབས༎མཐའ་མི་དབུས་སུ་རྡིབ་ལ་ཉེ༎བསྟན་འགྲོའི་བདེ་སྐྱིད་ཉི་མ་སྒྲིབ༎དེ་ཕྱིར་བདེ་བའི་གོ་སྐབས་མེད༎གནས་སྐབས་བདེ་བ་དོན་གཉེར་ན༎གནས་ནི་གར་བདེ་ས་རུ་འཕོས༎དེ་ནི་ལུང་བསྟན་མཆོག་ཏུ་ཟུངས༎ལོ་ཁྱིམ་དེ་ཡི་དབྱར་ཟླ་ཐ་ཆུང་གི་ཚེས་གྲངས་བཅུ་ཡི་ཉིན་བདག་བུ་ཆུང་རྟ་ཤུལ་གྱི་ནང་དུ་ཆོས་ཁྲིད་བཤད་སྐབས།བདག་གི་གཞི་ཕྱྭ་བདེ་མོ་ཨེ་ཡིན་སྙམ་དུ་ཡོད་པའི་སྐབས་ཤིག་ཏུ་ནུབ་གཅིག་གི་རྨི་ལམ་ན་གནོད་སྦྱིན་ཤན་པ་དམར་ནག་གིས་ནམ་མཁའ་བར་སྣང་ས་གཞིའི་ཁམས་ཐམས་ཅད་དུ་སྙིང་དང་ཁྲག་གི་ཆར་ཕབ།ཧ་ཧ།ཀྵ།ཅེས་པའི་སྒྲས་བར་སྣང་ཐམས་ཅད་བཀང་ནས་བདག་གི་ཐད་དུ་སླེབ་བྱུང་ནས།ཁྱོད་ཀྱིས་མ་གོ་བ་མ་ཤེས་པ་ཡོད་ན་ངས་བཤད་ཅེས་ཟེར།དེ་ལ་བདག་གིས།ངའི་ཡུལ་བ་བདེ་མོ་ཨེ་རེད་ཅེས་དྲིས་ཚེ།ཁོ་ན་རེ།བདེ་མོ་རེད།ད་ལོ་དཔལ་དགེ་སྤྲུལ་སྐུ་ཡང་ཕེབས་འདུག་གིཅེས་ཟེར་བ་ལ།ངས་ཨ་དཔལ་དགེ་སྤྲུལ་སྐུ་འདས་སོང་ནས་མི་བཞུགས་ཞེས་སྨྲས་ཚེ།འདས་སོང་ནས་མི་བཞུགས་མོད།སླར་དེ་བྱོན་ནས་སྟོན་ཐ་ཆུང་གི་ནང་ནས་མཇལ་འོང་ཟེར།ང་ཡི་ཤ་མཛོད་སྟོང་བ་འདི་ཀར་ལྟོས།ཞེས་ཟེར་ནས་ཁང་པ་སྟོང་པ་ཞིག་གི་ནང་ན་ཤ་ལག་སྐམ་ལ་རུལ་པ་ཞིག་ལས་མེད་པ་མཐོང་།འདི་ལ་ཅི་དགོས་ཞེས་དྲིས་ཚེ་ཁྱོད་ཀྱིས་ང་ལ་ཤ་མ་བྱིན་པས་ལན་པ་ཡིན་ཟེར།དེ་ལ་འདི་སྐད་སྨྲས།མཁས་པ་རྣམས་ན་རེ།ཤ་མཆོད་རྫས་ལ་བཤམ་མི་རུང་ཟེར།དེ་ཅི་ཡིན་དྲིས་ཚེ།ཧ་ཧ་མགོན་ལེགས་ལྡན་མན་ཆད་ནས་ཐེའུ་རིང་ཐལ་སྐྱ་ཡན་ཆད་ཤ་ལ་མི་དགྱེས་པ་ནི་མེད།ཅིའི་ཕྱིར་ན་དུག་ལྔའི་རྒྱུད་དུ་འཁྲུལ་བའི་གང་ཟག་གིས་གཟུང་འཛིན་རང་རྒྱུད་པར་སྒྲུབ་པའི་ལྷ་རྣམས་ནི་དུག་ལྔ་རང་རྒྱུད་པའི་བདག་ཉིད་ཅན་དུ་འདུག་པ་དེས་ན་ཟས་ཤ་ཁྲག་ལ་རྔམ་པ།ལས་གསོད་གཅོད་ལ་དགའ་བ་ཤ་སྟག་ཡིན་ཏེ།བསྟན་དགྲའི་སྲོག་གི་གཤེད་མར་གཟས་པའི་བཀའ་སྲུང་དུ་བཞག་པ་ཡིན་པས་ཤེས་པར་གྱིས་ཤིགབསྟན་དགྲ་ཐུལ་བའི་རྗེས་སུ་གཏང་རགས་ལའང་རེ་ཆེ་བ་ཡིན།ཁྱེད་མི་ཡི་བློ་ཡིད་ལས་སྐྱེས་པ་ངེད་ཅག་ཀྱང་ཁྱེད་ཀྱི་བཟའ་བཏུང་དུ་འོས་པ་ཐམས་ཅད་ལ་དགའ་སྟེ་རུང་ཞེས་ཟེར་ཡལ་སོང་།༈དབང་ཆེན་རབ་ཁྲོས་གནོད་སྦྱིནཆེན་པོ་ཡིས༎མངོན་པར་བཤད་པའི་ཚིག་འདི་དོན་ཟབ་སྟེ༎དུག་ལྔས་ཀུན་ནས་རྒྱུད་འཁྲུགས་གང་ཟག་གིས༎གཟུང་འཛིན་ཆོས་སུ་དངོས་པོར་ཞེན་པ་ཡིས༎བསྒྲུབ་པའི་ལྷ་ནི་འཇིག་རྟེན་དྲེགས་པ་ཅན༎དབྱིངས་དང་ཡེ་ཤེས་གཉིས་སུ་མེད་པ་ཡི༎དག་པའི་གཟིགས་སྣང་ཡེ་ཤེས་ལྷ་རུ་ཤེས༎འདིས་ཀྱང་ཨ་ཏིའི་གྲུབ་མཐའི་གསང་གནད་ཅིག།སྟོན་ཏེ་རྟོག་གེ་ཕལ་གྱི་བློ་དང་ནི༎མི་མཚམས་ཁབ་མིག་ཆུང་ངུར་མཁའ་མཐའ་བཞིན༎དེས་ན་བརྒྱུད་ལྡན་བླ་མའི་མན་ངག་དང་༎ལུང་རིགས་དང་འབྲེལ་ནང་གི་ཉམས་མྱོང་གི།སྟེང་ནས་མ་ནོར་གོ་དོན་འཚོལ་བ་གཅེས༎ལོ་ཁྱིམ་དེའི་ཚེས་བཅུ་དགུའི་ནུབ་ཀྱི་རྨི་ལམ་ན་བན་དེ་རྒན་སོང་ཞིག་གི་ལག་ན་གྲི་རིང་ཐོགས་ནས་ཁྱོད་འདི་རུ་འོང་དོན་ཅི་ཡོད།ངས་ཁྱོད་གསོད་པར་མི་བྱེད་རེ་ཞེས་ཟེར་ནས་མཆོངས་རྒྱུགས་བྱེད་འདུག་པ་ལ།ངས་ཁྱོད་ལ་རྫུ་འཕྲུལ་ཅི་ཡོད་དྲིས་ཚེ།དེ་ན་རེ་རྫུ་འཕྲུལ་ཨེ་རེད་ཟེར་ནས་སྟེང་གི་ནམ་མཁའ་སྤྲིན་གྱི་གོ་མཚམས་སུ་འཕུར།ཡང་ཨེ་རེད་ཟེར་ནས་ཆུ་ཆེན་པོའི་ནང་དུ་ཉ་ལྟར་ལྡིང་།ཡང་ཨེ་རེད་ཟེར་ནས་བྲག་དམར་པོའི་ཁུང་དུ་འཛུལ།ལྕགས་ཀྱི་སེན་མོ་མཐོ་གང་བས་རྡོ་རྣམས་ཐལ་མར་ཕིག་པའི་མཐར།ཁྱོད་སང་ཉིན་མ་སོང་ན་ངས་ཁྱོད་དོ་ནུབ་གསོད་ཟེར་བ་བྱུང་ཚེ།བདག་གིས་མི་འགྲོ་ངེས་པ་ཡིན།ཁྱོད་ཀྱིས་གསོད་དང་ལྷ་འདྲེ་ཡིད་ཀྱི་གཟུགས་ཅན་གྱིས་རྨི་ལམ་ན་གསོད་པ་གོ་མ་མྱོང་སྨྲས་པ་དང་།བདག་གི་ལག་གཡས་ལ་འཇུས་ཏེ་གྲི་ཐང་ལ་འཕངས་ནས་སེན་མོ་སྙིང་ཀར་བཏབ་ཚེ།བདག་གིས་ཁོ་པང་པས་བཏབས་ནས་གན་རྐྱལ་དུ་བཟློག་སྟེ་མགོ་བཞི་ཁྲམ་དུ་བཀས་ནས་ཀླད་པ་ཟོས་ཚེ་ང་མ་བསད་དང་གནོད་པ་བྱེད་ན་ན་ར་ཀན་ཞེས་ཟེར།དེ་ནས་དམིགས་པ་འདི་ལྟར་བྱས།གནམ་ལྕགས་ཀྱི་རྡོ་རྗེ་ལས་གྲུབ་པའི་ལྕགས་ཐག་ཁོ་ཡི་རྐང་ལག་བཞི་ལ་བསྐོན་ནས་གནམ་ལྕགས་ཀྱི་ཕུར་བ་བཞི་རླུང་རི་ནག་པོ་རྡོ་རྗེ་རྒྱ་གྲམ་ལ་བཏབ་ནས་ཐར་ཤོར་མེད་པར་བསྒོམ་ཚེ་དེ་ལྟར་གྲུབ་ཅིང་གྱུར་ཏོ།དེ་ནས་རྟ་ཤུལ་གོང་མའི་བུམ་སྒྲུབ་བྱས་ཚེ་ཡང་ནུབ་གཅིག་གི་རྨི་ལམ་ན་ཤར་ནས་སྤྲིན་ནག་པོ་ཞིག་ཆད་བྱུང་བའི་ནང་ནས་མི་དམར་རྟ་དམར་ཅན་ཞིག་གིས།ཁྱོད་སོང་ཤིག་མ་སོང་ན་ངས་ཁྱོད་བསད་ནས་ཤ་ཟ་ཁྲག་འཐུང་རུས་པ་མུར་ནས་ལྷག་མེད་དུ་གཏོང་བ་མིན་རེ་ཟེར་བ་ལ།ངས་ཁྱོད་སུས་མངགས་པ་ཡིན་ཞེས་དྲིས་ཚེ།ཁོ་ན་རེ།ང་སྐལ་བཟང་རྡོ་རྗེས་མངགས་པ་ཡིན།དགོས་དོན་སྡེ་ཡུལ་འདིའི་བན་དྲེད་མི་སྲུན་པ་ཞིག་གིས་ཉེས་ཆེན་པོ་བྱས་ཡོད་པས་ལས་ཀ་ནི་དེའི་སྲོག་མ་ཆོད་ཀྱི་བར་དུ་འགྲོ་རྒྱུ་མིན་ཞེས་ཟེར་ནས་མདའ་བཀང་འདུག་པ་ལ།གནོད་སྦྱིན་ཆེན་པོས་རལ་གྲི་གཡུག་ནས་གཞུ་སྐེད་ནས་ཆག་སྟེ་ཁོ་ཐུར་ལ་ལྷུང་བྱུང་བ་དེ་བདག་གིས་བཟུང་ནས་ཁྱོད་ང་གསོད་རན་ལ་ངས་ཁྱོད་མི་གསོད་རེ་སྨྲས་ནས་གྲི་སྙིང་ཀར་བཙུགས་པས་ཨ་ཕ་ཕ་ང་ཐོངས་དང་།ཁྱོད་ལ་གནོད་པ་བྱེད་རེ་ན་ར་ཀན་ཟེར་བ་ལ་ངས་སྦྱིན་བདག་རྣམས་ལའང་གནོད་པ་བྱེད་མི་ཆོག་པའི་ཁས་ལོངས་སྨྲས་པ་དང་།ཁོས་རེ་ཞིག་གནོད་པ་བྱེད་ན་ན་ར་ཀན་ཞེས་ཟེར།དེ་ནས་གནོད་སྦྱིན་ཆེན་པོས།ཧེ་ཧེ།སྟེང་བྱ་ཁྱིམ་དུ་བབས་པ་ནི༎བྱད་མའི་ལྷ་སྲུང་དབང་འདུས་ལྟས༎བསད་ན་བྱད་ཁ་ཡུལ་མེད་འགྲོ༎མངགས་ན་སླར་ཡང་ལན་གསུམ་འཁོར༎ཡུལ་སྡེ་འདི་དག་ངའི་འབངས་སུ༎འགྱུར་ལ་ཉེ་སྟེ་ཕན་ཡང་གདག།ཁྱོད་ཀྱང་གནས་འདིར་ས་བཟུང་ན༎རེ་ཞིག་དགེ་ལེགས་གོང་འཕེལ་སྲིད༎སྔོན་གྱི་རྟེན་འབྲེལ་འཆུག་པས་ལན༎བུ་སློབ་འགའ་ཞིག་དབྱིངས་ལ་གཤེགས༎དེ་ཕྱིར་ཀུན་གྱིས་སྡོད་ས་ཟུངས༎འོད་གསལ་སྦུབས་སུ་འཇུག་པ་གནད༎ཅེས་ཟེར་ཡལ།ཞག་དེའི་ཕྱི་ནུབ་བྱ་རྒོད་ཞིག་གཉེར་གུར་གྱི་ནང་དུ་བབས་པ་ན་བདག་གིས་དེ་སོད་ཟེར་མ་ནུས།གཞན་རྣམས་ཀྱིས་མ་བསད་པར་ཕྱིར་ཕུད་ནས་བཏང་ཚེ།དེ་ཡི་ཕྱི་ཉིན་ཡང་སྒོ་ཐད་དུ་འདུགམཐར་གར་སོང་ཆ་མེད་པར་གྱུར།དེ་ནས་སྟོན་ཟླ་ར་བའི་ནང་དུ་རང་གི་སྡོད་གནས་བླ་རུང་དུ་སླེབ།སྟོན་ཐ་ཆུང་གི་ནང་དུ་གཞི་ཆེན་དགོན་པའི་སྒྲུབ་ཆེན་གྱི་དཔོན་དུ་སོང་ཚེ།ནུབ་གཅིག་རྨི་ལམ་ན་བན་རྒན་མིག་གཡས་ཞ་ར་བ་ཞིག་གིས་བདག་གི་རྒྱབ་ནས་པང་པས་བཏབས་ཏེ།ང་ཡི་ཟ་ཞིང་གཞི་ཆེན་ཚང་ལ་བབ་འདུག་ཡོད་དེ་ཁྱོད་འདིར་ཡོང་དོན་ཅི་ཡོད།ཁྱོད་དོ་ནུབ་མེད་པ་བྱེད་པའི་དུས་ཡིན་ཟེར་ཚེ།བདག་གིས་ཤེད་བསྐྱེད་ནས་ལངས་ཆས་བྱས་ཀྱང་ཁོས་བསྡམས་འདུག་པས་ལངས་མ་ནུས།ཁོ་ན་རེ།ངས་རྡོ་རྗེ་འཇིགས་བྱེད་ཀྱི་སྒོམ་པས་གནད་ཐེང་།བསྙེན་པ་དུང་ཕྱུར་བཟླས་པས་གཤིན་རྗེ་དངོས་སུ་གྱུར་པ་ཡིན་ཏེ་བླ་བཙུན་སྐྱེས་ཆེན་མང་པོའི་སྲོག་དབུགས་སྡུད་མྱོང་བ་ཡིན།ཐུབ་ཐལ་ལས་ངན་ཟེར་ཚེ།དེ་མ་ཐག་ཏུ་བདག་གི་སེམས་དང་ཁོ་ཡི་རྣམ་ཤེས་དབྱེར་མེད་དུ་བསྲེས་ཏེ་དབྱིངས་ནམ་མཁའ་རྣམ་དག་གི་ཀློང་དུ་ཕཊ་སྒྲ་གསུམ་གྱིས་བསྲེས་པས་ལྷོད་དུང་ངེ་ཡལ་སོང་། གཞན་ཡུལ་དེ་རུ་རྡོ་རྗེ་འཇིགས་བྱེད་བསྒྲུབས་ནས་ཁོ་ལ་གྲུབ་པ་ཐོབ་ཡོད་ཟེར་བའི་འདྲེ་མང་པོ་བྱུང་ཡང་གནོད་སྦྱིན་ཤན་པ་ཆེན་པོས་བསད་བཅད་དྲག་པོའི་སྒོ་ནས་ཚར་བཅད་ནས་བདག་ལ་གླགས་མ་རྙེད།

དགུང་ལོ། ༥༥   

དེ་ནས་རང་ལོ་ལྔ་བཅུ་ང་ལྔ་གླང་གི་ལོ་ཁྱིམ་ལ་བབས་ཚེ། ཧོར་ཟླ་གསུམ་པའི་ཚེས་བཞིའི་ནུབ་ཀྱི་རྨི་ལམ་ན་བུད་མེད་ནག་མོ་སྔོ་ཡི་ལོ་མ་གོས་སུ་གྱོན་པ་ཞིག་གིས་འདི་སྐད་ཟེར། ཧོ། ཉོན་ཅིག་སྐལ་བཟང་སྐྱེས་བུ་ཉོན༎ ཤར་ཕྱོགས་སྲིན་པོ་འཇིགས་རུང་གིས༎ ལྷོ་ཕྱོགས་སྲིན་པོའི་རལ་བ་བཅད༎ བན་བོན་མ་རུང་གཤེད་དུ་སྡང་༎ སྲིན་ཆེན་སྲོག་ལ་ཧུར་ཐུམ་གཏོང་༎ དེ་བཟློག་ཆེད་དུ་འབོད་བྱུང་ན༎ ཤིན་ཏུ་ཡི་དམ་བསྒོམ་པར་འབད༎ གནད་དེས་རང་གི་རྐྱེན་བཟློག་ཅིང་།། རེ་ཞིག་སྦྱིན་བདག་རྐྱེན་ཡང་བཟློག། ཅེས་ཟེར་ཡལ། དེ་ནས་སྟོན་ཟླ་ར་བའི་ནང་དུ་མགོ་ལོག་ཕྱོགས་ནས་འབོད་དུ་འོང་ཚེ་དེར་ཕྱིན།

དགུང་ལོ། ༥༦   

དེ་ནས་ལོ་གྲངས་ལྔ་བཅུ་ང་དྲུག་ལ་བབས་ཚེ། ལིའི་བདར་ཚང་དུ་སྐལ་བཟང་དགོན་པ་བཏབ་པ་ཡིན། དེའི་ལོའི་དབྱར་ཟླ་ར་བའི་ཚེས་བརྒྱད་ལ་བབས་ཚེ་མཁའ་འགྲོ་མ་གསང་བ་ཡེ་ཤེས་ཀྱི་ཞལ་གཟིགས་ནས། སྐྱེས་མཆོག་ཁྱོད་ཀྱི་སློབ་བུ་དམ་པ་དེ་ཉིད་ཡོས་ཟླའི་ཉེར་གཅིག་གི་ནུབ་ཨོ་རྒྱན་མཁའ་འགྲོའི་གླིང་དུ་འཁྲུངས་ངེས་ཏེ། ཡོས་བུའི་ལོ་མཇུག་ཏུ་མདོ་སྡེ་བསྐལ་བ་བཟང་པོའི་ཚལ་གྱི་དགོན་དེ་རུ་སོང་ལ་གནས་ས་ཀྱིས་དང་རེ་ཞིག་དགེ་འོང་ཞེས་ཟེར།དེ་ནས་ལོ་ཁྱིམ་དེ་ཡི་སྟོན་ཟླ་ཐ་ཆུང་གི་ཚེས་གྲངས་བཅུ་དགུ་ལ་བབས་ཚེ་མཁའ་འགྲོ་མ་ཡེ་ཤེས་མཚོ་རྒྱལ་མས་སང་ཕོད་དཔལ་ཕྱག་ན་རྡོ་རྗེའི་སྤྲུལ་བ་ཞིག་ཁྱོད་ཀྱི་སྲས་སུ་འཁྲུངས་འོང་ཞེས་གསུངས་ཏེ། ཡུལ་དང་དུས་ཀྱི་ལུང་བསྟན་མང་པོ་ཡང་གསུངས་ཏེ་མི་སྣང་བར་ཡལ་ལོ། 

དགུང་ལོ། ༥༧ 

དེ་ནས་རང་ལོ་ལྔ་བཅུ་ང་བདུན་ལ་བབས་ཚེ། ཧོར་ཟླ་དང་པོའི་ཚེས་ཉེར་གཅིག་ཉིན་ལ་སློབ་བུ་དེ་གཤེགས་སོང་།དེ་ནས་ཧོར་ཟླ་གཉིས་པའི་ཚེས་ལྔ་ལ་བབས་པའི་ནུབ་མཁའ་འགྲོ་མ་ཟུ་ལེ་སྨན་ཞེས་བྱ་བས་བདག་ལ་འདི་སྐད་ཟེར།ཀྱཻ་ཧོ།ཉོན་དང་སྐལ་ལྡན་སྐྱེས་བུ་ཁྱོད༎ང་ནི་མཁའ་འགྲོ་ཟུ་ལེ་སྨན༎འོང་ནི་རྔ་ཡབ་ཡུལ་ནས་འོངས༎ལོ་ཁྱིམ་འདི་ཡི་སྟོན་ར་བར༎སྟོད་ནས་མི་གྲངས་འགའ་ཞིག་གི།དཔལ་དགེ་སྤྲུལ་སྐུ་གདན་འདྲེན་པའི༎ཕོ་ཉན་ལན་གཉིས་སླེབ་ཏུ་འོང་༎གནམ་ལོ་ལུག་ལ་མ་སླེབ་པར༎ཁྲི་རུ་འདོན་པའི་དུས་མ་ཡིན༎དེ་བར་མ་དང་མཁའ་འགྲོས་བཤོལ༎ཕོ་ཉས་ཇི་ལྟར་སྨྲས་པ་བཞིན༎དོན་ཆེན་ཡོད་ཕྱིར་བཟློག་མ་བྱེད༎ཁྲི་ཁར་མངའ་གསོལ་ཐབས་བྱུང་ན༎འགྲོ་བའི་དོན་ཡང་བྱེད་ནུས་སོ།།སྟོན་ཟླ་ཐ་ཆུང་ལ་ཐུག་ཚེ༎གནས་འདིར་མ་འདུག་སྟོད་ཕྱོགས་སུ༎སྐྱེས་འདེགས་བྱས་ན་ཤིན་ཏུ་ལེགས༎ཅེས་ཟེར་ཡལ།དེ་ནས་སྟོན་ཟླ་ཐ་ཆུང་གི་ནང་སྐལ་བཟང་དགོན་དུ་སླེབ་པར་བྱས།དེ་ནས་དགུན་ཐ་ཆུང་གི་ཚེས་བཅུའི་ཉིན་མཁའ་འགྲོ་རྡོ་རྗེ་གར་མཁན་མ་ཞེས་བྱ་བས་ཞལ་གཟིགས་ནས།ཀྱཻ་ཧོ་སྐལ་ལྡན་རིགས་ཀྱི་བུ༎གནས་འདིར་ས་འཆགས་བྱེད་པ་ལ༎ས་བདག་འཁྲུགས་པ་བཅོས་པ་དང་༎སྒྲོལ་མ་འབུམ་དང་བསམ་ལྷུན་འབུམ༎དཔུང་རྒྱན་དར་མང་བྲིས་ཏེ་ཕྱར༎གུ་རུ་སིངྔྷི་བྱད་བཟློག་དང་༎གཏོར་བཟློག་ཡང་ཡང་བསྐྱལ་བ་དང་༎ཕུར་པ་ལ་བརྟེན་ལོ་རེ་བཞིན༎བྱུར་སྲི་མནན་པ་བསྐྱར་བ་གལ༎མ་མོ་མཁའ་འགྲོའི་འཁྲུགས་བསྐང་དང་༎བཤགས་སྦྱང་ཆོ་གར་འབད་པ་གལ།།བྱང་ཕྱོགས་དགྲ་ཡི་འགྲིམ་རྒྱུད་འདྲ༎ལོ་བཞིན་ས་ཙྪ་ཅི་མང་གདབ༎དེ་ཡང་གཟུངས་བཅུད་ལྡན་པ་གནད༎དེ་ལྟར་འགྲུབ་ན་རེ་ཞིག་དགེ།ཞེས་ཟེར་ཡལ།ཡང་མཁའ་འགྲོ་ཡེ་ཤེས་དབང་ལྡན་མས༎སྨྲ་མདོ་བཀྲ་ཤིས་དགའ་འཁྲིལ་ན༎རེ་ཞིག་ཆོས་སྡེ་ཆགས་ནས་གདའ༎སྔར་གནས་སྒྱུ་མའི་ཟློས་གར་བཞིན༎གནས་འཕོ་བྱེད་པ་རྟེན་འབྲེལ་ལན།དེ་ལྟར་ཤེས་ནས་དོན་ལ་སོམས༎ཞེས་ཟེར་ཡལ་ལོ།   །

མུ་མཐུད་དུ་འགོད་རྩིས་ཡིན།

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔