རྒས་པའི་སྡུག་བསྔལ།
རྗེ་མི་ལས།
བརྟོད་ཕུར་འདོན་པའི་ལྡངས་ལུགས་དང་གཅིག།
བྱ་ལ་འཇབ་པའི་འགྲོ་ལུགས་དང་གཉིས།།
ས་དོ་ཆད་པའི་སྡོད་ལུགས་དང་གསུམ།།
གསུམ་འདི་གསུམ་འཛོམས་པའི་དུས་ཚོད་ན།།
ཨ་ཕྱི་སྒྱུ་ལུས་རྒུད་པའི་ཡིད་ཕམ་མ།།
ཕྱི་པགས་པ་འདུས་པའི་གཉེར་མ་དང་གཅིག།
ནང་ཤ་ཁྲག་ཟད་པའི་འབུར་གོབ་དང་གཉིས།།
བར་གླེན་ལྐུགས་འོན་ལོང་ཐོམ་ཡོར་དང་གསུམ།།
གསུམ་འདི་གསུམ་འཛོམ་པའི་དུས་ཚོད་ན།།
ཨ་ཕྱི་མི་སྡུག་སྟོན་པའི་ཁྲོ་གཉེར་ཅན།།
ལྕི་ལ་ཧྲུལ་བའི་དུག་པོ་དང་གཅིག།
གྲང་ལ་ཉོག་པའི་བཟའ་བཏུང་དང་གཉིས།།
པགས་པོ་བཞི་སྦྱོར་གྱི་མལ་ས་དང་གསུམ།།
གསུམ་འདི་གསུམ་འཛོམ་པའི་དུས་ཚོད་ན།།
ཨ་ཕྱི་མིས་འགོམ་ཁྱིས་འགོམ་གྱི་རྟོགས་ལྡན་མ།།
