དུར་ཁྲོད་བསིལ་པ་ཚལ་དང་། ཤ་ཝ་རིའི་བྲག་ཕུག་སོགས་ཀྱི་ལོ་རྒྱུས།

༄༅། །དུར་ཁྲོད་བསིལ་པ་ཚལ་དང་། རོ་སྒྲུང་། ཤ་ཝ་རིའི་བྲག་ཕུག 

མགོན་པོའི་བསྟོད་པ་མྱུར་མཛད་མའི་བྱུང་བ། 

གྲུབ་ཆེན་ཤ་ཝ་རི་པའི་ལོ་རྒྱུས།

དང་པོ། བསིལ་པ་ཚལ་གྱི་དུར་ཁྲོད།

བསིལ་བའི་ཚལ་གྱི་དུར་ཁྲོད་ནི། རྡོ་རྗེ་གདན་གྱི་མཆོད་རྟེན་རིན་པོ་ཆེ་ནས་ཤར་ཕྱོགས་སུ་རྒྱང་ཐག་སྤྱི་ལེ་ ༧ སར་ཆགས་ཤིང་། དེར་རྒྱ་གར་བས་དུར་རྒཱ་ཤྲཱི་ (Durgashri) ཞེས་བརྗོད་ཅིང་། དེ་ཡང་བསིལ་བ་ཚལ་ཞེས་པའི་སྒྲ་བཤད་ནི། འདུལ་བ་རྣམ་པར་འབྱེད་པའི་ཚིག་རྣམ་པར་བཤད་པ་ (ཚ) ༥༦བ༥ བསིལ་བའི་ཚལ་གྱི་དུར་ཁྲོད་ཅེས་བྱ་བ་ནི་སྔོན་ས་ཕྱོགས་དེ་མཆོག་ཏུ་བསིལ་བས་གྲོང་ཁྱེར་བ་རྣམས་ཀྱིས་ཚལ་བོར་ཏེ་དུར་ཁྲོད་དུ་གྱུར་པས་བསིལ་བའི་ཚལ་གྱི་དུར་ཁྲོད་ཅེས་བྱའོ། །ཞེས་གསུངས་ལ། སྟོན་པ་ག་ཡཱ་གོ་རི་ནས་རྒྱལ་པོའི་ཁབ་ཏུ་བྱོན་སྐབས་བསིལ་བ་ཚལ་གྱི་དུར་ཁྲོད་ཀྱི་གནས་འདིར་ཞག་ཅིག་བཞུགས་ཤིང་། རྒྱལ་པོ་གཟུགས་ཅན་སྙིང་པོ་ (བིམྦ་སཱ་ར་) འོངས་ནས་ཐོག་མར་མཇལ་བའི་ལོ་རྒྱུས་ཀྱང་ཡོད། ཆག་ལོ་ཆོས་རྗེ་དཔལ་གྱི་རྣམ་ཐར་ལས། དུར་ཁྲོད་བསིལ་བའི་ཚལ་ནི། ནཱ་ལེནྡྲའི་ནུབ་བྱང་ན་ནགས་སྤྱིལ་པོ་ཆེན་པོ་ཞིག་གི་དཀྱིལ་ན་ནགས་མེད་པའི་ས་སྟོང་ཆེ་བ་ཞིག་འདུག་གོ། ཞེས་གསལ་བ་ལྟར་དེང་སྐབས་སུའང་དེ་ལྟ་བུ་ཞིག་ཏུ་གནས།

ཡང་འོད་མའི་ཚལ་གྱི་རི་བོའི་ནང་ཕྱོགས་ཀྱི་ཐང་གི་གཡས་གཡོན་ནས་རྒྱུགས་པའི་ལྷོ་ཕྱོགས་ཀྱི་ཆུ་ཕྲན་བརྒྱུད་དེ་ཡར་ཕྱིན་ན་ནག་པོ་རྩེག་པའི་རི་ཡོད་ཅིང་། དེའི་མདུན་གྱི་ཐང་གི་ནགས་ཚལ་དེ་ཤི་ཏ་བ་ན། མདོ་ལས་གསུངས་པའི་བསིལ་བ་ཚལ་ཡིན་པར་གནས་བཤད་དུ་གསལ་ཞིང་། དེ་ལྟར་བསིལ་བ་ཚལ་དངོས་དང་། རྡོ་རྗེ་གདན་གྱི་ཉེ་འཁྲིས་སུ་ཡོད་པའི་བསིལ་བ་ཚལ་དེ་ནི་དོད་ཐུབ་ཅིག་ཡིན་པར་སྣང་གསུངས། འཇིགས་སུ་རུང་བའི་དུར་ཁྲོད་བརྒྱད་བསྟན་པའི་ནང་དུ། བསིལ་བ་ཚལ་དུ་བདུད་རྩིའི་སྒྲུབ་པ་མཛད། །བདུད་རྩི་ཡོན་ཏན་ལྷ་ཚོགས་ཞལ་གཟིགས་ཐོབ། །ཅེས་སོགས་གསུངས་པའི་གནས་ཀྱང་ཡིན་པར་གསལ་ལོ།།

གཉིས་པ། རོ་སྒྲུང་།

རོ་སྒྲུང་གི་གླེང་གཞི་གསུང་ཚུལ་གཉིས་ཡོད་པ་ལས། གཅིག་ནི། སྔོན་གྱི་དུས་ཡུལ་ཞིག་ན་སྒྱུ་མ་མཁན་སྤུན་མདུན་ཡོད་པ་དེར་གསལ་བྱེད་ཅེས་བྱ་བའི་གཞོན་ནུ་ཞིག་སྒྱུ་མ་བསླབས་ཏུ་སོང་། ཁོ་དེར་ལོ་གསུམ་ཙམ་ཕྱིན་ཀྱང་སྒྱུ་མ་སྤྲུལ་ཚུལ་མ་ཤེས། ཉིན་ཞིག་ཁོའི་སྤུན་དོན་གྲུབ་ཅེས་པ་བློ་རིག་བཀྲ་བ་ཞིག་ཡོད་པ་དེ་རྒྱགས་ཆས་བསྐྱེལ་དུ་བྱུང་། ཁོ་དེར་ལྷན་དུ་བསྡད་པའི་དགོང་མོར་སྒྱུ་མ་མཁན་རྣམས་ཀྱིས་སྤྲུལ་སྒྱུར་རྩལ་སྦྱོང་བྱེད་ཀྱིན་ཡོད་པ་ལ། ཁོས་གསང་བས་ཉན་ཏེ་སྒྱུ་མ་སྤྲུལ་ཚུལ་ཤེས་ཐུབ་པ་བྱུང་ནས་ཁོང་སྤུན་གཉིས་མཚན་མོ་སླར་རང་ཡུལ་དུ་ལོག །དོན་གྲུབ་ཀྱིས་རྟ་རར་རྟ་མཆོག་དཀར་པོ་ཞིག་ཡོད་པ་དེ་འཚོང་ཐབས་ཀྱིས་ཞེས་གསལ་བྱེད་ལ་སློབ་སྟོན་བྱས་ཏེ་རྟ་མཆོག་གཅིག་ཏུ་སྤྲུལ། དེའི་སྒྱུ་མ་མཁན་སྤུན་བདུན་གྱིས་གསལ་བྱེད་སྤུན་གཉིས་བྲོས་ཕྱིན་པས་ཁོང་ཚོས་སྒྱུ་མ་སྤྲུལ་སྟངས་ཤེས་ཡོད་པར་ངེས་ཟེར་ནས་ཚོང་དཔོན་བདུན་དུ་སྤྲུལ་ཏེ་གསལ་བྱེད་སྤུན་གྱི་སྒོ་རྩར་སླེབས། གསལ་བྱེད་ཀྱི་སྒྱུ་མ་མཁན་ཡིན་པར་མ་ཤེས་ནས་ཁོང་ཚོར་སྣེ་ལེན་བྱས་ཤིང་། ཁོང་ཚོར་རྟ་མཆོག་དེ་བཙོངས། སྒྱུ་མ་མཁན་རྣམས་ཀྱིས་རྟ་མཆོག་དེ་དོན་གྲུབ་ཡིན་པར་ཤེས་ནས་དགའ་ཚོར་ཆེན་པོས་འཁྲིད་དེ་འགྲོ་བའི་སྐབས་ཤིག་ན། གློ་བུར་དུ་རྟ་མཆོག་དེ་བྲོས་སྐབས་ཤིག་རྙེད་དེ་མགྱོགས་པོར་བྲོས་ཕྱིན་པ་ལ། ཁོང་ཚོས་རྗེས་དེད་ཀྱིས་ཟིན་ལ་ཁད་པའི་དུས་ཆུ་བོ་ཞིག་གི་འགྲམ་དུ་སླེབས། རྟས་ཆུ་ནང་དུ་ཉ་ཞིག་འཕྱོ་བར་མཐོང་ནས་དེ་མ་ཐག་གསེར་ཉ་ཞིག་ཏུ་སྤྲུལ་ནས་བྲོས། ཁོང་ཚོས་དེ་མ་ཐག་སྲམ་བདུན་དུ་སྤྲུལ་ནས་རྗེས་དེད་བྱས། ཉ་དེ་ཟིན་ལ་ཁད་པའི་དུས་ཉས་ནམ་མཁའ་ལ་ཡར་བལྟས་པས་ཕུག་རོན་ཞིག་འཕུར་བར་མཐོང་ནས་དེ་མ་ཐག་ཕུག་རོན་ཞིག་ཏུ་སྤྲུལ་ནས་བྲོས། ཁོང་ཚོས་དེ་མ་ཐག་ཁྲ་བདུན་དུ་སྤྲུལ་ནས་རྗེས་དེད་བྱས། ཕུག་རོན་དེ་བྲག་ཅིག་གི་སྐེད་ན་བྲག་ཕུག་ཅིག་ཡོད་པའི་ནང་དུ་བྲོས་ཕྱིན་པས། བྲག་ཕུག་དེར་སློབ་དཔོན་ཀླུ་སྒྲུབ་ཀྱིས་སྒྲུབ་པ་བྱེད་བཞིན་བཞུགས་པ་དང་མཇལ་ནས་ཁོང་ལ་སྐྱབས་ཞུས་པས། སློབ་དཔོན་གྱིས་ཕྲེང་བའི་མདོ་འཛིན་ལ་སྤྲུལ་ནས་སྡོད་གསུངས། ཁོས་དེ་བཞིན་བྱས་ཏེ་བསྡད་པའི་ཚེ་ཁོང་བདུན་རས་པ་བདུན་དུ་སྤྲུལ་ནས་བྲག་ཕུག་དེར་སླེབས་ཤིང་། སློབ་དཔོན་ལ་ཕུག་རོན་གར་ཡོད་དྲིས་པར་སློབ་དཔོན་གྱིས་ཅང་མ་གསུངས་པ་ལ་ཁོང་ཚོས་འབུ་སྲིན་བདུན་དུ་སྤྲུལ་ཏེ་སློབ་དཔོན་གྱི་སྐུ་ལུས་ལ་འཚེ་བར་བརྩམས་པ་ན། དོན་གྲུབ་ཀྱིས་སློབ་དཔོན་གྱི་སྐུ་ལ་ཞབས་འདྲེན་ཞུ་མི་འོས་བསམས་ནས་དེ་མ་ཐག་ཁྱིམ་བྱ་ཞིག་ཏུ་སྤྲུལ་ཏེ་འབུ་བདུན་ལ་མཆུ་ཚགས་བདུན་བརྒྱབས་ནས་བསད་པས་མི་རོ་བདུན་དུ་གྱུར། སློབ་དཔོན་ཐུགས་འགྱོད་ཆེར་སྐྱེས་པ་ལ་དོན་གྲུབ་ཀྱིས་སྡིག་སྦྱོང་དུ་ཅི་གསུངས་བཀའ་བཞིན་བསྒྲུབ་པར་ཞུས། སློབ་དཔོན་གྱིས་འོ་ན་སྡིག་སྦྱོང་ལ་དུར་ཁྲོད་བསིལ་བའི་ཚལ་དུ་རོ་དངོས་གྲུབ་ཅན་བྱ་བ་ཞིག་ཡོད་པ་དེ་ལོན་ཐུབ་པ་ཞིག་བྱུང་ན་དགོས་འདོད་ཐམས་ཅད་ཡོངས་སུ་འགྲུབ་ཐུབ་པ་དེ་ལེན་དུ་སོང་། དེ་ལེན་པ་ལ་ངག་གཏན་ནས་མ་ཤོར་བ་ཞིག་དགོས་ཞེས་གསུངས་ནས། ཁོའི་མིང་ལ་བདེ་སྤྱོད་བཟང་པོར་བཏགས། ཁོ་ལ་སྟ་རེ་ཟླ་བ་དཀར་པོ། རྐྱལ་པ་སྟོང་ཤོང་ཁྲ་མོ། ཐག་པ་རྒྱ་ཁྲེས་ཁྲ་བོ། མར་ཟན་ཟོས་པས་འཛད་མེད་རྣམས་གནང་ནས་རོ་རྒན་ལེན་དུ་བཏང་བའི་ཚུལ་གསལ། ཞེས་གསུངས་པ་ལྟར་དང་། ཤ་བ་རིའི་བྲག་ཕུག་གི་མདུན་ངོས་སུ་བྲག་རྡོ་ཆེན་པོའི་ངོས་སུ་ཨོྃ་དང་། ཨ་ཡིག་རང་བྱོན་མཐུན་སྣང་དུ་ཡོད་ཅིང་། རྡོ་རྗེ་ནི་རྡོ་དངོས་གྲུབ་རྡོ་རྗེ་མཐའ་མ་དེར་ཐིམ་པར་བརྗོད་སྲོལ་ཡོད།

གསུམ་པ། དཔལ་ཤ་ཝ་རིའི་བྲག་ཕུག

བསིལ་བ་ཚལ་གྱི་དུར་ཁྲོད་ནས་ཡར་ལམ་རི་སྐེད་དུ་དཔལ་ལྡན་ཤ་ཝ་རི་པའི་སྒྲུབ་ཕུག་དང་། སྒྲུབ་ཕུག་གི་སྒོ་ལ་མགོན་པོའི་བླ་ཤིང་དུ་ངོས་འཛིན་པའི་ཤིང་ཙན་དན་སྡོང་པོ་རྐང་གཅིག་ཡོད་ཅིང་། བྲག་ཕུག་དེར་གྲུབ་ཆེན་བརྒྱད་ཅུ་རྩ་བཞིའི་ནང་ཚན་བདུན་པ་གྲུབ་ཆེན་ཤ་བ་རི་པས་མགོན་པོ་ཞལ་གཟིགས་པས་ཐད་ཀར་ཞལ་རས་མཇལ་མ་ཕོད་པར་ཞབས་ནས་མཇལ་བཞིན་བསྟོད་པ་མྱུར་མཛད་མ་མཛད་པ་གྲགས་སོ།།

བཞི་པ། མྱུར་མཛད་མ་བཞུགས་སོ།།

༄༅། །ཧཱུཾ་མྱུར་མཛད་སྤྱན་རས་གཟིགས་ལ་ཕྱག་འཚལ་ལོ། །ཞབས་གདུབ་དང་བཅས་བི་ནཱ་ཡ་ཀ་ནན། །ནག་པོ་ཆེན་པོ་སྟག་གི་ཤམ་ཐབས་ཅན། །ཕྱག་དྲུག་སྦྲུལ་གྱི་རྒྱན་གྱིས་རྣམ་པར་བརྒྱན། །གཡས་པ་གྲི་གུག་བར་བ་འཕྲེང་བ་འཛིན། །ཐ་མ་ཌ་མ་རུ་ནི་དྲག་ཏུ་འཁྲོལ། །གཡོན་པ་ཐོད་པ་དང་ནི་མདུང་རྩེ་གསུམ། །དེ་བཞིན་ཞགས་པ་བཟུང་ནས་འཆིང་བར་བྱེད། །དྲག་པོའི་ཞལ་ནས་མཆེ་བ་རྣམ་པར་གཙིགས། །སྤྱན་གསུམ་དྲག་པོའི་དབུ་སྐྲ་གྱེན་དུ་འབར། །དཔྲལ་བར་སིནྔྷུ་ར་ཡིས་ལེགས་པར་བྱུགས། །སྤྱི་བོར་མི་བསྐྱོད་རྒྱལ་བོའི་རྒྱས་བཏབ་བརྟན། །ཁྲག་འཛག་མི་མགོ་ལྔ་བཅུའི་དོ་ཤལ་ཅན། །རིན་ཆེན་ཐོད་སྐམ་ལྔ་ཡིས་དབུ་ལ་བརྒྱན། །ཤིང་ལས་བྱོན་ནས་གཏོར་མ་ལེན་མཛད་པའི། །དཔལ་ལྡན་ཕྱག་དྲུག་པ་ལ་ཕྱག་འཚལ་ལོ། །སངས་རྒྱས་བསྟན་པ་གཉན་པོ་བསྲུང་བ་དང༌། །དཀོན་མཆོག་དབུ་འཕང་གཉན་པོ་བསྟོད་པ་དང༌། །བདག་ཅག་དཔོན་སློབ་འཁོར་དང་བཅས་རྣམས་ཀྱི། །རྐྱེན་ངན་བར་ཆད་ཐམས་ཅད་ཞི་བ་དང༌། །ཅི་འདོད་དངོས་གྲུབ་མྱུར་དུ་སྩལ་ཏུ་གསོལ། །ཞེས་པ་འདི་གྲུབ་ཆེན་ཤ་བ་རི་པས་མགོན་པོ་ཞལ་གཟིགས་ཀྱི་སྐབས་སུ་གནས་འདིར་མཛད་པའོ།།

ལྔ་པ། ཤ་ཝ་རི་པའི་ལོ་རྒྱུས་བཞུགས་སོ།།

གུ་རུ་ཤ་ཝ་རིའི་ལོ་རྒྱུས་ནི། རི་མནྡྲ་བི་ཀྲ་མ་ (རྣམ་གནོན་རྒྱུད་) ཞེས་བྱ་བའི་རི་ལ། ཤ་ཝ་རི་པ་བྱ་བའི་རྔོན་པ་གཅིག་ཡོད་པ་ལ། དེ་ལས་སུ་སྲོག་ཆགས་མང་པོ་བསད་ཅིང་། ཟས་སུ་ཤ་ཟ། དུས་རྟག་ཏུ་འཚོ་བའི་ཕྱིར་སེམས་ཅན་མང་པོ་ལ་གནོད་ཅིང་འཚེ་བའི་སྡིག་པ་འབའ་ཞིག་བྱེད་པ་དེ་ལ། འཕགས་པ་སྤྱན་རས་གཟིགས་ཀྱིས་གཟིགས་ནས་སྙིང་རྗེ་སྐྱེས་ཏེ། དེ་འདུལ་བའི་དོན་དུ་ཤ་ཝ་རི་པ་འདྲ་བའི་རྔོན་པ་ཞིག་ཏུ་སྤྲུལ་ནས། དེའི་གན་དུ་ཕྱིན་པ་དང་། ཤ་ཝ་རི་པས་དྲིས་པ། ཁྱོད་སུ་ཡིན། དེས་སྨྲས་པ། ང་ཡང་ཤ་ཝ་རི་པས་ཡིན་བྱས་པས། ཁྱོད་ཀྱི་ཡུལ་གང་ཡིན་ཟེར་བ་ལ། ཐག་རིང་པོ་ན་ཡོད་བྱས་པས། ཤ་ཝ་རི་པས་སྨྲས་པ། ཁྱོད་ཀྱིས་མདའ་གཅིག་གིས་ཤ་ཝ་དུ་སོད་དྲིས་པས། སྤྲུལ་པས་སྨྲས་པ། སུམ་བརྒྱ་གསོད་བྱས་པས། ཤ་ཝ་རི་པ་ན་རེ། འོ་ན་མདའ་དེ་འདྲ་བ་ང་ལ་ཡང་སློབས་ཤིག་ཟེར་བ་དང་། ནང་པར་སྤྲུལ་པས་ཤ་ཝ་རི་པ་ཁྲིད་དེ་ཐང་ཆེན་པོ་གཅིག་ལ་ཕྱིན་ནས། སྤྲུལ་པའི་ཤ་ཝ་ལྔ་བརྒྱ་ཙམ་བསྟན་ནས། དེ་ཤ་ཝ་རི་པས་མཐོང་བ་དང་། སྤྲུལ་པ་ལ་དྲིས་པ། ཁྱོད་ཀྱི་མདས་ཤ་བ་དུ་སོད། དེས་སྨྲས་པ། ལྔ་བརྒྱ་པོ་ཐམས་ཅད་སོད། ཤ་ཝ་རི་པ་ན་རེ། བཞི་བརྒྱ་ཕར་བོར་ལ་བརྒྱ་སོད་བྱས་པས། སྤྲུལ་པས་ཤ་ཝ་བརྒྱ་མདའ་གཅིག་གིས་བསད་ནས། ཤ་ཝའི་རོ་ཅིག་ཤ་ཝ་རི་པ་བསྐུར་བས། དེ་མ་ཐེག་པར་ཤ་ཝ་རི་པ་ང་རྒྱལ་ཆག་སྟེ། ཁྱིམ་དུ་འོངས་ནས་སྤྲུལ་པ་ལ་སྨྲས་པ། དེ་འདྲ་བའི་འཕོང་གི་སྟོབས་དེ་བདག་ལ་ཡང་སློབས་བྱས་པ་དང་། སྤྲུལ་པས་སྨྲས་པ། དེ་སློབ་པ་ལ་ཟླ་བ་གཅིག་ཤ་མི་ཟ་བ་གཅིག་དགོས་བྱས་པ་དང་། དེ་ནས་ཤ་ཝ་རི་པས་སེམས་ཅན་ལ་གནོད་འཚེ་སྤངས་པ་དང་། སྤྲུལ་པས་ཞག་བདུན་ནས་དེའི་གམ་དུ་ཕྱིན་ནས་སྨྲས་པ། ཁྱེད་ཅག་གིས་ཅི་ཟོས། དེ་ན་རེ་ཤིང་ཐོག་ཟོས་ཟེར་རོ། །དེ་ནས་སྤྲུལ་པས་སྨྲས་པ། ད་ཁྱེད་ཅག་གིས་སེམས་ཅན་ལ་བྱམས་དང་སྙིང་རྗེ་བསྒོམས་ཤིག་བྱས་ནས། ཟླ་བ་གཅིག་ལོན་པ་ན་དེར་གཤེགས་པ་དང་། ཤ་ཝ་རི་པ་ན་རེ། ད་ཤ་ཝ་གཤོར་བའི་ཆོས་བཤད་དོ་ཟེར་བ་ལ། སྤྲུལ་པས་དེར་མཎྜལ་ཞིག་མཛད་ནས་མེ་ཏོག་བཀྲམ་སྟེ་ཤ་ཝ་རི་པ་བཟའ་མི་གཉིས་ལ་མཎྜལ་ལ་ལྟོས་ཤིག་དང་། ཅི་མཐོང་དྲིས་པས་མཎྜལ་གྱི་ནང་དུ་དམྱལ་བ་ཆེན་པོ་བརྒྱད་དང་ཁོ་རང་གཉིས་ཀྱང་དེར་འཆེད་པར་མཐོང་ནས། འཇིགས་ཤིང་སྐྲག་ལ། དངངས་ཤིང་འདར་ནས་སྐད་མ་ཐོན་པ་ན། སྤྲུལ་པས་ཡང་དང་ཡང་དུ་དྲིས་པས་སེམས་ཅན་དམྱལ་བ་འདི་འདྲ་བ་གདའ་ཞུས་པས། སྤྲུལ་པས་ཁྱེད་དེར་སྐྱེ་བ་ལ་མི་འཇིགས་སམ་གསུངས་པས། དེ་དག་ན་རེ། འཇིགས་ལགས་ཏེ་དེ་ལས་ཐར་བའི་ཐབས་མཆིས་ལགས་སམ་ཞུས་པས། དེ་ཡོད་ན་ཁྱོད་ཀྱིས་སྒྲུབ་ནུས་སམ་གསུངས་པས། ནུས་ཟེར་ནས་སྤྲུལ་པས་ཤ་ཝ་རི་པ་བཟའ་མི་གཉིས་ལ་ཆོས་བཤད་དེ། སྲོག་བཅད་པའི་རྣམ་པར་སྨིན་པས་ནི་སེམས་ཅན་དམྱལ་བར་སྐྱེ་བ་ཡིན་ལ། བྱེད་པ་རྒྱུ་མཐུན་ནི་སྲོག་གཅོད་སྙིང་འདོད་པ་ཡིན་ཅིང་། དབང་གི་འབྲས་བུས་ནི་ཚེ་ཐུང་བ་ཡིན་ལ། སྐྱེས་བུ་བྱེད་པའི་འབྲས་བུ་ནི་གཟི་བརྗིད་ངན་པ་ཡིན་ནོ། །སྲོག་གཅོད་པའི་ལས་སྤངས་པས་བྱང་ཆུབ་ཐོབ་པ་ཡིན་ལ། བྱེད་པ་རྒྱུ་མཐུན་ནི་སྲོག་གཅོད་སྙིང་མི་འདོད་པ་དང་། དབང་གི་འབྲས་བུ་ནི་ཚེ་རིང་བ་ཡིན་ལ། སྐྱེས་བུ་བྱེད་པའི་འབྲས་བུ་ནི་གཟི་བརྗིད་དང་ལྡན་པ་ཡིན་ནོ། །ཞེས་སོགས་མི་དགེ་བ་བཅུའི་ཉེས་དམིགས་དང་། དགེ་བ་བཅུའི་ཕན་ཡོན་བཤད་པས། ཤ་ཝ་རི་པ་འཁོར་བ་ལ་སྐྱོ་བ་སྐྱེས་ནས། ཆོས་ལ་མི་ཕྱེད་པའི་དད་པ་བརྟན་པོ་ཐོབ་པར་གྱུར་ཏོ། །

དེ་ནས་འཕགས་པ་སྤྱན་རས་གཟིགས་ཀྱིས་གདམས་ངག་གནང་ནས་རི་བོ་དན་ཏིར་གཤེགས་པ་དང་། ཤ་ཝ་རིས་ལོ་བཅུ་གཉིས་སུ་རྣམ་པར་མི་རྟོག་པའི་སྙིང་རྗེ་ཆེན་པོ་བསྒོམས་པས་ཕྱག་རྒྱ་ (སོ་ལྟམ་) ཆེན་པོ་མཆོག་གི་དངོས་གྲུབ་ཐོབ་ནས། སྙིང་རྗེ་ཆེན་པོའི་ཆོས་ཉིད་ལས་ལངས་ཏེ་འཕགས་པའི་སྤྱན་ལམ་དུ་ཕྱིན་པ་དང་། འཕགས་པས་ཤ་ཝ་རི་པ་ལ་ཡོན་ཏན་གྱི་བསྔགས་པ་དུ་མ་བརྗོད་ནས། རིགས་ཀྱི་བུ་རྩའི་མེ་ཤི་བ་དང་འདྲ་བའི་ཕྱོགས་གཅིག་གི་མྱ་ངན་ལས་འདས་པ་ནི་མཆོག་མ་ཡིན་ལ། ཁྱོད་ཀྱིས་སེམས་ཅན་གྱི་དོན་དུ་འཁོར་བར་འདུག་ལ། སེམས་ཅན་བསམ་གྱིས་མི་ཁྱབ་པའི་དོན་གྱིས་ཤིག་གསུངས་པས། ཤ་ཝ་རི་པ་རང་གི་ཡུལ་དུ་བྱོན་ནས་བཞུགས་སོ། །

མཚན་དུ་དཔལ་ཤ་ཝ་རི་པ་ཞེས་པའམ། རྨ་བྱའི་གཤོག་པ་གྱོན་ནས་འདུག་པས་རྨ་བྱའི་གོས་ཅན་ཞེས་ཀྱང་བྱ་ལ། དུས་རྟག་ཏུ་རི་ལ་བཞུགས་པས་རི་ཁྲོད་མགོན་པོ་ཞེས་ཀྱང་ཟེར་ཏེ་མཚན་གསུམ་དུ་གྲགས་སོ། །སྐལ་བ་དང་ལྡན་པ་ལ་བརྡ་དང་མགུར་ལ་སོགས་པའི་དོན་མཛད་དེ། བྱམས་པའི་བསྟན་པ་འཆར་གྱི་བར་དུ་སྐུ་འདི་ཉིད་ཀྱིས་འཛམ་བུའི་གླིང་འདིར་བཞུགས་སོ། །གུ་རུ་ཤ་ཝ་རི་པའི་ལོ་རྒྱུས་རྫོགས་སོ།། །།

ལུང་ཁུངས། བསྟན་འགྱུར་དཔེ་བསྡུར་མ། རྒྱུད། ༼གེ༽ དེབ་ཨང་ ༤༨ པ། ཤོག་གྲངས་ ༤༢༤ ནས་ ༤༢༦ བར་གསལ།།

མཛད་པ་པོ། བླ་མ་མི་འཇིགས་པ་སྦྱིན་པའི་དཔལ། ལོ་ཙཱ་བ། མི་ཉག་ལོ་ཙཱ་བ་སྨོན་གྲུབ་ཤེས་རབ།

གངས་སྣོན་པ་བསྟན་འཛིན་མདོ་སྔགས་ལགས་ནས་ཞུ་དག་གནང་བ་ལྟར་བསྐྱར་དུ་འཇུག་འགོད་དང་། གྲུབ་ཆེན་ཤ་ཝ་རི་པའི་སྐུ་པར་ཞིག་ཀྱང་ཁ་སྣོན་ཞུས་ཡོད་པས་དེ་དགོངས་འཇགས་འཚལ།