རྗེས་དྲན་མིག་ཆུའི་ཐིགས་པ།
མཚན་མོ་དེ་ནམ་མཁའི་ཁམས་སུ།།
བསིལ་འཇམ་གྱི་དུང་ཟླ་ཤར་འདུག།
སྐར་ཚོགས་དག་སྤྲོ་དགའི་ངང་ནས།།
བཞད་གད་ཀྱི་དཔལ་ལ་རོལ་འདུག།
རི་རྩེ་གྱི་འཇག་མ་སྐྱ་བོས།།
རྗེས་དྲན་གྱི་མིག་ཆུའི་ཐིགས་པ།།
ཙག་རླུང་ལྟར་བར་མེད་སྡང་དུས།།
སེམས་ཉིད་དུ་གྲང་རེག་ལྕི་སོང་།།
ལས་དབང་གི་འགྲོ་འདུག་བར་ནས།།
རྐྱང་ལམ་དེ་བཙན་གྱིས་དེད་ནས།།
བཅོས་མེད་ཀྱི་སེམས་དབུས་ངོས་སུ།།
ཁྱེད་སྐུ་ཡི་མཚན་དཔེའི་གཟུགས་སྐུ།།
ལྷང་ལྷང་ངང་ཡིད་ལ་དྲན་དུས།།
ཐུགས་རྗེ་ཡི་སྣང་བ་སྩོལ་རོགས།།
བྱིན་རླབས་ཀྱི་ཚན་ཁ་གནང་རོགས།།
རྩོམ་སྒྲིག་མ། རེ་དོགས་པདྨ་ནས། ༢༠༡༨ བོད་ཟླ་༡༢ ཚེས་པ་༡༨ ཉིན་གངས་རིའི་ཁྲོད་ཀྱི་འཇམ་དབྱངས་གཉིས་པ་ཀུན་མཁྱེན་ཀློང་ཆེན་པ་དྲི་མེད་འོད་ཟེར་མཆོག་བསམ་ཡས་འཆིམ་བུ་ནགས་ཀྱི་དབེན་ཁྲོད་དུ་ཡ་མཚན་དུ་བྱུང་བའི་རྟགས་མཚན་མང་པོ་དང་བཅས་སྤྱི་ལོ་ ༡༣༦༣ ལོར་བདེ་བར་གཤེགས་ནས་ད་བར་དུ་ལོ་གྲངས་ ༦༥༥ སོང་བའི་དུས་དྲན་ཁྱད་པར་ཅན་གྱི་ཉིན་རེ་དོགས་པདྨ་ནས་རྗེས་དྲན་དུ་ཕུལ།།