ۇرپاعىما باق قونسىن دەسەڭ جاسا ءبىر كەلىنشەكتىڭ عاجايىپ اڭگىمەسى
توسەگىمدى اشىپ تۇنگى ۇيقىعا جاتا بەرگەنىم سول ەدى، ەلەكتروندى حات ساندىعىىما كەلىپ تۇسپەسى بار ما؟
اۋەلگىدە،ونشا سالايىنشى- دەپ اۋديو جازبانى قوستىم. بەيتانىس ايەل باسىنان وتكەن وقيعاسى جايىندا بايانداپ جاتىر ەكەن.
ءبىر جاسقا ءالى تولا قويماعان بالاممەن، كۇيەۋىم ۇشەۋمىز اۋىلدا تۇراتىن اتا- اناما باردىق- دەپ باستادى اڭگىمەسىن الگى ايەل.
كوپتەن كورمەگەن اكە- شەشەم، استى- ۇستىمىزگە ءتۇسىپ جاتىر. قازاق ءۇشىن اكەڭنىڭ قاباعىمەن، انانىڭ ايالى الاقانىنان اسقان نە بار شىركىن. قالادان قىزىم كەلدى - دەپ قۇراق ۇشىپ. بارىن الدىما قويىپ، بالامدى الدىنا الىپ، بايىما جىلى قاباق تانىتىپ جاتىر اكە- شەشەم.
قايران ۋاقىت، قىستا تەرەزەگە ويۋ سالعان ايازداى، اتا- انامنىڭ بەتىنە اجەپتەۋىر ءاجىم ءتۇسىرىپتى. اكەمنىڭ ادەمى قىراۋ شالعان سامايى بار ەدى. بۇگىندە شاشى قار تۇسكەن، الاتاۋدىڭ شىڭىنداي اعارىپتى.ەرنىنىڭ ۇستىندەگى سەلدىر مۇرتىمەن، يەگىنىڭ استىنداعى شوقشا ساقالى بىرىگىپ، قىراۋ تۇسكەن قامىستاي، ولاردا اپپاق. ەڭسەسىن تۇسىرمەيتىن ەسىل اكەمدى، قارتتىق شىركىن قاتتى ەڭكەيتىپتى بيىل.
ءبيداي ءوڭدى انامنىڭ بەتىندەگى ءاجىمى، بالامنىڭ بىلەگىندەگى سىزاتتاي تەرەڭدەپتى. قويۋ تۇندە قولىمەن ينە ساباقتايتىن انامنىڭ جانارى جاساۋرايتىن بولىپتى. بۇل ۇيدە بايقاعانىم،وزگەرمەگەن ەكى دۇنيە بار ەكەن. ول اكە- شەشەمنىڭ كەڭ پەيىلمەن، قوناقجاي نيەتىنە بەرگەن، توردەگى اق داستارقانى عانا.
مەنىڭ اتا- انام وتە قاراپايىم قايىرىمدى جاندار.وسى ۇيدەن انامنىڭ قولىنان اس ىشپەگەن ادام جوق. ءتىپتى قاڭتاردىڭ قاقاعان ايازىندا دالادا قالعان جولاۋشىلار تالاي رەت اكەم ۇيگە اكەلگەن. انام اس- اۋقاتىن بەرىپ، ەرتەڭىنە شىعارىپ سالاتىن
شىلىڭگىر شىلدەنىڭ ىستىعىندا شولدەيسىڭدەر، ەڭ بولماسا ءبىر بوتەلكە سۋ الىڭدارشى - دەگەن انامنىڭ ايتقانىنا قۇلاق اسپادىم. قالا- دەگەن مىناۋ تۇر، امان بولساق ەكى ساعاتتاي جەتەرمىز- دەپ بوي بەرمەدىم. بالامدى الدىما الىپ، باۋىر باسقان اۋىلعا قوش- دەپ قوساعىمىز ەكەۋمىز جولعا شىقتىق. قۇدايدىڭ قۇدىرەتى جارتى جولعا كەلگەندە كولىگىمىز وزىنەن- ءوزى ءسونىپ قالماسى بار مە؟ ايدالا، جاپان ءتۇز، ۇشەۋمىزدەن باسقا جان جوق.
كۇرە جولدىڭ بويىندا، كوك شوپكە جايىلىپ تۇرعان كۇرەڭ اتتاي، كولىگىمىز تۇر قاقپاعى كوتەرىلىپ.كۇيەۋىم كولەڭكە ىزدەپ الەك، اعاش تۇگىلى بۇتا جوق.بالا شولدەپ شىرىلداپ بارا جاتىر. باعاناعى انامنىڭ ايتقانىنا قۇلاق اسسامشى. مانادان بەرى ماشيناسىنىڭ ماتورىن شۇقىپ مازاسى كەتكەن كۇيەۋىم جارايدى ەكەن. ءبىر اۋىز ماعان سويلەگەن جوق. ارتقى ورىندىقتا جاتقان كورپەشەنى بىزگە كولەڭكە قىلىپ الەك. ءبىراز ۋاقىت ءوتتى. كولىكتىڭ كولەڭكەسىندە وتىرعان مەنىڭ كوزىمە الىستان شاڭ كورىندى. قالاعا جول تارتقان اپپاق كولىكتىڭ ىشىنەن اق جاۋلىقتى اپامەن، الپىستاردى القىمداعان اعا ءتۇستى. سۋلارى بار ەكەن. ءشولىمىزدى ابدەن قاندىردىق. اق كوڭىل الگى اعا، ءبىزدىڭ كولىكتى ءبىراز شۇقىپ ەدى بولمادى.
اعا اق پەيىلىڭىزگە راحىمەت. قالاعا بارساڭىز حابارلاسساڭىز بولدى. اتتاي شاۋىپ كەلەم، جۇمىسىڭىز بولسا ايتىڭىز قالادا شەشىپ بەرەم- دەپ جولداسىم جالماڭداپ جاتىر. شىنىندا كۇيەۋىم ارىپتەستەرىنىڭ اراسىندا وتە ابىرويلى جىگىت ەدى. قالاعا شامامەن ءالى قىرىق شاقىرىمداي بار.
جارايدى، اماناتىڭدى ايتام اينالايىن- دەپ اعام كولىكتى اينالىپ ءوتىپ بارا جاتىپ ماعان قارادى. كىمنىڭ قىزىسىڭ اينالايىن؟ - دەدى. كەمنىڭ اتىن ايتىپ ەدىم، اۋىلدىڭ شەتىندەگى، كانالدىڭ جاعاسىنداعى ۇلكەن ۇيدە تۇراتىن اعانىڭ قىزىسىڭ با؟ - دەپ اكەمنىڭ اتىن ايتتى. ءيا، سول كىسىنىڭ قىزىمىن - دەپ ەدىم. ويباي، مەن مىنا بالالاردى دالادا تاستامايمىن- دەپ اعام ايەلىنە قارادى. بۇل قىزدىڭ اكەسى مەنى قاقاعان قىستا قاتىپ قالعان ماشينامدى ۇيىنە سۇيرەپ اپارعان. اپامنىڭ قولىنان اس ءىشىپ سول ءتۇنى ايازدان امان قالعانبىز. قايرىمدى اعاممەن، قوناقجاي جەڭەشەمنىڭ بالالارى عوي
بۇلار. “ ءبىر كۇن اسىن ىشكەن ۇيگە، قىرىق كۇن سالەم- دەگەن .
جاقسىلىعىن ۇمىتسام، ازاماتتىعىما سىن. ساسپاڭدار، ءوزىم جەتپەسەم دە سەندەردى جەتكىزەم- دەپ كولىگىنىڭ ارتىنا ءبىزدىڭ ماشينانى شىنجىرىمەن تىركەدى. كۇيەۋىم رولدا، ءشولىن قاندىرعان بالام بالبىراپ ۇيىقتاپ جاتىر. تەك مەنىڭ عانا كوزىمنەن شىققان ءمولدىر مونشاق جاسىم، ءجۇزىمدى جۋىپ كەلە جاتىر.جاسىمدا توقتاتا الار ەمەسپىن. جولداسىمدا نەگە جىلاپ كەلە جاتىرسىڭ- دەپ ولدا ەشنارسە سۇرامادى مەنەن. ول دا ءۇنسىز. ءولى تىنىشتىق.
بۇل جىلاۋدىڭ دا ءوز سەبەبى بار ەدى. ول كەزدە مەن تۇلىمشاعى جەلبىرەگەن مەكتەپتە وقيتىن كىشكەنتاي قىزبىن. سول جىلى قار قالىڭ ءتۇستى. قاڭتاردىڭ شۇناق ايازى كەۋدەسىندە شىبىن جانى باردىڭ ءبارىن شىرقىراتتى. ........
اڭگىمەنىڭ جالعاسىن استىڭعى 阅读原文دەگەن جازۋدى باسىپ وقىڭىز
