ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༩

དགུང་ལོ། ༢༩   

ཡང་དགུན་ཟླ་ར་བའི་ཚེས་བཅུའི་ཉིན་རྒྱལ་བ་ཚུལ་ཁྲིམས་ཞེས་བྱ་བས་ཀ་པ་ལ་མཚན་ཉིད་དང་ལྡན་པ་ཕུལ་ནས་བདུད་གཅོད་ཀྱི་གདམས་པ་ཉུང་བསྡུས་ཤིག་ཞུ་བ་ལ་དེ་ཕབས་ནས་ལུང་སྦྱིན། དགུན་ཟླ་འབྲིང་པོའི་ཚེས་གཅིག་ལ་འབྲོས་ཕུག་ཏུ་ཕྱིན་ཏེ་ཚེས་བཅུའི་ཉིན་པར་ནས་རང་གི་བུ་སློབ་གཉིས་དང་ལྷན་ཅིག་ཏུ་རང་ལོ་ཉེར་དགུའི་ལོ་ཁྱིམ་དེར་ཀློང་ཆེན་སྙིང་ཐིག་གི་རླུང་དང་གཏུམ་མོ་འཁྲུལ་འཁོར་རྣམས་ལོ་གཅིག་ཏུ་ཉམས་ལེན་བྱས་ཚེ་དྲོད་རྟགས་བུམ་ཅན་རིལ་བ་ཞབས་ཚག་ཅན་མཐོང་བའི་ཡུལ་དུ་གྱུར་པ་དང་དགུན་གྱི་དུས་སུ་ཡང་ལུས་ལ་མེ་དྲོད་འབར་ཞིང་རས་རྐྱང་ཐུབ་པ་ཙམ་དུ་བྱུང་།གཞན་ཡང་དུ་བ་ལྟ་བུའི་ཉམས་སྣང་དང་།སྨིག་རྒྱུ་ལྟ་བུའི་ཉམས་སྣང་དང་།རྒྱུ་སྐར་ལྟ་བུའི་ཉམས་སྣང་དང་།སྣང་པའི་འོད་གསལ་དང་།དཔེའི་འོད་གསལ་བསམ་གྱི་མི་ཁྱབ་པ་ལ་བརྟེན་ནས་རིག་པའི་ཡེ་ཤེས་སྐྱོན་བྲལ་ཕྱིན་ཅི་མ་ལོག་པ་རྒྱུད་ལ་སྐྱེས་སོ།     །དགུན་འབྲིང་བོའི་ཚེས་བཅོ་ལྔའི་ཉིན་ཕ་ཡུལ་དུ་ཕྱིན་ཏེ་ཟླ་བ་ཕྱི་མའི་ཚེས་གཅིག་ལ་བདུད་འདུལ་རྡོ་རྗེའི་གཏེར་བྱོན་རྡོ་རྗེ་ཁྲོ་ལོད་ཀྱི་སྒྲུབ་སྐོར་ལ་བརྟེན་ནས་སྒྲུབ་གྲོགས་མཁྱེན་རབ་དང་།ཀརྨ་དཀོན་མཆོགབླ་མ་བརྟན།རིག་མཆོག་ཅེས་བྱ་བ་རྣམས་དང་ལྷན་ཅིག་ཏུ་ཟླ་བ་གཉིས་ཀྱི་བར་དུ་བསྒྲུབ་པ་བྱས་ཚེ།བནྡེ་མཁྱེན་རབ་བྱ་བ་དེ་ཉིད་རྒྱལ་འགོང་གདུག་པ་ཅན་ཞིག་གི་ནད་ཀྱིས་བཏབ་འདུག་པ་ལ་རྒྱལ་བསེན་དམ་ལ་བཏགས་པས་ནད་ལས་གྲོལ་བའི་ཚུལ་ནི་བསྒྲུབ་པ་ལ་ཞུགས་ནས་ཞག་བདུན་གྱི་རྨི་ལམ་ན་བུད་མེད་གསུམ་སྒོ་རྩར་སླེབ་ཚེ་བདག་གིས་མེ་ཡི་ཏིང་ངེ་འཛིན་བསྒོམ་པས་ཨ་ཚ་ཚ་ཞེས་སྐད་ཆེར་བཏོན་ནས་བྲོས་སོང་།དེ་ནས་ཞག་ཉེར་གཅིག་གི་ནུབ་བྱི་ལ་དམར་པོ་ཞིག་སྒྲུབ་ཁང་དུ་བྱུང་ནས་འོང་ཚེ་དབྱུག་པས་བསྣུན་པས་དེ་རྒྱལ་པོའི་ཆོ་འཕྲུལ་ཡིན་པས་བདག་གི་ལག་གཡས་ཁར་བཅུག་ཅིང་སྤར་མོས་བཏབ་འདུག་ཚེ་བྲེད་ཅིང་བསྔངས་ཏེ་རྡོ་རྗེ་ཁྲོ་ལོད་ཀྱི་བསྐྱེད་རིམ་དྲན་པར་བྱས་ཏེ་ལག་པ་གཡོན་པས་ཁོས་སྐེ་ནས་ཙིར་གྱིས་བསྡམས།དམ་དུ་གཅུར་བའི་མོད་ལ་བན་དེ་གོས་ཧྲུལ་གྱོན་པ་ཞིག་ཏུ་གྱུར་ཏེ།ཁོ་ན་རེ།ཨ་ཧ་བོ་ངའི་སྐེ་མ་སྡོམས་དང་ཚིག་བཤད་པ་ཡག་པོ་ཡོད་ཟེར་བ་ལ།སྐད་ཆའི་དགོས་མེད་ཁས་ལོངས་ཅེས་སྨྲས་པས།ཁོ་ན་རེ།ཁས་ཅི་ལེན་དགོས་ཤོད་ཅེས་ཟེར་བ་ལ།ཕྱིན་ཆད་གནོད་པ་མི་བྱེད་པ་ཁས་ལོངས་ཞེས་སྨྲས་པ་དང་།ཁོ་ན་རེ་ཁྱོད་དང་ཁྱོད་ཀྱི་འཁོར་འདི་ལ་གནོད་པ་བྱེད་རེ་ན་ར་ཀན།བནྡེ་མཁྱེན་རབ་ཅེས་བྱ་བ་འདི་ལ་ཚིག་གསུམ་བཤད་དུ་མ་བཅུག་པར་དུ་མི་གཏོང་སྟེ་དེ་ནས་མི་གཏང་རེ་ན་ར་ཀན་ཞེས་ཁས་བླང་།དེ་ནས་མགོ་ལ་ལག་པ་བཞག་ཁ་ལ་དམ་ཆུ་བླུད་ནས་དམ་ལ་བཞགམཐར་སྒྲུབ་པ་ཐོན་ནས་ཞག་གསུམ་གྱི་ཉིན་རྒྱལ་པོ་བན་དེ་དེའི་ཁོག་ཏུ་ཞུགས་ནས་ཚུལ་དེ་དག་ཞིབ་ཏུ་སྨྲ་ཞིང་གཞན་ཡང་གཏམ་མང་པོ་བཤད་ནས་གནོད་པ་ཐམས་ཅད་ཡུལ་མེད་དུ་ཡལ་སོང་། དེ་ནས་ཡི་དམ་ལ་ཚོགས་བསྐང་སྟོང་ཕྲག་གཉིས་གྲངས་སུ་ལོངས་པར་བྱས་ནས་དངོས་གྲུབ་ལེན་ཁར་འཇའ་ཚོན་དཀར་པོ་ཞིག་གནས་ཁང་སྟེང་དུ་ཟུག་སྟེ་མེ་ཏོག་གི་རྣམ་པའི་ཁ་བ་ཟིམ་བུར་བབ་པ་སོགས་ལྟས་བཟང་ཤིན་ཏུ་ལེགས་པོ་བྱུང་།

དགུང་ལོ།༣༠

   དེ་ནས་རང་ལོ་སུམ་ཅུ་ལ་བབས་ཚེ། སླར་ཡང་འབྲོས་ཕུག་ཏུ་ཕར་ཕྱིན་ནས་སྡོད་པའི་ཚེ་ན།དབྱར་ཟླ་ར་བའི་ཚེས་བཅོ་བརྒྱད་ཀྱི་ནུབ་མཁའ་འགྲོ་མ་ལུས་ཀྱི་མགོ་མཇུག་ཐམས་ཅད་ཀྱི་གཡས་ཕྱོགས་སྔོ་སང་ངེར་ཡོད་པ་གཡོན་ཕྱོགས་དམར་བ།བར་སེར་ཤར་རེ་བ།གསེར་སྐུད་སེར་པོ་དང་ཟངས་སྐུད་དམར་པོ་དང་ལྕགས་སྐུད་ནག་པོ་གསུམ་གྱིས་སྐ་རགས་བཅིངས་པ།དར་ཚོན་སྣ་ལྔའི་ཤམས་ཐབས་གྱོན་པ་ཞིག་བདག་གི་ཐད་དུ་བྱུང་ནས་འདི་སྐད་ཅེས།བུ་ཁྱོད་ལ་གྲུབ་པའི་རྟགས་དང་མཚན་མ་ཡོད་དམ་མེད་ཡོད་ཚད་ང་ལ་སྨོས་ཤིག་ཟེར།དེའི་ལན་དུ།ཁྱོད་སུ་ཡིན།ང་ལ་ཨོ་རྒྱན་ཆེན་པོས་གྲུབ་རྟགས་དང་རྫུ་འཕྲུལ་སུ་ལའང་བཤད་མི་རུང་རེ་ཞིག་སྦས་པའི་རྣལ་འབྱོར་པ་ཞིག་བྱུང་ན་སྒྲུབ་པ་ལ་བར་ཆད་མེད་ཅིང་ཆོས་བརྒྱད་ཀྱི་དབང་དུ་མི་འགྲོ་བའི་གནད་ཡོད་ཅེས་གསུངས་པས་བཤད་མི་ཉན་སྨྲས་ཚེ།མོ་ན་རེ།ང་ནི་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞིའི་གསང་མཛོད་ཀྱི་བདག་མོ་ཀློང་ཡངས་སྨན་ཞེས་ཟེར་བ་དེ་ཡིན།མི་ལ་ངོམ་མ་སྔ་ན་ང་མི་མིན་མཁའ་འགྲོ་ལ་བཤད་པས་ནི་སྐྱོན་མེད་པས་སྨོས་དང་ཟེར་བ་ལ།བདག་གིས་ཀྱང་དེ་བདེན་ནོ་སྙམ་དུ་འདི་སྐད་སྨྲས།ཨ་ཀྱང་ལགས་སོ།ང་རང་ལོ་བཅུ་དྲུག་ལ་བབས་དུས་སྦྱིན་བདག་མགོན་བརྟན་ཚང་ལ་ཀློག་འདོན་དུ་ཕྱིན་པ་དང་།དེ་ན་རེ།སྔར་ངེད་ཀྱི་དབྱར་ས་དེ་སེ་རའི་གཤོག་ལྟེབས་ཡིན་པ་ལ།ལོ་གཅིག་ལ་ངེད་ཆུ་མིག་གི་མར་ངོས་སུ་འདུགདོན་གྲུབ་ཚང་ཡར་ངོས་སུ་འདུག་ཚེ་ཆུ་མིག་དེ་ཉིད་སྐམ་སོང་།དེ་ནས་བཟུང་ལོ་ལྔ་ཚུན་ཆད་ལ་ཆུ་མི་འདུག་པས་དེ་རུ་འདུག་རྒྱུ་མ་བྱུང་བས་གྱོང་ཆེ་ཡང་བྱ་ཐབས་བྲལ།ད་རེབ་ཁྱོད་བན་རྒོད་གཞན་དང་མི་འདྲ་བའི་མངོན་ཤེས་ཅན་ཞིག་ཡིན་འདུག་པས་ན་འདི་རུ་ཆུ་རྡོལ་ཐབས་ཤིག་བྱུང་ན་གྲུབ་རྟགས་ངེས་པ་ཡིན་ཟེར་བ་ལ།བདག་གིས་འདོད་དོན་ཨེ་འགྲུབ་རྨི་ལམ་བརྟགས་དགོས་བསམ་ནས་ཆུ་མིག་དེ་ཡིད་ལ་བཏགས་བཞིན་གཉིད་དུ་སོང་བའི་རྨི་ལམ་ན་ཁང་རལ་ཞིག་གི་ནང་དུ་སྦྲུལ་ནག་པོ་སྐེད་པ་མན་ཆད་སྐམ་ནས་ཉམ་ཐག་པ་ཞིག་ཉ་དང་སྦལ་བ་རྐང་ལག་སྐམ་པ་ཕྱི་དབུགས་དང་བྲལ་ཞིང་ནང་དབུགས་མ་ཆད་ཙམ་པ་མང་པོས་བསྐོར་ནས་ཡོད་པའི་སར་སླེབ་འདུག་ཚེ།བདག་གིས་ཉམ་ཐག་པའི་སེམས་ཅན་འདི་རྣམས་སྙིང་རེ་རྗེ་འདི་ཅིའི་ལན་ཡིན་སྙམ་པའི་གནས་སྐབས་སུ་སྦྲུལ་དེ་ཉིད་ཀྱིས་ན་རེ།ང་ནི་ཀླུ་ཡི་བུ་མོ་ནོར་འཛིན་མ་ཞེས་བྱ་བ་ཡིན།དེ་དུས་བདག་གི་གནས་ཁང་གསེར་མཁར་གཡུ་ཡི་ཁ་བད་ཅན་ཞིག་ཡིན་ཏེ་བདག་ཀྱང་སྟོབས་རྩལ་དང་ལྡན་ཞིང་ལོངས་སྤྱོད་ཀྱི་དཔལ་དང་ལྡན་པ་ཞིག་ཡིན་ཀྱང་།ཆུ་མིག་འདིའི་ནང་དུ་བུད་མེད་མང་པོས་རྐང་ལག་བཀྲུས་པའི་ཁུ་བ་སོང་བས་བདག་གི་སྟོབས་རྩལ་ཐམས་ཅད་ཉམས་ལོངས་སྤྱོད་ཀྱང་དབུལ།མཁར་ཁྱིམ་ཞིག་ནས་ཉི་ཚན་དང་བྱེ་ཚན་གྱིས་འཇིགས་པས་ཤིན་ཏུ་སྡུག་བསྔལ་ཞིང་ཉམས་ཐག་པ་ཡིན་ཅེས་ཟེར།ཡང་དེ་ན་རེ།གྲུབ་པ་ཐོབ་པའི་གང་ཟག་ཞིག་གིས་ཆུ་སྦྱིན་བཏང་ན་ནི་ཕན་ལོས་ཐོག་དང་ངའི་སྡུག་བསྔལ་མཐོང་བའི་སྐྱེས་བུ་མི་འོང་ད་ཅི་བཟོ་ཟེར།བདག་གིས་ཚུལ་དེ་སྦྱིན་བདག་དེ་ལ་བཤད་ཚེ།ཁོས་ཀྱང་ཁྱེད་མ་འཆུག་དང་ཕན་ཐོགས་ངེས་པ་རེད་ཟེར་འདུག་པས།བདག་ཆུ་མིག་ཡོད་སར་སླེབས་ནས་ཆུ་སྦྱིན་མང་དུ་བཏང་ཚེ་འཕགས་པ་ཐུགས་རྗེ་ཆེན་པོ་མདུན་གྱི་ནམ་མཁར་བསྒོམ་ནས་དེ་ཡི་སྐུ་ལས་བདུད་རྩིའི་ཆུ་རྒྱུན་བབས་པས་ན་བ་སོས།ཤི་བ་གསོན།མཁར་ཁྱིམ་དང་ལོངས་སྤྱོད་སྔར་ལས་ཀྱང་དགུ་འགྱུར་གྱིས་ལྷག་པ་ཞིག་ཏུ་གྱུར་པར་བསམ་ཞིང་ཆུ་སྦྱིན་འབུམ་ཕྲག་གྲངས་སུ་ལོང་ཁར་བུ་མོ་མཛེས་མ་ཞིག་མངོན་སུམ་དུ་བྱུང་ནས་ང་རང་ལ་ཕྱག་འཚལ་ཏེ་ཁྱོད་བདག་ཅག་ལ་དྲིན་ཆེན་གྱི་གྲུབ་ཐོབ་དམ་པ་ཡིན།ངེད་ཅག་ལ་ཉེས་པ་བྱེད་པའི་བུད་མེད་རྣམས་ལ་གནོད་ལན་ཐེབས་ངེས་ཤིག་མི་བྱེད་རེ་ཟེར་བ་ལ།ངས་དེ་དག་མ་གསོད་མ་མནར་རེམ་ཞིག་ཅེས་སྨྲས་པའི་ལན་དུ།བུ་མོ་དེས་ངེད་ཤི་བ་ཐམས་ཅད་གསོན།ན་བ་སོས་ལོངས་སྤྱོད་ཀྱི་དཔལ་ཀྱང་སྔར་ལས་ལྷག་པར་འཕེལ།མཁར་ཁྱིམ་ཀྱང་ཤིན་ཏུ་བཟང་པོར་གྱུར་གྱི།ཁྱོད་ལ་དྲིན་ལན་དུ་ཀླུ་ཡི་ཕྱུགས་བྱིན་ན་འབུ་སྲིན་དང་།ནོར་སྦྱིན་ཀྱང་རྡོ་དང་ཤིང་ལ་སོགས་པར་འགྱུར་བས་གསེར་གྱི་བྲག་ལུང་ནང་དུ་ཀླུ་མོ་གསེར་མདངས་མ་ལ་དུག་སྦྲུལ་གྱི་སྒོ་ང་ཞིག་ཡོད་པ་དེ་ཕུལ་བ་ཡིན།ཉར་ཚག་དམ་དུ་བྱོས་ལ་གཙང་སྦྲ་ལེགས་པར་བྱས་ན་ཆགས་གྲུམ་སོང་ཚེ་ལོངས་སྤྱོད་ཕུན་སུམ་ཚོགས་པས་ཕྱུག་པར་འགྱུར།ཉིད་ཀྱི་བཀའ་དང་འགལ་བར་མི་བགྱིད་མི་སྲོག་དང་མི་ལ་མི་འབབ།ཅེས་ཟེར་གྱིན་ནམ་མཁའ་ལ་སོང་བའི་མོད་ལ་སྤྲིན་ནག་པོ་དུམ་བུ་ཞིག་ཆད་དེ་དེ་ཉིད་ཇེ་ཆེར་སོང་བའི་ཚུལ་སྦྱིན་བདག་དེ་ལ་སྨྲས་པ་དང་།དེ་ན་རེ།ཁྱོད་ཀྱིས་འབུམ་ཞལ་ཕྱེ་ཞིག་མ་བྱས་ན་ཕོག་ཐུག་བཏང་ས་ངེད་ལོས་ཡིན་ཟེར་བ་བཞིན་ངས་ཀྱང་དེ་ལྟར་བྱས་མོད།ཡུན་ཅིག་གི་ཚེ་སེར་རླུང་དྲག་པོ་བབས་པ་དང་ཆབས་ཅིག་ཐོག་ཕབ་པས་འབྲི་མ་བུ་ལྔ་བསད་ཆུ་ཤུལ་ཆེན་པོ་རྡོལ་བྱུང་།དེ་གྲུབ་རྟགས་ཡིན་ནམ་ཨེ་རེད།ཡང་སྦྱིན་བདག་དེ་ཚང་གི་མཛོ་མོ་ཞིག་ཤི་འདུག་པ་ལ།ངས་བདེན་པ་བརྡར་ནས་ཀླུ་མོ་དེ་ལ་དམ་བསྒྲགས་པས་ཡར་ལངས་ཏེ་སོང་བ་དང་།ཡང་མགོན་བརྟན་ཚང་གི་ཁྱིམ་ནས་ཏེ་ལོ་ཞིག་ལྷག་ལྷག་དགོད་འདུག་པས་རྟ་དང་གནག་ལུག་ཐམས་ཅད་འགྲོག་སོང་ཚེ་ངས་བདེན་པ་བརྡར་ཞིང་དམ་བསྒྲགས་པའི་མོད་ལ་གཟུགས་མི་མཐོང་ཞིང་སྐད་ཚོར་བ་ཞིག་གིས་དེ་ལྟར་མ་ཟེར་ཅིགརྟ་ནོར་ཉེར་གཅིག་བླང་ཡང་ལྔ་ཙམ་མ་གཏོགས་ཁྱོད་ཀྱི་ངོ་སྐལ་དུ་སྟེར་ཟེར་བ་གཟའ་མི་ཀུན་གྱིས་ཐོས་པ་དེ་ཚོ་གྲུབ་རྟགས་ཡིན་ནམ།ན་ནིང་ངས་ཀཿཐོག་ཕྱག་ཚ་སྤྲུལ་སྐུའི་མདུན་ནས་རིག་འཛིན་བདུད་འདུལ་རྡོ་རྗེའི་གཏེར་བྱོན་ཆོས་སྐོར་གྱི་དབང་ལུང་རྣམས་ཞུས་ཚེ་ཉིན་གཅིག་ཚོགས་གྲལ་ལ་ཡོད་པའི་སྐབས་སུ།བུ་མོ་ཞིག་གིས་འདིར་མ་འདུག་པར་སོངས་ཤིག་ཅེས་ཟེར་བ་དང་།བདག་ཁྲོས་པའི་ཚུལ་གྱིས་དེ་མ་ཐག་ཏུ་ཧོར་ཚང་གི་བླ་མ་ཞིག་རྒྱལ་པོར་གྱུར་སོང་བའི་རྒྱལ་ཁང་ནང་དུ་འདུག་གནས་བཅས་ཡོད་པ་དེ་རུ་སོང་བ་དང་ལྡེ་མིག་གྲོགས་པོའི་ལག་ཏུ་ཡོད་པས་སྒོ་ཕྱེ་མ་ནུས་པར་སྒོ་དྲུང་ནས་ཕར་འདོམ་པ་གསུམ་ཙམ་སོང་ནས་བསམ་མནོ་མ་བཏང་བར་བརྒྱུག་པས་ཁང་བ་ཟང་ཐལ་དུ་ཕུག་ནས་ནང་དུ་ཕྱིན་པ་དེ་ཚོ་གྲུབ་རྟགས་ཡིན་ནམ།ཁང་བ་དེ་ཡི་ནང་དུ་སོང་མ་ཐག་པ་ནས་རྒྱལ་པོ་དེའི་ཆོ་འཕྲུལ་བན་རྒན་ཞིག་གི་བདག་གི་རྒྱབ་ལོག་ནས་རྐང་ལག་བཞིའི་བསྡམས་ནས་ཁྱོད་ལ་ད་སྟོབས་ཅི་འདྲ་ཡོད།ང་རང་གི་སྟོབས་འདི་ཡིན་ཁྱོད་ངས་ཐུབ་པ་ཡིན་ཟེར་བས་བདག་བྲེད་ཅིང་སྐྲག་སྔངས་སྐྱེས་པའི་མོད་ལ་རང་ལུས་གུ་རུ་དྲག་པོ་གཏུམ་དྲག་དམར་ནག་ཞིག་ཏུ་བསྒོམ་ཞིང་མེ་དཔུང་འབར་བའི་དམིགས་པ་གསལ་ཚེ།ཁོས་ཨ་ཚ་ཚ་ཟེར་ནས་ས་ཐོག་ཏུ་བབས་པ་ན་ཁོ་རང་གི་རྐང་པ་གཡས་པ་ནས་བཟུང་སྟེ་གླད་ལ་ལན་གསུམ་བསྐོར་ཞིང་ས་ལ་བརྡབས་པས་ཁོ་རི་བོང་གི་རིལ་མ་ཞིག་ཏུ་གྱུར་བ་ཁུག་མའི་ནང་དུ་བཅུག་སྟེ་ཁ་བསྡམས་ཤིང་མལ་འོག་ཏུ་སྦས་ནས་བཞགཞག་ཉེར་གཅིག་འདས་པའི་རྗེས་སུ་བན་རྒན་དེས་ང་ཐོངས་དང་ཁྱོད་ཀྱི་འཁོར་འབངས་འདིར་གནོད་པ་བྱེད་རེ་དྲི་མེད་ཞིང་སྐྱོང་མགོན་པོ་དཔང་ཟེར་བ་ལ།བདག་གིས་དམ་ཉམས་མནའ་ཟའམ་སྨྲས་པ་དང་།ཨ་ཁ་ཁ་གནོད་པ་བྱེད་རེ་ན་ར་ཀན།ཞེས་ཟེར་བས་ཁོ་ཕྱིར་བཏོན་ཏེ་བཏང་བ་ན་ཤིན་ཏུ་ཉམས་པར་གྱུར་ཅིང་།ཁང་འོག་ཏུ་ཡོད་པའི་སྐྱ་ཀ་བླ་མ་མིང་སྲིང་དང་སྟག་མཚལ་བླ་མ་རྣམས་ལ་ནི་ཅི་ཐུབ་ཞིག་མི་བྱེད་རེ་ཟེར་ནས་འགྲོ་གྲབ་བྱེད་ཚེ།བདག་གིས་ཁྱོད་གར་འགྲོ་དྲིས་པ་དང་ཁོ་བོ་ལྷོ་བཱ་ཨོ་རྒྱན་རྒྱ་མཚོའི་སར་འགྲོ་ཟེར་ནས་སོང་ངོ།ཞག་ཉེར་གཅིག་པོ་དེའི་རིང་ལ་བླ་མའི་སྙུན་དྲག་ནས་ཡོད་པ་ལ་དེའི་ནུབ་མོ་རྒྱལ་པོ་དེས་ང་ནི་ཞག་གྲངས་ཉེར་གཅིག་གི་བར་དུ་བན་རྒོད་མི་སྲུན་པ་ཞིག་གིས་བཙོན་དུ་བཟུང་ནས་བཀྲེས་སྐོམ་གྱིས་གདུངས་ཏེ་སྡུག་བསྔལ་མྱོང་མྱོང་མཐར་ད་འདིར་སླེབ་པ་ཡིན་ཟེར་བ་རྨིས་ཤིང་།ཕྱིར་ཉིན་སྔ་མོ་ནད་ཀྱང་ཇེ་ཐུར་སོང་ནས་གྲོལ་སོང་།དེ་ཡང་གྲུབ་རྟགས་ཡིན་ནམ་ཞེས་དྲིས།དེ་ནས་སྟག་མཚལ་བླ་མ་དང་སྐྱ་ཀ་མིང་སྲིང་ལ་ཅི་བྱུང་ཟེར།སྐྱ་ཀའི་སྲིང་མོ་ཡང་དེའི་ཉིན་ཕྱི་མར་སྨྱོས་སོང་།བླ་མ་ལ་ཁྱོད་ཁྲོམ་འཚོགས་ནས་ཚོགས་འཁོར་འདོན་ཚེ་ལྐོག་ཏུ་བྲོས་ཏེ་སོང་ལ་ཟླ་བ་གཅིག་གི་བར་དུ་ཕུར་པའི་མཚམས་ལ་སྡོད་ཅེས་སྨྲས་ཀྱང་ང་རང་གི་ངག་བཞིན་མ་བསྒྲུབ་པར་ཚོགས་གྱེས་པའི་རྗེས་སུ་སོང་བ་ན་ཟླ་བ་ཕྱི་མའི་ནང་དུ་ཤི་ཐལ།སྟག་མཚལ་བླ་མ་ལ་ཁྱོད་ཀྱིས་ཟོས་ལྷག་འཐུང་ལྷག་ཐམས་ཅད་ཀྱིས་གསུར་ཆེན་ཞིག་ཐོང་ལ་ཧོར་བླ་འདྲེའི་མིང་ནས་ལན་གསུམ་བོས་ལ་མིའི་མ་ཚོར་བར་ལྐོག་བུད་བྱས་ཏེ་སོང་ན་སྐྱོན་མེད་མ་གཏོགས་དེ་ལྟར་མ་བྱས་ན་གྲི་རུ་འཆི་ངེས་རེད་སྨྲས་ཀྱང་།ཁོ་བོའི་ངག་བཞིན་མ་ཉན་པར་རང་ཁྱིམ་དུ་ཕྱིན་ཏེ་ཞག་གསུམ་གྱིས་འཕྲོར་གཡག་ལ་ཞོན་ནས་སྨར་མཐའ་མའི་ནང་ཞིག་ཏུ་སོང་བ་ན་གཡག་འགྲོག་ནས་དེར་བསད་དོ།ཞེས་ཞུས་པའི་ཚེ་ན།མོ་ན་རེ།མངོན་ཤེས་དང་རྫུ་འཕྲུལ་དེ་ལས་ལྷག་མི་དགོས་པས་གཞན་ལ་གསང་རྒྱ་དམ་དུ་བྱས་ནས་སྦས་པའི་རྣལ་འབྱོར་ཞིག་བྱུང་ན་ཚེ་ལ་བར་ཆད་མེད་ཅིང་ཆོས་ལ་གེགས་རྐྱེན་མི་འབྱུང་བའི་གནད་ཡོད་དོ།ད་ཁྱོད་ཀྱི་གསང་ཚིག་རྣམས་སྨྲས་ཟིན།ང་ཡིས་ལུང་བསྟོན་པ་ནི་འདི་ཡིན་ནོ།ཧེ་ཧེ།མཁའ་སྤྱོད་ཨ་མའི་བུ་ཆུང་༎སྙིགས་མ་ལུས་ཀྱི་དྭངས་མའི༎ཙིཏྟ་རིན་ཆེན་དབུས་ནས༎སྡོང་པོ་རྩ་མཆོག་དྭངས་མའི༎འབྲས་བུ་མཐོང་བྱེད་ཙ་ཀྱུ༎ཕྱི་འབྱུང་དབྱིངས་ཀྱི་འོད་ལྔ༎ནང་འབྱུང་ཐིག་ལེ་ཟླུམ་འཁྱིལ༎མཆེད་གཞི་ཤེས་རབ་རང་བྱུང་༎སེམས་ཅན་ཡོངས་ལ་གནས་ཀྱང་༎མངོན་སུམ་མ་གྱུར་དབང་གིས༎སྲིད་པའི་འཁོར་ལོར་ཁ་འཁྱལ༎མ་དག་ལས་ཀྱི་བསྐལ་བ༎དག་དབྱིངས་དྭངས་མར་ཞིག་པའི༎འོད་གསལ་ཆོས་ཉིད་རོལ་པར༎ཞོག་དང་ས་ལམ་ཡོན་ཏན༎མ་བརྩལ་ངང་གིས་འབྱུང་འོང་༎ཁྲེགས་ཆོད་ཆོས་ཉིད་བདེན་པ༎ཁྱོད་ཀྱིས་མངོན་སུམ་མཐོང་ཡོད༎མྱུར་ལམ་འཕོ་བ་ཆེན་པོའི༎གདམས་པ་ཉམས་སུ་ལོངས་དང་༎ང་ཉིད་དྭངས་མའི་འོད་གསལ༎དྭངས་མར་བརྫུས་དེ་མ་བུ༎དབྱེར་མེད་རོ་གཅིག་འདྲེས་འགྲོ༎ཞེས་ཟེར་ཞིང་བདག་གི་སྙིང་ཀར་ཐིམས་པས་མྱུར་ལམ་ཐོད་རྒལ་གྱི་གནད་ཇི་ལྟ་བ་བཞིན་དུ་ངོ་འཕྲོད་པར་གྱུར།༈མི་མིན་ཡེ་ཤེས་ལུས་ཅན་མཁའ་འགྲོ་མས༎དགོས་པའི་དབང་ངམ་ཇི་ལྟར་ཡིན་ཀྱང་རུང་།།ཕལ་བ་བཞིན་དུ་ནན་གྱིས་འདྲི་བའི་དོན༎ཇི་ལྟ་བ་བཞིན་མ་གབ་གསལ་བར་སྨྲས༎དེས་ཀྱང་སྙན་པའི་གསུང་གིས་དབུགས་དབྱུང་བཅས༎རང་བྱུང་གཉུག་མའི་རྩ་ཐིག་ངོ་སྤྲད་ཅིང་༎ཟབ་མོའི་གདམས་ངག་གནང་སྟེ་ཕྱི་ནང་གི།བརྡ་དོན་འོད་གསལ་ཡེ་ནས་དབྱེར་མེད་དུ༎མཚོན་ཕྱིར་བདག་དང་རོ་གཅིག་ཐིམ་པའི་མོད༎མྱུར་ལམ་གསང་གནད་ཚུལ་བཞིན་རྟོགས་པར་གྱུར།   །

དགུང་ལོ།༣༡ 

དུས་དེ་ནས་བཟུང་སྟེ་འོད་གསལ་ཐོད་རྒལ་གྱི་ལམ་ལ་བརྟེན་ནས་རྩེ་གཅིག་ཏུ་ཉམས་སུ་བླང་པའི་ཚེ་ན་ཁང་བའི་སེར་ག་ལ་བལྟས་ནས་སེམས་ཏིང་ངེ་འཛིན་ལ་རྩེ་གཅིག་ཏུ་མཉམ་པར་བཞག་དུས་སུ། ཡུལ་ཡངས་པ་ཆེན་པོའི་གནས་ཤིག་ཏུ་སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པ་མཐོང་ནས་སངས་རྒྱས་ཡེ་ཤེས་ཉི་མ་ཞེས་བྱ་བས་འཁོར་བྱེ་བ་བརྒྱད་ལ་ཆོས་སྟོན་པ་དང་།སངས་རྒྱས་མི་འགྱུར་ཞེས་བྱ་བས་གདུལ་བྱ་ཐེར་འབུམ་ལ་ཆོས་སྟོན་པ་ལ་སོགས་པ་མཐོང་སྣང་བསམ་མི་ཁྱབ་པ་བྱུང་ངོ་།    །དེ་ནས་ལོ་གྲངས་སོ་གཅིག་ལ་བབས་པའི་དུས་སུ།ཉིན་གཅིག་མདུན་ཐད་ཀྱི་ནམ་མཁར་སངས་རྒྱས་གདོན་མི་ཟ་བའི་རྒྱལ་བོ་ཡིན་སྐད་པའི་ལོངས་སྤྱོད་རྫོགས་པའི་རྒྱན་སྣ་ཚོགས་ཀྱིས་བརྒྱན་པ་ཞིག་སྣང་སྟེ།དེའི་སྐུའི་རྒྱན་གྱི་ཕྲེང་བ་དང་དོ་ཤལ་གྱི་ནང་དུ་སངས་རྒྱས་ཀྱི་ཞིང་ཁམས་རེ་རེ་སྣང་བ་དང་།ཡང་དེ་དག་གི་རྒྱན་རེ་རེའི་ནང་དུ་སངས་རྒྱས་ཀྱི་ཞིང་ཁམས་གྲངས་མང་བ་མཐོང་སྟེ།དེ་ལྟར་རིམ་པ་བཞིན་དུ་སྣང་བའི་མོད་ལ་རིག་པ་བསམ་གྱི་མི་ཁྱབ་པ་མངོན་དུ་གྱུར་ཏེ་ཞག་བདུན་གྱི་བར་དུ་འདི་སྣང་འགགས་པས་ཉེ་གནས་རིག་མ་དང་བུ་སློབ་ཐམས་ཅད་ཀྱིས་འཆི་ལྟས་ཨེ་ཡིན་སྙམ་ནས་ཡིད་མ་བདེ་བར་མྱ་ངན་བྱེད་དགོས་པ་བྱུང་།དེར་བྱེའུ་དམར་པོ་ཞིག་ལྷག་ནས།བསྭོ་ལོ་ཀྱེ།ཁྱེའུ་ཆུང་བསམ་དུ་མེད་པ༎ང་ནི་འཕགས་པའི་ཡུལ་གྱི༎མཁའ་འགྲོ་དགའ་རབ་མཚོ་ཡིན༎ཚེ་འདིའི་སྣང་བ་ཐམས་ཅད༎སྒྱུ་མ་རྨི་ལམ་ལྟ་བུར༎བརྟན་གནས་མེད་ལ་ལྟོས་དང་༎རང་དོན་བྱེད་དགོས་ལོས་དྲན༎སྣ་ཚོགས་སྣང་བའི་ཆོས་རྣམས༎སྒྱུ་མ་རྨི་ལམ་ལྟ་བུར༎བརྟན་གནས་མེད་པའི་ཚུལ་ལ༎ཤེས་རབ་མིག་གིས་ལྟོས་དང་༎ཐམས་ཅད་ནམ་མཁའི་རང་བཞིན༎ཀུན་གྱི་སྣང་གཞི་ནམ་མཁའ༎མངོན་གྱུར་ཉིད་དུ་གོམས་པའི༎གདེང་ཆེན་ཐོབ་པའི་སྐྱེས་བུ༎རང་ཐོག་རང་སངས་རྒྱས་ལ༎མི་རིང་ཉེ་ལམ་ངེས་པ༎དེ་ཉིད་མངོན་གྱུར་ངང་ལ༎མ་བརྩལ་རང་སར་ཞོག་དང་༎ཀུན་བཟང་རྒྱལ་ས་ཐོབ་འོང་༎ཞེས་ཟེར་ཞིང་འཕུར་སོང་ངོ་།    །ཡང་བྱེའུ་ངང་དམར་ཞིག་གིས་ན་རེ།ཨཻ།ཁྱེའུ་ཆུང་ནམ་མཁའི་ཡིད་ཅན༎མ་ཡེངས་ང་ལ་ཉོན་དང་།།འཁོར་བ་སྒྱུ་མའི་གྲོང་ཁྱེར༎སྙིང་པོ་མེད་ལ་ལྟོས་དང་༎སོ་སོའི་སྐྱེས་བོའི་སྡུག་བསྔལ༎དེ་ལ་ཟད་མཐའ་མ་མཐོང་༎འཁོར་འདས་སྣང་བའི་ཆོས་ཀུན༎ཆོས་ཉིད་ཆེན་པོར་རིག་པའི༎ཆོས་ཉིད་ནམ་མཁའི་རྣལ་འབྱོར༎ཀུན་ཏུ་བཟང་པོའི་ས་ལ༎མི་རིང་མྱུར་དུ་བགྲོད་པའི༎སྐྱེས་བུ་ཆེན་པོ་སྐྱིད་པ༎བུ་ཁྱོད་འགྲོ་བའི་དོན་དུ༎ཨོ་རྒྱན་ཀུན་བཟང་པདྨས༎འདྲེན་སྟོན་ལས་ཀྱི་ཕོ་ཉར༎མངག་པས་གཞན་དོན་དང་ལོངས༎ཐོད་རྒལ་ལམ་མཆོག་ཟབ་མོ༎དེ་ཙམ་དེ་གར་ཞོག་ལ༎བུ་སློབ་སྐྱོངས་ཤིག་ཨེ་གོ།ཞེས་ཟེར་བ་བདག་གིས་རྗེས་ཟློས་བྱས་ཚེ་ཉེ་གནས་ཇོ་རྒན་མ་ཡེ་ཤེས་སྒྲོན་གྱིས་ད་རེབ་བྱེའུ་སྐད་སྙན་པོ་ཞིག་ཡུན་རིང་དུ་གྲགས་རྒྱུ་དེ་འདྲ་ཚོར་མ་མྱོང་།མཚར་རེ་མི་ཞིག་གིས་ངག་བཀུག་ནས་གླུ་ལེན་པ་དང་འདྲ་ཞེས་ཟེར།དེ་ལྟར་ཆོས་ཉིད་མངོན་སུམ་གྱི་དུས་སུ་བུམ་དབང་གི་ནུས་པ་ལུས་ཀྱི་གདོས་པ་ལ་ཐེབ་པས་ལུས་རྡོ་རྗེའི་སྐུ་རུ་སྨིན་པ་དང་།གསང་དབང་གི་ནུས་པ་ངག་ལ་ཞུགས་པས་རྡོ་རྗེ་གསུང་གི་རོལ་པ་རུ་སྨིན་ཞིང་།ཤེར་དབང་གི་ནུས་པ་སེམས་ལ་ཐེབ་པས་སེམས་ཤེས་རབ་ཡེ་ཤེས་སུ་སྨིན་ཏེ་ཆོས་ཉིད་ནམ་མཁའ་མཛོད་ཀྱི་ཀློང་རྡོལ།ཚིག་དབང་གི་ནུས་པ་སྣང་བ་ལ་ཐེབ་པས་སྣང་བ་ཐམས་ཅད་འཇའ་དང་ཐིག་ལེའི་རོལ་པ་རུ་གོ་འཕོས་པའི་རྟགས་རྣམས་མངོན་དུ་གྱུར་པ་ཡིན།འདི་དུས་རིག་འཛིན་རྡོ་རྗེ་ཡིན་སྐད་པའི་གཅེར་བུ་དར་དཀར་པོའི་ཨང་རག་གྱོན་པ་ཞིག་ན་རེ།འཁོར་འདས་ཀྱི་སྣང་བ་ཐམས་ཅད༎སྒྱུ་མ་དང་རྨི་ལམ་ཇི་བཞིན༎གཞི་མེད་དང་རྩ་བྲལ་ཆེན་པོ༎རང་སྣང་འདི་རང་བཞིན་མེད་དེ༎རྒྱུ་རྐྱེན་ལ་རྟེན་འབྱུང་ངེས་པ༎རང་རིག་འདི་གཞི་མེད་རྩ་བྲལ༎ཁྱབ་བདལ་དུ་ནམ་མཁའི་ཁོར་ཡུག།རང་བཞིན་ནི་སྤྲོས་དང་བྲལ་བའི༎ཡུལ་མེད་དང་ཟང་ཐལ་ངེས་པ༎ཀ་དག་དང་གདལ་ཁྱབ་ཆེན་པོ༎དྭངས་གསལ་དང་རྙོག་མ་བྲལ་བའི༎ངང་གདངས་ལས་ལྷུན་གྲུབ་རོལ་བ༎ཡེ་ཤེས་དང་ཡོན་ཏན་གཏེར་མཛོད༎ཞིང་ཁམས་དང་སྐུ་ཡི་རོལ་པ༎འབད་རྩོལ་དང་ལས་ཀར་མ་ལྟོས༎མངོན་གྱུར་དུ་རང་ས་ཟུངས་དང་༎རང་ཐོག་ཏུ་རང་སངས་རྒྱས་འོང་༎ཞེས་ཟེར་བའི་ལན་དུ།ཀྱཻ།དུས་གསུམ་རྒྱལ་བའི་སྤྱི་གཟུགས༎འགྲོ་བའི་བླ་མ་གསོན་དང་༎བདག་ནི་ལས་ངན་དབང་གིས༎སྙིགས་མའི་དུས་འདིར་སྐྱེས་ཏེ༎སྤྱིར་ནི་རིགས་དམན་མིན་ཡང་༎ཕ་མེས་མི་སྲུན་པ་ཚོས༎སྔགས་ནག་ནུས་ལྡན་དག་ལ༎ཕོད་བཙུག་དོ་བསྡོ་བྱས་པས༎བྱད་དང་གཏད་ནན་དལ་ཁ༎ཚོགས་ཤིང་དུས་ལ་བབ་པས༎བུ་རྒྱུད་ཕྱི་རབས་རིང་ལ༎ཁས་ཉན་དབང་ཆུང་འབྱོར་ཉམས༎གསོ་བའི་ཐབས་ཤིག་ཡོད་ན༎རིག་འཛིན་མཁའ་འགྲོའི་སྙིང་ཐིག།སྙིང་གི་དཀྱིལ་དུ་འཕོས་ཚེ༎སྲོག་གི་གཏའ་རུ་ལོས་འཛིན༎ཐར་པའི་ལམ་ཞིག་ཡོད་ཚེ༎སྒོ་གསུམ་རོ་ཡིས་ཅི་བྱེད༎ཚེ་འདིར་མངོན་སངས་རྒྱས་པར༎བླ་མ་བྱིན་གྱིས་རློབས་ལ༎ཁྱེད་དང་སྐལ་བ་མཉམས་པར༎ད་ལྟ་ཉིད་དུ་བྱིན་རློབས༎ཅེས་བརྗོད་པ་དང་ནམ་མཁའི་དབྱིངས་སུ་འཇའ་ལྟ་བུར་ཡལ་སོང་།ཡང་རེ་ཞིག་གི་ཚེ་སློབ་དཔོན་ཧཱུཾ་ཆེན་ཀ་ར་ཡིན་སྐད་པའི་རྣལ་འབྱོར་དམར་ནག་ཧེ་རུ་ཀ་པའི་ཆས་སུ་ཞུགས་པ་ཞིག་འཇའ་འོད་དང་ཐིག་ལེའི་ཀློང་དུ་སྣང་བྱུང་ནས།ཀྱཻ།ང་ངོ་ཁྱོད་ཀྱིས་ཨེ་ཤེས།།ང་ནི་རིག་འཛིན་རྒྱལ་པོ།།ཧཱུཾ་ཆེན་ཀ་ར་དེ་ཡིན།།བུ་ཁྱོད་ཉམས་སྣང་གོང་འཕེལ།།སྣང་བ་རྒྱན་དུ་ཤར་བའི།།ལྷ་དང་ཞིང་ཁམས་སྣང་བ།།མ་ངེས་སྣ་ཚོགས་སྣང་ཡང་།།སྒྱུ་མའི་ཉམས་ཀྱི་སྣང་བར།།ཁོ་ཐག་ཆོད་པར་གྱིས་དང་།།གོལ་ཤོར་འཕྲང་ལས་གྲོལ་འོང་།།མི་ལོ་བདུན་ཕྲག་གཅིག་ཏུ།།བར་མེད་ཉམས་སུ་བླངས་ན།།འཇའ་ལུས་ཆེན་པོར་འཚང་རྒྱ།།ཕ་ཡི་ཐོབ་ནོར་ལོངས་ལ།།གཞན་དོན་དང་དུ་ལེན་མཛོད།།ཅེས་ཟེར་བའི་ལན་དུ།གསོན་དང་རིག་འཛིན་རྒྱལ་པོ།།སྨར་ཡུལ་མུན་པའི་ཁྲོད་ན།།འགྲོ་དོན་བྱེད་ཡུལ་མི་འདུག།བསམ་རྒྱུ་ཆོས་ལས་མེད་བཞིན།།རང་དོན་དང་དུ་བླང་ཡང་།།ལྟོ་གོས་སྲེད་ལེན་དབང་གིས།།རྙེད་ཚོལ་མི་བྱེད་ཀ་མེད།།སེམས་ཅན་ཀུན་གྱི་ཆོས་ཉིད།།མཐུན་རྐྱེན་འབད་མེད་འབྱུང་བར།།བླ་མས་བྱིན་གྱིས་རློབས་མཛོད།།ཅེས་ཞུས་ཚེ་བླ་མའི་ཞལ་ནས།ཀྱཻ།ཁྱེའུ་ཆུང་བསམ་དུ་མེད་པ།།པདྨའི་གཏེར་དང་འཕྲད་ཚེ།།ཤེས་རབ་གཟུངས་མ་ལོས་བརྟེན།།གཟུངས་མ་གྲོགས་སུ་བརྟེན་ན།།འཁོར་བའི་ཁ་འཛིན་འགྱུར་དོགས།།དེ་ཕྱིར་དེ་ཡི་ཚེ་ན།།ཚེ་གཅིག་དཀོར་ལ་མ་འབྱམས།།མི་ཚེའི་ལྷག་མར་ཐུག་ཚེ།།སྒྲུབ་པ་ལྷུར་ལེན་རེམ་མཛོད།།ཉམས་ལེན་ནུས་པ་མེད་པའི།།སྐྱེས་བུ་མང་དུ་བྱུང་ནས།།འདོད་པ་ཁ་རུ་འདོན་ཚེ།།བསྟན་བཅོས་མང་པོ་ཞོག་ལ།།མངོན་སུམ་མངོན་དུ་གྱུར་པའི།།ཆོས་ཉིད་དབྱིངས་སུ་ཆམས་ཞོག། ཅེས་ཟེར་ཞིང་དབྱིངས་སུ་ཡལ་སོང་།

དགུང་ལོ།༣༢   

རང་ལོ་སུམ་ཅུ་སོ་གཉིས་ལ་བབས་ཚེ། ཧོར་ཟླ་དང་པོའི་ཚེས་གཅིག་གི་ནུབ་རྨི་ལམ་དུ་བྱིས་པ་ཤ་མདོག་དཀར་པོ་རས་དཀར་གྱི་ཨང་རག་གྱོན་པ་ཞིག་བདག་གི་ཐད་དུ་བྱུང་ནས།སྐྱེས་བུ་ཁྱོད་ཀྱིས་ཅི་འདོད་ཟེར་བའི་ལན་དུ་བདག་གིས་འདི་སྐད་ཅེས།འཇིག་རྟེན་འདི་ན་དཀོན་པའི་ཆོས་མཆོག་ཟབ་མོ་བདུད་ཀྱི་གཅོད་ཡུལ་རྫོགས་པ་ཆེན་པོ་དང་འབྲེལ་བ་ཞིག་ཨེ་རྙེད་བསམ་ཞིང་དེ་འདོད་པས་ཁྱོད་ཀྱིས་ཤེས་སམ་བྲིས་པས།དེ་ན་རེ།ངས་མི་ཤེས་ཀྱང་ཡུལ་དགའ་བའི་ཚལ་ཞེས་བྱ་བ་ན་བླ་མ་འཇམ་དབྱངས་ཞེས་པའི་སྟོན་པ་མཆོག་གིས་རང་རྩལ་སྒྱུ་མའི་འཁོར་ལ་གང་འདོད་པའི་ཆོས་སྟོན་ཏོ།དེ་ནི་གདུལ་བྱའི་དོན་དུ་འཆད་ཉན་གྱི་ཚུལ་མཛད་པ་ཡིན་པས་དེར་ཨེ་འགྲོ་ཞེས་ཟེར་བ་ལ།བདག་གིས་འགྲོ་སྨྲས་ནས་ཕྱིན་པས་ཡུལ་མང་པོ་ཞིག་གི་ཕ་རོལ་ཏུ་སོང་ཚེ་ཤིན་ཏུ་སྐྱིད་པའི་དགའ་ཚལ་ཞིག་ན་འཇའ་རིས་ཀྱི་དྲྭ་མིག་རིས་སུ་ཤར་བའི་ར་བ་ཡངས་ཤིང་རྒྱ་ཆེ་བའི་དབུས་སུ་རིན་པོ་ཆེའི་ཁྲི་དཔང་མཐོ་བའི་སྟེང་དུ་རང་གི་བླ་མ་དེའི་སྐུ་སྔོན་མི་ཡུལ་དུ་བཞུགས་པའི་དུས་ཀྱི་བཞིན་རས་ལྟ་བུ་ལ་དར་དང་རིན་པོ་ཆེའི་རྒྱན་གྱིས་བརྒྱན་ཅིང་བཞུགས་པའི་མདུན་སར་བདག་སླེབ་མ་ཐག་ཏུ་ཤིན་ཏུ་གུས་ཤིང་དད་པའི་ངང་ནས་ཕྱག་འཚལ་ཞིང་ཞབས་ལ་སྤྱི་བོས་གཏུག་སྟེ་སྨོན་ལམ་མང་པོ་བཏབ་ཅིང་མདུན་དུ་འཁོད་པའི་མོད་ལ།བྱིས་པ་དེ་ན་རེ།བླ་མ་ལགས་སྐྱེས་བུ་འདིས་བདུད་གཅོད་ཟབ་མོའི་གདམས་པ་འདོད་ཟེར་བས།དེ་ཚུལ་བཞིན་དུ་སྟོན་པར་ཞུ་ཟེར།བླ་མ་མཆོག་གིས་ཡུན་གཅིག་ཅང་མི་གསུངས་པར་སྤྱན་ནམ་མཁར་གཟིགས་ནས་བཞུགས་སོ།རེ་ཞིག་གི་ཚེ་བུ་ཁྱོད་ཀྱིས་འདོད་པ་དེ་ངས་བཤད་ཀྱི་ཉོན་ཅིག་གསུངས་ནས་འདི་སྐད་དོ།ཀྱཻ་ཧོ།གཅོད་ཅེས་བྱ་བ་ནི་བདག་འཛིན་གཞིག་པའི་མན་ངགབདུད་བཞི་རང་མེད་དུ་གསོད་པའི་གདམས་པ།ཐོས་པ་ཐམས་ཅད་ཀྱི་མཆོགསྒོམ་པ་ཀུན་གྱི་གེགས་སེལ།ཆོས་རྣམས་ཀུན་གྱི་ཡང་བཅུད།རྣལ་འབྱོར་ཡོངས་ཀྱི་ལམ་བཟང་།རྣམ་མཁྱེན་ཐོབ་པའི་མྱུར་ལམ་ཀུན་གྱི་མདོ་ཆིངས།རྐྱེན་ངན་ཐོག་བརྫིས་ཀྱིས་གཅོད་པའི་གདམས་པ།ལྟས་ངན་གཡང་དུ་ལེན་པའི་མན་ངགན་ཚ་ལམ་དུ་སློང་པའི་ཟབ་ཆོས།ལྷ་འདྲེ་གྲོགས་སུ་བྱེད་པའི་ཐབས་མཆོགའཁོར་འདས་རང་སྣང་དུ་ཐག་ཆོད་པའི་ཐབས་དང་།འཕོ་བ་ནམ་མཁའ་གོ་འབྱེད།བར་དོ་དབྱིངས་སུ་གཅོད་པའི་ཐོད་རྒལ།ཉག་གཅིག་རང་ཐོག་ཏུ་གྲོལ་བའི་ལམ་བཟང་ཡིན་ཏེ།དེའི་དོན་ངས་བཤད་ཀྱི་ཉོན་ཅིག་གསུངས་ནས་རྒྱས་པར་བཀྲལ་ཏེ་གསུངས་མཐར།ངས་བཤད་པ་དེ་དག་ཡིད་དུ་ཟུངས་ལ་གཞན་ལ་སྟོན་ཅིག་དང་སྐལ་བ་དང་ལྡན་པའི་སློབ་བུ་མང་པོ་ནམ་མཁའ་གོ་འབྱེད་པའི་སྟོབས་ཀྱིས་ཆོས་ཉིད་རྒྱུ་འབྲས་ལས་འདས་པའི་དབྱིངས་སུ་མྱ་ངན་ལས་འདའ་བར་འགྱུར་རོ།ཞེས་གསུངས་ཤིང་རྟེན་དང་བརྟེན་པར་བཅས་པ་ཐམས་ཅད་རང་ལ་ཐིམ་པའི་སྣང་བ་བྱུང་ངོ་།དེ་ནས་དབྱར་ཟླ་འབྲིང་པོའི་ཚེས་བདུན་གྱི་ནུབ་མཁའ་འགྲོ་རྡོ་རྗེ་ལྕམ་མོ་ཞེས་བྱ་བ་ཡིན་སྐད་པའི་བུད་མེད་སྔོ་སང་ངེ་བ་གཅེར་བུ་གོས་དང་རྒྱན་མེད་པ་ཞིག་བྱུང་ནས་བུ་ཁྱོད་རྔ་ཡབ་ཟངས་མདོག་དཔལ་རི་ལ་མཇལ་ཨེ་འགྲོ་ཟེར་བ་ལ།བདག་གིས་འགྲོ་སྨྲས་པས་ལག་པ་གཡས་པའི་སོར་མོ་ནས་བཟུང་སྟེ་སོང་བས་རི་བོ་ཆེན་པོ་ཁ་དོག་ནག་ལ་རྩེ་མོ་དགུང་ལ་སྙེགས་པ་ཞིག་གི་རྩེ་མོར་ཕྱིན་པའི་མོད་ལ།མཁའ་འགྲོ་དེ་ན་རེ།བུ་ཁྱོད་ཀྱི་ལག་པ་གཉིས་བར་སྣང་གི་ཁམས་སུ་སྐྱོངས་ལ་ཕུང་བོ་ཤུགས་ཕྱུངས་སྟངས་སྟབས་ཀྱིས་དང་རྨི་ལམ་གྱི་ལུང་རང་བཞིན་མ་གྲུབ་པའི་འཕུར་འགྲོ་བ་ལ་ཐོགས་པ་མེད་དོ།ཞེས་ཟེར་བ་ལྟར་བདག་གིས་དེ་ལྟར་བྱས་པས་བྱ་རྒྱལ་ནམ་མཁར་ལྡིང་བ་ལྟར་འཕུར་ནས་ཕྱིན་པས་ཡུལ་གླིང་ཆེན་པོ་བརྒྱ་དང་དྲུག་ཅུ་རྩ་ལྔ་བགྲོད་ཅིང་རྒྱ་མཚོ་བཅུ་བདུན་གྱི་ཕ་མཐར་ཕྱིན་ཚེ།འདི་ནི་ལང་ཀ་ཤོད་ཅེས་བྱ་བ་སྟེ་སྲིན་མོ་མི་ཟན་གྱི་གླིང་ཡིན།དེ་ནས་རྒྱ་མཚོ་ཆེན་པོ་འདིའི་ཕ་མཐར་ཁུག་པ་ཞིག་ན་ལང་ཀའི་ཡུལ་བཅོ་བརྒྱད་ཡོད་དེ་མཐའི་རྒྱ་མཚོའི་ཁུག་པའམ་བར་མཚམས་ཡིན་ཞེས་ཟེར།བདག་གིས་ཟགས་མདོག་དཔལ་གྱི་རི་བོ་གང་དུ་མཆིས་ཞེས་དྲིས་པས།མཁའ་འགྲོ་མ་དེ་ན་རེ།ད་ནི་ཐག་ཤིན་ཏུ་ཉེ་རུ་ཡོད་ཅེས་ཟེར།སྲིན་པོའི་ཡུལ་གླིང་ཆེན་པོ་བཅོ་བརྒྱད་ཀྱི་ཕ་མཐར་དུ་བགྲོད་དགོས་པ་ཨེ་ཡིན་ཞེས་དྲིས་པའི་ལན་དུ།དེ་ན་རེ།དེ་ལྟར་མ་ཡིན་ཏེ་ཟངས་མདོག་དཔལ་གྱི་རི་བོ་ཞེས་བྱ་བ་ནི་རྒྱ་མཚོ་ཆེན་པོའི་སྙིང་པོ་ཡིན་ཏེ་མཐའ་རྒྱ་མཚོས་བསྐོར་ནས་ཡོད་དོ།ཞེས་ཟེར།དེ་ནས་ཅུང་ཟད་ཕྱིན་ཚེ་མཐོང་སྣང་ལ་རི་བོ་ཆེན་པོ་རྩ་བ་སྔོ་ལ་སྐེད་པ་དཀར་བ་རྩེ་མོ་དམར་བ་ཞིག་མཐོང་བའི་མོད་ལ།བདག་གིས་ཕ་ཀིའི་རི་བོ་དེ་གང་ལགས་དྲིས་པས།མཁའ་འགྲོ་མ་ན་རེ།ཕ་ཀིའི་རི་འདི་ཟངས་མདོག་དཔལ་གྱི་རི་བོ་ཞེས་བྱ་བ་རེད་ཟེར་བས།དེ་ནས་རི་དེའི་ཉེ་འདབས་སུ་ཕྱིན་ཚེ་རྒྱ་མཚོ་ཆེན་པོ་རྒྱ་ཆེ་བའི་ཁོར་ཡུག་ཏུ་བསྐོར་པའི་ཚུར་རི་ལ་སླེབ་ནས་བལྟས་པས་རི་བོ་དེའི་གཡས་ལོག་ན་འཇའ་ཡི་སྤྲིན་དཔུང་ཆེན་པོ་འཁྲིགས་པའི་ཀློང་ནས་སྐུ་ལུས་མི་སྣང་བའི་མགྲིན་པ་ཡན་ཆད་ཐོན་པ་བརྒྱད་ཅུ་རྩ་བརྒྱད་དབུ་ལ་པཎ་ཞུ་གསོལ་བ་དང་ཐོར་ཅོག་ཅན་སོགས་སྣ་ཚོགས་པ་ཞལ་འཛུམ་པ་ཤ་སྟག་གིས་བརྩེ་བའི་ཉམས་ཀྱིས་བདག་ལ་གཟིགས་པ་རེད་ཟེར།དེ་ནས་བདག་གིས་ཕྱག་བྱས་ནས་གསོལ་བ་བཏབ་པས་སྤྲིན་གྱི་གསེབ་ནས་བླ་མ་སྙིང་པོའི་བུམ་ཞྭ་ཅན་ཞིག་བྱུང་ནས་ཕྱག་གཉིས་བདག་གི་མགོ་ཐོག་ཏུ་བཞག་ནས་འདི་སྐད་དོ།ང་ནི་རིག་འཛིན་ཧཱུཾ་ཆེན་ཀ་ར་ཞེས་བྱ་བ་ཡིན།ཁྱོད་ནི་ང་ཡི་ཕྲིན་ལས་ཀྱི་སྤྲུལ་བ་ཡིན།འགྱུར་བ་མེད་པ་སྐུ་བུམ་པའི་དབང་ཡོངས་སུ་རྫོགས་པ་ཐོབ་པར་གྱུར་ཅིགའགག་པ་མེད་པ་གསུང་གསང་བའི་དབང་ཡོངས་སུ་རྫོགས་པ་ཐོབ་པར་གྱུར་ཅིགའཁྲུལ་བ་མེད་པ་ཐུགས་ཤེས་རབ་ཀྱི་དབང་ཡོངས་སུ་རྫོགས་པ་ཐོབ་པར་གྱུར་ཅིགམཚན་མ་ཚིག་དང་བྲལ་བ་ལྷུན་གྲུབ་བདེ་བ་ཆེན་པོའི་དབང་ཡོངས་སུ་རྫོགས་པ་ཐོབ་པར་གྱུར་ཅིགཉི་མ་དེ་རིང་ནས་བཟུང་སྟེ་ཁྱོད་དང་ང་གཉིས་ཐ་དད་མེད་པའི་དབང་ཐོབ་པར་གྱུར་ཅིག་གསུངས་ནས་བདག་ཉིད་ལ་ཐིམ་པའི་སྣང་བ་བྱུང་།དེ་ནས་མཁའ་འགྲོ་མ་ཉི་འོད་འབར་མ་ཞེས་བྱ་བ་ཡིན་ཟེར་བའི་སྐུ་མདོག་དཀར་མོ་དར་དམར་པོའི་ཨང་རག་གྱོན་པ་གཡས་ཉི་ཟེར་བཟུང་ལ་གཡོན་པས་བརྡའ་ཡི་མེ་ལོང་ཐོགས་པ་ཞིག་བདག་གི་ཐད་དུ་བྱུང་ནས་འདི་སྐད་ཟེར།སྐྱེས་བུ་དམ་པ་ཁྱོད་ཀྱིས་ལྟོས།།བརྡ་འདི་གོའམ་ལེགས་པར་དཔྱོད༎མ་འོངས་འབྱུང་འགྱུར་ལེགས་ཉེས་བཀྲ༎མི་ཤེས་པ་ན་ང་ཡིས་སྟོན་ཟེར་བ་ན༎བདག་གིས་མི་ཤེས་སྨྲས་པ་དང་༎བརྡ་དེ་བཀྲོལ་ནས་ཚུལ་བཞིན་དུ་བཤད་དོ༎དེ་ནས་སྲིན་པོ་སྐྲ་དམར་ཞིང་མིག་ཟླུམ་པ་བཞི་ཡིས་དར་གྱི་འདོ་ལི་བཞི་ཁྲམ་དུ་བཟུང་ནས་ཁྱོད་འདི་ཡི་སྟེང་དུ་སྡོད་ཟེར་བ་བདག་དར་གྱི་སྟེང་དུ་བསྡད་པས་དེ་མ་ཐག་ཏུ་ནམ་མཁའི་ཁམས་ནས་ཕ་རི་ལ་ཕྱིན་པས་རི་བོ་དེ་ཡི་འདབས་རྒྱ་མཚོའི་ཕ་མཐའ་དེ་ན་བྲག་མདའ་མདུང་རལ་གྲི་ཁ་ཊཾ་དྲི་ཤུལ་འབར་བས་ཁོར་ཡུག་ཏུ་བསྐོར་བའི་བར་མཚམས་ཤིག་ཏུ་གྲུ་འདོར་བའི་ལམ་ལ་ལྕགས་ཀྱི་ཐེམ་སྐས་བཙུག་པ་ཞིག་སྣང་།དེ་ནས་རི་ཡི་རྩ་བར་ཐང་ཆེན་པོས་བསྐོར་བའི་དཀྱིལ་དུ་དངུལ་གྱི་མཁར་དང་།དེ་བཞིན་དུ་གསེར་ལས་བྱས་པ་དང་།ཟངས་ལས་བྱས་པ་དང་།ལྕགས་ལས་བྱས་པའི་མཁར་རྣམས་ལ་ལ་ནི་ཉིས་ཐོགལ་ལ་ནི་སུམ་ཐོགལ་ལ་ནི་བཞི་ཐོགལ་ལ་ནི་དགུ་ཐོག་གི་བར་བསམ་གྱིས་མི་ཁྱབ་པས་རི་དེ་ཡོངས་སུ་འཁོར་བ་དེ་དག་གི་དབུས་སུ་རིག་འཛིན་དྲང་སྲོང་གི་ཚོགས་བསམ་གྱིས་མི་ཁྱབ་པ་བཞུགས་པའི་དབུས་ན་མི་མགོ་སྐམ་རློན་གྱི་བརྩིག་པའི་མཁར་དགུ་ཐོག་གི་སྟེང་ཁང་དུ་སྲིན་རྒྱལ་རཀྴ་ཐོད་ཕྲེང་ཞེས་བྱ་བ་ཁྲོ་བོ་ནག་པོ་དབུ་དགུ་ཕྱག་བཅོ་བརྒྱད་ཡོད་པ་ལ་ཡུམ་སྲིན་མོ་དམར་མོ་འཇིགས་སུ་རུང་ཞིང་བལྟར་མི་བཟོད་པ་གཉིས་བློན་རཀྴ་ཀ་ལ་དང་།རཀྴ་རག་རོལ་དང་།རཀྴ་དབུགས་ལེན་དང་།རཀྴ་སྟོབས་ཆེན་དང་།རཀྴ་ཉིན་མོ་རྒྱུ་དང་།རཀྴ་མཚན་མོ་རྒྱུ་དང་།རཀྴ་སྲིན་མོ་སྤྱི་ཁྱོ་དང་།རཀྴ་སྲིན་མོ་གྲོང་རྒྱུ་དང་།ལང་ཀ་ཤོད་དབང་དང་།ལང་ཀ་ཤོད་འཛིན་དང་།མི་ཡུལ་རྒྱུ་དང་།མི་ཡུལ་དབང་བྱེད་དང་།མི་རྣམས་ཡོངས་འདུད་ཅེས་བྱ་བ་ལ་སོགས་པའི་སྲིན་པོའི་འཁོར་ཚོགས་སྟོང་གིས་བཀའ་ཉན་ཅིང་ལས་བསྒྲུབ་པ།དེ་དག་ཤར་ན་གནས་ཤིང་ཤར་གླིང་ལ་དབང་སྒྱུར་བའོ།ལྷོ་རུ་དུང་གི་མཁར་དར་དཀར་གྱི་དབྱིབས་སུ་འདུག་པའི་ནང་དུ་སྲིན་རྒྱལ་རྡོ་རྗེ་དྲག་རྩལ་ཞེས་བྱ་བ་ཁྲོ་བོ་དཀར་པོ་འཇིགས་སུ་རུང་བ་ལ་འཁོར་སྟོང་གིས་བསྐོར་ནས་ལྷོ་གླིང་ལ་མངའ་དབང་མཛད་པ།ནུབ་ཏུ་ལྕགས་མཁར་དྲག་པོའི་ནང་དུ་སྲིན་རྒྱལ་རཀྴ་གདོང་དྲུག་ཞེས་བྱ་བ་ཁྲོ་བོ་སེར་ནག་འཇིགས་སུ་རུང་བ་ཞིག་ལ་འཁོར་སྟོང་ཕྲག་ལྔ་ཡིས་བསྐོར་ནས་ནུབ་གླིང་ཐམས་ཅད་ལ་མངའ་དབང་མཛད།བྱང་དུ་རིན་པོ་ཆེ་བཻཌཱུརྱ་ལས་གྲུབ་པའི་མཁར་རྒྱ་ཆེ་ལ་དཔང་མཐོ་བའི་ནང་དུ་སྲིན་རྒྱལ་དྲག་འཁྲོས་ཐོད་ཕྲེང་ཞེས་བྱ་བ་ཁྲོ་བོ་ལྗང་སྔོན་འཇིགས་སུ་རུང་བ་ལ་འཁོར་སྟོང་ཕྲག་བརྒྱད་ཀྱིས་བསྐོར་ནས་བྱང་གླིང་ཡོངས་ལ་མངའ་དབང་མཛད་པ།དེ་དག་ཐམས་ཅད་ཀྱང་ཐུགས་ཞི་བ་ཆོས་ཀྱི་དབྱིངས་ལ་མ་གཡོས་ཤིང་སྐུ་རབ་འཇིགས་གཏུམ་ཞིང་རྔམ་པའི་ཆ་ལུགས་ཅན་ཤ་སྟག་གོབདག་གིས་མཁའ་འགྲོ་སྔོན་མོ་དེ་ལ་གནས་འདི་དག་གང་ལགས་ཅེས་དྲིས་པས།དེ་ན་རེ།གནས་འདི་ས་སྤྱོད་སྤྲུལ་བའི་ཞིང་ཁམས་ཡིན་ཏེ།མི་དགེ་བཅུ་སྤང་ནས་ཚོགས་དུ་མ་བསགས་ཤིང་སྨོན་ལམ་རྒྱ་ཆེན་པོ་བཏབ་པ་རྣམས་སྐྱེ་བའི་གནས་ཡིན་ནོ་ཟེར།ཕྱོགས་འདི་དག་ན་རིན་པོ་ཆེ་ཤེལ་ལས་གྲུབ་པའི་ཁང་བཟང་ན་གསེར་གྱི་ཁྲི་དར་གྱིས་བཀབ་པ་འདི་དག་གཟོད་སྐྱེས་བུ་མང་པོ་བྱོན་པ་རྣམས་བཞུགས་གདན་ཡིན་ཞེས་ཟེར།དེ་ནས་རི་རྒྱལ་དེ་ཡི་རྩེ་མོ་ནས་དཔག་ཚད་གཅིག་འཕགས་པའི་སྟེང་གི་ནམ་མཁར་ཕྱིན་ཚེ་ས་གཞི་ཐམས་ཅད་འཇའ་རིས་ཀྱིས་གང་བའི་ཟ་འོག་ཁ་ཕྱེ་བ་ལྟ་བུ་ལ།སྨན་སྣ་ཚོགས་པའི་སྤང་རི་ལ་དྲི་བཟང་གི་ན་བུན་འཐུལ་བ།ཁ་དོག་སྣ་ཚོགས་པའི་མེ་ཏོག་གིས་ཡོངས་སུ་ཁེབ་པ་མནན་ན་མར་ལ་ནེམ་པ།བཏེགས་ན་ཡར་ལ་འཕར་བ།ས་ཡི་ངོས་ལ་རྐང་པའི་མཐིལ་གྱིས་རེག་པས་ལུས་ངག་ཡིད་གསུམ་བདེ་བས་མྱོས་པ།རྒྱ་ཁྱོན་དཔག་ཏུ་མེད་པའི་གནས་དེ་རུ་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་མཚན་ཉིད་སྣ་ཚོགས་ཡོངས་སུ་རྫོགས་པའི་ནང་དུ་དཔའ་བོ་དང་མཁའ་འགྲོ་མའི་ཚོགས་དཔག་ཏུ་མེད་པས་གར་འཆམ་ཞིང་བྲོ་འཁྲབ་པ།མཆོད་པའི་ལྷ་མོ་དཔག་ཏུ་མེད་པས་མཆོད་པའི་སྤྲིན་རྒྱ་མཚོ་རྒྱུན་མི་འཆད་པར་སྤེལ་བའི་དབུས་སུ་རིག་འཛིན་གྲུབ་ཐོབ་རྒྱ་མཚོ་ལྟ་བུའི་དབུས་ན་རིན་པོ་ཆེ་སྣ་ཚོགས་ལས་གྲུབ་པའི་ཁྲི་རྒྱ་ཆེ་ལ་དཔངས་མཐོ་བའི་སྟེང་དུ་ཨོ་རྒྱན་ཆེན་པོ་པདྨ་འབྱུང་གནས་སྐུ་བྱད་བལྟ་བས་ཆོག་མི་ཤེས་པ།དེ་ཉིད་ཀྱི་གཡས་སུ་དགའ་རབ་རྡོ་རྗེ།གཡོན་ཏུ་བི་མ་མི་ཏྲ།མདུན་གྲལ་དུ་རྗེས་འབངས་ཉི་ཤུ་རྩ་ལྔ་ལ་སོགས་པའི་རྒྱ་གར་དང་བོད་ཀྱི་རིག་འཛིན་གྲུབ་པ་ཐོབ་པ་བསམ་གྱིས་མི་ཁྱབ་པ་ཐམས་ཅད་གནས་དེ་ཉིད་དུ་བཞུགས་སོ།དེ་ནས་བར་ཁང་དུ་རིན་པོ་ཆེ་ཤེལ་ལས་གྲུབ་པའི་གཞལ་ཡས་ཁང་རྒྱ་ཆེ་ལ་ཁྱོན་ཡངས་པའི་ནང་དུ་པདྨ་དང་ཉི་ཟླའི་གདན་ལ་པདྨ་འཇིག་རྟེན་གསུམ་མགོན་ཞེས་བྱ་བ་སྐུ་མདོག་དཀར་གསལ་ཞལ་གཅིག་ཕྱག་བཞི་པ་མཚན་དཔེས་མཛེས་ཤིང་བལྟ་བས་ཆོག་མི་ཤེས་པ་ཞིག་ལ་བྱང་ཆུབ་སེམས་དཔའི་འཁོར་ཚོགས་རྒྱ་མཚོ་ལྟ་བུས་བསྐོར་བ་ལ་ཆོས་སྟོན་ཏོ།ཡང་སྟེང་ཁང་དུ་རིན་པོ་ཆེ་པདྨ་དང་ཟླ་བའི་གདན་ལ་པདྨ་དྲི་མེད་འོད་སྣང་ཞེས་བྱ་བ་སྐུ་མདོག་དམར་པོ་མཚན་དང་དཔེ་བྱད་ཀྱིས་སྤྲས་པ་ཞིག་གིས་རང་སྣང་རིག་པའི་འཁོར་ལ་བརྡ་ཡིས་ཆོས་བསྟན་ནས་བཞུགས་སོ།སྐུ་གསུམ་གྱི་སྟོན་པ་དེ་དག་ལ་བདག་གིས་ཕྱག་འཚལ་ཞིང་བསྐོར་བ་བྱས་ནས་སྨོན་ལམ་རྒྱ་ཆེན་པོ་བཏབ་ཅིང་དབང་དང་གདམས་པས་རྒྱུད་སྨིན་པར་བྱས་སོ།རི་བོ་དེ་ཡི་རྐེད་དུ་ཤིང་མ་བུན་ཞེས་བྱ་བ་ལ་དྲིལ་བུ་གཡེར་ཁ་ལ་སོགས་པ་སྒྲ་སྙན་པའི་སིལ་སྙན་མང་པོ་མེ་ཏོག་དངའབྲས་བུའི་ཚུལ་དུ་སྐྱེས་པ།གཞན་ཡང་ལྗོན་པའི་ཤིང་སྣ་ཚོགས་ལས་ཉེ་བར་སྤྱད་པའི་མཆོད་པ་དཔག་ཏུ་མེད་པ་རྒྱུན་མི་འཆད་པར་སྤྲོ་བ་དང་།ཤར་ན་རི་བོ་གསལ་ལྡན་ཞེས་བྱ་བ་མེ་ལོང་ལྟ་བུའི་དྭངས་ཤེལ་ལས་གཟུགས་ཀྱི་འདོད་ཡོན་དུ་མ་འཕྲོ་བ།རི་དེ་དཀར་ལ་གསལ་བའི་རྩེ་རུ་ཨོ་རྒྱན་སྡུག་བསྔལ་ངེས་སེལ་ཞེས་བྱ་བ་ལ་འཁོར་ཚོགས་བསམ་ཡས་པས་བསྐོར་བ།ལྷོ་ཕྱོགས་སུ་རི་བོ་འདོད་ལྡན་ཞེས་བྱ་བ་གསེར་ལས་གྲུབ་པ་ལས་འདོད་དགུའི་དཔལ་ཡོན་ཕུན་སུམ་ཚོགས་པ་ན་བུན་ལྟར་དུ་སྤྲོ་བའི་རྩེ་རུ་ཨོ་རྒྱན་རིན་ཆེན་རྒྱལ་བོ་ཞེས་བྱ་བ་ལ་འཁོར་ཚོགས་བརྒྱ་ཁྲིས་བསྐོར་བ།ནུབ་ཏུ་ཟངས་རི་དམར་པོ་དགུང་ལ་སྙེགས་པའི་ངོས་ནས་དྲི་བཟང་སྣ་ཚོགས་པས་ན་བུན་འཐུལ་བའི་རྩེ་རུ་པདྨ་བདེ་བའི་འབྱུང་གནས་ལ་འཁོར་དཔག་ཏུ་མེད་པས་བསྐོར་བ།བྱང་དུ་རི་བོ་འབིག་བྱེད་ཅེས་བྱ་བ་རིན་ཆེན་ལྕགས་ལས་གྲུབ་པ་ལས་དར་གོས་ཀྱི་རིགས་སྣ་ཚོགས་ནམ་མཁའ་གང་བར་སྤྲོ་བ།རི་བོ་དེ་ཡི་རྩེ་མོ་ན་ཨོ་རྒྱན་གཡུལ་ལས་རྣམ་པར་རྒྱལ་བ་ཞེས་བྱ་བ་ལ་འཁོར་ཚོགས་བྱེ་བ་འབུམ་གྱིས་བསྐོར་བ།རི་བོ་དེ་དག་ལས་འཕྲོས་པའི་འདོད་ཡོན་གྱི་མཆོད་པའི་སྤྲིན་སྣ་ཚོགས་པའི་དབུས་ཀྱི་ཟངས་མདོག་དཔལ་གྱི་རི་བོ་ལ་ཁྱབ་པའོ།རྒྱ་མཚོའི་ཕྱི་རིམ་དུ་ཡང་ཐང་ཆེན་པོས་བསྐོར་བའི་མཐར་རྫ་རི་དང་བྲག་རི་ནགས་རི་མང་པོས་ཡོངས་སུ་བསྐོར་བའི་ཕྱི་རོལ་ཏུ་ཐང་དང་ལུང་པ་མང་པོའི་གནས་ངམ་གྲོག་ཅན་རྣམས་སུ་སྲིན་པོའི་གྲོང་ཁྱེར་མང་པོས་ཡོངས་སུ་བསྐོར་བ་སྲིན་པོ་སྲིན་མོ་དེ་དག་ཀྱང་ཟས་སུ་ཤ་ལ་སྤྱོད་ཅིང་སྐོམ་དུ་ཁྲག་ལ་འཐུང་བ།གཞན་ཡང་རཀྴལི་ལ་ཞེས་བྱ་བའི་ཤིང་འབྲས་ལ་ལོངས་སྤྱོད་པ།བུ་ལང་ཁ་པ་ཞེས་བྱ་བའི་འབྲས་བུ་ས་ལ་བཏབ་པའི་ཁ་ཟས་ཀྱི་མཆོག་ཤ་སྟག་མཆིས་སོ།སྲིན་པོ་སྲིན་མོ་དེ་དག་གིས་སྲོག་ཆགས་ཀྱི་རིགས་མཐོང་བ་ཐམས་ཅད་མགྱོགས་པའི་ཤུགས་ཀྱི་བཟུང་ནས་ཤ་གསོན་མར་ཟ་བ་འཕར་སྤྱང་ལྟ་བུའོ།དེ་ལྟར་དག་པའི་སྣང་བ་བསམ་གྱིས་མི་ཁྱབ་པ་ཤར་ཚེ།བདག་གིས་ཨོ་རྒྱན་ཆེན་པོའི་ཞབས་ལ་ཕྱག་འཚལ་ནས་མགོ་བོས་གཏུག་སྟེ།དཔལ་ཨོ་རྒྱན་ཆོས་ཀྱི་རྒྱལ་པོ་ཁྱེད་མཁྱེན་ནོ།ཐུགས་རྗེས་བཟུང་དུ་གསོལ།དབང་བསྐུར་དུ་གསོལ།བྱིན་གྱིས་རླབས་སུ་གསོལ།ལུང་བསྟན་དུ་གསོལ།ཞེས་ཞུས་ཚེ།ཕྱག་གཉིས་བདག་གི་མགོ་ཐོག་ཏུ་བཞག་སྟེ།བུ་ཁྱོད་ལ་སྨིན་བྱེད་ཀྱི་དབང་མཆོག་དམ་པ་ཡོངས་སུ་རྫོགས་པ་ཐོབ་པར་གྱུར་ཅིགསྒོ་གསུམ་རྡོ་རྗེ་གསུམ་གྱི་རོལ་པར་འཕོས་ཤིང་སྨིན་ཅིང་གྲོལ་ནས་ཁམས་གསུམ་ཆོས་ཀྱི་རྒྱལ་པོར་དབང་འབྱོར་ཏེ།འབྲེལ་ཚད་རྣམ་པར་གྲོལ་བའི་ས་ལམ་ལ་སྦྱོར་ནུས་པར་ཤོག་ཅིགད་ཁྱོད་དེ་རུ་སྡོད་ལ་ལེགས་པར་ཉོན་ཅིགདེང་སང་སྙིགས་མ་ལྔ་བདོ་བའི་དུས་ངན་ལ་ཐུག་པས་སྨོན་ལམ་ལས་ཀྱི་འབྲེལ་བའི་སྐྱེས་བུ་རྣམས་གདམས་ངག་གི་ཡང་བཅུད་རྣམས་སྟོན་ལ་ཟབ་ཆོས་རྣམས་ཀྱི་དབང་ལུང་ཐམས་ཅད་རྫོགས་པར་གྱིས་ཤིགགཞི་ཁྲེགས་ཆོད་ཀྱི་ལྟ་བའི་གཏིང་དཔོག་ཅིང་ལ་བཟླ་བ་དང་།ལམ་ཐོད་རྒལ་གྱི་གནད་དོན་དང་ལམ་རྟགས་ཀྱི་ཡོན་ཏན་ཐམས་ཅད་ཁོང་དུ་ཆུད་པར་གྱིས་ཤིགགེགས་སེལ་བདུད་གཅོད་ཟབ་མོ་ཐེག་པ་ཆེན་པོའི་ལམ་དང་འབྲེལ་བའི་སྒོ་ནས་སྟོན་ཅིགདེ་ནི་རྐྱེན་ངན་ཐོག་བརྫིས་སུ་གཅོད་པའི་གདམས་པ།ལྟས་ངན་གཡང་དུ་ལེན་པའི་མན་ངགན་ཚ་ལམ་དུ་སློང་བའི་ཟབ་ཁྱད་ཡིན་ཏེ་འདི་ཡི་གནད་དོན་ཚང་པར་ཤེས་པ་སྔོན་ཡོད་ཀྱང་དེང་དུས་ནི་མེད།དེང་སང་གསང་སྔགས་ཐེག་པ་ཆེན་པོའི་བསྟན་པ་ཉམ་དམའ་བ་ནི་སེམས་ཅན་ལས་དང་བསོད་ནམས་དམན་པའི་སྟོབས་ཀྱིས་སློབ་དཔོན་རྣམས་ཐེག་པ་འོག་མའི་ལམ་བློ་ཡིད་ཀྱིས་རྣམ་པར་རྟོག་པ་མྱོང་ཞེན་ཅན་ལ་དགའ་ཞིང་དེ་མཆོག་ཏུ་འཛིན་ཞིང་གཞན་ལའང་དེ་ལྟར་སྟོན་པ་ཤ་སྟག་ལས་མེད་ལ་གདུལ་བྱ་བསོད་ནམས་དམན་པ་རྣམས་དེ་དང་འཕྲད་པ་ཡིན།དེའི་ཕྱིར་ངས་ཁྱོད་ལ་ཚེ་གཅིག་མངོན་སངས་རྒྱས་པའི་ལམ་བཟང་རྫོགས་པ་ཆེན་པོ་བཤད་དོ།ཞེས་གསང་ཆེན་གཟུང་འཛིན་རང་གྲོལ་གྱི་རྒྱུད་ཆེན་ལུང་ལྟར་གསུངས་པ་བདག་གི་རྒྱུད་ལ་སྤར་གྱིས་བཏབ་པ་བཞིན་གསལ་ཞིང་བརྟན་པར་གྱུར་པ་དང་།ཚེ་འདིར་མངོན་སངས་རྒྱས་པའི་ལམ་བཟང་མྱུར་ལམ་རྫོགས་པ་ཆེན་པོ་འདི་རང་གི་ཉམས་སུ་ལོངས་ལ་གཞན་དག་ལ་ཡང་དག་པར་སྟོན་ཅིགཅེས་ཀྱང་གསུངས་པ་ན།སླར་ཡང་འདི་སྐད་ཅེས་ཞུས་སོ།།རྒྱལ་དང་རྒྱལ་སྲས་ཐམས་ཅད་ཀྱི་སྤྱི་གཟུགས་འགྲོ་བ་ཡོངས་ཀྱི་སྐྱབས་མགོན་རིན་པོ་ཆེ་བདག་གི་ཚེ་འདི་ལ་བསྟན་དང་འགྲོ་བའི་ལེགས་ཉེས་ཅི་ལྟ་བུ་ལགས་བསྟན་དུ་གསོལ།ཞེས་ཞུས་པས།ཨོ་རྒྱན་ཆེན་པོའི་ཞལ་ནས་རིགས་ཀྱི་བུ་དེང་སང་དུས་ངན་སྙིགས་མ་ལ་ཐུག་པ་དང་།སྨོན་ལོག་བདུད་ཀྱི་མགོ་འཕང་མཐོ་རུ་འཕགས་པས་དུས་ངན་པར་གྱུར་བའི་དབང་གིས་ལེགས་པ་ཉུང་ཞིང་ཉེས་པ་ཤིན་ཏུ་མང་བ་ཡིན།ཁྱོད་ཀྱི་ཚེ་སྟོད་འདི་ལ་ཡུལ་ཉེས་ཆེན་པོ་ནི་མེད་དེ།ཚེ་ཡི་སྨད་ཆ་ལ་བབས་པའི་ཚེ་མཐའ་མིའི་རྫས་སྔགས་ཀྱི་རྐྱེན་ལས་ནད་མཚོན་མུ་གེ་ལ་སོགས་པའི་དུ་རུ་ཀ་དར་ནས་སྐྱི་ཟིང་ཟིང་པ་འབྱུང་སྟེ།འོན་ཀྱང་ཁྱོད་ཀྱི་ཚེ་འདི་མ་རྫོགས་ཀྱི་བར་དུ་མདོ་སྔགས་ཀྱི་བསྟན་པ་ལོག་བདུད་ལ་མི་འཆོར་ངེས་པ་ཡིན།དེ་ནས་རེ་ཞིག་ནས་ཡུལ་འདི་རུ་མདོ་སྔགས་ཀྱི་བསྟན་པ་མེ་སྟག་ཙམ་ཡང་མི་གནས་ཤིང་བདུད་བསྟན་མཆེད་དེ་བདེ་བའི་སྐབས་ཏིལ་འབྲུ་ཙམ་ཡང་མི་འབྱུང་།ཁྱོད་ཀྱི་ཚེ་མཇུག་ཏུ་འདུ་བ་རྒྱས་ཤིང་བསྟན་པ་འཕེལ་རྒྱས་འདྲ་བ་འབྱུང་།བདག་གི་གདུལ་བྱའི་ལྷག་མ་ལས་ལྡན་གྱི་སྐྱེས་བུ་མང་པོ་ཚེ་འདིར་རྣམ་པར་གྲོལ་བའི་ས་ལ་སྦྱོར་བའི་ཕྱིར་ཕྲིན་ལས་ཀྱི་བྱེད་པོར་ཁྱོད་འཇིག་རྟེན་ཁམས་སུ་མངགས་པ་ཡིན་ནོ།།དེ་ཕྱིར་དེ་ཡི་ཚུལ་སོམས་ལ་གཞན་དོན་ཅི་ནུས་སུ་བསྒྲུབ་པ་ལ་སྐྱོ་ངལ་མེད་པར་མཛོད་ཅིག་ཅེས་གསུངས་སོ།།དེ་ནས་སྔར་གྱི་མཁའ་འགྲོ་མ་དེས།ད་འགྲོ་འགྲོ་ཞེས་ཟེར་བ་ལ་བདག་གིས་འགྲོ་ཆས་བྱས་པས།མོ་ན་རེ།ཀྱཻ་ཧོ་སྐལ་ལྡན་རིགས་ཀྱི་བུ༎རྨི་ལམ་སྣང་བའི་རྫུན་རིས་འདིར༎འགྲོ་སྡོད་གཉིས་ཀ་ཡོད་མ་ཡིན༎སྣང་བ་གནས་སུ་གྱུར་པ་སྟེ༎དབྱིངས་ལ་གཏོད་དང་དབྱིངས་སུ་སད༎གོའམ་ཞེས་ཟེར་ནས་བདག་ལ་ཐིམ༎དེ་ནས་བདག་གིས་རིག་པ་དབྱིངས་ལ་བཞག་པས་གཉིད་སད་དོ།     །ལོ་ཁྱིམ་དེའི་སྟོན་ཟླ་ཐ་ཆུང་གི་ནུབ་མཁའ་འགྲོ་མ་སེར་མོ་གསེར་བཙོ་མ་ལྟ་བུའི་འོད་འབར་བ་ལའུ་ལྗང་ཁྲ་གྱོན་པ་ཞིག་གིས།རི་བོ་གངས་མེད་རྣོ་རྩེ་ཞེས་པའི་རྩེ་རུ་ལྟད་མོ་ལ་ཨེ་འགྲོ་ཟེར་བ་ལ།བདག་གིས་འགྲོ་ཞེས་སྨྲས་པས་དེ་མ་ཐག་ཏུ་ལག་པ་གཡས་པའི་སོར་མོ་ནས་བཟུང་སྟེ་སྟེང་ཕྱོགས་ནམ་མཁའ་ལ་དཔག་ཚད་བདུན་དུ་འཕགས་པའི་གནས་སུ་ཕྱིན་ཚེ་རི་བོ་ཆེན་པོ་རྒྱ་ཆེ་ལ་དཔངས་མཐོ་བ་ཚད་ཀྱིས་གཞོལ་མི་ནུས་པ་ཞིག་གི་རྩེ་མོར་ཕྱིན་ཏེ་བལྟས་པས་ནུབ་བྱང་འཚམས་ཤིག་ནས་མེ་འབར་ཞིང་འུར་སྒྲས་ས་གསུམ་གཡོ་ལ་འདར་བ་ཞིག་མཐོང་བ་དང་།བདག་གིས་མཁའ་འགྲོ་མ་དེ་ལ་འདི་གར་ཡིན་བྲིས་པས།དེ་ན་རེ།འདི་ཨོ་རྒྱན་རང་བྱུང་གི་དུར་ཁྲོད་ཅེས་བྱ་བ་ཡིན་ཞེས་ཟེར།དེར་ཨེ་འགྲོ་སྨྲས་པས།འགྲོ་ཟེར་ནས་ཕྱིན་པས་ས་གཞི་ཐམས་ཅད་རུས་པ་སྐམ་པོ་སྤུངས་པའི་རི་བོ་དགུང་ལ་སྙེགས་པའི་ཡོངས་སུ་བསྐོར་བའི་དབུས་སུ་མི་ལྤགས་རློན་པའི་ཐང་ཆེན་པོ་ཚད་དང་རྒྱ་དཔག་ཏུ་མེད་པ།གནས་དེའི་ཐོ་ཕྱི་ཉེ་འཁོར་ཀུན་ཏུ་རྩ་དང་ཤིང་ཐམས་ཅད།མདའ་མདུང་རལ་གྲིའི་ནགས་ཚལ་གྱི་རྣམ་པ།ཁྲག་རྣག་ཆུ་སེར་གྱི་ཆར་བ་འབབ་པ།མེ་ལྕེ་དམར་ནག་གི་སྤྲིན་དཔུང་འཁྲིགས་པ།ས་གཞི་ཐམས་ཅད་དུ་མི་རོའི་གྲམ་ཁྲོད་བརྡལ་བ།ཁྲག་མཚོ་དམར་པོས་མཐའ་ནས་བསྐོར་བ།ཐུན་དང་མཚོན་ཆའི་ཚོགས་སྐྱིན་ཐང་ལྟར་དུ་འཚུབ་པ།སྒྲ་གྲགས་ཚད་ཐམས་ཅད་ཕཊ་ཕེམ་བྷྱོ་བཟློག་གི་འབྲུག་སྒྲ་སྟོང་དགོད་པའི་ང་རོ་ལྟར་སྒྲོག་པ།གཅན་གཟན་གདུག་པ་ཅན་སྣ་ཚོགས་ཀྱིས་ངར་སྐད་སྒྲོག་ཅིང་རྒྱུག་མཆོང་བྱེད་པའི་གནས།རབ་ཏུ་འཇིགས་ཤིང་ཡ་ང་བའི་དབུས་ཐང་པོ་ཆེ་དེ་རུ་མི་མགོ་སྐམ་པོས་ཁ་བད་བྱས་ཤིང་།རྙིད་པས་རྩིག་པ་བྱས་པ།རློན་པས་རྨང་བཏང་བའི་གཞལ་ཡས་ཁང་ཡངས་ཤིང་རྒྱ་ཆེ་བའི་ནང་དུ་མི་རོ་གསར་རྙིང་མང་པོ་བརྩེགས་པའི་ཁྲིའི་སྟེང་དུ་པདྨ་དང་ཉི་མའི་གདན་ལ་ཡེ་ཤེས་ཀྱི་མཁའ་འགྲོ་མ་རྡོ་རྗེ་ཕག་མོ་ཡིན་སྐད་པའི་མཁའ་འགྲོ་མཐིང་ནག་ཁྲོས་ཤིང་གཏུམ་པའི་སྤྱི་བོར་ཕག་ཞལ་ནག་པོ་གྱེན་དུ་ངུར་བས་དཔའ་བོ་དང་མཁའ་འགྲོ་མ་རྣམས་དབང་དུ་སྡུད་པ།ཕྱག་གཡས་པས་གྲི་གུག་ནམ་མཁའ་ལ་ཕྱར་ཞིང་གཡོན་པས་ཐོད་ཁྲག་ཐུགས་ཀར་བསྣམས་པ་སྐུ་གཅེར་བུ་མི་མགོའི་ཕྲེང་བས་དོ་ཤལ་བྱས་པ།འཇིགས་ཤིང་བལྟར་མི་བཟོད་པ་ཞིག་གི་གཡས་སུ་མཁའ་འགྲོ་མ་ཡེ་ཤེས་མཚོ་རྒྱལ་སྐུ་མདོག་དམར་ནག་ཤིན་ཏུ་ཁྲོས་པའི་ཉམས་ཅན་གཡས་ལྕགས་ཀྱུ་དང་གཡོན་པས་བྷན་ཐོད་བསྣམས་པ།གཡོན་ཏུ་བལ་མོ་ཤཱཀྱ་དྷེ་ཝ་ཞེས་བྱ་བ་ཁྲོ་མོ་ནག་མོ་ཐོད་དབྱུག་དང་ཐོད་ཁྲག་བསྣམས་པ།དེ་མཐར་རིགས་ལྔ་དབྱིངས་ཀྱི་ཌཱ་ཀྐི་ཁྲོ་མོ་མི་སྲུན་འཇིགས་པའི་ཆ་ལུགས་ཅན་ལ་མཁའ་འགྲོ་མ་བྱེ་བ་འབུམ་གྱིས་བསྐོར་བ།ལ་ལ་ནི་སྔོ་སེང་།ལ་ལ་ནི་དཀར་མོ།ལ་ལ་ནི་དམར་མོ།ལ་ལ་ནི་ལྗང་མོ།ལ་ལ་མཐིང་ནག་ལ་སོགས་པས་ཁ་དོག་དང་ཆ་ལུགས་མ་ངེས་པ།སྤྲུལ་བ་སྣ་ཚོགས་ཀྱི་རོལ་གར་བསྒྱུར་བའོ།དེ་ནས་བདག་གིས་མཁའ་འགྲོ་མ་རྣམས་ལ་གུས་པས་ཕྱག་འཚལ་ཏེ་ཐལ་མོ་སྦྱར་ནས་འདི་སྐད་ཅེས་ཞུས་སོ།ཀྱཻ།སྔོན་ནས་ལས་འབྲེལ་ལྷག་པའི་ལྷ༎མཁའ་འགྲོ་གཙོ་ལ་གུས་ཕྱག་འཚལ༎བདག་རྒྱུད་བྱིན་གྱིས་བརླབ་ཏུ་གསོལ༎ཡེ་ཤེས་མཁའ་འགྲོ་སྒྲུབ་ཐབས་ཀྱི༎བསྐྱེད་རྫོགས་ཟབ་མོ་བསྟན་དུ་གསོལ༎ཞེས་ཞུས་པའི་ལན་དུ།མཁའ་འགྲོའི་གཙོ་མོ་གསུམ་གྱིས་དབྱངས་གཅིག་དང་དགོངས་པ་གཅིག་གིས་འདི་སྐད་ཅེས་གསུངས་སོ།ཀྱེ་ཧོ།སྐལ་ལྡན་རིགས་ཀྱི་བུ།།དེང་སང་འཇིག་རྟེན་བོད་ཡུལ་ན༎གཏེར་སྟོན་སྐད་པ་མང་ལགས་ཏེ༎མཐོ་ལ་རློམས་ཞིང་གཡོ་དང་སྒྱུས༎བསམ་སྤྱོད་བརྩམ་བཅོས་མང་ལ་ལྟོས༎འགྲོ་དོན་འབྱུང་བ་ཕར་ཞོག་དང་༎རང་མགོ་རང་གིས་བསྐོར་ལ་ལྟོས༎ལ་ལ་ལོག་པ་བདུད་ཀྱི་བརླབས༎ལ་ལ་སེམས་འཛིན་ཉམས་ཀྱིས་བསླུ༎ལ་ལ་མཐོ་རློམ་ཆོ་ལེ་འདོམ༎གཏེར་ཆོས་ཕབ་པའི་དགོས་པ་མེད༎མཐའ་མི་དབུས་སུ་རྡིབ་པ་ཡིས༎ལོག་པའི་ཆོས་ཀྱི་སྤྲིན་དཔུང་གིས༎དམ་ཆོས་ཉིན་བྱེད་སྒྲིབ་ལ་ལྟོས༎ངལ་བ་དོན་མེད་སྤྱོད་པ་སྤོངས༎ཁྱོད་ཀྱང་གདུལ་བྱའི་ལྷག་སྡུད་ལས༎བསྟན་པ་རིང་དུ་གནས་པ་ལ༎བློ་ཐག་རིང་དུ་མ་བསྐྱེད་ཅིག།སྤྲེལ་དམར་ཐལ་མོ་བརྡེབ་པ་ལས༎རཀྟ་དམར་པོའི་ཆར་བ་འབེབས༎མེ་ཁྱུང་གཤོག་པ་གཡོ་བ་ལས༎སྔོན་མོ་ལྕགས་ཀྱི་ཡོ་ལང་གཡོ༎གསེར་ཁྱི་སེར་པོའི་ངར་སྐད་ཀྱིས༎ས་འོག་དབྱར་རྒྱུ་འདར་བ་དང་༎གསེར་ཕག་ས་སློག་བྱེད་པ་ལས༎དུག་སྦྲུལ་ནག་པོ་མལ་ནས་སློང་༎ཞེས་སོགས་མང་དུ་བཤད་པའི་མཐར།མཁའ་འགྲོ་འདུས་པ་གྲི་གུག་འབར་བའི་རྒྱུད་དང་བདུད་གཅོད་ཟང་ཐལ་སྒོ་འབྱེད་རྣམས་གསུངས་ནས་མཐར།བུ་ཁྱོད་ལ་ལས་ལྡན་གྱི་སློབ་བུ་མཆོག་བཅུ་དྲུགཕྲན་བརྒྱ་ཕྲག་དང་ཐར་བའི་ས་བོན་ཐེབས་པ་སྟོང་དང་སུམ་ཅུ་རྩ་ལྔ་འབྱུང་སྟེ།གཏེར་ཆོས་ཡུན་རིང་པོར་གནས་བའི་དུས་མ་ཡིན་ཏེ།ལས་ལྡན་གྱི་སློབ་མ་རྣམས་ལ་སྟོན་ལ་ཉམས་སུ་ལོངས་ཞེས་བསྒོས་ཤིགད་ནི་ཀླ་ཀློའི་བསྟན་པ་མགྲོན་ཐབས་སུ་སླེབས་ནས་ཡུལ་ས་འཛིན་པའི་དུས་ལ་ཐུག་པས་བློ་ཐག་མ་རིང་ཤིགགཏེར་ཆོས་དང་བསྟན་བཅོས་ཀྱི་ཆེད་དུ་དཀའ་ཚེགས་བྱ་བ་བྱིས་པའི་རྩེད་མོ་ཙམ་དུ་ཟད་དོ།ཞེས་ཟེར་ཞིང་།ཀྱཻ།སེམས་མ་ཡེངས་རིག་པ་དབྱིངས་ལ་གཏོད།དབྱིངས་ལྷུན་གྲུབ་བདེ་ཆེན་ཁང་བཟང་ན༎མ་མཁའ་འགྲོས་གར་སྒྱུར་རོལ་བར་ལྟོས༎དཔལ་རིགས་ལྔ་དགྱེས་པའི་ཞལ་རས་བཞད༎མ་མཁའ་འགྲོའི་སུན་མ་གྲོགས་སུ་བསྡེབས༎གནས་སྲིད་ལས་དབེན་པའི་ས་ལ་སླེབ༎ཚུལ་དེ་ལྟར་མི་ལྡན་སྐལ་མེད་རྣམས༎བདུད་སྲིན་པོའི་གྲལ་དུ་ལྷུང་ནས་སུ༎ཡར་ཐར་པའི་ལམ་སྒོ་འགགས་ལ་ལྟོས༎དོན་དེ་ཕྱིར་གདོད་མའི་མགོན་པོའི་ཀློང་༎དུས་མི་འགྱང་མྱུར་དུ་སླེབ་པར་མཛོད༎ཕཊ་ཕཊ་ཕཊ།ཅེས་སྒྲ་དྲག་པོས་གཉིད་སད་དོ།    །

མུ་མཐུད་དུ་འགོད་རྩིས་ཡིན།

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔