شى جىنپىڭ بىرازىلىيە زۇڭتۇڭى بىلەن سۆھبەت ئۆتكۈزدى

时事 2024-11-21 11:30 北京

دۆلەت رەئىسى شى جىنپىڭ شۇ يەر ۋاقتى 20-نويابىر چۈشتىن بۇرۇن بىرازىلىيە زۇڭتۇڭ سارىيى ئاۋبېتتې سارىيىدا بىرازىلىيە زۇڭتۇڭى لۇلا بىلەن سۆھبەت ئۆتكۈزدى. ئىككى دۆلەت باشلىقلىرى جۇڭگو-بىرازىلىيە مۇناسىۋىتىنىڭ ئورنىنى تېخىمۇ ئادىل دۇنيا ۋە تېخىمۇ ئىمكانىيەتلىك سىجىل پىلانېتانى بىرلىكتە بەرپا قىلىدىغان جۇڭگو-بىرازىلىيە تەقدىر ئورتاق گەۋدىسى دەرىجىسىگە كۆتۈرگەنلىكىنى جاكارلىدى.

باش يازدىكى بىرازىلىيەنىڭ ھاۋاسى ئوچۇق ئىدى. ئاۋبېتتې سارىيى ياپيېشىل ئوت-چۆپلەر بىلەن قاپلانغان بولۇپ، 450 ھۆرمەت قاراۋۇلى ھەيۋەت بىلەن رەتلىك تىزىلىپ تۇراتتى. شى جىنپىڭ 120 ئاتلىق ئەسكەرنىڭ ھىمايىسىدە، ئاپتوموبىلغا ئولتۇرۇپ ئاۋبېتتې سارىيى ئالدىدىكى مەيدانغا يېتىپ كەلدى.

زۇڭتۇڭ لۇلا ۋە ئۇنىڭ رەپىقىسى روسانرېلا شى جىنپىڭنى قىزغىن كۈتۈۋالدى ھەمدە شى جىنپىڭ ئۈچۈن داغدۇغىلىق، كاتتا قارشى ئېلىش مۇراسىمى ئۆتكۈزدى.

ھەربىي ئوركېستىر جۇڭگو بىلەن بىرازىلىيەنىڭ دۆلەت شېئىرلىرىنى ئورۇنلىدى. ئىككى دۆلەت باشلىقلىرى بىرلىكتە ھۆرمەت قاراۋۇللىرىنىڭ مۇراسىم سەپ شەكلىنى كۆردى.

جۇڭگو-بىرازىلىيە ئۆسمۈرلىرى ئىككى دۆلەتنىڭ دۆلەت بايراقلىرىنى پۇلاڭلىتىپ، شى جىنپىڭنى قىزغىن قارشى ئالدى. بىرازىلىيە سەنئەتكارلىرى «ۋەتىنىم» دېگەن ناخشىنى خەنزۇچە ئېيتتى.

ئىككى دۆلەت باشلىقلىرى قارشى تەرەپنىڭ ھەمراھ خادىملىرى بىلەن قول ئېلىشىپ كۆرۈشۈپ ئېھتىرام بىلدۈردى.

قارشى ئېلىش مۇراسىمىدىن كېيىن، ئىككى دۆلەت باشلىقلىرى سۆھبەت ئۆتكۈزدى.

شى جىنپىڭ مۇنداق دەپ كۆرسەتتى: جۇڭگو بىلەن بىرازىلىيە دىپلوماتىك مۇناسىۋەت ئورناتقانلىقىنىڭ 50 يىللىقىدىن ئىبارەت بۇ مۇھىم تارىخىي ئەھمىيەتكە ئىگە يىلدا بىرازىلىيەدە زىيارەتتە بولغانلىقىمدىن ئىنتايىن خۇشالمەن. بايا زۇڭتۇڭ لۇلا مەن ئۈچۈن ئەڭ ئالىي ئىززەت -ھۆرمەت بىلەن داغدۇغىلىق قارشى ئېلىش مۇراسىمى ئۆتكۈزۈپ، جۇڭگو-بىرازىلىيە مۇناسىۋىتىگە يۈكسەك ئەھمىيەت بېرىدىغانلىقى ۋە جۇڭگو خەلقىگە بولغان چوڭقۇر دوستلۇقىنى تولۇق نامايان قىلىپ، مېنى چوڭقۇر تەسىرلەندۈردى. جۇڭگو بىلەن بىرازىلىيە شەرقىي ۋە غەربىي يېرىم شاردىكى تەرەققىي قىلىۋاتقان ئىككى چوڭ دۆلەت. ئۆتكەن 50 يىلنى ئەسلىسەك، جۇڭگو-بىرازىلىيە مۇناسىۋىتى تاغ-دەريالاردىن ھالقىپ ئۆتۈپ، تەرەققىي قىلىۋاتقان چوڭ دۆلەتلەر ئۆزئارا ھۆرمەت قىلىدىغان، ئۆزئارا مەنپەئەت يەتكۈزىدىغان، دوستانە ئۆتىدىغان، ھەمكارلىشىپ ئورتاق پايدا ئالىدىغان توغرا مۇناسىۋەت يولى ئۈستىدە ئىزدەندى. بىرازىلىيە جۇڭگو بىلەن ئىستراتېگىيەلىك ھەمراھلىق مۇناسىۋىتى ئورناتقان تۇنجى دۆلەت، جۇڭگو بىلەن ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورناتقان تۇنجى لاتىن ئامېرىكىسى دۆلىتى. يېقىنقى يىللاردىن بۇيان، مەن ۋە زۇڭتۇڭ لۇلانىڭ ئىستراتېگىيەلىك يېتەكچىلىكىدە، ئىككى دۆلەت كۈنسېرى تەقدىرداش، ئىشەنچلىك دوستلارغا، تىنچلىقنى ئورتاق ئىلگىرى سۈرىدىغان ئاكتىپ كۈچكە ئايلاندى، جۇڭگو ـ بىرازىلىيە مۇناسىۋىتى تارىختىكى ئەڭ ياخشى مەزگىلدە تۇرۇۋاتىدۇ، ئىككى دۆلەت خەلقنىڭ بەخت ـ سائادىتىنى ئاشۇرۇپلا قالماي، تەرەققىي قىلىۋاتقان دۆلەتلەرنىڭ ئورتاق مەنپەئەتىنىمۇ قوغداپ، يەر شارىنىڭ جەنۇبىنىڭ كۈچى ۋە ساداسىنى زورايتىپ، دۇنيانىڭ تىنچلىقى، مۇقىملىقى ئۈچۈن گەۋدىلىك تۆھپە قوشتى.

شى جىنپىڭ مۇنۇلارنى تەكىتلىدى: بۈگۈن بىز جۇڭگو ـ بىرازىلىيە مۇناسىۋىتىنىڭ ئورنىنى تېخىمۇ ئادىل دۇنيا ۋە تېخىمۇ ئىمكانىيەتلىك سىجىل پىلانېتانى بىرلىكتە بەرپا قىلىدىغان جۇڭگو-بىرازىلىيە تەقدىر ئورتاق گەۋدىسى دەرىجىسىگە كۆتۈردۇق، شۇنىڭ بىلەن بىللە، «بىر بەلباغ، بىر يول»نى تەڭ قۇرۇش تەشەببۇسىنى بىرازىلىيەنىڭ تەرەققىيات ئىستراتېگىيەسى بىلەن جىپسىلاشتۇردۇق، بۇ، جۇڭگو ـ بىرازىلىيە مۇناسىۋىتى تەرەققىياتىدىكى يەنە بىر تارىخىي پەيت بولۇپ، ئىككى دۆلەت مۇناسىۋىتىنىڭ دۇنياۋىلىقى، ئىستراتېگىيەلىكلىكى، ئۇزاق مۇددەتلىكلىكىنى نامايان قىلدى. بۇ ئىككى دۆلەت خەلقىنىڭ ئومۇميۈزلۈك ئارزۇسىغا ئۇيغۇن بولۇپ، ئىككى تەرەپنىڭ زامانىۋىلاشتۇرۇشنى ئىلگىرى سۈرۈشىنى ھەرىكەتلەندۈرگۈچ كۈچ بىلەن تەمىنلەيدۇ، شۇنىڭ بىلەن بىر ۋاقىتتا، جۇڭگو بىلەن بىرازىلىيەنىڭ خەلقئارا ئادىللىق ۋە ھەققانىيلىقنى بىرلىكتە قوغداش، دۇنيانىڭ ئورتاق تەرەققىياتىنى ئىلگىرى سۈرۈش ئىرادىسىنى نامايان قىلدى. جۇڭگو بىرازىلىيە بىلەن بىرلىكتە، ئىنسانىيەتنىڭ ئىستىقبالىنى كۆڭلىگە پۈكۈپ، خەلقنىڭ بەخت-سائادىتىنى كۆزلەپ، يېڭى دەۋردىكى جۇڭگو ـ بىرازىلىيە مۇناسىۋىتىنىڭ ئىچكى مەزمۇنىنى ئۈزلۈكسىز بېيىتىپ، ئۆزئارا مۇۋەپپەقىيەت قازىنىدىغان «ئالتۇن ھەمراھلار» دىن بولۇپ، ئىنسانىيەت تەقدىرى ئورتاق گەۋدىسى، تېخىمۇ ئادىل دۇنيا ۋە تېخىمۇ ئىمكانىيەتلىك سىجىل پىلانېتانى بىرلىكتە بەرپا قىلىش نىشانىغا قاراپ ئۈزلۈكسىز ئىلگىرىلەپ، ئىنسانىيەتنىڭ تىنچلىقى ۋە تەرەققىيات ئىشلىرى ئۈچۈن تېخىمۇ زور تۆھپە قوشۇشنى خالايدۇ.

شى جىنپىڭ ئىككى دۆلەت مۇناسىۋىتىنىڭ كەلگۈسى تەرەققىياتى توغرىسىدا مۇنداق تۆت تەكلىپ بەردى.

بىرىنچى، تەقدىرداش بولۇپ، ئىستراتېگىيەلىك ئۆزئارا ئىشىنىشنى ئۈزلۈكسىز مۇستەھكەملىسەك. ئىگىلىك ھوقۇق، خەۋپسىزلىك، زېمىن پۈتۈنلۈكى قاتارلىق يادرولۇق مەنپەئەتكە چېتىلىدىغان مەسىلىلەردە ئۆزئارا قەتئىي قوللاپ، بىر-بىرىگە ئىشىنىدىغان ئىستراتېگىيەلىك ھەمراھلار ۋە يەر شارىنىڭ جەنۇبىدىكى دۆلەتلەرنىڭ ئىتتىپاقلىشىپ ھەمكارلىشىش، ئۆزئارا مەنپەئەت يەتكۈزۈپ ئورتاق پايدا ئېلىش، ئورتاق تەرەققىي قىلىشىنىڭ ئۈلگىلىرىدىن بولساق. مەدەنىيەت، مائارىپ، ياشلار قاتارلىق ساھەلەردىكى ئادىمىيەت ئالاقىسىنى كۈچەيتىپ، جۇڭگو ـ بىرازىلىيە تەقدىر ئورتاق گەۋدىسىنىڭ ئەل رايى ئاساسىنى پۇختىلىساق.

ئىككىنچى، تەڭ تەرەققىي قىلىپ، تەرەققىيات ئىستراتېگىيەمىزنى جىپسىلاشتۇرۇشنى داۋاملىق چوڭقۇرلاشتۇرساق. «بىر بەلباغ، بىر يول»نى تەڭ قۇرۇش تەشەببۇسىنى بىرازىلىيەنىڭ تەرەققىيات ئىستراتېگىيەسى بىلەن جىپسىلاشتۇرۇشتىكى تارىخىي پۇرسەتنى ئىگىلەپ، ئىقتىساد ـ سودا، ئۇل ئەسلىھە، پۇل مۇئامىلە، پەن ـ تېخنىكا، مۇھىت ئاسراش قاتارلىق نۇقتىلىق ساھەلەردىكى ھەمكارلىقنى چوڭقۇرلاشتۇرۇپ، ئالەم قاتنىشى، يېزا ئىگىلىك پەن-تېخنىكىسى، پاكىز ئېنېرگىيە قاتارلىق ساھەلەردىكى ھەمكارلىقنى كۈچەيتسەك. جۇڭگو نامراتلىقتىن قۇتۇلدۇرۇش ئۆتكىلىگە ھۇجۇم قىلىشنى دۆلەتنى ئىدارە قىلىش، ھاكىمىيەت يۈرگۈزۈشتە گەۋدىلىك ئورۇنغا قويىدۇ، بىرازىلىيەنىڭ «ئاچارچىلىق بولماسلىق» پىلانىنى قوللايدۇ، بىرازىلىيە بىلەن نامراتلارنى ئازايتىش ھەمكارلىقىنى داۋاملىق كۈچەيتىپ، ئىككى دۆلەت خەلقىنى تېخىمۇ گۈزەل تۇرمۇشقا ئېرىشتۈرۈشنى خالايدۇ.

ئۈچىنچى، مەسئۇلىيەتنى زىممىمىزگە ئېلىپ، تەڭ مەنپەئەتلىنىپ، دۇنيانىڭ تىنچلىقى ۋە ھەققانىيلىقىنى قوغداش ئۈچۈن جۇڭگو-بىرازىلىيە كۈچىنى نامايان قىلساق. ھەقىقىي كۆپ تەرەپچىللىكنى ئەمەلىيەتتە كۆرسىتىپ، ئادىل گەپ قىلىش، ئادىل ئىش قىلىشتا چىڭ تۇرۇپ، دۇنياۋى ئىدارە قىلىشنىڭ تېخىمۇ ئادىل، مۇۋاپىق يۆنىلىشكە قاراپ تەرەققىي قىلىشىغا تۈرتكە بولساق. جۇڭگو بىرازىلىيەنىڭ خەلقئارادىكى ئورنى ۋە تەسىر كۈچىگە يۈكسەك ئەھمىيەت بېرىدۇ، بىرازىلىيەنىڭ خەلقئارا سەھنىدە تېخىمۇ زور رولىنى جارى قىلدۇرۇشىنى قوللايدۇ، بىرازىلىيە بىلەن ب د ت ۋە كېسەك ئالتۇن دۆلەتلىرى قاتارلىق كۆپ تەرەپلىك مېخانىزملاردىكى ئالاقە ۋە ماسلىشىشنى كۈچەيتىشنى، بىرازىلىيەنىڭ كېلەر يىلى كېسەك ئالتۇن دۆلەتلىرىنىڭ رەئىس دۆلەتلىك خىزمىتىنى ئۈستىگە ئېلىشىنى قوللاپ، «چوڭ كېسەك ئالتۇن دۆلەتلىرى ھەمكارلىقى»نىڭ يۇقىرى سۈپەتلىك تەرەققىياتىنى ئىلگىرى سۈرۈپ، كۆپ تەرەپچىللىكتە چىڭ تۇرۇش، دۇنياۋى ئىدارە قىلىشنى مۇكەممەللەشتۈرۈش توغرىسىدا تېخىمۇ جاراڭلىق كېسەك ئالتۇن ساداسىنى ياڭرىتىشنى خالايدۇ.

تۆتىنچى، جاپادىمۇ، ھالاۋەتتىمۇ بىللە بولۇپ، ئىنسانىيەت تەقدىرى ئورتاق گەۋدىسى بەرپا قىلىش ئۈچۈن جۇڭگو ـ بىرازىلىيە تۆھپىسىنى قوشساق. جۇڭگو بىلەن بىرازىلىيە تەرەققىي قىلىۋاتقان چوڭ دۆلەتلەر بولۇش سۈپىتى بىلەن، باشلامچىلىق بىلەن ئورتاق كېڭىشىپ، «ھەرقايسى دۆلەتلەر ئىتتىپاقلىشىپ، دۇنياۋى خىرىسقا ئورتاق تاقابىل تۇرۇش»نى ئىلگىرى سۈرۈپ، ئىنسانىيەتنىڭ ئىستىقبالى ۋە تەقدىرىگە مۇناسىۋەتلىك دۇنياۋى خىرىسلارغا بىرلىكتە تاقابىل تۇرۇشى كېرەك. يېشىل تىپ ئۆزگەرتىش، ئىمكانىيەتلىك سىجىل تەرەققىيات، كىلىمات ئۆزگىرىشىگە تاقابىل تۇرۇش، سۈنئىي ئەقىلنى ئىدارە قىلىش قاتارلىق ساھەلەردىكى ھەمكارلىقنى كۈچەيتىشى كېرەك. جۇڭگو بىرازىلىيەنىڭ «ب د ت كىلىمات ئۆزگىرىشى رامكا ئەھدىنامىسى»نى تۈزگۈچى تەرەپلەرنىڭ 30-قېتىملىق يىغىنىنى ياخشى ئېچىشىنى قوللاشنى خالايدۇ.

شى جىنپىڭ مۇنداق دەپ كۆرسەتتى: 10 يىل ئىلگىرى مەن بىرازىلىيەدە لاتىن ئامېرىكىسى ۋە كارىب دېڭىزى رايونىدىكى دۆلەتلەرنىڭ رەھبەرلىرى بىلەن بىرلىكتە جۇڭگو-لاتىن ئامېرىكىسى مۇنبىرى قۇرۇلغانلىقىنى جاكارلاپ، جۇڭگو-لاتىن ئامېرىكىسى مۇناسىۋىتىنىڭ باراۋەر بولۇش، ئۆزئارا مەنپەئەت يەتكۈزۈش، يېڭىلىق يارىتىش، ئېچىۋېتىش، خەلققە نەپ يەتكۈزۈشتەك يېڭى دەۋرگە قەدەم قويۇشىغا تۈرتكە بولغان ئىدۇق. جۇڭگو بىرازىلىيە بىلەن بىرلىكتە، جۇڭگو ـ لاتىن ئامېرىكىسى مۇنبىرىنى داۋاملىق ياخشى ئۆتكۈزۈپ، «بىر بەلباغ، بىر يول»نى تەڭ قۇرۇش تەشەببۇسىنى لاتىن ئامېرىكىسى ۋە كارىب رايونىنىڭ تەرەققىيات ئەۋزەللىكى ۋە ئېھتىياجى بىلەن تېخىمۇ ياخشى جىپسىلاشتۇرۇپ، جۇڭگو ـ لاتىن ئامېرىكىسى تەقدىر ئورتاق گەۋدىسى قۇرۇلۇشىدا تېخىمۇ كۆپ نەتىجىلەرنى قولغا كەلتۈرۈشكە تۈرتكە بولۇشنى خالايدۇ.

لۇلا مۇنۇلارنى بىلدۈردى: بىرازىلىيە بىلەن جۇڭگو ئۆزئارا ھۆرمەت قىلىدىغان، ئۆزئارا تايىنىدىغان ياخشى دوستلار، جۇڭگو بىرازىلىيەنىڭ ئەڭ مۇھىم ئىستراتېگىيەلىك ھەمكارلىق ھەمراھى، جۇڭگو خەلقى بىرازىلىيە خەلقىنىڭ ئەڭ ئىشەنچلىك دوستى. بۇ يىل بىرازىلىيە بىلەن جۇڭگو دىپلوماتىك مۇناسىۋەت ئورناتقانلىقىنىڭ 50 يىللىقى، رەئىس شى جىنپىڭنىڭ بۇ مۇھىم پەيتتە بىرازىلىيەدە يەنە بىر قېتىم دۆلەت ئىشلىرى زىيارىتىدە بولغانلىقىنى قىزغىن قارشى ئالىمەن. جۇڭگونىڭ بۇلتۇر جۇڭگوغا زىيارەتكە بارغىنىمدا قىزغىن كۈتۈۋالغانلىقىغا رەھمەت ئېيتىش ھەمدە بىرازىلىيە خەلقىنىڭ جۇڭگو خەلقىگە بولغان چوڭقۇر دوستلۇقىنى ئىپادىلەش ئۈچۈن بايا مەن قارشى ئېلىش مۇراسىمىدا، بىرازىلىيە سەنئەتكارلىرىنى «ۋەتىنىم» دېگەن داڭلىق ناخشىنى خەنزۇچە ئېيتىشقا ئالاھىدە ئورۇنلاشتۇردۇم. ئۆتكەن 50 يىلدا بىرازىلىيە بىلەن جۇڭگونىڭ ھەر قايسى ساھەلەردىكى ھەمكارلىقىدا مول نەتىجىلەر قولغا كەلتۈرۈلدى. بىرازىلىيە رەئىس شى جىنپىڭنىڭ زىيارىتىنى يېڭى باشلىنىش نۇقتىسى قىلىپ، ئىككى دۆلەت مۇناسىۋىتىدە تېخىمۇ كۆپ ئەمەلىي يېڭى نەتىجىلەرنى قولغا كەلتۈرۈپ، تېخىمۇ ئادىل دۇنيا ۋە تېخىمۇ ئىمكانىيەتلىك سىجىل پىلانېتانى بىرلىكتە بەرپا قىلىدىغان بىرازىلىيە ـ جۇڭگو تەقدىر ئورتاق گەۋدىسىگە تۈرتكە بولۇشنى ئۈمىد قىلىدۇ. بىرازىلىيە «ئېشىشنى تېزلىتىش پىلانى»، «يېڭى سانائەت پىلانى»، «جەنۇبىي ئامېرىكىنى بىر گەۋدىلەشتۈرۈش يول پىلانى» قاتارلىق تەرەققىيات ئىستراتېگىيەسىنى زور كۈچ بىلەن ئىلگىرى سۈرۈۋاتىدۇ، بۇلار جۇڭگونىڭ «بىر بەلباغ، بىر يول» تەشەببۇسى بىلەن يۈكسەك دەرىجىدە ماس كېلىدۇ، ئىككى تەرەپ تەرەققىيات ئىستراتېگىيەسىنى جىپسىلاشتۇرۇشنى كۈچەيتىپ، بىرازىلىيەنىڭ قايتا سانائەتلىشىش مۇساپىسىگە زور دەرىجىدە ياردەم بېرىپ، جەنۇبىي ئامېرىكىنى بىر گەۋدىلەشتۈرۈش قۇرۇلۇشىنى ئىلگىرى سۈرۈپ، تەرەققىي قىلىۋاتقان دۆلەتلەرنىڭ ئىتتىپاقلىشىپ ھەمكارلىشىش، ئۆزئارا مەنپەئەت يەتكۈزۈپ ئورتاق پايدا ئېلىش ئىشلىرىدا ئۈلگە تىكلەيدۇ. ئىككى تەرەپ خىزمەت گۇرۇپپىسى ئۇل ئەسلىھە، پۇل مۇئامىلە، كەسىپ زەنجىرى، پەن-تېخنىكا، ئېكولوگىيەلىك مۇھىت ئاسراش قاتارلىق نۇقتىلىق ساھەلەردىكى ھەمكارلىق ئۈستىدە مۇھاكىمە ئېلىپ بېرىشى ۋە ئۇنى ئىلگىرى سۈرۈشى كېرەك. تېخىمۇ كۆپ جۇڭگو كارخانىلىرىنىڭ بىرازىلىيەگە كېلىپ مەبلەغ سېلىپ ھەمكارلىشىشىنى قارشى ئالىمىز. بىرازىلىيە جۇڭگو بىلەن بولغان ئالاقىنى راۋانلاشتۇرۇش ۋە ئەشيا ئوبوروتى سەۋىيەسىنى ئۆستۈرۈپ، بىرازىلىيە ـ جۇڭگو ۋە لاتىن ئامېرىكىسىنىڭ ئورتاق تەرەققىي قىلىشى، گۈللىنىشىنى ئىلگىرى سۈرۈشنى ئۈمىد قىلىدۇ. بىرازىلىيە «يېڭى سوغۇق ئۇرۇش»قا قارشى تۇرىدۇ، دۇنيانىڭ كۆپ قۇتۇپلىشىشى ۋە باراۋەرلىك، ئۆزئارا ھۆرمەت قىلىش ئاساسىدىكى دۇنياۋى ھەمراھلىق مۇناسىۋىتىنى ئىلگىرى سۈرۈشنى تەشەببۇس قىلىدۇ، جۇڭگو بىلەن ب د ت، كېسەك ئالتۇن دۆلەتلىرى، 20 دۆلەت گۇرۇھى قاتارلىق كۆپ تەرەپلىك رامكىلاردىكى ئالاقە ۋە ھەمكارلىقنى داۋاملىق چوڭقۇرلاشتۇرۇپ، يەر شارىنىڭ جەنۇبىنىڭ دۇنياۋى ئىدارە قىلىشتىكى سۆز قىلىش ھوقۇقى ۋە تەسىر كۈچىنى ئاشۇرۇشنى خالايدۇ. بىرازىلىيە جۇڭگو بىلەن كۆپ تەرەپلىك ھەمكارلىقنى داۋاملىق قويۇقلاشتۇرۇپ، ئۇكرائىنا كىرزىسى قاتارلىق قىزىق نۇقتا مەسىلىلىرىنى تىنچ ھەل قىلىشنى ئىلگىرى سۈرۈشكە پائال تۆھپە قوشۇشنى خالايدۇ. رەئىس شى جىنپىڭنىڭ بۇ قېتىمقى زىيارىتى بىرازىلىيە ـ جۇڭگو مۇناسىۋىتى تارىخىدىكى يېڭى ئابىدە بولۇپ، بىرازىلىيە بىلەن جۇڭگونىڭ تەقدىر ئورتاق گەۋدىسى بەرپا قىلىشىنىڭ يېڭى سەھىپىسىنى ئاچتى.

سۆھبەتتىن كېيىن، ئىككى دۆلەت باشلىقلىرى «جۇڭخۇا خەلق جۇمھۇرىيىتى بىلەن بىرازىلىيە فېدېراتىپ جۇمھۇرىيىتىنىڭ تېخىمۇ ئادىل دۇنيا ۋە تېخىمۇ ئىمكانىيەتلىك سىجىل پىلانېتانى بىرلىكتە بەرپا قىلىدىغان جۇڭگو بىرازىلىيە تەقدىر ئورتاق گەۋدىسى ھەققىدىكى بىرلەشمە باياناتى»نى بىرلىكتە ئىمزالىدى.

ئىككى دۆلەت باشلىقلىرى «جۇڭخۇا خەلق جۇمھۇرىيىتى ھۆكۈمىتى بىلەن بىرازىلىيە فېدېراتىپ جۇمھۇرىيىتى ھۆكۈمىتىنىڭ <بىر بەلباغ، بىر يول> نى تەڭ قۇرۇش تەشەببۇسى بىلەن <ئىقتىسادنى ئاشۇرۇشنى تېزلىتىش پىلانى>، <بىرازىلىيە يېڭى سانائەت پىلانى>، <ئېكولوگىيەلىك تىپ ئۆزگەرتىش پىلانى>، <جەنۇبىي ئامېرىكىنى بىر گەۋدىلەشتۈرۈش يول پىلانى>نى جىپسىلاشتۇرۇش ھەمكارلىق يىرىك پىلانى»نى ئىمزالاشقا بىرلىكتە گۇۋاھ بولدى.

زىيارەت مەزگىلىدە، ئىككى تەرەپ يەنە ئىقتىساد ـ سودا، مەبلەغ سېلىش، يېزا ئىگىلىكى، رەقەملىك ئىقتىساد، ئىمكانىيەتلىك سىجىل تەرەققىيات، پەن ـ تېخنىكا، سۈنئىي ئەقىل، دۇنيا تەرەققىيات ھەمكارلىقى قاتارلىق ساھەلەردىكى 30 نەچچە تۈرلۈك ئىككى تەرەپلىك ھەمكارلىق ھۆججىتىنى ئىمزالىدى.

سەي چى، ۋاڭ يى قاتارلىقلار يۇقىرىقى پائالىيەتلەرگە قاتناشتى.

ۋىدېيونى ئېكراننىڭ سول تەرەپ ئاستىدىكى
阅读原文نى بېسىپ ياكى تېلېفونىڭىزغا مەركەز ۋىدېيوسى (央视频) ئەپ دېتالىنى چۈشۈرۈپ قاچىلاپ، «ياخشى»
(亚克西视角) ۋىدېيولۇق پىروگراممىمىزدىن كۆرۈڭ.

(بىر قىسىم جايلاردا 阅读原文نى بېسىپ كۆرۈش نورمال بولمايۋاتىدۇ، يەنىلا ئاستىدىكى ئىككىلىك كودنى سايىلەپ مەركەز ۋىدېيوسى 央视频 ئەپ دېتالىنى چۈشۈرۈپ قاچىلاپ كۆرۈشنى تەۋسىيە قىلىمىز).

来源：中央广播电视总台

监制｜巴哈提亚尔·图尔地

校对｜帕提古丽买买提

翻译｜伊明司马义

视频、微信编辑｜艾尼瓦尔·艾尔肯

www.uycnr.com

http://mp.weixin.qq.com/s?__biz=MzA3NTExNDcyMg==&mid=2651244290&idx=1&sn=ba0f7fb741a94f7ca3947698a52af6d2

中央广播电视总台维吾尔语

中国维吾尔语广播网（www.uycnr.com）是中央广播电视总台民族语言节目中心主办的国内最权威的维吾尔语新闻网。