ནང་ཆེན་རྫོང་གིས་ཕྱོགས་བསྡུས་ཟོག་འགྲེམས་གླིང་གི་སྒོ་འབྱེད་མཛད་སྒོ་གཟབ་རྒྱས་ངང་འཚོགས་པ།
འདྲེན་ཚིག ཟླ་11པའི་ཚེས་10ཉིན་གྱི་སྔ་དྲོ་ནང་ཆེན་རྫོང་ཟོག་འགྲེམས་གླིང་གི་སྒོ་འབྱེད་མཛད་སྒོ་ནང་ཆེན་རྫོང་ཤར་མདའ་གྲོང་རྡལ་དུ་གཟབ་རྒྱས་ངང་འཚོགས་པ་རེད། རྫོང་ཨུད་ཀྱི་ཧྲུའུ་ཅི་ཧྲི་ཏ་ཚུན་མཛད་སྒོར་ཕེབས་པ་དང་རྫོང་ཕྱོགས་བསྡུས་ཟོག་འགྲེམས་གླིང་དངོས་སུ་སྒོ་ཕྱེ་བའི་ཁྱབ་བསྒྲགས་ཀྱང་གནང་བ་རེད། རྫོང་ཨུད་ཀྱི་ཧྲུའུ་ཅི་གཞོན་པ་རྫོང་དཔོན་ཤེས་རབ་རྒྱ་མཚོས་ཤིས་ཚིག་གསུངས་པ་དང་རྫོང་ཨུད་ཀྱི་ཧྲུའུ་ཅི་གཞོན་པ་ཟླ་བ་བཀྲ་ཤིས་ཀྱིས་གཙོ་སྐྱོང་གནང་བ་རེད། རྫོང་དེ་ཡོངས་ཀྱི་རྫོང་རིམ་པ་གཞོན་པ་ཡན་གྱི་འགོ་ཁྲིད་ལས་བྱེད་པ་དང་། ཞང་གྲོང་ཁག་གི་ཏང་སྲིད་འགན་འཁུར་བློ་མཐུན། རྫོང་ཐད་གཏོགས་སྡེ་ཚན་ཁག་གི་འགོ་ཁྲིད་གཙོ་བོ་དང་གླིང་ཁུལ་དུ་བཅའ་སྡོད་བྱེད་མཁན་ཁེ་ལས་ཀྱི་འཐུས་མི་བཅས་མཛད་སྒོར་ཞུགས་ཡོད་པ་རེད།དངོས་གཞི། ཤེས་རབ་རྒྱ་མཚོས་ཤིས་ཚིག་གསུང་སྐབས་ནང་ཆེན་རྫོང་ནི་མཚོ་སྔོན་གྱི“ལྷོ་སྒོ་ཆེན་པོ”ཞིག་དང་། ཡུས་ཧྲུའུ་ཡི“ལྟེ་གནས”ཞིག“མཚོ་སྔོན་ལྷོ་རྒྱུད་དང་བོད་ཤར་རྒྱུད་”ས་ཁུལ་གྱི་ཟོག་འགྲེམས་བསྡུ་འགྲེམས་ལྟེ་གནས་གལ་ཆེན་ཞིག་བཅས་ཡིན་ལ། ལོ་རྒྱུས་ཐོག་དེ་སྔའི་ཇ་རྟའི་གནའ་ལམ་དང་། ཚྭ་ནོར་གནའ་ལམ། ཐང་བོད་གནའ་ལམ་བཅས་ཀྱི་ལྷུ་ཚིགས་གལ་ཆེན་ཞིག་ཀྱང་ཡིན་ཞིང་། དེར་ཐུན་མོང་མ་ཡིན་པའི་ས་ཁམས་གནས་བབ་དང་ཚོང་དོན་རིག་གནས་ཀྱི་ནང་དོན་ཟབ་མོ་ལྡན་པས་ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད་ཚོང་དོན་སྤེལ་རེས་ཀྱི་འགན་འཁྲི་གལ་ཆེན་ཁུར་ཡོད། མ་འཇོག་བྱས་ནས་ཕྱོགས་བསྡུས་ཟོག་འགྲེམས་གླིང་བསྐྲུན་པ་ནི་རྫོང་ཨུ་དང་རྫོང་སྲིད་གཞུང་གིས་ས་ཁོངས་དཔལ་འབྱོར་འཕེལ་རྒྱས་ཀྱི་ཁྱོན་ཡོངས་དང་རང་འགུལ་ངང་མཉམ་འདྲེས་བྱས་ཏེ་ནང་ཆེན་གྱི་རང་ངོས་ལེགས་ཆ་འདོན་སྤེལ་གང་ལེགས་བྱེད་པ་དང་ནང་ཆེན་གྱི་འཕེལ་རྒྱས་མི་མངོན་པའི་ནུས་པ་འཕེལ་བ་བྱེད་པའི་བྱ་ཐབས་གལ་ཆེན་ཞིག་ཡིན་ལ་ནང་ཆེན་གྱི་འཕེལ་རྒྱས་དུས་བབ་མཐུན་པ་དང་། ཐོན་ལས་ཕྱོགས་སྒྱུར་རིམ་སྤོར་ལ་སྐུལ་འདེད་གཏོང་བ། ས་ཁོངས་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་ཞིབ་ཕྲའི་ལག་ལེན་ཞིག་ཀྱང་རེད། རྫོང་ཕྱོགས་བསྡུས་ཟོག་འགྲེམས་གླིང་གིས་རྫོང་ཁོངས་ཀྱི་ཟོག་འགྲེམས་ཐོན་ཁུངས་བསྡུ་སྒྲིལ་ནུས་ལྡན་ཐུབ་ནས་ཟོག་འགྲེམས་ཀྱི་མ་གནས་སྔར་བས་དམའ་རུ་གཏོང་བ་དང་ཟོག་འགྲེམས་ཀྱི་ལས་ཆོད་ཆེ་རུ་ཕྱིན་ཏེ་རང་རྫོང་གི་ཁྱད་ལྡན་ཐོན་རྫས“ཕྱིར་བསྐྱོད་རྒྱུ”དང་དངོས་ཟོག་སྣ་ཚོགས“ནང་དུ་འདྲེན་རྒྱུར”སྟབས་བདེ་ནུས་ཆེའི་བསྡུ་འགྲེམས་ལྟེ་གནས་བསྐྲུན་ནས་ཐོན་ལས་རིམ་སྤོར་ལ་སྐུལ་འདེད་དང་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་ཆེད་སྒུལ་ཤུགས་ཆེན་པོ་བསྣན་རྒྱུ་རེད།འབྱུང་འགྱུར་ལ་རྒྱང་ལྟ་བྱེད་སྐབས་ནང་ཆེན་རྫོང་ཟོག་འགྲེམས་གླིང་གིས་ལས་སྒོའི་ཁྱབ་ཁོངས་མུ་མཐུད་དུ་རྒྱ་ཆེར་བཏང་ནས་ཞབས་ཞུའི་ནུས་པ་རྒྱུན་ཆད་མེད་པར་འཐུས་སྒོ་ཚང་དུ་བཏང་སྟེ་སྔོན་ཐོན་གྱི་ཟོག་འགྲེམས་ལག་རྩལ་དང་རིག་ནུས་ཅན་གྱི་དོ་དམ་མ་ལག་རིམ་གྱིས་ནང་འདྲེན་བྱས་ནས་ཟོག་འགྲེམས་འཁོར་སྐྱོད་ཀྱི་ལས་ཆོད་ཆེ་རུ་གཏོང་རྒྱུ་ཡིན་པ་རེད། དེ་དང་ཆབས་ཅིག་ཏུ་གླིང་ཁུལ་གྱིས་མཐའ་འཁོར་ས་ཁུལ་དང་ཟོག་འགྲེམས་མཉམ་ལས་ཀྱི་དྲྭ་བ་བཙུགས་ནས་ཁྱབ་འགྱེད་ཁྱབ་ཁོངས་ཆེ་རུ་གཏོང་བ་དང་ཟོག་འགྲེམས་ཁེ་ལས་དང་ཁྱད་ལྡན་ཐོན་ལས་དེ་བས་མང་བ་གླིང་ཁུལ་དུ་བཅའ་སྡོད་བྱ་རྒྱུའི་ཡིད་དབང་བཀུག་སྟེ་ཐོན་ལས་ཁྱུ་ཚོགས་ཀྱི་ཕན་འབྲས་ཆགས་པ་བྱས་ནས་རྫོང་དེ་ཡོངས་ཀྱི་དཔལ་འབྱོར་འཕེལ་རྒྱས་ལ་སྒུལ་ཤུགས་གསར་པ་མཁོ་འདོན་བྱ་རྒྱུ་རེད།མཛད་སྒོ་མཇུག་གྲོལ་རྗེས་མཛད་སྒོར་ཞུགས་མཁན་རིམ་ཁག་འགོ་ཁྲིད་ཀྱིས་གླིང་ཁུལ་གྱི་བྱེད་ནུས་ཁུལ་ཁག་དང་ཟོག་འགྲེམས་མཛོད་ཁང་། དེ་བཞིན་རྒྱབ་སྟེགས་དོ་དམ་སྟེགས་བུར་ལྟ་སྐོར་བྱས་པ་རེད།ཤེས་རྟོགས་བྱུང་བར་གཞིགས་ན། ནང་ཆེན་རྫོང་ཕྱོགས་བསྡུས་ཟོག་འགྲེམས་གླིང་ལ་མ་དངུལ་བསྡོམས་སྒོར་ཁྲི་12750བཏང་བ་དེས་ས་ཁྱོན་མུའུ་95བཟུང་བ་དང་སྤྱིའི་འཛུགས་སྐྲུན་རྒྱ་ཁྱོན་སྨི་ངོས་གྲུ་18047ཟིན་ཞིང་། དེའི་ནང་འཁྱག་མཛོད་དང་། ལས་སྣོན་འཁོར་ཁང་། མཛོད་ཁང་། མྱུར་སྐྱེལ་གཏོང་སྤྲོད་ལྟེ་གནས། ཉོ་ཚོང་ཞབས་ཞུའི་ལྟེ་གནས། འགྲེམས་ཚོང་ཉོ་ཚོང་ལྟེ་གནས་སོགས་ནུས་པ་ཐོན་པའི་ཁང་པ་ཚུད་ཡོད་པ་རེད།
