ཨ་རིའི་སྤྱི་མཐུན་ཤོག་ཁག་དང་དམངས་གཙོ་ཤོག་ཁག་གི་འཛིན་སྐྱོང་གི་སྐོར་དང་། གྲོས་ཚོགས་གོང་འོག་གི་སྐོར། ད་རེས་ཏེ་སྐབས་ཞེ་བདུན་པར་སྤྱི་མཐུན་ཤོག་ཁག་ལ་དབང་ཆ་ཆེན་པོ་ཐོབ་བཞིན་པའི་ཡོད་པ་བཅས་ཀྱི་གསར་འགྱུར།
ཨ་རིའི་སྲིད་འཛིན་འོས་བསྡུ་ཁྲོད། ནེ་ཝ་རྡ་མངའ་སྡེ་རུ་སྒྲོ་ནལ.ཁྲི་རམ་ཕུ་རྒྱལ། རྒྱལ་ཕམ་ཐག་ཆོད་པའི་མངའ་སྡེ་ཆེན་པོ་ 7 ཡོད་པ་ལས་ 6 ཏུ་སྒྲོ་ནལ་ ཁྲི་རམ་ཕུ་ལ་རྒྱལ་ཁ་ཐོབ་ཅིང་། ད་ལྟ་ཨ་རི་ཛོ་ན་མངའ་སྡེ་རུ་ཁོ་ལ་རྒྱལ་ཁ་ཐོབ་རྒྱུར་གཏན་འཁེལ་ཟིན་པས།
དོན་ལ་ཐེངས་འདིའི་ཨ་རིའི་སྲིད་འཛིན་འོས་བསྡུའི་ཁྲོད། འགྱུར་ཆོག་པའམ་འོས་བསྡུའི་གྲུབ་འབྲས་ཐོག་གཅོད་ཐུབ་པའི་མངའ་ 7 ཚང་མས་སྒྲོ་ནལ་ ཁྲི་རམ་ཕུ་ལ་རྒྱབ་སྐྱོར་བྱས་ཤིང་། ད་ལྟ་བར་ཐོན་པའི་འོས་གྲངས་ལྟར་ན། སྒྲོ་ནལ་ ཁྲི་རམ་ཕུ་ལ་འོས་གྲངས་ 301 ཐོབ་ཅིང་། ཀཱ་མ་ལ་ཧ་རེ་སི་ལ་འོས་གྲངས་ 226 ཐོབ།
མི་གྲངས་ཀྱི་ཆ་ནས་སྒྲོ་ནལ·ཁྲི་རམ་ཕུ་ལ་རྒྱབ་སྐྱོར་བྱེད་མཁན་གྲངས་བྱེ་བ་ 7 དང་ས་ཡ་ 3 ལས་བརྒལ། ཀཱ་མ་ལ་ལ་མི་གྲངས་བྱེ་བ་ 6 དང་ས་ཡ་ 9 ལས་མང་བ་གྱུར་བས། སྒྲོ་ནལ་ ཁྲི་རམ་ ཕུའི་རྒྱལ་ཁ་འདི་ནི་དོན་གྱིས་ལོ་རྒྱུས་རང་བཞིན་ཅན་གྱི་རྒྱལ་ཁ་ཞིག་ཏུ་གྱུར། དེ་བཞིན་འོས་བསྡུའི་རྗེས་སུ་སྲིད་འཛིན་བྷ་ཀྲན་གྱིས་ཐོག་མར་གཏམ་བཤད་བྱས་ཤིང་། ཁོས། འདས་པའི་ལོ་ངོ་ 200 ཡི་རིང་ཨ་རིའི་མང་གཙོའི་ལམ་ལུགས་ཁྲོད་འདི་ལྟར་ཡོང་ཡིན་པ་དང་། ཐེངས་འདིའི་འོས་བསྡུའི་གྲུབ་འབྲས་འདིས། ཨ་རིའི་མང་གཙོ་དང་འོས་བསྡུའི་ལམ་ལུགས་དེ་ཧ་ཅང་དྲང་པོ་དང་། ཕྱི་གསལ་ནང་གསལ་ཡིན་པ་གསལ་བོར་བསྟན་པ་ཞིག་ཡིན་ཚུལ་སོགས་བཤད།
དེ་བཞིན་ཐེངས་འདིར་སྤྱི་མཐུན་ཚོགས་པའི་གྲོས་ཚོགས་གོང་མ་བཟུང་ཟིན་པ་ལྟར། ད་ལྟ་གྲོས་ཚོགས་འོག་མ་འཛིན་སྲིད་པའི་མཚམས་སུ་བསླེབས། གྲོས་ཚོགས་འོག་མར་ཁྱོན་རྐུབ་སྟེགས་ 435 ཡོད་པ་དང་། ད་ལྟ་བར་སྤྱི་མཐུན་ཚོགས་པར་རྐུབ་སྟེགས་ 211 ཐོབ་རྒྱུ་གཏན་འཁེལ་དང་། མང་གཙོ་ཚོགས་པར་རྐུབ་སྟེགས་ 200 ཐོབ་རྒྱུ། གྲོས་ཚོགས་སུ་ཆབ་སྲིད་ཚོགས་པ་ཆེ་ཤོས་དེ་འགྱུར་རྒྱུར་རྐུབ་སྟེགས་ 218 ཀྱིས་འཐུས། གལ་སྲིད་གྲོས་འོག་མ་སྤྱི་མཐུན་ཚོགས་པས་བཟུང་ཚེ། འཛིན་སྐྱོང་དང་ཁྲིམས་བཟོ་ལྷན་ཁང་གཉིས་ཆ་སྤྱི་མཐུན་ཚོགས་པས་བཟུང་ཟིན་པ་ཡིན་ཞིང་། དེ་ལ་མཉམ་དུ་སྦྲེལ་ཟིན་པའི་གཞུང་ཞེས་ཟེར།
འཛིན་སྐྱོང་དང་གྲོས་ཚོགས་གཉིས་ཀ་ཆབ་སྲིད་ཚོགས་པ་གཅིག་རྐྱང་བས་བཟུང་བ་ནི། ཨ་རིའི་ལོ་རྒྱུས་ནང་ཐེངས་མང་བྱུང་ཟིན་པ་དང་། དེ་ནི་ཨོ་བྷ་མ་དང་སྔར་ཁྲི་རམ་ཕུ། བྷ་ཀྲན་གསུམ་གྱི་དུས་ཡུན་རིང་བྱུང་མྱོང་། འདིའི་ཁེ་ཕན་ཆེ་ཤོས་ནི་དུས་ཡུན་དེའི་ནང་སྲིད་འཛིན་དང་དེའི་ཆབ་སྲིད་ཚོགས་པར་ཁྲིམས་འཆར་ཅི་ཞིག་ཡོད་ཀྱང་། ཁྲིམས་འཆར་གང་དེ་རྒྱལ་ཁབ་ཀྱི་གཞི་རྩའི་རྩ་དོན་ལ་གནོད་པ་ཅན་ཞིག་ཡིན་ན་མ་གཏོགས། འགྲོ་ཐུབ་པ་ནི་ཕལ་ཆེར་གཏན་འཁེལ་ཡིན། སྤྱིར་ཨ་རིའི་ལོ་རྒྱུས་ནང་ཆབ་སྲིད་ཚོགས་པ་གཅིག་རྐྱང་བས་ཡོད་ཚད་བཟུང་བའི་སྣང་ཚུལ་འདི་འདྲ་ཐེངས་ 48 བྱུང་ཟིན་པ་དང་། སྤྱི་མཐུན་ཚོགས་པས་ཐེངས་ 25 དང་། མང་གཙོ་ཚོགས་པས་ཐེངས་ 23 བྱུང་ཟིན་པ་བཤད།
བདམས་ཐོན་སྲིད་འཛིན་སྒྲོ་ནལ·ཁྲི་རམ་ཕུས། ཕོ་བྲང་དཀར་པོའི་ལས་བྱེད་དབུ་འཛིན་དུ། ལྕམ་སུ་སེ་ཝེ་ལེ་སི་ Susie Wiles བསྐོ་རྒྱུ་ཐག་བཅད། འདི་ནི་ཁོས་ཆེས་མཐོའི་ལས་བྱེད་ཅིག་བསྐོས་པ་ཐོག་མ་དེ་གྱུར་ཅིང་། ཕོ་བྲང་དཀར་པོའི་ནང་ལོགས་ཀྱི་ལས་དོན་གལ་ཆེན་དག་གི་འགན་བུད་མེད་འདིས་འཁུར་དགོས་པས། ལས་འགན་འདི་ནི་ཧ་ཅང་གལ་ཆེན་ཞིག་ཏུ་འདོད། དེ་བཞིན་གནས་ཚུལ་གཞན་ཞིག་ལ་ཁོའི་རྒྱལ་སྲིད་དྲུང་ཆེ་(ད་ལྟ་བར་འདི་ཀ་ནས་ཕྱི་སྲིད་དྲུང་ཆེ་ཞེས་བྲིས) རུ། གྲོས་ཚོགས་གོང་མའི་འཐུས་མི་མར་ཀོ་རུ་བྷེའོ་( བསྐོ་སྲིད་པ་བཤད། ཡིན་ན་ཡང་། གནས་ཚུལ་འདི་ད་དུང་གཏན་འཁེལ་མེད་པའི་རྣམ་པ་འདུག།
