ཡུས་ཧྲུའུ་ཁུལ་རིག་གནས་ཡུལ་སྐོར་ཐོན་ལས་ཀྱི་ལོ་གསུམ་བྱ་སྤྱོད་དུས་འབྲིང་ཕན་འབྲས་དཔྱད་དཔོག་དང་བརྟག་ཞིབ་ལྟ་སྦྱོང་ཚོགས་པ་ནང་ཆེན་དུ་བརྟག་ཞིབ་བྱེད་པར་ཡོང་བ།
འདྲེན་ཚིག ཟླ་11པའི་ཚེས་14ཉིན། ཡུས་ཧྲུའུ་ཁུལ་རིག་གནས་ཡུལ་སྐོར་ཐོན་ལས་ཀྱི་ལོ་གསུམ་བྱ་སྤྱོད་དུས་འབྲིང་ཕན་འབྲས་དཔྱད་དཔོག་དང་བརྟག་ཞིབ་ལྟ་སྦྱོང་ཚོགས་པ་ནང་ཆེན་རྫོང་དུ་བསྐྱོད་ནས་སྔ་རྗེས་སུ་མགར་རོང་འགག་དང་། ཐང་བོད་གནའ་ལམ（མཚོ་བོད་ལྷོ་ལམ）མགར་རོང་འགག་གི་བོད་སྐྱོད་ཡུལ་སྐོར་གཞུང་ལམ་ལས་ཀ་མཇུག་གྲོལ་བའི་མཛད་སྒོ་དང་ནང་ཆེན་རྫོང་ཚྭ་དམར་རིག་གནས་ཉམས་ལེན་ཁང་གི་སྒོ་བྱང་བཀལ་བའི་མཛད་སྒོ ནང་ཆེན་རྫོང་བཙན་པོའི་རྟེན་རྫས་བཤམས་སྟོན་ཁང་། རྫ་ཆུའི་དྲྭ་གཟུགས་ཆུ་རྒྱུད་ལྟ་སྐོར་སྟེགས་བུ། སྐར་རིམ་ཅན་གྱི་ཚངས་དབྱངས་རྒྱ་མཚོ་མགྲོན་ཁང་ཐོག་བརྩེགས་བཅས་ལ་བསྐྱོད་ནས་མཛེས་ལྗོངས་ཁུལ་སྒྱུར་བཀོད་རིམ་སྤོར་བྱས་ཚུལ་དང་ཞིང་ཆེན་ནས་ཕྱིར་ཐོན་པའི་ཡུལ་སྐོར་གཞུང་ལམ་འཛུགས་སྐྲུན་བྱས་ཚུལ་ལ་ཞིབ་བཤེར་བྱས་པ་རེད། ནང་ཆེན་རྫོང་གི་རིག་གནས་ཡུལ་སྐོར་རྨང་གཞིའི་སྒྲིག་བཀོད་ཀྱི་གཙོ་གནད་རྣམ་གྲངས་འཛུགས་སྐྲུན་དང་རིག་གནས་ཡུལ་སྐོར་ཐོན་ལས་འཕེལ་རྒྱས་ཀྱི་ད་ལྟའི་གནས་བབ་ཤེས་རྟོགས་བྱས་པ་རེད། དེའི་རིང་ལ་ལྟ་སྦྱོང་ཚོགས་པའི་ཁོངས་མིས་ཉམས་མྱོང་སྤེལ་རེས་ཧུར་ཐག་བྱས་པ་དང་ལྷག་པའི་གནད་དོན་དང་མི་འདང་ས་འཚོལ་ཞིབ་དང་དབྱེ་ཞིབ་གཏིང་ཟབ་བྱས་ཏེ་རིག་གནས་ཡུལ་སྐོར་ཐོན་ལས་སྤུས་ཚད་མཐོ་པོའི་ངང་འཕེལ་རྒྱས་མགྱོགས་སུ་གཏོང་བའི་བྱེད་ཐབས་ནུས་ལྡན་ལ་ཐུན་མོང་ཐོག་གྲོས་བསྡུར་བྱས་པ་རེད། དངོས་གཞི། ཤེས་རྟོགས་བྱུང་བར་གཞིགས་ན། ནང་ཆེན་རྫོང་གིས་ཁུལ་ཨུ་དང་ཁུལ་སྲིད་གཞུང་གི《རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་སའི་ཁུལ་གཏོད་པའི་ལོ་གསུམ་གྱི་བྱ་སྤྱོད་ཇུས་གཞིའི》བླང་བྱ་གཞིར་བཟུང་ནས།“ལོ་གཅིག་ལ་རྨང་གཞི་འདིང་བ་དང་། ལོ་གཉིས་ལ་ཕན་འབྲས་ཐོན་པ། ལོ་གསུམ་ལ་གྲུབ་འབྲས་ཐོན་པ”བཅས་ཀྱི་འཐབ་ཇུས་བཀོད་སྒྲིག་ལ་དམ་པོར་དམིགས་ཏེ“ལྷོ་འདྲེས་བྱང་སྦྲེལ་དང་མཚོ་འབྲེལ་བོད་འབྲེལ་ཟམ་སྣེའི་མཁར་རྫོང་”འཕེལ་རྒྱས་ཀྱི་གནས་ཚད་དུ་བྱེད་པ་དང་ཐོན་ཁུངས་ཀྱི་ལེགས་ཆར་གཞི་ཚུགས་པ་དང་ཐང་བོད་གནའ་ལམ་གྱི་རིག་གནས་སྤུས་རྟགས་གཞི་རྟེན་དུ་བྱས་ཏེ་ཁུལ་ཡོངས་ཀྱི་རིག་གནས་ཡུལ་སྐོར་མཉམ་འདྲེས་གཏིང་ཟབ་ཀྱི་འཕེལ་རྒྱས་འཐབ་ཇུས་ནང་རང་འགུལ་ཞུགས་ཏེ་ནུས་ཤུགས་ཡོད་རྒུས་རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་སའི་ཐོག་མའི་གདམ་ཁུལ་གཏོད་རྒྱུ་ཡིན་པ་རེད། 2023ལོ་ནས་བཟུང་ནང་ཆེན་རྫོང་གིས་རིམ་རྩིས་བྱས་ན་མ་དངུལ་སྒོར་ཁྲི་8168བཏང་སྟེ་ཡུལ་སྐོར་ལམ་ཐིག་རྩེ་གྲའི་ལྗང་མདོག་ཁྱམས་རིང་དང་། མགྲོན་བསུའི་ལམ་ཆེན་གྱི་མཛེས་སྒྱུར། རྫ་ཆུའི་དྲྭ་གཟུགས་ཆུ་རྒྱུད་ལྗོངས་གཟིགས་སྟེགས་བུ། ཚྭ་དམར་སྲུང་སྐྱོང་དང་གསར་སྤེལ་འགྲེམས་སྟོན་ཉམས་ལེན་ཁང་། སྤྱི་ཐག་ཐང་ཡུལ་སྐོར་དཔེ་སྟོན་རྣམ་གྲངས། སྤྲེལ་ཚྭ་ཞང་དཔལ་སྨད་གྲོང་ཚོའི་ཐོན་ལས་ལམ་བུ་ལེགས་སྒྱུར། མི་འཚོ་སྡོད་ཁོར་ཡུག་བཅོས་སྒྲིག་དང་ཐང་བོད་གནའ་ལམ(མཚོ་བོད་ལྷོ་རྒྱུད)མགར་རོང་འགག་གི་བོད་སྐྱོད་ཡུལ་སྐོར་གཞུང་ལམ་སོགས་རྣམ་གྲངས་14ལག་བསྟར་བྱས་པ་དང་། རིག་གནས་ཡུལ་སྐོར་ལས་རིགས་ལ་གནས་པའི་མི་འདང་སར་དམིགས་ནས་རྨང་གཞིའི་སྒྲིག་བཀོད་ཀྱི་ཞན་ཆ་ནུས་ཤུགས་ཡོད་རྒུས་གསབ་པ་དང་ལས་དོན་མི་སྣའི་རྩལ་ནུས་གསོ་སྦྱོང་ལ་རྒྱུན་ཆད་མེད་པར་ཤུགས་སྣོན་བརྒྱབ་སྟེ། བཟའ་བཅའ། སྡོད་གནས། འགྲུལ་བཞུད་དང་ཡུལ་སྐོར། ཉོ་ཚོང་། རྩེད་མོ་བཅས་ཀྱི་ཆུ་ཚད་ཁྱོན་ཡོངས་ནས་མཐོ་རུ་གཏོང་རྒྱུ། མིག་སྔའི་བར་ནང་ཆེན་རྫོང་གིས་ཡུལ་སྐོར་བ་མི་འབོལ་ཁྲི་17.8ལ་སྣེ་ལེན་ཞུས་པ་དང་ཡུལ་སྐོར་ཡོང་འབབ་སྒོར་ཁྲི་9458བྱུང་ཡོད་པ་རེད།ནང་ཆེན་རྫོང་རིག་གནས་ལུས་རྩལ་ཡུལ་སྐོར་བརྙན་འཕྲིན་ཅུས་ཀྱི་ཡུལ་སྐོར་སྣེ་ཤན་པ་ཚེ་དཀར་སྒྲོལ་མས་ཐང་བོད་གནའ་ལམ（མཚོ་བོད་ལྷོ་རྒྱུད）མགར་རོང་འགག་གི་བོད་སྐྱོད་ཡུལ་སྐོར་གཞུང་ལམ་དངོས་སུ་ཤར་གཏོང་ཐུབ་པ་དང་ཆབས་ཅིག་ཏུ་ནང་ཆེན་རྫོང་གི་མཛེས་ལྗོངས་ལ་ཡུལ་སྐོར་བྱེད་པ་དང་། ཟས་མཆོག་ལ་རོལ་མྱོང་བྱེད་པ། སྤུས་ཚད་ལྡན་པའི་རིག་གནས་ཡུལ་སྐོར་ལམ་ཐིག་སྔར་བས་འཐུས་ཚང་དུ་འགྲོ་རྒྱུ་རེད་ཅེས་བཤད་པ་རེད། ལྷག་པར་དུ་བོད་ཀྱི་ཚྭ་དམར་མྱོང་རོལ་ཁང་གསར་སྤེལ་བཙུགས་པ་དེས་ཡུལ་སྐོར་བ་རྣམས་ཚྭ་དམར་གྱི་ལོ་རྒྱུས་རིག་གནས་ཤེས་རྟོགས་གཏིང་ཟབ་ཐུབ་པར་མ་ཟད། ད་དུང་སྨན་ལུམས་དང་། ཚྭ་ཁྲུ། ཚྭ་བཟོ། མངོན་མིན་ཤུལ་བཞག་རིག་གནས་སོགས་ཀྱང་ཚོར་ཐུབ། རྒྱ་ཆེའི་ཡུལ་སྐོར་བ་ཚོས་ཡུས་ཧྲུའུ་དང་ནང་ཆེན་དུ་ཡོང་ནས་མཐོ་སྒང་གི་ཡུལ་ལྗོངས་དང་མི་རིགས་ཀྱི་ཁྱད་ཆོས་དང་ཡུལ་སྲོལ་གོམས་འདྲིས་མི་འདྲ་བ་ཉམས་ལེན་བྱ་རྒྱུར་དགའ་བསུ་ཞུ་རྒྱུ་ཡིན།
