རང་རྩོམ་རང་གིས་གྱེར་ཀློག་བྱེད་པ་དེ། རང་ཉིད་གྱེར་འདོན་སྒྱུ་རྩལ་པ་ཞིག་ཨེ་ཡོང་ལ་བརྩོན་པ་མིན་པར། རང་ལ་རྒྱུས་མངའ་བའི་འཚོ་བའི་རིན་ཐང་གཤའ་མ་དེ་ཐད་ཀར་ཁྱེད་ཀྱི་སེམས་སུ་གསལ་ལེར་བཞེངས་འདོད་པ་དེའོ། །
---བོད་ཀྱི་སྒྱུ་རྩལ་པ་གྲགས་ཅན་ཞི་བདེ་ཉི་མས།
藏族朗诵平台是藏区最大的朗诵媒体之一,本公众号主要是分享藏族已出版过的一些诗歌、经典朗诵、朗读，小品、故事等。
སྙན་ངག་པའི་ནང་སེམས་ཀྱི་སྐད་ཆ།
གཅོད་པ་མཚོ། མཚོ་སྔོན་པོའི་ནུབ་རྒྱུད་ཀྱི་འབྲོག་སྡེ་ཆེན་པོ་བོང་སྟག་ཏུ་སྐྱེས།
ཆུང་དུས་སློབ་གྲྭར་འགྲིམ་པའི་སྐལ་བ་མ་ལྡན་ཡང་ཀ་མད་སུམ་ཅུའི་རང་མདངས་འབོར་དུ་མ་བཅུག་པར།ལོ་ཟླའི་ཆར་རླུང་གི་རུམ་ཁ་རུ་སྙན་ངག་གི་དྲོད་ཁོལ་མི་ཚེའི་རང་མདངས་སུ་སྒོམ་མཁན་ཞིག
བེའུ་ད་ལྟ་གང་དུ་ཡོད་དམ།
མུན་པའི་གདུག་རྩུབ་ཀྱི་སྡེར་མོ་ཐོགས་པའི་ལུང་གི་རྩུབ་ཤ་དག་སྙིང་ལ་འབབ་བམ
ཨ་མའི་འོ་དྲི
བགོ་སྐལ་གྱིས་ཆད་པའི་ལས་དབང་ལ་ཡི་མུག་སྐྱེའམ
འཇིག་རྟེན་གྱི་རླུང་དང་མུན་པ་སྟུག་ས་དག་ནས
ཁྱོད་ཁོ་ན་གཅན་གཟན་ཚོགས་ཀྱི་མཆེ་བར་ལ་ལྷུང་བའི་ཚིལ་ཁུ་ཙམ་ཡིན་ནམ
ཞེན་ཆགས་ཀྱི་ཕྱི་མིག
མ་ལོའི་བྱམས་བརྩེ་ཡི་པང་ལ་འཐེན་དུས
འཇིག་རྟེན་གྱི་རྒྱུད་སྐུད་མཚར་བོ་འདིའི་ཕག་ན
ཚེ་སྲོག་གིས་བཀྲོལ་མ་ཤེས་པའི་དབྱངས་རྟ་ཅི་ཞིག་ལྷག་འདུག་གམ
བེའུ་ཆུང
ནོར་འཁྲུལ་གང་ཞིག་གི་བློ་ལ
རྨོངས་པའི་ལྕགས་ཀྱིས་བསྐུལ་ཏེ
ཁྱོད་འཇིག་རྟེན་གྱི་སོ་ཁ་ནས་འདི་ལྟར་རྒྱང་ལ་སྤྱུགས་པ་ཅི
རྒྱང་ནས་རྒྱང་ལ་སྤྱུགས་དགོས་པའང་ཅི
ཁྱོད་ཀྱི་རྗེས་ལ་འུར་ལྕག་ཐོགས་པའི་རྫི་བོ
ང་ཡི་འཁྲེང་སེམས་བཞིན
ཁྱོད་འཇིག་རྟེན་གྱི་རླབས་སྣེ་ནས་མེ་ཏོག་ཅིག་ཏུ་བཞད་ཅིང
འཁོར་བའི་ལ་ཐུར་རྩུབ་ས་རུ་མགོ་ལྕོག་ལྡེམ་ནའང
གདུག་རྩུབ་ཀྱིས་འཛིང་པའི་མི་ཡུལ་གྱི་ཁ་རླངས་ནག་པོའི་སྲུབས་བར་ནས
ཇི་འདྲའི་མགོན་མེད་སྐྱབས་མེད་ཅིག
ཇི་འདྲའི་སྐྱབས་མེད་ཉམ་ཆུང་ཞིག
འབྲི་མོའི་བྲེད་ཤ་གང་ཞིག་གི་མིག་ཟུང
སྨྲ་ཤེས་དོན་གོ་ཡི་གདགས་གཞི་ལས་ཡོངས་སུ་བརྒལ་ནའང
འུ་ཐུག་གི་སྤྱོད་པ་གཉོམ་པོས་མི་སེམས་ལ་སྡོམ་ཚིག་བཀོད་ནས་འོང
ཁྱོད་ལ་ཅི་ཁག
ཐ་ན་རྣམ་དཔྱོད་ཀྱི་བློ་མིག་ལྡན་པའི་རྫི་བོ་ང་ལའང
ཁྱོད་ལ་འདི་ཞེས་ཁ་ཕྱོགས་ཤིག་སྟོན་རྒྱུ་མི་འདུག
ཚོད་ཚོད་ལ་མ་སེམས་ཤེས་པའི་སེམས་པ་འདི་ཚལ་བར་གས་ཏེ
རང་གི་མ་འཇོན་པ་ཉེས་པ་དག་ལ་བཤགས་པ་བགྱིས་ནའང
འུ་གཉིས་ཀྱི་བར་ཐག་གིས་ཆོད་པའི་གོ་བརྡ་ལ
རླུང་བུ་ལྡང་ཞིང
འུ་གཉིས་ཀྱི་བར་ཐག་གིས་མ་ཆོད་པའི་སྡུག་བསྔལ་ལ
ཚེར་མ་སྐྱེ་བཞིན་ཡོད
མཐའ་མེད་པའི་རི་ལུང་གི་སྒལ་ཚུགས་སྐྱ་བོ
དྲོད་འཇམ་གྱི་དུས་ཚིགས་ཤིག་ལ
མཐའ་མེད་པའི་མྱ་ངམ་གྱི་འཇིག་རྟེན་བཞིན་ཆེ་ས་ནས
གསར་དུ་འབུས་པའི་ཚེ་སྲོག་གི་གང་བུ་ཆུང་ཆུང་ཁྱོད
སྤྱང་ཚོགས་ཁོ་ནའི་མཆེ་བ་བརྡར་ས་ཡིན་པར་ཐེ་མི་ཚོམ་པའི
ངའི་བྲེད་ཤའི་དྲི་གཞི་ལ་འཇིགས་རུང་གི་ཁྲག་དྲི་བབས་ཤིང
སེམས་ཀྱི་ཁོ་ཐག་ལ་ཡི་མུག་གི་སྐྱོ་བ་མཆེད་ནའང
ཉི་འོད་ཀྱི་ཐུ་སྣེ་བཀྱགས་པའི་དབྱར་གཞུང་གི་ལུང་ཁུག་གང་རུང་ནས
ཁྱོད་རང་ཁྲ་ཤ་ལེ་སེམས་ཀྱི་དྲོད་ཐིག་གིས་བཏེགས་འོང་བའི་སྨོན་ལམ་བཏབ
ཟླ་འོད་ཀྱི་སྐས་རྐང་འཐེན་པའི་ལམ་ཕྲན་གྱི་སྣེ་མོ་འབའ་ཞིག་ནས
ཁྱོད་རང་ཁྲ་དཔལ་ལེར་དཀོན་མཆོག་གི་ཐུགས་བརྩེས་གཉོར་ཡོད་པའི་རེ་བ་བརྒྱབ
བེའུ་ཆུང
འོ་དྲི་དྲན་ནམ
ལྟ་སྐུལ་པ། ཞི་བདེ་ཉི་མ།
གདན་ཞུའི་སྙན་ངག་པ། གཅོད་པ་མཚོ།
རྩོམ་སྒྲིག་པ། ཁྱུང་སྲས་ཀུན་བཟང་།
