ཕྱི་ལོ2024ཟླ11ཚེས11ནས་ཚེས 22 བར། ཨ་སེར་བྷེ་ཅན་རྒྱལ་ཁབ་ཀྱི་རྒྱལ་ས་བྷ་ཀུ་རུ། གོ་ལའི་གནམ་གཤིས་འགྱུར་ལྡོག་དང་འབྲེལ་ད་ལོའི་རྒྱལ་སྤྱིའི་ཚོགས་འདུ་ཆེ་ཤོས་དེ་ཚོགས་རྒྱུ། འཛམ་གླིང་གི་རྒྱལ་ཁབ་ 200 ཡས་མས་ཀྱི་དབུ་ཁྲིད་དང་། ཆེས་མཐོའི་སྐུ་ཚབ་ཐེངས་འདིའི་ཚོགས་ཆེན་དུ་ཞུགས་བཞིན་ཡོད། རྒྱལ་ཁབ་འདི་ནི་ཡོང་སྒོ་གཙོ་བོ་རྡོ་སྣུམ་ལ་བརྟེན་ཡོད་མཁན་ཞིག་ཡིན་པའི་ངོས་ནས། ཐེངས་འདིར་ཁོར་ཡུག་ཚོགས་ཆེན་རྒྱལ་ཁབ་འདིར་བསྐོངས་པ་ནི། དོན་དངོས་དང་ཧ་ཅང་མི་འཚམས་པ་ཞིག་ཡིན་པའི་གླེང་གཞི་མང་པོ་བྱུང་། ལོ་སྔོན་མར་དཀྱིལ་ཤར་གྱི་རྡུ་བྷའེ་གྲོང་ཁྱེར་དུ་ཚོགས།
ཐེངས་འདིར་ཕྱི་ལོ་ 2015 ལོར་ཧྥ་རན་སིའི་རྒྱལ་ས་ཕེ་རི་སིར་ཚོགས་པའི་ཁོར་ཡུག་ཚོགས་འདུའི་སྐབས་ཀྱི་གྲོས་ཆོད་ཀྱི་ནང་དོན་ལྟར། གོ་ལའི་ཚ་ཚད་དེ་ 1.5°C ཡི་སྒང་ལ་བརྒལ་དུ་མི་འཇུག་རྒྱུར་འབད་པ་དང་། དེའི་ཆེད་མཉམ་ལས་བྱ་རྒྱུའི་ཐད་གྲོས་བྱ་རྒྱུ།
ཚན་རིག་པས། གོ་ལའི་ཚ་ཚད་དེ་ 1.5°C ཡི་སྒང་ལ་མ་འཕར་ན། ཧ་ཅང་ཉེན་ཁ་ཆེ་བའི་གནམ་གཤིས་འགྱུར་ལྡོག་ལ་གཡོལ་ཐུབ་པ་ངོས་འཛིན། ལོ་འདིར་སྐབས་རེར་ཚ་ཚད་ 1.5°C ཡི་སྒང་ལ་བུད་ཟིན་པ་བཤད། ཡིན་ན་ཡང་། དེ་ནི་དུས་ཐུང་ནང་བྱུང་བའི་སྣང་ཚུལ་ཞིག་ལས་བརྟན་འཇགས་རང་བཞིན་ཅན་ཞིག་ད་དུང་ཆགས་མེད་པས། ཕེ་རི་སིའི་གྲོས་ཆོད་ཀྱི་ནང་དོན་དང་འགལ་མེད་པ་བཤད།
ཇི་ལྟར་ཡང་། གོ་ལའི་ཚ་ཚད་ཡར་འཕར་བ་དེ་ནི་རང་བྱུང་གི་སྣང་ཚུལ་དང་། འགྲོ་བ་མིའི་བྱ་སྤྱོད་གཉིས་ཀ་ལས་བྱུང་བ་ཡིན་པ་ངོས་འཛིན་ཅིང་། མིས་བྱེད་ཐུབ་པ་ཞིག་ཡོད་པ་ནི་ཁོར་ཡུག་ལ་གནོད་པའི་རྡོ་སོལ་དང་། རྡོ་སྣུམ། རླངས་རྫས་སོགས་མེར་སྒྲོན་རྒྱུར་གང་ཐུབ་སྙུང་རྒྱུ་དེ་ཡིན་པ་དང་། དེའི་ཆེད་གྲོས་ཆོད་འདྲ་མིན་བཞག་ཀྱང་དོན་ལ་ལོ་སྔོན་མར་དཀྱིལ་ཤར་གྱི་རྡུ་བྷའེ་རུ་ཚོགས་པའི་ཚོགས་འདུའི་སྟེང་།
གཞི་ནས་རྒྱལ་ཁབ་ཚང་མས་ནུས་པའི་(གློག)ཐད་ནས། རྡོ་སོལ་དང་རྡོ་སྣུམ་སོགས་སྲོལ་རྒྱུན་གྱི་ནུས་པའི་འབྱུང་ཁུངས་དག་ལས་རིང་དུ་གྱེས་དགོས་པ་ཐོག་མར་གྲོས་མཐུན། དེ་དང་ལྷན། གློག་རྫས་རླངས་འཁོར་དང་། ཉི་གློག་གི་ཡོ་ཆས་ཧ་ཅང་ཕོན་ཆེན་བཟོ་སྐྲུན་འགོ་བཙུག
ཡིན་ན་ཡང་། དེ་དང་ལྷན་སྐད་ཆ་གསར་བ་ཞིག་ཤུགས་ཆེན་བསླེབས་པ་ནི། ནུས་པའི་འབྱུང་ཁུངས་གཙང་མ་བཟོ་ཆེད། ཡར་རྒྱས་ཕྱིན་ཟིན་པའི་རྒྱལ་ཁབ་ཚོས། ཡར་རྒྱས་འགྲོ་བཞིན་པའི་རྒྱལ་ཁབ་ཚོར་རོགས་སྐྱོར་བྱ་དགོས་པ་དེ་རེད། ད་ལྟ་གློག་དང་ནུས་པའི་དགོས་མཁོ་ཧ་ཅང་ཤུགས་ཆེ་རུ་འགྲོ་བཞིན་པ་དང་། དེའི་རྒྱབ་ཀྱི་རྒྱུ་རྐྱེན་གལ་ཆེན་ཁྲོད་གནས་ཚུལ་གསོག་མཉར་བསྟི་གནས་(Data center)མང་དུ་ཕྱིན་པ་དང་། ལྷག་པར་བཅོས་མའི་རིག་པ་ཡར་རྒྱས་དང་འབྲེལ་ལས་གཞི་ཤུགས་ཆེ་རུ་འགྲོ་བཞིན་པའང་ཡོད་པ་བཤད།
འཛམ་གླིང་གནམ་གཤིས་ཚན་པ་དང་ཡུ་རོབ་ཀྱི་གནམ་གཤིས་ཚན་པས། ཕྱི་ལོ་ 2024 འདི་ནི་(ད་ལྟ་བར་གནམ་གཤིས་ཚ་ཚད་དང་འབྲེལ་གནས་ཚུལ་ཡིག་ཐོ་བཀོད་པ་ནས) གོ་ལའི་གནམ་གཤིས་ཆེས་ཚ་ཤོས་ཀྱི་ལོ་དེར་འགྱུར་སྲིད་པའི་ཉེན་བརྡ་བཏང་། ད་ལོར་རྒྱ་མཚོའི་ཚ་ཚད་འཕར་བ་དང་། འཁྱག་རོམ་ཞུ་བ། རྒྱ་མཚོའི་ཆུའི་ཚད་གཞི་སྐམ་སའི་ངོས་ལ་ཡར་རྒྱས་པ། གོ་ལའི་བྱང་སྣེ་དང་ལོ་སྣེའི་འཁྱག་པ་ཞུ་ཚད་མཐོ་རུ་འགྲོ་བཞིན་པ་དང་། དེའི་མཇུག་འབྲས་སུ་ས་ཁུལ་ཁ་ཤས་སུ་ཆར་བ་ཤུགས་ཆེན་འབབ་པ་དང་། ས་ཁུལ་ཁ་ཤས་སུ་ཆར་བ་འབབ་ཚད་ཉུང་བ། ཚ་རླབས་འཕྱུར་བ་དང་། མཚོ་རླུང་ལྡང་བ་སོགས་ཤུགས་ཆེ་རུ་འགྲོ་བཞིན་པ་བཤད།
ཨ་རི་ནི་རྡོ་སྣུམ་དང་རླངས་རྫས་ཐོན་སྐྲུན་དང་ཕྱིར་ཚོང་མཁན་ཆེ་ཤོས་ཤིག་ཡིན་པའི་ངོས་ནས། གོ་ལའི་གནམ་གཤིས་ཚ་ཚད་དང་འབྲེལ་ཧ་ཅང་གལ་ཆེ་བའི་རྒྱལ་ཁབ་ཅིག་ཡིན་ནའང་། ཐེངས་སྔོན་མར་སྒྲོ་ནལ་ ཁྲི་རམ་ཕུ་སྲིད་འཛིན་ཡིན་སྐབས། ཧྥ་རན་སིའི་རྒྱལ་སར་བཞག་པའི་རྒྱལ་སྤྱིའི་ཁོར་ཡུག་གྲོས་ཆོད་ནས་ཨ་རི་ཕྱིར་འཐེན། ཨ་རི་གྲོས་ཆོད་འདིའི་ཁྲོད་ནས་ཕྱིར་འཐེན་མཁན་རྒྱལ་ཁབ་ཐོག་མ་དེ་གྱུར། ཡིན་ན་ཡང་། བྷ་ཀྲན་སྲིད་སྟེགས་སུ་བསླེབས་མ་ཐག་ཨ་རི་སླར་ཡང་ཕེ་རི་སིའི་གྲོས་མཐུན་ནང་ཕྱིར་འཛུལ། ད་ཐེངས་ཡང་ཁྲི་རམ་ཕུས། ཨ་རི་གྲོས་ཆོད་འདི་ནས་ཕྱིར་འཐེན་འཆར་ཡོད་པ། བདུན་ཕྲག་སྔོན་མའི་གཟའ་ཕུར་བུའི་ཉིན་ནེའུ་ཡོག་དུས་བབ་སྟེང་གནས་ཚུལ་ཞིག་ཐོན།
