༄༅། །འཕགས་མ་སྒྲོལ་མ།
ལྕམ་པ་ཧ་ལོ།
གདོད་མའི་མགོན་པོ་ཀུན་བཟང་ཆོས་ཀྱི་སྐུ། །
རིགས་ལྔའི་རྒྱལ་བ་ལོངས་སྤྱོད་རྫོགས་པའི་སྐུ། །
ཤཱཀྱ་ཐུབ་པ་མཆོག་གྱུར་སྤྲུལ་པའི་སྐུ། །
ཀུན་ཀྱང་གཅིག་བསྡུས་བླ་མའི་སྐུ་ལ་འདུད། །
མ་ལུས་རྒྱལ་བའི་ཀུན་ཡུམ་ཤེར་ཕྱིན་མ། །
ཡི་དམ་མོ་རྒྱུད་རྡོ་རྗེ་རྣལ་འབྱོར་མ། །
ཡེ་ཤེས་མཚོ་རྒྱལ་ལ་སོགས་མ་ལུས་མ། །
བསྟན་འགྲོའི་དོན་ལ་ཀུན་ཀྱང་མཆོག་ཉིད་མ། །
ཉ་གང་མདོག་ཅན་ཨོཾ་མཛད་ཏཱ་རེ་མ། །
འཇའ་འོད་དྲྭ་ཡི་ཏུཏྟཱ་རེ་འཁྱུད་མ། །
མྱུར་སྐྱོབ་ཕོངས་སྐྱོབ་ལེགས་སྦྱིན་ཏ་རེ་མ། །
ཏིང་འཛིན་རོ་རྒྱའི་མཉམ་བཞག་སྭ་ཧཱ་མ། །
ལྟ་བས་མི་ངོམས་ལྗང་མདོག་སྐྱབས་སྦྱིན་མ། །
པདྨའི་གདན་སྟེང་གཡས་རྐྱང་གཡོན་སྐུམ་མ། །
བདེ་སྟོང་བཅུད་ཀྱི་མྱོས་པའི་གར་མཁན་མ། །
ས་གསུམ་མུན་པའི་སྒྲོན་མེར་ལྷ་མཆོག་མ། །
སྐུ་མདོག་ཕྱག་མཚན་ཉེར་གཅིག་གྲངས་ལྡན་མ། །
སྨན་ཤར་མཛེས་མའི་སྤྱི་ཕུད་ནང་སྙིང་མ། །
ནག་པོའི་རྩ་ལག་འཇོམས་པའི་ཕོ་ཉ་མ། །
ཞིང་སྔགས་ལྷན་ཅིག་སྐྱེས་པའི་ཌཱ་ཀི་མ།
མཁྱེན་བརྩེ་ནུས་པའི་མངའ་བདག་དབང་ཕྱུག་མ། །
གསོལ་འདེབས་བུ་ལ་དངོས་གྲུབ་མྱུར་སྩོལ་མ། །
སྤྱི་དང་བྱེ་བྲག་སྐྱེ་རྒུའི་འཇིགས་སྐྱོབ་མ། །
ཡང་སྒོས་ཁ་བའི་ལྗོངས་ཀྱི་མ་གཅིག་མ། །
གྲུབ་པའི་ས་ཐོབ་བྱེ་བའི་གཙུག་རྒྱན་མ། །
གཞན་སེམས་མཁྱེན་པའི་མངོན་ཤེས་སྤྱན་ལྡན་མ། །
ཐུགས་རྗེའི་རླབས་དཀར་རྐྱོང་བའི་རྗེ་བཙུན་མ། །
ཡང་ཡང་འབོད་པར་ཐལ་སོང་བརྩེ་བའི་མ། །