༄༅། །དཔལ་འབྲུག་པའི་གསེར་འཕྲེང་བརྒྱུད་པའི་གསོལ་འདེབས་
གཟི་ལྡན་ལྷུན་པོའི་བང་རིམ་ཞེས་བྱ་བ།
མཚུངས་མེད་རྒྱལ་དབང་ཆོས་རྗེས་མཛད།
རྡོ་རྗེ་འཆང་ཆེན་མཁྱེན་པའི་མཁའ་དབྱིངས་ལ། །
ཏིལླི་པ་ནི་རྟོགས་པའི་དཀྱིལ་འཁོར་རྒྱས། །
ནཱ་རོ་པཎ་ཆེན་ཐུགས་རྗེའི་འོད་ཟེར་འཕྲོ། །
བརྒྱུད་པ་མ་རིག་མུན་སེལ་གསུམ་ལ་འདུད། །
མར་པ་ལོ་ཙཱ་ཆོས་ཀྱི་རྒྱ་མཚོ་ལ། །
བཞད་པ་རྡོ་རྗེ་ཡིད་བཞིན་ནོར་བུ་བརྙེས། །
ཟླ་འོད་གཞོན་ནུ་དགོས་འདོད་རེ་བ་སྐོང་། །
བརྒྱུད་པ་དངོས་གྲུབ་མཆོག་སྟེར་གསུམ་ལ་འདུད། །
འགྲོ་མགོན་རིན་ཆེན་བྱང་ཆུབ་ལྗོན་ཤིང་ལ། །
གླིང་ཆེན་རས་པ་ལྷག་བསམ་ལོ་འདབ་རྒྱས། །
དཔལ་ལྡན་འབྲུག་པ་ཕྲིན་ལས་འབྲས་བུ་སྨིན། །
བརྒྱུད་པ་དུག་གསུམ་ནད་སེལ་གསུམ་ལ་འདུད། །
སངས་རྒྱས་དབོན་རས་ཕུན་ཚོགས་གངས་རི་ལ། །
སེང་གེའི་མཚན་དགུ་དམ་ཆོས་བདུད་རྩིའི་རྒྱུན། །
ཆོས་རྗེ་ཁུ་དབོན་ཟབ་དོན་མྱུ་གུ་འཁྲུངས། །
བརྒྱུད་པ་དགོས་འདོད་ཀུན་འབྱུང་གསུམ་ལ་འདུད། །
དཀར་བརྒྱུད་ཀུན་གྱི་གཙུག་རྒྱན་སྒམ་པོ་པ། །
སྒྲུབ་བརྒྱུད་བསྟན་པའི་སྲོག་ཤིང་ཙཱ་རི་བ། །
དོན་བརྒྱུད་གདམས་པའི་མངའ་བདག་འབྲུག་པའི་ཞབས། །
རྣམ་གསུམ་དབྱེར་མེད་ཆོས་རྗེའི་ཞབས་ལ་འདུད། །
དབྱིངས་དང་ཡེ་ཤེས་དག་པའི་སྐུ། །
འགགས་པ་མེད་པ་གསུང་གི་མཆོག །
འཁྲུལ་པ་མེད་པ་ཡེ་ཤེས་ཐུགས། །
བླ་མའི་སྐུ་གསུང་ཐུགས་ལ་འདུད། །
ཀུན་ཁྱབ་ནམ་མཁའི་རྣལ་འབྱོར་པ། །
ཕྱོགས་བྲལ་བདེ་བ་ཆེན་པོའི་ཀློང་། །
ལྷུན་གྲུབ་འདུས་མ་བྱས་པའི་དབྱིངས། །
ཀུན་མཁྱེན་འབྲུག་པའི་ཞབས་ལ་འདུད། །
བདག་ནི་ཚེ་རབས་ཐམས་ཅད་དུ། །
དམ་པ་ཁྱེད་དང་མི་འབྲལ་ཞིང་། །
ཁྱེད་གསུང་དམ་ཆོས་བདུད་རྩིའི་རོས། །
རྣམ་པ་ཀུན་ཏུ་འཚོ་བར་ཤོག །
རྒྱལ་བས་བསྔགས་པའི་གནས་རྣམས་སུ། །
ཚེ་འདིའི་བྱ་བ་བློས་བཏང་ནས། །
དོན་དམ་ཆོས་སྐུའི་བླ་མ་དང་། །
ནམ་ཡང་འབྲལ་བ་མེད་པར་ཤོག །
རང་དོན་ཞི་བདེའི་བློ་སྤངས་ནས། །
མཁའ་དང་མཉམ་པའི་འགྲོ་བ་རྣམས། །
བདག་གིས་བརྩེ་བས་རྗེས་བཟུང་ནས། །
ཐར་པའི་ལམ་ལ་འགོད་པར་ཤོག །
ཅེས་པའང་རྒྱལ་དབང་རྗེས་སོ།། །།
