ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༧

དགུང་ལོ༢༡

ཧོར་ཟླ་བཅུ་གཉིས་པའི་ཚེས་ལྔའི་ནུབ་མོ་རྨི་ལམ་ན་བུད་མེད་དམར་མོ་ཞིག་གིས་སང་ཉིན་མཐོང་བ་མངོན་སུམ་པ་ཞིག་འབྱུང་རྒྱུ་ཡིན། ཁྲོ་དང་ཐབ་ཆ་ལ་བཅག་གྲུམ་ཆེན་པོ་བྱེད་འོང་ཟེར་ནས་ཡལ་སོང་། སང་ཉིན་སྦྱིན་བདག་མགོན་བསྟན་གྱི་སྲིང་མོ་སྐྱ་རིས་མ་སླེབ་བྱུང་བ་དང་མཉམ་དུ་བྱིས་པ་ཐལ་སྐྱ་ཞིག་བྱུང་ནས་ལྷག་ལྷག་རྒོད་ཅིང་སྒྱེད་པུ་གསུམ་གྱི་མགོ་ཐོག་ཏུ་འཆམ་སྟབས་བྱེད་པ་མཐོང་ནས་བདག་གིས་སྦྱིན་བདག་མགོན་བསྟན་ལ་ཁྱེད་ཀྱི་ཐབ་ཆ་ལ་གཟབ་པར་རེམས་ཤིག ཐེའུ་རིང་ཞིག་གིས་སྒྱེད་མགོ་ན་རྩེ་བགད་བྱེད་འདུག་གི་སྨྲས་ཚེ་གཟབ་བྱེད་ངེས་སོ་ཟེར། དེ་ནས་ཁ་བཀལ་ཏེ་དེ་ཐོག་ཏུ་ཁྲོ་ཆེ་ཆུང་གསུམ་གཅིག་ནང་གཅིག་གི་ཚུལ་དུ་བཞག་སྟེ་ཆིངས་ཐག་ལེན་དུ་ཕྱིན་པ་ན་གཡག་གིས་གློ་མཆོང་ཞིག་བྱས་ནས་ཁྲོ་གསུམ་པོ་ཤོ་ལོ་བཞིན་དུ་རྡོ་ལ་བརྒྱབ་ནས་གཏོར་ཐལ།

དེ་ནས་བདག་ལོ་གྲངས་ཉེར་གཅིག་ལ་བབས་པའི་ཧོར་ཟླ་དང་པོའི་ཚེས་བཅུ་གསུམ་གྱི་ནུབ་མཁའ་འགྲོ་མ་སྔོན་མོ་དར་དཀར་གྱི་ཨང་རག་གསོལ་བ་རིན་པོ་ཆེའི་ཕྲེང་བ་མང་པོའི་རྒྱན་གྱིས་བརྒྱན་པ་ཞིག་བདག་གི་མདུན་སར་སླེབ་མ་ཐག་ཏུ་མཁའ་ལ་ཉི་མ་ཤར་བ་བཞིན་དུ་སྣང་བ་གསལ་ཞིང་ཡངས་པའི་ཡུལ་དུ་མེ་ཏོག་སེར་པོས་ས་གཞི་གང་བའི་འོད་ནམ་མཁའ་ལ་འཕགས་པ་ལ་བུད་མེད་རྒན་གཞོན་གྱི་ཚོགས་མང་པོས་གླུ་འདི་ལྟར་གྱེར་འདུག ཡེ་ཡེ།ངེད་མི་མེད་མཁའ་འགྲོའི་གླིང་ན༎ཁྱོ་མེད་ཞེ་རེ་རྨོངས་གི།སྲིད་པའི་སྡིག་གྲོགས་མི་མཁོ༎ཟག་མེད་བདེ་བ་སྟེར་བའི༎ཐབས་མཆོག་བདེ་ཆེན་རྒྱལ་པོ༎རྙེད་རྒྱུ་ཨེ་ཡོད་སྙམ་དང་༎རེ་བའི་རྡོས་ཐག་ཆད་ཐལ༎ཐབས་མཆོག་བདེ་ཆེན་དབང་པོར༎བདེ་སྟོང་སྙོམ་པར་ཞུགས་ན༎གཅེས་པའི་བུ་ཞིག་རྙེད་བསམ༎འཁོར་བའི་དཔྱངས་རྡོའི་བུ་ཚོ༎ཀུན་ལ་ཡོད་ཀྱང་དགོས་མེད༎ཤེས་རབ་རིག་པའི་བུ་མཆོག།སུ་ལ་མེད་པས་ཨི་རྙེད༎རྙེད་ན་ནམ་མཁའ་མཛོད་ཀྱི༎དགའ་སྟོན་ཆེན་པོ་ལོས་བྱེད༎ཅེས་ཡིད་འཕྲོག་པ་ཙམ་དུ་སྙན་པའི་གླུ་རིང་ལེན་ཞིང་།ཡང་མཁའ་འགྲོ་མ་དེའི་ངག་ནས་འདི་སྐད་གླུ་རིང་ལེན་འདུག་གོཡེ་ཡེ།དགའ་དགའ་མཁའ་འགྲོའི་གྲོང་ཁྱེར༎སྐྱིད་སྐྱིད་མཁའ་སྤྱོད་གླིང་ཡིན༎མེད་མེད་གཞན་ན་མེད་དང་༎ཡོད་ཡོད་རང་ལ་རྫོགས་ཡོད༎གོ་གོ་གཏིང་ནས་གོ་དགོས༎ཤེས་ཤེས་དོན་གྱིས་ཤེས་དགོས༎རྟོགས་རྟོགས་ངང་གིས་རྟོགས་དགོས༎རིག་རིག་མངོན་དུ་གྱུར་དགོས༎གྲོལ་གྲོལ་རང་སར་གྲོལ་དགོས༎མི་མིན་མཁའ་འགྲོའི་གླུ་འདི༎མ་འོངས་དུས་སུ་བརྡ་ཡིན༎མ་བརྗེད་རབ་ཏུ་མ་བརྗེད༎ཁྱབ་ཁྱབ་ཀུན་ཏུ་ཁྱབ་པ༎བརྡལ་བརྡལ་ཀུན་ཏུ་བརྡལ་བ༎དག་དག་ཀ་དག་མཁའ་ལས༎གྲོལ་གྲོལ་ཡེ་གྲོལ་མ་ང་༎གྲུབ་གྲུབ་ལྷུན་གྲུབ་སྒྱུ་མ༎རང་རང་གཟུགས་བརྙན་ངོ་མ༎དོན་དོན་ཁྱོད་ཀྱི་དོན་དུ༎བཤད་བཤད་ཚིག་བཤད་ཅིག་ཡོད༎ད་ནི་ཚིག་འདི་ཉོན་དང་༎དེང་དུས་དཔག་བསམ་ལྗོན་ཤིང་༎ཡལ་ག་ལོ་འདབས་ཕྲ་ཞིང་༎འབྲས་བུ་མེ་ཏོག་མ་སྨིན༎ཤིང་གཞན་ཞིག་དང་ནོར་བས༎སུ་ལ་མཁོ་དགོས་མེད་ཀྱང་༎ཤིང་ལ་སྐྱེ་འགགས་མི་འབྱུང་༎རྩལ་ལྡན་སེང་གེ་དཀར་མོ༎ཤར་གྱི་ཕྱོགས་སུ་མཆོངས་ཚེ༎སྡོང་ཟླ་སེང་ཆུང་ཟུང་དང་༎འཕྲད་ནས་རང་སྐད་ཐོན་ཚེ༎སྙན་པའི་དབྱངས་སུ་མངོན་ནས༎སྡེར་ཆགས་ཁྱུ་ཚོགས་འགུགས་སྲིད༎རབ་མཐོ་གངས་དཀར་རྩེ་རུ༎མ་བསྒྲོད་ངང་གིས་སླེབ་འོང་༎སྡེར་བཞི་གངས་ལ་བསྒྲད་ཅིང་༎སྤྱན་མིག་སྟེང་དུ་གཟིགས་པའི༎རྩལ་ཆེན་གྲོགས་བཟང་གཉིས་འཛོམས༎བྱ་བྲལ་བྲག་སྐྱིབས་འཛིན་ཅིང་༎ཕྲུ་གུ་གཟན་གྱིས་སྐྱོངས་ཏེ༎ནམ་མཁའ་དལ་གྱིས་འགྲོ་བའི༎ཐང་དཀར་བཅུ་ཕྲག་གཉིས་འབྱུང་༎རྒྱ་སྟག་ནགས་ཚལ་འཛིན་ཞིང་༎དཔལ་གྱིས་རྔམས་སྟབས་མིག་གིས༎ཡངས་བའི་ཡུལ་ལ་བལྟ་ཞིང་༎རོ་བརྒྱའི་ཟས་བཅུད་སྤྱོད་པའི༎རྩལ་ཆེན་བཅུ་ཕྲག་གསུམ་ཡོད༎གསུང་སྙན་ཁུ་བྱུག་སྔོན་མོ༎སྤང་ལྗོངས་གཟན་འཚོལ་བྱེད་ཅིང་།ལྗོན་ཤིང་རྩེ་རུ་ཕྱིན་ཏེ༎གསུང་སྙན་སྒྲོགས་པ་བཞི་འབྱུང་༎ནོར་བུ་ལག་ཏུ་ཐོགས་ནས༎རྒྱ་མཚོའི་གཏིང་ནས་རྩལ་རྫོགས༎ནམ་མཁའི་ཁམས་སུ་སླེབས་ཏེ༎ས་གསུམ་སྐད་ཀྱིས་འགེངས་པའི༎གཡུ་འབྲུག་སྔོན་མོ་བདུན་འབྱུང་༎དུག་ལ་ཁ་ཟས་བྱེད་ཅིང་༎མདངས་ལྔ་འོད་དུ་འབར་བའི།།རྨ་བྱ་མཛེས་ལྡན་བཅུ་དྲུག།ལུས་མེད་མཁའ་འགྲོའི་མཛའ་ཡིན༎སྲིད་པའི་འདམས་རྫབ་ཁྲོད་ནས༎ནོར་བུ་རིན་ཆེན་རྙེད་དེ༎བཀུར་བསྟི་ཆེན་པོ་བྱས་འབྲས༎དབུལ་ཕོངས་འབྱོར་རྒུད་སེལ་བའི༎ཕྱུག་པོ་ནོར་ལྡན་བརྒྱ་ཡོད༎གསེར་གྱི་རྡོ་རྗེ་རྩེ་དགུ༎ད་དུང་ཕྱར་བའི་དུས་མིན༎ལྷོ་ཕྱོགས་བདུད་ཀྱི་ཕོ་ཉས༎བདུད་ཀྱི་དཔུང་ཚོགས་བསགས་ཏེ༎ཡུལ་མང་མི་བདེའི་ལ་ཡོག།ལས་ཀ་དམག་འཁྲུག་གཡུལ་འགྱེད༎འཚུབ་མ་བཞིན་དུ་ལངས་ཚེ༎དུས་ལ་བབ་ལྟས་ངེས་པ༎ཁར་སང་ཁྱོད་ཀྱིས་བྲིས་པའི༎ཡི་གེ་གཞན་ལ་མ་སྟོན༎ཝ་དང་སྤྲེའུའི་ཁྲོད་དུ༎མི་ཡི་ཀི་སྒྲ་མ་སྒྲོགས༎ཀུན་གྱི་སྙིང་ལ་ཕོག་ནས༎རིང་བའི་ཡུལ་དུ་བྲོས་འགྲོ༎དེ་ལྟར་སེམས་ལ་ཞོག་དང་༎རིམ་གྱིས་མཐོ་སར་སླེབས་ཡོང་༎ལུས་མེད་མཁའ་འགྲོའི་གླིང་འདིར༎ཡུལ་མེད་ཟང་ཐལ་ཆེན་པོར༎མི་གནས་མི་འགགས་སྤྲོས་བྲལ༎རྨི་ལམ་བཞིན་དུ་སངས་འགྲོ༎ཞེས་ཟེར་ཞིང་སྒྱུ་མའི་འཁྲུལ་འཁོར་ལྟ་བུར་ཞིག་སོང་།ལོ་ཁྱིམ་དེ་ཡི་དབྱར་ཟླ་ཐ་ཆུང་གི་ཚེས་བཅུའི་ཉིན་པར་གསེར་གྱི་བྲག་ལུང་ཐང་གི་ཆུ་འགྲམ་ན་མེ་ཏོག་རབ་ཏུ་རྒྱས་པའི་ཚལ་ཞིག་ཏུ་ཕྱིན་ནས་སྡོད་འདུག་པའི་ཚེ་ཡིད་ལ་དགའ་བདེའི་ཉམས་ཤིག་ཤར་ནས་ཡོད་པའི་གནས་སྐབས་ཤིག་ན་སྦྲང་བུ་ཞིག་གིས་མེ་ཏོག་ལ་འཁོར་ཞིང་གླུ་འདི་ལེན་པའི་སྣང་བ་བྱུང་།བཾ་བཾ།སྤང་ལྗོངས་མེ་ཏོག་གི་ཚལ་དུ༎གསེར་གྱི་སྦྲང་ཆུང་ངས་སྐྱིད་པ༎སྐྱིད་ཀྱང་ངེས་རྟག་རང་མི་འདུག།སྟོན་གྱི་རྒྱལ་མོ་ཁོ་སླེབས་ཡོང་༎ནམ་ཕུག་ཐུབ་པར་ནི་མི་གནས༎འབུ་སྲིན་སྔ་མ་ནི་ཡལ་འགྲོ༎ཤ་སྦྲང་ནག་ཆུང་ཁོ་ལུས་ཀྱང་༎ནམ་ཕུག་ཐུབ་པ་ནི་མི་འདུག།སྔར་གྱི་མི་རྣམས་ནི་ཤི་སོང་།།དྭ་ཕྲུག་ཁ་དམར་ཁྱོད་ལུས་ཀྱང་༎ནམ་ཕུག་ཐུབ་པ་ནི་མི་འདུག།ཁྲི་སྡེའི་རྒྱལ་ས་ལ་འཁོད་ཀྱང་༎ཡུལ་གྱི་སྡུག་ཁུར་ཞིག་རེད་ན༎བླ་ཆེན་ཐོབ་ཐང་ཞིག་འབྱུང་ཡང་༎འཁོར་བའི་ཁ་དཔོན་ཞིག་རེད་ན༎ཕྱུག་པོ་ནོར་ལྡན་ཞིག་འབྱོར་ཡང་༎དཀའ་ཚེགས་བཟོད་མེད་ཅིག་རེད་ན༎གཙོ་བོ་ཁ་མཁས་ཤིག་འབྱུང་ཡང་༎དལ་མེད་རྣམ་གཡེང་ཞིག་རེད་ན༎སྤྲང་པོ་ནོར་མེད་ཅིག་འབྱུང་ཡང་༎བཀྲེས་སྐོམ་བཟོད་མེད་ཅིག་རེད་ན༎ཟླ་གྲོགས་བུད་མེད་ལ་བྱས་ན༎དགྲ་ཟླ་འཐབ་ཡ་ཞིག་རེད་ན༎གཅེས་སྤྲས་བུ་ཕྲུག་ལ་བྱས་ན༎ཇག་པ་ནོར་འཕྲོག་ཅིག་རེད་ན༎ཆོས་པ་བྱར་མེད་ཅིག་བྱུང་ན༎འདི་བདེ་ཕྱི་སྐྱིད་ཅིག་རེད་ན༎གསེར་སྦྲང་སེར་པོ་ངས་བལྟས་ན༎འདི་ལྟར་འཁོར་བ་ཡི་གྲོང་ཁྱེར༎མི་རྟག་རྨི་ལམ་དང་འདྲ་མཚུངས༎ང་ཡི་དགའ་གླུ་དང་རྨོངས་གླུ༎གྲོགས་པོ་ཁྱོད་ཉིད་ལ་གདམས་ཡོད༎ད་ནི་མཁའ་སྤྱོད་ལ་ཆས་འགྲོ༎ང་རྗེས་ཁྱོད་ཀྱིས་ཀྱང་སྙོགས་མཛོད༎ཅེས་ཟེར་ནས་རྒྱང་རིང་བོ་རུ་འཕུར་སོང་ངོ་།།ལོ་ཁྱིམ་དེ་ཡི་ཧོར་ཟླ་བདུན་པའི་ཚེས་བཅོ་བརྒྱད་ཀྱི་ནུབ་སྣང་བ་ཐམས་ཅད་མཁའ་སྤྱོད་བདེ་བ་ཆེན་པོའི་ཞིང་ཁམས་ཡིན་པར་སྐད་པའི་ཡུལ་ཕྱོགས་ཉམས་དགའ་བའི་ཚལ་དུ་མི་དཀར་པོ་མཛེས་སྡུག་བལྟ་བའི་ཆོག་མི་ཤེས་པ་ཞིག་གིས་ཤ་བ་ཕོ་ཆེན་ལ་ཞོན་ནས་ཡུ་མོ་དར་གྱི་རྒྱན་ཆ་ཅན་ཞིག་དང་བསྡེབ་ནས་དེར་སླེབས།དེ་ནས་བདག་ལ་འདི་སྐད་ཟེར་གྱིན།འུ་ཅག་བསྡེབ་ནས་རྒྱ་ནག་རི་བོ་དེ་ཤན་གྱི་རྩེ་རུ་ལྟད་མོ་ལ་ཨེ་འགྲོ་ཟེར་བ་ལ།བདག་གིས་འགྲོ་བྱས་པས་བྱིན་པ་ན་རི་བོ་གཅིག་ལ་རྩེ་མོ་ལྔ་ཡོད་པའི་དབུས་ཀྱི་རི་བོ་ཤིན་ཏུ་མཐོ་བའི་རྩེ་རུ་ཕྱིན་ཚེ་མི་དཀར་དེས་ན་རེ།ཁྱོད་ཀྱིས་སྟེང་དུ་ལྟོས་དང་ཟེར་བ་བཞིན་བལྟས་པས་སྟེང་ཕྱོགས་མེ་སྟག་དམར་པོའི་ཆར་པ་བབས་པ་ལྟར་འབྱུང་གྱིན།ཤར་དུ་ལྟོས་དང་ཟེར་བཞིན་བལྟས་པས་མི་ལྤགས་ཀྱི་གུར་ལ་རྒྱུ་མའི་ཆོན་ཐག་བྱས་པའི་གྲོང་ཁྱེར་ཐང་གཞི་ཐམས་ཅད་ཁྲག་གི་དམར་གྱི་ལེ་ཡོད་པ་ཞིག་མཐོང་།ལྷོ་རུ་ལྟོས་ཞེས་ཟེར་བཞིན་བལྟས་པས་རི་དཀར་པོ་དུང་གི་མདོག་ཅན་གྱི་རྩ་བ་ན་མཚོ་འོ་མ་ལྟར་དཀར་བའི་འགྲམ་ན་ངང་བ་ལ་སོགས་ཆུ་བྱ་སྣ་ཚོགས་འཚོགས་པ་མེ་ཏོག་དཀར་པོའི་པད་ཚལ་རྒྱས་པ་རྩེ་མོ་འཇའ་ཡི་ཁ་དོག་འོད་ལྔའི་ན་བུན་གྱིས་གཡོག་པ་ཞིག་སྣང་།ནུབ་ཏུ་ལྟོས་དང་ཟེར་བཞིན་བལྟས་པས་རྒྱ་བོད་མིའི་གྲོང་ཁྱེར་སྣ་ཚོགས་སྣང་ངོ་།བྱང་དུ་ལྟོས་དང་ཟེར་བཞིན་དེར་བལྟས་ཚེ་གཅན་གཟན་དང་དུག་སྦྲུལ་གྱི་ཚོགས་ལ་མི་སྐྲ་དང་སྨིན་མ་དམར་བ་སེར་བ་སྔོ་བ་ལྗང་པ་དཀར་བ་མང་པོས་ཤ་ཟས་སུ་སྦྱིན་ཅིང་ཁྲག་སྐོམ་དུ་བླུད་འདུག་པ་མཐོང་ངོ་།ལག་ཏུ་དུང་དཀར་ཞིག་གཏད་ནས་ཕྱོགས་བཞི་རུ་ཁ་ལྟོས་ལ་བུས་ཤིག་ཅེས་ཟེར་བཞིན་བདག་གིས་དུང་བུས་ཚེ་ཤར་དུ་རླུང་གི་འཚུབ་མ་ལངས་ནས་སྒྲ་མ་འབྱིན།ལྷོ་རུ་ཁ་བུས་དུང་ཁང་ནས་སྒྲ་མ་བྱིན།ནུབ་ཏུ་སྒྲ་ཆེན་པོ་གྲགས་ནས་གང་སོང་།བྱང་དུ་སྒྲ་གྲགས་ཀྱང་བྲག་རི་མཐོན་པོས་སྒྲ་ཡི་ལམ་བཅད་ནས་བྲག་ཆ་རུ་སོང་བས།བདག་གིས་གཞོན་ནུ་ལ་དེ་ཅིས་ཕྱིར་འདི་དོན་གང་ཡིན་པའི་ཚུལ་ཤོད་ཅིགཁྱེད་གཉིས་སུ་ཡིན་དྲིས་ཚེ་མི་ཕོ་དེ་གཉིས་ཀས་དབྱངས་གཅིག་གིས་འདི་སྐད་ཟེར།ཀྱཻ།ཉོན་དང་གཞོན་ནུ་རིག་པ་ཅན༎ང་ངོ་ཁྱོད་ཀྱིས་མ་ཤེས་ན༎ང་ལྷ་ཕྲུག་དུང་གི་ཟུར་ཕུད་ཡིན༎སྲིང་མོ་མི་མིན་ཟུ་ལེ་ཡིན༎སྟེང་ན་མེ་སྟག་འཕྲོ་བ་འདི༎མཁའ་འགྲོའི་རྡལ་སྤྲུག་བྱེད་པ་རེད༎སྲིད་པའི་བག་རྡལ་སྤྲུག་པར་གདའ༎ཞལ་རས་རི་རབ་ལ་གཟིགས་ནས༎དུས་ངན་རྒྱབ་ཏུ་འབོར་བ་རེད༎ཤར་གྱི་མི་སྡུག་གྲོང་ཁྱེར་འདི༎ཀླ་ཀློ་སྡིག་པའི་གྲོང་ཁྱེར་རེད།ལུང་བ་མེ་ལ་བསྲེག་པ་ནི༎ཐར་བའི་ཞིང་ས་བསྲེག་པ་རེད༎ལྷོ་ཕྱོགས་དུང་རི་དཀར་པོ་ནི༎རི་བོ་ཏ་ལ་བྱ་བ་རེད༎ལ་རྩར་བྱ་ཚོགས་འཚོགས་པ་ནི༎དཔའ་བོ་དཔའ་མོ་འདུ་བ་རེད༎མེ་ཏོག་པད་ཚལ་རྒྱས་པ་ནི༎ཚུལ་ཁྲིམས་གཙང་མའི་འཁྲུངས་ས་ཡིན༎ལ་མགོ་སྤྲིན་གྱིས་གཡོག་པ་ནི༎སྒྲིབ་པ་ཅན་གྱིས་མཐོང་མིན་རྟགས༎ནུབ་ཏུ་མི་ཡི་གྲོང་ཁྱེར་འདི༎ཁྱོད་དང་མཐུན་པའི་གདུལ་བྱ་ཡིན༎མུན་ནག་ཁྲོད་ཀྱི་གོས་སྔོན་ཅན༎རྒྱ་ཡུལ་མུན་པའི་གྲོང་ཁྱེར་རེད༎བྱང་གི་མི་རིགས་མི་འདྲ་བ༎བདུད་སྡེ་ཧ་ལའི་གྲོང་ཁྱེར་ཡིན༎མི་སྲུན་ཤ་ཟན་སྲོག་ཆགས་ལ༎ཤ་ཁྲག་ཟས་སྐོམ་སྦྱིན་པ་ནི༎མི་སྲུན་ལྷ་འདྲེས་བློ་བསྒྱུར་ནས༎མི་བློ་དབང་དུ་སྒྱུར་བ་རེད།།ཤར་གྱི་དུང་དཀར་རླུང་གིས་བཀག།ཆོས་སྒྲ་བདུད་ཀྱིས་བཀབ་པ་ཡིན༎ལྷོ་ཡི་དུང་སྒྲ་ཁ་བས་བཅད༎སྒྲིབ་གཉིས་བྲལ་བ་ཉུང་བའི་རྐྱེན༎ཐར་བ་ཐོབ་པ་དཀོན་པའི་བརྡའ༎ནུབ་ཏུ་དུང་སྐད་འབྱིན་པ་ནི༎ཁྱོད་ཀྱི་སྙན་གྲགས་རྒྱས་པའི་རྟགས༎ས་ཁུག་རེ་ལ་ཉི་འོད་རེ༎སྣང་བ་ཁྱོད་ཀྱི་གདུལ་བྱ་སྟེ༎བྱང་དུ་དུང་སྐད་ཆུང་གྲགས་པ༎རེ་ཞིག་ཀླ་ཀློའི་ཁ་གནོན་རྟགས༎ཁྱོད་ཀྱིས་གླུ་དེ་གོའམ་བུ༎བདག་གིས་གོ་གོ་ལེགས་སོ་སྨྲས༎ངེད་མིང་སྲིང་ནམ་མཁའི་དབྱིངས་སུ་འགྲོ༎མི་ཁྱོད་ཀྱང་སྲིད་པའི་ཡུལ་དུ་སོང་༎ཁྱོད་བདེ་ཆེན་པདྨ་བཀོད་ཞིང་དུ༎ངེད་མིང་སྲིང་བསུ་མར་སླེབས་ངེས་ཡིན༎ཞེས་ཟེར་བས་སྒྲས་གཉིད་སད་པའོ།    །

དགུང་ལོ༢༢ 

དེ་ནས་ལོ་གྲངས་ཉེར་གཉིས་ལ་བབས་ཚེ། ཧོར་ཟླ་བདུན་པའི་ནང་དུ་སྦྱིན་བདག་མགོན་བསྟན་ཚང་གི་རྒན་མོ་ཞིག་ནད་ཀྱིས་བཏབ་ནས་དེ་ལ་རིམ་གྲོར་སྨན་བླ་ཞིག་བཏོན་པ་དེའི་གྲལ་ལ་བདག་ཕྱིན་ཏེ་ཡོང་བའི་སྐབས་སུ་ཚེས་བཅོ་ལྔའི་ནུབ་མཁའ་འགྲོ་མ་མཛེས་སྡུག་བལྟ་བས་ཆོག་མི་ཤེས་པ་ཞིག་གིས་རིན་པོ་ཆེ་བཻཌཱུརྱ་ལས་གྲུབ་པའི་མེ་ལོང་ཞིག་གི་སྟེང་དུ་ཡུངས་དཀར་འབྲུ་བཅུ་གསུམ་བླུགས་ཏེ་བདག་ལ་སྟེར་ཞིང་འདི་སྐད་ཟེར།ཀྱཻ།བུ་ཁྱོད་ང་ལ་ཉོན་དང་༎མ་འོང་ལོ་གྲངས་བཅོ་ལྔའི༎དུས་ཚིགས་ཉིད་ལ་བབ་པ༎ནས་བཟུང་སློབ་མ་རིམ་བཞིན༎སྟོང་ཕྲག་མང་པོ་འཚོགས་ནས༎གཏན་བདེའི་ས་ལ་བགྲོད་དེ།།ཁྱད་པར་བུ་སློབ་མཆོག་གྱུར༎ངེས་མེད་རི་ཁྲོད་འགྲིམ་ཞིང་༎རལ་པའི་ལྕང་ལོ་འཆང་སྟེ༎རྣམ་འབྱོར་ཆས་སུ་ཞུགས་པ༎འཇའ་ལུས་སྒྱུ་མ་འགྲུབ་པའི༎སྒྱུ་མའི་རྣམ་འབྱོར་བཅུ་གསུམ༎དཔའ་བོ་ཁྱོད་ཀྱི་གྲོགས་ཡིན༎རྟེན་འབྲེལ་བརྡ་ཡི་ཡུངས་དཀར༎མཁའ་འགྲོའི་རིགས་སྔགས་བཏབ་པ༎མི་འབྲལ་རྟེན་དུ་ཟུངས་ཤིག།ཅེས་པ་དང་།རིགས་ཀྱི་བུ་ཡུངས་དཀར་འདི་རུམ་དུ་འཆོངས་དང་མ་འོངས་པའི་དུས་ཤིག་ན་ཁྱོད་ལ་ཚེ་གཅིག་རྡོ་རྗེ་འཆང་གི་གོ་འཕང་དུ་གཤེགས་པའི་སློབ་མ་རལ་བའི་ཐོར་ཚུག་ཅན་བཅུ་གསུམ་འབྱུང་ངེས་ཡིན།མེ་ལོང་འདི་སྙིང་ལ་འཆོངས་དང་ཁྱོད་རང་རྟོགས་པ་ནམ་མཁའ་དང་མཉམ་པར་འགྱུར་བ་ཡིན།ཞེས་ཟེར་ཞིང་བདག་གི་སྙིང་ཀར་ཐིམ་པས་བདེ་དང་སྟོང་པའི་ཉམས་ཤིག་ཤར།དེའི་ནངས་པར་བླ་མ་ཀླུ་ཕྱུག་ལ་དེ་ཚུལ་ཞུས་པ་དང་།བན་རྒན་བློ་ལྡན་ཟེར་བ་ཞིག་ཡོད་པ་དེ་ན་རེ།ཁྱོད་ལ་དེ་འདྲའི་སློབ་མ་ཞིག་འབྱུང་རྒྱུ་ཡོད་ན་མ་ཀའི་ཁྱི་རྒན་འདི་ལའང་སློབ་མ་ཞིག་ཅིས་མི་འབྱུང་ཟེར་བ་ལ།བླ་མས་དེ་འདྲ་ཟེར་མི་རུང་རྨི་ལྟས་ཤིན་ཏུ་བཟང་ལུགས་ལ་ཚོད་ཟིན་མི་འདུག་གསུངས་པ་ན་བན་རྒན་གྱིས་འོ་ཧོ་ཧོ་ཟེར་ཞིང་ཞེ་ཁྲེལ་གཏོང་འདུག་གོ།ཧོར་ཟླ་བཅུ་པའི་ཚེས་དགུའི་ནུབ་བུད་མེད་དམར་མོ་གཟུགས་བྱད་ཤིན་ཏུ་མཛེས་པ་ཞིག་བདག་གི་ཐད་དུ་ལྷག་ནས་འདི་སྐད་ཟེར།ཨེ་ཨཻ།ཤར་ནས་བྱུང་བའི་མགྲོན་པོ༎ཟུང་ཞིག་འདི་རུ་ལྷག་ཚེ༎མཚན་ལྡན་བླ་མའི་བཀའ་ཡིན༎ཤར་གྱི་ཕྱོགས་སུ་སླེབ་ན༎སྔོན་ནས་འདྲིས་པའི་མཛའ་གྲོགས༎འབྲལ་མེད་འབངས་སུ་འཁོར་ནས༎མཐུན་རྐྱེན་ལེགས་པའི་དཔལ་ཡོན༎ཚེས་གཅིག་ཟླ་བ་ཇི་བཞིན༎གོང་ནས་གོང་དུ་འཕེལ་འོང་༎ཐོབ་ནོར་ཟས་དང་ལོངས་སྤྱོད༎དང་པོ་མེད་མེད་འདྲ་ཡང་༎ཐ་མ་མཁོས་ཆུང་འདྲ་སྣང་༎སྒྲུབ་དང་བསྐྱེད་རིམ་གནད་རྣམས༎ཉི་མ་སྤྲིན་ལས་ཐོན་བཞིན༎སེམས་ཉིད་ཀློང་ལས་རྡོལ་ཚེ༎ཕྱོགས་མེད་འགྲོ་དོན་འབྱུང་ངེས༎ཉི་ཟླ་སྐར་ཆེན་ལྟ་བུའི༎བུ་ཆུང་འགའ་རེ་བྱུང་ནས༎བསྟན་པའི་མདངས་ཆེན་གསལ་འོང་༎སེམས་དང་བློ་དཔང་མ་ཞན༎སྔོན་ཚེ་བསོད་ནམས་བསགས་པའི༎འབྲས་བུ་དུས་སུ་སྨིན་ནས༎འོངས་སྤྱོད་མངའ་ཐང་འཕེལ་འོང་༎ཉམ་ཆུང་དབང་ཆེན་གྱུར་ཚེ༎རང་ཚོད་ཟིན་པ་གལ་ཆེ༎མི་ཕྱུགས་ལོངས་སྤྱོད་རྒྱས་ཚེ༎ཆོག་ཤེས་བསྟེན་པ་གལ་ཆེ༎བུ་སློབ་སྐལ་ལྡན་འཚོགས་ཚེ༎གདམས་ངག་སྟོན་པ་གལ་ཆེ༎མི་མིན་མཁའ་འགྲོའི་ཡུལ་ན༎བརྡ་དང་གླུ་རུ་གྱེར་ལས༎མི་གཏམ་ལབ་པ་མི་སྲིད༎ཁྱོད་ཉིད་ཤིན་ཏུ་བླུན་པས༎མི་ཡི་ཚིག་གིས་བརྡ་བཀྲོལ༎མ་བརྗེད་སེམས་ལ་ཞོག་དང་༎དོ་གལ་ཆེན་པོ་ཡོད་དོ༎ཞེས་དང་།སང་ཕོད་ཧོར་ཟླ་དྲུག་པའི་ནང་དུ་གྲོགས་བཟང་བོ་ཞིག་འབྱུང་།དེ་ཚེ་དེ་དང་ལྷན་གཅིག་ཏུ་ཤར་མགོ་ལོག་གི་ཡུལ་དུ་སོང་དང་གདུལ་བྱ་བཟང་བོ་ཞིག་དེ་ན་ཡོད་ཅེས་ཟེར་པའི་ལན་དུ།ཨ་ནེ་ང་དེར་སོང་ན་གདུལ་བྱར་ཇ་ཁོར་ཅི་ཙམ་ལོན་ཞེས་སྨྲས་པ་དང་།དེ་ན་རེ།གདུལ་བྱ་ནི་དེ་མ་ཡིན་བུ་སློབ་སྙིང་དང་འདྲ་བ་མང་པོ་འབྱུང་ཞིང་འགྲོ་དོན་རྒྱ་ཆེར་འགྲུབ་བོ་ཞེས་སྨྲས་པ་ཡིན།ཞེས་ཟེར་ཞིང་མི་སྣང་བར་ཡལ། 

དགུང་ལོ༢༣     

དེ་ནས་རང་ལོ་ཉེར་གསུམ་ལ་བབས་པའི་དབྱར་ཟླ་ཐ་ཆུང་གི་ནང་དུ། རྒིས་ལེ་དབང་ལི་ཞེས་བྱ་བ་དང་དེའི་ཚ་བོ་བློ་དར་གཉིས་མགོ་ལོག་ནས་གསེར་ཐལ་ཕྱོགས་སུ་ཚོང་བྱེད་དུ་འོང་བ་ལ་བླ་མ་གསང་སྔགས་བསྒྲུབ་མཆོག་གིས་བཅོལ་གཏམ་ལེགས་པར་བྱས།དེ་གཉིས་དང་འགྲོགས་ནས་ཤར་མགོ་ལོག་ཕྱོགས་སུ་སོང་ཚེ།སྨར་གྱི་གཞི་བདག་སྟག་གཡག་གི་འཕྲང་ཁར་སླེབ།དེར་བག་མ་ཡར་འགྲོ་ཞིག་དང་འཕྲད་ནས་དེའི་སྐྱེལ་མི་རྣམས་དང་བཅས་པ་རྟ་ལས་བབས་ཏེ་ཆང་ཕོར་དོ་རེ་བླུད་བྱུང་།བདག་གིས་བསམ་པ་ལ་གཞི་བདག་འདི་ཀའི་ཚལ་དུ་བཏུང་བ་འདི་འདྲ་བྱུང་བ་ནི་རྟེན་འབྲེལ་ཤིན་ཏུ་ལེགས་སོ་ཞེས་བསམ་ཞིང་དགའ་བ་སྐྱེས།དེའི་ནུབ་མོ་དེར་མཁའ་འགྲོ་མ་ཟུ་ལེ་སྨན་ཡིན་ཟེར་བའི་བུ་མོ་ཞིག་གིས།ཨ་ཧོ།དེ་རིང་བརྡ་དེ་ཨེ་གོ།བུ་མོ་གོས་རྒྱན་མཛེས་པ༎ཡར་བྱུང་མར་འགྲོ་འཕྲད་པ༎མཚན་ལྡན་རིག་མར་འཕྲད་ལྟས༎མཚན་ལྡན་རིག་མ་མེད་ན༎ཤེས་རབ་རྩ་ཁ་མི་འབྱེད༎དེ་མ་ཕྱེ་བའི་སྐྱོན་གྱིས༎དགོངས་པའི་ཀློང་མཛོད་མི་རྡོལ༎དེ་ཡི་ཡིག་རིས་མང་ཡང་༎རྒྱུད་དང་མི་མཐུན་སྐྱོན་འབྱུང་༎བདུད་རྩི་ཆང་འདྲེན་བྱུང་བ༎མ་དག་སྙིགས་མའི་སྣང་བ༎དྭངས་མ་ཉིད་དུ་འཕོས་པའི༎ལྟས་དང་རྟེན་འབྲེལ་ལེགས་བྱུང་༎ཟོ་དོར་སྟག་གཡག་བྱ་བ༎གཟའ་དང་གནོད་སྦྱིན་ཟུང་གིས༎བསྟན་པ་སྲུང་བའི་ལྟས་ཡིན༎ཡུལ་གྱིས་དམེ་གྲིབ་ཕོག་པས༎ཟླ་གཅིག་ཁམས་དུབ་འབྱུང་ཡང་༎རིམ་བཞིན་ཁྲི་གདུགས་ཉི་ཟླ༎སྤྲིན་ལས་ཐོན་བཞིན་ཡལ་འགྲོ༎ཞེས་ཟེར་མཐར།དེ་རིང་གཞི་བདག་གིས་ཆང་འདྲེན་བཏང་བ་དེ་རྟེན་འབྲེལ་གྱི་ཐོག་མ་ཡིན་ཤིན་ཏུ་ལེགས།དེ་ནི་ཁྱོད་མགོ་ནག་ལས་མངོན་པར་མཐོ་བའི་སྣེ་ཀ་ཟིན་པ་ཡིན་ཞེས་ཟེར་ཞིང་མི་སྣང་བར་ཡལ་སོང་།སྦྱིན་བདག་དབང་ལི་དེ་ལ་ཚ་བོ་ངག་དབང་རྒྱ་མཚོ་ཞེས་བྱ་བའི་བན་ཆུང་ཞིག་ཡོད་པ་དེ་ལ་རྡོ་རྗེ་ཁྲོ་ལོད་ཀྱི་སྒྲུབ་ཐབས་ཤིག་བསྟན་ནས་ལུང་བྱིན།དེ་ནས་སྐྱ་ཚེ་དོན་ཞེས་བྱ་བས་ཀློག་འདོན་ལ་འབོད་དུ་འོངས་ནས་དེར་སོང་ཚེ་ཟླ་བ་གཅིག་འདས་རྗེས་སུ་མཁའ་འགྲོ་གིང་ཆུང་མ་ཡིན་ཟེར་བའི་བུད་མེད་ཅིག་བདག་གི་ཐད་དུ་ལྷག་ནས།ཀྱཻ།ཨ་མའི་བུ་ཆུང་ཉོན་དང་།།གནས་ཚང་འདི་རུ་མ་འདུག།དཀོར་བདག་རྒྱལ་པོ་བེ་ནག།ཡུན་དུ་གཤེད་ལ་བབ་ཡོང་༎སྦྱིན་བདག་བློ་རྒྱ་ཆུང་བས༎ཀློག་ཡོན་ཆུང་ལ་ལྟོས་དང་༎སྦྱིན་བདག་རྒིས་ལེ་ཚང་ནི༎རེ་ཞིག་སྨོན་ལམ་སྟོབས་ཀྱིས༎འབྲེལ་བའི་གནས་ཚང་ཡིན་ཏེ༎ཤུད་བུ་དཔལ་གྱི་སེང་གེའི༎སྤྲུལ་བ་ངག་དབང་རྒྱ་མཚོ༎འབྲལ་མེད་གྲོགས་སུ་བསྟེན་མཛོད༎སྨར་མདོ་བཀྲ་ཤིས་འཁྱིལ་དེར༎སྔོན་གྱི་ལྷག་པའི་ལྷ་མཆོག།དཔལ་ཆེན་རྡོ་རྗེ་ཁྲོ་ལོད༎ཡི་དམ་མཆོག་ཏུ་ཟུངས་ཤིག།རྣམ་འབྱོར་དབང་ཕྱུག་མཆོག་འབྱུང་༎དེ་ལས་དབང་དང་ལུང་ནོད༎ཡང་ཅིག་དེ་ལས་མི་རིང་༎བསྙེན་ཚད་ལན་ལྔ་སོང་བའི༎རྣལ་འབྱོར་རྒན་པོ་ཞིག་དང་༎འཕྲད་ཚེ་སླར་ཡང་གོང་བཞིན༎དབང་ལུང་ཡོངས་རྫོགས་ཞུས་ལ༎རྟག་ཏུ་ཉམས་སུ་ལོངས་དང་༎ལོ་མང་འགྱང་པ་མིན་པར༎ལོ་གྲངས་འགའ་ཡི་རྗེས་སུ༎རྗེ་བཙུན་སྒྲོལ་བའི་མགོན་པོའི༎སྐུ་ཕྲེང་བདུན་གྱི་ཐ་མ༎སྤྲུལ་པའི་སྐུ་མཆོག་དམ་པ༎དང་འཕྲད་དེ་ཉིད་ལས་ཀྱང་༎དབང་ལུང་ཡོངས་རྫོགས་ལེན་མཛོད༎ཟླ་བ་བཅུ་བའི་ནང་དུ༎དམ་རྒྱས་ཟླ་སྒྲུབ་རེམ་མཛོད༎དངོས་གྲུབ་ཕྲན་བུ་ཐོབ་ཅིང་༎ཡེ་ཤེས་དབྱིངས་ཀྱི་མཁའ་འགྲོས༎བྷན་དྷས་བདུད་རྩི་སྟོབས་པ༎མཆོག་གི་དངོས་གྲུབ་རྟགས་ལགས༎ཨེ་གོ་མ་བརྗེད་ཟུངས་ཤིག།ཅེས་དང་།འདི་རུ་མ་འདུག་ཕར་སོང་།སྦྱིན་བདག་འདི་སང་གི་ཁྱོད་ལ་ལུག་ལྤགས་ཤིག་དང་མར་རྒྱ་མ་གསུམ་བཞི་ཙམ་ལས་འབུལ་བ་ནི་མི་སྟེར་ངེས་པ་རེད་ཟེར་ཞིང་མི་སྣང་བར་ཡལ་ལོ།།                   

དགུང་ལོ༢༤   

དེ་ནས་རང་ལོ་ཉེར་བཞི་ལ་བབས་ཚེ། དཔྱིད་ཟླ་ར་བའི་ཚེས་བཅུའི་ནུབ་འཕགས་མཆོག་ཐུགས་རྗེ་ཆེན་པོ་དང་ཞལ་མཇལ་ནས་ཞི་འདུས་དགོངས་པ་རང་གྲོལ་ཡིན་ཟེར་པའི་སྒྲུབ་ཐབས་དབང་ལུང་ཡོངས་སུ་རྫོགས་པ་གནང་ནས་བུ་ཁྱོད་ཀྱིས་འདི་ཡི་གེར་ཕབ་ནུས་ན་འགྲོ་དོན་འགའ་འབྱུང་སྲིད་པས་དེ་དོན་སེམས་ལ་ཞོག་ཅེས་ཟེར་ཞིང་ཡལ་ལོ།དེ་རྗེས་ཡི་གེར་བྲི་བར་བརྩོན་ཚེ་བརྡ་འགགས་ནས་ཕབ་མ་ནུས།ཡང་ལོ་ཁྱིམ་དེ་ཡི་དབྱར་ཟླ་ར་བའི་ཉེར་ལྔའི་ནུབ་མོ་རྒྱ་གར་གྱི་རིག་འཛིན་ཧཱུཾ་ཆེན་ཀ་ར་དང་ཞལ་མཇལ་བའི་ཚེ།ཕྱག་མཐིལ་ལས་བརྡ་ཡིག་འདི་ཀ་བསྟན་ཏེ།ཤྴལྨབྦཐྱབྠ།འདི་ཡི་གེར་ཕབ་ན་བསྟན་དགྲ་འདུལ་བའི་རྡོ་རྗེའི་ཐོག་མདའ་དང་འདྲ་བས་ན།བུ་ཁྱོད་ལ་གནོད་སྦྱིན་ཤན་པ་དམར་ནག་གི་རྒྱུད་འདི་མཁོ་སྟེ་སྦྱིན་ནོ་གསུངས་ཤིང་ཤན་པ་དམར་ལེན་ཞེས་པའི་རྒྱུད་ཀྱི་དབང་ལུང་ཡོངས་རྫོགས་གནང་ནས་མི་སྣང་བར་གྱུར་ཏོ།དེ་ཡང་ཡི་གེར་ཕབ་པ་ལ་བརྩོན་པའི་ཚེ་ན་ཧོར་ཁོག་ཕྱོགས་ནས་མགོ་ལོག་ཏུ་འོངས་པའི་རས་དཔོན་ཞེས་པའི་བླ་ཆུང་ཞིག་ཡོད་པ་དེས་འདི་ཡི་གཏེར་ཆོས་ཐམས་ཅད་ཆོས་ལོག་ངེས་པ་རེད་ཟེར་བས་རྟེན་འབྲེལ་འཆུག་པར་གྱུར།བདག་གིས་ཀྱང་དེ་ལ་ལོག་སྨོན་བཏབ་ཅིང་ཡི་གེ་མེ་ལ་བསྲེགཡང་ལོ་ཁྱིམ་དེ་ཡི་དགུན་ཟླ་ར་བའི་ཚེས་བཅོ་ལྔ་ལ་བབས་པའི་དུས་ན་གྲོགས་ངག་དབང་རྒྱ་མཚོ་དང་ལྷན་ཅིག་ཏུ་རྡོ་རྗེ་ཁྲོ་ལོད་ཀྱི་སྒྲུབ་པ་ལ་ཞུགས་ཚེ་དགུན་ཟླ་འབྲིང་པོའི་ཚེས་བཅུའི་ཉིན་མཁའ་འགྲོ་མ་དཀར་མོ་ཞིག་བདག་གི་ཐད་དུ་ལྷག་ནས་འདི་སྐད་ཟེར།ཨེ་མ།དཔའ་བོ་ཁྱོད་ཀྱི་མཐུན་གྲོགས་སུ༎གངས་སེང་ལྟ་བུ་ངག་གི་དབང་༎རྒྱ་སྟག་ལྟ་བུ་བཀྲ་ཤིས་པ༎རྡོ་རྗེའི་ལྷུམས་ཞུགས་དཔལ་ལྡན་པ༎ལེགས་ན་འགྲོ་མགོན་ཀི་ལི་པ༎ཉེས་ན་འཁོར་བའི་གཏིང་རྡོ་སྟེ༎འདི་དག་རིམ་པ་བཞིན་དུ་ནི༎སྨོན་ལམ་སྟོབས་ལས་ཁྱོད་འཁོར་དུ༎འབྱུང་སྟེ་བསྟན་ལ་ཕན་ཆེར་གདག།འདི་ནས་མི་ལོ་བཅོ་ལྔ་ཚུན༎རྗེ་འབངས་སྤྲུལ་པ་ཤ་སྟག་ལས༎ཕལ་གྱི་སེམས་ཅན་འབྱུང་མི་སྲིད༎འདི་དག་མ་བརྗེད་ཡིད་ལ་ཟུངས༎ཤར་ཕྱོགས་སྲིན་མོ་སྲོག་བདུད་མ༎བདུད་པོ་ལྷར་བརྫུ་བིརྱ་པ༎ཡང་ཅིག་ཐོས་ཆུང་ཤྲཱི་པ༎ལྷོ་རུ་དང་ཁྱོད་ལ་གཤེ་བསྐུར་བའི༎སྨོན་ལམ་ལོག་པ་བཅུ་བདུན་འབྱུང་༎དེ་ལ་བཟང་ངན་ཚིག་མ་བརྗོད༎གྱོད་དང་ཁ་མཆུའི་ལ་ཡོག་འདེབས༎དཀོར་ལ་རྐུ་བའི་བདུད་སྤྲུལ་ནི༎ཉེར་བརྒྱད་འབྱུང་སྟེ་བཀའི་སྲུང་མ༎དཔུང་དུ་ཁུར་དང་ཉེས་ཕུང་མེད༎མ་བརྗེད་སེམས་ལ་ཞོག་དང་བུ༎ཐོག་མཐའ་བར་གསུམ་ཀུན་ཏུ་དགེ།ཞེས་དང་།བུ་ཁྱོད་ཀྱི་སློབ་བུར་ཧོར་གྱི་བནྡེ་ཕུན་ཚོགས་བཀྲ་ཤིས་ཞེས་བྱ་བ་ཞིག་འདིར་འབྱུང་ཚེ་དེ་ཉིད་འབྲལ་མེད་དུ་ཡི་གེ་པར་བརྟེན་དང་འགྲོ་དོན་རྒྱ་ཆེན་པོ་འབྱུང་འོང་།ཞེས་ཟེར་ཞིང་མི་སྣང་བར་ཡལ་ལོ། དེའི་དགུན་ཟླ་ཐ་ཆུང་གི་ནང་དུ་ཧོར་གྱི་བནྡེ་དེ་ཉིད་བདག་གི་སར་བྱུང་ནས་ཉེ་གྲོགས་སུ་བརྟེན་ཏེ་ཡི་གེ་པ་རུ་བཀོལ།

མུ་མཐུད་དུ་འགོད་རྩིས་ཡིན།

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔