ཟླ་མཆོད་དུས་ཆེན་བསླེབ་ལ་ཉེ་བའི་སྐབས་འདིར། སྔར་ལས་ལྷག་པར་སྒྲིག་ལམ་དམ་དྲག་ཏུ་གཏོང་བ་དང་། ཀྲུང་དབྱང་གི་གཏན་འབེབས་བརྒྱད་ཀྱི་འགོག་རགས་མུ་མཐུད་དུ་སྲ་བརྟན་དུ་གཏོང་བ། ཕྱོགས་ཡོངས་ནན་མོར་འཛིན་པ་དང་ཐོག་མཐའ་བར་གསུམ་དུ་ནན་མོར་འཛིན་པའི་བརྡ་རྟགས་དྲག་པོ་གཏོང་བ་བཅས་ཀྱི་ཆེད་དུ། ཉེ་ལམ་ཞིབ་བཤེར་ཐག་གཅོད་བྱས་པའི་ཀྲུང་དབྱང་གི་གཏན་འབེབས་བརྒྱད་ཀྱི་དགོངས་དོན་དང་འགལ་བའི་དཔེ་མཚོན་གནད་དོན3ད་ལྟ་བརྡ་ཁྱབ་བཏང་བ་གཤམ་ལྟར།
ཟི་ལིང་གྲོང་ཁྱེར་དབང་པོ་སྐྱོན་ཅན་མཉམ་འབྲེལ་ཚོགས་པའི་ཏང་ཙུའུ་ཁོངས་མི་ཟུར་པའམ་ལས་འཛིན་དཔོན་གཞོན་པ་ལུའོ་ཧྲའོ་ཧྭ་དང་། གཞུང་ལས་ཁང་གི་ཀྲུའུ་རེན་ཟུར་པ་ཁྲེན་ཧའེ་ཡོན། ཕྱོགས་བསྡུས་ཞབས་ཞུ་ལྟེ་གནས་ཀྱི་འགན་འཁུར་པ་ཀྲང་ཡན་ལིང་བཅས་ཀྱིས་སྒྲིག་འགལ་ངང་གསོལ་སྟོན་དང་ལེན་བྱས་པ་སོགས་ཀྱི་གནད་དོན། 2018ལོ་ནས2024ལོའི་བར། ལུའོ་ཧྲའོ་ཧྭ་ཡིས་དོ་དམ་དང་ཞབས་ཞུ་བྱ་ཡུལ་གྱི་གསོལ་སྟོན་དང་ལེགས་སྐྱེས་དང་ལེན་ཐེངས་མང་བྱས། ཁྲེན་ཧའེ་ཡོན་དང་ཀྲང་ཡན་ལིང་གཉིས་ཀྱིས་དོ་དམ་དང་ཞབས་ཞུ་བྱ་ཡུལ་གྱི་གསོལ་སྟོན་དང་ལེན་ཐེངས་མང་བྱས། ལུའོ་ཧྲའོ་ཧྭ་དང་ཁྲེན་ཧའེ་ཡོན། ཀྲང་ཡན་ལིང་བཅས་ལ་ད་དུང་གཞན་པའི་སྒྲིག་འགལ་ཁྲིམས་འགལ་གྱི་གནད་དོན་ཡང་ཡོད། 2024ལོའི་ཟླ6པར། ལུའོ་ཧྲའོ་ཧྭ་ལ་ཏང་ཁོངས་ནས་ཕུད་པ་དང་སྲིད་དོན་ཕྱིར་འཐེན་གྱི་ཆད་པ་བཅད། 2024ལོའི་ཟླ5པར། ཁྲེན་ཧའེ་ཡོན་དང་ཀྲང་ཡན་ལིང་གཉིས་ལ་ཏང་ཁོངས་ནས་ཕུད་པ་དང་གཞུང་གཉེར་ལས་རྐང་ཐོག་ནས་ཕུད་པའི་ཆད་པ་བཅད། ཉེས་གསོག་དོགས་ཡོད་གནད་དོན་ཞིབ་དཔྱོད་ལས་ཁུངས་ལ་བསྐྱལ་ནས་ཁྲིམས་ལྟར་ཞིབ་བཤེར་བྱ་རྒྱུར་ཞུ་གཏུག་བྱས།
མཚོ་བྱང་ཁུལ་མདོ་ལ་རྫོང་སྐྱེ་ཁམས་ཁོར་ཡུག་ཅུས་ཀྱི་ཅུས་ཀྲང་གཞོན་པ་ཟུར་པ་ཀྲང་ཞང་ཅུན་གྱིས་སྒྲིག་འགལ་ངང་གསོལ་སྟོན་དང་ལེན་བྱས་པ་སོགས་ཀྱི་གནད་དོན། 2022ལོ་ནས2024ལོའི་བར། ཀྲང་ཞང་ཅུན་གྱིས་དོ་དམ་དང་ཞབས་ཞུ་བྱ་ཡུལ་གྱི་ཞི་ཨན་དང་ཟི་ལིང་། མཚོ་ཤར་སོགས་ས་ཁུལ་ནས་གསོལ་སྟོན་དང་ལེན་ཐེངས་མང་བྱས་པ་དང་། ལེགས་སྐྱེས་སྐྱེས་དངུལ་བླངས་པ། མ་གཞི་རང་ཉིད་ཀྱི་འགན་འཁུར་དགོས་པའི་གསོལ་ཟས་དང་ཡུལ་སྐོར་སོགས་ཀྱི་འགྲོ་སོང་དོ་དམ་དང་ཞབས་ཞུ་བྱ་ཡུལ་ལ་སྟེར་ཏུ་བཅུག་པ། ཀྲང་ཞང་ཅུན་ལ་ད་དུང་གཞན་པའི་སྒྲིག་འགལ་ཁྲིམས་འགལ་གྱི་གནད་དོན་ཡང་ཡོད། 2024ལོའི་ཟླ8པར། ཀྲང་ཞང་ཅུན་ལ་ཏང་ཁོངས་ནས་ཕུད་པ་དང་གཞུང་གཉེར་ལས་རྐང་ཐོག་ནས་ཕུད་པའི་ཆད་པ་བཅད།
མཚོ་ནུབ་ཁུལ་ཐེམ་ཆེན་རྫོང་གཡག་ཁེངས་ཤང་གི་ཏང་ཨུའི་ཧྲུའུ་ཅི་གཞོན་པ་ཟུར་པའམ་ཤང་ཀྲང་བློ་གྲོས་རྒྱ་མཚོ་དང་། ཤང་ཀྲང་གཞོན་པ་དོན་གྲུབ་ཚེ་རིང་གཉིས་ཀྱི་ལས་དོན་སྐབས་སུ་སྒྲིག་འགལ་ངང་ཆང་འཐུང་བའི་གནད་དོན། 2024ལོའི་ཟླ7པའི་ཚེས1ཉིན་ནས་ཚེས6ཉིན་བར། བློ་གྲོས་རྒྱ་མཚོས་ཆར་ཞོད་ཆེ་བའི་དུས་ཀྱི་ལས་རེས་སྐབས་སུ་འགན་ཐོག་མལ་ཤག་ཏུ་སྒྲིག་འགལ་ངང་ཆང་ཐེངས་མང་པོར་འཐུང་། ཟླ7པའི་ཚེས9ཉིན། བློ་གྲོས་རྒྱ་མཚོ་དང་དོན་གྲུབ་ཚེ་རིང་གཉིས་ཀྱི་ཆར་ཞོད་འགོག་པའི་ལས་དོན་ཞིབ་བཤེར་བྱས་ནས་ཕྱིར་ལོག་པའི་ལམ་དུ་སྒྲིག་འགལ་ངང་ཆང་འཐུང་། 2024ལོའི་ཟླ8པར། བློ་གྲོས་རྒྱ་མཚོ་ལ་ཏང་ནང་ཉེན་བརྡ་དྲག་པོ་བཏང་བ་དང་སྲིད་དོན་ལས་རྐང་ཕྱིར་འཐེན་པའི་ཆད་པ་བཅད། དོན་གྲུབ་ཚེ་རིང་ལ་ཏང་ནང་ཉེན་བརྡ་དྲག་པོ་བཏང་བའི་ཆད་པ་བཅད།
གོང་གི་གྱོད་དཔེ་ལས། ཇི་ལྟར་རྗེས་སུ་བསླེབས་ན་དེ་ལྟར་སྒྲིག་ལམ་དམ་དྲག་ཡིན་པའི་གནས་བབ་འོག་ཏུ་ཡང་། ད་དུང་ཏང་ཡོན་ལས་བྱེད་པ་ཉུང་ཤས་ཀྱི་སྒྲིག་ཁྲིམས་འདུ་ཤེས་ཞན་པ་དང་། གང་དྲན་ཅི་འདོད་བྱེད་པ་ལ་ཆད་པ་ནན་མོ་གཅོད་ངེས་པ་གསལ་པོར་བསྟན་ཡོད། དེ་བས། རྒྱ་ཆེ་བའི་ཏང་ཡོན་ལས་བྱེད་པས་གྱོད་དཔེ་དཔྱད་གཞིར་འཛིན་པ་དང་། བསླབ་བྱ་ཟབ་མོ་སྡུད་པ། གཏན་འགོག་བཅུའི་སྒྲིག་ཁྲིམས་བླང་བྱ་རང་རྟོགས་སྒོས་སྲུང་བ། ཆབ་སྲིད་ངེས་ཤུགས་དང་རིག་པ་གསལ་པོ་དུས་དང་རྣམ་པ་ཀུན་ཏུ་སྲུང་འཛིན་བྱས་ཏེ། སྒྲིག་སྲོལ་ནན་མོར་སྲུང་བ་དང་མཐའ་ཐིག་ལས་མི་བརྒལ་བར་བྱེད་དགོས། རིམ་པ་སོ་སོའི་ཏང་རྩ་འཛུགས་ཀྱིས་ཕྱོགས་ཡོངས་ནས་ཏང་ནན་མོས་སྐྱོང་བའི་ཆབ་སྲིད་འགན་འཁྲི་ངེས་པ་དོན་གྱིས་ཕྲག་ཏུ་ལེན་པ་དང་། བྱེད་ཐབས་དགུ་ལག་བསྟར་ནན་ཏན་བྱེད་པ། གཞུང་རྒྱུས་ཟ་མ་ཟ་བ་དང་གཞུང་རྒྱུས་ཡུལ་སྐོར་བྱེད་པ། གཞུང་འཁོར་སྒེར་ལ་སྤྱོད་པ་སོགས་དུས་ཆེན་སྐབས་འབྱུང་སླ་བའི་གནད་དོན་ལ་དམིགས་པ། ཕྱོགས་བསྡུས་ཇུས་བསྟར་དང་གནད་སྨིན་ཤུགས་འདོན་སྒོས། སྤྱོད་ངན་བཞིའི་གནད་དོན་སླར་མཆེད་པ་མཐའ་གཅིག་ཏུ་འགོག་དགོས། རིམ་པ་སོ་སོའི་སྒྲིག་ཁྲིམས་ཞིབ་དཔྱོད་ལྟ་རྟོག་ལས་ཁུངས་ཀྱིས་ལྟ་རྟོག་སྒྲིག་བསྟར་འགན་འདྲི་ཇེ་དྲག་ཏུ་གཏོང་བ་དང་། སྤྱོད་ངན་སྒྲིག་འགལ་པར་སྒྲིག་ཁྲིམས་ཚད་ཤིང་མཐོན་པོར་བསྒྲེངས་ནས། གཞི་གདངས་དྲག་པོ་དང་བྱེད་ཐབས་ནན་མོ། མཁའ་དབུགས་ཛ་དྲག་བཅས་དུས་ཡུན་རིང་པོར་རྒྱུན་འཁྱོངས་བྱ་དགོས།
ཡོང་ཁུངས། ཀྲུང་གོ་བོད་ཀྱི་དྲ་བ།
རྩོམ་སྒྲིག་འགན་ཁུར་བ། གུ་རུ་སྐྱབས།
ལྟ་སྐུལ་བ། གཡང་འབུམ་ཚེ་རིང་། སྤྱི་ཁྱབ་ལྟ་སྐུལ་བ། ལིག་ཙུན་ཁོས།
责编/格日加布
监制/杨本才让 总监制/刘增奎
投稿邮箱/3068276991@qq.com
བརྩམས་དབང་རྩོམ་མཁན་ལ་དབང་། དབང་གནོད་ཡོད་ཚེ་འཕྲལ་མར་ང་ཚོར་འབྲེལ་བ་གནང་རོགས།
版权归原作者所有，如有侵权请立即与我们联系
