གསར་འགོད་པའི་དུས་ཆེན་ལ་མཉམ་དུ་རྟེན་འབྲེལ་ཞུས། གསར་འགྱུར་ལས་དོན་པ་རྣམས་མཉམ་དུ་འཛོམས་ནས་དུས་ཆེན་ལ་དགའ་བསུ་ཞུས།
འདྲེན་ཚིག ཟླ་11པའི་ཚེས་8ཉིན་ནི་ཀྲུང་གོའི་གསར་འགོད་པའི་དུས་ཆེན་ཐེངས་25པ་ཡིན་ཞིང་། དོན་སྙིང་ལྡན་པའི་ཉིན་མོ་དེར་ནང་ཆེན་རྫོང་གི་གསར་འགྱུར་ལས་དོན་པ་ཚོ་མཉམ་དུ་འཛོམས་ནས་གླུ་ལེན་གར་འཁྲབ་བྱས་ནས་རང་ཉིད་ལ་དབང་བའི་དུས་ཆེན་ལ་མཉམ་དུ་རྟེན་འབྲེལ་ཞུས་པ་རེད། རྫོང་ཨུད་ཀྱི་ཧྲུའུ་ཅི་གཞོན་པ་རྫོང་དཔོན་ཤེས་རབ་རྒྱ་མཚོ་དང་། རྫོང་ཨུད་ཀྱི་རྒྱུན་ཨུ། རྫོང་ཨུད་ཀྱི་ཧྲུའུ་ཅི་གཞོན་པ། རྫོང་སྲིད་གཞུང་གི་རྫོང་དཔོན་གཞོན་པ་ལིའུ་ལེན། རྫོང་སྲིད་གཞུང་གི་རྫོང་དཔོན་གཞོན་པ་ཚེ་རིང་བཟང་པོ། རྫོང་ཇ་པ་དགོན་དོ་དམ་ཨུ་ལྷན་གྱི་ཀྲུའུ་རེན། རིག་གནས་ཡུལ་སྐོར་ཅུས་ཀྱི་ཅུས་ཀྲང་ཀུན་བཟང་ཚེ་བརྟན། དེ་བཞིན་གཞུང་ལས་ཁང་གཉིས་ཀྱི་ཀྲུའུ་རེན། རྫོང་ཨུའི་དྲིལ་བསྒྲགས་པུའུ། མཉམ་འདྲེས་སྨྱན་སྦྱོར་ལྟེ་གནས། རྫོང་དྲྭ་རྒྱའི་ལས་ཁུངས་བཅས་ཀྱི་འབྲེལ་ཡོད་འགན་འཁུར་བློ་མཐུན་བྱེད་སྒོར་ཞུགས་ཡོད་པ་རེད།དངོས་གཞི། བྱེད་སྒོ་སྤེལ་རིང་ལ་ཤེས་རབ་རྒྱ་མཚོ་ཡིས་ཤིས་ཚིག་གསུངས་པ་དང་།ཁོང་གིས་གསུང་བཤད་གནང་སྐབས་རྫོང་མཉམ་འདྲེས་སྨྱན་སྦྱོར་ལྟེ་གནས་ཀྱི་གསར་འགྱུར་ལས་དོན་པའི་ལོ་གཅིག་གི་རིང་ལ་ལས་ཀའི་གྲུབ་འབྲས་ལ་ཁས་ལེན་གང་ལེགས་གནང་བར་མ་ཟད། གོམ་སྟབས་རྗེས་མའི་གསར་འགྱུར་དྲིལ་བསྒྲགས་ལས་དོན་ཡག་པོ་བསྒྲུབ་རྒྱུའི་ཐད་ལ་རེ་བ་དང་བླང་བྱ་ནན་པོ་བཏོན་པ་རེད། ལིའུ་ལེན་གྱིས་གསར་འགྱུར་ལས་དོན་པ་ཡོངས་ལ་དུས་ཆེན་གྱི་འཚམས་འདྲི་དང་སྨོན་འདུན་བཟང་པོ་ཞུས་པ་རེད། རྫོང་མཉམ་འདྲེས་སྨྱན་སྦྱོར་ལྟེ་གནས་ཀྱི་འགན་འཁུར་བས་འགོ་ཁྲིད་རྣམས་ཡུལ་དངོས་སུ་ཕེབས་ནས་སྔར་རྒྱུན་བཞིན་གསར་འགྱུར་དྲིལ་བསྒྲགས་ལས་དོན་ཡག་པོ་བསྒྲུབས་ཏེ་ནང་ཆེན་གྱི་སྤྱི་ཚོགས་ཁྱོན་ཡོངས་དང་དཔལ་འབྱོར་འཕེལ་རྒྱས་ལ་ཞབས་འདེགས་ཞུ་བར་ཐུགས་རྗེ་ཆེ་ཞུས་པ་རེད།དེའི་རྗེས་ནས་རིག་རྩལ་འཁྲབ་སྟོན་བྱས་པ་རེད། དགོང་ཚོགས་ཀྱི་རིང་ལ་རྫོང་མཉམ་འདྲེས་སྨྱན་སྦྱོར་ལྟེ་གནས་ཀྱི་འཐབ་ཕྱོགས་དང་པོའི་གསར་འགོད་པ་དང་རྩོམ་སྒྲིག་པས་རང་རྩོམ་རང་འཁྲབ་བྱས་ནས་ངོ་མཚར་ཆེ་བའི་ལེ་ཚན་འཁྲབ་པ་རེད། འཁྲབ་སྟོན་ནང་ཞུགས་མཁན་གྱིས་སྐད་ངག་མཐོན་པོའི་གླུ་སྒྲ་དང་། འཇམ་ཞིང་མཉེན་པའི་དཀྲོལ་གཞས། སྤྲོ་སྣང་ལྡན་པའི་ཞབས་བྲོ། ངོ་མཚར་ཆེ་བའི་ཡིག་གཟུགས་སྒྱུ་རྩལ་དངོས་འབྲི་སོགས་ཀྱི་ལེ་ཚན་རྒྱུད་ནས་གསར་འགྱུར་ལས་དོན་པའི་དུས་རབས་ཀྱི་ཉམས་འགྱུར་མངོན་པར་བྱས་ཡོད། དེའི་ཁྲོད་འབྲུག་ཡུལ་གྱི་ཞབས་བྲོ 《སྤྲོ་འཛོམས》དང་། གླུ་གཞས《རྫོང་དྲུག་གི་བསྟོད་གླུ》《ཁྲེང་ཏུའུ》སོགས་ལེ་ཚན་འཁྲབ་སྟོན་བྱས་པར་ལྟད་མོ་བ་ཚོའི་ཐལ་མོའི་རྡེབ་སྒྲ་ཡང་ཡང་གྲགས། གཞན་ཡང“གསར་འགོད་པར་རིན་ཐང་ཡོད་དམ”ཞེས་བརྗོད་བྱ་གཙོ་བོར་བྱས་པའི་གསར་འགོད་པའི་དུས་ཆེན་གྱི་ཆེད་དོན་བརྙན་ཐུང་དེས་ནང་ཆེན་རྫོང་མཉམ་འདྲེས་སྨྱན་སྦྱོར་ལྟེ་གནས་བཙུགས་ཚུན་གྱི་འཕེལ་རྒྱས་ལ་ཕྱིར་མིག་བལྟས་པ་དང་གསར་འགྱུར་གྱི་འཐབ་ཕྱོགས་ཐོག་འབད་འཐབ་བྱེད་མཁན་གསར་འགོད་པར་ལྷག་བསམ་ཟོལ་མེད་ངང་དུས་ཆེན་གྱི་འཚམས་འདྲི་ཞུས་པ་རེད།བྱེད་སྒོའི་ཁྲོད་འགོ་ཁྲིད་རྣམས་པས“ཕུལ་བྱུང་གི་གསར་འགྱུར་ལས་དོན་པ”དང“གསར་འགོད་པའི་དུས་ཆེན་དང་རིག་རྩལ་བྱེད་སྒོ་རབ་དང་རིམ་པ”སོགས་བྱ་དགའ་ཐོབ་པའི་བློ་མཐུན་ཚོར་བྱ་དགའ་གནང་བ་རེད། ནང་ཆེན་རྫོང་མཉམ་འདྲེས་སྨྱན་སྦྱོར་ལྟེ་གནས་ཀྱི་སྡེ་ཚན་ཁག་གི་ཕུལ་བྱུང་གསར་འགྱུར་ལས་དོན་པའི་འཐུས་མིར་གཙོ་གནད་ཐོག་གཟེངས་བསྟོད་བྱས་པ་དང་“ཕུལ་བྱུང་གསར་འགྱུར་ལས་དོན་པའི”བྱ་དགའ་སྤྲད་ཡོད་པ་རེད། གཟི་བརྗིད་མཚན་སྙན་དེ་དག་ཐོབ་པ་ནི་ཁོང་ཚོས་དཀའ་སྤྱད་ལས་བརྩོན་བྱས་པར་ཁས་ལེན་བྱས་པ་ཞིག་ཡིན་པར་མ་ཟད། ཁོང་ཚོས་གསར་འགྱུར་ཕུགས་བསམ་བརྟན་པོ་སྲུང་བ་དང་འགན་འཁྲི་འཁུར་ཕོད་པའི་སྙིང་སྟོབས་ལ་བསྔགས་བརྗོད་བྱས་པ་ཞིག་ཀྱང་རེད།ཀྲུང་གོའི་གསར་འགོད་པའི་དུས་ཆེན་ནི་གསར་འགྱུར་ལས་དོན་པའི་དུས་ཆེན་ཞིག་ཡིན་པ་དང་ཁོང་ཚོས་དཀའ་སྤྱད་འབད་བརྩོན་བྱས་པའི་ཁས་ལེན་དང་བསྔགས་བརྗོད་དེ་བས་བྱེད་ཀྱིན་ཡོད། དམིགས་བསལ་གྱི་ཉིན་མོ་འདིར་གསར་འགྱུར་ལས་དོན་པ་ཚོས་རང་ཉིད་ལ་དབང་བའི་དུས་ཆེན་ལ་རྟེན་འབྲེལ་ཞུ་བཞིན་ཡོད་པ་དང་ཆབས་ཅིག་ཏུ་རང་ཉིད་ཀྱིས་འབྱུང་འགྱུར་གྱི་ལས་ཀའི་ཁྲོད་ལ་མུ་མཐུད་དུ་མདུན་སྐྱོད་བྱས་ཏེ་གྲུབ་འབྲས་བཟང་པོ་སླར་ཡང་གཏོད་རྒྱུར་སྐུལ་མ་གཏོང་བཞིན་ཡོད།
