༄༅། །སྤུན་ཟླ་ཚོ། ང་ཚོ་མཉམ་དུ་ཡོད།
རང་བྱུང་འཇིགས་པའི་གཤེད་མ་སྟེ། །
རང་བྱུང་ས་ཡོམ་འཚེ་བ་ཡིས། །
རང་ཡུལ་ཁང་ཁྱིམ་མི་ཕྱུགས་སོགས། །
རང་ཁྱིམ་དྲོན་མོར་བརྡབ་གསིག་བཟོས། །
འཇིགས་ཤིང་དངངས་པའི་ཡོམ་ཆེན་དེས། །
སྙིང་ཁམས་འཇིག་རྟེན་ལན་མང་དཀྲུགས། །
འདང་ཅན་སྤུན་གྱི་སེམས་པ་གཙེས། །
སྤུན་ཟླ་ཁག་གི་མིད་པ་འཆུས། །
གློ་བུར་ཐོན་པའི་གནོད་འཚེ་ཡིས། །
མི་དང་ཕྱུགས་རིགས་གྲངས་མེད་ཀྱི། །
སྲོག་གི་དབང་པོ་བཅོམ་པ་ལས། །
ཕྱོཊ་བཞི་མཚམས་བརྒྱད་གདུང་བས་མནར། །
ས་རྡོ་འཛིང་བའི་རྡུལ་རླུང་ཁྲོད། །
འཇིག་རྟེན་སྐྱི་གཡའི་སྨྲེ་སྔགས་ལྷན། །
སྣ་མང་འཁུན་སྒྲའི་བྲག་ཅ་ཡིས། །
ལ་སྟོད་ཡུལ་གྱི་ནམ་མཁའ་གཡོས། །
འབྱུང་བའི་གེགས་བར་རྩུབ་ན་ཡང་། །
མི་ཡུལ་དྲོན་མོ་འོད་ཀྱིས་བཀང་། །
གནས་སྐབས་སྡུག་གིས་མནར་ན་ཡང་། །
མཐའ་མར་རྣམ་པར་རྒྱལ་ངེས་ལགས། །
གོང་རིམ་དབུ་ཁྲིད་བཟང་དང་གཅིག །
སྤུན་ཟླའི་རོགས་སྐྱོར་ཡག་དང་གཉིས། །
དམངས་སེམས་བརྩེ་བ་ཟབ་དང་གསུམ། །
ཡོམ་འགོག་གེགས་སེལ་ནོར་བུ་ཡིན། །
ཡང་དག་སྲིད་བཟང་ཉིན་བྱེད་འཛུམ། །
ཀུན་ལ་སྙོམས་པའི་འོད་སྣང་གིས། །
འཕྲལ་མར་རོགས་སྐྱོབ་དངོས་རྫས་གནང་། །
དགུན་གཞུང་རིང་མོར་དྲོད་ཁོལ་བསྩལ། །
ས་རྒྱང་ཆོད་པའི་ཡུལ་ལུང་དང་། །
མིག་མདུན་གྲོང་པའི་རོགས་རམ་འོག །
ས་ཡོམ་བར་ཆད་འབྱུང་ཡུལ་དུ། །
གེགས་སེལ་དཔུང་ཁག་སྟོབས་ཤུགས་ཆེ། །
ཞལ་འདེབས་དངུལ་གྱི་རོགས་སྐྱོར་དང་། །
སྣ་མང་ཟོག་གི་རྒྱབ་སྐྱོར་འོག །
གནས་སྐབས་གདུང་བས་མནར་གྱུར་ཡང་། །
སྐྱིད་པའི་ཉི་མ་འཆར་ལ་ཉེ། །
སེམས་པ་མ་སྐྱོ་ང་ཡི་སྤུན། །
ཡིད་ཐང་མ་ཆད་རིགས་ཀྱི་བུ། །
ཁྱེད་ལ་འཕྲད་པའི་དཀའ་ཁག་དག །
ཕྱོགས་བཞིའི་སྤུན་ཟླས་སེལ་རོགས་བྱེད། །
ས་དང་རྡུལ་གྱི་བརྙས་བཅོས་དང་། །
རླུང་དང་སྡུག་བསྔལ་འཛིང་ན་ཡང་། །
ང་ཚོ་ནམ་ཡང་མཉམ་དུ་ཡོད། །
སེམས་པ་མ་སྐྱོ་རིག་པ་སྒྲིམས། །
