ཨ་མདོ་བརྙན་འཕྲིན་གྱི་ཕུལ་བྱུང་གཞས་པ་གཞས་མའི་མུ་འབྲེལ་གླུ་གཞས་ཆེད་ཚོགས༼གངས་རིའི་སྐར་རྒྱན ༽ལས། མགོ་ལོག་གླུ་བ་དགེ་ལེགས་ཀྱི་རྡུང་ལེན་ཆེད་ཚོགས༼འབྲུག་སིང་སིང༽ཞེས་པ་སྤྱི་ཟླ༡༡པའི་ཚེས༢༡ཉིན་གྱི་དགོང་མོའི་ཆུ་ཚོད་བདུན་པའི་སྟེང་། མཚོ་སྔོན་རྒྱང་སྒྲོག་བརྙན་འཕྲིན་ཁང་གི་འཁྲབ་གཏོང་ཚོམས་ཆེན་ནས་གཟབ་རྒྱས་ངང་འཚོགས་ཤིང་། དགོང་ཚོགས་ཀྱི་མགོ་རྔ་ཆ་ཚང་ཨ་མདོ་བརྙན་འཕྲིན་གྱི་དུས་དབྱངས་འཕྲིན་སྟེགས་དང་སྐད་འཕྲིན་བརྙན་ལམ། གངས་ལྗོངས་མེ་ལོངappབཅས་ནས་དུས་མཉམ་དུ་ཐད་གཏོང་བྱས།
དེ་མིན་ད་དུང་གླུ་བ་དགེ་ལེགས་ནི་གླུ་གཞས་སྒྱུ་རྩལ་གྱི་གཞུང་ལུགས་དང་ལག་ལེན་གཉིས་ཆ་ནས་བརྩོན་སེམས་ནམ་ཡང་ལྷོད་མ་མྱོང་བ་ཞིག་ཡིན་པས། བྱ་བའི་ཞོར་ནས་མདོ་སྟོད་སྨད་གཉིས་སུ་གླུ་གཞས་སྒྱུ་རྩལ་ཐད་བྱས་རྗེས་ཆེ་ཞིང་ཀུན་ལ་བག་ཆགས་ཟབ་པའི་གླུ་བ་རྒན་གཞོན་མང་པོ་ཞིག་གསོ་སྐྱོང་བྱས་ཡོད་ལ། དེ་ལས་སློབ་མ༥༨ཀྱིས་སྙན་མོ་གླུ་ཡི་ལེགས་སྐྱེས་བཏེགས་ནས་ཐེངས་འདིའི་རྡུང་ལེན་ཆེད་ཚོགས་ལ་མཉམ་ཞུགས་བྱས་ཡོད།
གླུ་བ་དགེ་ལེགས་ཀྱི་རྡུང་ལེན་ཆེད་ཚོགས་ཧྲིལ་བོ་འཁྲབ་ཚན་བཅུ་བདུན་གྱིས་གྲུབ་ཡོད་ཅིང་། ནང་དོན་གྱི་ཆ་ནས་དམངས་གླུ་དང་། ཨ་མདོའི་རྡུང་ལེན། གེ་སར་སྒྲུང་གླུ་སོགས་སྲོལ་རྒྱུན་གྱི་གླུ་གར་རིག་གནས་ཀྱི་ཉིང་བཅུད་འདུས་ཡོད་ལ། རྣམ་པའི་ཐད་ནས་ཁེར་ལེན་དང་མཉམ་ལེན། མཐུད་ལེན་སོགས་ཡོད་པས། ནང་དོན་དང་རྣམ་པ་གཉིས་ཆ་ཡི་འཁྲབ་ཚན་སྒྲིག་སྟངས་ལ་ཁྱད་ཆོས་ཕུན་སུམ་ཚོགས་པ་ལྡན།
ཕྱོགས་སོ་སོ་ནས་ཡོང་བའི་སྐུ་མགྲོན་དང་གླུ་བ་གླུ་མ། ལྟད་མོ་བ་བཅས་མི་ལྔ་བརྒྱ་ལྷག་གིས་ཡུལ་དངོས་ནས་དགོང་ཚོགས་ལ་རོལ་མྱོང་བྱས་པ་དང་། མི་འབུམ་གསུམ་ལྷག་གིས་ཨ་མདོ་བརྙན་འཕྲིན་གྱི་དུས་དབྱངས་འཕྲིན་སྟེགས་དང་སྐད་འཕྲིན་བརྙན་ལམ། གངས་ལྗོངས་མེ་ལོངappབཅས་ཀྱི་དྲ་ལམ་ཐད་གཏོང་བརྒྱུད་ནས་དགོང་ཚོགས་ལ་རོལ་མྱོང་བྱས།
རྩོམ་སྒྲིག་པ། ལྕགས་ཐར་ཚེ་རིང་། དོ་དམ་པ། འགྱུར་མེད་རྡོ་རྗེ།
རྩོམ་སྒྲིག་འགན་འཁུར་བ། བདུད་འདུལ་རྡོ་རྗེ།
ལྟ་སྐུལ་བ། སྐལ་བཟང་རྡོ་རྗེ།
སྤྱིའི་ལྟ་སྐུལ་བ། བསོད་ནམས་རིན་ཆེན།
