ཚེ་སྲོག་འདྲ་མཉམ་གྱི་ལེགས་བཤད།
ཚེ་སྲོག་ལས་རིན་ཐང་ཆེ་བའི་དངོས་པོ་ཞིག་འཇིག་རྟེན་ཁམས་ན་མེད། དེ་ཡང་སེམས་ཅན་ཐམས་ཅད་ཀྱི་ཚེ་སྲོག་འདྲ་མཉམ་ཡིན་གྱི། མཐོ་དམན་གྱི་ཁྱད་པར་དབྱེ་རྒྱུ་མེད། ས་ལྒང་འདིའི་སྟེང་དུ་སྲོག་ཆགས་ཐམས་ཅད་འཚེ་མེད་མཉམ་གནས་འོང་པ་ལ་བརྩོན་པ་ནི། མིའི་རིགས་ཀྱི་བྱ་བ་རླབས་ཆེན་ཞིག་གོ།
2012.8.13
རང་དབང་ཁ་ལ་ཁྱེར་བཞིན་རང་ལས་བརྒྱ་འགྱུར་གྱིས་ཉམ་ཆུང་བའི་སྲོག་ཆགས་རྣམས་ལ་ཐ་ན་འཚོ་གནས་ཀྱི་རང་དབང་ཙམ་ཡང་མི་སྤྲོད་པའམ་ཡང་ན་སྤྲོད་མི་དགོས་སོ་ཞེས་སྨྲས་ན་རང་དབང་ལ་བརྩི་བསྲུང་རང་གིས་མ་བྱས་པར་འགྱུར་ཏེ། རང་དབང་ནི་སེམས་ཅན་ཐམས་ཅད་ཀྱི་སྨོན་གནས་ཡིན་པའི་ཕྱིར་རོ།།
2012.8.14
སྤུན་ཟླ་རྣམ་པ། ཚེ་སྲོག་ལ་མཐོ་དམན་གྱི་དབྱེ་བ་འབྱེད་པ་འདི་ལ་རྒྱབ་སྐྱོར་བྱས་ཚེ་མི་རྒྱུད་དཀར་པོ་རྣམས་ཀྱིས་མི་ནག་དག་གི་ཚེ་སྲོག་ལ་རིན་ཐང་མེད་པར་བལྟས་ནས་མི་ལོ་བཞི་བརྒྱའི་རིང་ལ་ནག་བྲན་གྱི་ཉོ་ཚོང་ཡ་ང་བ་བྱས་པ་དེ་ཡང་འཐད་པར་ཁས་ལེན་དགོས་ཤིང་། མཐར་སུ་སྟོབས་ཆེ་ན་དེས་ཅི་བྱས་ཀྱང་ཆོག་པ་ཞིག་ཏུ་འགྱུར་བས་འདི་ང་ཚོའི་རིག་གནས་མ་ཡིན་ནོ།།
2012.8.17
མཐོ་དམན་ཐམས་ཅད་ཀྱི་ཚེ་སྲོག་ལ་འདྲ་མཉམ་དུ་བལྟ་བ་དང་བརྩི་སྲུང་བྱེད་པ་འདི་ནི་དངོས་གནས་ཡིད་འཕྲོག་པའི་བྱ་བ་ཞིག་རེད། ང་ཚོས་གཅན་གཟན་གྱི་གཤིས་ཀ་དོར་ནས་མིའི་གཤིས་ཀའི་ཕྱོགས་སུ་བསྐྱོད་དགོས་སོ།།
2012.9.6
ང་ཚོས་གཡག་བཤའ་ཤེས་པ་ཙམ་གྱིས་མུ་གེས་མ་ཤི་ཙམ་ཞིག་བྱུང་ན་རབ་ཡིན་གྱི། དཔལ་འབྱོར་ཡར་རྒྱས་སུ་མི་འོང་ཐག་ཆོད་ཡིན། དེས་ན་འཚོ་ཐབས་གཞན་པ་ལ་བརྩོན་དགོས། དེ་གང་ཞེ་ན། རབ་རིག་གནས་ཀྱིས་འཚོ་བ། འབྲིང་ལག་ཤེས་ཀྱིས་འཚོ་བ། ཐ་མ་ངལ་རྩོལ་གྱིས་འཚོ་བ་གསུམ་པོ་ཡིན་ནོ།།
2012.8.20
དེ་རིང་ནི་འཛམ་གླིང་ཤ་མེད་ཉི་མའམ་རྒྱལ་སྤྱིའི་དཀར་ཟས་ཉི་མ་རེད། སྤུན་སྲིང་རྣམ་པ། ཚེ་སྲོག་འདྲ་མཉམ་དང་། ཁོར་ཡུག་སྲུང་སྐྱོབ། ལུས་ཁམས་བདེ་ཐང་གི་ཕྱིར་དུ་དཀར་ཟས་ལ་འབད་པར་ཞུ་ཞུ།
2014.11.25
སེམས་ཅན་གྱི་ལུས་སྲོག་ལ་འཚེ་བ་སྤང་བའི་ཕྱིར་དུ་དཀར་ཟས་བསྟེན་པར་ཏུ། སེམས་ཅན་གྱི་སྡུག་བསྔལ་ལ་བསམ་བློ་གཏོང་མ་དགོས་ན། ཐེག་པ་ཆེན་པོའི་ལུགས་ལ་དེ་ལས་གཞན་བསམ་བློ་གཏོང་དགོས་ས་ནི་ཅི་ཡང་མེད་དོ།།
2015.11.25
ཁོར་ཡུག་སྲུང་སྐྱོབ་དང་ལུས་ཁམས་བདེ་ཐང་། ཚེ་སྲོག་འདྲ་མཉམ་བཅས་ལ་བསམས་ཏེ། དཀར་ཟས་ལ་འབད་པ་གནང་བར་ཞུ། དམར་ཟས་པ་རྣམས་ཀྱི་ཁ་ལྟོའི་ཆེད་དུ་སེམས་ཅན་རྣམས་ལ་སྡུག་བསྔལ་གང་འདྲ་ཞིག་འོང་གིན་འདུག། ཅིས་ཀྱང་བསམ་བློ་ལན་གཅིག་གཏོང་བར་མཛོད།
ཚུལ་ཁྲིམས་བློ་གྲོས་ཀྱིས་རྒྱལ་སྤྱིའི་དཀར་ཟས་ཉིན་མོར་སྨྲས།
2018.11.25
སའི་གོ་ལ་དང་། རང་གི་བདེ་ཐང་། སེམས་ཅན་གྱི་ཚེ་སྲོག་གི་ཕྱིར་དུ་དཀར་ཟས་བསྟེན་པར་ཞུ།
2020.11.25
བྱམས་པའི་དྲི་ཞིམ་འཐུལ་ཞིང་། བརྩེ་བའི་རོ་བཅུད་ལྡན་པའི་དཀར་ཟས་ཀྱིས་འཚོ་བར་སྨོན།
ད་ལམ་དཀར་ཟས་བསྟེན་ཚུལ་གྱི་དཔེ་ཆ་ལེགས་པོ་ཞིག་བོད་སྐད་དུ་བསྒྱུར་ཡོད་པས་གཟིགས་པར་ཞུ་ཞུ།
2022.11.25
ཟས་ཀྱི་དྭངས་རྩེ་དཀར་ཟས་ཏེ།།
འབགས་མེད་སྡིག་མེད་འཚེ་བ་མེད།།
བློ་ཡི་དྭངས་རྩེ་སྙིང་རྗེ་སྟེ།།
ཁྲོ་མེད་འཁོན་མེད་སྡུག་བསྔལ་མེད།།
2023.11.25
终于爬到食物链的顶端，为什么还要吃素?
