མི་ཚེའི་ཁ་ཕྱོགས།
རྣམ་དག་ཆོས་ཀྱི་དབྱིངས་ལས་མ་གཡོས་པར།།
རྣམ་མང་འགྲོ་ལ་སྙིང་རྗེས་ཆེར་བསྐུལ་ཏེ།།
རྣམ་པ་དགེ་བའི་གཤེས་ཀྱི་སྐུར་བཞེངས་པ།།
རྣམ་དཀར་དད་པས་སྤྱི་བོའི་གཙུག་ཏུ་བསྙེན།།
ཐོས་བསམ་སྒོམ་དང་འཆད་རྩོད་བརྩམ་པ་ཡི།།
མཁས་བཙུན་བཟང་པོའི་རྣམ་ཐར་ལས་བྱུང་བའི།།
ཡ་རབ་ཚུལ་མཐུན་དམ་པའི་ལུགས་བཟང་གི།
དྲི་ཙམ་མེད་ཀྱང་ཕྱི་དྲན་བརྗེད་ཐོ་ཙམ།།
སྲིད་དང་ཞི་བའི་སྐྱོན་ཡོན་ལེགས་རྟོགས་ནས།།
གཏན་དུ་ཞི་བའི་ལམ་དེ་འཚོལ་མིན་ཡང་།།
འཕྲལ་སྣང་དད་དགེ་ཞིག་གིས་རྐྱེན་བྱས་ཏེ།།
དབེན་པའི་རི་ངོགས་ཤིག་ལ་གོམ་ཁ་བསྒྱུར།།
གནག་སྣུམ་དབུ་སྐྱེས་སྐྲ་ལོ་ཚོན་ཁར་སྦྱིན།།
གོས་ནག་དོར་ངན་མེ་ལྕེར་ཞུགས་སུ་ཕུལ།
མགོ་རིས་ངུར་སྨྲིག་གྱོན་པའི་བཙུན་མ་རུ།།
བསླབ་གསུམ་རྒྱུད་ལྡན་ཞིག་གི་སྐལ་བ་ཐོབ།།
གཞོན་པའི་ལང་ཚོ་དབྱར་གྱི་འཇའ་ཚོན་འདྲ།།
མཛེས་པར་སྣང་ཡང་རེས་འགའ་སྐད་ཅིག་ཙམ།།
འགྱུར་མེད་གཏན་གྱི་མཚར་སྡུག་མཚན་དཔེའི་སྐུ།།
ཁོ་བོས་ཡིད་ཡུལ་སྨོན་པ་དེ་ཁོ་ན།།
མཚན་ལྡན་བླ་མས་བརྩེ་བས་རྗེས་སུ་བཟུང་།།
བགྲོད་པའི་ལམ་མཆོག་ཐེག་དགུའི་མན་ངག་གནད།།
སྙན་ནས་སྙན་དུ་བརྒྱུད་པའི་གདམས་ཟབ་དག།
བདག་གི་རྣ་བར་སོན་པའི་སྐལ་བཟང་ཐོབ།།
ཐུན་མོང་ཐུན་མིན་རྒྱ་ཆེན་གཞུང་ལུགས་ལ།།
འཆད་རྩོད་རྩོམ་པས་མཐའ་རྒྱ་མ་ཆོད་རུང་།།
ཐེག་པ་རིམ་བགྲོད་རྟེན་ཅིང་འབྲེལ་འབྱུང་ལ།།
འཇུག་པའི་བག་ཆགས་བགོས་པའི་བསོད་ནམས་ལྡན།།
སྐྱེ་དམན་བུད་མེད་ཞིག་གི་ལུས་རྟེན་ལ།།
ཡོངས་འཛིན་དམ་པས་རྗེས་བཟུང་གདམས་པ་བསྩལ།།
བསླབ་གསུམ་ངུར་སྨྲིག་འཆང་བའི་ལས་དབང་འདི།།
བསྐལ་མང་ཚོགས་གཉིས་ཤིག་གིས་འཕང་པར་ཤེས།།
མ་འོངས་མི་ཚེ་ཡུད་ཙམ་གནས་པ་ལ།།
དཔལ་མགོན་བླ་མ་དམ་པའི་གསང་གསུམ་ལས།།
ནམ་ཡང་འགལ་མེད་ཁོང་གི་ཞབས་འབྲངས་ཏེ།།
བརྩེ་བའི་གདམས་བདག་རྒྱུད་གྲོལ་བར་ཤོག།
ཅེས་བཙུན་མིང་ཙམ་འཛིན་པ་བྱང་ཆུབ་ལྷ་མོ་ནས།