陳夢吉要鷄販食鷄屎
作者：崖州竹主《大汉公报》1939年12月
《荒唐镜五斗陈梦吉》海报
我哋廣東佬，誰個不識陳夢吉德大名？佢的笑話，連細蚊仔、八卦婆，都噲講，聽到無不笑到肚痛。現在我所講呢一段，聽過的人自然當佢舊，未聽過的人一定話佢新。既然係講古，則古時的事，當然有好多人知，怕乜開番槓舊野呢！
吉叔有一日，家內有喜事，需用三幾隻鷄做酒，遇正墟期，出墟搵鷄販交易，問聲每斤要幾多銀？鷄販開價一錢四分四。當時生活程度，未有今日咁高，平常每斤鷄至多價值一錢銀，不過鷄販見佢一連要買幾隻，料到佢必有喜事，非鷄不可，所以吊高嚟賣，搵的著數。
吉叔本是數口之家，行情極光，答以價錢太貴，呌佢減實，誰知鷄販係牛皇的後裔，一身牛氣，聞吉叔嫌貴，便牛牛精精罵曰：「想平食鷄屎喇。」吉叔見佢咁可惡，一句唔出，買水咁頭不顧而行，與另一鷄販交易。
喂，朋友，你估吉叔係自量口拙唔係呢？非也，吉叔有名扭計祖宗，點肯把佢輕輕放過？隘交唔中用，不如畀些少滋味佢嚇，果然下次墟期，吉叔又找著鷄販牛先生，問過價錢之後，一句答應，大大殺起。
鷄販偷偷歡喜，以為今回搵到笨七，撈到水蟹，吉叔呌佢將所有十零隻鷄，擔回自己家中。
入門之後，詐諦往隔籬二叔婆處，搵把秤番嚟秤過，一去好耐，仍未見返。鷄販一早出市，未食早飯，五臟神作怪，喉嚨伸出隻手，一眼望見檯上有餅仔十數包，其中幾包拆開，估話細路拆開來食過，一定無數目，貪心起來，偷了幾個食左。
食到半，吉叔攜秤回來，偽為不知，正想鬱手秤鷄，一角踏著地下有餅仔半塊，連隨拾起，放回檯中，自言自語曰：「乜咁糟呀，我都唔知行左幾遠路，至買到佢，今晚泡製的老鼠，免佢夜夜偷食偷得咁過癮，呢回的老鼠重唔死咩？」
鷄販聽聞，當堂嚇得睜大眼，擘大口，唔知點好，口震震問吉叔真定假？吉叔滋滋油油自認好計，要報老鼠仇。鷄販魂飛魄散，不打自招，供認偷食左幾件，問吉叔有救否？
吉叔話當然有，佢買老鼠藥之時，恐防細路唔識危險，偷食撞板，問明救治之法，好彩你講得早，唔係就噲瓜老襯。
鷄販哀求救命，吉叔咁淡定，教訓佢一番，呌佢做人咪咁貪，鷄販已經慌到標靑屎。吉叔好少理，嘆完煙又嘆茶，然後聲明要依足佢話，合埋雙眼，至肯俾藥救佢。
鷄販無法，不敢不依，把燈籠咁大雙眼合埋，吉叔在鷄籠底取鷄屎一碗，用水開勻，先用手執住鷄販個鼻哥，免被佢索到蘇味，灌落鷄販口內。鷄販當係靈丹妙藥，大飲特飲。
吉叔等佢飲完，笑微微曰：「老友，呢個你唔係食蔴糖鷄屎，一定唔救得生你咯。」
鷄販想起前墟舊事，方知吉叔有意報仇，一手將攜來的鷄攜走，恨恨回家。
— 完 —
本文由民国故纸堆公众号整理，转载请注明
版权归作者所有，如有侵权请联系删除
相关阅读：
粤派讲古：广州白云山景泰僧归的传说：我是山人《星报》1948（索引：羊城八景、景泰僧归、景泰寺）
粤派讲古：佛山祖庙北帝出宫有段古，苏真人新春揽大花炮：我是山人《星报》1948年
粤派讲古：红罗伞、白罗伞邱天赞广州建四庙：忠义乡人《大汉公报》1939年
粤派讲古：广东新会城圭峰山之掘尾龙：崖州竹主《大汉公报》1939年
粤派讲古 | 纪文达公梦中审鬼：孝廉公《大汉公报》1940年（索引：纪晓岚）
