ལུག་གི་༼སྤྱི་ལོ་༡༩༣༡༽ལོར་བིས་མདོའི་ཁྱུང་གྱ་རུ་ཡབ་སྒོམ་པ་རྒྱལ་དང་ཡུམ་མཁར་མོ་རྒྱལ་གཉིས་ཀྱི་སྲས་སུ་འཁྲུངས། དགེ་བའི་བཤེས་གཉེན་ལྷ་མོ་ཚུལ་ཁྲིམས་ཚང་ལས་དགེ་ཚུལ་བསྒྲུབས། བླ་བྲང་ཇོ་དགོན་ནས་ཅུང་ཟད་བཞུགས། དགུང་ལོ་ཉེར་ལྔའི་སྟེང་མདོ་སྨད་གནས་མཆོག་རྒན་རྒྱའི་བྲག་དཀར་དུ་ཕེབས་ཤིང་མཚུངས་མེད་དགེ་བའི་བཤེས་གཉེན་གཙུག་གི་རྒྱན་དུ་བསྟེན་ནས་སྤྱོད་འཇུག་སོགས་ལ་ཐོས་བསམ་གནང་ཞིང་། ཚེ་འདི་སྣང་གི་བྱ་བ་རྒྱང་དུ་སྤངས་ཤིང་རི་ཁྲོད་འགྲིམས་ནས་སྒྲུབ་པ་ཉམས་ལེན་ལ་རྩེ་གཅིག་ཏུ་གཞོལ།
རབ་རྒྱན་ས་ཁྱི་༼སྤྱི་ལོ༡༩༥༨༽ལོ་དང་རིག་གནས་གསར་བརྗེའི་སྐབས་སུའང་བྱ་བྲལ་སྦས་པའི་ཚུལ་གྱིས་གྲོང་དུ་མ་སོང་བར་ཤིན་ཏུ་སྦས་ཚུལ་གྱིས་རི་ཁྲོད་དབེན་པ་ཁོ་ནར་བཞུགས་ཤིང་གྱོང་ལྟོ་གོས་གཏམ་གསུམ་ལ་བསྐུར་ནས་ཆོས་ལ་དཀའ་སྤྱད་བསམ་གྱིས་མི་ཁྱབ་པ་མཛད་དེ་ཐེག་པ་ཆེན་པོའི་ཉམས་ལེན་དང་བློ་སྦྱོང་ཐམས་ཅད་ཀྱི་སྙིང་པོ་གྱུར་བ་བྱང་སེམས་སྤྱོད་འཇུག་ཆེན་མོ་སོགས་ཐུགས་དམ་གྱི་མཐིལ་དུ་བཟུང་ནས་ངེས་དོན་སྦས་པའི་བྱ་བྲལ་དང་ཚེ་མཚམས་པའི་མིང་དོན་མཚུངས་པའི་ལག་ལེན་མཐར་འཁྱོལ་མཛད་དེ་ད་ལྟའང་དགུང་གྲངས་གྱ་དགུར་སོན་ཡང་དབེན་པའི་རི་ཁྲོད་འབའ་ཞིག་ན་རང་ཉིད་གཅིག་པུར་བཞུགས་ནས་བཀའ་གདམས་གོང་མའི་རྣམ་ཐར་བདག་གིར་བཞེས་ཏེ་སྒྲུབ་བརྒྱུད་བསྟན་པའི་་རྒྱལ་མཚན་མཁའ་རུ་བསྒྲེང་བཞིན་བཞུགས་པ་འདི་ཀ་ལགས་སོ།།
