ནང་ཆེན་རྫོང་གིས་གསར་འགྱུར་ལས་དོན་པ་ལ་འཚམས་འདྲིར་སྐྱོད་པའི་བྱེད་སྒོ་སྤེལ་བ།
ཟླ་11པའི་ཚེས་8ཉིན་གྱི་སྔ་དྲོ་ཀྲུང་གོའི་གསར་འགོད་པའི་དུས་ཆེན་ཐེངས་25པ་འཆར་ཉེར་ཡོད་པའི་སྐབས་དེར་རྫོང་ཨུད་ཀྱི་ཧྲུའུ་ཅི་ཧྲི་ཏ་ཚུན་དང་བཅས་པ་ནང་ཆེན་རྫོང་མཉམ་འདྲེས་སྨྱན་སྦྱོར་ལྟེ་གནས་སུ་ཕེབས་ནས་འཐབ་ཕྱོགས་དང་པོའི་གསར་འགྱུར་ལས་དོན་པ་ལ་གཟིགས་པ་དང་འཚམས་འདྲི་གནང་བ་རེད། ཁོང་ཚོ་ལྟ་བུར་དུས་ཡུན་རིང་པོའི་ནང་རྫོང་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སེམས་ཁུར་དང་རྒྱབ་སྐྱོར་བྱས་པའི་སྨྱན་སྦྱོར་གྲོགས་པོ་ཚོ་ལ་སྙིང་དབུས་ནས་ཐུགས་རྗེ་ཆེ་ཞུས་པ་རེད། གསར་འགྱུར་ལས་དོན་པས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་གསར་འགྱུར་གླེང་ཕྱོགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གལ་ཆེའི་རྣམ་བཤད་སློབ་སྦྱོང་དང་ལག་བསྟར་གཏིང་ཟབ་བྱས་ནས་གཙོ་རྒྱུན་སྨྱན་སྦྱོར་གྱི་གླེང་ཕྱོགས་དྲིལ་བསྒྲགས་བྱ་ཡུལ་གཙོ་བོའི་ནུས་པ་འདོན་སྤེལ་གང་ལེགས་ཀྱིས་ནང་ཆེན་གྱི་གཏམ་རྒྱུད་ཡག་པོ་བཤད་པ་དང་། ནང་ཆེན་གྱི་གཟུགས་བརྙན་ཡག་པོ་སྟོན་པ། ནང་ཆེན་གྱི་གསུང་སྒྲ་བརྒྱུད་བསྒྲགས་ཡག་པོ་བཅས་བྱས་ཏེ་ནང་ཆེན་གྱི་སྤུས་ཚད་མཐོ་བའི་མཆོང་སྐྱོད་ལྟ་བུའི་འཕེལ་རྒྱས་ཆེད་དྲང་ནུས་ཆེན་པོ་གཅིག་ཏུ་སྒྲིལ་དགོས།གསར་འགྱུར་བྱ་བ་སྒྲུབ་མཁན་ནི་དུས་རབས་གསར་བའི་ཟིན་ཐོ་འགོད་མཁན་དང་བདེན་དཔང་མཁན་ཡིན། “ཚང་མ་དཀའ་ལས་ཁག་སོང་། ཁྱེད་ཚོའི་དུས་ཆེན་ལ་བཀྲ་ཤིས་བདེ་ལེགས་ཞུ”ཞེས་ཧྲི་ཏ་ཚུན་མཉམ་འདྲེས་སྨྱན་སྦྱོར་ལྟེ་གནས་སུ་ཕེབས་ནས་གསར་འགྱུར་ལས་དོན་པ་དང་བྱམས་བརྩེའི་ངང་གླེང་མོལ་གནང་བ་དང་ཁོང་ཚོས་དཀའ་སྤྱད་འབད་བརྩོན་དང་སྒེར་སེམས་མེད་པར་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་པར་མ་ཟད། ཚང་མས་ཐོག་མའི་བསམ་འདུན་རྒྱུན་འཁྱོངས་དང་ལས་དོན་ཏན་ཏིག་བསྒྲུབས་ནས་གསར་འགྱུར་བརྩམས་ཆོས་དེ་བས་མང་བ་དང་། དེ་བས་ལེགས་པ། དེ་བས་ཕུལ་བྱུང་བཅས་ཀྱི་བརྩམས་ཆོས་གསར་པ་ཧུར་ཐག་བྱ་རྒྱུའི་རེ་བའང་གནང་བ་རེད།འཚམས་འདྲིར་སྐྱོད་སྐབས་ཧྲི་ཏ་ཚུན་གྱིས་འབྲེལ་ཡོད་ལས་དོན་གྱི་སྙན་ཞུ་ནན་ཏན་ངང་གསན་པ་དང་གསར་འགྱུར་དྲིལ་བསྒྲགས་ལས་དོན་ལ་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་རེད། ཁོང་གིས་འདི་ལོ་ནས་བཟུང་མཉམ་འདྲེས་སྨྱན་སྦྱོར་ལྟེ་གནས་ཀྱིས་རྫོང་ཨུ་དང་རྫོང་སྲིད་གཞུང་གི་ལྟེ་བའི་ལས་དོན་ལ་དམ་པོར་དམིགས་ནས་ཡང་དག་པའི་གླེང་ཕྱོགས་ཀྱི་ཁྲིད་སྟོན་ཁོང་དུ་བརྟན་པོ་ཆུད་པ་དང་། མི་རིགས་མཐུན་སྒྲིལ། གྲོང་གསེབ་དར་རྒྱས། སྐྱེ་ཁམས་སྲུང་སྐྱོང་། ཞིང་འབྲོག རིག་གནས་ཡུལ་སྐོར་སོགས་ཀྱི་གཙོ་གནད་ལས་དོན་ལ་དམིགས་ཏེ་གཞི་རིམ་དང་མང་ཚོགས་ཁྲོད་དུ་ཟབ་ཞུགས་ཀྱིས་སྐད་སྒྲའི་ཐོག་ནས་སྐབས་དོན་གསར་འགྱུར་གཏོང་སྤེལ་དང་། པར་རིས་ཐོག་ནས་བརྩེ་སེམས་བརྒྱུད་སྤྲོད་བྱེད་པ། སྨྱུག་གུ་ཐོག་ནས་དམངས་འཚོ་མཚོན་པ་བཅས་བྱས་ཏེ་ནང་ཆེན་གྱི་གཏམ་རྒྱུད་ལེགས་པར་བཤད་པ་དང་ནང་ཆེན་གྱི་སྐད་སྒྲ་རྒྱ་ཁྱབ་ངང་བརྒྱུད་བསྒྲགས་བྱས་ནས་ནང་ཆེན་གྱི་དཔལ་འབྱོར་འཕེལ་རྒྱས་དང་དགའ་འོས་པའི་འགྱུར་ལྡོག་ཁྱོན་ཡོངས་ནས་མངོན་པར་བྱས་པའི་ཐོག་སྐྱོན་བྲལ་དང་དེང་རབས་བདེ་སྐྱིད་ཀྱི་ནང་ཆེན་གསར་པར་སྐུལ་འདེད་ཤུགས་ཆེན་གཏོང་ཆེད་བསམ་པའི་སྟོབས་ཤུགས་དང་གླེང་ཕྱོགས་ཀྱི་རྒྱབ་སྐྱོར་ཤུགས་ཆེན་བྱས་ཡོད་ཅེས་བཤད་པ་རེད།ཧྲི་ཏ་ཚུན་གྱིས་གསར་འགྱུར་བྱ་གཞག་ནི་ཏང་དང་མི་དམངས་ཀྱི་མགྲིན་ཚབ་ཅིག་ཡིན་པས་གླེང་ཕྱོགས་མཚོན་པ་དང་གླེང་ཕྱོགས་ལ་ཁྲིད་སྟོན་བྱེད་པའི་ལས་འགན་གལ་ཆེན་ཁུར་ཡོད། འགན་འཁྲི་གཙོ་བོ་དང་ལས་རིགས་གཙོ་བོར་དམིགས་དགོས། གསར་འགྱུར་གླེང་ཕྱོགས་ལས་དོན་གྱི་ཡང་དག་པའི་ཆབ་སྲིད་ཁ་ཕྱོགས་ཁོང་དུ་བརྟན་པོ་ཆུད་པ་བྱས་ཏེ་ཐོག་མཐའ་བར་གསུམ་དུ་ཆབ་སྲིད་ལ་སྣང་ཆེན་བྱ་རྒྱུ་དེ་སྔར་བས་མངོན་གསལ་དོད་པའི་གནས་བབ་ཐོག་འཇོག་པ་དང་། ཏང་ཀྲུང་དབྱང་དང་གོམ་སྟབས་གཅིག་གྱུར་དང་རྫོང་ཡོངས་ཀྱི་འཕེལ་རྒྱས་དང་མཉམ་དར་ཡོང་བར་བྱས་ནས་རང་རྟོགས་ངང་རྫོང་ཨུ་དང་རྫོང་སྲིད་གཞུང་གི་ཐབས་ཇུས་བཀོད་སྒྲིག་དོན་འཁྱོལ་བྱེད་པའི་དྲིལ་བསྒྲགས་པ་དང་། སྐུལ་འདེད་པ། ལག་ལེན་པ་བཅས་སུ་འགྱུར་བ་བྱས་ཏེ་གསར་འགྱུར་གྱི“དུས་དང་ཚད་ལྡན”ཁོང་དུ་འཕྱུགས་མེད་ཆུད་པ་བྱས་ཐོག “ཀླད་ཤུགས་དང་། མིག་ཤུགས། རྐང་ཤུགས། སྨྱུག་རྩལ་”བཅས་ཟམ་མི་ཆད་པར་ཆེ་རུ་བཏང་སྟེ་མྱུར་ཚད་ལྡན་པ་དང་། གཏིང་ཟབ་པ། དྲོད་ཚད་ལྡན་པ་བཅས་ཀྱི་གསར་འགྱུར་སྤུས་དག་དེ་བས་མང་བ་བཏོན་ཏེ་དྲང་བདེན་གསར་གཏོད་མཐའ་འཁྱོངས་བྱེད་དགོས། སྒྱུར་བཅོས་ལ་བརྟེན་ནས་གསོན་ཤུགས་འཕེལ་བ་དང་མཉམ་འདྲེས་ལ་བརྟེན་ནས་མི་མངོན་པའི་སྟོབས་ཤུགས་འཕེལ་བ་བྱ་རྒྱུ་མཐའ་འཁྱོངས་ཀྱིས་དྲིལ་བསྒྲགས་ཀྱི་ནང་དོན་ཐད་ལ་མང་ཚོགས་ཀྱི་དོ་ཁུར་བྱ་ཡུལ་དང་། དྲིལ་བསྒྲགས་ཀྱི་འགག་རྩ། གསར་འགྱུར་གྱི་འཇུག་སྒོ་བཅས་ཡང་དག་འཚོལ་བ་དང་། གནས་ཚུལ་གཏོང་སྤེལ་གྱི་ནང་དོན་དང་བྱེད་ཐབས་སོགས་ཀྱི་ཐད་ལ་བྱ་ཐབས་གསར་གཏོད་དང་རྣམ་པ་གསར་པ་བཏོད་དེ་མང་ཚོགས་དེ་བས་མང་བ་དགའ་ཤོས་བྱེད་པ་དང་དངོས་འཁྲིད་པ་དང་རྣམ་པ་མང་བའི་བརྩམས་ཆོས་རྩེ་གྲ་གཏོད་པ། སྒྲིག་སྲོལ་དང་ལམ་སྲོལ་གྱི་ཐད་ལ་མཐོང་རྒྱ་ཇེ་ཆེར་གཏོང་བ་དང་། བློ་ཁོག་ཆེན་པོས་ཚོད་ལྟ་བྱས་ནས་ས་ཁུལ་གཞན་དག་གི་སྔོན་ཐོན་ཉམས་མྱོང་བསྡུ་ལེན་དང་དཔྱད་གཞིར་འཛིན་གང་ཐུབ་བྱེད་པ། ཐོན་ཁུངས་སྡེབ་སྒྲིག་དང་། བྱེད་ཐབས་འཐུས་ཚང་། འདུ་ཤེས་གསར་གཏོད། དོ་དམ་གསར་གཏོད་ལ་ཤུགས་སྣོན། ཤེས་ལྡན་མི་སྣའི་ཐོབ་ཐང་མཐོར་འདེགས། ཤེས་ལྡན་མི་སྣ་ཕུལ་བྱུང་སྔར་ལས་མང་བ་རུབ་བསྡུས་མགྱོགས་སུ་གཏོང་བ་བཅས་བྱ་དགོས། ཁྱད་ཆོས་དང་བཀྲག་ཆེ་ས་དམ་འཛིན་ཡག་པོ་བྱེད་དགོས། བསམ་ཕྱོགས་གསར་གཏོད་དང་ཐབས་ལམ་ཡང་དག་བཙལ་ཏེ“ཐང་བོད་གནའ་ལམ་གྱི་སྐྱེ་ཁམས་རིག་གནས་ཡུལ་སྐོར་གྱི་རིམ་སྤེལ་བྱེད་སྒོ་དང་ནས་ནག་གི་རིག་གནས་སྒྱུ་རྩལ་དུས་ཚིགས”སོགས་ས་ཁོངས་ཧྲིལ་པོའི་ཡུལ་སྐོར་དྲིལ་བསྒྲགས་ཁྱབ་གདལ་སོགས་ཀྱི་གཙོ་གནད་ལས་དོན་ཡག་པོ་བསྒྲུབས་ནས་ནང་ཆེན་ཡི་གེའི་ཡུལ་སྐོར་ལ་ངོ་མཚར་བཏོད་དེ་ནང་ཆེན་གྲོང་ཁྱེར་གྱི་གཟུགས་བརྙན་ངོམས་པའི་IPཞིག་ཏུ་འགྱུར་བ་བྱས་ནས་ནང་ཆེན་གྱི་སྤྱི་ཚོགས་རིག་གནས་སྣང་ཚུལ་སྣ་ཚོགས་དང་ཡུལ་སྐོར་གྱི་མིང་གྲགས་དང་ཤུགས་རྐྱེན་རྒྱུན་ཆད་མེད་པར་ཆེ་རུ་གཏོང་དགོས་པར་མ་ཟད། ཞིང་ཨུ་དང་། ཁུལ་ཨུ། རྫོང་ཨུ་བཅས་ཀྱི་ཚང་འཛོམས་གྲོས་ཚོགས་ཀྱི་བཀོད་སྒྲིག་བླང་བྱ་དང་ཞིབ་བསྡུར་བྱས་ཏེ་རང་འགུལ་ངང་ལས་དོན་སྤེལ་བ་དང་། ལྟེ་བར་དམིགས་པ་དང་ཁྱོན་ཡོངས་ལ་ཞབས་འདེགས་ཞུ་བའི་ཁྲོད་ནས་གནས་ཚད་ངེས་གནས་ཡང་དག་འཚོལ་བ། མིག་སྔའི་རྫོང་ཡོངས་ཀྱི་གཙོ་གནད་ལས་དོན་ཁག་ལ་གསོན་ཉམས་དོད་པོས་གསལ་འགྲེལ་བྱེད་པ། གཞི་རིམ་མང་ཚོགས་ལ་དམིགས་པ་དང་འཐབ་ཕྱོགས་དང་པོའི་ཚ་ཚ་འུར་འུར་གྱི་ལག་ལེན་ལ་དམིགས་པ་བཅས་བྱས་ནས་ཀྲུང་གོའི་རྣམ་པའི་དེང་རབས་ཅན་གྱི་མཚོ་སྔོན་གསར་པའི་ནང་ཆེན་གྱི་ལག་ལེན་དངོས་ཀྱི་གསོན་ཉམས་དོད་པའི་རྣམ་པ་མངོན་པ་བྱེད་དགོས་པའི་བླང་བྱ་བཏོན་ཡོད་པ་རེད།རྫོང་གི་འགོ་ཁྲིད་ཏིང་ཀྲུང་ཅང་དང་། དཀོན་མཆོག་བདེ་ལྡན། མཚོ་དགའ། སྐྱིད་བཟང་པོ། ཚེ་རིང་བཟང་པོ། ཀུན་བཟང་ཚེ་བསྟན་བཅས་རྫོང་ཨུའི་དྲིལ་བསྒྲགས་པུའི་འགན་འཁུར་བློ་མཐུན་ལྷན་དུ་འཚམས་འདྲིའི་བྱེད་སྒོར་ཞུགས་པ་རེད།
