གྱེར་ཀློག ▶ ༧རྗེ་བཙུན་བླ་མར་བསྟོད་པ།

   

༄༅། །རྗེ་བཙུན་བླ་མར་བསྟོད་པ་དཔྱིད་ཀྱི་རྒྱལ་མོའི་མགྲིན་གླུ།

རྩོམ་པ་པོ།   གངས་གཅེས་པ།

སྙན་སྒྲོན་མཁན།  གངས་གཅེས་པ།

བསླབ་གསུམ་རྒྱན་གྱི་གོ་ཆ་ལེགས་པར་སྤུད། །

གསང་གསུམ་མི་ཟད་འཁོར་ལོ་བར་མེད་སྐོར། །

སྐུ་གསུམ་ཀུན་འདུས་རྩ་བའི་བླ་མ་སྟེ། །

མཆོག་གསུམ་དབྱེར་མེད་དགེ་བའི་བཤེས་ལ་འདུད། །

ཉོན་མོངས་གདོད་ནས་དག་པས་མི་ཡི་ཕུད། །

འཆད་རྩོད་རོ་མངར་བསྟིམས་པས་མཁས་པའི་ཕུད། །

མདོ་སྔགས་ལེགས་བཤད་སྨྲ་བས་ཆོས་པའི་ཕུད། །

ཕུད་གསུམ་དཀོན་མཆོག་གསུམ་ལ་གཅིག་ཏུ་མཆོད། །

འདི་ན་ཆོ་ངེ་དྲག་པོ་རབ་སྒྲོག་པའི། །

སྐལ་ལྡན་ཐར་འདོད་རྣམས་ཀྱི་མགོན་གཅིག་པུ། །

རྗེ་བཙུན་བླ་མ་བློ་བཟང་ཐར་པ་ལ། །

དང་བའི་ཡིད་ཀྱིས་བསྟོད་པ་བྱེད་ལ་སྤྲོ། །

རབ་བྱུང་བཅོ་ལྔའི་ས་བྱ་ལོ་ཡི་དུས། །

དབང་ཕྱོགས་དབུས་སྟོད་མལ་གྲོ་དག་ཞིང་ནས། །

བདག་ཅག་འགྲོ་བའི་མགོན་རབ་མཆོག་གྱུར་ཞིག །

ནམ་མཁའི་ནོར་བུ་ལྟ་བུར་ངང་གིས་ཚེས། །

པཎ་ཆེན་བཅུ་པ་ཆེན་མོའི་མཛད་བཟང་གི །

དབྱར་སྐྱེས་རྔ་སྒྲ་ཐོས་པས་གཙུག་ཕུད་ཅན། །

རབ་ཏུ་མྱོས་བཞིན་བསྟན་འགྲོའི་བྱ་བ་ལ། །

འཇུག་པར་སྤྲོ་བ་དམ་པའི་རང་བཞིན་ཉིད། །

ལམ་གྱི་རྩ་བ་བཤེས་གཉེན་བསྟེན་ཚུལ་ཞེས། །

ཡང་ཡང་དགོངས་བཞིན་ལམ་འབྲོག་དགེ་བའི་བཤེས། །

སྲོག་བཞིན་གོང་དུ་བཀུར་བའི་འདུལ་འཛིན་པ། །

རྗེ་བཙུན་བློ་བཟང་ཐར་པའི་རྣམ་ཐར་བསུ། །

དམར་སེར་ཐུན་མཚམས་ལང་ཚོའི་དཔལ་འཛིན་ཅིང་། །

བྱང་ཆུབ་སེམས་དཔའི་ངང་མོ་ཐུགས་མཚོར་རོལ། །

རབ་སྙན་སྒྲ་དབྱངས་ལྷ་མོའང་སྐྱེངས་མཛད་པའི། །

ཞི་བསིལ་རོ་མཆོག་དཔྱིད་ཀྱི་རྒྱལ་མོའི་གླུ། །

འོད་དཔག་མེད་མཚུངས་པཎ་ཆེན་བཅུ་པ་ཡི། །

བཀའ་བཞིན་འབྲོག་རི་མི་འཇིགས་ལྷུན་པོའི་སྤོར། །

ཐུབ་གསུང་གཡུ་རལ་རྒྱས་པའི་གདོང་ལྔ་ཅན། །

ཆོས་ཀྱི་གད་རྒྱངས་ད་བར་ཟམ་མི་ཆད། །

འཛམ་གླིང་སྤྱི་ལ་སྨན་པའི་ནང་ཆོས་འདི། །

མ་ཉམས་རྒྱུན་གནས་དགོས་ན་དམངས་ཚོགས་ཀྱི། །

གོ་རྟོགས་མཐོ་རུ་གཏང་རྒྱུ་གཙིགས་ཆེ་ཞེས། །

ངག་གི་དབང་ཕྱུག་རོལ་བའི་ཞལ་ལས་གསུངས། །

གཅིག་ནས་གླིང་བར་འདི་ལ་ཟེར་བརྒྱ་སྦྱིན། །

གཉིས་ནས་ཐར་པའི་ལམ་ལ་ཡང་དག་བཀྲི། །

གསུམ་ནས་གྲྭ་རྐྱང་རིགས་སྨྲའི་སྐྱིད་གླུ་ལེན། །

རྗེ་བཙུན་བློ་བཟང་ཐར་པའི་རྣམ་ཐར་བསུ། །

བློ་བཟང་ཐར་པའི་མཚན་གྱི་སྙན་པ་དེ། །

ས་འཛིན་དཀར་པོའི་ལྗོངས་འདིར་ཐོས་ཙ་ན། །

ཡིན་ཚུལ་མིན་ཚུལ་གླེང་བའི་ཐལ་སྒྲ་མཁན། །

གཞན་དག་ལ་ནི་གུས་པ་ལྷོད་པར་གྱུར། །

བརྗིད་དོ་གངས་རིའི་ཁྲོད་ན་ཇོ་རི་བཞིན། །

ཁྱེད་སྐུ་དད་ལྡན་དབུས་ན་བཞུགས་པ་ཡང་། །

སྙན་ནོ་དྲི་ཟའི་པི་ཝང་འཁྲོལ་བ་བཞིན། །

ཁྱེད་གསུང་དམ་ཆོས་བདུད་རྩི་བོད་འབངས་ལ། །

ཡོན་ཏན་ཀུན་གྱི་གཞི་རྟེན་ཚུལ་ཁྲིམས་ནི། །

ཁོག་པའི་སྙིང་དང་མིག་གི་འབྲས་བུ་ལྟར། །

སྡོམ་གསུམ་མ་ཉམས་མི་ཡི་རབ་དང་ཕུལ། །

རྗེ་བཙུན་བློ་བཟང་ཐར་པའི་རྣམ་ཐར་བསུ། །

བལྟས་སྣང་དབུ་ལ་གཙུག་ཏོར་མགོ་ལ་ནི། །

གདེངས་ཀ་མེད་ཀྱང་སངས་རྒྱས་ཀླུ་སྒྲུབ་དང་། །

གཉིས་སུ་མ་མཆིས་སྙིགས་དུས་སེམས་ཅན་གྱི། །

སྐྱབས་ས་རེ་ས་ཁྱེད་ལས་གཞན་མ་མཆིས། །

དང་པོ་ཐོས་བསམ་ཀློང་ནས་སྙིང་པོ་བཙལ། །

བར་དུ་བསྒོམ་པའི་ལམ་ནས་ལྟ་སྒྲུབ་རྙེད། །

མཐའ་མ་ཉམས་ལེན་ངང་ནས་མི་ཚེ་ཟད། །

རྗེ་བཙུན་བློ་བཟང་ཐར་པའི་རྣམ་ཐར་བསུ། །

བློ་བཟང་རྒྱལ་བ་གཉིས་པ་བསྐྱར་དུ་ནི། །

བྱོན་འདྲའི་བླ་མ་མཚན་དཔེ་བཟང་པོའི་སྐུ། །

ཐར་པ་བསྒྲུབ་ལ་རེམ་པའི་མོས་བུའི་སླད། །

མི་འགྱུར་ལྷུན་དུ་བཞུགས་པའི་གསོལ་བ་འདེབས། །

  ཞེས་ཡོངས་ཀྱི་དགེ་བའི་བཤེས་གཉེན་ཆེན་མོ་དགེ་ལྡན་སྙན་གྲགས་སམ་རྗེ་བཙུན་བླ་མ་བློ་བཟང་ཐར་པ་ལ་བསྟོད་པ་དཔྱིད་ཀྱི་རྒྱལ་མོའི་མགྲིན་གླུ་འདི་ནི་སྤྱི་ལོ་ཉིས་སྟོང་ཉེར་གཉིས་ལོའི་ཟླ་བ་བདུན་པའི་ཚེས་པ་གསུམ་ལ་མ་འོངས་སངས་རྒྱས་རྗེབཙུན་བྱམས་པ་མགོན་པོའི་ཞིང་མཆོག་དབྱེར་མེད་འཇམ་མགོན་བླ་མ་ཆོས་ཀྱི་རྒྱལ་པོ་ཤར་ཙོང་ཁ་པ་བློ་བཟང་གྲགས་པའི་དཔལ་གྱི་གདན་ས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་མཇུག་རྫོགས་པར་བྱས་པའི་ཡི་གེ་པ་ནི་བླ་མ་གང་ལ་དད་གུས་ཆེ་བའི་ཕྲན་བློ་དམན་པ་སྒའོ་དགོན་རིག་འཛིན་ནམ་གངས་མིང་འཛིན་པའོ། །