ནང་ཆེན་རྫོང་གི་གྲོང་སྐོར་བྱང་ལམ་དང་རྫ་ཆུའི་བྱང་རྒྱུད་ཟམ་ཆེན་ལས་གྲྭ་དངོས་སུ་ལས་མཇུག་གྲོལ་ནས་རླངས་འཁོར་ཤར་གཏོང་ཐུབ་པ།
འདྲེན་ཚིག ཟླ་11པའི་ཚེས་11ཉིན་གྱི་ཆུ་ཚོད་13དང་སྐར་མ་30ཡི་ཐོག་ནང་ཆེན་རྫོང་གི་གྲོང་སྐོར་བྱང་ལམ་དང་རྫ་ཆུའི་བྱང་རྒྱུད་ཟམ་ཆེན་ལས་གྲྭ་དངོས་སུ་ལས་མཇུག་གྲོལ་ནས་རླངས་འཁོར་ཤར་གཏོང་ཐུབ་པ་རེད། ཀྲུང་གུང་ནང་ཆེན་རྫོང་ཨུད་ཀྱི་ཧྲུའུ་ཅི་གཞོན་པ་རྫོང་དཔོན་ཤེས་རབ་རྒྱ་མཚོས་རླངས་འཁོར་ཤར་གཏོང་ཐུབ་པའི་ཁྱབ་བསྒྲགས་བྱས་པ་དང་།རྫོང་འགྲིམ་འགྲུལ་སྐྱེལ་འདྲེན་ཅུས་ཀྱི་ཅུས་ཀྲང་གིས་རྣམ་གྲངས་ཀྱི་གནས་ཚུལ་ངོ་སྤྲོད་བྱས་པ།རྫོང་སྲིད་གཞུང་གི་རྫོང་དཔོན་གཞོན་པ་བློ་གྲོས་མཆོག་ལྡན་གྱིས་མཛད་སྒོ་གཙོ་སྐྱོང་བྱས་པ། རྫོང་ཨུད་ཀྱི་ཧྲུའུ་ཅི་གཞོན་པ་ཟླ་བ་བཀྲ་ཤིས་ཀྱིས་ཤིས་ཚིག་གསུངས་པ་རེད། རྫོང་ཨུད་ཀྱི་རྒྱུན་ཨུ་འཐབ་ཕྱོགས་གཅིག་གྱུར་པུའི་པུའུ་ཀྲང་བསོད་ནམས་གཡང་འཕེལ་དང་རྫོང་མི་དམངས་སྲིད་གཞུང་གི་རྫོང་དཔོན་གཞོན་པ་ཚེ་རིང་བཟང་པོ་བཅས་མཛད་སྒོར་ཞུགས་པ་དང་དར་ཚོན་ཡང་བྲེགས་ཡོད་པ་རེད།དངོས་གཞི། ནང་ཆེན་རྫོང་གི་གྲོང་སྐོར་བྱང་ལམ་དང་རྫ་ཆུའི་བྱང་རྒྱུད་ཟམ་ཆེན་ལས་གྲྭ་ནི་རང་རྫོང་གི་བྱང་སྐོར་ལམ་ཐིག་གི་ལྷུ་ཚིགས་གལ་ཆེན་ཞིག་དང་རྫོང་ཁོངས་ཀྱི་ལམ་ཧྲིལ་པོའི་འཆར་འགོད་འཐུས་ཚང་དུ་གཏོང་བའི་འགག་གནད་ཅིག་ཡིན། རྣམ་གྲངས་དེར་ཁྱོན་མ་དངུལ་སྒོར་དུང་ཕྱུར་0.8བཏང་ནས་གསར་དུ་བསྐྲུན་པའི་ཟམ་ཆེན་དེ་ནང་ཆེན་རྫོང་གི་བྱང་ངོས་སུ་ཡོད་པ་དང་། རྣམ་གྲངས་ཇུས་འགོད་ཀྱི་སྤྱིའི་རིང་ཚད་སྨི་840.26ཟིན་པའི་ནང་རྫ་ཆུའི་ཟམ་ཆེན་གྱི་རིང་ཚད་སྨི་367.2ཟིན་པ་དང་ལེ་ལག་ཚང་བའི་གྲོང་ཁྱེར་གྱི་གཞུང་ལམ་སྨི་473.06ཟིན་པ་དེ་2021ལོའི་ཟླ་11པའི་ཚེས་26ཉིན་ལས་འགོ་ཚུགས་པ་དང་2023ལོའི་ཟླ་12ཚེས་8ཉིན་ལས་མཇུག་གྲོལ་བ་རེད། ལས་གྲྭ་དེའི་འཆར་འགོད་དུམ་བུ་དེ་པིན་ཧོ་ནུབ་ལམ་དང་གྲོང་སྐོར་བྱང་ལམ་ནུབ་རྒྱུད་ཀྱི་སྦྲེལ་མཚམས་སུ་གནས་ཤིང་། མཇུག་གྲོལ་ས་ནི་རྒྱལ་ལམ་214དང་སྦྲེལ་ཡོད་པ་རེད།རླངས་འཁོར་ཤར་གཏོང་གི་མཛད་སྒོའི་ཐོག་ཟླ་བ་བཀྲ་ཤིས་ཀྱིས་ནང་ཆེན་རྫོང་ཨུ་དང་རྫོང་སྲིད་གཞུང་གི་ཚབ་ཞུས་ནས་བྱང་རྒྱུད་ཟམ་ཆེན་ལས་གྲྭར་རླངས་འཁོར་ཤར་གཏོང་ཐུབ་པར་སྤྲོ་སེམས་འཁོལ་བའི་རྟེན་འབྲེལ་ཞུས་པ་དང་། ལས་གྲྭ་འཛུགས་སྐྲུན་ནང་ཞུགས་མཁན་ལས་བཟོ་ཡོངས་ལ་སྙིང་དབུས་ནས་ཐུགས་རྗེ་ཆེ་ཞུས་པ་རེད། ནང་ཆེན་གྱི་འཕེལ་རྒྱས་ལ་སེམས་ཁུར་དང་རྒྱབ་སྐྱོར་བྱེད་མཁན་གྱི་སྤྱི་ཚོགས་ལས་རིགས་ཁག་གི་མི་སྣར་བླ་ན་མེད་པའི་གུས་འདུད་ཞུས་པ་རེད། ཁོང་གིས་བྱང་རྒྱུད་ཟམ་ཆེན་ནི་ངོགས་གཉིས་ཀྱི་འཕེལ་རྒྱས་འབྲེལ་མཐུད་བྱེད་པའི་ལྷུ་ཚིགས་གལ་ཆེན་ཞིག་ཡིན་ལ་སྐོར་ལམ་བྱང་རྒྱུད་མྱུར་བགྲོད་ལམ་ཤར་གཏོང་ཐུབ་པའི་འགག་རྩའི་ལྷུ་ཚིགས་ཤིག་ཀྱང་ཡིན་ལ་རྫོང་དེའི་གྲོང་ཁྱེར་གྱི་སྤུས་ཚད་ལེགས་སུ་གཏོང་བའི་དམངས་འཚོའི་རྣམ་གྲངས་ཤིག་དེ་བས་ཀྱང་ཡིན། བྱང་རྒྱུད་ཟམ་ཆེན་ལས་མཇུག་གྲོལ་ནས་རླངས་འཁོར་ཤར་གཏོང་ཐུབ་པ་དེ་ནི་ཞིང་ཆེན་དང་། ཁུལ། རྫོང་ཨུ། རྫོང་སྲིད་གཞུང་བཅས་ཀྱིས་ཚད་མཐོའི་མཐོང་ཆེན་དང་རྒྱབ་སྐྱོར་ཤུགས་ཆེན་བྱས་པའི་འབྲས་བུ་ཞིག་དང་། འབྲེལ་ཡོད་སྡེ་ཚན་ཁག་གིས་གཞོགས་འདེགས་ཧུར་ཐག་དང་། བརྩེ་བས་ཞབས་ཞུ། རྒྱབ་སྐྱོར་ཤུགས་ཆེན་བཅས་བྱས་པའི་འབྲས་བུ་ཞིག ལམ་རྒྱུད་ཀྱི་གྲོང་མི་མང་ཚོགས་ཚོས་ཁྱོན་ཡོངས་ལ་ལྟ་རྟོག་དང་རྒྱབ་སྐྱོར་ཧུར་ཐག་བྱས་པའི་འབྲས་བུ་ཞིག འཛུགས་སྐྲུན་པ་ཚོས་ཇུས་འགོད་ཞིབ་ཚགས་དང་ཚན་རིག་དང་མཐུན་པའི་ཨར་རྒྱག་བྱས་པའི་འབྲས་བུ་ཞིག་བཅས་རེད། ཟམ་ཆེན་ཐོག་རླངས་འཁོར་ཤར་གཏོང་ཐུབ་རྗེས་རྫོང་ཁོངས་ཀྱི་འགྲིམ་འགྲུལ་གནོན་ཤུགས་ཆུང་དུ་ནུས་ལྡན་འགྲོ་རྒྱུ་དང་། གྲོང་ཁྱེར་སྤྱི་ཡོངས་ཀྱི་གཟུགས་བརྙན་ལེགས་སུ་འགྲོ་རྒྱུ། ནང་ཆེན་རྫོང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྒུལ་ཤུགས་ཆེན་པོ་གསར་པ་སྦྱིན་རྒྱུ། ཐོན་ལས་རིམ་སྤོར་ལ་སྐུལ་འདེད་གཏོང་རྒྱུ། ས་ཁོངས་མཉམ་འདྲེས་ལ་སྐུལ་འདེད་གཏོང་རྒྱུ། གྲོང་ཁྱེར་གྱི་སྤུས་ཚད་མཐོ་རུ་གཏོང་རྒྱུ། སྤུས་ཚད་མཐོ་བའི་འཕེལ་རྒྱས་ཀྱི་དམིགས་ཚད་མངོན་འགྱུར་བྱ་ཆེད་འདེགས་སྐྱོར་ནུས་ལྡན་བྱ་རྒྱུ་བཅས་རེད།རྫོང་ཨུད་ཀྱི་སྡེ་ཚན་ཁག་དང་རྫོང་ཐད་གཏོགས་ཚན་པ་ཁག་གི་འགན་འཁུར་བ་དང་།ཁྲང་ཧྥུང་འཛུགས་སྐྲུན་ལས་གྲྭ་ཚད་ཡོད་ཀུང་སི་དང་དེ་བཞིན་རྩད་ཞིབ་ཇུས་འགོད་དང་ལྟ་སྐུལ་དོ་དམ་ཚན་པ་སོགས་ཀྱི་འགན་འཁུར་བ་གཙོ་བོ་རླངས་འཁོར་ཤར་གཏོང་ཐུབ་པའི་མཛད་སྒོར་ཞུགས་ཡོད་པ་རེད།
