ཁྲག་འཐུང་བདུད་འཇོམས་གླིང་པའི་རང་རྣམ། སྒྲ་ཡིག ༡༥ རྫོགས་སོ།།

དགུང་ལོ། ༦༡

དེ་ནས་ལོ་གྲངས་དྲུག་ཅུ་རེ་གཅིག་ལ་བབས་ཚེ། བྱིས་པ་དཀར་པོ་ལྭ་བ་དཀར་པོ་གྱོན་པ་བདག་ལོ་བརྒྱད་ནས་སུམ་ཅུར་མ་བརྒལ་གྱི་བར་དུ་མཚན་མོ་རྨི་ལམ་ན་དབྱེར་མེད་དུ་འགྲོགས་པ་ལས།ལོ་སུམ་ཅུ་སོ་གསུམ་ནས་ནུབ་གཅིག་འདི་སྐད་ཟེར།འོ་ད་ནི་ཁྱོད་ཀྱི་ལྟ་བ་མདོ་ཙམ་ཤེས་འདུག་པ་ངའི་དྲིན་ཡིན་པས་ཤེས་པར་གྱིས།ང་ནི་ལྷ་ཕྲུག་དུང་གི་རྣ་བ་ཅན་བྱ་བ་ཡིན།འཕགས་མཆོག་ཐུགས་རྗེ་ཆེན་པོས་ཁྱོད་ཀྱི་ཟླ་གྲོགས་སུ་མངགས་པ་ཡིན།ད་ནི་རེ་ཞིག་ང་དང་ཁྱོད་གཉིད་མི་འཕྲད་ཟེར་ནས་ཡལ་སོང་ཡང་།དེའི་ནུབ་བྱུང་ནས་ཁྱོད་དེང་སང་གི་དཔལ་དང་སྙན་གྲགས་ཀྱི་ཡོན་ཏན་ཐམས་ཅད་འཛོམས་པ་ལ་དགའ་སྟེ།ད་དབྱར་ཟླ་གཉིས་པའི་ནང་དུ་སྦྲ་ཞིག་ཕུབ་ལ་དེ་ནང་དུ་སྡོད་དང་སྦྲ་ཡི་མཐུན་རྐྱེན་ནི་འགྲུབ་སླ་ཞིང་དེ་ནས་གར་ཕྱིན་ཀྱང་ཚེགས་མེད་ཡིན།ཞེས་ཟེར་བ་ལ།ངས་དགོན་པ་འདིར་འདུ་ཁང་ཆེན་པོ་ཞིག་རྩིག་ཟེར་འདུག་པའི་དེ་བདེན་ན་དེར་བདེ་བར་འདུག་སྙམ་གྱི་ཞེས་སྨྲས་ཚེ་དེ་ན་རེ།ད་ལོ་བརྩིག་པར་བྱས་ན་འགྲུབ་འགྲུབ་འདྲ་སྟེ་མ་བྱུང་།ད་ནི་ཡུན་རེ་ཞིག་ཏུ་ཐོག་ཏུ་ཕེབ་དུས་མི་འོང་།སང་ཕོད་རྫ་རྒྱལ་དགོན་དུ་འགྲོ་རྒྱུ་འབྱུང་སྟེ།དམག་དང་འཁྲུགས་པ་ཆེན་པོ་ཡུལ་འདིའི་ཉེ་ས་རུ་ཨེ་འབྱུང་སྙམ་སྟེ་འདི་ཀ་ལ་སྐྱོན་ཆེར་མེད།ཨེ་ཨཱེ།ཆུང་ནས་ལྷན་ཅིག་སྐྱེས་པའི༎གྲོགས་པོ་ང་ལ་ཉོན་དང་༎སྣང་སྲིད་སྣོད་བཅུད་ཐམས་ཅད༎རྨི་ལམ་སྒྱུ་མའི་གྲོང་ཁྱེར༎བརྟན་གནས་མེད་པར་ཨེ་གོ།འདུས་བྱས་ཆོས་རྣམས་ཐམས་ཅད༎རང་སྣང་འཁྲུལ་བའི་སྣང་བ༎གནས་འགྱུར་བྱེད་པ་ཨེ་གོ།རྙེད་ཚོལ་གསོག་འཇོག་ཐམས་ཅད༎བྱིས་པའི་རྩེད་མོ་བཞིན་དུ།།སྙིང་པོ་མེད་པ་ཨེ་གོ།བུ་དང་ཆུང་མའི་ཆེད་དུ༎ཚེ་གཅིག་སྡིག་ལ་འབད་ཀྱང་༎རྣམ་སྨིན་སྒོས་ཁུར་ཨེ་གོ།ཡུལ་དང་ཁང་ཁྱིམ་ཟས་ནོར༎གཏན་ལོངས་སྤྱོད་པར་རློམས་ཀྱང་༎རྨི་སྣང་སད་པ་བཞིན་དུ༎བརྟན་གནས་མེད་པ་ཨེ་གོ།ཚེ་ཟད་མི་རྒན་དག་གིས༎གཏན་དུ་སྡོད་གྲབ་བྱེད་ཀྱང་༎སྡོད་ལོང་མེད་པ་ཨེ་གོ།བྱས་བྱས་བྱ་བ་མང་པོ༎ཆོག་ཤེས་མེད་པར་སྤྱོད་མོད༎བྱ་བ་ཟིན་དུས་མེད་དེ༎ཕ་རོལ་འགྲོ་བ་ཨེ་རིག།འཁོར་བ་འདི་ལས་ཐར་ཐབས༎འགྲུབ་པའི་སྐྱེས་བུ་མཆིས་ན༎དོན་ལྡན་ཡིན་པ་ཨེ་གོ།ཁ་ལག་དལ་དུ་མེད་པའི༎དགེ་སྦྱོར་བསགས་གྲངས་མང་ཡང་༎འཁོར་བའི་སྣོན་པར་ཨེ་གོ།རང་གཞི་ཀུན་ཏུ་བཟང་པོ༎སྤྲོས་བྲལ་ནམ་མཁའི་ཁོར་ཡུག།རང་ས་འཛིན་དགོས་ཨེ་གོ།རང་ཐོག་རང་ས་བཟུང་ན༎ཆོས་ཀྱི་དམ་པ་ཆོས་ཉིད༎རང་དབང་ཐོབ་པ་ཨེ་གོ།གཞི་སྣང་དག་པའི་འཁོར་མང་༎མངོན་དུ་གྱུར་པ་ཉིད་ལས༎ཞིང་ཁམས་མེད་པ་ཨེ་གོ།བཤད་དང་བརྗོད་པ་བྲལ་བའི༎ཆོས་ཉིད་མངོན་དུ་བྱ་བ༎ཐེག་པའི་ཡང་རྩེ་ཨེ་གོ།གོ་ན་བྱར་མེད་ངང་ནས༎ལྷུན་གྲུབ་དབྱིངས་ལ་ལྟོས་དང་༎མ་དག་ལས་ཀྱི་བསྐལ་པ༎དག་དབྱིངས་དྭངས་མར་འཕོས་འགྲོ༎དག་དབྱིངས་དྭངས་མར་འཕོས་ཚེ༎ཆོས་སྐུ་སྤྲོས་མཐའ་བྲལ་བར༎མངོན་རྫོགས་སངས་རྒྱས་ཐོབ་འོང་༎ང་འགྲོ་པོ་ཏ་ལ་རུ༎ཕྱིར་མི་ལྡོག་པར་འགྲོ་སྟེ༎འགྲོ་དང་འགྲོ་ཡུལ་བྲལ་བའི༎ངང་ལ་ཆམ་བརྡལ་ཡན་གཏོང་༎ཞེས་ཟེར་ཡལ།སྟོན་ཟླ་ར་བའི་ནང་དུ་རྫ་རྒྱལ་དགོན་དུ་སྐྱེས་བཏེགས་སོང་།དེར་སེར་འཕྲེང་གིས་རོལ་བསུ་བྱས་ནས་དཔལ་དགེ་སྤྲུལ་སྐུ་ཁྲི་ཁར་མངའ་གསོལ།དེ་ནས་དགུན་ཟླ་འབྲིང་པོ་ནས་བཟུང་དཔྱིད་ཟླ་འབྲིང་པོའི་ནང་བར་དུ་ཆོས་ཁྲིད་བཤད་ནས།དཔྱིད་འབྲིང་པོའི་སྨད་དུ་ཡང་སྒར་བཏེགས་ནས་ཁྲི་བར་མ་ཞེས་བྱ་བའི་ལུང་པར་འཕོས།  

དགུང་ལོ།༦༢

དེ་ཚེ་རང་ལོ་དྲུག་ཅུ་རེ་གཉིས་ལ་བབས་ཚེ། ཧོར་ཟླ་བཞི་བའི་ཚེས་བརྒྱད་ཀྱི་ནུབ་རྨི་ལམ་ན།བུ་མོ་ཞིག་གིས་ང་ནི་བཟང་པོ་སྐྱོང་མ་ཞེས་བྱ་བ་ཡིན།གསེར་སྟོད་འབྲོང་རི་སྨུག་པོའི་ནང་དུ་ལྟད་མོ་ལ་ཨེ་འགྲོ་ཟེར།དེ་ལ་འདི་སྐད་སྨྲས།རི་བོ་ཞིག་ཡིན་པས་བལྟ་ས་ཅང་མེད་སྨྲས་པ་དང་།མོ་ན་རེ།ཕྱི་རི་བོ་ཡིན་ནའང་ནང་ཡུལ་ཆེན་པོ་ཞིག་ཡིན་ཟེར།ཡང་ངས་འདི་སྐད་སྨྲས།རི་བོ་ཆུང་ངུ་དེ་ལ་ཡུལ་ཆེན་པོ་ཤོང་མི་འོང་།ཞེས་སྨྲས་པ་དང་།མོ་ན་རེ།རྨི་ལམ་གྱི་ཡུལ་ཁམས་ཆེན་པོ་དང་མི་མ་ཡིན་གྱི་གྲོང་ཁྱེར་འདྲ་མཉམ་ཡིན་ཅེས་ཟེར་བ་བདེན་འདུག་གི་བསམ་ནས་དེ་དང་ལྷན་དུ་སོང་ནས་ཕྱིན་ཚེ།རི་བོ་དེ་ཡི་རྩ་བར་སླེབ་པ་ན་རི་བོ་མི་མཐོང་བར་མཁར་ཆེན་པོ་རྩེ་མོ་དགུང་ལ་སྙེགས་པ་ཞིག་གི་ཁ་བད་གསེར་ལས་བྱས་པ་ཁྲོ་ཆུ་ཞུན་མས་སྐེད་བྱས་པ།གཡུ་ཡིས་སྨད་དང་རྨང་བྱས་པ་ཞིག་གི་ནང་དུ་ཕྱིན་པ་ན་མཁར་ཐོག་བརྩེགས་ལྔ་བ་ཞིག་ཏུ་འདུག་གོམ་མོ་ཤ་ཟ་དང་རོ་ལང་།ཐེའུ་རིང་གི་སྡེ་ཚོགས་བསམ་གྱིས་མི་ཁྱབ་པ་འཚོགས་འདུགབདག་གིས་ཁྱེད་ཅག་འདིར་ཅི་ལ་འཚོགས་པ་ཡིན་དྲིས་ཚེ།མི་ནག་པོ་ཁ་སྤུ་ཡོད་པའི་འགྲམ་པའི་གཡས་གཡོན་དུ་རྒྱ་ཁྲིད་པ་ཞིག་གིས་ངེད་འབྲོང་རི་སྨུག་པོའི་བྲན་གཡོག་གི་ཚོགས་ཡིན་ཞེས་ཟེར།དེ་ནས་ཐོག་བརྩེགས་གཉིས་པའི་ནང་དུ་ཕྱིན་ཚེ་དེ་ན་བླ་མ་ཞིག་ཁྲི་ཆེན་དུ་འདུག་པ་ལ་བན་དེ་དང་མོན་པ་ཨ་ཙ་ར་མང་པོས་གང་འདུག་པ།དེ་དག་ལ་ཁྱོད་ཚོ་སུ་ཡིན་དྲིས་ཚེ།ངེད་ཅག་བླ་མཆོད་ཀྱི་སྡེ་ཡིན་ཟེར།དེ་ནས་ཐོག་བརྩེགས་གསུམ་པའི་ནང་དུ་སོང་ཚེ་ཤ་མཁར་མང་པོས་གང་འདུག་པའི་ནང་ན་མི་སྔོ་ནག་སྨིན་མ་དམར་བ་དང་།མི་དམར་ནག་སྨ་ར་དང་སྨིན་མ་ནག་པ།མི་སེར་པོ་སྨ་ར་དང་སྨིན་མ་དམར་བ་གསུམ་གྱིས་ཤ་ལ་སྟ་རེས་གཅོད་འདུགདེ་དག་ལ་ཁྱེད་ཅག་སུ་ཡིན་དྲིས་ཚེ་མི་སེར་པོ་དེས་ངེད་ཚོ་གཞི་བདག་གི་ཤ་གཉེར་ཡིན་ཞེས་ཟེར།དེ་ནས་ཐོག་བརྩེགས་བཞི་བའི་ནང་དུ་སླེབ་ཚེ་དེའི་ནང་ཕྱོགས་མཚམས་ཁོར་ཡུག་ཏུ་ཁང་སྒོ་མང་པོས་བསྐོར་ནས་ཡོད་པའི་དབུས་ན་དར་ཟབ་སྣ་ཚོགས་བརྩེགས་པའི་ཁྲི་ཡི་སྟེང་དུ་བུད་མེད་སྔོ་ལྗང་འོད་ཟེར་འབར་བ་དར་སྣ་ཚོགས་ཀྱི་གོས་ཀྱིས་བཀླུབ་ཅིང་རིན་པོ་ཆེའི་རྒྱན་རྫོགས་པ་ལ་བུད་མེད་མཛེས་མ་གཞོན་ནུ་མ་མང་པོས་བཀུར་སྟི་བྱེད་དུ་འདུག་གོཡང་ཁྱེད་ཅག་སུ་ཡིན་དྲིས་ཚེ།བུ་མོ་ཞིག་གིས།དབང་ཆེན་ས་ཡི་བདག་པོ།འགྲོ་བ་མི་ཡི་མགོན་པོ།འཕགས་མཆོག་ཐུགས་རྗེའི་མངའ་བདག་དང་ཞལ་མི་གཉིས་པ་དཔལ་ལྡན་བྲག་ལྷ་མགོན་པོའི་བཙུན་མོ་གཡུ་ལྕམ་མ་ཤར་གཉན་པོ་གཡུ་རྩེའི་སྲས་མོ་འཕགས་མ་ཁྲོ་གཉེར་མ་ཡི་སྤྲུལ་བ་ཡིན་ཟེར།དེ་ནས་ཐོག་བརྩེགས་ལྔ་བའི་ནང་དུ་ཕྱིན་ཚེ་སྤྲིན་དང་ན་བུན་འཇའ་ཚོན་འཁྲིགས་པའི་ཀློང་དུ་དར་མཐིང་གའི་ལྡིང་གུར་ཕུབ་པའི་དབུས་སུ་རིན་པོ་ཆེ་གསེར་གྱི་ཁྲི་ཁར་ཟ་འོག་འབོལ་བརྩེགས་མཐོ་བའི་སྟེང་དུ་མི་སྨུག་ནག་དར་དཀར་གྱི་ལ་ཐོད་གྱོན་པ་གོས་སུ་ལེ་བརྒན་མཐིང་གའི་ན་བཟའ་གསོལ་བ་ཞིག་འགྱིང་སྟབས་སུ་བཞུགས་འདུགདེ་ལ་འཁོར་གྱི་ཚོགས་ནི་བརྗོད་ཀྱིས་མི་ལང་ངོ་།མི་དེ་ན་རེ།འོ་ཁྱོད་ཁྱེའུ་ཆུང་ལོ་ཙཱ་ཡིན་འང་ཟེར།བདག་གིས་ལེགས་སོ་ཞེས་སྨྲས།འདི་ལ་གདན་ཞིག་ཐོངས་དང་གཏམ་ཞིག་བཤད་ཅེས་ཟེར།དེ་ནས་དགེ་ལེགས་རབ་བརྟན་གྱིས་བདག་ལ་འབོལ་དང་དར་ཟབ་ཀྱི་གདན་ཞིག་བཏིང་ནས་འདུགམི་ཆེན་དེས་ཁྱོད་དེ་སྟེང་ནས་ཡུན་ཅིག་སྡོད་དང་ཟེར།བདག་དེ་རུ་བསྡད་ཚེ་ཁོ་ན་རེ།ཁྱོད་གཏེར་སྟོན་ཡིན་སྐད་འདུག་གི་ཨ་ཟེར།ཡིན་ལགས་ཞེས་སྨྲས་ཚེ།ཁོ་ན་རེ།ཁྱེད་ལ་ཞལ་གཟིགས་ལུང་བསྟན་མང་པོ་ཡོད་དམ་མེད་ཅེས་ཟེར་བ་ལ།བདག་གིས་འདི་སྐད་སྨྲས།ང་དང་པོ་མ་ལས་སྐྱེས་ནས་བཟུང་རིག་འཛིན་དཔའ་བོ་མཁའ་འགྲོའི་ཞལ་མཐོང་བ་དང་དེ་དག་གིས་ལུང་བསྟན་པ་ཚད་མེད་དེ།ཁྱད་པར་དུ་ཨོ་རྒྱན་ཆེན་པོས་རྗེས་སུ་བཟུང་ནས་སྐད་ཅིག་ཙམ་ཡང་འབྲལ་བ་ཡོད་མ་མྱོང་།ནུབ་བདེ་བ་ཅན་ནས་སངས་རྒྱས་འོད་དཔག་ཏུ་མེད་པ་དང་མཇལ་ནས་བདེ་ཆེན་ཞིང་གི་སྒྲུབ་ཐབས་ཀྱི་དབང་དང་ལུང་ནོད།དེ་བཞིན་དུ་སངས་རྒྱས་སྨན་གྱི་བླ་དང་མཇལ་ནས་སྒྲུབ་ཐབས་གནང་།རྡོ་རྗེ་འཆང་དང་མཇལ་ནས་གདམས་པའི་མན་ངག་གནང་།རིག་འཛིན་བརྒྱད་དང་མཇལ་ཚེ་སྒྲུབ་སྡེ་བརྒྱད་ཀྱི་དབང་ལུང་གནང་།ཟུར་པོ་ཆེ་ཤཱཀྱ་འབྱུང་གནས་ཟུར་ཆུང་ཤེས་རབ་གྲགས་པ་རྣམས་ཀྱི་ཞལ་མཇལ་ནས་རྫོགས་པ་ཆེན་པོའི་སྐོར་གནང་།ཀློང་ཆེན་རབ་འབྱམས་ཀྱི་ཞལ་ཐེངས་གསུམ་དུ་མཇལ་ནས་རྫོགས་པ་ཆེན་པོའི་ལྟ་སྒོམ་ཡོངས་རྫོགས་གནང་།ཕ་ཅིག་དམ་པ་རྒྱ་གར་གྱིས་སྟོང་ཉིད་ལྟ་བའི་གནད་དོན་ཚུལ་བཞིན་དུ་གསུངས།མ་ཅིག་ལབ་སྒྲོན་དང་མཇལ་ནས་བདུད་གཅོད་ཟབ་མོའི་གདམས་པ་གནང་།འཇམ་པའི་དབྱངས་དང་མཇལ་ནས་འཇམ་དཔལ་གསང་བ་འདུས་པའི་དབང་ལུང་གནང་།སྤྱན་རས་གཟིགས་དང་མཇལ་ནས་སྒྲུབ་ཐབས་ཀྱི་དབང་ལུང་དང་ལྷ་ཆེན་མ་ཧཱ་དཱེ་ཝའི་སྒྲུབ་ཐབས་ཀྱི་དབང་དང་ལུང་གནང་།གསང་བདག་ཕྱག་ན་རྡོ་རྗེ་དང་མཇལ་ནས་གསང་བདག་རང་གི་སྒྲུབ་ཐབས་དང་གནོད་སྦྱིན་དམར་ནག་དང་གཟའ་བཙན་རྣམས།དམ་ཅན་རྡོ་རྗེ་ལེགས་པ་རྣམས་ཀྱི་སྒྲུབ་ཐབས་དག་གི་དབང་ལུང་ཡོངས་སུ་རྫོགས་པ་གནང་།ཡང་འཇམ་དཔལ་སྨྲ་བའི་སེང་གེ་དང་མཇལ་ནས་འཕོ་བ་ཆེན་པོའི་གདམས་པ་རྣམས་གནང་བ་ཡིན།གཞན་ཡང་ལྷ་དང་བླ་མ་ཡི་དམ་སྔགས་སྲུང་མ་མོ་རྣམས་ཀྱིས་ཞལ་གཟིགས་དང་ལུང་བསྟན་གྲངས་མང་པོ་ཐོབ་བྱུང་སྟེ་བརྗོད་ཚོད་མི་འདུག་ཅེས་སྨྲས་པ་དང་།ད་ནི་ཕྱི་འཁྲུགས་ཁྲག་གི་ཆར་པ་འབབ་པས་བཟློག་ཐབས་དཀའ་སྙམ།གསེར་ཐལ་འདི་ལ་ལེགས་ཉེས་ཇི་ལྟར་ཡིན་དྲིས་ཚེ།ངའི་བུ་དེས་ཁྲིམས་དྲང་པོར་སྲུང་འདུག་པས་ཡུལ་འཇིགས་ཆེན་པོ་མེད་ཅེས་ཟེར།འཁྲུགས་པ་ཆེན་པོ་ཨེ་ཡོད་ཅེས་དྲིས་ཚེ།དེ་ན་རེ།བཤད་མི་དགོས་གོ་སླ་བར་ཐུག་ཡོད་ཅེས་ཟེར།སྐྱེས་བུ་དམ་པ་ཁྱོད་ལ་ངས་འདི་འབུལ་ཟེར་ནས་རྡོ་ཡི་སྒྲོམ་བུ་གཅིག་གནང་བྱུང་སྟེ།ཁྱོད་ལ་ཤར་གཉན་པོ་གཡུ་རྩེས་ནོར་བུ་ཞིག་གནང་ཡོད་པ་དེ་རྒྱ་ནག་རྒྱ་མཚོའི་ནང་གི་ཀླུ་མོ་རིན་ཆེན་འཛམ་གླིང་དབང་མོས་བཙུན་མོ་ལ་རྫོངས་སུ་བསྐྱལ་བ་ཡིན་ཏེ་བཀུར་བསྟི་གྱིས་ཤིགགསེར་གྱི་ལུང་འདི་ཁྱོད་ཀྱི་གདུང་རྒྱུད་རྣམས་ཀྱིས་མ་དོར་དང་ཕྱི་ཕུག་ཀུན་ཏུ་དགེ་ཞིང་ལེགས་པ་འདྲ།ད་ནི་ཡུན་རིང་པོར་མ་ཕྱི་བར་རང་ཡུལ་ལ་ཕེབས་ཤོགདམག་འཁྲུགས་ཀྱིས་ལམ་འགག་པ་འབྱུང་གི་ཞེས་ཟེར།དེ་ནས་སྔར་གྱི་བུ་མོ་དེས་འགྲོ་རན་ཟེར་ནས་བཞིན་ལ་ཕུ་བཏབ་པའི་སྣང་བ་ཤར་བས་གཉིད་སད་ནས་ནམས་ཡང་ལངས་འདུགདེ་ནས་དཔྱིད་ཐ་ཆུང་ཟད་མཚམས་སུ་རང་ཡུལ་དུ་ཆས་ཏེ་ལམ་དུ་ཞུགས་སོ།དབྱར་འབྲིང་པོའི་སྨད་དུ་རང་ཡུལ་ལ་སླེབས།དེ་ནས་དབྱར་ཐ་ཆུང་ནང་དུ་དམག་འཁྲུགས་ཆེན་པོ་འབྱུང་བའི་ལྟས་བྱུང་ཚེ།གཞན་ཕལ་བ་ཐམས་ཅད་ཀྱིས་འབྲོས་དགོས་ཞེས་ཟེར་བས།བདག་གིས་ཀྱང་སྐྱེས་འདེག་དགོས་པ་རེད་སྙམ་ཚེ།རྗེ་བཙུན་འཕགས་མ་སྒྲོལ་མའི་ཞལ་གཟིགས་ནས་བུ་ཁྱོད་ད་ལོ་འབྲོས་མི་དགོས་དང་མི་ཡི་དམག་འཇིགས་མི་འབྱུང་།མཐའ་ཡི་ཀླ་ཀློའི་ཆོ་འཕྲུལ་གྱིས་འབྱུང་བོ་སྲོག་དབུགས་སྡུད་པའི་དམག་འབྱུང་ཡང་འབྲོས་པས་ནི་མི་ཐར།ཞེས་གསུང་ཞིང་མི་སྣང་བར་ཡལ།དེ་ནས་དགུན་ཟླ་ར་བའི་ཚེས་བཅོ་བརྒྱད་ཀྱི་ནུབ་རྨི་ལམ་ན་རྒྱ་མི་མང་པོས་ས་སྟེང་ཁྱབ་འོང་བའི་སྣང་བ་ཤར་ཚེ།དམ་ཚིག་ལྷ་མོ་པྲ་མོ་ཧ་ཞེས་བྱ་བས་ནམ་མཁའི་མཐོངས་ནས་འདི་སྐད་ཟེར།ནག་པོ་རྒྱ་ཡི་དམག་སྣ་དེ༎སྨོན་ལོག་བདུད་ཀྱིས་འདྲེན་པ་ལ༎སེང་གདོང་མ་ཡི་སྒོམ་བཟླས་དང་༎བཟློག་པ་རྟག་ཏུ་བྱ་བ་དང་༎དབང་ཕྱུག་ཆེན་པོའི་ཟླ་སྒྲུབ་ཀྱིས༎རང་མགོ་འདོན་པའི་ཐབས་སུ་བརྩོན༎ཞེས་ཟེར་ཡལ།དེ་ནས་དགུན་ཟླ་ཐ་ཆུང་གི་ཚེས་བཅོ་ལྔ་ལ་བབས་ཚེ།དེ་ནུབ་ཀྱི་རྨི་ལམ་ན་ས་སྤྲིན་དང་འཇའ་ཚོན་འཁྲིགས་པའི་ཀློང་དུ་མཁའ་འགྲོ་ཡེ་ཤེས་མཚོ་རྒྱལ་གྱི་སྐུ་སྟོད་ཡན་ཆད་ངོམ་ནས་འདི་སྐད་གསུང་།ཀྱེ་བུ་ཁྱོད་ཉོན་དང་ཚིག་འགའ་གདམས༎རྣམ་ཐར་ཡི་གེར་འགོད་པ་ནི༎རྒྱལ་བ་གོང་མའི་ཕྱག་སྲོལ་ལགས༎བུ་སློབ་བསྐལ་པ་བཟང་པོ་ལ༎མི་འགྱང་མྱུར་དུ་རྫོགས་ཐབས་མཛོད༎རྒྱལ་སྲས་གཞན་ཕན་མཐའ་ཡས་དང་༎རས་ཆུང་རྡོ་རྗེ་གྲགས་པ་ལ༎ཡི་གེའི་སྐྱོན་སེལ་བྱེད་དུ་ཆུག།ད་ནི་ཅ་ཅོ་འ་འུར་གྱིས༎ལུས་སེམས་གཟིང་བ་འབྱུང་ལ་ལྟོས༎ཞེས་གསུངས་པ་ལ།བདག་གིས་རྒྱལ་སྲས་གཞན་ཕན་མཐའ་ཡས་ཞིང་ཁམས་སུ་གཤེགས་སོང་།རྡོ་རྗེ་གྲགས་པའང་དེ་བཞིན་གྱིས་རྙེད་པར་མི་འགྱུར།ཁྱེད་ཀྱིས་ཅི་གསུངས་ཞེས་ཞུས་པ་དང་།ཧེ་གོ་ན།རྒྱལ་སྲས་གཞན་ཕན་མཐའ་ཡས་དེ༎སྡོང་རིགས་ལུང་རྟོགས་རྒྱ་མཚོ་སྟེ༎ཚེ་སྒྲུབ་ནན་དུ་མ་བསྐྱར་ན༎ཡུན་དུ་མི་བཞུགས་དབྱིངས་ལ་ཆ༎རས་ཆུང་རྡོ་རྗེ་གྲགས་པ་ནི༎སྡོང་རིགས་མཁྱེན་རབ་རྒྱ་མཚོ་སྟེ༎ངེས་མེད་རི་སུལ་མ་ཟིན་ན༎ཡུན་རིང་བཞུགས་པའི་སྐལ་པ་མེད༎དེ་ཕྱིར་ཡུན་རིང་མི་འགྱང་བར༎མྱུར་དུ་ཕོབས་ལ་མཐར་ཕྱིན་མཛོད༎ཅེས་སོགས་ལུང་བསྟན་མང་པོ་ཞིག་གསུངས་ཏེ་བདག་གི་མགོ་ལ་ཕྱག་བྱིལ་མཛད་ནས་མི་སྣང་བར་ཡལ་ལོ།།དེ་ལྟ་ན་བརྗོད་འགྱུར་བཞིན་དད་ལྡན་གྱི་སློབ་མ་རྣམས་ཀྱི་ངོར་རང་ཉིད་ཀྱི་ལོ་རྒྱུས་ཡི་གེར་འགོད་པའི་ངལ་བ་ལྷུར་བླངས་པ་ལས་རེ་ཞིག་ཆོས་ཁྲིད་སོགས་བྱ་བ་གཞན་གྱིས་འགྱང་སོང་བ་ལ།མཁའ་འགྲོས་ཇི་ལྟར་ལུང་བསྟན་པ་བཞིན་མྱུར་དུ་རྫོགས་པར་གྲུབ་པར་བྱས་པ་སྟེ།འོན་ཀྱང་དེ་ཙམ་གྱིས་ཟད་པ་ནི་མ་ལགས་ཀྱང་།ཕལ་ཆེར་བརྗེད་སོང་བ་དང་།ལོ་ཟླ་དང་ཚེས་གྲངས་མི་དྲན་པའི་རིགས་ཀྱང་མ་བྲིས་ཤིང་།གལ་ཆེ་བ་རགས་རིམ་ཙམ་དེར་འདུས་སོ་སྙམ་དུ་བསམ་པའོ།ཞེས་པ་འདི་ཡང་སྔ་མོའི་དུས་ས་ཕོ་བྱི་བའི་ལོར་རང་སློབ་ལུང་ཟིན་གྱི་སྐྱེས་མཆོག་དམ་པ་བླ་མ་ཚེས་བཅུ་ནས་བཀྲ་ཤིས་པའི་ལྷ་རེག་གཅོད་ཌ་རིན་པོ་ཆེའི་ཕྲས་མཛེས་པ་ཁྱད་འཕགས་དང་།མི་རྐང་གི་གླིང་བུ་མཚན་ལྡན་ཟུང་བཅས་ཕུལ་ནས་བསྐུལ་བ་དང་།མི་ཕྱེད་པའི་དད་ལྡན་སློབ་བུ་འཇམ་དཔལ་ནས་ཀྱང་ཌར་འཕན་སེང་གེའི་རི་མོ་བཀྲ་བ་དཔལ་བེའུས་མཚན་པའི་རས་ཁྲ་དང་གཡུ་བྱུར་བཅས་ནན་གྱིས་བསྐུལ་ཞིང་།དེའི་རྗེས་སུ་གསེར་ལྗོངས་བླ་མ་རུང་ནས་སྐལ་བ་དང་ལྡན་པའི་བུ་སློབ་མཆེད་ལྕམ་མང་པོས་དུས་གཅིག་ཏུ་དངུལ་གོས་ཆེན་ཇ་བག་སོགས་ཟང་ཟིང་གི་མཆོད་པ་མང་པོ་དང་།ཚེ་གཅིག་ཏུ་འཇིག་རྟེན་གྱི་བྱ་བ་བྲལ་ནས་དབེན་གནས་བརྟེན་པ་དང་།གཞན་ཡང་ལོ་གྲངས་བཅུ་གསུམ་དང་བཅོ་བརྒྱད་ལ་སོགས་པར་རང་རང་གིས་གང་ནུས་སུ་སྒོམ་སྒྲུབ་ལ་གཞོལ་བར་ཁས་བླངས་པ་སོགས་སྒྲུབ་པ་ཉམས་ལེན་གྱི་མཆོད་པ་རྒྱ་ཆེན་པོ་དང་བཅས་བསྐུལ་བའི་ངོར་འབྲི་བར་བརྩམས་ཤིང་།ཉེ་ཆར་ཡང་སློབ་བུ་མང་པོས་ཡང་དང་ཡང་དུ་བསྐུལ་བ་ལས་བདུད་འཇོམས་རྡོ་རྗེས་བཀོད་པ་ལ་ཡི་གེ་པ་ནི་མཁྱེན་རབ་རྒྱ་མཚོ་དགེ་ལེགས་དཔལ་བཟང་སོགས་ཀྱིས་བགྱིས་ཤིང་། མཁས་དབང་སྤྲུལ་པའི་སྐུ་པདྨ་ལུང་རྟོགས་རྒྱ་མཚོས་ཞུས་དག་ལེགས་པར་བྱས་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག

ཞར་བྱུང་རྣམ་ཐར་གྱི་ཁ་སྐོང་འགའ།སྐབས་ཤིག་ལ་ཁོང་འཛི་རྐ་ཕྱོགས་སུ་བྱོན་ལམ་དུ། སྨར་ཁོག་ཏིས་མགོ་ཟེར་བའི་གྲོང་བ་དེར་རྒན་མོ་བདག་མེད་ཅིག་ཤི་བ་ལ་ཡུལ་མི་ཚོས་ཁོང་གདན་དྲངས་ནས་གཤིན་འཕོ་མཛད་དུ་བཅུགཁོང་གིས་པུར་གྱི་སྔས་སུ་ཞལ་དུ་ཞིག་གསོལ་ནས་འདི་སྐད་དུ།ཕུང་པོ་དབང་སའི་ནང་དུ་སུ་རུ་རུ༎དུ་བ་ནམ་མཁའི་དབྱིངས་སུ་ཐ་ལ་ལ༎རྣམ་ཤེས་བདེ་བ་ཅན་དུ་འཕོ་བར་ཤོག།ཅེས་གསུང་ནས་ཚག་རྡལ་པུར་གྱི་སྔས་སུ་རྡོ་བ་ཞིག་ཡོད་པའི་སྟེང་དུ་སྤྲུགས་ཏེ་སང་ཉིན་དེར་ལྟོས་ཤིག་གསུང་ནས་བྱོན་སོང་།ཕྱིའི་ནངས་པར་རོ་དེ་མི་འདུག་པས་ཀུན་འུར་ལངས་ནས་རོ་སྔས་སུ་བལྟས་པས་ཚག་རྡུལ་ནང་དུ་མིའི་རུས་པ་ཆ་ཚང་གི་དབྱིབས་ཕྲ་བ་འདུག་པས་ངོ་མཚར་དང་ཡིད་ཆེས་བྱུང་ཞེས་ཏིས་མགོ་གྲོང་མིའི་ངག་རྒྱུན་དུ་ད་ལྟའང་འདུག་གོ།ཡང་སྐུ་ཚེའི་སྟོད་དུ་གཞོན་ནུ་ལོ་ཆུང་རྣམས་དང་སྐུ་རྩེད་མཛད་སྐབས་སྐུ་རྗེན་པ་ས་འདམ་ལ་རེག་པས་འདམ་ལ་སྐུ་གཟུགས་སྣ་ཚོགས་བྱོན་པར།འགའ་རེས་ཟན་རྩམ་དང་བག་ཕྱེ་སོགས་བརྫིས་ནས་ཁོང་གི་སྐུ་ཤ་ལ་གཏུག་པས་སངས་རྒྱས་ཀྱི་སྐུ་གཟུགས་སྣ་ཚོགས་བརྐོས་ཕོར་དུ་བཏབ་པར་ལྟར་འོང་།དེ་ལྟར་ཡང་ཡང་བྱས་ཀྱང་སྔར་ལྟར་འོང་ལ།རེ་འགའ་ཐུགས་སུན་ནས་མི་གནང་ངོ་།།ཡང་ཁོང་ཉིད་ལུག་རྫི་མཛད་སྐབས་དགུན་དུས་ཁང་རླུང་ཆེ་བའི་སྐབས་ཁོང་ལུག་ཁྱུ་དང་བཅས་པའི་སྟེང་དུ་ཁ་བ་མི་འབབ་བོ།གཞན་ཡང་འབྲོས་ཕུག་མཁའ་འགྲོའི་འདུ་གླིང་དུ་རི་ཁྲོད་ཀྱི་སྒྲུབ་སྡེ་བཏབ།མདོ་ཐོག་དགོན་དུ་ཟབ་གཏེར་གྱི་འགྲོ་དོན་བསྐྱངས།ཚེ་ལུས་འདིར་གདོས་བཅས་སྒྱུ་མའི་ཕུང་པོ་འཇའ་ལུས་སུ་བཏང་བའི་སློབ་མ་ཡུལ་འདིར་ཁོ་ནར་མཚོན་ན།སྨར་གྱི་ཧོར་སྐོར་ནང་དུ།ཕྱག་ཚ་ཡེ་ཤེས་ཉི་མ།དགེ་རྩེ་དཔལ་བཟང་།འཇིགས་དོམ།བྱ་བཏང་པདྨ་བཀྲ་ཤིས།བླ་མ་ཚེས་བཅུ།རྨེ་བའི་མཁན་པོ་ཚེ་དབང་རིག་འཛིན།ཚ་བླ་པདྨ།སྔགས་པ་སྔོ་ར་རྣམས་མངོན་སུམ་འཇའ་ལུས་སུ་གཤེགས་པ་ཡོངས་ལ་གྲགས་པ་དང་།ཆོས་བདག་མཆོག་གྱུར་པདྨ་ལུང་རྟོགས་རྒྱ་མཚོ་དང་།མགོ་སེར་མཁྱེན་རབ་རྒྱ་མཚོ།གཙང་སྐོར་རྒྱ་བླ།རྫོགས་ཆེན་བླ་མ་རྣམ་གྲོལ་རྣམས་ཀྱང་འཇའ་ལུས་སུ་གཤེགས་པ་དང་།ཨ་སྐྱོང་བླ་མ་ཀརྨ་ཚེ་རིང་དང་།རྒྱལ་རོང་ཐེག་ཆེན་དགོན་གྱི་བླ་མ་སྨིན་གྲོལ།རྡོ་གྲུབ་སྤྲུལ་སྐུ་སོགས་རིག་པ་ཚད་ཕེབས་དང་།ཆོས་ཟད་བློ་འདས་ཀྱི་དགོངས་པ་མངོན་དུ་གྱུར་བའི་ཞལ་སློབ་མང་དུ་བྱུང་ངོ་།།ཡང་སྔོན་ཆད་ཙ་ན་མི་ཞིག་རྒྱ་ཡུལ་གྱི་ཁྲིམས་ལ་ཚུད་པ་ལས།སྐབས་ཤིག་མི་དེ་ཁྲིམས་ར་ལས་བྲོས་ནས་རིམ་བཞིན་ནུབ་ཕྱོགས་སུ་འཁྱམས་པ་ལ།རེ་ཞིག་བྱེ་ཐང་ཞིག་ཏུ་དུ་བ་སྔོ་ཕྱུར་འདུག་པ་མཐོང་བས་དེར་ཕྱིན་ཚེ།ཁང་ཆུང་ཞིག་ཏུ་སྐྲ་དང་སྨ་ར་དཀར་བའི་རྒྱ་མི་རྒན་པོ་ཞིག་འདུག་པ་ལ་འཚོ་བ་སློང་ནས་ཉིན་ཤས་དེར་བསྡད།རྒན་པོ་དེར་ཟས་གོས་ཚོགས་པར་འདུག་པ་ལས་ཡོ་བྱད་གཞན་དག་མེད་ལ།སྟེགས་བུའི་ཁར་ཤེལ་གྱི་བུམ་པ་ཟུང་ཞིག་བཤམས་ཡོད།རྒྱ་མི་རྒན་པོ་དེས་ཉིན་རེ་བཞིན་ཁ་ལག་གཙང་མར་བཀྲུས་ཏེ་ཤེལ་བུམ་ཅིག་ཤོས་ནང་གི་ཆུ་ཐིགས་རེ་སྲིན་ལག་གིས་བླངས་ཏེ་མིག་ལ་བསྐུས་ནས་མིག་ཟུམ་ཟུམ་བྱས་ཏེ་ནུབ་ཕྱོགས་བོད་ཡུལ་ལ་བལྟ་བཞིན་འདུགཉིན་ཞིག་རྒྱ་མི་རྒན་པོ་དེ་ཕྱི་རོལ་དུ་འདུག་པའི་ཤུལ་དུ་མི་དེས་ཀྱང་ལྐོག་ཏུ་ཁ་ལག་མ་བཀྲུས་པར་ཤེལ་བུམ་ནང་གི་ཆུ་ཐིགས་ཤིག་མིག་ལ་བསྐུས་ནས་ཕྱོགས་ཕྱོགས་སུ་བལྟས་པས་རི་བྲག་ཁོངས་སེང་དུ་འདུག་ལ་ས་འོག་གི་དངོས་པོ་ཐམས་ཅད་གསལ་བར་མཐོང་བྱུང་།ཕྱིའི་ནངས་པར་རྒྱ་མི་རྒན་པོས་སྔར་བཞིན་བུམ་ཆུ་མིག་ལ་བྱུགས་པས་ཅི་ཡང་མཐོང་རྒྱུ་མེད་པར།དེ་མ་ཐག་མི་དེས་ལག་དྲིས་བརླག་པར་སྙམ་ནས།ཁྱོད་ཀྱིས་ཤེལ་བུམ་དུ་མཛུབ་མོ་བཅུག་གམ་དྲིས་པས།དེས་བཅུག་གོ་ཟེར།རྒན་པོས་བྲང་ལ་ཁུ་ཚུར་བསྣུན་ནས་འོ་དོད་བོས།དེ་ནི་མཐའ་མིས་ངན་སྔགས་དང་རྫས་སྦྱོར་གྱིས་ལོ་མང་པོར་སྒྲུབ་ནས་གྲུབ་པ་ལ།དེས་ས་འོག་ས་སྟེང་གི་གཏེར་ཁ་ཐམས་ཅད་མཐོང་ཐུབ་པའི་ནོར་བུ་ཞིག་ཏུ་བརྩི་ཡང་རྩ་བ་ནས་བརླག་ཟིན་ཏོ།མི་དེ་གསོད་པར་རིགས་ཀྱང་།བུམ་པ་གཅིག་ལ་མཛུབ་མོ་མཉམ་དུ་བཙུག་པ་ཕྱི་རོལ་ལུགས་ཀྱི་དམ་ཚིག་འདྲེས་པས་གསོད་མི་རུང་སྐད་དོ།།དེའི་རྒྱུ་མཚན་ཞིབ་ཏུ་ལབ་པ་ལས།རྒན་པོ་དེ་ན་རེ།སྔ་དུས་བོད་ཡུལ་མདོ་སྨད་དུ་བླ་མ་གཟན་དཀར་ཅན་ཤ་དམངས་སྨུག་ལ་སྣ་ཆེ་བ།སྐྲ་ཐོར་ཅོག་ཅན།སྨྲ་ར་དཀར་པོ་བྲང་དཀྱིལ་དུ་སླེབས་པ་ཞིག་འདུགདེས་ནངས་སྔ་དུ་བ་ཚག་ལེ་གང་འཐེན་པས་དུད་པ་དེ་ཇེ་ཆེར་སོང་ནས་བོད་ཡུལ་མཐའ་དབུས་ཐམས་ཅད་བཏུམ་འགྲོ་བས་དེ་ཕྱོགས་ཅི་ཡང་མི་མཐོང་།ཕྱིས་བླ་མ་དེ་གཤེགས་པའི་ཉིན་ནས་བཟུང་བོད་ཡུལ་ཐམས་ཅད་མཐོང་བས་ངས་གཏེར་ཁ་སོགས་ལ་བལྟ་བ་ཡིན་ཟེར།བླ་མ་དེ་ནམ་གཤེགས་སོང་དྲིས་པས།དེ་གཤེགས་ནས་ལོ་གསུམ་འགོར་སོང་ཟེར་རོ།།ཕྱིས་སུ་མི་དེས་བླ་མ་དེ་ཉིད་རྩད་ཆོད་བྱས་ཀྱང་མ་ཆོད་པ་ལ།དེའི་བུ་ལ་ཇི་བཞིན་བཤད་པ་ཁྲིམས་ཁང་དུ་སྤྱི་ལོ༡༩༥༨ལོར་བཙོན་པའི་ཇ་མ་ལིའུ་ལན་ཡུ་ཞེས་པ་དེ་ཡིན་ལ།དེས་མདོ་སྨད་དུ་བླ་མ་དེ་འདྲ་ཞིག་འཁྲུངས་ཨེ་མྱོང་ཞེས་བོད་ཀྱི་བཙོན་མ་རྣམས་ལ་འདྲི་ཞིང་།སྐུ་གཤེགས་ལོ་ཡར་དེད་བྱས་ན་སྤྱི་ལོ༡༩༠༤ལ་འཁེལ་འདུག་པས་རྒིས་གཏེར་རིན་པོ་ཆེ་ཡིན་ངེས་འདུགཅེས་མཁར་སྒང་བླ་མ་ཨོ་རྒྱན་རྣམ་རྒྱལ་གྱི་ཞལ་ནས་ཐོས་སོ།ཚུལ་འདི་ཡང་གོང་གི་རྣམ་ཐར་དུ་ཨོ་རྒྱན་རིན་པོ་ཆེ་སོགས་ལྷ་དང་བླ་མས་ལུང་བསྟན་དུ་ཁྱོད་ཀྱི་སྐུ་རིང་ལ་མཐའ་མི་ཀླ་ཀློས་འཚེ་མི་ནུས་ཞེས་གསུངས་པས་འདི་འང་དོན་དང་མཐུན་གྱི་གཏན་ཚིག་ཏུ་ངེས་པས་འཕྲོས་མོལ་ཙམ་དུ་བྲིས་པའོ།།གཏེར་ཆེན་ཆོས་ཀྱི་རྒྱལ་པོ་དེ་ཉིད་ལ་སྐལ་ལྡན་གྱི་སློབ་མ་ཚེ་འདིར་འཇའ་ལུས་སུ་གྲུབ་པ་བཅུ་གསུམ།ཟབ་གཏེར་ཆོས་ཀྱི་བདག་པོ་ཉེར་བརྒྱད།མཆོག་གི་དངོས་གྲུབ་ཐོབ་པ་བཅུ་དྲུགདགོངས་པ་མངོན་དུ་གྱུར་བ་བརྒྱ་ཕྲགཐར་བའི་ས་བོན་ཐེབས་པ་སྟོང་ཕྲགའབྲེལ་བ་ཐོགས་པ་འབུམ་ཕྲག་བཅས་གདུལ་བྱར་གྱུར་ནས་དགུང་གྲངས་བདུན་ཅུ་པ་སྤྱི་ལོ༡༩༠༤ལོར་གཟུགས་སྐུའི་བཀོད་པ་ཆོས་དབྱིངས་སུ་མནལ་ཚེ་ཐུགས་ལྗགས་སྤྱན་གསུམ་གུ་རུ་རྡོ་རྗེ་གྲོ་ལོད་ཀྱི་སྣང་བརྙན་དུ་བྱོན་པ་སོགས་ངོ་མཚར་གྱི་གདུང་རྟགས་སྣང་བར་བྱས།རྗེ་ཁོང་གི་མི་རབས་བཅུ་ཕྲག་འགར་རིག་པ་འཛིན་པའི་གདུང་རྒྱུད་ཤ་སྟག་འབྱུང་བའི་ཞལ་བཞེས་དང་།བསྐལ་བཟང་སངས་རྒྱས་སྟོང་གི་བསྟན་པ་མ་རྫོགས་ཀྱི་བར་དུ་སྤྲུལ་བའི་སྐུ་མཆོག་རྒྱུན་མི་ཆད་པར་འབྱུང་བ་དང་།མ་འོངས་པར་རིག་ལྡན་དྲག་པོ་འཁོར་ལོ་ཅན་གྱི་སྐུར་བཞེངས་ནས་ཀླ་ཀློའི་སྡེ་ཚོགས་རྨེག་མེད་དུ་མཛད་ཅེས་བདུད་འཇོམས་ཕྱི་མའི་རྣམ་ཐར་གསོལ་འདེབས་སུ་གསལ་བ་དང་།མཐར་བསྐལ་བཟང་རྣམ་འདྲེན་སྟོང་གི་འཕྲིན་ལས་དང་མཉམ་པའི་སངས་རྒྱས་མོས་པ་མཐའ་ཡས་སུ་འགྱུར་བར་གསུངས་སོ།།རྗེ་ཁོང་གི་ཐུགས་ཀྱི་དགྱེས་སྡེ་ཌཱ་ཀི་ཆེ་བ་ཁྲ་བཟའ་བསོད་ནམས་མཚོ་དང་།འབྲིང་བ་སྐེ་བཟའ་སངས་རྒྱས་མཚོ།ཆུང་བ་ཨ་སྐྱབས་བཟའ་སྐལ་བཟང་སྒྲོལ་མ་བཅས་ལ་སྐུ་སྲས་སེམས་དཔའ་བརྒྱད་འཁྲུངས་པ་ནི།རྡོ་གྲུབ་ཆེན་འཇིགས་མེད་བསྟན་པའི་ཉི་མ་དང་།ཚ་སྤྲུལ་པདྨ་རྡོ་རྗེ།མཁྱེན་བརྩེ་ཡེ་ཤེས་རྡོ་རྗེའི་ཡང་སྤྲུལ་འཛམ་གླིང་དབང་རྒྱལ།ཆེ་ཡོས་རིག་འཛིན་ཆེན་མོའི་སྤྲུལ་སྐུ་མི་ཕམ་རྡོ་རྗེ།ཀློང་ཆེན་པའི་སྤྲུལ་སྐུ་དྲི་མེད་འོད་ཟེར།གཞི་ཆེན་ཨ་པང་སྐུ་ཆེན་གྱི་ཡང་སྲིད་ལྷ་ཆེན་སྟོབས་ཀྱི་རྒྱལ་པོ།རྫ་དཔལ་སྤྲུལ་གྱི་ཡང་སྤྲུལ་ནམ་མཁའ་འཇིགས་མེད།གསང་བདག་གི་སྤྲུལ་པ་རྡོ་རྗེ་དགྲ་འདུལ་བཅས་སོ།      །གཏེར་ཆེན་གྱི་ཡང་སྤྲུལ་དེ་མ་ཐག་པ་ཁམས་བདུད་འཇོམས་རིན་པོ་ཆེ་འཇིགས་བྲལ་ཡེ་ཤེས་རྡོ་རྗེ་རབ་ཚེས་ཤིང་འབྲུག（སྤྱི་ལོ༡༩༠༤）ལ་སྐུ་འཁྲུངས་ཤིང་སྔ་མའི་བག་ཆགས་བཟང་པོ་འཕྲལ་དུ་སད།ཨོ་རྒྱན་ཡབ་ཡུམ་གྱི་ཞལ་གཟིགས་ལུང་བསྟན་ཐོབ།དགོངས་གཏེར་གྱི་ཞལ་བརྡ་བྱོན།རྒྱལ་ཁབ་ཕྱི་ནང་དུ་རིན་ཆེན་གཏེར་མཛོད་ཆེན་མོའི་དབང་ལུང་ལན་བཅུ་གཅིག་གིས་མཚོན་དཀའ་མ་རྙིང་རྒྱུད་དང་།པད་གླིང་སོགས་སྔ་འགྱུར་བཀའ་གཏེར་རྒྱ་མཚོའི་ཆོས་འཁོར་ཕྱོགས་མེད་དུ་བསྐོར།གསུང་ཆོས་སྣ་ཚོགས་པོད་ཉི་ཤུ་ཉེ་བ་བསྟན་པའི་བཙས་སུ་བསྩལ།ཕྱི་གླིང་ཨ་མེ་རི་ཀ་དང་།ཧྥ་རན་སེའི་ཡུལ་སོགས་སུ་ཡེ་ཤེས་སྙིང་པོ་དང་།རྡོ་རྗེ་སྙིང་པོ་ཞེས་སོགས་ཀྱི་ཆོས་ཚོགས་འཛུགས་གནང་མཛད།སྔ་འགྱུར་བཀའ་མའི་སྐོར་བཀའ་བསྡུ་དང་འཚོལ་ཞིབ་གནང་ནས་གླེགས་བམ་ཞེ་བརྒྱད་ཙམ་བྱུང་བ་ཞུ་དག་པར་བསྐྲུན་བྱས་ཏེ་ཕྱི་རབས་འགྲོ་བའི་སྤྱི་ནོར་དུ་བཞག་པ་སོགས་རྒྱལ་བསྟན་རིན་པོ་ཆེའི་སྲོག་མཐུད་པའི་བཀའ་དྲིན་གནང་།ཁྱད་པར་དུ་གཏེར་ཆེན་བདུད་འཇོམས་པའི་གསུང་བཀའ་མཐའ་དག་ཞུས་དག་དང་།བསྙེན་ཡིག་དམིགས་ཁྲིད་སོགས་དགོས་ངེས་ཀྱི་ཁ་སྐོང་གནང་སྟེ་དོན་གཉེར་ཅན་རྣམས་ལ་དེ་དག་གི་དབང་ལུང་བཀའ་གཏད་གང་དགོས་ཀྱི་བཀའ་དྲིན་བསྩལ་བ་དང་།རྨད་དུ་བྱུང་བའི་ཆོས་མཆོག་བླ་མ་གཏེར་གསར་ཚང་གི་འཕྲིན་ལས་འཛམ་གླིང་དུ་ཁྱབ་པའི་མཛད་རྗེས་གནང་ནས་སླར་དགུང་གྲངས་གྱ་གསུམ་པར（སྤྱི་ལོ༡༩༨༤ལོར）ཞིང་འདིའི་གདུལ་བྱ་རེ་ཞིག་རྫོགས་པའི་ཚུལ་གྱིས་ཨོ་རྒྱན་ཆེན་པོའི་དགོངས་དབྱིངས་སྤྲོས་བྲལ་རྣམ་པར་མི་རྟོག་པའི་ཡེ་ཤེས་ཀྱི་ཀློང་ཆེན་པོར་བསྡུས་པས་སྐུ་གདུང་རིན་པོ་ཆེ་བལ་ཡུལ་མཆོད་རྟེན་བྱ་རུང་ཁ་ཤོར་གྱི་འཁྲིས་སུ་ཕྱི་རབས་འགྲོ་བའི་དད་རྟེན་དུ་བཞུགས་པའོ།།གཏེར་ཆེན་ཆོས་ཀྱི་རྒྱལ་པོ་ཡབ་སྲས་བརྒྱུད་པ་དང་བཅས་པས་སྤྱིར་འཛམ་གླིང་དང་སྒོས་གངས་ཅན་ལྗོངས་སུ་རྗེས་བརྩེ་ཆེན་པོས་ཆོས་འཁོར་ལན་མང་བསྐོར་ཞིང་།ཁྱད་པར་དུ་གཏེར་སྲས་རྡོ་རྗེ་དགྲ་འདུལ་དང་།གཏེར་སྲས་ལྷ་ཆེན་སྟོབས་རྒྱལ།བདུད་འཇོམས་གཉིས་པ་གཏེར་ཆེན་ཀུན་བཟང་ཉི་མ།ཐུགས་སྤྲུལ་བསོད་ནམས་ལྡེའུ་བཙན་སོགས་གཏེར་སྲས་སློབ་འབངས་བརྒྱུད་པར་བཅས་པའི་བཀའ་དྲིན་ལས་རྫོགས་ཆེན་སྣང་སྦྱང་དང་།ཟབ་ལམ་ཁྲོས་མའི་སྒྲུབ་པ་ཆེ་འབྲིང་ཆུང་ངུ།ཕུར་བ་བདེ་གཤེགས་སྙིང་པོ།ཁྲོས་མའི་འགྱེད་བཞི་དང་བླ་རྣམ།འཕོ་བ།ཉེར་མཁོའི་ཞལ་འདོན་སོགས་ད་ལྟའང་རྒྱུན་མ་ཆད་པར་གནས་ཤིང་།གཏེར་ཆེན་བླ་མ་ཨོ་རྒྱན་སྐུ་གསུམ་གླིང་པས་ཉེ་བའི་ལོ་བཅུ་ཕྲག་ཕྱེད་དང་གཉིས་ལྷག་རིང་ཟབ་ལམ་ཁྲོས་མའི་དབང་ལུང་ཁྲིད་གསུམ་སྤེལ་བཞིན་པ་དང་།དེ་བཞིན་དུ་བསྟན་པའི་བདག་པོ་གཏེར་སྲས་རྟ་མགྲིན་དབང་རྒྱལ་དང་།ཨོ་རྒྱན་མི་འགྱུར་རྡོ་རྗེ།མཆོག་སྤྲུལ་ཐེག་ལོ།དབོན་སྤྲུལ་བསྟན་པའི་དབང་ཕྱུགདུར་བུད་བླ་མ་བདེ་དཔལ།གཏེར་ཆེན་སྐུ་ཕྲེང་གསུམ་པ་སངས་རྒྱས་པདྨ་བཞད་པ་དང་ཐུགས་སྤྲུལ་རྒྱལ་སྲས་འབྲོང་རྫོང་རྡོ་རྗེའི་ཕ་ལམ་སོགས་གང་གི་གདུང་སྲས་སློབ་བརྒྱུད་དམ་པ་རྣམས་ཀྱིས་གདུལ་བྱ་ལྷག་མ་འདྲེན་ཕྱིར་ཟབ་མོའི་བརྒྱུད་པ་སྤེལ་ཞིང་།ས་སྒང་གོ་ལ་ཧྲིལ་བོར་མཛད་པའི་འཕྲིན་ལས་དབྱར་མཚོ་རྒྱས་བཞིན་པ་ཀུན་གྱིས་མངོན་སུམ་མཐོང་སྣང་དུ་གྱུར་བ་འདིའོ།།རྒྱལ་ཀུན་སྤྱི་དཔལ་མཚོ་སྐྱེས་བླ་མ་ཡི༎འགགས་མེད་རོལ་བའི་སྒྱུ་འཕྲུལ་བདུད་འཇོམས་པའི༎གསང་གསུམ་གཏིང་མཐའ་དཔོག་པའི་ཡུལ་མིན་ཀྱང་༎རྣམ་ཐར་ཆ་ཤས་ཡི་གེའི་རིས་སུ་སྤེལ༎ཚུལ་འདིར་ཉེས་ཚོགས་རྨོངས་བློའི་དྲི་མ་ཀུན༎ཚེ་རབས་སྒོ་གསུམ་མ་དགེའི་ལས་དང་བཅས༎མཆོག་གསུམ་སྲུང་མའི་སྤྱན་སྔར་ཆབས་ཅིག་ཏུ༎འཆགས་སོ་དག་ཅིང་ཚངས་པའི་དངོས་གྲུབ་སྩོལ༎དགེ་འདིས་མཁའ་ཁྱབ་འགྲོ་བ་མ་ལུས་པ༎ཀུན་བཟང་གདོད་མའི་གཏན་སྲིད་ཟིན་པ་དང་༎གཏེར་ཆེན་ཆོས་ཀྱི་རྒྱལ་པོའི་རང་ལུགས་ཀྱི༎བཤད་སྒྲུབ་བསྟན་པའི་ཉི་མ་ནུབ་མེད་ཤོག།ཅེས་ཨ་བུ་དཀར་ལོའམ་གར་དབང་རྡོ་རྗེས་བོད་རབ་གནས་ཆུ་རྟ་ལོ༼སྤྱི་ལོ༢༠༠༢༽ལོར་སྤེལ།

  རྣམ་ཐར་ཡོངས་རྫོགས་སྒྲོག་འདོན་བྱས་ཟིན།  གདོད་མའི་མགོན་པོའི་རང་ཞལ་མཇལ་བའི་རྒྱུར་གྱུར་ཅིག 

སྐལ་ངན་ལྟ་བ་དམན་པ་དང་༔

ལོག་ལྟ་ཅན་དུ་མ་གྱུར་ཅིག༔

ཤེས་རབ་སྙིང་རྗེ་དད་ལྡན་པས༔

རྟག་ཏུ་བླ་མ་བསྟེན་པར་ཤོག༔

ལོག་འཚོ་ཁ་ན་མ་ཐོའི་ཟས༔

གཞན་གྱི་སྐྱོན་རྟོག་སྤངས་ནས་ནི༔

ཆོས་ཀྱི་རྩ་བ་ངོ་ཤེས་ཏེ༔

གུས་པས་གདམས་ངག་སྒོམ་པར་ཤོག༔

རང་གི་རྒྱུད་དང་གཞན་གྱི་རྒྱུད༔

གྲོལ་བྱེད་དམ་ཆོས་བདུད་རྩི་ལས༔

ལོག་ན་མེད་པའི་དོན་མཐོང་ནས༔

རྟག་ཏུ་ཆོས་བཞིན་བྱེད་པར་ཤོག༔

བསླབ་པ་ལམ་གྱི་སྨོན་ལམ་འདི༔

གེགས་མེད་ཡིད་བཞིན་འགྲུབ་པའི་མཐུས༔

འབྲས་བུ་རྫོགས་སངས་རྒྱས་ཐོབ་ནས༔

སེམས་ཅན་ཐམས་ཅད་འདྲེན་པར་ཤོག༔