ཟླ1པའི་ཚེས8ཉིན་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་སྲིད་ཇུས་ཀྱི་འཆར་ཅན་བརྡ་ཁྱབ་ཚོགས་འདུ་འཚོགས། ཚོགས་ཐོག་ཏུ་རྒྱལ་ཁབ་འཕེལ་རྒྱས་བཅོས་སྒྱུར་ཨུ་ལྷན་དང་། ནོར་སྲིད་པུའུ། ཚོང་དོན་པུའུ། ཀྲུང་གོ་མི་དམངས་དངུལ་ཁང་། ཁྲོམ་ར་ལྟ་སྐུལ་དོ་དམ་སྤྱི་ཁྱབ་ཅུའུ་བཅས་ཀྱི་འབྲེལ་ཡོད་འགན་འཁུར་བས“གསར་པ་གཉིས”སྲིད་ཇུས་ལག་བསྟར་བྱེད་ཤུགས་ཆེ་རུ་གཏོང་བའི་འབྲེལ་ཡོད་གནས་ཚུལ་ངོ་སྤྲོད་བྱས། རྒྱལ་ཁབ་འཕེལ་རྒྱས་བཅོས་སྒྱུར་ཨུ་ལྷན་གྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། འཛད་སྤྱོད་དངོས་རྫས་རྙིང་པ་གསར་དུ་བརྗེ་བར་རྒྱབ་སྐྱོར་བྱ་རྒྱུ་སྟེ། ལག་ཁྱེར་ཁ་པར་སོགས་ཨང་ཀིའི་ཐོན་རྫས་ཉོ་སྒྲུབ་བྱེད་པའི་ཁ་གསབ་གསར་པ་ལག་བསྟར་བྱ་རྒྱུ་ཡིན། མི་སྒེར་གྱི་འཛད་སྤྱོད་པས་ལག་ཁྱེར་ཁ་པར་དང་། ལག་འཁྱེར་གློག་ཀླད། རིག་ནུས་ལག་གདུབ་སོགས་ཨང་ཀིའི་ཐོན་རྫས་རིགས་གསུམ་ཉོ་སྐབས། ཐོན་རྫས་ཀྱི་ཕྱིར་ཚོང་རིན་གོང་སྒོར6000ལས་བརྒལ་མི་ཆོག)ཐོན་རྫས་ཀྱི་ཕྱིར་ཚོང་རིན་གོང་གི15%ལྟར་ཁ་གསབ་སྤྲད་རྒྱུ་དང་། འཛད་སྤྱོད་པས་ཐོན་རྫས་རིགས་གང་དག་ཉོས་ན་རེ་རེ་ལ་ཁ་གསབ་གཅིག་རེ་ཡོད་པ་དང་། ཐོན་རྫས་རེའི་ཁ་གསབ་སྒོར500ལས་བརྒལ་མི་རུང་། རྙིང་པ་གསར་དུ་བརྗེ་བའི་ཁ་གསབ་ལོངས་སུ་སྤྱོད་པའི་ཁྱིམ་སྤྱོད་གློག་ཆས་ཀྱི་ཐོན་རྫས་ན་ནིང་གི་རིགས8ནས2025ལོའི་རིགས12བར་ཇེ་མང་དུ་བཏང་བ་དང་། ཐོན་རྫས་རྐྱང་པར་ཆེས་མཐོ་ན་ཕྱིར་ཚོང་རིན་གོང་གི20%ཡི་ཁ་གསབ་ལོངས་སུ་སྤྱད་ཆོག ཆ་རྐྱེན་དང་མཐུན་པའི་རྒྱལ་ཁབ་བཞི་པའི་ཕྱིར་གཏོང་ཚད་གཞིའི་འབར་སྣུམ་རླངས་འཁོར(རྒྱལ་ཁབ་ཀྱི་རིམ་པ་བཞི་པའི་ཕྱིར་གཏོང་ཚད་གཞི་ལག་བསྟར་དང་འཚམ་པའི་འབར་སྣུམ་རླངས་འཁོར་སྟེ། 2012ལོའི་ཟླ6པའི་ཚེས30ཉིན་སྔོན་ལ་ཐོ་འགོད་བྱས་པའི་རླངས་སྣུམ་རླངས་འཁོར་དང་། 2014ལོའི་ཟླ་6པའི་ཚེས30ཉིན་གྱི་སྔོན་ལ་ཐོ་འགོད་བྱས་པའི་ཁྲའེ་སྣུམ་དང་དེ་བཞིན་འབར་རྫས་རླངས་འཁོར་འདུ་བ)དག་བེད་མེད་དང་གསར་སྒྱུར་ཁ་གསབ་ཁྱབ་ཁོངས་ནང་བཅུག་ནས་རྒྱལ་ཡོངས་ཀྱི་རླངས་འཁོར་བརྗེ་རེས་དང་གསར་སྒྱུར་གྱི་ཁ་གསབ་མཐོ་ཤོས་དེ་གཅིག་གྱུར་གྱིས་ཚད་ཚད་ལྡན་དུ་གཏང་རྒྱུ། གྲོང་མིའི་ཁྱིམ་ཚང་གི་དགོས་མཁོ་དངོས་ལ་གཞིགས་ནས་འཛད་སྤྱོད་པ་མི་རེ་ནས་མཁའ་རླུང་སྙོམས་ཆས་ཀྱི་ཐོན་རྫས་ཉོ་དུས་ཐོན་རྫས་གཅིག་ལ་ཁ་གསབ1དང་གསུམ་ཉོ་བ་ལ་ཁ་གསབ3རེ་ཡོད། ཁྱིམ་ཚང་གི་འཛད་སྤྱོད་དངོས་རྫས་གསར་དུ་བརྗེ་བ་དང་གློག་སྒུལ་ལྕགས་རྟ་རྙིང་པ་གསར་དུ་བརྗེ་བར་མུ་མཐུད་རྒྱབ་སྐྱོར་ཤུགས་ཆེན་བྱ་རྒྱུ།
